1. ¿Tiʼ taj Jehová tuʼn tbʼant quʼn?

IN TZALAJ Jehová aj in kubʼ tyekʼin tkʼujlabʼil tzʼaqli (Os. 6:6). Ex ax jlu taj tuʼn tbʼant kyuʼn tmajen. Ajbʼen profeta Miqueas tuʼn Jehová tuʼn ttzaj tqʼamaʼn tuʼn tkubʼ qyekʼin qkʼujlabʼil tzʼaqli (Miq. 6:8, tqanil, TNM). Pero tuʼn tbʼant jlu quʼn, tnejel kʼelel qnikʼ tiʼj tiʼ aju kʼujlabʼil tzʼaqli.

2. ¿Tiʼ aju kʼujlabʼil tzʼaqli?

² ¿Tiʼ aju kʼujlabʼil tzʼaqli? Qa tzʼaqli tkʼujlabʼil jun xjal, jaku tzʼok tkʼujlaʼn juntl xjal ex kukx ktel ttxlaj te jumajx. In kubʼ tyekʼin Jehová techel qwitz tiʼj kʼujlabʼil lu. Toj xnaqʼtzbʼil lu, qo yolil tiʼj tzeʼn in kubʼ tyekʼin Jehová tkʼujlabʼil tzʼaqli kyiʼj xjal, atzun toj juntl xnaqʼtzbʼil, kʼelel qnikʼ tiʼj tzeʼn jaku tzʼel qkanoʼn tiʼj aj kyok qkʼujlaʼn erman.

3. ¿Tiʼ xi tqʼamaʼn Jehová te Moisés?

³ Tej tzmatoq in nikʼ chʼin ambʼil kyetzlen aj Israel toj tnam Egipto, yolin Jehová tiʼj tbʼi tukʼil Moisés ex kyiʼj tbʼanel tmod. Tqʼama jlu: «Aqine Jehová, aqine Jehová, aqine Dios at nim tqʼaqʼbʼil nkʼuʼje, aqine nim in tzʼeʼy nkʼuʼje, yaj in tzaj ntxʼuʼjile, nim nkʼujlalile, ex axix tok chin yoline. At tqʼaqʼbʼil nkʼuʼje kyiʼj nimku kyiyjil xjal, ex in kubʼ nnajsaʼne kyil qeju in che bʼinchan mya bʼaʼn, qeju kykʼiʼ che niman, ex qeju in che bʼinchan il» (Éx. 34:6, 7).  Kyukʼil tbʼanel yol lu, xi tqʼamaʼn Jehová jun tiʼ nim toklen te Moisés tiʼj tkʼujlabʼil tzʼaqli. Qo xnaqʼtzan tiʼj alkye.

4, 5. a) ¿Tiʼ tqʼama Jehová tiʼjx? b) ¿Alkyeqe xjel kxel qqʼoʼn tzaqʼwebʼil kyiʼj?

⁴ Nya oʼkx xi tqʼamaʼn Jehová te Moisés qa at nim tkʼujlabʼil, sino ax ikx tqʼama qa maʼxix tkʼujlabʼil. Mas te wuq maj tkuʼx txol lu toj Tyol Dios (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Oʼkx tiʼj Jehová in tzaj qʼamaʼn qe txol yol lu ex nya kyiʼj xjal. Tbʼanel tuʼnju in yolin Jehová tiʼj tkʼujlabʼil tzʼaqli. In nel qnikʼ tiʼj qa nim toklen mod lu toj twitz Jehová. * Bʼalo tuʼn jlu tqʼama aj kawil David jlu: «Atzunju tkʼujlalila Nman, max japun pon twitz kyaʼj [...]. Tbʼanilxix tkʼujlalila Nman Dios. Kyjaʼtzun nnoʼkx kyklon kyibʼ qe xjal tjaqʼ t-xikʼa» (Sal. 36:5, 7). Yajtzun qe, ¿in nokpe qqʼoʼn toklen tkʼujlabʼil Jehová ik tzeʼn bʼant tuʼn David?

