XNAQʼTZBʼIL 46
In nonin Jehová qiʼj tuʼn kukx tikʼx quʼn tukʼil tzalajbʼil
«Kyjaʼtzun in ayon Qman kyiʼje tuʼn ttzaj qʼaqʼan tkʼuʼj kyiʼje, ex nimxix tajbʼil tuʼn t-xi tyekʼun tkʼujlalil kyeye» (IS. 30:18).
BʼITZ 3 Aya qʼol qipumale, onil qeye ex qʼuqbʼil qkʼuʼje
AJU KʼELEL QNIKʼ TIʼJ a
1, 2. a) ¿Tiʼ kʼelel qnikʼ tiʼj toj xnaqʼtzbʼil lu? b) ¿Tiquʼn in xi qqʼamaʼn qa taj Jehová tuʼn tonin qiʼj?
JAKU tzʼonin Jehová qiʼj tuʼn kyikʼx nya bʼaʼn quʼn ex tuʼn qajbʼen te tukʼil tzalajbʼil. Toj xnaqʼtzbʼil lu, kʼelel qnikʼ tiʼj tzeʼn in nonin qiʼj ex tiʼ jaku bʼant quʼn tuʼn qtzalaj tiʼj onbʼil in tzaj tqʼoʼn qe. Pero tnejel, qqʼonx tzaqʼwebʼil tiʼj xjel lu: «¿Axpe tok taj Jehová tuʼn tonin qiʼj?».
2 Tuʼn tkanet tzaqʼwebʼil quʼn, qo ximen tiʼj jun yol ajbʼen tuʼn apóstol Pablo toj uʼj te Hebreos. Kubʼ ttzʼibʼin jlu: «Ate Qman onil weye; mlay chin xobʼe. Mintiʼ jun mya bʼaʼn jaku kybʼincha xjal wiʼje» (Heb. 13:6). In tzaj kyqʼamaʼn junjun diccionario tiʼj Tyol Dios qa aju yol «onil», atz in yolin tiʼj jun xjal in xi ojqelan onil te juntl in qanin onbʼil. Qo ximen tiʼj qa in xi ojqelan Jehová onil te jun xjal in nok weʼ twitz nya bʼaʼn. Tuʼn jlu, in nel qnikʼ tiʼj qa nya oʼkx taj Jehová tuʼn tonin qiʼj, sino in bʼant tuʼn tuʼn tkyaqil tanmi. Qa kukx at Jehová qukʼil, jaku tzikʼx alkyexku nya bʼaʼn quʼn tukʼil tzalajbʼil.
3. ¿Alkye oxe tumel in nonin Jehová qiʼj tuʼn kyikʼx nya bʼaʼn quʼn tukʼil tzalajbʼil?
3 ¿Tzeʼn in nonin Jehová qiʼj tuʼn kyikʼx nya bʼaʼn quʼn tukʼil tzalajbʼil? In kanet tzaqʼwebʼil quʼn toj uʼj te Isaías. ¿Tiquʼn? Tuʼnju chʼixme kykyaqil profecía kyaj ttzʼibʼin Isaías, at kyoklen kyukʼil tmajen Jehová toj ambʼil jaʼlo. Ax ikx, nim maj e ajbʼen yol nyaxix kwest tuʼn Isaías tej tyolin tiʼj Jehová. Jun techel, in che ajbʼen junjun tbʼanel techel tuʼn toj capítulo 30 tuʼn ttzaj tqʼamaʼn tzeʼn in nonin Jehová tiʼj ttnam. In tzaj tqʼamaʼn capítulo lu qa in bʼant oxe tiʼ tuʼn. Tnejel, in tzaj tbʼiʼn ex in tzaj ttzaqʼweʼn qnaʼj Dios. Tkabʼin, in kubʼ nej qwitz. Ex toxin, in qo tzaj tkʼiwlaʼn jaʼlo ex toj ambʼil tzul. Qo xnaqʼtzan kyiʼj onbʼil lu in tzaj tqʼoʼn Jehová qe.
IN QO TZAJ TBʼIʼN JEHOVÁ
4. a) ¿Tiʼ tqʼama Jehová kyiʼj judiy toj tqʼijlalil Isaías ex tiʼ bʼaj kyiʼj? b) ¿Tiʼ qʼuqbʼil kykʼuʼj judiy e ten tzʼaqli xi tqʼoʼn Jehová? (Isaías 30:18, 19).
