1, 2. ¿Tiquʼn jaku kubʼ qximen qa mintiʼ in tzaj ttzaqʼweʼn Jehová qnaʼj Dios?

 TBʼANELXIX qe yol lu in che kanet quʼn toj Salmo 37:4: «Tzalajxa tiʼj Qman, ex tzul tqʼoʼn teya aju in pon tkʼuʼja tiʼj». Pero, ¿ape t-xilen jlu qa jun rat ktzajel tqʼoʼn Jehová tkyaqilju in xi qqanin te? Tbʼanel tuʼn qximen tiʼj xjel lu. Qo ximen kyiʼj junjun techel. Tnejel, in xi tqanin jun ermana tuʼn t-xiʼ toj Xnaqʼtzbʼil kye Pakbʼal tiʼj Tkawbʼil Dios, pero in nikʼ ambʼil ex mintiʼ in pon txokbʼil tiʼj. Tkabʼin, at yabʼil tiʼj jun kuʼxun ex in xi tqanin te Jehová tuʼn tkubʼ tqʼanin tuʼntzun tajbʼen mas toj congregación. Noqtzun tuʼnj, mintiʼ in qʼanit yabʼil tiʼj. Ex toxin, in xi kyqanin junjun mambʼaj tuʼn kukx tajbʼen kykʼwal te Jehová, pero in kubʼ t-ximen kykʼwal tuʼn tkyaj tkolin axix tok.

² Bʼalo o txi tqanina jun tiʼ te Jehová, pero naʼmx ttzaj tzaqʼweʼna tuʼn. Aj tbʼaj jlu, jakulo kubʼ t-ximana qa in tzaj ttzaqʼweʼn Jehová kynaʼj Dios txqantl, atzun teya mintiʼ. Moqa jaku kubʼ t-ximana qa mintiʼ in tzaj bʼiʼna tuʼn tuʼnju o kubʼ tbʼinchaʼna jun nya bʼaʼn. Atzun jlu kubʼ t-ximen jun ermana Janice tbʼi. b Xi tqʼamaʼn ermana tukʼil tchmil te Jehová qa kyajtoq tuʼn kyxiʼ toj Betel. Tqʼama Janice jlu: «Qʼuqlitoq qkʼuʼje tiʼj qa jun rat ktzajel qʼoʼn txokbʼil qiʼje». Pero ikʼ ambʼil ex mintiʼ pon txokbʼil kyiʼj. Tqʼamatl Janice jlu: «Tzaj nbʼise ex mintiʼ el nnikʼe tiʼjju bʼaj. Kubʼ nxjeline tiʼ nya bʼaʼn otoq bʼant wuʼne. Otoq txi nqʼamaʼne  te Jehová tiʼ waje, pero mintiʼ el nnikʼe tiʼj tiquʼn mintiʼ tzaj ttzaqʼweʼn nnaʼj Diose».

3. ¿Tiʼ kʼelel qnikʼ tiʼj toj xnaqʼtzbʼil lu?

³ Atlo maj jaku kubʼ qxjelin qa in tzaj tbʼiʼn Jehová qnaʼj Dios. Axtzun jlu kubʼ kyxjelin junjun tmajen Jehová toj ambʼil ojtxe (Job 30:20; Sal. 22:2; Hab. 1:2). ¿Tiʼ jaku tzʼonin tiʼja tuʼn tok qeʼ tkʼuʼja tiʼj qa in tzaj ttzaqʼweʼn Jehová qe tnaʼj Diosa? (Sal. 65:2). Tuʼn t-xi qqʼoʼn tzaqʼwebʼil tiʼj xjel lu, tnejel qqʼonx tzaqʼwebʼil kyiʼj oxe xjel. Tnejel, ¿tiʼ kbʼantel tuʼn Jehová? Tkabʼin, ¿tiʼ taj Jehová tuʼn tbʼant quʼn? Ex toxin, ¿tiquʼn atlo maj il tiʼj tuʼn t-xi qqanin junxitl tiʼ toj qnaʼj Dios?

