1. ¿Tiʼ t-ximbʼetz apóstol Pablo ten kyiʼj siervo ministerial?

 NIM toklen aqʼuntl in bʼant kyuʼn siervo ministerial kyoj congregación. Ex toj twitz apóstol Pablo nimtoq kyoklen ermano lu. Tuʼntzunju, tej t-xi ttzʼibʼin kye okslal te tnam Filipos, nya oʼkx xi tqʼoʼn qʼolbʼebʼil kye ansyan, sino ax ikx kye siervo ministerial (Filip. 1:1).

2. ¿Tiʼ t-ximbʼetz Luis at tiʼj toklen te siervo ministerial?

² Ateʼ nim ermano o che bautisarin in che tzalaj tuʼnju o txi qʼoʼn kyoklen te siervo ministerial. Jun techel, qʼiʼntoq 18 abʼqʼi tuʼn Devan tej t-xi qʼoʼn toklen. Atzunte Luis qʼiʼntoq mas te 50 abʼqʼi tuʼn ex in tzaj tqʼamaʼn tiʼ in kubʼ kynaʼn nimku onil kye ansyan: «Jun tbʼanel oklenj te weye tuʼnju o tzaj qʼoʼn woklene te siervo ministerial, ex mas in kubʼ nnaʼne jlu aj nximane tiʼj nim kʼujlabʼil o kubʼ kyyekʼin erman wiʼje toj congregación».

3. ¿Alkyeqe xjel qo xnaqʼtzal kyiʼj toj xnaqʼtzbʼil lu?

³ Qa jun ermano teya ex o bautisarina, ¿ope kubʼ t-ximana tuʼn toka te siervo ministerial? Qa ikju, bʼaʼn tuʼn tel tnikʼa tiʼj tiquʼn taja tuʼn ttzaj qʼoʼn toklena. Ax ikx bʼaʼn tuʼn tel tnikʼa tiʼj alkyeqe requisito il tiʼj tuʼn tjapun tuʼna. Toj xnaqʼtzbʼil lu kʼelel tnikʼa tiʼj. Pero tnejel qo yolil tiʼj tiʼ in bʼant tuʼn jun siervo ministerial.

 ¿TIʼ IN BʼANT TUʼN JUN SIERVO MINISTERIAL?

4. ¿Tiʼ in bʼant tuʼn jun siervo ministerial moqa onil kye ansyan? (Ax ikx qʼonka twitza tiʼj tilbʼilal).

⁴ Aju oklenj te siervo ministerial moqa onil kye ansyan, in xi qʼoʼn tuʼn xewbʼaj xjan te jun ermano o bautisarin tuʼntzun tonin kyiʼj ansyan tuʼn tbʼant junjun tiʼchaq moqa aqʼuntl tuʼn toj congregación. In nok tilil kyuʼn tuʼn tten territorio jatumel tuʼn kypakbʼan erman ex qe uʼj tuʼn tajbʼen kyuʼn. Ax ikx, in che onin tuʼn tbʼant limpieza ex mantenimiento kyoj Ja te Chmabʼil. In che ajbʼen te acomodador moqa in che onin tiʼj audio ex video kyoj chmabʼil. Pero aju mas nim toklen, kʼujlaʼn Jehová kyuʼn ex in xi kynimen qe tkawbʼil. Nya oʼkxju, ax ikx at nimxix kykʼujlabʼil kyiʼj erman (Mat. 22:​37-39). ¿Tiʼ il tiʼj tuʼn tbʼant tuʼn jun ermano o bautisarin tuʼn tok te onil kye ansyan?

5. ¿Tzeʼn jaku tzʼok jun ermano te onil kye ansyan?

⁵ In tzaj tqʼamaʼn Biblia alkye junjun tmod jun ermano il tiʼj tuʼn tten tuʼntzun tok te onil kye ansyan (1 Tim. 3:​8-10, 12, 13). Qa taja tuʼn toka te onil kye ansyan, nim toklen tuʼn tel tnikʼa tiʼj alkyeqe mod lu ex qʼonka tilil tuʼn kykubʼ tyekʼina. Pero tnejel, bʼaʼn tuʼn tel tnikʼa tiʼj tiquʼn taja tuʼn toka te onil kye ansyan.

