1. ¿Tiʼ tajtoq Isaías tuʼn t-xi tqʼamaʼn kye xjal te Israel?

 TQʼAMA profeta Isaías qa a Jehová «Dios [ . . . ] in japunxix tyol». Toj yol hebreo, in najbʼen yol «amén» tiʼj yol «in japunxix tyol» (Is. 65:16). A t-xilen yol amén «iktzun tten» moqa «axix tok». In najbʼen yol amén nimku maj toj Biblia tuʼn ttzaj tyekʼin qa ax tok aju in tzaj tqʼamaʼn Jehová ex Jesús ex aju in bʼant kyuʼn. Tuʼntzunju, tajtoq Isaías tuʼn t-xi tyekʼin kye xjal te Israel qa in japun twi tkyaqilju in tzaj tqʼamaʼn Jehová. Ex atzun jlu o bʼant tuʼn Jehová tuʼnju kukx in japun kywi tyol.

2. ¿Tiquʼn jaku tzʼok qeʼ qkʼuʼj tiʼjju o tzaj ttziyen Jehová qe toj ambʼil tzul ex alkyeqe xjel kxel qqʼoʼn tzaqʼwebʼil tiʼj?

² Yajtzun qe, ¿jakupe tzʼok qeʼ qkʼuʼj tiʼjju o tzaj ttziyen Jehová toj ambʼil tzul? Jaku. Tej tikʼ junlo 800 abʼqʼi tanqʼin profeta Isaías, tzaj tqʼamaʼn apóstol Pablo tiquʼn jaku tzʼok qeʼ qkʼuʼj tiʼj qa kjapunel twi tkyaqilju o tzaj ttziyen Jehová. Tqʼama jlu: «Mlay bʼant tuʼn tnikʼan Dios yol» (Heb. 6:18). Qo ximen tiʼj jlu, mlay tzʼetz aʼ chiʼ ex a kʼa toj ax nasimyent. Ax jlu in bʼaj tukʼil Jehová, mlay nikʼan yol tuʼnju tukʼil in tzaj axix tok. Tuʼntzunju, jaku tzʼok qeʼ qkʼuʼj tiʼj tkyaqilju o tzaj ttziyen Jehová, axpe ikx tiʼjju o tzaj tqʼamaʼn tiʼj ambʼil tzul. Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu: ¿Tiʼ o tzaj ttziyen Jehová toj ambʼil tzul? ¿Ex tzeʼn o tzaj tyekʼin qa ax tok kbʼantel jlu tuʼn?

3. a) ¿Alkye promesa mas nim toklen toj kywitz tmajen Jehová? (Apocalipsis 21:​3, 4). b) ¿Tiʼ in tzaj kyqʼamaʼn junjun xjal aj tok kybʼiʼn promesa lu?

³ Nim toklen promesa qo yolil tiʼj toj kywitz kykyaqil tmajen Jehová (kjawil uʼjit Apocalipsis 21:​3, 4). O tzaj ttziyen Jehová qa toj ambʼil tzul ya miʼn ten «kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj». In najbʼen texto lu quʼn nimku maj tuʼn t-xi qqʼuqbʼaʼn kykʼuʼj xjal ex tuʼn t-xi qqʼamaʼn kye tzeʼn kʼokel qanqʼibʼil toj Paraíso. Pero aj tok kybʼiʼn junjun xjal lu, in tzaʼj kyqʼamaʼn: «Tbʼanel tbʼinx, pero saber qa kjapunel twiʼ».

4. a) ¿Alkyeqe kabʼe tiʼ ojtzqiʼntoq tuʼn Jehová? b) ¿Tiʼ mas bʼant tuʼn Jehová tej ttzaj tqʼamaʼn t-ximbʼetz?