4. Ik tzeʼn in tzaj tqʼamaʼn Jeremías 29:​12, ¿tiʼ o tzaj ttziyen Jehová qe?

⁴ In tzaj ttziyen Jehová qa ktzajel tbʼiʼn qe qnaʼj Dios (kjawil uʼjit Jeremías 29:12). Kʼujlaʼn qe tmajen Jehová tuʼn ex in tzaj tbʼiʼn kynaʼj Dios (Sal. 10:17; 37:28). Pero nya a t-xilen jlu qa ktzajel tqʼoʼn tkyaqilju in xi qqanin te. Bʼalo ateʼ junjun qnaʼj Dios tzmaxi ktzajel ttzaqʼweʼn toj akʼaj twitz Txʼotxʼ.

5. ¿Tiʼ in nok tqʼoʼn Jehová toklen aj ttzaj tbʼiʼn qnaʼj Dios?

⁵ In nok tqʼoʼn Jehová toklen t-ximbʼetz aj ttzaj tbʼiʼn qe qnaʼj Dios (Is. 55:​8, 9). O kubʼ t-ximen Jehová tuʼn tnoj twitz Txʼotxʼ kyuʼn xjal in nok kyqʼoʼn toklen Tkawbʼil ex kyaj tuʼn kyajbʼen te tukʼil tzalajbʼil ex toj mujbʼabʼil. Pero tqʼama Satanás qa mas bʼaʼn qa aʼyex xjal ma che kawin kyibʼaj (Gén. 3:​1-5). Tuʼn tel nikʼbʼaj tiʼj qa nya ax tok aju tqʼama Satanás, xi tqʼoʼn Jehová ambʼil kye xjal tuʼn kykawin. Tuʼntzunju, at nim nya bʼaʼn toj ambʼil jaʼlo (Ecl. 8:9). Ojtzqiʼn quʼn qa mlay tzʼel tiʼn Jehová tkyaqil nya bʼaʼn toj ambʼil jaʼlo. Noqwit bʼant jlu tuʼn, jaku kubʼ kyximen xjal qa tbʼanel kykawbʼil ex qa jaku txi kybʼinchaʼn tiʼj tkyaqil nya bʼaʼn.

6. ¿Tiquʼn nim toklen tuʼn tok qeʼ qkʼuʼj tiʼj qa in xi tbʼinchaʼn Jehová qe tiʼchaq tukʼil kʼujlabʼil ex tzʼaqli?

⁶ Jaku txi qqanin aʼyex tiʼchaq toj qnaʼj Dios, pero junxichaq tumel jaku tzaj ttzaqʼweʼn Jehová. Qo yolin kyiʼj junjun techel. Tej ttzaj yabʼil tiʼj rey Ezequías, xi tqanin te Jehová tuʼn tkubʼ tqʼanin ex tzaj bʼiʼn tnaʼj Dios (2 Rey. 20:​1-6). Pero nya ax jlu bʼant tuʼn Jehová tej t-xi tqanin apóstol Pablo te tuʼn tel tiʼn jun chʼix toj t-xmilal moqa jun yabʼil (2 Cor. 12:​7-9). Atzun jaʼlo qo ximen tiʼjju bʼaj tiʼj apóstol Santiago ex Pedro tej tkubʼ t-ximen rey Herodes tuʼn kykubʼ tbʼyoʼn. E naʼn okslal Dios tiʼj Pedro ex axlo ikx tiʼj Santiago. Pero kubʼ bʼyoʼn Santiago, atzunte Pedro klet tuʼn jun milagro bʼant tuʼn Jehová (Hech. 12:​1-11). Jakulo kubʼ qxjelin tiquʼn klet Pedro tuʼn Jehová, atzunte Santiago mintiʼ. Maske mintiʼ in tzaj tqʼamaʼn Biblia jlu, jaku tzʼok qeʼ qkʼuʼj tiʼj qa «mintiʼ jun mya bʼaʼn in tbʼinchaʼn» Jehová ex qa kʼujlaʼntoq Santiago tuʼn ik tzeʼn te Pedro (Deut. 32:4; Apoc. 21:14). c Atlo maj mintiʼ in tzaj ttzaqʼweʼn Jehová qnaʼj Dios ik tzeʼn qaj. Pero mintiʼ in qo yolin nya bʼaʼn tiʼjju in bʼant tuʼn. ¿Tiquʼn? Tuʼnju ojtzqiʼn quʼn qa in xi tbʼinchaʼn qe tiʼchaq tukʼil kʼujlabʼil ex qa tzʼaqli (Job 33:13).

