XNAQʼTZBʼIL 45
BʼITZ 138 Nim kyoklen erman ma che tijen
Junjun xnaqʼtzbʼil jaku tzʼel qiʼn kyiʼj mankbʼil yol kyqʼama junjun tmajen Jehová
«Qe tij xjal at kynabʼl; ax ju kyabʼqʼiyil ma tzaj qʼonte kynabʼl» (JOB 12:12).
¿TIʼ KʼELEL QNIKʼ TIʼJ?
Kʼelel qnikʼ tiʼj qa bʼaʼn qo nimen te Jehová, in tzaj ttziyen qe qa qo ul tkʼiwlaʼn jaʼlo ex tzul tqʼoʼn qchwinqlal te jumajx toj ambʼil tzul.
1. ¿Tiquʼn at nim xnaqʼtzbʼil jaku tzaj kyqʼoʼn qeju ma che tijen qe?
QKYAQILX qaj tuʼn qtzaj onin tuʼn tel qnikʼ tiʼj alkye mas bʼaʼn tuʼn tbʼant quʼn toj qanqʼibʼil. Nimxix jaku che onin qe ansyan qiʼj ex qe erman ma che chʼiy toj kyokslabʼil. Maske ya ma che tijen, mintiʼ tuʼn tkubʼ qximen qa ya mintiʼ kyajbʼen qe kyconsej toj ambʼil jaʼlo. Taj Jehová tuʼn tel qkanoʼn kyiʼj erman ma che tijen. Tuʼnju mas nim ambʼil o che anqʼin, o tzikʼ kywitz kyiʼj junjun tiʼchaq, mas at kyojtzqibʼil ex mas ma at kynabʼil (Job 12:12).
2. ¿Tiʼ kʼelel qnikʼ tiʼj toj xnaqʼtzbʼil lu?
2 Toj ambʼil ojtxe e ajbʼen junjun xjal otoq che tijen tuʼn Jehová tuʼn t-xi tqʼuqbʼaʼn kykʼuʼj tmajen ex tuʼn kykubʼ nej kywitz. Qo ximen kyiʼj junjun techel ik tzeʼn Moisés, David ex apóstol Juan. E anqʼin toj junxichaq ambʼil ex junxichaq tiʼchaq e ikʼ kyiʼj. Tej chʼixtoq kykyim, xi kyqʼoʼn junjun consej kye qeju mas kuʼxun. Kyoxil e yolin tiʼj qa nim toklen tuʼn qnimen te Dios. Ok tilil tuʼn Jehová tuʼn tkyaj tzʼibʼin kyyol tuʼn tajbʼen qe toj ambʼil jaʼlo. Qa kuʼxun qoʼ moqa ma qo chʼiy, jaku che onin kyconsej qiʼj qkyaqilx (Rom. 15:4; 2 Tim. 3:16). Toj xnaqʼtzbʼil lu, kʼelel qnikʼ tiʼj tiʼ kyqʼama oxe tmajen Jehová lu tej chʼixtoq kykyim ex tiʼ xnaqʼtzbʼil jaku tzʼel qiʼn tiʼjju kyqʼama.
«CHE TELE NIM QʼIJ TWITZ TXʼOTXʼ»
3. ¿Tzeʼn ajbʼen Moisés tuʼn Jehová?
3 Kukx ajbʼen Moisés te Jehová toj tkyaqil tanqʼibʼil. Ok te profeta, te jwes, te nejenel kye soldad ex te aj tzʼibʼil. Tuʼn jlu in nel qnikʼ tiʼj qa ten nim tojtzqibʼil kyiʼj nimku tiʼchaq. Kubʼ nej kywitz aj Israel tej kyetz tzaqpiʼn te majen toj tnam Egipto ex ok te testiw kyiʼj nim milagro e bʼant tuʼn Jehová. Ajbʼen Moisés tuʼn Dios tuʼn tkubʼ tzʼibʼit qeju tnejel jweʼ libro te Biblia, tuʼn tkubʼ tzʼibʼit Salmo 90 ex bʼalo a kubʼ tzʼibʼinte Salmo 91. Ax ikx, alo kubʼ tzʼibʼinte uʼj te Job.
