1. ¿Tiquʼn ojtzqiʼn quʼn qa taj Jehová tuʼn qten nqayin ttxlaj?

 IN TZAJ tqʼoʼn Jehová txokbʼil qiʼj tuʼn qten nqayin ttxlaj (Sant. 4:8). Taj tuʼn tok te Qdios, te Qman ex te Qamiw. In tzaj ttzaqʼweʼn qe qnaʼj Dios ex in nonin qiʼj aj qok weʼ kywitz nya bʼaʼn. Ax ikx, in qo tzaj t-xnaqʼtzaʼn ex in najbʼen ttnam tuʼn tuʼn qok t-xqʼuqin. ¿Tiʼ il tiʼj tuʼn tbʼant quʼn tuʼn kukx qten nqayin ttxlaj?

2. ¿Tzeʼn jaku qo ok laqʼeʼ ttxlaj Jehová?

² Jaku qo ok laqʼeʼ ttxlaj Jehová aj qnaʼn Dios, aj quʼjin tiʼj Tyol ex aj qximen tiʼj. Kʼonil jlu qiʼj tuʼn tok qkʼujlaʼn ex tuʼn t-xi qqʼoʼn chjonte te. Ax ikx, kʼonil qiʼj tuʼn qnimen te ex tuʼn tjaw qnimsaʼn (Apoc. 4:11). Qa mas ma tzʼok qojtzqiʼn, mas kʼokel qeʼ qkʼuʼj tiʼj ex tiʼj ttnam.

3. a) ¿Tzeʼn in nok tilil tuʼn Satanás tuʼn qel tpaʼn tiʼj Jehová? b) ¿Tiʼ jaku tzʼonin qiʼj tuʼn miʼn tkyaj qkolin Jehová ex ttnam? (Salmo 31:13, 14).

³ In nok tilil tuʼn Satanás tuʼn qel tpaʼn tiʼj Jehová ex mas aj qok weʼ kywitz nya bʼaʼn. ¿Tzeʼn in bʼant jlu tuʼn? In nok tilil tuʼn tuʼn ya miʼn tok qeʼ qkʼuʼj tiʼj Jehová ex tiʼj ttnam. Pero jaku kubʼ tiʼj quʼn. Mlayx kyaj qkolin Jehová ex ttnam qa ma tzʼok qeʼ qkʼuʼj tiʼj ex qa kyuw atoʼ toj qokslabʼil (kjawil uʼjit Salmo 31:13, 14).

4. ¿Tiʼ qo yolil tiʼj toj xnaqʼtzbʼil lu?

 ⁴ Toj xnaqʼtzbʼil lu, qo yolil tiʼj oxe tiʼ jaku tzʼel kyiʼn ambʼil qe tuʼn tok qeʼ qkʼuʼj tiʼj Jehová ex tiʼj ttnam. ¿Tzeʼn jaku qo el kypaʼn tiʼj Jehová? ¿Ex tiʼ jaku bʼant quʼn tuʼn tkubʼ tiʼj Satanás quʼn?

5. ¿Tzeʼn jaku qo el kypaʼn nya bʼaʼn tiʼj Jehová ex tiʼj ttnam?

