1, 2. ¿Alkye junjun tbʼanel aqʼuntl in bʼant kyuʼn ansyan?

 QA YA ma tzikʼ nim ambʼil in najbʼena te onil kye ansyan, bʼalo ya in che japun qe requisito tuʼna tuʼn toka te ansyan. ¿Jakupe tzʼok tilil chʼintl tuʼna tuʼn ttzaj qʼoʼn toklena te ansyan? (1 Tim. 3:1).

² ¿Tiʼ aqʼuntl in bʼant tuʼn jun ansyan? In kubʼ tqʼoʼn jun tbʼanel techel toj pakbʼabʼil, in xqʼuqin kyiʼj erman ex in xi tqʼoʼn xnaqʼtzbʼil kye. Ax ikx in nonin kyiʼj erman tuʼn tchʼiy qʼuqbʼil kykʼuʼj tiʼj Jehová tukʼil tyol ex tbʼinchbʼen. Tuʼntzunju in tzaj tqʼamaʼn Biblia qa in che ok ansyan ik tzeʼn jun oyaj tuʼnju nimxix in che aqʼunan (Efes. 4:​8, TNM).

3. ¿Tiʼ il tiʼj tuʼn tbʼant tuʼn jun ermano tuʼn tok te ansyan? (1 Timoteo 3:​1-7; Tito 1:​5-9).

³ ¿Tiʼ il tiʼj tuʼn tbʼant tuʼn jun ermano tuʼn tok te ansyan? Tuʼn tok jun ermano te ansyan nya oʼkx il tiʼj tuʼn tten tojtzqibʼil tiʼj jun aqʼuntl. Ik tzeʼn aj t-xi tjyoʼn jun xjal jun taqʼun, nim maj in tzaj qʼoʼn taqʼun tuʼnju at tojtzqibʼil kyiʼj junjun aqʼuntl. Tuʼn tok jun ermano te ansyan nya oʼkx il tiʼj tuʼn tpakbʼan ex tuʼn tok te jun tbʼanel aj xnaqʼtzal. Ax ikx il tiʼj tuʼn tjapun junjun requisito tuʼn, aʼyeju in che tzaj qʼamaʼn toj 1 Timoteo 3:1 a 7 ex toj Tito 1:5 a 9 (uʼjinktza). Toj xnaqʼtzbʼil lu qo yolil kyiʼj junjun mod in tzaj qʼamaʼn kyoj versículo lu. Kʼelel qnikʼ tiʼjju jaku  bʼant tuʼn jun ermano tuʼn kyyolin erman ex qe xjal bʼaʼn tiʼj, tzeʼn jaku tzʼok te jun tbʼanel wibʼaj toj ja ex tiʼ jaku tzʼonin tiʼj tuʼn ttzalaj aj tajbʼen kye erman.

TUʼN KYYOLIN TXQANTL BʼAʼN TIʼJ

4. ¿Tiʼ t-xilen aju txol yol «mintiʼ tpaltil»?

⁴ Jun kyxol qe requisito tuʼn tjapun tuʼn jun ansyan, aju «mintiʼ tpaltil». Toj juntl yol, in che yolin erman bʼaʼn tiʼj. Ax ikx, il tiʼj «tuʼn tten [ . . . ] bʼaʼnxix kywitz xjal mya okslal». Jaku che yolin xjal nya bʼaʼn tiʼjju nimen tuʼn, pero mintiʼ tuʼn tjawje kykʼuʼj tiʼj qa bʼaʼn xjal moqa in yolin axix tok (Dan. 6:​4, 5). Xjelinkuya jlu: «¿In che yolinpe erman ex xjal bʼaʼn wiʼje?».

5. ¿Tiʼ t-xilen aju txol yol «at tkʼujlalil tiʼj ju bʼaʼn»?