¿TIQUʼN TAJA TUʼN TOKA TE ONIL KYE ANSYAN?

6. ¿Tiquʼn taja tuʼn tonina kyiʼj erman? (Mateo 20:28; ax ikx qʼonka twitza tiʼj tilbʼilal).

⁶ Aju mas tbʼanel techel aju kyaj tqʼoʼn Jesús. Tkyaqilju bʼant tuʼn, bʼant tuʼn tuʼnju kʼujlaʼn Jehová ex qe xjal tuʼn. Onin kʼujlabʼil tiʼj tuʼn taqʼunan kyuw ex tuʼn kybʼant junjun tiʼchaq tuʼn aju nyaxix nim toklen toj kywitz txqantl (kjawil uʼjit Mateo 20:28; Juan 13:​5, 14, 15). Qa taja tuʼn toka te onil kye ansyan tuʼnju kʼujlaʼn Jehová tuʼna ex qe erman, tzul kʼiwlaʼna tuʼn Jehová ex kʼonil tiʼja tuʼn ttzaj qʼoʼn toklena (1 Cor. 16:14; 1 Ped. 5:5).

7. ¿Tiquʼn mintiʼ tuʼn tkubʼ t-ximen jun erman qa mas nim toklen kywitz txqantl?

⁷ Toj ambʼil jaʼlo, tbʼanel in nela toj kywitz txqantl aj tjaw tnimsan tibʼ jun xjal. Pero mintiʼ in bʼaj jlu toj ttnam Jehová. Qa kʼujlaʼn qe txqantl tuʼn jun ermano, ik tzeʼn te Jesús, nya taj tuʼn tkawin kyibʼaj nix tuʼn tok qʼoʼn nim toklen kyuʼn. Qa ma txi qʼoʼn toklen jun xjal taj tuʼn tok bʼaj kywitz txqantl tiʼj, mlaylo txi tbʼinchaʼn junjun aqʼuntl nyaxix nim kyoklen tuʼn  kyok t-xqʼuqin qe t-rit Jehová. Jakulo kubʼ t-ximen xjal lu qa nya nim kyoklen qe aqʼuntl in xi qʼoʼn te (Juan 10:12). Mlayx che tzaj tkʼiwlaʼn Jehová qeju in nok tilil kyuʼn tuʼn kybʼant qe tiʼchaq kyuʼn noq tuʼn tkubʼ kynaʼn qa mas nim kyoklen kywitz txqantl (1 Cor. 10:​24, 33; 13:​4, 5).

8. ¿Tiʼ xi tqʼamaʼn Jesús kye t-apóstol?

⁸ Axpe ikx junjun tamiw Jesús kyajtoq tuʼn ttzaj qʼoʼn junjun kyoklen, pero nya toj tumel ten kyximbʼetz. Atzun jlu bʼaj tiʼj Santiago ex Juan, aqeju t-apóstol Jesús. Xi kyqʼamaʼn te Jesús tuʼn ttzaj qʼoʼn jun tbʼanel kyoklen toj Tkawbʼil Dios. Pero mintiʼ xi tqʼamaʼn Jesús qa bʼaʼn aju bʼant kyuʼn. Xi tchikʼbʼaʼn jlu kye qeju 12 t-apóstol: «Alkye tajbʼil tuʼn tten mas toklen kyxole, atzunju tuʼn tok te ajbʼel kyeye; ex alkye tajbʼil tuʼn tok te nejenel kyxole, atzunju tuʼn tok te kymajen kykyaqil» (Mar. 10:​35-37, 43, 44). Qa at jun tbʼanel kyximbʼetz ermano kyaj tuʼn ttzaj qʼoʼn jun kyoklen, toj juntl yol kyaj tuʼn kyajbʼen kye erman, che okel te jun tbʼanel onbʼil toj congregación (1 Tes. 2:8).

¿TIʼ JAKU TZʼONIN TIʼJA TUʼN TKUBʼ T-XIMANA TUʼN TAJBʼENA MAS KYE ERMAN?