4 Aj t-xi tzyet capítulo 30 te Isaías, tqʼama Jehová qa e ok judiy ik tzeʼn qe «kʼwaʼlbʼaj mibʼan che bʼin» ex qa «chmet nimxix il kyuʼn». Ex tqʼamatl jlu: «Qe xjal lu mibʼan che bʼin, [...] ex mintiʼ kyaj tuʼn t-xi kybʼiʼn aju xnaqʼtzbʼil tuʼn Qman» (Is. 30:1, 9). Tuʼnju mintiʼ e bʼin, tqʼama Isaías qa ktzajel tiʼn Jehová nya bʼaʼn kyiʼj (Is. 30:5, 17; Jer. 25:8-11). Ex atzun jlu bʼaj tuʼnju i ex qʼiʼn toj tnam Babilonia. Noqtzun tuʼnj, e ten junjun judiy tzʼaqli twitz Jehová ex xi tqʼamaʼn Isaías kye qa ktzajeltoq tqʼoʼn Jehová ambʼil kye tuʼn kymeltzʼaj juntl maj toj tnam Jerusalén (kjawil uʼjit Isaías 30:18, 19). Atzun jlu bʼant tuʼn Jehová, pero xi tiʼn ambʼil tuʼn kyetz ttzaqpiʼn toj tnam Babilonia. Aqeju yol «in ayon Qman kyiʼje tuʼn ttzaj qʼaqʼan tkʼuʼj kyiʼje», in tzaj tyekʼin qa iltoq tiʼj tuʼn tkubʼ kyyoʼn jun ambʼil naʼmxtoq kyetz tzaqpiʼn. Tzmaxi e meltzʼaj junjun judiy toj Jerusalén tej otoq tzikʼ 70 abʼqʼi (Is. 10:21; Jer. 29:10). Tej kymeltzʼaj toj kytnam, ya mintiʼ e oqʼ tuʼn bʼis, sino tuʼn tzalajbʼil.
5. ¿Tiʼ in tzaj ttziyen Isaías 30:19 qe?
5 Toj ambʼil jaʼlo, ax ikx in che onin yol lu qiʼj: «Ktzajel tzʼeʼy tkʼuʼj Qman kyiʼje ok tbʼinte in che schʼine ex in che qanine onbʼil» (Is. 30:19). In tzaj tqʼamaʼn Isaías qa kxel tbʼiʼn Jehová qnaʼj Dios ex qa jun rat ktzajel ttzaqʼweʼn. In tzaj tqʼamatl profeta jlu: «Ok kybʼinjtze tuʼn, che tzajel tzaqʼweʼne tuʼn». In tzaj kyyekʼin yol lu qa nya oʼkx taj Jehová tuʼn tonin kyiʼj qeju in xi kyqanin onbʼil te, sino taj tuʼn t-xi tbʼinchaʼn tuʼn tkyaqil tanmi. Aj qximen tiʼj jlu, in nonin qiʼj tuʼn tikʼx quʼn tukʼil tzalajbʼil.
6. Ik tzeʼn in tzaj tqʼamaʼn versículo 19 kyoj uʼj e kubʼ tzʼibʼin tnejel, ¿tzeʼn in nel qnikʼ tiʼj qa in nok tqʼoʼn Jehová twiʼ tiʼj tnaʼj Dios teyele junjun tmajen?
6 Ax ikx, in tzaj tyekʼin versículo lu qa in nok tqʼoʼn Jehová twiʼ tiʼj tnaʼj Dios teyele junjun qe. ¿Tiquʼn in xi qqʼamaʼn jlu? Kyoj tnejel versículo te capítulo 30 te Isaías, in tzaj tqʼamaʼn qa tzaj yolin Jehová kye kykyaqil tmajen. Pero toj versículo 19, tzaj yolin te teyele junjun kye. Jaku txi qqʼamaʼn qa kubʼ tzʼibʼin kyjalu kyoj tnejel uʼj: «Mlay tzʼoqʼa», «ktzajel tqʼoʼn onbʼil teya» ex «tzul tzaqʼweʼna tuʼn». Tuʼnju in nok Jehová te jun mambʼaj at nim tkʼujlabʼil, mintiʼ in xi tqʼamaʼn jlu te jun tkʼwal otoq tzaj bʼaj tkʼuʼj: «Il tiʼj tuʼn tten tipuna ik tzeʼn te termana». Sino in ximen tiʼj teyele junjun qe ex in tzaj ttzaqʼweʼn qnaʼj Dios (Sal. 116:1; Is. 57:15).