⁵ «At tkʼujlalil tiʼj ju bʼaʼn», a t-xilen jlu qa in nok tqʼoʼn twitz tiʼj tbʼanel kymod txqantl ex in xi tqʼamaʼn tbʼanel yol kye. Ax ikx in kubʼ tnaʼn tzalajbʼil aj tonin kyiʼj txqantl, axpe ikx qa mintiʼ in tzaj qʼamaʼn te tiʼ tuʼn t-xi tbʼinchaʼn (1 Tes. 2:8). ¿Tiquʼn nim toklen tuʼn tbʼant jlu kyuʼn ansyan? Tuʼnju in najbʼen nim ambʼil kyuʼn tuʼn kyxqʼuqin kyiʼj erman ex tuʼn t-xi kybʼinchaʼn junjuntl oklenj in tzaj qʼoʼn kye (1 Ped. 5:​1-3). Maske in bʼant nim aqʼuntl kyuʼn, pero in che tzalaj aj kyonin kyiʼj txqantl (Hech. 20:35).

6. Qa bʼaʼn qʼon jun xjal kyposad txqantl, ¿tzeʼn tmod in kubʼ tyekʼin? (Hebreos 13:​2, 16; ax ikx qʼonka twitza tiʼj tilbʼilal).

⁶ Aju xjal in xi tqʼoʼn «kyposad» txqantl, nya oʼkx in kubʼ tyekʼin tbʼanel tmod kyukʼil qe tamiw, sino ax ikx kyukʼil qeju nya tamiw (1 Ped. 4:9). In tzaj tqʼamaʼn jun diccionario tiʼj Tyol Dios qa aju xjal in xi tqʼoʼn kyposad txqantl in kubʼ tyekʼin tbʼanel tmod axpe ikx kyukʼil qeju mintiʼ ojtzqiʼn kywitz tuʼn ex in chex ttxkoʼn tja. Xjelinkuya jlu: «¿Ojtzqiʼnpe kyuʼn txqantl qa in kubʼ nyekʼine tbʼanel nmode kyukʼil qeju in che pon njaye?» (kjawil uʼjit Hebreos 13:​2, 16). Aju erman in cheʼx ttxkoʼn junjuntl tja, in kubʼ tyekʼin tbʼanel tmod kyukʼil. Ik tzeʼn kyukʼil qeju mebʼa moqa prow, kyukʼil qeju in che pon qʼol chikʼbʼabʼil ex kyukʼil qe ansyan in che bʼet kyojele Ja te Chmabʼil (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Tzeʼn in kubʼ tyekʼin jun ansyan qa mintiʼ in nok tkʼujlaʼn pwaq?

⁷ «Mintiʼ in pon tkʼuʼj tiʼj nimku». A t-xilen jlu  qa mintiʼ in nok tqʼoʼn mas toklen pwaq ex qe tiʼchaq at te. Qa at nim tpwaq moqa prow, il tiʼj tuʼn tkubʼ tyekʼin qa aju tajbʼebʼil te Jehová atzun mas nim toklen toj tanqʼibʼil (Mat. 6:33). Il tiʼj tuʼn tajbʼen ambʼil, tipumal ex qe tiʼchaq at te tuʼn tajbʼen te Jehová, tuʼn t-xqʼuqin kyiʼj toj tja ex tiʼj congregación (Mat. 6:24; 1 Juan 2:​15-17). Xjelinkuya jlu: «¿In nokpe nqʼoʼne nim toklen pwaq? ¿In chin tzalaje tiʼj chʼin at weye? ¿Moqa in nok tilil wuʼne tuʼn tkanet mas npwaqe ex tiʼchaq weye?» (1 Tim. 6:​6, 17-19).

8. ¿Alkye tten in kubʼ tyekʼin jun xjal qa in tjakʼunte tibʼ ex in nok tkwentin tibʼ?