7. ¿Tiʼ mintiʼ in bʼant quʼn ex tiquʼn?

⁷ Mintiʼ tuʼn tok qmojbʼaʼn aju in bʼaj qiʼj  kyukʼil txqantl. Jun techel, jakulo txi qqanin jun tiʼ te Jehová, pero mintiʼ in qo tzaj ttzaqʼweʼn. Yajxitl, in nok qbʼiʼn qa axju xi tqanin juntl te Jehová ex tzaj tzaqʼweʼn. Atzun jlu bʼaj tiʼj jun ermana Anna tbʼi. Tzaj cáncer tiʼj tchmil, aju Matthew tbʼi ex xi tqanin te Jehová tuʼn tonin tiʼj tuʼn tbʼanix. Tojx ambʼil aju, attoq cáncer kyiʼj kabʼe ermana otoq che tijen ex naʼn Anna Dios kyiʼj. Tej tikʼ ambʼil e bʼanix kabʼe ermana, atzunte Matthew kyim. Tnejel, tajtoq Anna tuʼn tel tnikʼ tiʼj qa kubʼ tqʼanin Jehová qe kabʼe ermana moqa mintiʼ. ¿Tiquʼn? Tuʼnju tajtoq tuʼn tel tnikʼ tiʼj tiquʼn mintiʼ kubʼ tqʼanin tchmil. Mintiʼ ojtzqiʼn quʼn tiquʼn e bʼanix kabʼe ermana, pero ojtzqiʼn quʼn qa kʼelel tiʼn Jehová te jumajx tkyaqil nya bʼaʼn ex qa taj tuʼn kyjaw anqʼin tmajen o che kyim (Job 14:15).

8. a) Ik tzeʼn in tzaj tqʼamaʼn Isaías 43:​2, ¿tiʼ in bʼant tuʼn Jehová tuʼn tonin qiʼj? b) ¿Tzeʼn in nonin naʼj Dios qiʼj tuʼn qex kywitz nya bʼaʼn? (Qʼonka twitza tiʼj video In nonin naʼj Dios qiʼj tuʼn kukx tikʼx quʼn).

⁸ Kukx kʼonil Jehová qiʼj. Kʼujlaʼn qoʼ tuʼn Jehová ex nya taj tuʼn qsufririn (Is. 63:9). Pero mintiʼ in nel tiʼn tkyaqil nya bʼaʼn in qo ok weʼ twitz, aʼyeju in che ok tmojbʼaʼn Biblia ik tzeʼn nimaʼ ex qʼaqʼ (kjawil uʼjit Isaías 43:2). Noq alkyexku prueba jaku qo ok weʼ twitz, in nonin Jehová qiʼj tuʼn kukx tten jun tbʼanel qamiwbʼil tukʼil. Ex in tzaj tqʼoʼn xewbʼaj xjan qe tuʼn tikʼx quʼn (Luc. 11:13; Filip. 4:13). Tuʼntzunju, qʼuqli qkʼuʼj tiʼj qa kukx ktzajel tqʼoʼn Jehová aju at tajbʼen qe tuʼn tikʼx quʼn ex tuʼn kukx qten tzʼaqli twitz. d

9. ¿Tzeʼn in nonin Santiago 1:6 ex 7 qiʼj tuʼn tel qnikʼ tiʼj qa nim toklen tuʼn tok qeʼ qkʼuʼj tiʼj qa kʼonil Jehová qiʼj?

