1, 2. ¿Alkye junjun nya bʼaʼn jaku tzʼok bʼinchaʼn qiʼj?

 KUBʼ tqʼoʼn Jesús jun techel tiʼj jun mebʼa xuʼj aju xi tqanin nimku maj te jun jwes tuʼn t-xi tbʼinchaʼn tiʼj nya bʼaʼn ok bʼinchaʼn tiʼj. El-lo kynikʼ t-xnaqʼtzbʼen Jesús tiʼjju kubʼ tnaʼn mebʼa xuʼj yolin Jesús tiʼj tuʼnju toj ambʼil aju in noktoq bʼinchaʼn nya bʼaʼn kyiʼj xjal (Luc. 18:​1-5). Ax ikx toj ambʼil jaʼlo, jaku tzʼel qnikʼ tiʼjju kubʼ tnaʼn mebʼa xuʼj tuʼnju qkyaqilx o tzʼok bʼinchaʼn junjun nya bʼaʼn qiʼj.

² Mintiʼ tuʼn qjaw labʼin qa ma tzʼok bʼinchaʼn jun nya bʼaʼn qiʼj, tuʼnju toj ambʼil jaʼlo in ten kyximbʼetz xjal nya bʼaʼn kyiʼj txqantl, mintiʼ in nok kyqʼoʼn kyoklen ex in che kubʼ kyyajen. Atzun jlu in bʼaj tkyaqil qʼij twitz tkyaqil Txʼotxʼ (Ecl. 5:8). Pero mas jaku qo jaw labʼin qa jun erman sok bʼinchante nya bʼaʼn qiʼj. Ax tok, junxitl qe erman kywitz xjal nya kyaj tuʼn tel kynikʼ tiʼj axix tok, noqtzun tuʼnj, atlo maj jaku tzʼok kybʼinchaʼn nya bʼaʼn qiʼj tuʼnju aj il qe. Pero jaku tzʼel qkanoʼn aju bʼant tuʼn Jesús tej tok bʼinchaʼn nya bʼaʼn tiʼj kyuʼn aj qʼoj. Qa in nok tilil quʼn tuʼn tten qpasens kyiʼj aj qʼoj in nok kybʼinchaʼn nya bʼaʼn qiʼj, ¿nyapetzulo mas il tiʼj tuʼn tbʼant jlu quʼn kyukʼil qerman? Pero, ¿tiʼ in kubʼ tnaʼn Jehová aj tok tbʼinchaʼn jun xjal moqa jun erman nya bʼaʼn qiʼj? ¿In nelpe tnikʼ tiʼjju in kubʼ qnaʼn?

3. ¿Tiquʼn in xi qqʼamaʼn qa in nok tqʼoʼn Jehová twitz tiʼjju in nok kybʼinchaʼn txqantl qiʼj?

³ Taj Jehová tuʼn tkubʼ kyyekʼin txqantl tbʼanel kymod qukʼil ex in nel tnikʼ tiʼj aj tok bʼinchaʼn jun nya bʼaʼn qiʼj. In tzaj tqʼamaʼn Biblia qa «in tzalaj Qman qiʼj qa in qbʼinchaʼn ju tzʼaqlxix» (Sal. 37:28). Ex tqʼama Jesús qa jurat kxel tbʼinchaʼn Dios tiʼj nya bʼaʼn ex toj ambʼil mas bʼaʼn (Luc. 18:​7, 8). Chʼix tpon ambʼil  tuʼn tel tiʼn Dios yajbʼil ex ya mlay tzaj tqʼoʼntl ambʼil tuʼn tok bʼinchaʼn jun nya bʼaʼn qiʼj (Sal. 72:​1, 2).

4. ¿Tzeʼn in nonin Jehová qiʼj?