¿Tiʼ tajtoq Isaías tuʼn tel qnikʼ tiʼj tej tqʼama qa mintiʼ tuʼn t-xi qqʼoʼn ambʼil te Jehová tuʼn tojlan? (Qʼonka twitza tiʼj párrafo 7).
7. ¿Tzeʼn in tzaj tyekʼin Isaías ex Jesús qa il tiʼj tuʼn kukx qnaʼn Dios?
7 Aj qnaʼn Dios te Jehová tiʼj jun nya bʼaʼn in qo ok weʼ twitz, bʼalo tnejel jaku tzaj tqʼoʼn qipumal tuʼn tikʼx quʼn. ¿Yajtzun qa kukx in qo ok weʼ twitz nya bʼaʼn? Bʼalo il tiʼj tuʼn t-xi qqanin nimku maj te tuʼn ttzaj tqʼoʼn qipumal tuʼn tikʼx quʼn. Ex atzun jlu in tzaj tqʼamaʼn qe tuʼn tbʼant quʼn tej tqʼama Isaías jlu: «Miʼn txi kyqʼoʼne ambʼil te tuʼn tojlan» (Is. 62:7). ¿Tiʼ t-xilen lu? A t-xilen qa il tiʼj tuʼn tok tilil quʼn tuʼn qnaʼn Dios, toj juntl yol, mintiʼ tuʼn t-xi qqʼoʼn ambʼil tuʼn tojlan Jehová. Ex in tzaj tnaʼn jlu qe aju tqʼama Jesús tiʼj naʼj Dios toj Lucas 11:8 a 10 ex 13. Tej tajbʼen junjun techel tuʼn, tzaj tqʼamaʼn qa il tiʼj tuʼn qkubʼsan ex tuʼn kukx txi qqanin xewbʼaj xjan. Ax ikx, jaku txi qqanin te Jehová tuʼn tonin qiʼj tuʼn tjaw qjyoʼn aju mas tbʼanel.
IN TZAJ TYEKʼIN JEHOVÁ QBʼE
8. ¿Tzeʼn e japun kywi yol tkuʼx toj Isaías 30:20 ex 21?
8 (Kjawil uʼjit Isaías 30:20, 21). Toj jun abʼqʼi tukʼil mij, ok kytxolbʼan kyibʼ soldad te tnam Babilonia tiʼj Jerusalén. Toj ambʼil lu, kukx e ok weʼ judiy twitz nim nya bʼaʼn ex tzaj bʼaj kykʼuʼj. Pero xi tqʼamaʼn Jehová kye toj versículo 20 ex 21 qa kʼoniltoq kyiʼj qa ma chʼexpaj kymod. Tqʼama Isaías qa in nok Jehová te «xnaqʼtzal» kye tmajen ex qa kxeltoq tyekʼin kye tzeʼn tuʼn kykʼulin te. Japun kywi yol lu tej kyetz tzaqpiʼn judiy toj tnam Babilonia. Kubʼ tyekʼin Jehová qa ok te Xnaqʼtzal kye. Ex tuʼnju xi tyekʼin kybʼe, e kʼulin juntl maj te ik tzeʼn taj. Toj ambʼil jaʼlo, ax ikx in tzaj tqʼoʼn Jehová xnaqʼtzbʼil qe ex in qo tzalaj tuʼn jlu.
9. ¿Alkye jun tumel in tzaj tqʼoʼn Jehová xnaqʼtzbʼil qe?
9 Tbʼanelxix tuʼnju in tzaj tqʼoʼn Jehová xnaqʼtzbʼil qe. Kyoj versículo lu, in tzaj tqʼamaʼn Isaías qa in tzaj tqʼoʼn Jehová xnaqʼtzbʼil qe toj kabʼe tumel. Tnejel, in tzaj tqʼamaʼn Isaías jlu: «Ok kyilaʼye [xnaqʼtzal kyeye] kyuʼn qe tbʼaqʼ kywitze». Toj techel lu, in tzaj qʼamaʼn qa waʼl xnaqʼtzal kywitz t-alumno. ¿Tzeʼn in tzaj tqʼoʼn Jehová xnaqʼtzbʼil qe toj ambʼil jaʼlo? In tzaj tqʼoʼn tbʼanel xnaqʼtzbʼil qe aj tbʼaj tbʼinchaʼn ttnam qe chmabʼil, qe asamblea, qe quʼj, qe programa te JW Broadcasting® ex toj junjuntl tten. In nonin tkyaqil xnaqʼtzbʼil lu qiʼj tuʼn qtzalaj aj qok weʼ twitz nya bʼaʼn.