4. ¿Alkyeqe tajtoq Moisés tuʼn t-xi tqʼuqbʼaʼn kykʼuʼj ex tiquʼn?
4 Tej qʼiʼntoq 120 abʼqʼi tuʼn Moisés ex tej chʼixtoq tkyim, e ok tchmoʼn qe israelita tuʼn t-xi tnaʼn kye tiʼ otoq tzʼok kyqʼoʼn kywitz tiʼj ex tiʼ otoq che ikʼ toj. Kyxol qe jlu, e ten junjun ok kyqʼoʼn kywitz kyiʼj milagro e bʼant tuʼn Jehová tej kuʼxun qe ex ok kyqʼoʼn kywitz tiʼj tzeʼn kubʼ tqʼoʼn Jehovʼa kykastiw xjal te Egipto (Éx. 7:3, 4). Ax ikx, otoq tzʼok kyqʼon kywitz tiʼj tzeʼn kubʼ tpan tibʼ mar Rojo tuʼn kyikʼtz bʼet toj tzqij txʼotxʼ ex tzeʼn e kyim tsoldad faraón (Éx. 14:29-31). Ya otoq tzʼel kynikʼ tiʼj toj desierto tzeʼn xqʼuqin Jehová kyiʼj (Deut. 8:3, 4). Tuʼntzunju, tej chʼixtoq kyokx xjal te Israel toj Txʼotxʼ Tziyen Maj, xi tqʼuqbʼaʼn Moisés kykʼuʼj tej naʼmxtoq tkyim. a
5. Tej chʼixtoq tkyim Moisés, ¿alkyeqe kʼiwlabʼil tqʼama qa jakutoq tzaj kykʼamoʼn israelita? (Deuteronomio 30:19, 20).
5 ¿Tiʼ xi tqʼamaʼn Moisés kye? (Kjawil uʼjit Deuteronomio 30:19, 20). At nim kʼiwlabʼil jakutoq tzaj kykʼamoʼn aj Israel aj kyokx toj Txʼotxʼ Tziyen Maj. Tuʼn tonbʼil Jehová jakutoq che anqʼin nim ambʼil toj Txʼotxʼ otoq tzaj tziyen kye. ¡Tbʼanelxix txʼotxʼ aju tuʼnju tbʼanel awal in jaw twitz! Tej tyolin Moisés tiʼj txʼotxʼ lu, tqʼama: «Ateʼ nintz tnam tbʼanilxix mya kyuʼne jaw kybʼinchaʼne; ateʼ ja tuj, nojni kyuj kyuʼn tiʼxti tbʼanilxix mya kyuʼne e noj; ateʼ xoch tuj, mya kyuʼne kuʼx kylakuʼne; ex ateʼ tqan uva tukʼix tqan olivo tuj, mya kyuʼne kuʼx kyawaʼne» (Deut. 6:10, 11).
6. ¿Tiquʼn xi tqʼoʼn Dios ambʼil tuʼn tkubʼ kyiʼj aj Israel kyuʼn txqantl tnam?
6 Ax ikx xi tqʼamaʼn Moisés kye aj Israel tiʼtoq kbʼajel kyiʼj qa mintiʼ ẍe nimen. Qa kyajtoq tuʼn kukx kyanqʼin toj tbʼanel txʼotxʼ aju, iltoq tiʼj tuʼn t-xi kynimen qe tkawbʼil Jehová. Xi tqʼamaʼn Moisés jlu kye: «Kyskʼon jawe chwinqlal» ex «kukx che lpeʼke» tiʼj Jehová. Pero mintiʼ e nimen israelita te Jehová. Tuʼntzunju, tej tikʼ ambʼil, xi tqʼoʼn Dios ambʼil tuʼn tkubʼ kyiʼj kyuʼn soldad te tnam Asiria ex yajxitl kyuʼn soldad te tnam Babilonia ex i ex qʼin kyuʼn toj kytnam (2 Rey. 17:6-8, 13, 14; 2 Crón. 36:15-17, 20).