⁸ Jaku txi qqʼamaʼn qa in «tjakʼunte tibʼ» ex qa in nok «tkwent[in] tibʼ» jun erman at tnabʼil kyiʼj junjun tiʼchaq. Jun techel, mintiʼ in waʼn ex mintiʼ in kʼan nim, in bʼaj t-xbʼalumin tibʼ toj tumel ex in jaw tjyoʼn aju mas bʼaʼn toj tanqʼibʼil. Ax ikx mintiʼ in nel tkanoʼn kymod ex aju in bʼant kyuʼn xjal mintiʼ in che ajbʼen te Jehová (Luc. 21:34; Sant. 4:4). Ex mintiʼ in jaw kyaqpaj, aj tkubʼ kyyekʼin txqantl nya bʼaʼn kymod tukʼil. «Mya kʼal qʼeʼn» jun ansyan, toj juntl yol mintiʼ in xi tkʼaʼn nim qʼeʼn tuʼn ttzaj sutin toj twitz, ex ojtzqiʼn kyuʼn txqantl qa mintiʼ in xi tkʼaʼn nim qʼeʼn maske mintiʼ in tzaj sutin toj twitz. Xjelinkuya jlu: «Kyukʼil tiʼchaq in che bʼant wuʼne, ¿in kubʼpe nyekʼine qa mintiʼ in chin ikʼe kyibʼaj junjun tiʼchaq ex qa in jakʼunte wibʼe?».

9. ¿Tiʼ t-xilen tuʼn tten «tnabʼl» jun xjal ex tuʼn tok te ordenad?

⁹ In kubʼ tyekʼin jun ansyan qa «at tnabʼl» aj t-ximen kyiʼj nabʼil toj Tyol Dios naʼmxtoq tkubʼ tbʼinchaʼn jun tiʼ. Aj t-ximen tiʼj tzeʼn jaku txi tnimen aju in tzaj tqʼamaʼn Biblia, in nonin tiʼj tuʼn tel tnikʼ tiʼj tiʼ jaku bʼant tuʼn kyiʼj junjun tiʼchaq. Mintiʼ in xi tbʼinchaʼn naj jun tiʼ, sino tnejel in nok tbʼiʼn tkyaqil tqanil (Prov. 18:13). Tuʼntzunju, in jaw tjyoʼn aju mas bʼaʼn ex in kubʼ tyekʼin qa in el tkanoʼn t-ximbʼetz Jehová. Ax ikx «bʼaʼn tmod», toj juntl yol ordenad. A t-xilen jlu qa organizado ex puntual. Ojtzqiʼn kyuʼn txqantl qa in kubʼaj jun aqʼuntl tuʼn ex in xi tbʼiʼn qe tqanil in xi kyqʼoʼn ansyan te. Tuʼnju in bʼant tkyaqil jlu tuʼn, in che yolin txqantl bʼaʼn tiʼj. Atzun jaʼlo qo xnaqʼtzan kyiʼj junjun tmod tuʼn tten tuʼntzun tok te jun tbʼanel wibʼaj toj ja ik tzeʼn in tzaj tqʼamaʼn Biblia.

TUʼN TOK TE JUN TBʼANEL WIBʼAJ TOJ JA

10. ¿Tiʼ t-xilen qa bʼaʼn kawin jun xjal toj tja?

¹⁰ Qa at tfamilia jun ermano ex taj tuʼn tok te ansyan, jun kyxol qe requisito tuʼn tjapun tuʼn aju tuʼn kyyolin txqantl bʼaʼn tiʼj tfamilia. Tuʼntzunju, in tzaj tqʼamaʼn Biblia qa «bʼaʼn kawin [ansyan] tuj tja». A t-xilen jlu qa in che ok tkwentin qe tfamilia tukʼil kʼujlabʼil ex in jaw tjyoʼn aju mas bʼaʼn te kye. In nok tilil tuʼn tuʼn tok kykʼulbʼil te Jehová, tuʼn kyxiʼ kyoj chmabʼil ex in nonin kyiʼj tuʼn kytzalaj toj pakbʼabʼil. ¿Tiquʼn nim toklen tuʼn tbʼant jlu tuʼn? Ik tzeʼn tqʼama apóstol Pablo: «Porke jun xjal mibʼan kawin tuj tja, ¿tzaʼntzun tten tuʼn tbʼant tkwentin kye okslal etzan qe tuʼn Dios?» (1 Tim. 3:5).