⁹ Taj Jehová tuʼn tok qeʼ qkʼuʼj tiʼj (Heb. 11:6). Atlo maj jaku tzaj bʼaj qkʼuʼj kyuʼn nya bʼaʼn in qo ok weʼ twitz ex jaku kubʼ qxjelin qa ax tok jaku tzʼonin Jehová qiʼj. Pero in tzaj tqʼamaʼn Biblia qa jaku qo jax twi jun muro noq tuʼn qipumal tzul tqʼoʼn Jehová (Sal. 18:29). Tuʼntzunju, miʼn txi qqʼoʼn ambʼil kye nya bʼaʼn qximbʼetz ex qo naʼn Dios tuʼn tkyaqil qanmi te Jehová. Qʼuqli qkʼuʼj tiʼj qa tzul ttzaqʼweʼn qe qnaʼj Dios (kjawil uʼjit Santiago 1:​6, 7).

10. Yolina tiʼj jun techel in tzaj tyekʼin tiʼ il tiʼj tuʼn tbʼant quʼn otoqxi qo naʼn Dios.

¹⁰ Taj Jehová tuʼn t-xi qbʼinchaʼn aju in xi qqanin te. Qo ximen tiʼj qa taj jun ermano tuʼn t-xiʼ toj asamblea te oxe qʼij ex in xi tqanin te Jehová tuʼn tonin tiʼj tuʼn ttzaj qʼoʼn tpermis tuʼn tpatrón. ¿Tiʼ jaku bʼant tuʼn Jehová tuʼn ttzaj ttzaqʼweʼn tnaʼj Dios ermano? Jakulo tzaj tqʼoʼn tipumal tuʼn tyolin tukʼil tpatrón. Noqtzun tuʼnj, il tiʼj tuʼn t-xiʼ yolil tukʼil tpatrón ex atlo maj nimku maj. Axpe ikx, jaku txi tqʼamaʼn te tpatrón tuʼn taqʼunan juntl te t-xel ex tuʼn taqʼunan toj juntl qʼij. Ex qa il tiʼj, jaku txi tqʼamaʼn qa nya il tiʼj tuʼn ttzaj chjoʼn twi tkʼuʼj kyoj qʼij mlay tzʼaqʼunan.

11. ¿Tiquʼn il tiʼj tuʼn kukx qnaʼn Dios?

¹¹ Taj Jehová tuʼn kukx qnaʼn Dios te tiʼjju in tzaj bʼaj qkʼuʼj tuʼn (1 Tes. 5:17). Kyaj tqʼamaʼn Jesús qa bʼalo ateʼ junjun qnaʼj Dios mya jun rat che tzajel tzaqʼweʼn (Luc. 11:9). Tuʼntzunju, kukx qo naʼn Dios te Jehová tuʼn tkyaqil qanmi  ex toj alkyexku ambʼil (Luc. 18:​1-7). Aj qnaʼn Dios nimku maj, in kubʼ qyekʼin qa nim toklen toj qwitz aju in xi qqanin te Jehová ex qa in nok qeʼ qkʼuʼj tiʼj qa jaku tzʼonin qiʼj.

12. a) ¿Tiʼ jaku kubʼ qxjelin ex tiquʼn? b) ¿Tiʼ bʼaʼn tuʼn qximen tiʼj tuʼntzun tok qqʼoʼn toklen Jehová aj qnaʼn Dios? (Qʼonka twitza tiʼj recuadro « ¿In kubʼpe nyekʼine qa in nok nqʼoʼne toklen Jehová aj nnaʼne Dios te?»).

