1. ¿Tzeʼn jaku kubʼ qyekʼin qa at qnabʼil? (2 Timoteo 4:5).

 KWEST jaku qo ten tzʼaqli twitz Jehová ex tuʼn tok qeʼ qkʼuʼj tiʼj ttnam aj qok weʼ kywitz nya bʼaʼn. ¿Tiʼ jaku tzʼonin qiʼj toj ambʼil lu? Bʼaʼn tuʼn tten qnabʼil, tuʼn kukx qxqʼuqin ex tuʼn qweʼxix toj qokslabʼil (kjawil uʼjit 2 Timoteo 4:5). ¿Tzeʼn jaku kubʼ qyekʼin qa at qnabʼil? Kbʼel qyekʼin qa mintiʼ ma tzaj qqʼoj, qa ma qo ximen toj tumel ex qa ma ten qximbʼetz kyiʼj tiʼchaq ik tzeʼn te Jehová. Qa ma bʼant jlu quʼn, qo ximel toj tumel.

2. ¿Tiʼ kʼelel qnikʼ tiʼj toj xnaqʼtzbʼil lu?

² Toj xnaqʼtzbʼil ma kyaj, o yolin tiʼj oxe tiʼ jaku qo ok weʼ twitz ex mintiʼ kyoklen tukʼil ttnam Jehová. Toj xnaqʼtzbʼil lu, kʼelel qnikʼ kyiʼj oxe tiʼ jaku bʼaj toj ttnam Jehová ex jaku tzʼok qʼuqbʼil qkʼuʼj toj prueba kyuʼn. Tnejel, aj tkubʼ qximen qa otoq tzʼok bʼinchaʼn nya bʼaʼn qiʼj tuʼn jun erman. Tkabʼin, aj qtzaj kawin. Ex toxin, aj kyul junjun chʼixpubʼil toj ttnam Jehová. Qa ma bʼaj jlu qiʼj, ¿tiʼ jaku bʼant quʼn tuʼn kukx tten qnabʼil, tuʼn kukx qten tzʼaqli twitz Jehová ex tuʼn kukx tok qeʼ qkʼuʼj tiʼj ttnam?

3. ¿Tiʼ jaku kubʼ qxjelin qa ma kubʼ qximen qa ma tzʼok bʼinchaʼn jun nya bʼaʼn qiʼj tuʼn jun erman?

³ ¿Ope kubʼ t-ximen teya jun maj qa o tzʼok tbʼinchaʼn jun erman nya bʼaʼn tiʼja ex bʼalo at toklen erman lu? Jaku  txi qqʼamaʼn qa nyalo taj erman tuʼn tok tbʼinchaʼn nya bʼaʼn tiʼja (Rom. 3:23; Sant. 3:2). Maske ikju, tzajlo tbʼisa tuʼnju bʼant tuʼn. Bʼalo mintiʼ in nokx watl toj twitza tuʼn jlu ex in kubʼlo t-xjelina: «Qa in bʼant jlu tuʼn jun erman, ¿ape ttnam Dios jlu?». Atzun jlu taj Satanás tuʼn tkubʼ t-ximana (2 Cor. 2:11). Qa ma ten qximbʼetz ik tzeʼn jlu, jaku qo el tpaʼn tiʼj Jehová ex tiʼj ttnam. Qa in kubʼ tnaʼna qa o tzʼok bʼinchaʼn jun nya bʼaʼn tiʼja tuʼn jun ermano moqa tuʼn jun ermana, ¿tiʼ jaku bʼant tuʼna tuʼn kukx tten tnabʼila ex tuʼn tten t-ximbʼetza toj tumel?

4. a) ¿Tiʼ bʼant tuʼn José tuʼn kukx tten tnabʼil tej tok bʼinchaʼn nya bʼaʼn tiʼj? (Génesis 50:19-21). b) ¿Tiʼ xnaqʼtzbʼil jaku tzʼel qiʼn tiʼj?