⁴ Akux in qo ayon tuʼn tel tiʼn Jehová nya bʼaʼn, in qo tzaj t-xnaqʼtzaʼn tiʼj alkye qmod tuʼn tkubʼ qyekʼin aj tok bʼinchaʼn nya bʼaʼn qiʼj (2 Ped. 3:13). Jun techel, in tzaj tyekʼin qe tiʼ tuʼn tbʼant quʼn tuʼn miʼn t-xiʼ nya bʼaʼn toj il. Ax ikx, o tzaj tqʼoʼn Tkʼwal tuʼn tkyaj tqʼoʼn jun tbʼanel techel qwitz. Ex o tzaj tqʼoʼn qe consej qe toj Biblia, aʼyeju jaku che onin qiʼj aj tok bʼinchaʼn jun nya bʼaʼn qiʼj.

BʼAʼN TUʼN TOK QXQʼUQIN QMOD AJ TOK BʼINCHAʼN NYA BʼAʼN QIʼJ

5. ¿Tiquʼn nim toklen tuʼn tok qqʼoʼn kwent tiʼj qmod in kubʼ qyekʼin aj tok bʼinchaʼn jun nya bʼaʼn qiʼj?

⁵ Atlo maj jaku kux choʼn toj qanmi ex jaku tzaj bʼaj qkʼuʼj aj tok bʼinchaʼn jun nya bʼaʼn qiʼj (Ecl. 7:7). Ax jlu kubʼ kynaʼn junjun tmajen Jehová toj ambʼil ojtxe, ik tzeʼn Job ex Habacuc (Job 6:​2, 3; Hab. 1:​1-3). Nya jun il qa ma kux choʼn toj qanmi tuʼn nya bʼaʼn, noqtzun tuʼnj, nim toklen tuʼn tok qxqʼuqin alkye qmod kbʼel qyekʼin tuʼntzun miʼn tkubʼ qbʼinchaʼn jun tiʼ nya toj tumel.

6. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Absalón? (Ax ikx qʼonka twitza tiʼj tilbʼilal).

⁶ Aj tok qqʼoʼn qwitz tiʼj jun nya bʼaʼn in nok bʼinchaʼn tiʼj juntl moqa in nok bʼinchaʼn qiʼj, jakulo kubʼ qximen qa aqoʼ at qoklen tuʼn t-xi qbʼinchaʼn tiʼj nya bʼaʼn. Noqtzun tuʼnj, at maj mas jaku txiʼ nya bʼaʼn toj il. Qo ximen tiʼjju bʼaj tiʼj jun kyxol tkʼwal David, aju Absalón tbʼi. Kyitzʼin kyibʼ Absalón tukʼil Tamar, atzun tukʼil Amnón junx kyman pero part kytxuʼ. Tuʼntzunju, tzaj nimxix tqʼoj Absalón tej tok tbʼiʼn qa otoq kubʼ tviolarin Amnón Tamar, aju tanabʼ. In tzajtoq tqʼamaʼn Tley Moisés tuʼn tkubʼ bʼiyet jun xjal in bʼinchan il ik tzeʼn te Amnón (Lev. 20:17). Tuʼntzunju, toj tumel tej ttzaj tqʼoj Absalón, pero nya atoq at toklen tuʼn tkubʼ tbʼyoʼn Amnón (2 Sam. 13:​20-23, 28, 29).

7. ¿Tiʼ kubʼ t-ximen jun salmista tej tok tqʼoʼn twitz kyiʼj qeju in nok kybʼinchaʼn nya bʼaʼn kyiʼj txqantl?

⁷ Aj kyok qkeʼyin qeju xjal bʼinchal nya bʼaʼn, in che tzalaj ex mintiʼ in kubʼ qʼoʼn kykastiw, jakulo kubʼ qxjelin: «¿Bʼaʼnpe tuʼn kukx tkubʼ qbʼinchaʼn aju bʼaʼn?». Qo ximen tiʼj tiʼ kubʼ tnaʼn salmista tej tok tkeʼyin qe xjal in noktoq kybʼinchaʼn nya bʼaʼn kyiʼj txqantl, pero kukxtoq in che tzalaj. Tqʼama jlu: «Kyjaʼtzun kyten  qeju bʼinchal mya bʼaʼn. Mintiʼ in kykʼulbʼaʼn jun mya bʼaʼn» (Sal. 73:12). Tzajxix tbʼis tuʼnju attoq nim nya bʼaʼn ex chʼixme ikʼ tnaʼl tuʼn qa tbʼaneltoq aj tajbʼen te Jehová. Ex tqʼamatl jlu: «Ok tilil wuʼne tuʼn tel nnikʼe tiʼj jlu, ex kyuw ela te weye» (Sal. 73:​14, 16). Nya oʼkxju, ax ikx tqʼamatl jlu: «Chʼixmi ẍin jaw tolje, ex chʼixmi ẍex jilj qe nqane» (Sal. 73:2). Chʼixme ax jlu bʼaj tiʼj jun ermano Alberto tbʼi. a