7. ¿Tiʼ xnaqʼtzbʼil jaku tzʼel qiʼn kyiʼj tyol Moisés? (Ax ikx qʼonka twitza kyiʼj tilbʼilal).
7 ¿Tiʼ xnaqʼtzbʼil jaku tzʼel qiʼn tiʼj jlu? Qa ma qo nimen te Jehová jaku qo anqʼin te jumajx. Ik tzeʼn kye aj Israel chʼixtoq kyokx toj Txʼotxʼ Tziyen Maj, ax ikx qe chʼix qokx toj akʼaj twitz Txʼotxʼ o tzaj ttziyen Dios qe. Chʼix tpon ambʼil tuʼn tok Txʼotxʼ te jun paraíso (Is. 35:1; Luc. 23:43). Ya miʼn ten Tajaw il ex qe t-demonio (Apoc. 20:2, 3). Ya mlay che el paʼn xjal tiʼj Jehová tuʼn okslabʼil nya ax tok (Apoc. 17:16). Ya mlay ten kykawbʼil xjal in nok kybʼinchaʼn nya bʼaʼn kyiʼj xjal (Apoc. 19:19, 20). Ex mlay txi tqʼon Jehová ambʼil te nijun xjal tuʼn tkubʼ tbʼinchaʼn nya bʼaʼn toj Paraíso (Sal. 37:10, 11). Kykyaqil xjal kxel kynimen tley Jehová, tuʼntzunju, ktel tzalajbʼil, mujbʼabʼil ex kʼujlabʼil kyxol kykyaqil xjal (Is. 11:9). ¡Tbʼanelxix ambʼil chʼix tul! Ex mas tbʼanel tuʼnju nya oʼkx qo anqʼil junjun syent abʼqʼi, sino qo anqʼil te jumajx qa ma qo nimen te Jehová (Sal. 37:29; Juan 3:16).
Qa ma txi qnimen Jehová, qo anqʼil toj Tbʼanel Najbʼil tzalu twitz Txʼotxʼ te jumajx ex nya oʼkx junjun syent abʼqʼi. (Qʼonka twitza tiʼj párrafo 7).
8. ¿Tzeʼn onin tiʼj jun misionero tej t-ximen tiʼj anqʼibʼil te jumajx? (Judas 20, 21).
8 Qa kukx ma qo ximen tiʼj qchwinqlal te jumajx, kukx qo ajbʼel te Jehová noq tiʼxku ma qo ok weʼ twitz (kjawil uʼjit Judas 20, 21). Ax ikx, in nonin qiʼj tuʼn tkubʼ tiʼj nya bʼaʼn achbʼil quʼn. Atzun jlu bʼant tuʼn jun ermano misionero ten África. Tqʼama jlu: «Tej tel nnikʼe tiʼj qa mintiʼ ma chin nimane te Jehová mlaytoq chin anqʼine te jumajx, tuʼntzunju, kubʼ nximane tuʼn tok tilil wuʼne tuʼn tkubʼ tiʼj nya bʼaʼn wuʼne ex in kubʼsane te Jehová tuʼn tonin wiʼje. Tuʼnju onin Jehová wiʼje, kukx in kubʼ nnaʼne bʼaʼn aj wajbʼene te».
«TUʼNTZUN TEL BʼAʼN TEYA TUJ TKYAQILJU OK TBʼINCHAʼYA»
9. ¿Alkyeqe nya bʼaʼn ok weʼ David twitz toj tkyaqil tanqʼibʼil?
9 Ok David te jun rey nim toklen, te profeta, te soldad, ex te jun bʼinchal bʼitz ex poema. Ok weʼ David twitz nimku nya bʼaʼn. Ex toj nimku abʼqʼi el oq tuʼn tklet, tuʼnju tajtoq rey Saúl tuʼn tkubʼ tbʼyoʼn. Ex tej otoq tzʼok te rey el oq juntl maj tuʼnju tajtoq Absalón, aju tkʼwal, tuʼn tkubʼ tbʼyoʼn ex tuʼn tel tiʼn toklen te rey. Maske ok we twitz nim nya bʼaʼn ex at maj kubʼ tzʼaq toj junjun il, kukx ajbʼen te Jehová tejxi tkyim. Tqʼama Jehová qa o tzalaj tanmi tuʼn David. Tuʼntzunju, tbʼanel tuʼn t-xi qbʼiʼn qe consej tqʼama David (Hech. 13:22; 1 Rey. 15:5).