11, 12. ¿Tzeʼn jaku che onin qe toj tja jun ermano tuʼn tok te ansyan? (Ax ikx qʼonka twitza tiʼj tilbʼilal).

¹¹ Qa at tkʼwal ermano ex naʼmx kyjapun twi 18 abʼqʼi, «bʼaʼn che niman [ . . . ] ex bʼaʼn che bʼin» te. Il tiʼj tuʼn t-xi tqʼoʼn xnaqʼtzbʼil kye ex tuʼn tonin kyiʼj tukʼil kʼujlabʼil. Ax tok, il tiʼj tuʼn kytzalaj ex tuʼn kytzeʼn, ik tzeʼn in bʼant kyuʼn kykyaqil kʼwal, pero il tiʼj tuʼn kyxi t-xnaqʼtzaʼn tuʼn tbʼant kynimen, tuʼn kyrespetarin kye txqantl ex tuʼn tten tbʼanel kymod. Ax ikx, il tiʼj tuʼn kyonin kyiʼj kykʼwal tuʼn kyok te tamiw Jehová, tuʼn t-xi kynimen qe consej in tzaj tqʼoʼn Biblia ex tuʼn kyonin kyiʼj tuʼn kybautisarin.

 ¹² «Bʼaʼn tuʼn tok te anciano [ . . . ] qa okslal qe tkʼwaʼl ex qa mintiʼ in che yolin xjal kyiʼj tkʼwaʼl qa tzoqpiʼn qe tuʼn kybʼinchante noq alkye kyajbʼil ex qa mibʼan che bʼin». Pero qa in nanqʼin jun kʼwal o bautisarin tja tman, ¿tiʼ jaku bʼaj qa ma kubʼ tbʼinchaʼn jun matij il? Qa mintiʼ ok tilil tuʼn mambʼaj tuʼn t-xi tqʼoʼn xnaqʼtzbʼil te tkʼwal ex tuʼn t-xi tkawin, jakulo tzʼel qʼiʼn toklen te ansyan (qʼonka twitza tiʼj uʼj La Atalaya te 15 te octubre te 1996, página 21, párrafo 6 ex 7).

TUʼN TONIN TIʼJ CONGREGACIÓN

13. ¿Alkye tten in kubʼ tyekʼin jun xjal qa «bʼaʼn tmod ex mans» ex «mya jawni twitz»?

¹³ Nimxix in che onin erman tiʼj congregación qa at tbʼanel kymod. Jun techel, aju xjal «mans» in nonin tuʼn tten mujbʼabʼil. Ax ikx in che ok tbʼiʼn txqantl ex in nok tilil tuʼn tel tnikʼ tiʼjju in kubʼ kynaʼn. Aj ttena toj jun chmabʼil kyukʼil ansyan ex in kubʼ kyximen tuʼn tbʼant jun tiʼ pero mintiʼ in che ikʼ tibʼaj jun nabʼil moqa jun kawbʼil in tzaj tqʼoʼn Biblia, ¿kʼokelpe tilil tuʼna tuʼn tonina tiʼjju in kubʼ kyximen? Ax ikx, «mya jawni twitz» jun ansyan, toj juntl yol, mintiʼ in xi tqʼamaʼn kye txqantl tuʼn t-xi kybʼinchaʼn aju tajbʼil. Sino in nel tnikʼ tiʼj qa nim toklen tuʼn tok tbʼiʼn kyximbʼetz txqantl (Gén. 13:​8, 9; Prov. 15:22). «Mya jurat in jaw kyaqpaj», ex mintiʼ «in qʼojin». A t-xilen jlu qa in respetarin kye txqantl ex mintiʼ in nok ten qʼojil ex ilel kyukʼil, sino in kubʼ tyekʼin tbʼanel tmod. Tuʼnju in nonin tuʼn tten mujbʼabʼil, in nok tilil tuʼn tuʼn miʼn ttzaj qʼoj kyxol txqantl, axpe ikx kyoj ambʼil kwest (Sant. 3:​17, 18). In yolin toj tumel kyukʼil txqantl ex in nonin kyiʼj tuʼn miʼn ttzajxix kyqʼoj, axpe ikx kyukʼil qeju in qo el ikʼun kyuʼn (Juec. 8:​1-3; Prov. 20:3; 25:15; Mat. 5:​23, 24).