⁵ Atlo maj jaku qo el ikʼun kyuʼn toj qja moqa jaku tzʼel qʼiʼn qaqʼun. ¿Tzeʼn jaku qo el kypaʼn nya bʼaʼn lu tiʼj Jehová ex tiʼj ttnam? Aj qok weʼ twitz jun nya bʼaʼn toj nim ambʼil, jakulo kubʼ qximen qa mlayx qo ex twitz. Toj ambʼil lu, in nok tilil tuʼn Satanás tuʼn tkubʼ qximen qa nya kʼujlaʼn qoʼ tuʼn Jehová. Taj tuʼn tkubʼ qximen qa tuʼn Jehová ex tuʼn ttnam in che tzaj nya bʼaʼn qiʼj. Chʼixme ax jlu bʼaj kyiʼj xjal te Israel e anqʼin toj Egipto. Tnejel, kubʼ kyximen qa otoq jaw tskʼoʼn Jehová Moisés ex Aarón tuʼn tkolin kyiʼj (Éx. 4:29-31). Pero tzaj kyqʼoj kyiʼj tej tok tbʼinchaʼn faraón mas nya bʼaʼn kyiʼj ex xi kyqʼamaʼn jlu kye: «Tuʼn kylaje ma qo el ikʼune tuʼn Faraón ex kyuʼn qe tmayordom. Mer ik tzaʼn jun spad o txi kyqʼoʼne tuj kyqʼabʼ tuʼn qkubʼ bʼyoʼne kyuʼn» (Éx. 5:19-21). Bʼisbʼajilxix tuʼnju ok kyqʼoʼn kypaj tmajen Jehová. Qa o tzikʼ ambʼil in nok weʼya twitz jun nya bʼaʼn, ¿tiʼ jaku bʼant tuʼna tuʼn kukx tok qeʼ tkʼuʼja tiʼj Jehová ex tiʼj ttnam?

6. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Habacuc? (Habacuc 3:17-19).

⁶ Qʼamanxa aju tkuʼx toj tanmiya te Jehová ex qeʼk tkʼuʼja tiʼj. Ok weʼ profeta Habacuc kywitz nimku nya bʼaʼn. Toj jun ambʼil, mintiʼ ok qeʼ tkʼuʼj tiʼj qa in ximen Jehová tiʼj. Tuʼntzunju, xi tqʼamaʼn te Jehová tkyaqilju kubʼ tnaʼn. Tqʼama jlu: «Nman, ¿Jteʼ maj chin qanile onbʼil teya ex mintiʼ in chin tzaj tbʼiʼna? [...] ¿Tiquʼn taja tuʼn tikʼ nwitze tiʼj yajbʼil?» (Hab. 1:2, 3). Tzaj ttzaqʼweʼn Jehová tnaʼj Dios Habacuc (Hab. 2:2, 3). Tej t-ximen tiʼj tzeʼn kolin Jehová tiʼj ttnam, tzalaj juntl maj. Ok qeʼ tkʼuʼj tiʼj qa in ximen Jehová tiʼj ex qa kʼonil tiʼj aj tok weʼ twitz nya bʼaʼn (kjawil uʼjit Habacuc 3:17-19). ¿Tiʼ xnaqʼtzbʼil jaku tzʼel qiʼn tiʼj jlu? Aj tok weʼya twitz jun nya bʼaʼn, naʼna Dios te Jehová, qʼamanxa te aju in kubʼ tnaʼna ex qeʼk tkʼuʼja tiʼj. Jaku tzʼok qeʼ tkʼuʼja tiʼj qa tzul tqʼoʼn tipumala tuʼn tikʼx tuʼna. Ex aj tok tkeʼyina tzeʼn in nonin tiʼja, mas kchʼiyel qʼuqbʼil tkʼuʼja.

7. ¿Tiʼ bʼant tuʼn jun tfamiliar Shirley ex tiʼ onin tiʼj tuʼn kukx tok qeʼ tkʼuʼj tiʼj Jehová?