9. ¿Tiʼ jaku tzʼonin tiʼja tuʼn tkubʼ t-ximana tuʼn tajbʼena mas kye erman?

⁹ Kʼujlaʼn Jehová tuʼna ex bʼalo taja tuʼn tajbʼena kye erman. Maske ikju, jakulo tzaj xobʼa tuʼn kybʼant aqʼuntl tuʼna aju in bʼant kyuʼn onil kye ansyan. ¿Tiʼ jaku tzʼonin tiʼja tuʼn tajbʼena mas toj congregación? Bʼaʼn tuʼn t-ximana tiʼj tzalajbʼil in kubʼ qnaʼn aj qajbʼen kye txqantl. Tqʼama Jesús jlu: «Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hech. 20:35). Nya oʼkx tqʼama Jesús jlu, sino ax ikx xi tbʼinchaʼn. Ex kubʼ tnaʼn nim tzalajbʼil tuʼnju ajbʼen kye txqantl, ax ikx teya jaku tzalaja qa ma bʼant jlu tuʼna.

10. ¿Tzeʼn kubʼ tyekʼin Jesús qa tzalaj tej tajbʼen kye txqantl? (Marcos 6:​31-34).

¹⁰ Bʼaʼn tuʼn ttzaj qnaʼn jun techel aju in tzaj tyekʼin jniʼ tzalajbʼil kubʼ tnaʼn Jesús tej tajbʼen kye txqantl (kjawil uʼjit Marcos 6:​31-34). Jun maj, tej otoq sikt Jesús ex qe t-apóstol, i eʼx toj jun lugar kyjunalx tuʼn kyojlan. Pero otoq chex nej nimku xjal tuʼnju kyajtoq tuʼn tok kybʼiʼn t-xnaqʼtzbʼil. Jakutoq txi tqʼamaʼn Jesús qa mlaytoq txi tqʼoʼn xnaqʼtzbʼil kye tuʼnju naʼmxtoq tten ambʼil kyiʼj tuʼn kywaʼn. Ax ikx, jakutoq t-xi tqʼoʼn Jesús jun moqa kabʼe xnaqʼtzbʼil kye ex jakutoq t-xi tqʼamaʼn kye tuʼn kyanj. Pero ok ten «Jesús qʼol nimku xnaqʼtzbʼil kye» tuʼnju kʼujlaʼn qe tuʼn. Ex mintiʼ ok tqʼoʼn twitz tiʼj qa otoq tzʼok qax (Mar. 6:35). Bʼant jlu tuʼn tuʼnju «tzaj qʼaqʼan tkʼuʼj» kyiʼj xjal ex nya tuʼnju ok obligarin. Tajtoq t-xi tqʼoʼn xnaqʼtzbʼil kye tuʼnju kʼujlaʼn qe tuʼn. ¡Kubʼ tnaʼn Jesús nim tzalajbʼil tej tajbʼen kye txqantl!

11. ¿Alkye junjuntl tten onin Jesús kyiʼj qeju e pon bʼil tchikʼbʼabʼil? (Ax ikx qʼonka twitza tiʼj tilbʼilal).

¹¹ Nya okx xi tqʼoʼn Jesús xnaqʼtzbʼil kye xjal sino ax ikx ximen tiʼjju at tajbʼen kye. Tuʼntzunju, bʼant jun milagro tuʼn Jesús tuʼn t-xi tqʼoʼn kywa nim xjal ex xi tqʼamaʼn kye t-xnaqʼtzbʼen tuʼn t-xi kysipen (Mar. 6:41). Tej tbʼant jlu tuʼn Jesús, xi tyekʼin kye t-xnaqʼtzbʼen tiʼ t-xilen tuʼn kyajbʼen kye txqantl ex qa nim toklen tuʼn tbʼant jlu kyuʼn, ik tzeʼn onbʼil jaku txi kyqʼoʼn onil kye ansyan toj ambʼil jaʼlo. Qo ximen tiʼj tzalajbʼil kubʼ kynaʼn t-apóstol Jesús tej kyonin tuʼn t-xi sipet wabʼj tejxi kybʼaj waʼn kykyaqil ex e bʼaj noj (Mar. 6:42). In tzaj tyekʼin jlu qa mas ximen Jesús tiʼjju at tajbʼen kye txqantl ex nya oʼkx tiʼjju at tajbʼen te. Toj tkyaqil tanqʼibʼil tzalu  twitz Txʼotxʼ kukx ajbʼen kye txqantl (Mat. 4:23; 8:16). Kubʼ tnaʼn Jesús nim tzalajbʼil tej t-xi tqʼoʼn xnaqʼtzbʼil ex tej tonin kyiʼj xjal. Ax ikx teya, jaku kubʼ tnaʼna nim tzalajbʼil qa ma tzʼok tilil tuʼna tuʼn tonina kyiʼj txqantl qa ma tzʼoka te onil kye ansyan.