⁵ Tuʼn tel qnikʼ tiʼj tiʼ t-xilen kʼujlabʼil tzʼaqli, kxel qqʼoʼn tzaqʼwebʼil kyiʼj kabʼe xjel lu: ¿Alqiʼj in kubʼ tyekʼin Jehová tkʼujlabʼil tzʼaqli? Ex ¿tiʼ tbʼanel in tzaj qe tuʼnju in kubʼ tyekʼin Jehová tkʼujlabʼil tzʼaqli qiʼj?

6. ¿Alqiʼj in kubʼ tyekʼin Jehová tkʼujlabʼil tzʼaqli?

⁶ ¿Alqiʼj in kubʼ tyekʼin Jehová tkʼujlabʼil tzʼaqli? In tzaj tqʼamaʼn Biblia qa jaku tzʼok qkʼujlaʼn nim tiʼ ik tzeʼn kawbʼil, «nabʼl», «vin» ex «perjum» (Prov. 12:1; 21:17; 29:3). Pero mlay kubʼ qyekʼin qkʼujlabʼil tzʼaqli kyiʼj tiʼchaq moqa tiʼj jun yol, sino oʼkx jaku kubʼ qyekʼin kyiʼj xjal. ¿Ape t-xilen jlu qa in kubʼ tyekʼin Jehová tkʼujlabʼil tzʼaqli tiʼj alkyexku xjal? Miʼn. Oʼkx in kubʼ tyekʼin kyiʼj xjal at jun tbʼanel kyamiwbʼil tukʼil. Tzʼaqli te Jehová kyukʼil xjal in che ok te tamiw. At jun tbʼanel t-ximbʼetz kyiʼj ex mlayx che kyaj tkolin.

7. ¿Tzeʼn o kubʼ tyekʼin Jehová tkʼujlabʼil kyiʼj kykyaqil xjal?

⁷ O kubʼ tyekʼin Jehová tkʼujlabʼil kyiʼj kykyaqil xjal. Xi tqʼamaʼn Jesús jlu te jun xjal Nicodemo tbʼi: «Tuʼnju nimxix tkʼujlalil Dios kyiʼj xjal, kyjaʼtzun ma chin tzaj samaʼne tuʼn, aqine oʼkxku jun Tkʼwaʼl, tuʼntzun miʼn kynaj kykyaqil qeju ma che okslan wiʼje, noq oʼkx tuʼn tten kychwinqlal te jumajx» (Juan 3:1, 16; Mat. 5:44, 45).

8, 9. a) ¿Tiquʼn in kubʼ tyekʼin Jehová tkʼujlabʼil tzʼaqli kyiʼj tmajen? b) ¿Tiʼ qo xnaqʼtzal tiʼj kyoj junjuntl taqikʼ?

 ⁸ Ik tzeʼn ma qqʼama, oʼkx in kubʼ tyekʼin Jehová tkʼujlabʼil tzʼaqli kyiʼj tmajen. In nel qnikʼ tiʼj jlu tuʼnju atzun tqʼama aj kawil David ex profeta Daniel. Jun techel, kubʼ ttzʼibʼin David jlu: «Kukx qʼontz tkʼujlalila kye qeju ojtzqiʼna kyuʼn». Ax ikx tqʼama qa kukx at kyukʼil «xjal in che niman te». Ex tqʼama Daniel jlu: «Nman Dios, maʼxix toklena ex xobʼajilxixa, [...] in tzaj qʼaqʼan tkʼuʼja kyiʼj qeju in che kʼujlan teya ex in che japun qe tmandamyenta kyuʼn» (Sal. 36:10; 103:17; Dan. 9:4). Tuʼn jlu in nel qnikʼ tiʼj qa in kubʼ tyekʼin Jehová tkʼujlabʼil tzʼaqli kyiʼj tmajen tuʼnju ojtzqiʼn kyuʼn, in che nimen te, in nok kykʼujlaʼn ex in che japun qe tmandamyent kyuʼn. In kubʼ tyekʼin tbʼanel tmod lu kyiʼj tmajen tuʼnju toj tumel in che kʼulin te.

