XNAQʼTZBʼIL 41
Kukx qo ajbʼen te Jehová toj nimxix yajbʼil
«Kykʼujlame Qman kykyaqile aqeye in che niman te. In che ok tkwentin Qman qeju in che bʼet tuj tumelxix» (SAL. 31:23).
BʼITZ 129 Kukx tuʼn tikʼx quʼn
AJU KʼELEL QNIKʼ TIʼJ *
1, 2. a) ¿Tiʼ tqanil chʼix ttzaj kyqʼamaʼn nimaq tnam? b) ¿Alkyeqe xjel kxel qqʼoʼn tzaqʼwebʼil kyiʼj?
QO XIMEN tiʼj aj ttzaj kyqʼamaʼn nimaq tnam qa ya «mintiʼ bʼis, [ex qa] bʼaʼn taʼ tkyaqil». Bʼalo kjawil kynimsan kyibʼ tuʼnju naʼmx tten jun maj tzalajbʼil tzalu twitz Txʼotxʼ. Ex kʼokel tilil kyuʼn tuʼn t-xi qnimen qa jaku txi kybʼinchaʼn tiʼj tkyaqil nya bʼaʼn. Noqtzun tuʼnj, mlayx ten kyipumal tiʼjju tzul kyiʼj. ¿Tiquʼn? Tuʼnju in tzaj tqʼamaʼn Tyol Dios qa noq «minabʼen tzul kastiw kyibʼaj tuʼn kynaj, [...] ex mlay che tzoqpaj» (1 Tes. 5:3).
2 Tuʼntzun, at junjun xjel nim toklen kxel qtzaqʼweʼn: ¿Tiʼ kbʼajel aj tul nimxix yajbʼil? ¿Tiʼ tajbʼil Jehová tuʼn tbʼant quʼn toj ambʼil aju? Ex ¿alkye tten jaku bʼaj qbʼinchaʼn qten toj ambʼil jaʼlo tuʼntzun kukx qajbʼen te Jehová toj nimxix yajbʼil? (Mat. 24:21).
¿TIʼ KBʼAJEL AJ TUL NIMXIX YAJBʼIL?
3. Ik tzeʼn in tzaj tqʼamaʼn Apocalipsis 17:5, 15 a 18, ¿alkye tten kbʼel tnajsaʼn Jehová «Nintz tnam Babilonia»?
3 (Kjawil uʼjit Apocalipsis 17:5, 15-18). Kbʼel xiten «Nintz tnam Babilonia». Ik tzeʼn ma txi qqʼamaʼn, mlay ten kyipumal nimaq tnam tibʼaj tkyaqilju kbʼajel toj ambʼil aju. ¿Tiquʼn? Tuʼnju kbʼelex tqʼoʼn «Dios tuj kyanmi tuʼn kybʼinchante ju tajbʼil». ¿Alkye jlu? Aju tuʼn kykubʼ najset kykyaqil okslabʼil nya ax tok ex qeju kʼloj okslabʼil in tzaj kyqʼamaʼn qa in che ok lepeʼ tiʼj Jesús, pero mintiʼ in che kʼulin te Jehová ik tzeʼn tajbʼil. Kʼajbʼel lajaj tkach «txkup kyaq tiʼj» tuʼn Jehová tuʼn tjapun twi t-ximbʼetz. Aqeju lajaj tkach txkup, in kubʼ qʼoʼn te techel kykyaqil aj kawil te twitz Txʼotxʼ in che onin tiʼj txkup, atzunte txkup, in nok te techel Naciones Unidas (Apoc. 17:3, 11-13; 18:8). Aj kyok tzoqpaj aj kawil kyiʼj okslabʼil nya ax tok, toj ambʼil aju kxel tzyet nimxix yajbʼil. Tzul nim bʼis twitz tkyaqil Txʼotxʼ tuʼn jlu.
4. a) ¿Tiquʼntzulo che okel ten aj kawil qʼojil kyiʼj okslabʼil nya ax tok? b) ¿Tiʼlo kbʼantel kyuʼn xjal ateʼ toj jun okslabʼil?