12. ¿Tiquʼn mintiʼ tuʼn tkubʼ t-ximana qa mintiʼ tojtzqibʼila tiʼj jun aqʼuntl?

¹² ¿Yajtzun qa in kubʼ t-ximana qa mintiʼ tojtzqibʼila tiʼj jun aqʼuntl? Mi tzaj bʼaj tkʼuʼja, tuʼnju ateʼ tbʼanel tmoda jaku che onin tiʼja tuʼn tonina kyiʼj erman. Jun tiʼ jaku tzʼonin tiʼja aju qa ma naʼna Dios te Jehová ex qa ma jaw tuʼjina 1 Corintios 12:12 a 30. Aju tqʼama Pablo in tzaj tyekʼin qa teyele te junjun tmajen Jehová in bʼant jun tbʼanel aqʼuntl tuʼn ex nim toklen toj congregación. Miʼn tzaj bʼaj tkʼuʼja qa naʼmx toka te jun onil kye ansyan tuʼnju atx junjun requisito tuʼn tjapun tuʼna. Qʼonka tilil tuʼn tajbʼena mas te Jehová ex tuʼn tonina kyiʼj erman. Jaku tzʼok qe tkʼuʼja tiʼj qa che ximel ansyan tiʼja ex tzul kyqʼoʼn jun toklena aju jaku bʼant tuʼna (Rom. 12:​4-8).

13. ¿Tiʼ il tiʼj tuʼn tbʼant kyuʼn kykyaqil erman?

¹³ Ximana tiʼj jlu: Kykyaqil qe requisito in tzaj tqʼamaʼn Biblia tuʼn tjapun kyuʼn onil kye ansyan, jaku japun kyuʼn kykyaqil erman. Kykyaqil qe erman il tiʼj tuʼn kyxi laqʼeʼ ttxlaj Jehová ex tuʼn tkubʼ kynaʼn tzalajbʼil aj kyonin kyiʼj txqantl ex tuʼn kyanqʼin ik tzeʼn taj Jehová. Pero, ¿tiʼ il tiʼj tuʼn tbʼant tuʼn jun ermano qa taj tuʼn ttzaj qʼoʼn mas toklen?

¿TIʼ IL TIʼJ TUʼN TBʼANT TUʼNA TUʼN TOKA TE ONIL KYE ANSYAN?

14. ¿Tiʼ t-xilen «in che yolin tuj tumelxix»? (1 Timoteo 3:​8-10, 12).

¹⁴ Atzun jaʼlo, qo xnaqʼtzan tiʼj junjun requisito in che kanet quʼn toj 1 Timoteo 3:8 a 10 ex 12 (uʼjinktza). Aʼyeju onil kye ansyan «in che yolin tuj tumelxix». Ax ikx jaku kubʼ traducirit txol yol lu ik tzeʼn: «Ax tok che yolin», «responsable qe» moqa «tbʼanel kymod ex in che ok respetarin kyuʼn txqantl». Pero nya t-xilen jlu qa mlay che tzeʼn moqa mlay che tzalaj kyukʼil txqantl (Ecl. 3:​1, 4). Qa kukx ma chex tbʼinchana qe aqʼuntl in tzaj qʼoʼn teya ex qa ma che kubʼaj tuʼna, jaku tzʼok qeʼ kykʼuʼj erman tiʼja ex jaku che nimen teya.