⁹ Tej naʼmxtoq t-xi tzyet tuʼn qajbʼen te Jehová, ya otoq kubʼ tyekʼin tkʼujlabʼil qiʼj (Sal. 104:14). Pero tej t-xi tzyet tuʼn qajbʼen te, mas kubʼ tyekʼin tkʼujlabʼil qiʼj. In tzaj tqʼamaʼn jlu qe: «Aju nkʼujlalile tiʼja mlay chʼexpet» (Is. 54:10). Ikʼ twitz David tiʼj qa ax tok qe yol lu: «Tzʼelkuʼ kynikʼeʼ qa nche tkʼuʼjlaʼn Qman Dyosjuʼ xjal nche niman te» (Sal. 4:3, XT). Yajtzun qe, ¿tiʼ kbʼantel quʼn aj tok qqʼoʼn qwitz tiʼj tkʼujlabʼil Jehová? Tqʼama jun aj tzʼibʼil tiʼj Salmo jlu: «Aju xjal at tnabʼl, bʼaʼn tuʼn tok tkwent tiʼj jlu, ex bʼaʼn tuʼn tel tnikʼ tiʼj tkʼujlalil Qman» (Sal. 107:43). Tuʼn tbʼanel consej lu, qo xnaqʼtzan tiʼj oxe tumel tzeʼn in nonin tkʼujlabʼil Jehová tzʼaqli qiʼj.

10. ¿Tzeʼn in nonin qiʼj aj tel qnikʼ tiʼj qa kʼujlaʼn qoʼ tuʼn Jehová te jumajx? (Salmo 31:7).

¹⁰Te jumajx in ten tkʼujlabʼil Jehová tzʼaqli. Toj Salmo 136, in tzaj qʼamaʼn 26 maj txol yol lu: aju tkʼujlabʼil Jehová tzʼaqli. In tzaj tqʼamaʼn tnejel versículo jlu: «Kyqʼonxe chjonte te Qman tuʼnju bʼaʼnte, ex kukx kʼujlaʼn qoʼ tuʼn te jumajx»  (Sal. 136:1). Kyoj versículo 2 a 26, in tzaj qʼamaʼn jlu: «Tuʼnju kukx kʼujlaʼn qoʼ tuʼn te jumajx». Aj tjaw quʼjin salmo lu, in qo jaw labʼin tiʼj tkʼujlabʼil Jehová in kubʼ tyekʼin qiʼj toj junxichaq tten ex nya noq jun maj in bʼant jlu tuʼn. Aju txol yol «tuʼnju kukx kʼujlaʼn qoʼ tuʼn te jumajx», in tzaj tyekʼin qa mintiʼ in chʼexpaj tkʼujlabʼil Jehová kyiʼj tmajen. In chewix qanmi aj tel qnikʼ tiʼj qa nya jun rat in che kyaj tkolin Jehová qe tmajen. Aju in bʼant tuʼn, kukx in ten kyukʼil qeju in che ajbʼen te ex mas kyoj ambʼil kwest. ¿Tzeʼn in nonin jlu qiʼj? Aj tel qnikʼ tiʼj qa kukx at Jehová qukʼil, in qo tzalaj tuʼn jlu, in tzaj tqʼoʼn qipumal tuʼn qex kywitz nya bʼaʼn ex tuʼn kukx qbʼet toj bʼe te chwinqlal (kjawil uʼjit Salmo 31:7).