10. ¿Tiquʼn xi tqʼoʼn David tconsej Salomón?
10 Qo ximen tiʼjju xi tqʼamaʼn David te Salomón, aju tkʼwal yajxitl ok te rey. Otoq jaw tskʼoʼn Jehová kuʼxun lu tuʼntzun kukx tten kʼulbʼil axix tok tuʼn ex tuʼn tjaw tbʼinchaʼn jun templo te nimsabʼil tbʼi Jehová (1 Crón. 22:5). Kʼokeltoq weʼ Salomón twitz junjun nya bʼaʼn. Tuʼntzunju, qo xnaqʼtzan tiʼj consej xi tqʼoʼn David te.
11. ¿Tiʼ xi tqʼamaʼn David te Salomón, ex tzeʼn e japun kywi tyol? (1 Reyes 2:2, 3; ax ikx qʼonka twitza kyiʼj tilbʼilal).
11 ¿Tiʼ xi tqʼamaʼn David te? (kjawil uʼjit 1 Reyes 2:2, 3). Xi tqʼamaʼn David te tkʼwal qa oʼkx kʼelel bʼaʼn tkyaqil toj tanqʼibʼil qa ma txi tbʼiʼn tyol Jehová. Ex atzun jlu bʼant tuʼn Salomón toj nim abʼqʼi (1 Crón. 29:23-25). Jaw tbʼinchaʼn jun tbʼanel templo, kubʼ ttzʼibʼin junjun libro te Biblia ex e kux tzʼibʼin junjun tyol kyoj junjuntl libro te Biblia. Ax ikx, ok ojtzqiʼn twitz tuʼnju ten nim tnabʼil ex tqʼinumabʼil (1 Rey. 4:34). Pero ik tzeʼn xi tqʼamaʼn David te, oʼkxtoq kʼelel bʼaʼn tkyaqil te qa ma nimen te Jehová. Bʼisbʼajilxix tuʼnju tej ttijen, ok ten ajbʼel kye junjuntl dios. Nya bʼaʼn ela jlu toj twitz Jehová ex ya mintiʼ xi tqʼoʼn tnabʼil Salomón tuʼn tkawin kyibʼaj xjal toj tumel (1 Rey. 11:9, 10; 12:4).
Aqeju yol xi tqʼamaʼn David te Salomón in tzaj tyekʼin qa tzul tqʼoʼn Jehová qnabʼil tuʼn tel qnikʼ tiʼj tiʼ tuʼn tbʼant quʼn qa ma qo nimen te. (Qʼonka twitza tiʼj párrafo 11 ex 12). b
12. ¿Tiʼ xnaqʼtzbʼil jaku tzʼel qiʼn kyiʼj tyol David?
12 ¿Tiʼ xnaqʼtzbʼil jaku tzʼel qiʼn tiʼj jlu? Qa ma qo nimen te Jehová, in qo tzaj tonin ex in qo tzaj tkʼiwlaʼn (Sal. 1:1-3). Ax tok, mintiʼ in tzaj ttziyen Jehová tuʼn ttzaj tqʼoʼn qqʼinumabʼil ex nimbʼil qe ik tzeʼn te Salomón. Pero qa ma qo nimen te tzul tqʼoʼn qnabʼil tuʼn tel qnikʼ tiʼj alkye mas bʼaʼn tuʼn tbʼant quʼn (Prov. 2:6, 7; Sant. 1:5). In che onin tconsej Jehová qiʼj tuʼn tel qnikʼ tiʼj alkye aqʼuntl kjawil qjyoʼn, alkye qximbʼetz tuʼn tten tiʼj pwaq ex tiʼj universidad, ex alkye tten jaku qo tzalaj jun rat. Qa ma chex qbʼiʼn qe tconsej, kʼokel qxqʼuqin qamiwbʼil tukʼil ex qo anqʼil te jumajx (Prov. 2:10, 11). Jaku che ten tbʼanel qamiw ex che tzalajel qe toj qja.