15. ¿Tiʼ t-xilen aju qa «mintiʼ in meltzʼajeʼ kyyol» ex qa «mintiʼ in pon kykʼuʼj tiʼj jun kambʼabʼl mya tuj tumel»?

¹⁵ «Ex mintiʼ in meltzʼajeʼ kyyol». A t-xilen jlu qa il tiʼj tuʼn kyyolin axix tok, tuʼn miʼn kysbʼun ex tuʼn tok qe kykʼuʼj txqantl kyiʼj. In japun kyyol in xi kytziyen (Prov. 3:32). «Ex mintiʼ in  pon kykʼuʼj tiʼj jun kambʼabʼl mya tuj tumel». Toj juntl yol, mintiʼ in che sbʼun toj kʼaẍjel ex toj tumel in najbʼen oyaj te congregación kyuʼn. Ex nya bʼaʼn qa ma che ajbʼen erman kyuʼn toj congregación noq tuʼn tkambʼet mas kypwaq.

16. a) ¿Tiʼ t-xilen qa «mya kʼal qʼeʼn qe»? b) ¿Tiʼ t-xilen «in tmaʼn kyanmi qa bʼaʼn in kybʼinchaʼn»?

¹⁶ «Mya kʼal qʼeʼn qe». Toj juntl yol, mintiʼ tuʼn t-xi kykʼaʼn nim qʼeʼn ex mintiʼ tuʼn tok ojtzqiʼn kywitz qa in xi kykʼaʼn nim qʼeʼn. Ax ikx, «in tmaʼn kyanmi qa bʼaʼn in kybʼinchaʼn» tuʼnju in xi kynimen qe tkawbʼil Jehová. Mi aʼlx jun kye tzʼaqli, pero in kubʼ kynaʼn bʼaʼn tuʼnju at jun tbʼanel kyamiwbʼil tukʼil Dios.

17. ¿Tiʼ t-xilen qa «ilxix tiʼj tuʼn tikʼ witzbʼaj kyiʼj tnejel qa bʼaʼn ateʼ»? (1 Timoteo 3:10; ax ikx qʼonka twitza tiʼj tilbʼilal).

¹⁷ Ax ikx, «ilxix tiʼj tuʼn tikʼ witzbʼaj kyiʼj tnejel qa bʼaʼn ateʼ». A t-xilen jlu qa otoq kubʼ kyyekʼin qa in kubʼ kybʼinchaʼn aju in xi kyqʼamaʼn ansyan kye. Tuʼntzunju, aj t-xi kyqʼoʼn ansyan jun kyaqʼun, nim toklen tuʼn tkubʼ kybʼinchaʼn ik tzeʼn in xi kyqʼamaʼn kye ex ik tzeʼn in tzaj tqʼamaʼn ttnam Jehová. Qa ma tzʼok tilil kyuʼn tuʼn tjapun kyoklen, kʼokel kyqʼoʼn erman kywitz tiʼj ex kʼelel kynikʼ tiʼj qa in che chʼiy toj kyokslabʼil. Aqeye ansyan, kyqʼonke kywitze kyiʼj ermano o che bautisarin tuʼntzun t-xi kyqʼoʼne xnaqʼtzbʼil kye tuʼn kyonin kyiʼje (kjawil uʼjit 1 Timoteo 3:10). Jun techel, ¿ateʼqe kʼwal te chʼixme 10 a 14 abʼqʼi toj congregación ex o che bautisarin? ¿In nelpe kypaʼn ambʼil tuʼn kyxnaqʼtzaʼn kyjunalx ex in bʼaj kybʼinchaʼn kyten tiʼj chmabʼil? ¿In xipe kyqʼoʼn kyyol kyoj chmabʼil ex in nokpe tilil kyuʼn tuʼn kyex pakbʼal? Qa ikju, bʼaʼn tuʼn t-xi kyqʼoʼne junjun aqʼuntl kye aju jaku bʼant kyuʼn ik tzeʼnx kyabʼqʼi. Iktzun tten, kʼelel kynikʼe tiʼj qa jaku bʼant jun aqʼuntl kyuʼn. Atzun jlu kʼonil kyiʼj tuʼn t-xi qʼet kyoklen te onil kye ansyan aj kyex toj kykuʼxumal.