4 Mintiʼ ojtzqiʼn quʼn tiquʼn che okel ten aj kawil qʼojil tiʼj Nintz tnam Babilonia. Bʼalo tzul kyqʼamaʼn qa mintiʼ in che onin okslabʼil moqa nimbʼil tuʼn tten mujbʼabʼil twitz Txʼotxʼ ex qa toj tkyaqil ambʼil in nokx kyqʼon kyibʼ kyxol aj kawil. Ex jaku tzaj kyqʼamaʼn qa ya at nim kyqʼinumabʼil ex at nim kytxʼotxʼ (Apoc. 18:3, 7). Aj kyok ten aj kawil qʼojil kyiʼj okslabʼil, jaku kubʼ qximen qa mlay che kyim kykyaqil qeju ateʼ toj. Sino oʼkx kʼokel tilil kyuʼn aj kawil tuʼn ya miʼn kyten kʼloj okslabʼil. Aj kykubʼ naj okslabʼil, kʼelel kynikʼ qeju otoq che ten kyoj qa mintiʼ otoq che onin nejenel kye okslabʼil kyiʼj ex bʼalo kʼokel tilil kyuʼn tuʼn tel kypan kyibʼ kyiʼj.
5. ¿Tiʼ o tzaj ttziyen Jehová aj tul nimxix yajbʼil ex tiquʼn?
5 Mintiʼ in tzaj tqʼamaʼn Tyol Dios jniʼ ambʼil kxel tiʼn tuʼn tkubʼ xiten Nintz tnam Babilonia, pero ojtzqiʼn quʼn qa nya nim ambʼil kxel tiʼn (Apoc. 18:10, 21). O tzaj ttziyen Jehová qa kʼajetz «laqʼeʼ tiʼj tqʼijlalil kʼixbʼisabʼl» tuʼn tuʼntzun kyklet skʼoʼn maj ex qeju tmajen (Mar. 13:19, 20). Noqtzun tuʼnj, ¿tiʼ taj Jehová tuʼn tbʼant quʼn aj t-xi tzyet nimxix yajbʼil ex aj tul Armagedón?
KUKX QO AJBʼEN TE JEHOVÁ
6. ¿Tiʼ taj Jehová tuʼn tbʼant kyuʼn tmajen?
6 Ik tzeʼn el qnikʼ tiʼj toj xnaqʼtzbʼil o kyaj, taj Jehová tuʼn tel qpan qibʼ tiʼj tkyaqilju at toklen tukʼil Nintz tnam Babilonia. Noqtzun tuʼnj, il tiʼj tuʼn tbʼant juntl tiʼ quʼn. Nim toklen tuʼn tkubʼ qximen tuʼn kukx qajbʼen te Jehová. Qo yolin tiʼj kabʼe tumel tzeʼn jaku bʼant jlu quʼn.
Tzʼok tilil quʼn tuʼn qxiʼ kyoj kykyaqil chmabʼil, axpe ikx kyoj ambʼil kwest. (Qʼonka twitza tiʼj taqikʼ 7). *
7. a) ¿Tzeʼn in kubʼ qyekʼin qa in qo nimen te Jehová tiʼjju alkye bʼaʼn ex alkye nya bʼaʼn? b) Ik tzeʼn in tzaj tqʼamaʼn Hebreos 10:24 ex 25, ¿tiquʼn nim toklen tuʼn tok qchmon qibʼ ex mas toj ambʼil jaʼlo?