14. ¿Tiquʼn mlay tzʼok «jun akʼaj okslal» te ansyan ex tzeʼn jaku kubʼ tyekʼin qa «bʼaʼnxix tten tchwinqlal»?

¹⁴ Mlay tzʼok te ansyan «jun akʼaj okslal». Maske naʼmxtoq tikʼ nim ambʼil tej tbautisarin, il tiʼj tuʼn tchʼiy tamiwbʼil tukʼil Jehová ex  tuʼn tajbʼen Biblia tuʼn tuʼn tjaw tjyoʼn aju mas bʼaʼn aj tbʼant jun tiʼ tuʼn. Ex naʼmxtoq tok te ansyan, kbʼel tin tibʼ ik tzeʼn te Jesús. Tuʼntzunju, kbʼel tyekʼin tbʼanel tmod ex kʼayol tuʼn ttzaj tqʼoʼn Jehová toklen (Mat. 20:23; Filip. 2:​5-8). Ax ikx, il tiʼj tuʼn tkubʼ tyekʼin qa «bʼaʼnxix tten tchwinqlal». A t-xilen jlu qa in nok qeʼ tkʼuʼj tiʼj Jehová ex kyiʼj tkawbʼil. Ex in xi tbʼiʼn qe tqanil in tzaj tqʼoʼn ttnam.

15. ¿Nimpe toklen tuʼn tbʼant-xix tqʼoʼn jun ansyan chikʼbʼabʼil?

¹⁵ Ax ikx in tzaj tqʼamaʼn Biblia qa bʼantni tten ansyan «tuʼn tqʼonte xnaqʼtzbʼil». ¿Ape t-xilen jlu qa tbʼanelxix qʼon chikʼbʼabʼil? Miʼn. Tuʼnju ateʼ tbʼanel ansyan bʼalo nyaxix tbʼanel che qʼon chikʼbʼabʼil, pero tbʼanel che pakbʼan ex tbʼanel che onin kyiʼj erman tuʼn t-xi kyqʼuqbʼaʼn kykʼuʼj (mojbʼankuya tukʼil 1 Corintios 12:​28, 29 ex Efesios 4:11). Maske nyaxix tbʼanel qʼon jun ansyan chikʼbʼabʼil, pero jaku tzʼok tilil tuʼn tuʼn tok te jun tbʼanel aj xnaqʼtzal. ¿Tzeʼn jaku bʼant tuʼn?

16. ¿Alkye tten jaku tzʼok jun ermano te tbʼanel aj xnaqʼtzal? (Ax ikx qʼonka twitza tiʼj tilbʼilal).