11. Ik tzeʼn in tzaj tqʼamaʼn Salmo 86:5, ¿tiquʼn in kubʼ tnajsaʼn Jehová kyil xjal?

¹¹In kubʼ tnajsaʼn Jehová qil tuʼnju tzʼaqli tkʼujlabʼil. Aj tel tnikʼ Jehová tiʼj qa otoq tzʼajtz tiʼj tanmi jun xjal ex qa otoq che bʼant chʼixpubʼil tuʼn, in nonin tkʼujlabʼil tiʼj tuʼn tkubʼ tnajsaʼn til. Toj jun salmo, tqʼama David jlu tiʼj Jehová: «Mintiʼ in kubʼ tqʼoʼn qcastiw ik tzaʼn kyajlal qil ex qe qbʼinchbʼen mya bʼaʼn» (Sal. 103:8-11). Ojtzqiʼntoq tuʼn David tiʼ in kubʼ tnaʼn jun xjal aj tkubʼ tbʼinchaʼn jun nya bʼaʼn. Pero ax ikx el tnikʼ tiʼj qa in kubʼ tnajsaʼn Jehová kyil xjal. Toj jun naʼj Dios, tqʼama David qa in kubʼ tnajsaʼn Jehová kyil xjal tuʼnju at tkʼujlabʼil tzʼaqli kyiʼj (kjawil uʼjit Salmo 86:5).

12, 13. ¿Tiʼ jaku tzʼonin qiʼj qa in tzaj bʼaj qkʼuʼj tuʼnju kubʼ qbʼinchaʼn jun nya bʼaʼn toj ambʼil ojtxe?

¹² Qa in kubʼ qnaʼn nya bʼaʼn aj tkubʼ qbʼinchaʼn jun il, toj tumel jlu ex jaku tzʼonin qiʼj tuʼn tajtz tiʼj qanmi ex tuʼn tok tilil quʼn tuʼn miʼn tkubʼ qbʼinchaʼn juntl maj. Pero ateʼ junjun tmajen Jehová kukx in tzaj kybʼis tuʼnju kubʼ kybʼinchaʼn jun nya bʼaʼn toj ambʼil ojtxe. In che kubʼ sbʼuʼn tuʼn kyanmi ex in kubʼ kyximen qa mlayx kubʼ najsaʼn kyil tuʼn Jehová maske o tzʼajtz tiʼj kyanmi. Qa a jlu in kubʼ tnaʼna, jaku tzʼonin tiʼja aj tel tnikʼa  tiʼj qa taj Jehová tuʼn tkubʼ tyekʼin tkʼujlabʼil tzʼaqli tiʼja.

¹³¿Tzeʼn in nonin qiʼj? Maske aj il qoʼ, jaku qo tzalaj aj qajbʼen te Jehová ex jaku ten qximbʼetz toj txubʼtxaj. ¿Tiquʼn? In tzaj tqʼamaʼn Tyol Dios jlu: «Aju tchkʼel Jesucrist aju Tkʼwaʼl Dios nneʼl ttxʼjoʼn tkyaqilju qil» (1 Juan 1:7). Qa in tzaj bʼaj qkʼuʼj tuʼnju in qo el txalpaj, bʼaʼn tuʼn ttzaj qnaʼn qa taj Jehová tuʼn tkubʼ tnajsaʼn kyil qeju in najtz tiʼj kyanmi. Qo ximen tiʼj tzeʼn kubʼ tyekʼin David qa at toklen kʼujlabʼil tukʼilju aj tkubʼ najsaʼn qil. Kubʼ ttzʼibʼin jlu: «Ik tzaʼn te kyaʼj leqʼch tjaw tibʼaj txʼotxʼ, ax ikx te Dios nim tkʼujlalil kyiʼj qeju in che niman te. Ik tzaʼn tjawitz qʼij ex telex qʼij najchaq kyxol, ax ikxtzun qe qil najchaq ma tzʼel tlaqʼbʼaʼn Dios qiʼj» (Sal. 103:11, 12). Ik tzeʼn ma tzʼel qnikʼ tiʼj, taj Jehová tuʼn tkubʼ tnajsaʼn qil tuʼn tkyaqil tkʼuʼj (Is. 55:7).