7 Tnejel, il tiʼj tuʼn t-xi qnimen qe tkawbʼil Jehová tiʼj alkye bʼaʼn ex tiʼj alkye nya bʼaʼn. Mintiʼ tuʼn tten ax qximbʼetz ex qmod ik tzeʼn kye xjal. Jun techel, mintiʼ in xi qqʼoʼn ambʼil te alkyexku tten yaẍbʼil, ex nya bʼaʼn in nela toj qwitz aj tkubʼ mojeʼ jun xinaq tukʼil juntl xinaq moqa alkyexku juntl il (Mat. 19:4, 5; Rom. 1:26, 27). Tkabʼin, nim toklen tuʼn kukx qkʼulin te Jehová junx kyukʼil erman. In bʼant jlu quʼn ik tzeʼn kyoj Ja te Chmabʼil, kyoj junjuntl ja ex qa toj ewaj. Noq tiʼxku kbʼajel, kukx kʼokel tilil quʼn tuʼn tok qchmon qibʼ tuʼntzun qajbʼen te Jehová. Ex il tiʼj tuʼn tbʼant jlu quʼn tuʼnju «in laqʼex ttzaj tqʼijlalil» Jehová (kjawil uʼjit Hebreos 10:24, 25).
8. ¿Axpelo tqanil qo pakbʼal tiʼj aj tul nimxix yajbʼil ik tzeʼn in bʼant quʼn jaʼlo?
8 Jakulo chʼexpaj tqanil in qo pakbʼan tiʼj aj tul nimxix yajbʼil. Toj ambʼil jaʼlo in qo pakbʼan tiʼj tbʼanel tqanil tiʼj Tkawbʼil Dios ex in nok tilil quʼn tuʼn kyok xjal te t-xnaqʼtzbʼen Jesús. Pero aj tul nimxix kʼixbʼisabʼil, bʼalo kyuw tqanil kxel qqʼoʼn tuʼnju in nok tqʼoʼn Tyol Dios ik tzeʼn qe abʼj ex saqbʼaqin (Apoc. 16:21). Bʼalo kxel qqʼamaʼn qa xobʼajil xitbʼil tzul tiʼjju tokx tjaqʼ tkawbʼil Satanás. Aj tbʼet ambʼil, kʼokel qbʼiʼn tiʼ kxel qqʼamaʼn ex tzeʼn kbʼantel quʼn. ¿Axpe tten qo pakbʼal ik tzeʼn in bʼant quʼn kyoj qeju mas te 100 abʼqʼi ma che ikʼ moqa kbʼel qchʼexpuʼn? Il tiʼj tuʼn qayon tuʼn tok qbʼiʼn. Noq alkyexku tten qo pakbʼal, bʼalo ktel qoklen tuʼn t-xi qqʼamaʼn tqanil tiʼj kastiw tzul tiʼn Jehová ex mlay qo tzaj xobʼ (Ezeq. 2:3-5).
9. ¿Tiʼ jaku kubʼ kyximen xjal tuʼn tbʼant kyuʼn aj qpakbʼan tiʼjju tqanil toj ambʼil tzul, pero alqiʼj jaku tzʼok qeʼ qkʼuʼj?
9 Bʼalo kʼokel tilil kyuʼn xjal tuʼn ya miʼn qpakbʼan tiʼjju tqanil kxel qqʼamaʼn. Qʼuqli qkʼuʼj tiʼj onbʼil in tzaj tqʼoʼn Jehová qe toj pakbʼabʼil toj ambʼil jaʼlo, ex ax jlu kbʼantel quʼn toj ambʼil tzul. Jaku tzʼok qeʼ qkʼuʼj tiʼj qa tzul tqʼoʼn Qdios qipumal tuʼn kukx tbʼant tajbʼil quʼn (Miq. 3:8).
QBʼINCHANKU QTEN AJ KYOK TZOQPAJ AJ QʼOJ TIʼJ TTNAM JEHOVÁ
10. Ik tzeʼn in tzaj tqʼamaʼn Lucas 21:25 a 28, ¿tiʼ kbʼajel kyiʼj xjal aj tok kyqʼoʼn kywitz tiʼjju kbʼajel toj nimxix yajbʼil?
10 (Kjawil uʼjit Lucas 21:25-28). Toj nimxix yajbʼil, che tzajel xobʼ xjal aj tok kykeʼyin qa ya otoq txi tzyet tuʼn kykubʼ naj qe tiʼchaq in nok qeʼ kykʼuʼj tiʼj. Tzul nimxix kybʼis ex che tzajel xobʼ tuʼnju che anqʼil toj ambʼil mas nya bʼaʼn toj kychwinqlal (Sof. 1:14, 15). Tuʼn jlu maslo kwest kʼokel kyanqʼibʼil xjal, axpe ikx kye tmajen Jehová. Bʼalo kʼokel bʼinchaʼn nya bʼaʼn qiʼj kyuʼn xjal. Ex kwestlo che kanetel qe tiʼchaq at tajbʼen qe.