⁴ Tej tajbʼen apóstol Juan tuʼn Jehová tuʼn tkubʼ ttzʼibʼin promesa tiʼj Paraíso, ojtzqiʼntoq tuʼn qa kʼajbʼel quʼn toj pakbʼabʼil. Ax ikx, ojtzqiʼntoq tuʼn qa kwest kʼelel toj kywitz nim xjal tuʼn tok qeʼ kykʼuʼj tiʼj «tqanil akʼaj» o tzaj ttziyen (Is. 42:9; 60:2; 2 Cor. 4:​3, 4). Qa ikju, ¿tzeʼn jaku qo onin kyiʼj txqantl tuʼn tok qeʼ kykʼuʼj tiʼj qa ax tok kjapunel kywi yol tkuʼx toj Apocalipsis 21:3 ex 4? ¿Ex tzeʼn jaku chʼiy qʼuqbʼil qkʼuʼj tiʼj Jehová ex kyiʼj ttziybʼil? Nya oʼkx o tzaj ttziyen Jehová qa ktel jun paraíso, sino in tzaj tyekʼin qe tiquʼn jaku tzʼok qeʼ qkʼuʼj tiʼj. Qo xnaqʼtzan tiʼj.

5. ¿Alkyeqe versículo jaku che onin qiʼj tuʼn tok qeʼ qkʼuʼj tiʼj tpromesa Jehová ex tiʼ in tzaj kyqʼamaʼn?

⁵ Kyoj junjuntl versículo, in tzaj tyekʼin Jehová qe tiquʼn jaku tzʼok qeʼ qkʼuʼj tiʼj qa ktel jun paraíso. In tzaj kyqʼamaʼn jlu: «Ex tma Dios aju qʼuql tuj tqʼuqbʼil jatum in kawin: —Tkyaqil kʼokel te akʼaj wuʼne. Ex tzaj tmaʼn weye: —Tzʼibʼankuya, porke aqeju yol lu axix tok ex bʼaʼn tuʼn tqeʼ kykʼuʼje kyiʼj. Ex tzaj tmaʼn weye: —Ma bʼant. Aqine atine t-xe tnejel ex kukx chin tele ok tjapun bʼaj mankbʼil tqʼijlalil» (Apoc. 21:​5, 6a).

6. ¿Tiquʼn in nonin texto te Apocalipsis 21:5 ex 6 qiʼj tuʼn tok qeʼ mas qkʼuʼj tiʼj ttziybʼil Jehová?

⁶ ¿Tiquʼn in nok qeʼ qkʼuʼj tiʼjju o tzaj ttziyen Jehová kyuʼn yol lu? In tzaj tqʼamaʼn libro Apocalipsis qe yol lu kyiʼj versículo ma che jaw quʼjin: b «Aju in bʼant tuʼn Jehová, in nok ik tzeʼn in kubʼ tfirmarin jun uʼj tuʼn ttzaj tqʼamaʼn qe qa ax tok che japunel twi tyol». Toj Apocalipsis 21:3 ex 4 in jaw quʼjin aju o tzaj ttziyen Jehová qe. Atzun toj versículo 5 ex 6, in tzaj tyekʼin qa ax tok kjapunel twi tyol ex in nok ik tzeʼn in kubʼ tfirmarin. Jaʼlo, qo xnaqʼtzan tiʼj tzeʼn in nonin Jehová qiʼj tuʼn tok qeʼ qkʼuʼj tiʼj.

7. ¿Alkye in yolin aj t-xi tzyet versículo 5 ex tiquʼn nim toklen?

⁷ In nonin Jehová qiʼj tuʼn tok qeʼ qkʼuʼj tiʼj aj ttzaj tqʼamaʼn qe yol lu: «Ex tma Dios aju qʼuql tuj tqʼuqbʼil jatum in kawin» (Apoc. 21:5a). Oʼkx in tzaj yolin Jehová oxe maj kyoj witzikʼ in yolin uʼj te Apocalipsis tiʼj ex in tzaj tqʼamaʼn qe yol lu jun maj naʼmxtoq t-xi tzyet tuʼn tyolin. Mintiʼ ajbʼen jun anjel nix Jesús tuʼn Jehová tuʼn ttzaj tqʼamaʼn tqanil lu, sino ax tzaj yolin. Tuʼn jlu, jaku tzʼok qeʼ qkʼuʼj tiʼjju in tzaj tqʼamaʼn yajxitl tuʼnju «mibʼan te Dios nikʼan yol» (Tito 1:2). Tuʼntzunju, jaku tzʼok qeʼ qkʼuʼj tiʼj qa ax tok che kjapunel qe yol tkuʼx toj Apocalipsis 21:5 ex 6.