8. ¿Tiʼ tmod jun erman kubʼ tyekʼin tej tok bʼinchaʼn nya bʼaʼn tiʼj?

⁸ Tzaj qʼamaʼn qa otoq txi telqʼan Alberto tpwaq congregación, pero nya ax tok jlu. Tuʼn jlu el qʼiʼn toklen te ansyan ex ya mintiʼ ok qeʼ kykʼuʼj junjun erman tiʼj. Tzaj tqʼamaʼn tiʼ kubʼ tnaʼn: «Tzajxix nbʼise ex tzaj nim nqʼoje». Xi tqʼoʼn ermano Alberto ambʼil te qʼoj kubʼ tnaʼn ex toj jweʼ abʼqʼi ya mintiʼtl ajbʼen te Jehová. Aju ikʼ tiʼj ermano lu, in tzaj tyekʼin qe tiʼ jaku bʼaj qiʼj qa mintiʼ xkubʼ tiʼj qʼoj quʼn aj tok bʼinchaʼn jun nya bʼaʼn qiʼj.

QKANOʼMIL TMOD JESÚS

9. ¿Alkye junjun nya bʼaʼn ikʼx tuʼn Jesús? (Ax ikx qʼonka twitza kyiʼj tilbʼilal).

⁹ Kubʼ tqʼoʼn Jesús jun tbʼanel techel qwitz tuʼn miʼn taj qqʼoʼn t-xel jun nya bʼaʼn. Nim qe xjal ok kybʼinchaʼn nya bʼaʼn tiʼj, axpe ikx junjun  tfamiliar. Kyqʼama qa otoq tzʼok te loc ex mintiʼ ok qeʼ kykʼuʼj tiʼj qa atoq Mesías. Kyqʼama junjun nejenel kye txqantl okslabʼil qa kyukʼil demonio tzaj tpoder tuʼn kybʼant milagro tuʼn. Atzun kye soldad te Roma, e xmayin tiʼj, bʼaj kybʼyoʼn ex kyim kyuʼn (Mar. 3:​21, 22; 14:55; 15:​16-20, 35-37). Pero ikʼx tkyaqil jlu tuʼn Jesús ex mintiʼ aj tqʼoʼn t-xel. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn?

10. ¿Tiʼ tmod Jesús kubʼ tyekʼin tej tok bʼinchaʼn nya bʼaʼn tiʼj? (1 Pedro 2:​21-23).

¹⁰ (Kjawil uʼjit 1 Pedro 2:​21-23). b Kyaj tqʼoʼn Jesús jun tbʼanel techel tiʼj alkye qmod tuʼn tten aj tok bʼinchaʼn jun nya bʼaʼn qiʼj. El tnikʼ tiʼj toj alkye ambʼil tuʼn tyolin ex toj alkye ambʼil mintiʼ tuʼn tyolin (Mat. 26:​62-64). Jun techel, tej t-xi qʼamaʼn jun nya ax tok yol tiʼj, at maj kubʼ t-ximen tuʼn miʼn t-xi ttzaqʼweʼn (Mat. 11:19). Ex tej tkubʼ t-ximen tuʼn tyolin, mintiʼ e ok tyasoʼn qe aj qʼoj tiʼj ex mintiʼ xi tqʼamaʼn yol te xobʼtzabʼil kye. Bʼant tkyaqil jlu tuʼn tuʼnju «xi tqʼon tibʼ tuj tkwent Dios aju bʼinchalte tiʼj xtis tuj tumelxix». Ojtzqiʼntoq tuʼn qa ok tqʼoʼn Jehová twitz tiʼj nya bʼaʼn ikʼx tuʼn ex ok qeʼ tkʼuʼj tiʼj qa kxeltoq tbʼinchaʼn tiʼj toj ambʼil mas bʼaʼn toj twitz.