11. a) ¿Tiquʼn kʼokel bʼaj kywitz xjal qiʼj aj tul nimxix yajbʼil? b) ¿Tiquʼn mintiʼ tuʼn qtzaj xobʼ qa ma tzul nimxix yajbʼil?
11 Kpol ambʼil tuʼn ttzaj kyqʼoj qeju kʼokel kyqʼoʼn kywitz tiʼj tzeʼn che kbʼel xiten okslabʼil nya ax tok aj tok kykeʼyin qa naʼmx kykubʼ najsaʼn testigos de Jehová. Tuʼn jlu, bʼalo kxel kyqʼamaʼn tqanil lu kye txqantl, ik tzeʼn toj Internet. Qo elel ikʼun kyuʼn xjal, kyuʼn aj kawil ex tuʼn Satanás tuʼnju oʼkx qe qokslabʼil kukx ktel. Maske otoq kubʼ kyximen tuʼn tkubʼ kynajsaʼn kykyaqil okslabʼil, mlay bʼant kyuʼn. Tuʼntzunju, oʼkx kʼokel bʼaj kywitz qiʼj. Toj ambʼil aju, che okel tnam te Gog ex Magog. * Kʼokel kychmon kyibʼ tuʼntzun ttzaj nimxix kyqʼoj kyiʼj tmajen Jehová (Ezeq. 38:2, 14-16). Tuʼnju mintiʼ ojtzqiʼn tkyaqil tqanil quʼn, bʼalo jaku tzaj bʼaj qkʼuʼj qa ma qo ok ten ximel tiʼjju kbʼajel. Pero mintiʼ tuʼn qtzaj xobʼ qa ma tzul nimxix yajbʼil tuʼnju tzul tqʼamaʼn Jehová qe tiʼ kbʼantel quʼn tuʼn qkyaj anqʼin (Sal. 34:19). Toj ambʼil aju, kjawil qiʼn qwiʼ jawni ex mlay qo tzaj xobʼ tuʼnju «in laqʼex ttzaj» kolbʼil qe. *
12. ¿Toj alkye tten o tzʼonin «majen in bʼant taqʼun [...] ex at tnabʼl» qiʼj tuʼn tbʼaj qbʼinchaʼn qten tiʼj ambʼil tzul?
12 In tzaj tqʼoʼn «majen in bʼant taqʼun [...] ex at tnabʼl» xnaqʼtzbʼil qe tuʼntzun tbʼaj qbʼinchaʼn qten tuʼn kukx qajbʼen te Jehová toj nimxix yajbʼil (Mat. 24:45). O bʼant jlu tuʼn toj nimku tten. Pero qo ximen tiʼj jun kyxol qe jlu, aqeju tbʼanel nimaq chmabʼil o che ok toj abʼqʼi 2016 a 2018. O che onin nimaq chmabʼil lu qiʼj tuʼntzun tbʼaj qkyuwsaʼn qeju qmod il tiʼj tuʼn tten akux in nul laqʼeʼ tqʼijlalil Jehová. Qo xnaqʼtzan chʼin tiʼj alkyeqe jlu.
KUKX QKYUWSAM QIBʼ TUʼN KUKX QAJBʼEN TE JEHOVÁ, TUʼN TIKʼX QUʼN EX TUʼN TTEN QIPUMAL
Qbʼinchanku qten toj ambʼil jaʼlo tuʼntzun qkyaj anqʼin toj nimxix yajbʼil. (Qʼonka twitza kyiʼj taqikʼ 13 a 16). *
13. ¿Alkye tten jaku bʼaj qbʼinchaʼn qten tuʼn kukx qajbʼen te Jehová, ex tiquʼn nim toklen tuʼn tbʼant jlu quʼn jaʼlo?