¹⁶ «Tzyuʼnx tuʼn aju yol axix tok». Tuʼn tok jun ansyan te tbʼanel aj xnaqʼtzal il tiʼj tuʼn tajbʼen Tyol Dios tuʼn aj tex tqʼoʼn jun chikʼbʼabʼil ex aj t-xi tqʼoʼn consej te jun erman. In xnaqʼtzaʼn tiʼj Biblia ex kyiʼj uʼj in che etz tuʼn ttnam Jehová (Prov. 15:28; 16:23). Aj t-xnaqʼtzan in nok tqʼoʼn twiʼ tiʼj tzeʼn in tzaj tchikʼbʼaʼn qe quʼj jun texto ex in ximen tiʼj tzeʼn tuʼn tajbʼen tuʼn toj tumel. Ex aj tqʼoʼn xnaqʼtzbʼil in nok tilil tuʼn tuʼn tkupin xnaqʼtzbʼil toj kyanmi qeju in che bʼin tiʼj. Ax ikx, jaku txi tqanin tnabʼil kye junjuntl ansyan ex tuʼn tkubʼ tqʼoʼn toj xnaqʼtzbʼil aju in tzaj kyqʼamaʼn te (1 Tim. 5:17). Il tiʼj tuʼn t-xi kyqʼoʼn ansyan «kynabʼl» erman, toj juntl yol tuʼn t-xi kyqʼuqbʼaʼn kykʼuʼj, maske at maj il tiʼj tuʼn t-xi kyqʼoʼn jun kawbʼil kye. Pero il tiʼj tuʼn tbʼant kyuʼn tukʼil kʼujlabʼil. Qa ma tzʼel kykanoʼn tiʼj Jesús kʼonil kyiʼj tuʼn kyok te tbʼanel aj xnaqʼtzal tuʼnju che yolil toj tumel, kbʼel kyyekʼin tbʼanel kymod ex kjawitz kyiʼn  qe xnaqʼtzbʼil toj Tyol Dios (Mat. 11:​28-30; 2 Tim. 2:24).

KUKX TZʼOK TILIL TUʼNA

17. a) ¿Tiʼ jaku tzʼonin kyiʼj onil kye ansyan tuʼn tok tilil kyuʼn tuʼn kyok te ansyan? b) ¿Tiʼ bʼaʼn tuʼn ttzaj kynaʼn ansyan aj tok kyqʼoʼn kywitz tiʼj qa in che japun requisito tuʼn jun erman tuʼn t-xi qʼoʼn jun toklen? (Ax ikx qʼonka twitza tiʼj recuadro « Aqeye ansyan, bʼaʼn tuʼn tten kyximbʼetze toj tumel aj t-xi kyqʼoʼne toklen jun ermano»).

¹⁷ Bʼalo ateʼ junjun onil kye ansyan jaku kubʼ kyximen qa mlayx che ok te ansyan tuʼnju at nim requisito tuʼn tjapun kyuʼn. Pero bʼaʼn tuʼn ttzaj kynaʼn qa mintiʼ in nayon Jehová ex ttnam tuʼn kyok te tzʼaqli tuʼn ttzaj qʼoʼn jun kyoklen (1 Ped. 2:21). Ax ikx, bʼaʼn tuʼn ttzaj kynaʼn qa jaku tzʼonin xewbʼaj xjan kyiʼj tuʼn tjapun twi kyximbʼetz (Filip. 2:13). Yajtzun teya, ¿atpe jun mod taja tuʼn tok te mas tbʼanel? Qa ikju, naʼna Dios te Jehová, jyonxa mas tqanil tiʼj mod ex qaninxa junjun consej kye ansyan tzeʼn tuʼn tbʼant tuʼna.

18. ¿Tiʼ il tiʼj tuʼn tbʼant kyuʼn onil kye ansyan?

¹⁸ Tbʼanel qa ma tzʼok tilil kyuʼn kykyaqil ermano ex qe ansyan, tuʼn kukx tkubʼ kyyekʼin qe mod ma qo xnaqʼtzan tiʼj toj xnaqʼtzbʼil lu (Filip. 3:16). Ex qa onil te ansyan teya, kukx tzʼok tilil tuʼna tuʼn toka te ansyan. Qaninxa te Jehová tuʼn ttzaj tqʼoʼn xnaqʼtzbʼil teya tuʼntzun tajbʼena mas te ex kye erman (Is. 64:8). Qa ma tzʼok tilil tuʼna tuʼn tjapun twi t-ximbʼetza tzul kʼiwlaʼna tuʼn Jehová.