8. ¿Tiʼ in tzaj tqʼamaʼn Jehová tuʼn ttzaj tyekʼin qa ax tok kjapunel twi tyol? (Isaías 46:10).

⁸ Tzaj tqʼamaʼntl Jehová jlu: «Tkyaqil kʼokel te akʼaj wuʼne». Atzun jlu kbʼantel tuʼn Jehová toj ambʼil tzul. Ex tuʼnju qʼuqli tkʼuʼj tiʼj qa kjapunel twi tyol, in nok ik tzeʼn ya in bʼant tuʼn toj ambʼil jaʼlo (kjawil uʼjit Isaías 46:10).

9. a) ¿Tiʼ jaku tzʼel qnikʼ tiʼj aj qximen kyiʼj yol «tkyaqil kʼokel te akʼaj wuʼne»? b) ¿Tiʼ kbʼajel tiʼj «kyaʼj» ex «txʼotxʼ» at toj ambʼil jaʼlo?

⁹ ¿Tiʼ tajtoq Jehová tuʼn ttzaj tqʼamaʼn kyukʼil yol «tkyaqil kʼokel te akʼaj wuʼne» aju tkuʼx toj Apocalipsis 21:5? Jaku tzʼel qnikʼ tiʼj kabʼe tiʼ aj qximen tiʼjju in tzaj tqʼamaʼn capítulo 21 te Apocalipsis. Tnejel, kʼelel tiʼn Jehová tkyaqil nya bʼaʼn ex tkabʼin ktel jun akʼaj txʼotxʼ. In tzaj tqʼamaʼn Apocalipsis 21:1 jlu: «Aju tnejel kyaʼj ex ju tnejel txʼotxʼ otoq che kubʼ naj». In kubʼ techlaʼn «tnejel kyaʼj» qe gobierno ateʼ tjaqʼ tipumal Satanás ex qe demonio (Mat. 4:​8, 9; 1 Juan 5:19). Ex at maj in najbʼen yol «txʼotxʼ» toj Biblia tuʼn tyolin kyiʼj xjal najli qe twitz (Gén. 11:1; Sal. 96:1). Tuʼntzunju, aj ttzaj qʼamaʼn «tnejel txʼotxʼ», atz in yolin kyiʼj xjal in che bʼinchaʼn nya bʼaʼn. Tuʼn jlu, in nel qnikʼ tiʼj qa nya oʼkx kbʼantel junjun chʼixpubʼil tuʼn Jehová tiʼj «kyaʼj» ex tiʼj «txʼotxʼ». Sino kbʼel t-xiten tkyaqil ex ktel «jun akʼaj kyaʼj ex jun akʼaj txʼotxʼ», toj juntl yol, ktel jun akʼaj gobierno ex kkawil kyibʼaj xjal tzʼaqli qe.

10. ¿Alkye juntl tten kʼokel tkyaqil «te akʼaj» tuʼn Jehová?

¹⁰ ¿Alkye juntl tten kʼokel tkyaqil «te akʼaj» tuʼn Jehová? (Apoc. 21:5). Kʼokel Txʼotxʼ te jun tbʼanel lugar tuʼn ex kʼonil kyiʼj xjal tuʼn kyok te tzʼaqli. Kyaj tqʼamaʼn profeta Isaías qa kʼokel Txʼotxʼ te jun paraíso ik tzeʼn jardín te Edén. Ex teyele junjun qe kʼokel te tzʼaqli juntl maj. Kbʼel tqʼanin Jehová qe xjal kox, qe moẍ, qe chkin kywiʼ ex che kjawil anqʼin kyimni tuʼn (Is. 25:8; 35:​1-7).

11. ¿Tiʼ xi tqʼamaʼn Jehová te Juan ex tiquʼn?