⁴ Miʼn txi tkʼuʼna qʼoj. Tej tzmatoq kuʼxun José, ok bʼinchaʼn nya bʼaʼn tiʼj kyuʼn ttzik. El ikʼun twitz kyuʼn ex ok tilil kyuʼn tuʼn tkubʼ kybʼyoʼn (Gén. 37:4, 18-22). Xi kykʼayin te majen. Tuʼn jlu, ok weʼ José twitz nim nya bʼaʼn toj junlo 13 abʼqʼi. Kubʼlo t-ximen qa ax tok kʼujlaʼn tuʼn Jehová ex qa otoq kyaj kolin tuʼn kyoj ambʼil kwest. Pero ten tnabʼil ex mintiʼ tzaj tqʼoj. Tej tikʼ ambʼil, jakutoq tzʼaj tqʼoʼn t-xel nya bʼaʼn kyiʼj ttzik, pero mintiʼ bʼant jlu tuʼn, sino kubʼ tyekʼin tkʼujlabʼil kyiʼj ex kubʼ tnajsaʼn kyil (Gén. 45:4, 5). ¿Tiquʼn? Tuʼnju ximen kyiʼj tiʼchaq toj tumel. Mintiʼ ximen oʼkx kyiʼj nya bʼaʼn tzaj tiʼj, sino ximen tiʼj tkyaqil ex tiʼj alkye taj Jehová (kjawil uʼjit Génesis 50:19-21). ¿Tiʼ xnaqʼtzbʼil jaku tzʼel qiʼn tiʼj? Qa o tzʼok bʼinchaʼn jun nya bʼaʼn tiʼja, miʼn ten t-ximbʼetza nya toj tumel tiʼj Jehová ex miʼn kubʼ t-ximana qa o kyaj kolina tuʼn. Sino ximana tiʼj tzeʼn in nonin tiʼja tuʼn tikʼx nya bʼaʼn tuʼna. Ax ikx, bʼaʼn tuʼn tkubʼ tnajsaʼna kyil txqantl ex naʼntza qa jaku najset «nimku kyil txqantl» quʼn qa at qkʼujlabʼil (1 Ped. 4:8).

5. ¿Tiʼ bʼant tuʼn Miqueas tej tkubʼ tnaʼn qa otoq kubʼ kyyekʼin erman nya bʼaʼn kymod tiʼj?

⁵ Qo yolin tiʼjju bʼaj tiʼj jun ansyan Miqueas tbʼi te Sudamérica. b Jun maj, kubʼ tnaʼn qa kubʼ kyyekʼin junjun ansyan nya bʼaʼn kymod tukʼil. Naʼnx jlu tuʼn Miqueas: «Naʼmxtoq wok weʼye twitz jun nya bʼaʼn ik tzeʼn jlu. Tzaj bʼajxix nkʼuʼje tuʼn. Mintiʼ okx watl toj nwitze ex in jaw oqʼe tuʼnju mintiʼ el nnikʼe tiʼj tiʼ jakutoq bʼant wuʼne». Maske ikju, kukx ten tnabʼil Miqueas ex ok tilil tuʼn tuʼn tten t-ximbʼetz toj tumel. Kukx naʼn Dios te Jehová tuʼn t-xi tqanin xewbʼaj xjan ex tuʼn ttzaj tqʼoʼn tipumal tuʼn tikʼx tuʼn. Ax ikx, jyon tqanil kyoj uʼj in che etz tuʼn ttnam. ¿Tiʼ xnaqʼtzbʼil jaku tzʼel qiʼn tiʼj? Qa in kubʼ tnaʼna qa o tzʼok bʼinchaʼn jun nya bʼaʼn tiʼja tuʼn jun erman, qʼonka tilil tuʼn kukx tten tnabʼila ex tuʼn tten t-ximbʼetza toj tumel. Bʼalo at jun tiquʼn bʼant jlu tuʼn erman ex mintiʼ ojtzqiʼn tuʼna. Tuʼntzunju, qʼamanxa tkyaqil te Jehová ex qaninxa te tuʼn tten t-ximbʼetza kyiʼj tiʼchaq ik tzeʼn te erman. Qa ma bʼant jlu tuʼna, kʼonil tiʼja tuʼn tten t-ximbʼetza toj tumel tiʼj ex tuʼn tkubʼ tnajsaʼna til (Prov. 19:11). Bʼaʼn tuʼn ttzaj tnaʼna qa ojtzqiʼn jlu tuʼn Jehová ex tzul tqʼoʼn tipumala tuʼn tikʼx tuʼna (2 Crón. 16:9; Ecl. 5:8).

6. ¿Tiquʼn nim toklen tuʼn tkubʼ qximen qa jun yekʼbʼil tiʼj tkʼujlabʼil Jehová aj qtzaj kawin? (Hebreos 12:5, 6, 11).