11. Aj qyolin, ¿tiquʼn nim toklen tuʼn tten qnabʼil? (Ax ikx qʼonka twitza kyiʼj tilbʼilal).

¹¹ Jaku tzʼel qkanoʼn tiʼj Jesús aj tok qxqʼuqin tiʼ in xi qqʼamaʼn aj tok bʼinchaʼn jun nya bʼaʼn qiʼj. Qa nya nim nya bʼaʼn sok bʼinchaʼn qiʼj, bʼaʼn tuʼn tikʼ tnaʼl quʼn. Ex at maj, mas bʼaʼn tuʼn tkubʼ qximen tuʼn miʼn t-xi qqʼamaʼn jun qyol tuʼntzun miʼn t-xiʼ toj il (Ecl. 3:7; Sant. 1:​19, 20). Pero atlo maj, il tiʼj tuʼn qyolin qa in nok bʼinchaʼn nya bʼaʼn tiʼj jun xjal moqa il tiʼj tuʼn qkolin tiʼj qokslabʼil  (Hech. 6:​1, 2). Pero toj ambʼil lu, nim toklen tuʼn qrespetarin ex tuʼn qyolin toj tumel (1 Ped. 3:15). c

12. ¿Tzeʼn jaku kyaj qqʼoʼn nya bʼaʼn «tuj tkwent Dios aju bʼinchalte tiʼj xtis tuj tumelxix»?

¹² Ax ikx jaku tzʼel qkanoʼn tiʼj Jesús aj tkyaj qqʼoʼn nya bʼaʼn «tuj tkwent Dios aju bʼinchalte tiʼj xtis tuj tumelxix». ¿Tzeʼn? Ik tzeʼn qa at jun in kubʼ t-ximen moqa in nok tbʼinchaʼn jun nya bʼaʼn qiʼj, in nok qeʼ qkʼuʼj tiʼj qa ojtzqiʼn tuʼn Jehová alkye axix tok. Aj tel qnikʼ tiʼj qa chebʼe kxel tbʼinchaʼn Jehová tiʼj nya bʼaʼn, in nonin qiʼj tuʼn tikʼx quʼn. Qa ma tzʼok qeʼ qkʼuʼj tiʼj ex qa ma qo ayon tuʼn t-xi tbʼinchaʼn Jehová tiʼj tkyaqil nya bʼaʼn, mlay txi qkʼuʼn qʼoj ex mlay che el qikʼen qe txqantl. Tuʼnju qa kukx ma txi qkʼuʼn qʼoj tiʼj juntl, jaku kubʼ qbʼinchaʼn jun nya bʼaʼn, ya mlay qo tzalaj, axpe ikx jaku tzaj tiʼn nya bʼaʼn tiʼj qamiwbʼil tukʼil Jehová (Sal. 37:8).

13. ¿Tiʼ jaku tzʼonin qiʼj tuʼn kukx tikʼx quʼn aju nya bʼaʼn in nok bʼinchaʼn qiʼj?

¹³ Ax tok mlay qo ok te tzʼaqli ik tzeʼn te Jesús. Atlo maj jaku txi qqʼamaʼn moqa jaku txi qbʼinchaʼn jun tiʼ aju jaku tzaj qbʼis tuʼn yajxitl (Sant. 3:2). Ex at junjun nya bʼaʼn kukx tzul tiʼn bʼis ex kʼixkʼoj qiʼj tzmaxi aj tel tiʼn Jehová nya bʼaʼn toj ambʼil tzul. Qa a jlu in bʼaj tiʼja, bʼaʼn tuʼn ttzaj tnaʼna qa ojtzqiʼn tuʼn Jehová aju in nok weʼya twitz. Ex in nelxix tnikʼ Jesús tiʼjju in nikʼ tiʼja, tuʼnju ax ikx te ikʼx nim nya bʼaʼn tuʼn (Heb. 4:​15, 16). Nya oʼkx in nok Tkʼwal Jehová te jun tbʼanel techel qwitz, sino ax ikx o tzaj tqʼoʼn Jehová junjun tbʼanel consej qe toj Tyol tuʼntzun kyonin qiʼj aj tok bʼinchaʼn jun nya bʼaʼn qiʼj. Qo xnaqʼtzan tiʼj kabʼe versículo te Romanos.