10. ¿Alkye tten in nok qbʼiʼn tqʼajqʼajel twiʼ Jehová qiʼjxi?
10 In tzaj tyekʼin Isaías juntl tumel tzeʼn in tzaj tqʼoʼn Jehová xnaqʼtzbʼil qe aj ttzaj tqʼamaʼn jlu: «Ok kybʼiʼye jun tqʼajqʼajel kyiʼjtzeye». Kyukʼil yol lu, in nel qnikʼ tiʼj qa in nok Jehová ik tzeʼn jun xnaqʼtzal at kyiʼjxi t-alumno ex in xi tyekʼin kye jatumel tuʼn kyxiʼ. ¿Alkye tten in nok qbʼiʼn tqʼajqʼajel twiʼ Jehová qiʼjxi toj ambʼil jaʼlo? In nok qbʼiʼn aj tjaw quʼjin Biblia tuʼnju tyol tkuʼx toj. Tuʼntzunju, aj tjaw quʼjin in nok ik tzeʼn in tzaj yolin Jehová qiʼjxi tuʼnju kubʼ tzʼibʼin toj ambʼil ojtxe (Is. 51:4).
11. ¿Tiʼ il tiʼj tuʼn tbʼant quʼn tuʼn kukx tikʼx quʼn tukʼil tzalajbʼil ex tiquʼn?
11 ¿Tiʼ jaku bʼant quʼn tuʼntzun tonin xnaqʼtzbʼil in tzaj tqʼoʼn Jehová qe toj ttnam ex toj Tyol? In tzaj tqʼamaʼn Isaías qa jaku bʼant kabʼe tiʼ quʼn. Tnejel, in tzaj tqʼamaʼn «lu ju bʼe lu» ex tkabʼin, «kyxiʼye tuj» (Is. 30:21). Tuʼntzunju, nya oʼkx tuʼn tok qojtzqiʼn bʼe, sino il tiʼj tuʼn qxiʼ toj. In nonin Tyol Dios qiʼj ex qe xnaqʼtzbʼil o che etz tuʼn ttnam Jehová tuʼn tel qnikʼ tiʼjju taj tuʼn tbʼant quʼn ex tzeʼn tuʼn tkubʼ qqʼoʼn toj xnaqʼtzbʼil. Il tiʼj tuʼn kybʼant kabʼe tiʼ lu quʼn tuʼntzun qajbʼen te Jehová tukʼil tzalajbʼil. Qa ma bʼant jlu quʼn, qo tzajel tkʼiwlaʼn.
IN QO TZAJ TKʼIWLAʼN JEHOVÁ
12. Ik tzeʼn in tzaj tqʼamaʼn Isaías 30:23 a 26, ¿tzeʼn tzaj tkʼiwlaʼn Jehová qe tmajen?
12 (Kjawil uʼjit Isaías 30:23-26). ¿Tzeʼn japun twi profecía lu toj ambʼil ojtxe? Kykyaqil judiy i etz toj Babilonia ex e meltzʼaj toj Israel, tzaj kykʼamoʼn nim kʼiwlabʼil ex onin jlu kyiʼj tuʼn kukx kyajbʼen te Jehová. Tzaj qʼoʼn nim kywa, pero ax ikx bʼaj juntl tiʼ mas nim toklen. Tzaj tqʼoʼn Jehová xnaqʼtzbʼil kye tuʼntzun kykʼulin te ik tzeʼn taj. Naʼmxtoq ttzaj kykʼamoʼn nim kʼiwlabʼil ik tzeʼn toj ambʼil aju. Ik tzeʼn in tzaj tqʼamaʼn versículo 26, ten mas spikʼun tuʼn Jehová, toj juntl yol, onin kyiʼj tmajen tuʼn tel kynikʼ tiʼj Tyol (Is. 60:2). Tuʼnju tzaj kykʼamoʼn kʼiwlabʼil lu, e tzalaj ex ten kyipumal tuʼn kukx kyajbʼen te. Chikʼlixix taʼ qa kubʼ kynaʼn nim tzalajbʼil (Is. 65:14).
13. ¿Tzeʼn o japun twi profecía tiʼjju tuʼn tten juntl maj kʼulbʼil axix tok toj ambʼil jaʼlo?