⁶ Jaku tzaj qbʼis aj qtzaj kawin. Pero qa oʼkx ma qo ximen tiʼj bʼis, jaku tzʼel  qiʼn toklen kawbʼil, jaku kubʼ qximen qa nya toj tumel ex qa kyuw. Ax ikx, mlay qo ximen tiʼj qa jun yekʼbʼil tiʼj tkʼujlabʼil Jehová aj qtzaj kawin (kjawil uʼjit Hebreos 12:5, 6, 11). Qa oʼkx ma tzʼok qqʼoʼn qwiʼ tiʼjju in kubʼ qnaʼn, jaku txi qqʼoʼn ambʼil te Satanás tuʼn tok tzoqpaj qiʼj. Taj Satanás tuʼn tel qikʼen kawbʼil ex aju mas bʼisbʼajil, taj tuʼn tel qpan qibʼ tiʼj Jehová ex tiʼj ttnam. Qa o tzaj kawin teya, ¿tiʼ jaku tzʼonin tiʼja tuʼn kukx tten tnabʼila?

7. a) Ik tzeʼn in nok qkeʼyin kyoj dibujo, ¿tiʼ aqʼuntl xi tqʼoʼn Jehová te Pedro tej otoqxi txi tbʼiʼn qe kawbʼil? b) ¿Tiʼ xnaqʼtzbʼil jaku tzʼel qiʼn tiʼj Pedro?

⁷ Bʼinxa kawbʼil ex bʼinchama qe chʼixpubʼil. Nya oʼkx jun maj xi tqʼoʼn Jesús kawbʼil te Pedro kywitz txqantl apóstol (Mar. 8:33; Luc. 22:31-34). ¡Tzajlo nim tchʼixwi Pedro! Pero kukx ok lepeʼ tiʼj Jesús, xi tbʼiʼn kawbʼil ex el tiʼn jun xnaqʼtzbʼil kyiʼj tpaltil. Tuʼn jlu, tzaj kʼiwlaʼn tuʼn Jehová ex tzaj qʼoʼn mas toklen toj congregación (Juan 21:15-17; Hech. 10:24-33; 1 Ped. 1:1). ¿Tiʼ xnaqʼtzbʼil jaku tzʼel qiʼn tiʼj? Qa nim toklen tuʼn t-xi qbʼiʼn qe kawbʼil, tuʼn kybʼant chʼixpubʼil quʼn ex nya oʼkx tuʼn tok qqʼoʼn qwiʼ tiʼj qchʼixwi. Qa ma bʼant jlu quʼn, qo ajbʼel mas tuʼn Jehová ex tuʼn ttnam.

8, 9. ¿Tiʼ kubʼ tnaʼn Bernardo tej t-xi qʼoʼn kawbʼil te, pero tiʼ onin tiʼj tuʼn tbʼaj tchʼexpuʼn t-ximbʼetz?

⁸ Qo ximen tiʼjju bʼaj tiʼj Bernardo, jun ermano te tnam Mozambique. El qʼiʼn toklen te ansyan. ¿Tiʼ kubʼ tnaʼn tej tbʼaj jlu? Tqʼama jlu: «Tzaj nim nbʼise tuʼnju nya bʼaʼn ela kawbʼil toj nwitze». Tzaj bʼaj tkʼuʼj tej tkubʼ t-ximen qa jakutoq kubʼ kyximen erman nya bʼaʼn tiʼj. Tqʼamatl Bernardo jlu: «Ikʼ nim xjaw tuʼn tten juntl maj nximbʼetze toj tumel ex tuʼn tok qeʼ nkʼuʼje tiʼj Jehová ex tiʼj ttnam». ¿Tiʼ onin tiʼj?