«NOQ OʼKX KYQʼONKJE TUJ TKWENT DIOS»

14. ¿Alkye tten jaku txi qbʼiʼn consej tqʼama Pablo toj Romanos 12:19?

¹⁴ (Kjawil uʼjit Romanos 12:19). In xi qbʼiʼn consej tqʼama Pablo aj t-xi qqʼoʼn ambʼil te Jehová tuʼn tok te jwes, tuʼnju a kbʼel ximen jtoj ex tzeʼn kxel tbʼinchaʼn tiʼj nya bʼaʼn. Atzun jlu bʼant tuʼn John tej tok bʼinchaʼn jun nya bʼaʼn tiʼj tuʼn juntl erman. Tqʼama jlu: «Ok tilil wuʼne tuʼn miʼn ttzajxix nqʼoje tuʼntzun miʼn t-xi nbʼinchaʼne kyiʼj qe tiʼchaq ik tzeʼn weye nximbʼetz. Nim onin Romanos 12:19 wiʼje tuʼn tten npasense ex tuʼn tok qeʼ nkʼuʼje tiʼj Jehová».

15. ¿Tiquʼn mas bʼaʼn tuʼn t-xi qqʼoʼn ambʼil te Jehová tuʼn t-xi tbʼinchaʼn tiʼj nya bʼaʼn?

¹⁵ Mas bʼaʼn tuʼn t-xi qqʼoʼn ambʼil te Jehová tuʼn t-xi tbʼinchaʼn tiʼj nya bʼaʼn. Qa ma bʼant jlu quʼn, jaku tzʼonin tuʼn miʼn ttzajxix qqʼoj ex tuʼn miʼn ttzaj bʼajxix qkʼuʼj noq tuʼnju in nok tilil quʼn tuʼn t-xi qbʼinchaʼn tiʼj nya bʼaʼn. In tzaj tqʼamaʼn Jehová qe qa kʼonil qiʼj ex in tzaj ttziyen qe qa kxel tbʼinchaʼn tiʼj nya bʼaʼn, tuʼntzunju, bʼaʼn tuʼn qayon tiʼj. Qa ma tzʼok qeʼ qkʼuʼj tiʼj jlu, mlay tzajxix qqʼoj. Atzun jlu bʼaj tiʼj John, aju ma qo yolin tiʼj toj párrafo ma kyaj. In tzaj tqʼamaʼn jlu: «Mas bʼaʼn kʼelel qe tiʼchaq qa ma kyaj nqʼoʼne toj tqʼabʼ Jehová twitzju qa aʼyine ma tzʼok tilil wuʼne tuʼn t-xi nbʼinchaʼne kyiʼj».

«NOQ OʼKX TUʼN TKUBʼ TIʼJ MYA BʼAʼN TUʼNA TUʼNJU TBʼINCHBʼENA BʼAʼN»

16, 17. ¿Tzeʼn in nonin naʼj Dios qiʼj tuʼn kukx tkubʼ tiʼj nya bʼaʼn quʼn tukʼil bʼaʼn? (Romanos 12:21).