13. ¿Tiʼ onin tiʼj Carmen tuʼn tel bʼaʼn tkyaqil toj tanqʼibʼil?
13 Kubʼ t-ximen jun ermana in nanqʼin atz Mozambique, aju Carmen tbʼi, qa mastoq tbʼanel ktel tanqʼibʼil qa ma tzʼetz nim t-xnaqʼtzbʼil. Tuʼntzunju, kubʼ t-ximen tuʼn t-xiʼ toj universidad ex tuʼn t-xnaqʼtzan tiʼj tzeʼn tuʼn tjaw bʼinchet qe ja. Tqʼama jlu: «Ngantoqe aju in nel nnikʼe tiʼj. Pero in neltoq tiʼn nim ambʼil wiʼje ex in chin sikttoqe tuʼn. In chin okxtoqe toj clase a las siete y media te prim ex in kubʼajtoq a las seis te qale. Kwesttoq in nela te weye tuʼn nxiʼye toj chmabʼil, tuʼntzunju, chewix wamiwbʼile tukʼil Jehová. Ex el nnikʼe tiʼj qa in noktoq tilil wuʼne tuʼn wajbʼene kye kabʼe patrón» (Mat. 6:24). Pero naʼn ermana Dios ex xi tjyoʼn tqanil kyoj qe quʼj. ¿Tiʼ tzaj tuʼn jlu? Tqʼama ermana jlu: «Tej ttzaj nkʼamoʼne tbʼanel consej tzaj kyqʼoʼn erman otoq che chʼiy toj kyokslabʼil ex aju tzaj tqʼoʼn ntxuʼye, kubʼ nximane tuʼn tkyaj ntzaqpiʼne universidad ex tuʼn wajbʼene toj tkyaqil ambʼil te Jehová. Noq tuʼn jlu, in kubʼ nnaʼne qa atzun mas tbʼanel bʼant wuʼne ex in chin tzalaje tuʼn».
14. ¿Alkyeqe consej nim toklen tqʼama Moisés ex David?
14 Kʼujlaʼntoq Jehová tuʼn Moisés ex tuʼn David ex el kynikʼ tiʼj qa nim toklen tuʼn kynimen te Jehová. Tej chʼixtoq kykyim, xi kyqʼamaʼn kye qeju in che bʼintoq kyiʼj tuʼn tel kykanoʼn techel otoq kubʼ kyqʼoʼn ex tuʼn kukx kyajbʼen te Jehová. Kykabʼil kyqʼama qa ya mlay tzalaj Jehová kyiʼj xjal in nel kypan kyibʼ tiʼj ex qa ya mlay tzaj kykʼamoʼn kʼiwlabʼil otoq tzaj ttziyen kye. Ax ikx nim kyoklen qe kyconsej te qe. Tej tikʼ junjuntl syent abʼqʼi, yolin juntl tmajen Jehová tiʼj qa nim toklen tuʼn qten tzʼaqli twitz.
«MAS IN CHIN TZALAJE TIʼJ JLU»
15. ¿Alkyeqe tiʼchaq e ikʼ toj tanqʼibʼil apóstol Juan?
15 Ok Juan te t-apóstol Jesús ex ok kʼujlaʼnxix tuʼn (Mat. 10:2; Juan 19:26). Bʼet tukʼil Jesús tej tpakbʼan, ok tqʼoʼn twitz kyiʼj milagro e bʼant tuʼn ex kukx ten tukʼil kyoj ambʼil mas kwest. Ax ikx, ten tukʼil tej tkubʼ bʼyoʼn ex ok tqʼoʼn twitz tiʼj tej otoqxi jaw anqʼin. Nya oʼkxju, ax ikx ok tqʼoʼn twitz tiʼj tej tchʼiy kybʼet okslal toj tnejel syent abʼqʼi. Ex kukx in nanqʼin Juan tej t-xi pakbʼet tbʼanel tqanil «kye kykyaqil xjal tuj tkyaqil twitz txʼotxʼ» (Col. 1:23).