⁷ Kukx bʼinchama qe tiʼchaq in che onin tiʼja tuʼn ttena nqayin ttxlaj Jehová. Atzun jlu onin tiʼj jun ermana Shirley tbʼi te tnam Papúa Nueva Guinea tej tok weʼ twitz nya bʼaʼn. b Nyatoq nim kypwaq at ex kwesttoq tuʼn tkanet twiʼ kywa. Ok tilil tuʼn jun tfamiliar tuʼn ya miʼn tok qeʼ tkʼuʼj tiʼj Jehová tej t-xi tqʼamaʼn jlu te: «In tzaj tqʼamaʼna qa in nonin xewbʼaj xjan tiʼja, pero mintiʼ in nok nkeʼyine jlu tuʼnju mintiʼ kypwaqe. Noqx gan in pakbʼana». In tzaj tqʼamaʼn Shirley qa toj jun ambʼil mintiʼ ok qeʼ tkʼuʼj tiʼj qa ax tok in ximen Jehová tiʼj ex kyiʼj toj tja. Tqʼama jlu: «Jun rat in naʼne Dios te Jehová ex  xi nqʼamaʼne te aju tkuʼx toj wanmiye. Kukx jaw wuʼjine Tyol ex qe uʼj in che etz tuʼn ttnam. Ok tilil wuʼne tuʼn kukx npakbʼane ex in xiʼye kyoj chmabʼil». Ok tqʼoʼn Shirley twitz tiʼj qa xqʼuqin Jehová kyiʼj tuʼnju mintiʼ ikʼx weʼyaj kyuʼn ex e tzalaj. Tqʼamatl jlu: «Ok nkeʼyine tzeʼn tzaj ttzaqʼweʼn Jehová nnaʼj Diose» (1 Tim. 6:6-8). Qa kukx ma tzʼok laqʼeʼya ttxlaj Jehová, mlayx tzʼel tpan tibʼa tiʼj aj tok weʼya twitz nya bʼaʼn.

8. ¿Tiʼ jaku bʼaj kyiʼj erman at kyoklen toj ttnam Jehová?

⁸ At maj, in najbʼen noticia ex redes sociales kyuʼn aj qʼoj tuʼn ttzaj kyqʼamaʼn nya ax tok tqanil kyiʼj erman at kyoklen toj ttnam Jehová (Sal. 31:13). O che okx qʼoʼn junjun erman toj cárcel ex o tzaj qʼamaʼn qa at kyil. Chʼixme ax jlu bʼaj toj tnejel syent abʼqʼi. Xi qʼamaʼn nya ax tok yol tiʼj apóstol Pablo ex okx qʼoʼn toj cárcel maske mintiʼ til. ¿Tiʼ bʼant kyuʼn okslal toj ambʼil aju?

9. ¿Tiʼ bʼant kyuʼn junjun okslal tej tokx qʼoʼn Pablo pres?

⁹ Tej tokx qʼoʼn Pablo pres toj tnam Roma, ateʼ junjun erman el kypan kyibʼ tiʼj (2 Tim. 1:8, 15). ¿Tzajpe kychʼixwi tiʼj Pablo tuʼnju xi qʼamaʼn qa at til? (2 Tim. 2:8, 9). ¿Moqa e tzaj xobʼ tuʼnju kubʼ kyximen qa ax ikx kye che elel ikʼun? Noq tiʼxku bʼaj, tzaj tbʼis Pablo kyuʼn. Otoq tzikʼx nim nya bʼaʼn tuʼn tuʼn tonin kyiʼj, axpe ikx chʼixme kyim (Hech. 20:18-21; 2 Cor. 1:8). Nya qaj tuʼn qok ik tzeʼn kye okslal lu tuʼnju mintiʼ e onin tiʼj Pablo tej tajtoq onbʼil. ¿Tiʼ bʼaʼn tuʼn ttzaj qnaʼn aj kyel ikʼun erman in che kubʼ nej twitz aqʼuntl?

10. ¿Tiʼ bʼaʼn tuʼn ttzaj qnaʼn aj kyel ikʼun erman in che kubʼ nej twitz aqʼuntl ex tiquʼn?

¹⁰ Bʼaʼn tuʼn ttzaj qnaʼn tiquʼn in qo el ikʼun ex alquʼn in qo el ikʼun. In tzaj tqʼamaʼn  2 Timoteo 3:12 jlu: «Kykyaqil qeju kyajbʼil kukx tuʼn kynimante Jesucrist, ok che yajlanjtzel». Tuʼntzunju, mintiʼ tuʼn qjaw labʼin aj tel qnikʼ tiʼj qa taj Satanás tuʼn tok tbʼinchaʼn nya bʼaʼn kyiʼj erman in che kubʼ nej twitz aqʼuntl. Taj tuʼn tkyaj kytzaqpiʼn erman lu kyajbʼebʼil te Jehová tuʼntzun ttzaj bʼaj qkʼuʼj (1 Ped. 5:8).