¹² Qa mintiʼ in tzaj qkʼamoʼn aju in xi qqanin toj qnaʼj Dios, bʼaʼn tuʼn qximen kyiʼj oxe xjel. Tnejel, «¿tojpe tumel aju in xi nqanine toj nnaʼj Diose?». Chʼixme tkyaqil maj, in kubʼ qximen qa ojtzqiʼn quʼn alkyeju mas bʼaʼn te qe. Noqtzun tuʼnj, atlo maj mlay tzaj tiʼn tbʼanel qe aj tikʼ ambʼil. Jakulo txi qqanin toj qnaʼj Dios tzeʼn qaj tuʼn t-xi bʼinchaʼn tiʼj jun problem, pero atlo maj at juntl tumel mas tbʼanel. Ex atlo maj mintiʼ toklen aju in xi qqanin tukʼil tajbʼil Jehová (1 Juan 5:14). Jun techel, qo ximen kyiʼj mambʼaj ma qo yolin kyiʼj toj tnejel párrafo. Xi kyqanin mambʼaj lu te Jehová tuʼn kukx tten kykʼwal toj axix tok. Jaku kubʼ qximen qa toj tumel aju xi kyqanin. Noqtzun tuʼnj, mintiʼ in nok t-obligarin Jehová qe xjal tuʼn kyajbʼen te. Sino taj tuʼn qajbʼen te ex qe qkʼwal tuʼnju in tzaj anqʼin toj qanmi (Deut. 10:​12, 13; 30:​19, 20). Qa ikju, ¿tiʼtzun jaku txi kyqanin mambʼaj te Jehová? Jaku txi kyqanin te tuʼn tonin kyiʼj tuʼn tpon xnaqʼtzbʼil toj tanmi kykʼwal tuʼntzun tok tkʼujlaʼn Jehová ex tuʼn tok te tamiw (Prov. 22:6; Efes. 6:4).

13. Ik tzeʼn in tzaj tqʼamaʼn Hebreos 4:​16, ¿toj alkye ambʼil in nonin Jehová qiʼj?

¹³ Tkabʼin xjel: «¿In kubʼpe t-ximen  Jehová qa atzun ambʼil lu mas tbʼanel tuʼn ttzaj tqʼoʼn aju in xi nqanine te?». Atlo maj qaj tuʼn ttzaj qʼoʼn naj jun tzaqʼwebʼil tiʼj qnaʼj Dios. Pero ojtzqiʼn tuʼn Jehová alkye ambʼil mas tbʼanel jaku tzʼonin qiʼj (kjawil uʼjit Hebreos 4:16). Qa mintiʼ in tzaj tqʼoʼn Jehová aju in xi qqanin te, jakulo kubʼ qximen qa mlayx tzaj tqʼoʼn qe. Noqtzun tuʼnj, bʼalo oʼkx in nayon tiʼj jun tbʼanel ambʼil. Qo yolin juntl maj tiʼj kuʼxun naʼn Dios tuʼn tqʼanit tiʼj jun yabʼil. Noqwit bʼant jun milagro tuʼn Jehová tuʼn tqʼanit, jaku tqʼama Satanás qa kukx in najbʼen kuʼxun te noq tuʼnju kubʼ tqʼanin (Job 1:​9-11; 2:4). Ex bʼaʼn tuʼn ttzaj qnaʼn qa ya ojtzqiʼn tuʼn Jehová toj alkye ambʼil kʼelel tiʼn tkyaqil yabʼil (Is. 33:24; Apoc. 21:​3, 4). Tuʼntzunju, mintiʼ in qo ayon tuʼn tbʼant jun milagro tuʼn Jehová tuʼn qkubʼ tqʼanin. Qa ikju, ¿tiʼ jaku txi tqanin kuʼxun toj tnaʼj Dios? Jaku txi tqanin tuʼn ttzaj tqʼoʼn Jehová tipumal ex tuʼn miʼn ttzaj bʼajxix tkʼuʼj tuʼntzun tikʼx yabʼil tuʼn ex tuʼn kukx tten tzʼaqli (Sal. 29:11).

14. ¿Tiʼ xnaqʼtzbʼil jaku tzʼel qiʼn tiʼj Janice?