13 Yajtzun toj ambʼil jaʼlo, ¿ope japun twi profecía tiʼjju tuʼn tten juntl maj kʼulbʼil axix tok? Oje. Atxix toj 1919, o che etz nim millón xjal toj Nintz tnam Babilonia, toj juntl yol, qe okslabʼil nya axix tok. Ex o che okx toj jun lugar mas tbʼanel twitz Txʼotxʼ Tziyen maj, aju paraíso espiritual (Is. 51:3; 66:8). ¿Alqiʼj in qo yolin aj t-xi qqʼamaʼn paraíso espiritual?
14. ¿Alqiʼj in qo yolin aj t-xi qqʼamaʼn paraíso espiritual ex alkyeqe o che okx toj? (Ax ikx qʼonka twitza tiʼj tqanil).
14 Atxix toj 1919, o che okx skʼoʼn maj toj paraíso espiritual. b Tej tbʼet ambʼil, ax ikx o che okx txqantl ẍneʼl ex o tzaj qʼoʼn nim kʼiwlabʼil kye tuʼn Jehová (Juan 10:16; Is. 25:6; 65:13).
15. ¿Jatumel taʼ paraíso espiritual?
15 ¿Jatumel taʼ paraíso espiritual toj ambʼil jaʼlo? Jaku txi qqʼamaʼn qa twitz tkyaqil Txʼotxʼ tuʼnju in che anqʼin tmajen Jehová toj kykyaqil tnam. Tuʼntzunju, noq jaxku tumel in qo anqʼin, jaku qo okx toj paraíso espiritual qa ma qo onin tuʼn tkyaqil qanmi tiʼj kʼulbʼil axix tok.
¿Tiʼ jaku bʼant tuʼn teyele junjun qe tuʼn tok paraíso espiritual te mas tbʼanel? (Qʼonka twitza tiʼj párrafo 16 ex 17).
16. ¿Tiʼ il tiʼj tuʼn tbʼant quʼn tuʼn kukx tok qqʼoʼn qwitz tiʼj mujbʼabʼil at toj ttnam Jehová?
16 Tuʼn kukx qten toj paraíso espiritual, il tiʼj tuʼn tok qqʼoʼn toklen ttnam Jehová. ¿Tzeʼn in bʼant jlu quʼn? In bʼant quʼn aj tok qqʼoʼn qwitz tiʼj tbʼanel kymod erman ex nya tiʼj kypaltil (Juan 17:20, 21). ¿Tiquʼn nim toklen tuʼn tbʼant jlu quʼn? Qo ximen tiʼj jun techel. Jaku che kanet junxichaq tzeʼ quʼn toj jun bosque. Ax jlu in bʼaj toj paraíso espiritual, junxichaq kymod erman at ex in che ok ik tzeʼn qe tzeʼ (Is. 44:4; 61:3). Tuʼntzunju, miʼn tzʼok qqʼoʼn qwitz tiʼj tpaltil jun «tzeʼ», tuʼnju qa ma bʼant jlu quʼn, mlay tzʼok qqʼoʼn qwitz tiʼj tbʼanel «bosque». Toj juntl yol, miʼn txi qqʼoʼn ambʼil kye qpaltil moqa kye kypaltil txqantl tuʼn tel tiʼn ambʼil qe tuʼn tok qqʼoʼn qwitz tiʼj mujbʼabʼil at toj ttnam Jehová.
17. ¿Tiʼ jaku bʼant tuʼn teyele junjun qe tuʼn kukx tten mujbʼabʼil toj congregación?
17 ¿Tiʼ jaku bʼant tuʼn teyele junjun qe tuʼn kukx tten mujbʼabʼil qxol? Bʼaʼn tuʼn qjyon tiʼj mujbʼabʼil (Mat. 5:9; Rom. 12:18). Aj tok tilil quʼn tuʼn qten bʼaʼn kyukʼil erman toj congregación, in qo onin tuʼn tok paraíso espiritual te tbʼanel. In tzaj qnaʼn qa a Jehová o txi qʼonte txokbʼil kye kykyaqil erman tuʼn kykʼulin te (Juan 6:44). Nim kyoklen tmajen Jehová toj twitz, tuʼntzunju in kubʼ tnaʼn nim tzalajbʼil aj tok tkeʼyin qa in nok tilil quʼn tuʼn tten mujbʼabʼil qxol (Is. 26:3; Ageo 2:7).
18. ¿Alqiʼj kukx tuʼn qximen ex tiquʼn?