16. ¿Alqiʼj o che onin qe carta kubʼ ttzʼibʼin apóstol Juan?
16 Tej otoq tijen Juan, xi qʼoʼn toklen tuʼn tkubʼ ttzʼibʼin uʼj te Apocalipsis (Apoc. 1:1). Ax ikx kubʼ ttzʼibʼin jun kyxol uʼj in che yolin tiʼj tanqʼibʼil Jesús aju tok tbʼi tiʼj ex e kubʼ ttzʼibʼin oxe carta. Xi ttzʼibʼin toxin carta te jun okslal Gayo tbʼi, aju ok tkʼujlaʼn ik tzeʼn jun tkʼwal (3 Juan 1). Toj ambʼil aju, bʼalo ya ateʼtoq nim erman kʼujlaʼn tuʼn Juan ik tzeʼn tkʼwal. Aju kubʼ ttzʼibʼin apóstol Juan tej otoq tijen, kukx in nonin kyiʼj qe t-xnaqʼtzbʼen Jesús toj ambʼil jaʼlo.
17. Ik tzeʼn in tzaj tqʼamaʼn 3 Juan 4, ¿tiʼ in tzaj tqʼoʼn mas tzalajbʼil qe?
17 ¿Tiʼ kubʼ ttzʼibʼin Juan? (Kjawil uʼjit 3 Juan 4). Yolin apóstol Juan tiʼj tzalajbʼil in kubʼ qnaʼn qa ma qo nimen te Jehová. Tej tkubʼ ttzʼibʼin toxin carta, ateʼtoq junjun xjal in xi kyxnaqʼtzaʼn nya ax tok ex in tzajtoq kyiʼn nya bʼaʼn toj congregación. Pero ateʼtoq junjuntl kukx in che ok lepeʼ «tiʼj ju yol axix tok». E nimen te Jehová ex japun qe tmandamyent kyuʼn (2 Juan 4, 6). Nya oʼkx Juan tzalaj kyuʼn okslal lu, sino ax ikx te Jehová (Prov. 27:11).
18. ¿Tiʼ xnaqʼtzbʼil jaku tzʼel qiʼn kyiʼj tyol Juan?
18 ¿Tiʼ xnaqʼtzbʼil jaku tzʼel qiʼn tiʼj jlu? Qa kukx in qo ten tzʼaqli twitz Jehová in qo tzalaj ex in che tzalaj txqantl quʼn (1 Juan 5:3). Jun techel, in qo tzalaj aj tel qnikʼ tiʼj qa in tzalaj Jehová quʼn. Ik tzeʼn aj tel qikʼen jun nya bʼaʼn ex aj t-xi qnimen qe tkawbʼil (Prov. 23:15). Ax ikx in che tzalaj qe anjel ateʼ toj kyaʼj (Luc. 15:10). Ax ikx qe in qo tzalaj aj tok qqʼoʼn qwitz kyiʼj txqantl erman in che ten tzʼaqli twitz Jehová maske in che ok weʼ twitz nya bʼaʼn (2 Tes. 1:4). Ex aj tkubʼ najsaʼn tkyaqilju tokx tjaqʼ tkawbʼil Satanás qo tzalajel aj ttzaj qnaʼn qa otoq qo ten tzʼaqli twitz Jehová.
19. ¿Tiʼ tqʼama jun ermana tiʼjju tuʼn t-xi qʼet xnaqʼtzbʼil kye txqantl? (Ax ikx qʼonka twitza kyiʼj tilbʼilal).
