AJU xjal in xnaqʼtzan tiʼj tzeʼn taʼ ambʼil, in nok tkeʼyin jun ex juntl maj qe tilbʼilal in nel kyiʼn satélite, iktzun tten in nel tnikʼ tiʼj qa kyja ttzaj jun kyqʼiqʼ jbʼal toj jun lugar jatumel ateʼ nim xjal. Tuʼnju in ximen kyiʼj xjal ex nya taj tuʼn kykyim, jun rat in xi tqʼoʼn tqanil kye qa chʼix tul jun kyqʼiqʼ jbʼal.

Chʼixmi axju in bʼant tuʼn Jehová, in tzaj tqʼamaʼn kye xjal qa chʼix tul jun matij xitbʼil ex mas nya bʼaʼn jaku tzaj tiʼn twitz jun xitbʼil tuʼnx twitz txʼotxʼ. ¿Alkye tten in bʼant tuʼn? ¿Ex tiquʼn in xi qqʼamaʼn qa in xi tqʼoʼn nim ambʼil kye xjal tuʼntzun tbʼaj kybʼinchaʼn kyten? Tuʼn tel qnikʼ tiʼj tzaqʼwebʼil, qo xnaqʼtzan tiʼj junjun tqanil tzaj tqʼoʼn Jehová toj ambʼil ojtxe.

Toj ambʼil ojtxe, nim maj xi tqʼamaʼn Jehová kye xjal qa tzultoq tiʼn kastiw kyibʼaj qeju kubʼ kyximen tuʼn miʼn kynimen te (Prov. 10:25; Jer. 30:23). Tej tkubʼ tqʼoʼn qe kastiw lu, xi tqʼoʼn nim ambʼil kye xjal tuʼn tbʼaj kychʼexpuʼn kymod ex xi tqʼamaʼn kye tiʼ tuʼn tbʼant kyuʼn tuʼntzun ttzalaj kyiʼj (2 Rey. 17:12-15; Neh. 9:29, 30). Tuʼn tonin Jehová kyiʼj tuʼn tkubʼ kybʼinchaʼn aju bʼaʼn, e ajbʼen tmajen tuʼn tuʼntzun t-xi kyqʼamaʼn kye xjal tuʼn tbʼaj kybʼinchaʼn kyten (Amós 3:7).

Jun kyxol qe tmajen Jehová ajbʼen tuʼn, ten Noé. Toj nim abʼqʼi xi tqʼamaʼn Noé kye xjal in che yaẍintoq ex in che bʼiyen qa chʼixtoq tul Nim Jbʼal twitz tkyaqil Txʼotxʼ (Gén. 6:9-13, 17). Ax ikx xi tqʼamaʼn kye xjal tiʼ tuʼn tbʼant kyuʼn tuʼntzun kykyaj anqʼin. Ok tilil tuʼn tuʼn tbʼant oklenj lu tuʼn, tuʼntzunju ok qʼoʼn tbʼi te pakbʼal tiʼjju tzʼaqli (2 Ped. 2:5).

Maske ok tilil tuʼn Noé tuʼn tok kybʼiʼn xjal tqanil, mintiʼ kubʼ kyyekʼin xjal qʼuqbʼil kykʼuʼj ex mintiʼ xi kybʼiʼn tqanil. Tejtzun «ttzaj qʼeqabʼ kyibʼaj; kykyaqiltzun e jeʼx qʼiʼn tuʼn aʼ» ex e kyim (Mat. 24:39; Heb. 11:7). Mlaytoq txi kyqʼamaʼn xjal qa mintiʼ otoq tqʼama Dios tqanil kye.

Toj junjuntl ambʼil, xi tqʼamaʼn Jehová tqanil kye xjal tej chʼixtoq tkubʼ tqʼoʼn kykastiw. Pero xi tqʼoʼn ambʼil kye tuʼn tkubʼ kychʼixpuʼn kymod. Atzun jlu bʼant tuʼn tej ttzaj tqʼoʼn qe lajaj kʼixbʼisabʼil toj tnam Egipto. Qo ximen tiʼjju bʼaj toj twuqin kʼixbʼisabʼil. Tzaj tqʼoʼn nim saqbʼaqin te kastiw. Xi tsamaʼn Jehová Moisés ex Aarón tuʼn t-xi kyqʼoʼn tqanil te faraón ex qe tmajen. Tuʼnju toj juntl qʼij tuʼn tkubʼ saqbʼaqin, ¿tenpe ambʼil kyiʼj xjal tuʼn t-xi kyjyoʼn jun tumel tuʼn kyklet? In tzaj ttzaqʼweʼn Tyol Dios jlu: «Aqeju xi kyniman tyol Qman kyxol qeju attoq kyoklen ttxlaj Faraón, okx kyqʼoʼn qe kymajen ex qe kyalun kyuj kyja; atzun qeju mintiʼ xi kyniman tyol Qman, ax e kyaj kyqʼoʼn qe kymajen ex qe kyalun tuj kojbʼil» (Éx. 9:18-21). Tuʼn jlu in nel qnikʼ tiʼj qa xi tqʼoʼn Jehová ambʼil kye xjal tuʼn tbʼaj kybʼinchaʼn kyten. Noq tuʼn jlu, e klet qe xjal xi kybʼiʼn tqanil tiʼj kʼixbʼisabʼil.