13 Tuʼn kukx qajbʼen te Jehová. Toj 2016, ok qʼoʼn tbʼi nimaq chmabʼil te «Kukx qo ajbʼen te Jehová». Toj nimaq chmabʼil lu, el qnikʼ tiʼj qa kukx jaku qo ajbʼen te Jehová qa at jun tbʼanel qamiwbʼil tukʼil. Tzaj tnaʼn qe qa in qo ok laqʼeʼ mas ttxlaj Jehová aj qnaʼn Dios ex aj qxnaqʼtzan tiʼj Tyol. Tuʼn jlu jaku ten qipumal tuʼn kyikʼx nim nya bʼaʼn quʼn. Tuʼnju in qo onin tiʼj Tkawbʼil Jehová ex tuʼnju in qo ajbʼen te, mas che okel jlu toj malbʼil akux in nul laqʼeʼ xitbʼil tiʼj tkyaqilju tokx tjaqʼ tkawbʼil Satanás. Bʼalo kukx che xmayil xjal qiʼj (2 Ped. 3:3, 4). Kbʼajel jlu tuʼnju mintiʼ in nokx qqʼon qibʼ kyxol xjal. Tuʼntzunju, nim toklen tuʼn tkubʼ qximen tuʼn kukx qajbʼen te Jehová toj nimxix yajbʼil.
14. a) ¿Alkye chʼixpubʼil tzul kyiʼj erman qʼil twitz aqʼuntl tzalu twitz Txʼotxʼ? b) ¿Tiquʼn nim toklen tuʼn kukx qajbʼen te Jehová toj ambʼil aju?
14 Toj nimxix yajbʼil, kbʼantel jun chʼixpubʼil kyukʼil erman qʼil twitz aqʼuntl tzalu twitz Txʼotxʼ. Kpol ambʼil tuʼn kyxi qʼiʼn kykyaqil okslal skʼoʼn maj ateʼx tzalu twitz Txʼotxʼ tuʼn kyxiʼ toj kyaʼj tuʼntzun kyqʼojin toj Armagedón (Mat. 24:31; Apoc. 2:26, 27). A t-xilen jlu qa ya mlay ten Kʼloj Xjal Qʼil Twitz Aqʼuntl qukʼil. Maske ikju, ktel nukʼbʼil kyxol txqantl ẍneʼl. Aʼyex erman ateʼ kyxol txqantl ẍneʼl che kbʼel nej twitz aqʼuntl tuʼnju ya xnaqʼtzaʼn maj qe. Kbʼel qyekʼin qa in qo onin kyiʼj erman lu aj t-xi qbʼiʼn tkyaqilju tqanil tzul kyqʼoʼn qe, tuʼnju atzun tzul tqʼamaʼn Jehová. Qa ma txi qbʼiʼn, jaku qo klet tuʼn.
15. ¿Alkye tten jaku bʼaj qkyuwsan qibʼ tuʼn kukx tikʼx quʼn, ex tiquʼn nim toklen tuʼn tbʼant jlu quʼn toj ambʼil jaʼlo?
15 Tuʼn kukx tikʼx quʼn. Atzun toj abʼqʼi 2017 ok qʼoʼn tbʼi nimaq chmabʼil te, «¡Miʼn sikta!». Onin nimaq chmabʼil lu qiʼj tuʼn kukx tikʼx quʼn. El qnikʼ tiʼj qa oʼkx jaku tzikʼx quʼn qa ma tzʼok qeʼxix qkʼuʼj tiʼj Jehová, ex nya tiʼjju qa che chʼexpajel qe tiʼchaq (Rom. 12:12). Miʼn tzʼetz qiʼn ttziybʼil Jesús lu toj qwiʼ: «Alkye kukx ma tzikʼx tuʼn [...], atzunju ok kletel» (Mat. 24:13). A t-xilen jlu qa il tiʼj tuʼn kukx qajbʼen te Jehová aj qok weʼ twitz alkyexku nya bʼaʼn. Qa ma tzikʼx quʼn jaʼlo, ktel mas qipumal aj tul nimxix yajbʼil.