11. ¿Tiʼ xnaqʼtzbʼil in nel qiʼn tiʼj techel kyaj tqʼoʼn Onesíforo? (2 Timoteo 1:16-18).

¹¹ Kukx qo onin kyiʼj erman qʼil twitz aqʼuntl tuʼn tkyaqil qkʼuʼj (kjawil uʼjit 2 Timoteo 1:16-18). Toj tnejel syent abʼqʼi, ten jun okslal onin tiʼj Pablo tej tokx qʼoʼn toj cárcel. Onesíforo tbʼi ex tqʼama Pablo jlu tiʼj: «Mintiʼ o chʼixwi wiʼje tej ntene tuj pres». Ok tilil tuʼn Onesíforo tuʼn tkanet Pablo tuʼn ex tuʼn t-xi tqʼoʼn onbʼil te. Axpe ikx bʼant jlu tuʼn maske jakutoq kyim. ¿Tiʼ xnaqʼtzbʼil in nel qiʼn tiʼj jlu? Qa mintiʼ tuʼn qtzaj xobʼ kywitz txqantl ex qo onin kyiʼj erman in che el ikʼun. Bʼaʼn tuʼn tok tilil quʼn tuʼn qonin kyiʼj ex tuʼn qkolin kyiʼj (Prov. 17:17). Kyaj erman lu tuʼn kukx kyok qkʼujlaʼn ex tuʼn qonin kyiʼj.

12. ¿Tiʼ xnaqʼtzbʼil jaku tzʼel qiʼn kyiʼj erman te Rusia?

¹² Qo ximen tiʼjju in bʼant kyuʼn erman te Rusia aj tokx qʼoʼn juntl erman toj cárcel. Aj kyxiʼ yolil kywitz jwes, ateʼ nim erman in cheʼx kyukʼil tuʼn kyonin kyiʼj. ¿Tiʼ xnaqʼtzbʼil in nel qiʼn tiʼj jlu? Qa mintiʼ tuʼn qtzaj xobʼ aj kyyolin aj qʼoj nya bʼaʼn kyiʼj erman at kyoklen, aj kyokx qʼoʼn toj cárcel moqa aj kyel ikʼun. Bʼaʼn tuʼn qnaʼn Dios kyiʼj, tuʼn qonin kyiʼj ex kyiʼj toj kyja (Hech. 12:5; 2 Cor. 1:10, 11).

13. ¿Tzeʼn jaku jawje qkʼuʼj kyuʼn xjal tiʼj Jehová ex tiʼj ttnam aj kyxmayin qiʼj?

¹³ Jakulo che xmayin qfamiliar qiʼj, junjun qukʼil toj aqʼuntl moqa toj escuela tuʼnju in qo pakbʼan moqa tuʼnju in nok qqʼoʼn toklen tkawbʼil Jehová (1 Ped. 4:4). Jakulo tzaj kyqʼamaʼn jlu qe: «Bʼaʼn in nela tmoda toj nwitze, pero nya ngane tokslabʼila». Atzun junjuntl, jakulo che yolin nya bʼaʼn qiʼj tuʼnju mintiʼ in qox yolin kye qeju o che ex expulsarin ex jakulo tzaj kyqʼamaʼn qe: «Nya ax tok kʼujlaʼn qe txqantl kyuʼne». Aj tok qbʼiʼn jlu, jakulo jawje qkʼuʼj ex jakulo kubʼ qxjelin: «¿Axpe tok in tzaj tqanin Jehová tuʼn tbʼant nim tiʼchaq wuʼne? ¿Nimpe kawbʼil in tzaj tqʼoʼn ttnam?». Qa a jlu in bʼaj tiʼja, ¿tiʼ jaku bʼant tuʼna tuʼn miʼn tel tpan tibʼa tiʼj Jehová ex tiʼj ttnam?

