¿KWESTPE in nela teya tuʼn t-xnaqʼtzana tkyaqil seman? Chʼixme qkyaqilx in bʼaj jlu qiʼj tuʼnju at maj mintiʼ in tzaj qgan tuʼn qxnaqʼtzan. Pero at junjun tiʼchaq in bʼant quʼn maske nyaxix qgan ex in xi tiʼn ambʼil, ik tzeʼn tuʼn qbañarin. Pero aj tbʼant quʼn in kubʼ qnaʼn bʼaʼn. Ax jlu jaku bʼaj qʼij aj qxnaqʼtzan tiʼj Biblia tuʼnju in chewix qanmi tuʼn (Efes. 5:​26). Aqeju consej in tzaj tqʼoʼn xnaqʼ­tzbʼil lu jaku che onin tiʼja tuʼn t-xnaqʼtzana:

•  Ximana alkye qʼij ex alkye or kxnaqʼtzala. Aju tuʼn qxnaqʼtzan qjunalx atzun jun kyxol qe tiʼ­chaq mas nim toklen tuʼn tbʼant tuʼn jun okslal ex mintiʼ tuʼn tkyaj ttzaqpiʼn (Filip. 1:​10). Tuʼn miʼn tikʼ tnaʼl tuʼna tuʼn tel tpaʼna ambʼil tuʼn t-xnaqʼtzana tju­nalxa, tbʼanel qa ma kubʼ ttzʼibʼina twitz jun uʼj al­kye qʼij ex alkye or jaku bʼant tuʼna ex bʼaʼn tuʼn tkubʼ tqʼoʼna uʼj toj jun lugar jatumel qʼanchaʼl. Moqa jaku kubʼ tqʼoʼna jun alarma toj teléfono chʼinxtoq tpon ambʼil tuʼn t-xnaqʼtzana.

•  Bʼinchankuya aju mas in nonin tiʼja. Ateʼ junjun in che xnaqʼtzan mas nim ambʼil, atzun junjuntl noq chʼin ambʼil. Yajtzun teya, ¿alkye mas bʼaʼn in nela toj twitza? Ximana tiʼj jlu aj tkubʼ t-ximana al­kye qʼij ex alkye or kxnaqʼtzala. ¿Yajtzun qa mintiʼxix tgana tuʼn t-xnaqʼtzana aj tpon ambʼil? Qʼonka tilil tuʼn t-xnaqʼtzana maske noq 10 minut. Noqlo chʼin ambʼil, pero mas bʼaʼn qa ma bʼant tuʼna twitzju qa mintiʼ xbʼant tuʼna. Ex bʼalo aj tikʼ 10 mi­nut, in tzaj mas tgana tuʼn t-xnaqʼtzana mas ambʼil (Filip. 2:​13).

•  Ximana tiʼj alkyeqe xnaqʼ­tzbʼil che kbʼel t-xnaqʼtzaʼna. Qa tzmaxi aj tok tena xnaqʼtzal in xi tjyoʼna alkye xnaqʼ­tzbʼil kbʼel t-xnaqʼtzaʼna, mintiʼlo in xi tbʼiʼna aju nabʼil in tzaj tqʼoʼn Bi­blia: «Tzʼ­ajbʼenxwit tkyaqil qʼij kyuʼne tuʼn kybʼinchanteye bʼaʼn» (Efes. 5:​16). Bʼinchama jun lista tiʼj al­kyeqe xnaqʼ­tzbʼil taja tuʼn t-xnaqʼtzaʼna tiʼj. Ex aj tul jun xjel toj twiʼya, tzʼibʼinkuya. Axpe ikx aj tok tena xnaqʼtzal ex in che ul junjuntl xjel toj twiʼya ex taja tuʼn tel tnikʼa kyiʼj, jaku che kubʼ ttzʼibʼina toj jun lista.

•  Qa il tiʼj, jaku kubʼ tchʼexpuʼna qʼij ex or. Aju mas nim toklen tuʼn tbʼant tuʼna aju tuʼn t-xnaqʼtzana tkyaqil seman. Pero tuʼn tbʼant jlu tuʼna, atlo maj nim toklen tuʼn tbʼant junjun chʼixpubʼil tuʼna tiʼj alkye qʼij, alkye or, alkyeqe xnaqʼ­tzbʼil kxnaqʼtzala tiʼj ex jniʼ ambʼil kʼokel tqʼoʼna tiʼj.

Qa kukx ma xnaqʼtzana tjunalxa tkyaqil seman, ktzajel tiʼn nim tbʼanel teya. Mas kchʼiyel tamiwbʼila tukʼil Jehová, mas kʼelel tnikʼa tiʼj tiʼ tuʼn tbʼant tuʼna aj tok weʼya twitz jun tiʼ ex kbʼel tnaʼna qa mas at qʼuqbʼil tkʼuʼja (Jos. 1:⁠8).