14. ¿Tiʼ tqʼama David tiʼj tkʼujlabʼil Jehová?

¹⁴In kolin tkʼujlabʼil Jehová tiʼj qamiwbʼil at tukʼil. Toj jun naʼj Dios, xi tqʼamaʼn David jlu te Jehová: «Aya kolbʼil weye; in chin klete tuʼna tuj xobʼajil, chin bʼitzale tuʼnju at kolbʼil weye tuʼna ex txolin wiʼje tuʼna». Ex tqʼamatl jlu: «Atzun qeju nnoʼk qeʼ kykʼuʼj tiʼj Qman, txolin kyiʼj tuʼn tkʼujlalil» (Sal. 32:7, 10). Toj ambʼil ojtxe, in che kolintoq muro kyiʼj xjal tuʼn miʼn kyok tzoqpaj aj qʼoj kyiʼj. Chʼixme ax jlu in bʼant tuʼn tkʼujlabʼil Jehová, in kolin qiʼj tuʼn miʼn ttzaj nya bʼaʼn tiʼj qamiwbʼil tukʼil. Ex mas in qo ok laqʼeʼ ttxlaj tuʼn tkʼujlabʼil (Jer. 31:3).

15. ¿Tiquʼn in nok tkʼujlabʼil Jehová ik tzeʼn jun kolbʼil ex ik tzeʼn jun ewbʼil qibʼ?

¹⁵ Tqʼama David qe yol lu tiʼj tzeʼn in xqʼuqin Jehová kyiʼj tmajen: «Aya kolbʼil weye; aya Dios aju in kʼujlante weye». Ex tqʼamatl jlu: «At tkʼujlalil wiʼje ex ate kolbʼil wibʼe, ate wewbʼil wibʼe mas maʼ tjax ex tzoqpilte weye; ik tten te weye ik tzaʼn jun maqbʼil in ajbʼen tuj qʼoj ex tukʼil in pon nklon wibʼe» (Sal. 59:17; 144:2). ¿Tiquʼn tqʼama David qa in nok tkʼujlabʼil Jehová ik tzeʼn jun kolbʼil ex ik tzeʼn jun ewbʼil qibʼ? Tuʼnju kukx kxqʼuqil Jehová tiʼj qamiwbʼil at tukʼil qa kukx in qo ajbʼen te ex noq jaxku tumel in qo anqʼin. Atzun jlu in tzaj tqʼamaʼn Salmo 91 qe. Tqʼama aj tzʼibʼil tiʼj Salmo 91 jlu: «Kxel nmaʼne te Qman kyjaʼ: Aya jun ja kyuw bʼinchbʼen te jatum tuʼn tokx nklon wibʼe» (Sal. 91:1-3, 9, 14). Chʼixme ax techel lu ajbʼen tuʼn Moisés (Sal. 90:1). Ex tej chʼixtoq tkyim, tqʼama qe tbʼanel yol lu tiʼj Jehová: «Aju Dios mintiʼ bʼajsbʼil te, atzun klol kyeye, ex qe tqʼabʼ mintiʼ bʼajsbʼil kye atzun tokx kyjaqʼe te tzyul kyeye» (Deut. 33:27). Qo xnaqʼtzan tiʼj tiʼ xnaqʼtzbʼil in tzaj tqʼoʼn qe tiʼj Jehová aju txol yol lu: «Qe tqʼabʼ mintiʼ bʼajsbʼil kye atzun tokx kyjaqʼe».

16. ¿Alkyeqe kabʼe kʼiwlabʼil in tzaj tqʼoʼn Jehová qe? (Salmo 136:23).