14. ¿Tiʼ qmod kbʼel qyekʼin qa in che xmayin txqantl qiʼj tuʼnju in chex qbʼiʼn qe tley Jehová? (Salmo 119:50-52).

¹⁴ Bʼaʼn tuʼn tok qeʼ qkʼuʼj tiʼj qa tbʼanel qe tkawbʼil Jehová. Ok qeʼ tkʼuʼj Job kyiʼj tkawbʼil Jehová maske e xmayin txqantl tiʼj. Xi tqʼamaʼn jun nya ax tok tamiw Job te qa mintiʼ in nok tqʼoʼn Dios twitz tiʼjju in bʼant tuʼn (Job 4:17, 18; 22:3). Pero mintiʼ xi tokslaʼn Job jlu. Ok qeʼ tkʼuʼj tiʼj qa tbʼanel qe tkawbʼil Jehová tiʼj bʼaʼn ex tiʼj nya bʼaʼn, ex ok lepeʼ kyiʼj. Mintiʼ xi tbʼiʼn kyyol txqantl ex ten tzʼaqli twitz Dios (Job 27:5, 6). ¿Tiʼ xnaqʼtzbʼil jaku tzʼel qiʼn tiʼj? Qa mintiʼ tuʼn t-xi qqʼoʼn ambʼil tuʼn tjawje qkʼuʼj kyiʼj tkawbʼil Jehová aj kyxmayin txqantl qiʼj. Bʼaʼn tuʼn qximen tiʼj tzeʼn taʼ qanqʼibʼil tuʼnju in chex qnimen  tkawbʼil Jehová. Tkyaqil maj, in nok qqʼoʼn qwitz tiʼj qa kukx in che onin qiʼj. Tuʼntzunju, bʼaʼn tuʼn qonin tiʼj ttnam Jehová tuʼnju in qo tzaj t-xnaqʼtzaʼn. Qa ma bʼant jlu quʼn, mlay tzʼel qpan qibʼ tiʼj Jehová maske in che xmayin xjal qiʼj (kjawil uʼjit Salmo 119:50-52).

15. ¿Tiquʼn e xmayin tfamiliar Brizit tiʼj?

¹⁵ Qo yolin tiʼj Brizit, jun ermana te tnam India. E xmayin tfamiliar tiʼj tuʼnju testigo de Jehová. Bautisarin toj 1997, ex tej tikʼ chʼin ambʼil el qʼiʼn taqʼun tchmil ex nyatoq testigo de Jehová. Tej tbʼaj jlu, kubʼ t-ximen tchmil tuʼn kyxiʼ anqʼil kyukʼil tlibʼ toj juntl tnam. Pero nya oʼkx nya bʼaʼn jlu tzaj tiʼj ermana Brizit. Tuʼnju mintiʼtoq taqʼun tchmil, iltoq tiʼj tuʼn taqʼunan tkyaqil ambʼil tuʼntzun kykʼaʼchit toj tja. Ex tuʼn t-xiʼ kyoj chmabʼil, iltoq tiʼj tuʼn t-xi bʼet junlo 350 kilómetro. Bʼisbʼajil tuʼnju el ikʼun Brizit kyuʼn tfamiliar tchmil tuʼnju in najbʼen te Jehová. Tzaj nim nya bʼaʼn kyxol, tuʼntzunju e xiʼ anqʼil toj juntl lugar. Noq minabʼen tzaj juntl nya bʼaʼn, kyim tchmil ermana. Ex tej tikʼ ambʼil, kyim jun tal tuʼn cáncer tej qʼiʼntoq 12 abʼqʼi tuʼn. Nya oʼkxju, ax ikx xi kyqʼamaʼn tfamiliar te qa tuʼn otoq tzaj tkyaqil nya bʼaʼn kyiʼj toj tja. Xi kyqʼamaʼn te qa noqwit mintiʼ ok te testigo de Jehová, mintiʼwtlo e tzaj nya bʼaʼn lu tiʼj. Pero kukx ok qeʼ tkʼuʼj Brizit tiʼj Jehová ex mintiʼ el tpan tibʼ tiʼj ttnam.