¹¹ ¿Tiʼ mas tqʼama Jehová tuʼntzun tok qeʼ qkʼuʼj tiʼj? Xi tqʼamaʼn jlu te Juan: «Tzʼibʼankuya, porke aqeju yol lu axix tok ex bʼaʼn tuʼn tqeʼ kykʼuʼje kyiʼj» (Apoc. 21:5). Nya oʼkx xi tqʼamaʼn Jehová te Juan tuʼn tkubʼ ttzʼibʼin qe yol lu, sino tqʼama: «Aqeju yol lu axix tok ex bʼaʼn tuʼn tqeʼ kykʼuʼje kyiʼj». Toj juntl yol, xi tqʼamaʼn Jehová te qa kjapunel kywiʼ. Tbʼanelxix tuʼnju xi tbʼiʼn Juan tyol Jehová ex kubʼ ttzʼibʼin. Tuʼnju bʼant jlu tuʼn, jaku tzʼel qnikʼ tiʼj qa ktel jun paraíso ex jaku qo ximen kyiʼj kʼiwlabʼil che ktzajel qkʼamoʼn.

12. ¿Tiquʼn jaku txi tqʼamaʼn Jehová «ma bʼant»?

¹² ¿Tiʼ tqʼama Jehová yajxitl? Tqʼama jlu: «Ma bʼant» (Apoc. 21:6). Kyuʼn yol lu, yolin Jehová ik tzeʼn ya otoq che bʼant qe tiʼchaq tzaj ttziyen tiʼj Paraíso. Toj tumel tej tqʼama jlu tuʼnju mintiʼ jun tiʼ jaku tzʼel qʼinte ambʼil te tuʼn tjapun twi t-ximbʼetz. Yajxitl, in tzaj tqʼamaʼntl Jehová juntl tiʼ tuʼntzun tok qeʼ mas qkʼuʼj tiʼj qa kjapunel twi tyol. Qo xnaqʼtzan tiʼj.

13. ¿Tiquʼn jaku tzaj tqʼamaʼn Jehová «aqine atine t-xe tnejel ex kukx chin tele ok tjapun bʼaj mankbʼil tqʼijlalil»?

¹³ Ik tzeʼn ma qo xnaqʼtzan tiʼj, tzaj yolin Jehová oxe maj kyoj witzikʼ ok tkeʼyin  Juan (Apoc. 1:8; 21:​5, 6; 22:13). Tej tyolin, kukx tqʼama jlu: «Aqine atine t-xe tnejel ex kukx chin tele ok tjapun bʼaj mankbʼil tqʼijlalil, ik tzaʼn ju letr A ex Z» moqa Alfa ex Omega. Toj yol griego, in nok qʼoʼn tbʼi tnejel letra te Alfa ex aju mankbʼil te Omega. Aj ttzaj tqʼamaʼn Jehová qe yol lu, in tzaj tyekʼin qa kbʼel tbʼajsaʼn aju o txi tzyet tuʼn.

14. a) Qʼamantza jun techel toj alkye ambʼil tqʼama Jehová «Alfa» ex toj alkye ambʼil kxel tqʼamaʼn «Omega». b) ¿Tiʼ in tzaj tqʼamaʼn Jehová qe toj Génesis 2:1 a 3?

¹⁴ Tej tkubʼ tbʼinchaʼn Jehová Adán ex Eva, xi tqʼamaʼn kye alkye t-ximbʼetz at kyiʼj xjal ex tiʼj Txʼotxʼ. In tzaj tqʼamaʼn Tyol Dios jlu: «E kubʼtzun tkyʼiwlaʼn ex xi tmaʼn kye kyjaʼ: Che kʼwaʼline, chmet-x kybʼaje, kynojsame twitz txʼotxʼ ex che kawine tibʼaj» (Gén. 1:28). Tej ttzaj tqʼamaʼn Jehová tnejel maj alkye t-ximbʼetz, ok ik tzeʼn tqʼama «Alfa». Ex jaku txi qqʼamaʼn qa kxel tqʼamaʼn «Omega» aj tok Txʼotxʼ te jun paraíso ex aj tnoj kyuʼn t-xeʼchel Adán ex Eva tzʼaqliqe. Tej tbʼaj «bʼant kyaʼj ex txʼotxʼ tukʼix tkyaqilju at kywitz» tuʼn Jehová, tzaj tqʼamaʼn juntl tiʼ in tzaj tyekʼin qa kjapunel tyol. Tzaj tqʼamaʼn tuʼn tok twuqin qʼij te xjan (kjawil uʼjit Génesis 2:​1-3). ¿Tiʼ t-xilen jlu? A t-xilen qa kubʼ t-ximen Jehová tuʼn tjapun twi t-ximbʼetz tiʼj Txʼotxʼ ex kyiʼj xjal toj twuqin qʼij. Ex aj tkubʼaj qʼij lu, kjapunel twi kykyaqil yol o tzaj tqʼamaʼn.