19 Mas in qo tzalaj aj t-xi qyekʼin axix kye txqantl. In nanqʼin Rachel atz República Dominicana ex in tzaj tqʼamaʼn qa mintiʼ juntl qoklen mas tbʼanel ik tzeʼn aj qonin kyiʼj txqantl tuʼn tel kynikʼ tiʼj Jehová, aju Qdios. O tzʼonin ermana kyiʼj nimku xjal tuʼn kyok te tamiw Jehová ex in tzaj tqʼamaʼn jlu: «Mintiʼ in che kanet yol wuʼne tuʼn t-xi nqʼamaʼne jniʼ tzalajbʼil in kubʼ nnaʼne aj tok nqʼoʼne nwitze tiʼj alkye tten in chʼiy kykʼujlabʼil xjal tiʼj Jehová, alkye tten in nok qeʼ kykʼuʼj tiʼj ex alkye tten in bʼant chʼixpubʼil kyuʼn tuʼn ttzalaj tanmi Jehová. Aju tzalajbʼil in kubʼ nnaʼne mas nim twitz alkyexku nya bʼaʼn in nok weʼye twitz tej t-xi nqʼoʼne xnaqʼtzbʼil kye».
In qo tzalaj aj t-xi qyekʼin kye txqantl tuʼn tok kykʼujlaʼn Jehová ex tuʼn kynimen te. (Qʼonka twitza tiʼj párrafo 19).
BʼAʼN TUʼN TEL QIʼN XNAQʼTZBʼIL TIʼJJU KYQʼAMA OXE TMAJEN JEHOVÁ TEJ CHʼIXTOQ KYKYIM
20. ¿Tiʼ in bʼant quʼn ik tzeʼn te Moisés, David ex Juan?
20 E anqʼin Moisés, David ex Juan toj junxitl ambʼil ex junxitl tiʼchaq ikʼ toj kyanqʼibʼil ik tzeʼn qe. Pero at junjun tiʼ axju in bʼant quʼn ik tzeʼn kye. E ajbʼen te Dios axix tok ik tzeʼn qe. Ax ikx qe in qo naʼn Dios te Jehová, in nok qeʼ qkʼuʼj tiʼj ex in qo jyon onbʼil tukʼil. Ex ik tzeʼn bʼant kyuʼn qe xjal lu, qʼuqli qkʼuʼj tiʼj qa in che tzaj tkʼiwlaʼn Jehová qeju in che nimen te.
21. ¿Alkyeqe kʼiwlabʼil tzul kykʼamoʼn qeju in xi kybʼiʼn qe consej kyqʼama Moisés, David ex Juan?
21 Kukx qbʼinx qe consej kyqʼama qe oxe tmajen Jehová otoq che tijen ex qbʼinx qe tkawbʼil Jehová. Iktzun tten jaku tzʼel bʼaʼn tkyaqil aju in bʼant quʼn. Jaku qo anqʼin «nim qʼij twitz txʼotxʼ», toj juntl yol, te jumajx (Deut. 30:20). Ex qo tzalajel tuʼnju ktzalajel Jehová quʼn, aju in japun twi tkyaqil tyol. ¡At nim kʼiwlabʼil taj tuʼn ttzaj tqʼoʼn qe ex mlay tzʼel qnikʼ tij toj ambʼil jaʼlo! (Efes. 3:20).
BʼITZ 129 Kukx tuʼn tikʼx quʼn
a Otoq che kyim chʼixmi kykyaqil israelita ok kyqʼoʼn kywitz tiʼj milagro bʼant tuʼn Jehová toj mar Rojo tej kyokx txqantl aj Israel toj Txʼotxʼ Tziyen Maj (Núm. 14:22, 23). Tzaj tqʼamaʼn Jehová qa kykyaqil qeju otoq che japun twi 20 abʼqʼi moqa mas, iltoq tiʼj tuʼn kykyim toj desierto (Núm. 14:29). Atzunte Josué, Caleb, qe txqantl aj Israel mas kuʼxun ex tribu te Leví ok kyqʼoʼn kywitz tiʼj tzeʼn japun twi tyol Jehová tej kyikʼx toj nimaʼ te Jordán ex tej kyokx toj txʼotxʼ te Canaán (Deut. 1:24-40).
b TQANIL KYIʼJ TILBʼILAL: Izquierda: In xi tqʼoʼn David consej te Salomón, aju tkʼwal. Derecha: Ateʼ nim erman toj Xnaqʼtzbʼil kye Precursor, aju mas tbʼanel xnaqʼtzbʼil.