16. ¿Alkyeqe kʼiwlabʼil tzaj tkʼamoʼn Brizit tuʼnju ten nqayin tiʼj Jehová ex tiʼj ttnam?

¹⁶ Tuʼnju najchaq anqʼin Brizit tiʼj congregación, xi tqʼamaʼn jun superintendente te circuito te tuʼn tpakbʼan toj lugar jatumel taʼ ex tuʼn kyok chmabʼil tuʼn toj tja. Tnejel, kubʼ t-ximen qa mlayxtoq bʼant tuʼn. Pero xi tbʼiʼn aju xi qʼamaʼn te, ok ten pakbʼal, e ok chmabʼil tuʼn toj tja ex kʼulin te Jehová tkyaqil seman kyukʼil tal. ¿Tiʼtzun bʼaj tuʼnju ok tilil tuʼn? Xi tzyet tuʼn kyxnaqʼtzan nim xjal tukʼil  Brizit ex nim kye e bautisarin. Ex toj abʼqʼi 2005 ok te precursora regular. Tzaj kʼiwlaʼn tuʼn Jehová tuʼnju kukx ok qeʼ tkʼuʼj tiʼj ex tiʼj ttnam. Kukx in che ajbʼen tal te Jehová ex at kabʼe congregación toj lugar jatumel in che anqʼin. Qʼuqli tkʼuʼj Brizit tiʼj qa tzaj tqʼoʼn Jehová tipumal tuʼn tikʼx nya bʼaʼn tuʼn ex tej kyxmayin toj tja tiʼj.

17. ¿Tiʼ bʼaʼn tuʼn tbʼant quʼn?

¹⁷ Taj Satanás tuʼn tkubʼ qximen qa in qo kyaj tkolin Jehová aj qok weʼ kywitz nya bʼaʼn ex qa mas in tzaj bʼis qiʼj aj qok lepeʼ tiʼj ttnam. Ax ikx, taj tuʼn qtzaj xobʼ aj ttzaj qʼamaʼn nya ax tok yol kyiʼj erman in che kubʼ nej twitz aqʼuntl toj ttnam Jehová, aj kyel ikʼun moqa aj kyokx qʼoʼn toj cárcel. Ex in najbʼen xmaybʼil tuʼn tuʼn miʼn tok qeʼ qkʼuʼj kyiʼj tkawbʼil Jehová ex tiʼj ttnam. Pero ya ojtzqiʼn qe ttramp quʼn ex mintiʼ in xi qqʼoʼn ambʼil tuʼn qkubʼ tsbʼuʼn (2 Cor. 2:11). Tbʼanel tuʼn tel qikʼun qe nya ax tok yol in tzaj tqʼamaʼn ex qeʼk qkʼuʼj tiʼj Jehová ex tiʼj ttnam. Bʼaʼn tuʼn ttzaj qnaʼn qa mlayx qo kyaj kolin tuʼn Jehová (Sal. 28:7). Tuʼntzunju, miʼn txi qqʼoʼn ambʼil te ni jun tiʼ tuʼn qel tpaʼn tiʼj Jehová (Rom. 8:35-39).

18. ¿Tiʼ kʼelel qnikʼ tiʼj toj juntl xnaqʼtzbʼil?

¹⁸ Toj xnaqʼtzbʼil lu, ma qo yolin kyiʼj nya bʼaʼn in che tzaj qiʼj ex jaku tzʼel kyiʼn ambʼil qe tuʼn tok qeʼ qkʼuʼj tiʼj Jehová ex tiʼj ttnam. Mintiʼ kyoklen nya bʼaʼn lu tukʼil congregación. Pero ax ikx jaku tzaj junjun nya bʼaʼn toj ttnam Jehová. ¿Tiʼ jaku bʼant quʼn tuʼn kykyaj toj ttxolil? Kxel qqʼoʼn tzaqʼwebʼil tiʼj xjel lu toj juntl xnaqʼtzbʼil.