15. ¿Tiquʼn jakutoq kubʼ qximen qa mlayxtoq japun twi t-ximbʼetz Jehová?

¹⁵ Tuʼnju mintiʼ nimen Adán ex Eva te Jehová, e ok te aj il ex kyaj kyqʼoʼn il ex kamik qibʼaj (Rom. 5:12). Tej tbʼaj jlu, kubʼlo t-ximen Satanás qa el tiʼn ambʼil te Jehová tuʼn tjapun twi t-ximbʼetz tuʼn tnoj twitz Txʼotxʼ kyuʼn xjal bʼaʼn che nimen ex  tzʼaqli qe. Ex kubʼlo t-ximen qa mlaytoq bʼant jun tiʼ tuʼn Jehová tuʼn t-xi tqʼamaʼn «Omega». Jun techel, noqwit kubʼ tnajsaʼn Jehová Adán ex Eva ex noqwit e kubʼ tbʼinchaʼn junjuntl xjal tzʼaqli tuʼn tjapun twi t-ximbʼetz, ¿tiʼwtlo tzaj tqʼamaʼn Satanás? Tzajwitlo tqʼamaʼn qa in nikʼan Jehová yol. ¿Tiquʼn? Tuʼnju otoq kyaj tqʼamaʼn toj Génesis 1:28 qa kyuʼn tkʼwal Adán ex Eva knojel twitz Txʼotxʼ.

16. ¿Tiquʼn jakutoq kubʼ t-ximen Satanás qa mlayx japun twi t-ximbʼetz Jehová?

¹⁶ ¿Tiʼ juntl tiʼ kubʼ t-ximen Satanás? Kubʼlo t-ximen qa maske jakutoq txi tqʼoʼn Jehová ambʼil te Adán ex Eva tuʼn kyul itzʼj kykʼwal, mlayxtoq che ok te tzʼaqli (Ecl. 7:20; Rom. 3:23). Noqwit bʼaj jlu, tzajwitlo tqʼamaʼn Satanás qa mintiʼ japun twi t-ximbʼetz Jehová. ¿Tiquʼn? Tuʼnju mlay noj twitz Txʼotxʼ kyuʼn xjal tzʼaqli.

17. ¿Tiʼ bʼant tuʼn Jehová tej tbʼinchaʼn Adán ex Eva il ex tiʼ tbʼanel ktzajel tuʼn jlu? (Ax ikx qʼonka twitza tiʼj dibujo).

¹⁷ Jawlo labʼin Satanás tiʼjju bʼant tuʼn Jehová tuʼn tjapun twi t-ximbʼetz maske otoq bʼinchaʼn Adán ex Eva il (Sal. 92:5). Tej t-xi tqʼoʼn Jehová ambʼil tuʼn tul itzʼj kykʼwal Adán ex Eva, kubʼ tyekʼin qa mintiʼ in nikʼan yol. Ax ikx, kubʼ tyekʼin qa mintiʼ jun tiʼ jaku tzʼel qʼinte ambʼil te tuʼn t-xi tbʼinchaʼn aju in tzaj tqʼamaʼn. Tuʼntzunju, tzaj ttziyen tuʼn tul jun «tiyjil» tuʼn t-xi tqʼoʼn tchwinqlal tuʼn tchjet kyil tkʼwal Adán ex Eva bʼaʼn che nimen. Iktzun tten kukx japun twi t-ximbʼetz (Gén. 3:15; 22:18). Mintiʼlo kubʼ t-ximen Satanás qa kbʼantel jlu tuʼn Jehová. ¿Tiquʼn? Tuʼnju tzaj tqʼoʼn Jehová chojbʼil tuʼnju kʼujlaʼn qoʼ tuʼn (Mat. 20:28; Juan 3:16). Atzunte Satanás, mlayx kubʼ tyekʼin mod lu tuʼnju oʼkx in ximen tiʼjx. Noq tuʼn chojbʼil xi tqʼoʼn Jehová, kjapunel twi t-ximbʼetz tuʼn kyanqʼin tkʼwal Adán ex Eva bʼaʼn che nimen ex tzʼaqli qe toj jun paraíso aj tkubʼaj mil abʼqʼi. Aj tpon ambʼil lu, kxel tqʼamaʼn Jehová «Omega» moqa ma kubʼaj.