16. ¿Alqiʼj tok aju tuʼn tten qipumal ex alkye tten jaku bʼaj qkyuwsaʼn toj ambʼil jaʼlo?
16 Tuʼn tten qipumal. Ex toj abʼqʼi 2018 ok qʼoʼn tbʼi nimaq chmabʼil te, «¡Tenx tipuna!». El qnikʼ tiʼj qa nya atz tok mod lu tiʼjju jaku bʼant quʼn, sino atz tok tiʼj qʼuqbʼil qkʼuʼj at tiʼj Jehová ik tzeʼn in bʼaj tiʼjju tuʼn kukx tikʼx quʼn. ¿Tiʼ jaku bʼant quʼn tuʼn tok qeʼ mas qkʼuʼj tiʼj Jehová? Bʼaʼn tuʼn quʼjin tiʼj Tyol tkyaqil qʼij ex bʼaʼn tuʼn qximen tiʼj alkye tten e klet qe tmajen tuʼn toj ambʼil ojtxe (Sal. 68:20; 2 Ped. 2:9). Aj kyok tzoqpaj aj qʼoj qiʼj toj nimxix yajbʼil, il tiʼj tuʼn tten qipumal ex tuʼn tok qeʼ mas qkʼuʼj tiʼj Jehová (Sal. 112:7, 8; Heb. 13:6). Qa qʼuqli qkʼuʼj tiʼj Jehová toj ambʼil jaʼlo, kʼonil jlu qiʼj tuʼn tten ax qipumal aj ttzaj tqʼoj Gog. *
QO AYON TUʼN TKYAQIL QKʼUʼJ TIʼJ KOLBʼIL QE
Toj chʼintl ambʼil, kbʼel tnajsaʼn Jesús ex qe tbʼanel anjel qe aj qʼoj tiʼj Dios toj qʼoj Armagedón. (Qʼonka twitza tiʼj taqikʼ 17).
17. ¿Tiquʼn mintiʼ tuʼn qtzaj xobʼ aj tok qʼoj Armagedón? (Qʼonka twitza tiʼj tilbʼilal tok tiʼj t-xkʼomil).
17 Ik tzeʼn el qnikʼ tiʼj toj xnaqʼtzbʼil o kyaj, chʼixmi qkyaqilx tzaj tzyet qanqʼibʼil kyoj bʼajsbʼil tqʼijlalil. Noqtzun tuʼnj, ax ikx in qo ayon tuʼn qkyaj anqʼin toj nimxix yajbʼil. Kbʼel najset tkyaqilju tokx tjaqʼ tkawbʼil Satanás aj tul Armagedón. Pero mintiʼ tuʼn qtzaj xobʼ tuʼn jlu tuʼnju atzun tqʼoj Jehová (Prov. 1:33; Ezeq. 38:18-20; Zac. 14:3). Aj ttzaj tqʼamaʼn Jehová tuʼn t-xi tzyet qʼoj, a Jesús kbʼel nej twitz. Ax ikx che tel okslal skʼoʼn maj tukʼil ex qeju nimxix kyajlal anjel. Kykyaqilx che qʼojil junx tuʼntzun tkubʼ tiʼj Satanás kyuʼn, qe nya bʼaʼn anjel ex qe soldad ateʼ twitz txʼotxʼ (Dan. 12:1; Apoc. 6:2; 17:14).
18. a) ¿Tiʼ o tzaj ttziyen Jehová qe? b) ¿Alkye tten in tzaj qʼuqbʼaʼn qkʼuʼj tuʼn Apocalipsis 7:9, 13 a 17 tiʼj ambʼil tzul?