⁹ Bʼaj tchʼexpuʼn Bernardo t-ximbʼetz. Tqʼama jlu: «Tej in chin ajbʼentoqe te ansyan, in xitoq wuʼjine Hebreos 12:7 kye erman tuʼntzun tten kyximbʼetz toj tumel aj kyxi kawin tuʼn Jehová. Kubʼtzun nxjeline jlu: ‹¿Alkyeqe il tiʼj tuʼn t-xi kybʼiʼn aju in tzaj tqʼamaʼn texto jlu?›. Kykyaqilx tmajen Jehová, ax ikx weye». Ax ikx, bʼant juntl tiʼ tuʼn Bernardo tuʼn tchʼiy qʼuqbʼil tkʼuʼj tiʼj Jehová ex tiʼj ttnam.  El tpaʼn mas ambʼil tuʼn tuʼjin tiʼj Biblia ex tuʼn t-ximen tiʼj. Maske kukx tzaj bʼaj tkʼuʼj tiʼjju jakutoq kubʼ kyximen erman, kukx ex pakbʼal kyukʼil ex kukx xi tqʼoʼn tyol kyoj chmabʼil. Tej tikʼ ambʼil, tzaj qʼoʼn juntl maj toklen te ansyan. Qa o tzaj qʼoʼn jun kawbʼil teya ik tzeʼn te Bernardo, bʼaʼn tuʼn t-xi tbʼiʼna qe consej, bʼinchama qe chʼixpubʼil ex miʼn tzʼok tqʼoʼna twiʼya tiʼj tchʼixwiya (Prov. 8:33; 22:4). c Qa ma bʼant jlu tuʼna, jaku tzʼok qeʼ tkʼuʼja tiʼj qa tzul kʼiwlaʼna tuʼn Jehová tuʼnju mintiʼ in nel tpan tibʼa tiʼj nix tiʼj ttnam.

10. ¿Alkye chʼixpubʼil jakutoq tzʼok qʼuqbʼil kykʼuʼj israelita tuʼn toj prueba?

¹⁰ Aj kybʼant chʼixpubʼil tuʼn ttnam Jehová, jaku tzʼok qʼuqbʼil qkʼuʼj toj prueba. Qa mintiʼ ma tzʼok qxqʼuqin qibʼ, jaku tzʼel qpan qibʼ tiʼj Jehová. Qo ximen tiʼj chʼixpubʼil tzaj toj kyanqʼibʼil israelita tej ttzaj qʼoʼn Tley Moisés kye. Tej naʼmxtoq ttzaj qʼoʼn Ley, tzaj qʼoʼn kyoklen wibʼaj toj ja te pal, tuʼntzunju, jaw kybʼinchaʼn qe altar ex kubʼ kypatin chojbʼil twitz (Gén. 8:20, 21; 12:7; 26:25; 35:1, 6, 7; Job 1:5). Tejtzun ttzaj qʼoʼn Ley, el qʼiʼn oklenj lu kye. Xi tqʼoʼn Jehová kyoklen toj tja Aarón te pal tuʼntzun tkubʼ kypatin qe chojbʼil. Atxix toj ambʼil aju, qa ma kubʼ tpatin jun wibʼaj toj ja qe chojbʼil, jakutoq kyim (Lev. 17:3-6, 8, 9). d ¿Tuʼnpe chʼixpubʼil lu ya mintiʼ xi tbʼiʼn Coré, Datán, Abiram ex qeju 250 nejenel tyol Moisés ex Aarón? (Núm. 16:1-3). Mlay txi qqʼamaʼn qa ikju. Noq tiʼxku bʼaj, el tpan tibʼ Coré ex junjuntl xjal tiʼj Jehová. ¿Tiʼ jaku bʼant tuʼna qa ma jawje tkʼuʼja tuʼn jun chʼixpubʼil in bʼant tuʼn ttnam Jehová?

11. ¿Tiʼ xnaqʼtzbʼil jaku tzʼel qiʼn tiʼjju bʼant kyuʼn tkʼwal Cohat?