18. ¿Alkyeqe oxe tiʼ in tzaj tqʼamaʼn Jehová qe tuʼn tok qeʼ qkʼuʼj tiʼj? (Ax ikx qʼonka twitza tiʼj recuadro « Oxe tiquʼn jaku tzʼok qeʼ qkʼuʼj tiʼj tpromesa Jehová»).

¹⁸ Toj xnaqʼtzbʼil lu, ma tzʼel qnikʼ tiʼj tiquʼn jaku tzʼok qeʼ qkʼuʼj tiʼj qa kʼokel  Txʼotxʼ te jun paraíso. ¿Tiʼ jaku txi qqʼamaʼn kye txqantl tuʼn tok qeʼ kykʼuʼj tiʼj qa kjapunel twi tyol Jehová? Tnejel, qa ax Jehová o tzaj qʼamante aju kbʼantel tuʼn. In tzaj tqʼamaʼn uʼj te Apocalipsis jlu: «Ex tma Dios aju qʼuql tuj tqʼuqbʼil jatum in kawin: —Tkyaqil kʼokel te akʼaj wuʼne». Taj Jehová tuʼn tjapun twi t-ximbʼetz ex at tnabʼil ex tipumal tuʼn tbʼant tuʼn. Tkabʼin, qʼuqli tkʼuʼj Jehová tiʼj qa kjapunel twi tyol ex in yolin kyiʼj ik tzeʼn ya o che bʼant tuʼn. Tuʼntzunju, in tzaj tqʼamaʼn jlu kyiʼj tyol: «Axix tok ex bʼaʼn tuʼn tqeʼ kykʼuʼje kyiʼj». Ex tqʼamatl: «Ma bʼant». Toxin, tkyaqilju in xi tzyet tuʼn t-xi tbʼinchaʼn Jehová, in kubʼaj tuʼn. Atzun jlu in tzaj kyyekʼin yol lu: «Aqine atine t-xe tnejel ex kukx chin tele ok tjapun bʼaj mankbʼil tqʼijlalil». Ikju, kbʼel tyekʼin Jehová qa in nikʼan Satanás yol ex qa mlay tzʼel tiʼn ambʼil te tuʼn tjapun twi t-ximbʼetz.

19. ¿Tiʼ jaku bʼant quʼn qa mintiʼ in xi tokslaʼn jun xjal qa kʼokel Txʼotxʼ te jun paraíso?

¹⁹ Bʼaʼn tuʼn ttzaj tnaʼna qa mas kchʼiyel qʼuqbʼil tkʼuʼja kyiʼj ttziybʼil Jehová aj t-xi tqʼamaʼna kye txqantl tiquʼn jaku tzʼok qeʼ qkʼuʼj tiʼj. Aj tjaw tuʼjina texto te Apocalipsis 21:4 toj pakbʼabʼil ex in tzaj tqʼamaʼn xjal jlu teya: «Tbʼanel tbʼinx, pero saber qa kjapunel twiʼ», ¿tiʼ jaku bʼant tuʼna? Jaku jaw tuʼjina ex jaku txi tchikʼbʼaʼna versículo 5 ex 6 te. Yekʼinxa te xjal tiʼ o tqʼama Jehová tuʼn ttzaj tyekʼin qa ax tok kjapunel twi tyol. In nok jlu ik tzeʼn o kubʼ tfirmarin jun uʼj tiʼjju o tzaj ttziyen (Is. 65:16).