¹⁶ Aj qjyon kolbʼil tukʼil Jehová, ya mintiʼ in qo tzaj xobʼ. Maske ikju, atlo maj jaku tzaj bʼaj qkʼuʼj ex jaku tzaj qbʼis. Aj tbʼaj jlu qiʼj, ¿tiʼ in bʼant tuʼn Jehová qiʼj? (kjawil uʼjit Salmo 136:23). Kʼokex tqʼoʼn tqʼabʼ qjaqʼ ex tuʼn kʼujlabʼil qo jawil twaʼbʼan (Sal. 28:9; 94:18). ¿Tzeʼn in nonin jlu qiʼj? Aj qximen tiʼj qa kukx in nonin Jehová qiʼj, in tzaj qnaʼn kabʼe kʼiwlabʼil in tzaj tqʼoʼn Jehová qe. Tnejel, qa kukx kkolil Jehová qiʼj noq jaxku tumel in qo anqʼin. Ex tkabʼin, qa in ximen Jehová qiʼj tuʼnju kʼujlaʼn qo tuʼn.

17. ¿Tiʼ jaku tzʼok qeʼ qkʼuʼj tiʼj? (Salmo 33:18-22).

¹⁷ Ik tzeʼn ma tzʼel qnikʼ tiʼj, jaku tzʼok qeʼ qkʼuʼj tiʼj qa kʼonil Jehová qiʼj tuʼn qten tzʼaqli twitz aj qok weʼ twitz nya bʼaʼn (2 Cor. 4:7-9). Tqʼama profeta Jeremías jlu: «Aju tkʼujlalil Qman mintiʼ bʼajsbʼil te, kyjaʼtzun noq tuʼnju tqʼaqʼbʼil tkʼuʼj, te jumajx naʼnx qnaj tuʼn» (Lam. 3:22). Jaku tzʼok qeʼ qkʼuʼj tiʼj qa kukx kbʼel tyekʼin Jehová tkʼujlabʼil qiʼj tuʼnju tqʼama jun aj tzʼibʼil tiʼj Salmo jlu: «Atzun qeju in che niman te Qman ex in qeʼ kykʼuʼj tiʼj tkʼujlalil, kukx kwentin qe tuʼn» (kjawil uʼjit Salmo 33:18-22).

18, 19. a) ¿Tiʼ bʼaʼn tuʼn ttzaj qnaʼn? b) ¿Tiʼ kʼelel qnikʼ tiʼj toj juntl xnaqʼtzbʼil?

¹⁸ ¿Tiʼ bʼaʼn tuʼn ttzaj qnaʼn? Bʼaʼn tuʼn ttzaj qnaʼn qa tej naʼmxtoq t-xi tzyet tuʼn qajbʼen te Jehová, ya otoq kubʼ tyekʼin tkʼujlabʼil qiʼj. Pero tej t-xi tzyet tuʼn qajbʼen te, kubʼ tyekʼin tkʼujlabʼil tzʼaqli qiʼj. Tuʼn tkʼujlabʼil lu, in qo jaw tchleʼn tuʼntzun t-xqʼuqin qiʼj. Kukx kʼonil qiʼj tuʼn qten ttxlaj ex kjapunel kywi tyol o tzaj ttziyen qe. Taj tuʼn qtzalaj toj qanqʼibʼil (Sal. 46:1, 2, 7). Jaku tzʼok qeʼ qkʼuʼj tiʼj qa tzul tqʼoʼn Jehová qipumal tuʼn qten tzʼaqli twitz aj qok weʼ kywitz nya bʼaʼn.

¹⁹ Ma tzʼel qnikʼ tiʼj tzeʼn in kubʼ tyekʼin Jehová tkʼujlabʼil tzʼaqli kyiʼj tmajen. Tuʼntzunju, ax ikx taj tuʼn tkubʼ kyyekʼin tmajen kykʼujlabʼil tzʼaqli kyxolx. Atzun jlu qo yolil tiʼj toj juntl xnaqʼtzbʼil ex kʼelel qnikʼ tiʼj tzeʼn jaku bʼant quʼn.