¹⁴ Qo yolin juntl maj tiʼj Janice, aju ermana naʼn Dios tuʼn t-xiʼ ajbʼel toj Betel. Tzmaxi tej tikʼ jweʼ abʼqʼi, el tnikʼ tiʼj tzeʼn tzaj ttzaqʼweʼn Jehová tnaʼj Dios. Tqʼama jlu: «Toj ambʼil aju, onin Jehová wiʼje tuʼn kyten tbʼanel nmode. Jun techel, iltoq tiʼj tuʼn tok qeʼ mas nkʼuʼje tiʼj Jehová, tuʼn tel mas nnikʼe tiʼj Tyol ex tuʼn tel nnikʼe tiʼj qa jaku chin tzalaje noq jaxku tumel in chin ajbʼene te». Tej tikʼ ambʼil, xi qʼoʼn txokbʼil tiʼj Janice ex tiʼj tchmil tuʼn kyajbʼen toj circuito. Tqʼamatl Janice jlu: «Tzaj ttzaqʼweʼn Jehová nnaʼj Diose, pero  nya ik tzeʼn kubʼ nximane. Xi tiʼn ambʼil tuʼn tel nnikʼe tiʼj qa tbʼanel tzaqʼwebʼil tzaj tqʼoʼn weye. In xi nqʼoʼne nimxix chjonte te tuʼnju kubʼ tyekʼin tkʼujlabʼil ex tbʼanel tmod wukʼile».

15. ¿Tiquʼn tbʼanel tuʼn qnaʼn Dios tiʼj juntl tiʼ? (Ax ikx qʼonka twitza kyiʼj foto).

¹⁵ Qo yolin jaʼlo tiʼj toxin xjel: «¿Jakupe chin naʼne Dios tiʼj juntl tiʼ?». Tbʼanel qa ma txi qqʼamaʼn toj qnaʼj Dios tiʼ qaj, pero at maj mas bʼaʼn qa mintiʼ ma txi qqʼamaʼn tuʼntzun tel qnikʼ tiʼj tiʼ tajbʼil Jehová. Qo yolin juntl maj tiʼj ermana xi tqanin toj tnaʼj Dios tuʼn t-xiʼ toj Xnaqʼtzbʼil kye Pakbʼal tiʼj Tkawbʼil Dios. Taj ermana tuʼn t-xi toj xnaqʼtzbʼil lu tuʼntzun tajbʼen jatumel kyaj erman mas onbʼil. Kukx jaku naʼn ermana Dios tiʼj jlu, pero ax ikx jaku txi tqanin te Jehová tuʼn tel tnikʼ tiʼj tzeʼn jaku tzʼajbʼen mas te (Hech. 16:​9, 10). Tibʼajxi jlu, jaku txi tqanin te superintendente te circuito qa at jun congregación nqayin jatumel jaku che pon mas precursor onil. Ax ikx, jaku txi ttzʼibʼin toj sucursal tuʼntzun tel tnikʼ tiʼj jatumel kyaj erman mas onbʼil toj pakbʼabʼil. e

16. ¿Tiʼ jaku tzʼok qeʼ qkʼuʼj tiʼj?

¹⁶ Ik tzeʼn ma tzʼel qnikʼ tiʼj, jaku tzʼok qeʼ qkʼuʼj tiʼj qa ktzajel ttzaqʼweʼn Jehová qnaʼj Dios tukʼil kʼujlabʼil ex toj jun tten tzʼaqli (Sal. 4:3; Is. 30:18). Atlo maj, mlay qo tzaj ttzaqʼweʼn ik tzeʼn qaj, pero kukx in che tzaj tbʼiʼn qnaʼj Dios. Kʼujlaʼn qoʼ tuʼn ex mlayx qo kyaj tqʼoʼn qjunalx (Sal. 9:10). Tuʼntzunju, kukx qeʼk qkʼuʼj tiʼj Jehová toj tkyaqil ambʼil ex qqʼamanx te tkyaqilju in tzaj qbʼis tuʼn (Sal. 62:8).