¹¹ Tzʼonina tuʼn tkyaqil tkʼuʼja kyiʼj chʼixpubʼil in bʼant tuʼn ttnam Jehová. Tej kybʼet israelita toj desierto, bʼant jun aqʼuntl nim toklen kyuʼn toj tja Cohat. Tej kyikʼ bʼet xjal, xi kyiʼn junjun tkʼwal Cohat kajon tkubʼil Ley kywitz txqantl (Núm. 3:29, 31; 10:33; Jos. 3:2-4). ¡Tbʼanelxix oklenj lu! Pero chʼexpaj qe tiʼchaq tej kyokx toj Txʼotxʼ Tziyen maj. ¿Tiquʼn? Tuʼnju ya mintiʼ xi qʼiʼn kajon tkubʼil Ley toj juntl lugar. Tuʼntzunju, xi qʼoʼn junjuntl kyoklen tkʼwal Cohat toj ambʼil tej tkawin Salomón. Ateʼ junjun e bʼitzin, junjuntl e xqʼuqin ttzi tpwertil templo ex junjuntl e xqʼuqin kyiʼj wabʼj (1 Crón. 6:31-33; 26:1, 24). Mintiʼ in tzaj tqʼamaʼn Tyol Dios qa nya bʼaʼn ela jlu toj kywitz tkʼwal Cohat ex mintiʼ in tzaj tqʼamaʼn qa xi kyqanin junjuntl kyaqʼun mas nim toklen tuʼnju otoq ten jun tbʼanel kyoklen. ¿Tiʼ xnaqʼtzbʼil jaku tzʼel qiʼn tiʼj jlu? Qa bʼaʼn tuʼn qonin tuʼn tkyaqil qkʼuʼj kyiʼj chʼixpubʼil in bʼant tuʼn ttnam Jehová, axpe ikx qa ma tzaj tiʼn chʼixpubʼil toj qanqʼibʼil. Qo tzalaj tiʼj alkyexku aqʼuntl in tzaj qʼoʼn qe. Bʼaʼn tuʼn ttzaj qnaʼn qa mintiʼ in nok qʼoʼn qoklen noq tuʼnju aqʼuntl in bʼant quʼn toj ttnam Jehová. Mas nim toklen toj twitz Jehová tuʼn qnimen te twitz alkyexku oklenj (1 Sam. 15:22).

12. ¿Tiʼ kubʼ tnaʼn Zaira tej tetz toj Betel?

 ¹² Qbʼinx aju bʼaj tiʼj Zaira, jun ermana te Oriente Medio. Ok tqʼoʼn nim toklen tajbʼebʼil toj Betel, jatumel ten mas te 23 abʼqʼi. Pero xi qʼoʼn toklen tuʼn tok te precursora especial. Tqʼama ermana jlu: «Kwest ela chʼixpubʼil lu toj nwitze. Kubʼ nximane qa mintiʼ wajbʼene ex kubʼ nximane tiʼ nya bʼaʼn otoq bʼant wuʼne». Bʼisbʼajil tuʼnju ateʼ junjun erman mintiʼ e onin tiʼj, sino mas tzaj tbʼis kyuʼn tuʼnju xi kyqʼamaʼn jlu te: «Noqwit tbʼanel aqʼuntl bʼant tuʼna, mintiʼwtlo etz qʼiʼna toj Betel». Toj jun ambʼil ok ten Zaira oqʼil tkyaqil qonikʼen tuʼn bʼis. Pero tqʼama jlu: «Kukx ok qeʼ nkʼuʼje tiʼj tkʼujlabʼil Jehová ex tiʼj ttnam». ¿Tiʼ onin tiʼj tuʼn kukx tten tnabʼil?

13. ¿Tiʼ bʼant tuʼn Zaira tuʼn ya miʼn t-ximen tiʼj bʼis?

¹³ Tuʼn tikʼx bʼis tuʼn Zaira, jyon tqanil kyoj uʼj in che etz tuʼn ttnam Jehová tiʼjju in bʼajtoq tiʼj. Jun kyxol qe xnaqʼtzbʼil onin tiʼj, atz tkuʼx toj La Atalaya te 1 te febrero te 2001, aju tok tbʼi «Usted puede afrontar el desánimo». In yolin xnaqʼtzbʼil lu tiʼjju bʼaj tiʼj Marcos, aju kubʼ tzʼibʼinte jun uʼj toj Tyol Dios ex axlo qe tiʼchaq kubʼ tnaʼn ik tzeʼn te Zaira tej tok weʼ kywitz chʼixpubʼil. Tqʼamatl Zaira jlu: «Aju techel kyaj tqʼoʼn Marcos, atzun onin wiʼje tuʼn ya miʼn nbʼisune». Kukx jyon Zaira onbʼil kyukʼil tamiw, mintiʼ el tpan tibʼ kyiʼj erman ex nya kukx ximen tiʼj tbʼis. El tnikʼ tiʼj qa in nonin xewbʼaj xjan tiʼj ttnam Jehová ex qa ax tok in che ximen erman qʼil twitz aqʼuntl tiʼj. Ax ikx, el tnikʼ tiʼj qa mas nim toklen toj twitz ttnam Jehová tuʼn tbʼant aqʼuntl o tzaj qʼamaʼn qe.

14. ¿Alkye chʼixpubʼil ok weʼ ermano Vlado twitz ex tiʼ onin tiʼj tuʼn tnaqʼet tiʼj?