18. ¿Tiʼ t-xilen tuʼn kyten «mintiʼ kypaltil»?

¹⁸ «Mintiʼ kypaltil» onil kye ansyan, toj juntl yol, mintiʼ jun tiquʼn tuʼn ttzaj qʼamaʼn qa at jun il in bʼant kyuʼn. Ax tok, at maj in tzaj qʼamaʼn junjun nya ax tok yol kyiʼj okslal. Bʼaj jlu tiʼj Jesús ex tqʼama qa ax jlu kbʼajel kyiʼj t-xnaqʼtzbʼen (Juan 15:20). Pero qa kukx ma tzʼok tilil tuʼn jun ermano tuʼn tkubʼ tbʼinchaʼn bʼaʼn, ik tzeʼn bʼant tuʼn Jesús, ok che yolil erman bʼaʼn tiʼj toj congregación (Mat. 11:19).

19. ¿Tiʼ t-xilen tuʼn tten «junx kyxuʼjil» onil kye ansyan?

¹⁹ Aqeju kyaj tuʼn kyok te onil kye ansyan ex  o che kubʼ mojeʼ, «junx kyxuʼjil tuʼn tten». Il tiʼj tuʼn t-xi kynimen kawbʼil kubʼ tqʼoʼn Jehová tiʼj mejebʼleʼn: Tuʼn tkubʼ mojeʼ jun xinaq tukʼil jun xuʼj (Mat. 19:​3-9). Ax ikx, mintiʼ tuʼn tkubʼ tbʼinchaʼn jun okslal yaẍbʼil (Heb. 13:4). Pero nya oʼkx jlu mintiʼ tuʼn tbʼant tuʼn, tuʼnju ax ikx nim toklen tuʼn tten tzʼaqli twitz t-xuʼjil ex tuʼn miʼn tpon tkʼuʼj tiʼj juntl xuʼj (Job 31:1).

20. ¿Tzeʼn jaku bʼant kykawin ermano kye toj kyja?

²⁰ Ax ikx nim toklen «tuʼn tbʼant kykawin kye kykʼwaʼl ex kye qeju ateʼ tuj kyja». Nim toklen tuʼn tok tilil kyuʼn wibʼaj toj ja tuʼn tjapun kyoklen. Tkyaqil seman il tiʼj tuʼn tel kypaʼn ambʼil tuʼn tok kykʼulbʼil kyukʼil toj kyja te Jehová. Ax ikx, in nok tilil kyuʼn tuʼn kypakbʼan tukʼil kyxuʼjil ex kykʼwal. Ex il tiʼj tuʼn kyonin kyiʼj kykʼwal tuʼn tchʼiy kyamiwbʼil tukʼil Jehová (Efes. 6:4). Qa in nok t-xqʼuqin jun ermano qe toj tja, ax ikx jaku che ok t-xqʼuqin qe erman toj congregación (jaku kubʼ tmojbʼaʼna tukʼil 1 Timoteo 3:5).

21. ¿Tiʼ jaku bʼant tuʼna qa naʼmx toka te onil kye ansyan?

²¹ Qa naʼmx toka te siervo ministerial moqa onil kye ansyan, kukx naʼna Dios te Jehová ex xnaqʼtzana tiʼj xnaqʼtzbʼil lu. Bʼaʼn tuʼn tel tnikʼa tiʼj alkyeqe requisito il tiʼj tuʼn tjapun kyuʼn onil kye ansyan ex qʼonka tilil tuʼn kyjapun tuʼna. Ximana tiʼj jniʼ kʼujlaʼn Jehová ex qe erman tuʼna ex qʼonka tilil tuʼn tajbʼena kye (1 Ped. 4:​8, 10). Qa ma bʼant jlu tuʼna, jaku kubʼ tnaʼna tzalajbʼil aj tonina kyiʼj erman. ¡Awt Jehová tzaj kʼiwlante teya tuʼntzun toka te onil kye ansyan! (Filip. 2:13).