NOQWIT viajarin teya toj isla te Sangir Besar toj tnam Indonesia kyoj abʼqʼi o che kyaj, e okwitlo tkeʼyina oxe ermana ttzi mar. Ok ojtzqiʼn kywitz tuʼnju in che onin kyiʼj xjal tuʼn tel kynikʼ tiʼj Biblia, pero nya a jlu bʼant kyuʼn ttzi mar. ¿Tiʼtzun in bʼant kyuʼn?

Tnejel, e okx laqʼeʼ ermana toj mar jyol matij abʼj aqeju chʼixme ik tzeʼn jun pelot te fútbol. Yajxitl, jax kyiʼn ttzi mar ex e kubʼ qeʼ tibʼaj jun silla te tzeʼ tuʼn tbʼaj kybʼuchin tukʼil jun martillo tuʼntzun kyok te mas tal chʼin twitz jun jos. Tej tbʼant jlu kyuʼn, kux kyqʼoʼn toj jun tkubʼil te plástico ex e jax bʼet tibʼaj jun escalera tuʼn kypon kyja. Ex kubʼ kychmoʼn qe abʼj toj jun costal matij. Te mankbʼil, e pon camión qʼilte kye costal te abʼj tuʼn kyajbʼen tuʼn kybʼaj bʼinchet bʼe.

Jun kyxol qe ermana lu Hulda tbʼi. At maj, mas nim ambʼil aqʼunan ttzi mar kywitz qe tukʼil. Tej ttzaj chjoʼn twi abʼj te Hulda, onin tiʼj tfamilia tuʼn ttzaj laqʼet junjun tiʼchaq at tajbʼen kye. Pero tajtoq Hulda tuʼn ttzaj tlaqʼoʼn jun ttablet tuʼntzun tokx toj JW Library^®, tuʼntzunju kubʼ t-ximen tuʼn t-xi tkʼuʼn chʼin tpwaq. El tnikʼ ermana lu tiʼj qa jakutoq che onin video ex qe xnaqʼtzbʼil tiʼj tuʼn tbʼant-xix tpakbʼaʼn ex tuʼn tel mas tnikʼ tiʼj Biblia.

Toj jun xjaw tukʼil mij, aqʼunan Hulda kabʼe or tkyaqil prim. Bʼaj tbʼuchin qe abʼj ex tuʼn jlu noj jun tal camión tuʼn. Ex tuʼn pwaq tzaj qʼoʼn te, tzaj tlaqʼoʼn tablet otoq kubʼ t-ximen.

Tzaj tqʼamaʼn Hulda jlu: «Nim in sikte ex tzaj choʼn nximlale tuʼnju bʼaj nbʼuchine qe abʼj. Pero ikʼ tnaʼl siktleʼn wuʼne tej tzaj qʼoʼn tablet weye ex tej tok nqʼoʼne nwitze tiʼj qa jakutoq tzʼajbʼen wuʼne toj pakbʼabʼil ex tuʼn tbʼaj nbʼinchaʼne ntene kyiʼj chmabʼil». Ax ikx tzaj tqʼamaʼn Hulda qa onin tablet tiʼj tej tzaj pandemia tuʼn tok tconectarin tibʼ kyoj chmabʼil ex toj pakbʼabʼil. ¡In kubʼ qnaʼn nimxix tzalajbʼil tuʼnju tzaj tlaqʼoʼn Hulda aju mas tajbʼiltoq!