18 ¿Tiʼ jaku bʼant quʼn tuʼntzun qtzalaj kyiʼj kʼiwlabʼil in tzaj tqʼoʼn Jehová kye tmajen? Bʼaʼn tuʼn qximen tiʼjju in tzaj t-xnaqʼtzaʼn qe toj Tyol ex kyoj quʼj. Qa ma qo ximen tiʼjju in jaw quʼjin, che tel tbʼanel qmod ex kbʼel qyekʼin qkʼujlabʼil kyiʼj txqantl toj congregación (Rom. 12:10). Aj qximen kyiʼj kʼiwlabʼil in che tzaj qkʼamoʼn jaʼlo, in chʼiy qamiwbʼil tukʼil Jehová. Ex aj qximen kyiʼj kʼiwlabʼil che tzajel qkʼamoʼn toj ambʼil tzul, kʼonil qiʼj tuʼn kukx qajbʼen te tukʼil tzalajbʼil te jumajx.
BʼAʼN TUʼN KUKX TIKʼX QUʼN
19. a) Ik tzeʼn in tzaj tqʼamaʼn Isaías 30:18, ¿tiʼ jaku tzʼok qeʼ qkʼuʼj tiʼj? b) ¿Tiʼ jaku tzʼonin qiʼj tuʼn kukx tikʼx quʼn tukʼil tzalajbʼil?
19 Kkolil Jehová qiʼj aj tkubʼ tnajsaʼn tkyaqil nya bʼaʼn (Is. 30:18). Tuʼnju in nok Jehová te «jun Dios tzʼaqlxix», o kubʼ t-ximen alkye qʼij tuʼn tkubʼ tnajsaʼn tkyaqilju tokx tjaqʼ tkawbʼil Satanás ex mlay txi tqʼoʼn mas ambʼil te (Is. 25:9). Ik tzeʼn te Jehová, bʼaʼn tuʼn tten qpasens akux in pon qʼij tuʼn qklet. Akux in pon ambʼil lu, bʼaʼn tuʼn kukx tkubʼ qbʼinchaʼn aju in nel qnikʼ tiʼj, tuʼn tok qqʼoʼn toklen naʼj Dios, qe kʼiwlabʼil in che tzaj qkʼamoʼn ex aju ambʼil tuʼn qxnaqʼtzan tiʼj Biblia. Qa kukx ma bʼant tkyaqil jlu quʼn, kʼonil Jehová qiʼj tuʼn tikʼx quʼn ex tuʼn qajbʼen te tukʼil tzalajbʼil.
BʼITZ 142 Qeʼk qkʼuʼj tiʼj oyaj
a Toj xnaqʼtzbʼil lu, qo yolil kyiʼj oxe tiʼ in bʼant tuʼn Jehová tuʼn tonin kyiʼj tmajen tuʼn tikʼx nya bʼaʼn kyuʼn tukʼil tzalajbʼil. Tuʼntzunju, qo xnaqʼtzal tiʼj capítulo 30 te Isaías. Ax ikx, kʼelel qnikʼ tiʼj tiquʼn nim toklen tuʼn qnaʼn Dios te Jehová, tuʼn qxnaqʼtzan tiʼj Tyol, tuʼn qximen kyiʼj kʼiwlabʼil in che tzaj qkʼamoʼn jaʼlo ex qeju che tzajel qkʼamoʼn toj ambʼil tzul.
b YOL NIM TOKLEN: Aj t-xi qqʼamaʼn paraíso espiritual, atz in qo yolin tiʼj mujbʼabʼil at qxol aj qkʼulin te Jehová. Toj lugar lu, in tzaj qkʼamoʼn nim xnaqʼtzbʼil tiʼj Tyol Dios ex mintiʼ jun nya ax tok xnaqʼtzbʼil tkuʼx toj. Ex in qo tzalaj tiʼj jun tbʼanel aqʼuntl, aju tuʼn qpakbʼan tiʼj tbʼanel tqanil tiʼj Tkawbʼil Dios. Ax ikx, at jun tbʼanel qamiwbʼil tukʼil Jehová ex at mujbʼabʼil qxol kyukʼil erman, aqeju kʼujlaʼn qoʼ kyuʼn ex in che onin qiʼj tuʼn qex kywitz nya bʼaʼn. In qo okx toj paraíso espiritual aj qkʼulin te Jehová ik tzeʼn taj ex aj tok tilil quʼn tuʼn tel qkanoʼn tiʼj.