18 O tzaj ttziyen Jehová jlu qe: «Mi jun xjal jaku bʼant jun ubʼl tuʼn tuʼn tnaja tuʼn» (Is. 54:17). At «nimxix kyajlal xjal» che kjel anqʼin toj nimxix yajbʼil tuʼnju in che ajbʼen te Jehová ex kukx kbʼantel jlu kyuʼn (kjawil uʼjil Apocalipsis 7:9, 13-17). ¿Mintiʼpe in tzaj tqʼoʼn Tyol Dios qʼuqbʼil qkʼuʼj tiʼj ambʼil tzul? Ojtzqiʼn quʼn qa «in che ok tkwentin Qman [Jehová] qeju in che bʼet tuj tumelxix» (Sal. 31:23). Kykyaqilx qeju kʼujlaʼn Jehová kyuʼn ex in che nimen te, che tzalajel aj tkubʼ tyekʼin qa xjan tbʼi (Ezeq. 38:23).
19. ¿Alkye tbʼanel qʼuqbʼil qkʼuʼj chʼix tul?
19 Qo ximen tiʼj alkye tten jaku tzaj tqʼamaʼn 2 Timoteo 3:2 a 5 kymod xjal che anqʼil toj akʼaj twitz Txʼotxʼ, jatumel mlay ten tipumal Satanás (qʼonka twitza tiʼj recuadro « ¿Tzeʼn kymod xjal ktel toj ambʼil tzul?»). Tej tyolin ermano George Gangas, aju ten toj Kʼloj Xjal Qʼil Twitz Aqʼuntl, * tiʼj kyanqʼibʼil xjal ktel, tqʼama jlu: «¡Tbʼanelxix kʼokel ambʼil aj qok ik tzeʼn qitzʼin qibʼ! Toj chʼintl ambʼil qo anqʼil toj jun akʼaj twitz Txʼotxʼ. Qo tel nim ambʼil ik tzeʼn te Jehová. Qo anqʼil te jumajx». ¡Tbʼanelxix qʼuqbʼil qkʼuʼj!
BʼITZ 122 ¡Qo weʼxix ex miʼn qo yukch!
^ taqik' 5 Ojtzqiʼn quʼn qa chʼix tpon ambʼil jatumel tzul nimxix yajbʼil toj kychwinqlal kykyaqil xjal. Aj tbʼaj jlu, ¿tiʼ kbʼajel kyiʼj tmajen Dios? ¿Tiʼ tajbʼil Jehová tuʼn tbʼant quʼn toj ambʼil aju? ¿Alkyeqe qmod nim toklen tuʼn kybʼaj qkyuwsaʼn tuʼn kukx qajbʼen te Jehová? Kʼelel qnikʼ kyiʼj tzaqʼwebʼil toj xnaqʼtzbʼil lu.
^ taqik' 11 YOL NIM TOKLEN: Aj tajbʼen yol Gog ex Magog moqa Gog quʼn, atz in qo yolin kyiʼj kʼloj tnam che okel tzoqpaj kyiʼj tmajen Jehová toj nimxix yajbʼil.
^ taqik' 11 In tzaj qʼoʼn mas tqanil tiʼjju kbʼajel toj qʼoj Armagedón toj capítulo 21 te uʼj El Reino de Dios ya está gobernando. Ax ikx in tzaj qʼamaʼn chʼintl tqanil tiʼj Gog ex Magog toj uʼj Aju Xqʼuqil te 1 te julio te 2015, t-xaq 16 a 21.
^ taqik' 16 Toj nimaq chmabʼil te oxe qʼij te 2019, aju tok tbʼi te «¡Mlayx bʼaj kʼujlabʼil!», in tzaj tqʼuqbʼaʼn qkʼuʼj tuʼnju jaku qo klet tuʼn Jehová (1 Cor. 13:8).
^ taqik' 19 Qʼonka twitza tiʼj xnaqʼtzbʼil «Sus obras lo siguen», toj uʼj La Atalaya te 1 te diciembre te 1994.
^ taqik' 64 TQANIL KYIʼJ TILBʼILAL: Toj nimxix yajbʼil, in kubʼ kyikʼsaʼn jun kʼloj erman chmabʼil tjaqʼ tzeʼ ex mintiʼ in che tzaj xobʼ.
^ taqik' 66 TQANIL KYIʼJ TILBʼILAL: Ma che kyaj anqʼin nimxix kyajlal xjal in che ajbʼen te Jehová toj nimxix yajbʼil ex in che tzalaj.