¹⁶ (Kjawil uʼjit Romanos 12:21). Tqʼama Pablo jlu: «Noq oʼkx tuʼn tkubʼ tiʼj mya bʼaʼn tuʼna tuʼnju tbʼinchbʼena bʼaʼn». Tqʼama Jesús jlu toj jun chikʼbʼabʼil ex tqʼoʼn twiʼ jun witz: «Kykʼujlame qe aj qʼoj kyiʼje, [ . . . ] ex che naʼne Dios kyiʼj qeju in che ilin kyiʼje ex in che yajlan  kyeye» (Mat. 5:44). Ex atzun jlu bʼant tuʼn. Bʼalo o qo ximen tiʼj kʼixkʼoj ikʼx tuʼn Jesús tej tokx qʼoʼn qe clav kyoj tqʼabʼ kyuʼn soldad twitz tzeʼ. Ax ikx tej tkubʼ kyqʼoʼn tchʼixwi ex tej tok kybʼinchaʼn nya bʼaʼn tiʼj. Nimxix kʼixkʼoj ikʼx tuʼn ex kwest tuʼn tel qnikʼ tiʼj.

¹⁷ Mintiʼ xi tqʼoʼn Jesús ambʼil tuʼn tkubʼ tiʼj kyuʼn nya bʼaʼn ok bʼinchaʼn tiʼj. Mintiʼ xi tqʼamaʼn te Jehová tuʼn tkubʼ tqʼoʼn kykastiw aj qʼoj tiʼj, sino xi tqʼamaʼn jlu te: «Tat, najsama kyil xjal lu, porke mintiʼ nneʼl kynikʼ tiʼj ju in kybʼinchaʼn» (Luc. 23:34). Qa ma qo naʼn Dios kyiʼj qeju in nok kybʼinchaʼn nya bʼaʼn qiʼj, jaku tzʼonin tuʼn tten qximbʼetz toj tumel, tuʼn miʼn ttzajxix qqʼoj ex tuʼn miʼn t-xi qkʼuʼn qʼoj kyiʼj.

18. ¿Tzeʼn onin naʼj Dios tiʼj Alberto ex tiʼj John?

¹⁸ Onin naʼj Dios tuʼn tikʼx nya bʼaʼn kyuʼn qeju kabʼe erman ma qo yolin kyiʼj toj xnaqʼtzbʼil lu. Tqʼama Alberto jlu: «In naʼne Dios kyiʼj erman o tzʼok kybʼinchaʼn nya bʼaʼn wiʼje. Nim maj xi nqanine te Jehová tuʼn tonin wiʼje tuʼn ya miʼn ttzaj nqʼoje tiʼjju otoq tzʼok bʼinchaʼn wiʼje». ¡Tbʼanelxix tuʼnju in najbʼen Alberto juntl maj te Jehová! Ax ikx te John tqʼama jlu: «Nim maj xi nqanine te Jehová tuʼn tonin tiʼj erman otoq tzʼok tbʼinchaʼn nya bʼaʼn wiʼje ex tuʼn tonin wiʼje tuʼn tkubʼ nnajsaʼne til. Onin Jehová wiʼje tuʼn miʼn ttzajxix nqʼoje ex tuʼn miʼn nximane tiʼj tiquʼn otoq tzʼok tbʼinchaʼn nya bʼaʼn wiʼje. Atzun jlu onin wiʼje tuʼn ntzalaje ex tuʼn tkubʼ nnaʼne bʼaʼn».

19. ¿Tiʼ il tiʼj tuʼn tbʼant quʼn akux in qo anqʼin toj ambʼil kwest? (1 Pedro 3:​8, 9).

¹⁹ Naʼmxtoq tkubʼ tnajsaʼn Jehová nya bʼaʼn, mintiʼ ojtzqiʼn quʼn tiʼ mastl nya bʼaʼn qo okel weʼ twitz. Pero noq tiʼxku tzul qiʼj, kukx kxel qqanin te Jehová tuʼn tonin qiʼj. Tuʼntzunju, bʼaʼn tuʼn tok tilil quʼn tuʼn tel qkanoʼn tmod Jesús kubʼ tyekʼin tej tok bʼinchaʼn nya bʼaʼn tiʼj ex qbʼinx qe consej ateʼkux toj Biblia. Qa ma bʼant jlu quʼn, jaku tzʼok qeʼ qkʼuʼj tiʼj qa qo tzajel tkʼiwlaʼn Jehová (kjawil uʼjit 1 Pedro 3:​8, 9).