¹⁴ Kwest ela toj twitz ermano Vlado, jun ansyan te Eslovenia qʼiʼn 73 abʼqʼi tuʼn tej t-xi qʼamaʼn te qa kʼokel mojbʼaʼn tcongregación tukʼil juntl ex qa ya mlay tzʼajbʼen Ja te Chmabʼil jatumel in xiʼtoq. Tqʼama jlu: «Mintiʼ el nnikʼe tiʼj tiquʼn iltoq tiʼj tuʼn tjpet jun tbʼanelxix Ja te Chmabʼil. Nya bʼaʼn ela toj nwitze tuʼnju tzmatoq in bʼaj qbʼinchaʼne chʼintl. In chin aqʼunane te carpintero ex bʼaj nbʼinchaʼne junjun mueble. Ax ikx, mas kwest  ela kye erman otoq che tijen ik tzeʼn weye tej tok mojbʼaʼn congregación». ¿Tiʼ onin tiʼj ermano tuʼn tonin tiʼj chʼixpubʼil? Tqʼamatl jlu: «Aj qonin kyiʼj chʼixpubʼil in bʼant tuʼn ttnam Jehová, in nonin qiʼj. In nonin jlu qiʼj tuʼn tbʼaj qbʼinchaʼn qten kyiʼj mas chʼixpubʼil che ul toj ambʼil tzul». ¿In nokpe weʼ teya twitz chʼixpubʼil ik tzeʼn aj tok mojbʼaʼn jun congregación tukʼil juntl moqa tuʼn jun akʼaj oklenj? Miʼn tzaj bʼaj tkʼuʼja, in nel tnikʼ Jehová tiʼjju in kubʼ tnaʼna. Qa ma tzʼonina kyiʼj chʼixpubʼil ex qa mintiʼ ma tzʼel tpan tibʼa tiʼj Jehová nix tiʼj ttnam, tzul tkʼamoʼna nim kʼiwlabʼil (Sal. 18:25).

15. ¿Tiʼ jaku bʼant quʼn tuʼn kukx tten qnabʼil aj qok weʼ kywitz nya bʼaʼn toj congregación?

¹⁵ Akux in nul laqʼeʼ xitbʼil, oklo che tzajel junjun nya bʼaʼn toj congregación ex oklo kʼokel qʼuqbʼil qkʼuʼj toj prueba kyuʼn. Tuʼntzunju, nim toklen tuʼn tten qnabʼil. Qa ma kubʼ qximen qa o tzʼok tbʼinchaʼn jun erman jun nya bʼaʼn qiʼj, miʼn txi qkʼuʼn qʼoj tiʼj. Qa ma qo tzaj kawin, bʼaʼn tuʼn kyxi qbʼiʼn qe consej ex bʼaʼn tuʼn kybʼant chʼixpubʼil quʼn ex nya oʼkx qo ximen tiʼj qchʼixwi kbʼel kywitz txqantl. Ex aj kybʼant chʼixpubʼil tuʼn ttnam Jehová, bʼaʼn tuʼn qonin tiʼj tuʼn tkyaqil qkʼuʼj ex qbʼinx tqanil tzul qʼamaʼn qe.

16. ¿Tiʼ jaku bʼant quʼn tuʼn kukx tok qeʼ qkʼuʼj tiʼj Jehová ex tiʼj ttnam?

¹⁶ Kukx jaku tzʼok qeʼ qkʼuʼj tiʼj Jehová ex tiʼj ttnam aj tok qʼuqbʼil qkʼuʼj toj prueba. Pero tuʼn tbʼant jlu quʼn, nim toklen tuʼn kukx tten qnabʼil, toj juntl yol, tuʼn miʼn ttzaj qqʼoj, tuʼn qximen toj tumel ex tuʼn tten qximbʼetz kyiʼj tiʼchaq ik tzeʼn te Jehová. Bʼaʼn tuʼn qxnaqʼtzan tiʼj kyanqʼibʼil tmajen Jehová e ok weʼ twitz nya bʼaʼn ik tzeʼn qe ex bʼaʼn tuʼn qximan tiʼjju bʼant kyuʼn. Qqaninx onbʼil te Jehová ex miʼn tzʼel qpan qibʼ kyiʼj erman. Qa ma bʼant jlu quʼn, mlayx qo el tpaʼn Satanás tiʼj Jehová ex tiʼj ttnam (Sant. 4:7).