Ax ikx xi tqʼoʼn Jehová tqanil te faraón ex kye tmajen tej naʼmxtoq tkubʼ tqʼoʼn tlajin kʼixbʼisabʼil. Pero mintiʼ ten kynabʼil ex mintiʼ xi kybʼinchaʼn jun tiʼ (Éx. 4:22, 23). Tuʼntzunju, ok kykeʼyin tej kykyim qe tnejel kykʼwaʼl. ¡Bʼisbʼajilxix jlu! (Éx. 11:4-10; 12:29). ¿Tenpelo ambʼil kyiʼj tuʼn t-xi kybʼinchaʼn jun tiʼ? Ten.  ¿Tiquʼn in xi qqʼamaʼn jlu? Xi tqʼamaʼn Moisés tqanil kye aj Israel tiʼj kʼixbʼisabʼil lu ex xi tqʼamaʼn kye tiʼtoq tuʼn tbʼant kyuʼn tuʼntzun kyklet qe toj kyja (Éx. 12:21-28). ¿Jteʼ kybʼet xjal xi kybʼiʼn tqanil lu? Ik tzeʼn in tzaj kyyekʼin junjun tqanil, e klet ex i etz oxe millón xjal. I etz aj Israel ex nimku xjal te junxichaq kyyajil, kyxol qe jlu i etz junjun xjal te Egipto (Éx. 12:38).

Ik tzeʼn in tzaj kyyekʼin techel lu, ok tilil tuʼn Jehová tuʼn tten ambʼil kyiʼj xjal tuʼn t-xi kybʼiʼn tqanil (Deut. 32:4). ¿Tiquʼn bʼant jlu tuʼn? Tzaj tchikʼbʼaʼn apóstol Pedro qa nya taj Jehová «tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Ped. 3:9). Ikju, in ximen Jehová kyiʼj xjal. Tajtoq tuʼn tajtz tiʼj kyanmi xjal ex tuʼn t-xi kybʼiʼn qe nabʼil xi tqʼoʼn kye naʼmxtoq tkubʼ tqʼoʼn kykastiw (Is. 48:17, 18; Rom. 2:4).

Ax ikx toj ambʼil jaʼlo, il tiʼj tuʼn tok kybʼiʼn xjal tqanil in xi qʼamet twitz tkyaqil Txʼotxʼ. Tej tten Jesús tzalu twitz Txʼotxʼ, kyaj tqʼamaʼn qa che kbʼel xiten xjal aj tul «jun kʼixbʼisabʼl maʼxix» (Mat. 24:21). Kyaj tqʼamaʼn junjun tqanil tiʼj tiʼxix tuʼn tikʼ kyiʼj t-xnaqʼtzbʼen ex tiʼ tuʼn tok kykeʼyin akux in nul laqʼeʼ xitbʼil. Yolin kyiʼj junjun tiʼchaq tuʼn tbʼaj twitz Txʼotxʼ ex in nok qqʼoʼn qwitz tiʼj jlu toj ambʼil jaʼlo (Mat. 24:3-12; Luc. 21:10-13).

Tuʼnju kyaj tqʼamaʼn Jehová qe yol lu, in xi tqʼamaʼn kye xjal tuʼn kynimen ex tuʼn kyajbʼen te. Taj tuʼn tten jun tbʼanel kyanqʼibʼil qeju in che nimen te toj ambʼil jaʼlo ex tuʼn ttzaj kykʼamoʼn tbʼanel kʼiwlabʼil toj akʼaj twitz Txʼotxʼ (2 Ped. 3:13). Tuʼn tok qeʼ kykʼuʼj xjal kyiʼj ttziybʼil Jehová, o tzaj tqʼoʼn qe tbʼanel tqanil tiʼj Tkawbʼil, aju jaku che klet tuʼn. Ax ikx, kyaj tqʼamaʼn Jesús qa tuʼn t-xi pakbʼet Tyol Dios «tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon» (Mat. 24:14). O bʼaj tnukʼun Jehová qe tmajen tuʼntzun t-xi kyqʼamaʼn tqanil lu kyoj junlo 240 nimaq tnam ex lugar. Taj tuʼn tok kybʼiʼn nim xjal tqanil lu ex tuʼn kyklet tiʼj xitbʼil tzul tiʼn aj tkubʼ tqʼoʼn kykastiw xjal (Sof. 1:14, 15; 2:2, 3).

Tuʼntzunju, aju xjel nim toklen, nya aju qa in tzaj tqʼoʼn Jehová nim ambʼil tuʼntzun tok kybʼiʼn xjal tqanil in tzaj tqʼoʼn. ¿Tiquʼn? Tuʼnju at yekʼbʼil tiʼj qa in tzaj tqʼoʼn nim ambʼil. Sino aju xjel nim toklen, aju qa kyxel kybʼiʼn xjal tqanil in tzaj tqʼoʼn Jehová akux at ambʼil kyiʼj. Atzun qe, kukx qo onin kyiʼj nim xjal tuʼntzun kykyaj anqʼin aj tul xitbʼil.