1. ¿Tiquʼn at toklen Jehová tuʼn qajbʼen oʼkx te?

AT TOKLEN Jehová tiʼj tuʼn qajbʼen oʼkx te tuʼnju a Bʼinchal qe ex o tzaj tqʼoʼn qchwinqlal (Apoc. 4:11). Ax tok kʼujlaʼn Jehová quʼn ex in nok qqʼoʼn toklen, pero ateʼ junjun tiʼchaq jaku tzʼok qqʼoʼn qwiʼ kyiʼj ex kyuʼn qe jlu ya mlay qo ajbʼen te ik tzeʼn at toklen tiʼj. Tuʼn miʼn tbʼaj jlu qiʼj, bʼaʼn tuʼn tel qnikʼ tiʼj alkyeqe tiʼchaq jaku tzʼel kyiʼn ambʼil qiʼj. Pero, tnejel qo xnaqʼtzan tiʼj tiʼ t-xilen aju tuʼn qajbʼen oʼkx te Jehová.

2. Ik tzeʼn in tzaj tyekʼin Éxodo 34:14, ¿tiʼ mlay bʼant quʼn qa oʼkx in qo ajbʼen te Jehová?

² Aj tyolin Tyol Dios tiʼj kʼujlabʼil in qnaʼn tiʼj Jehová, in nok tmojbʼaʼn tukʼilju aj qajbʼen te. Tuʼntzunju, aj t-xi qqʼamaʼn tuʼn qajbʼen oʼkx te Jehová, atz in yolin jlu tiʼj tuʼn qkʼulin oʼkx te. Mintiʼ in xi qqʼoʼn ambʼil te alkyexku juntl tiʼ tuʼn tok te t-xel qkʼujlabʼil at tiʼj (kjawil uʼjit Éxodo 34:14).

3. ¿Tiquʼn in qo ajbʼen te Jehová?

³ In qo ajbʼen oʼkx te Jehová tuʼnju qojtzqibʼil at tiʼj ex in qo tzalaj kyiʼj tbʼanel tmod ateʼ. Ojtzqiʼn quʼn alkye tgan ex alkyeqe tiʼchaq in nel tikʼun, ex ax qximbʼetz at ik tzeʼn te tiʼj jlu. Ax ikx in nel qnikʼ tiʼj alkye t-ximbʼetz at kyiʼj xjal ex in qo onin tiʼj aj kyjapun tkawbʼil quʼn. In qnaʼn qa in nok tqʼoʼn qoklen tuʼnju in tzaj tqʼoʼn ambʼil qe tuʼn qok te tamiw (Sal. 25:14). Tkyaqilju in nel qnikʼ tiʼj Jehová, in  nonin qiʼj tuʼn qok laqʼeʼ mas ttxlaj (Sant. 4:8).

4. a) ¿Tiʼ in najbʼen tuʼn Satanás tuʼn miʼn qajbʼen oʼkx te Jehová? b) ¿Tiʼ kʼelel qnikʼ tiʼj toj xnaqʼtzbʼil lu?

⁴ A Satanás in kawin tibʼaj tkyaqilju at twitz txʼotxʼ ex in najbʼen jlu tuʼn tuʼn tsbʼun qiʼj ex tuʼn qkubʼ kyuʼn nya bʼaʼn qajbʼil (Efes. 2:1-3; 1 Juan 5:19). Taj tuʼn tok qkʼujlaʼn junjuntl tiʼchaq ex tuʼn miʼn qajbʼen oʼkx te Jehová. Qo xnaqʼtzan tiʼj alkye kabʼe tiʼ in najbʼen tuʼn. Tnejel, taj tuʼn tok qkʼujlaʼn qe qʼinumabʼil. Ex tkabʼin, in nok tilil tuʼn tuʼn tjaw qjyoʼn qe nya bʼaʼn tiʼchaq tuʼn qtzalaj kyiʼj.

5. ¿Tiquʼn nim toklen tuʼn tok qxqʼuqin qibʼ tuʼn miʼn tok qkʼujlaʼn pwaq?

⁵ Qkyaqilx qaj tuʼn tkanin qwa, tuʼn tten qxbʼalun ex tuʼn tten jun qja jatumel tuʼn qanqʼin. Pero il tiʼj tuʼn tok qxqʼuqin qibʼ tuʼn miʼn tok qkʼujlaʼn pwaq. Toj ambʼil jaʼlo, «oʼkx tok kykʼuʼj [xjal] tiʼj pwaq» ex tiʼjju jaku laqʼet kyuʼn (2 Tim. 3:2). Ojtzqiʼntoq tuʼn Jesús qa jaku pon kykʼuʼj t-xnaqʼtzbʼen tiʼj qʼinumabʼil ex tuʼntzunju tqʼama jlu: «Mi jun xjal jaku bʼant tuʼn tajbʼen te kabʼe patrón: porke kʼelel tikʼun jun, atzun juntl ok tkʼujlaʼ, ex qa oʼkx ok kʼajbʼel te jun patrón, atzun juntl mintiʼ taj tiʼj. Mlayx bʼant tuʼn kyajbʼene te Dios ex te qʼinumabʼl» (Mat. 6:24). Qa at jun xjal in kʼulin te Dios ex toj ax ambʼil in nok tilil tuʼn tuʼn tkanet tqʼinumabʼil, jaku txi qʼamet qa in najbʼen te kabʼe patrón. Ex tuʼn jlu mintiʼ in najbʼen oʼkx te Jehová.

6. ¿Tiʼ xnaqʼtzbʼil in nel qiʼn tiʼjju tqʼama Jesús te kʼloj okslal te Laodicea?

⁶ Tej chʼixtoq tkubʼaj tnejel syent abʼqʼi, in jawtoq kynimsan kyibʼ kʼloj okslal te  tnam Laodicea tuʼnju attoq tiʼchaq kye, qʼinun qe ex mintiʼ jun tiʼ atxtoq taj kye. Pero toj twitz Jehová ex toj twitz Jesús, mintiʼtoq jun tiʼ at kye, mintiʼtoq in che tzalaj, moẍ qe ex mintiʼtoq kyxbʼalun tok. Mintiʼ i ex tkawin Jesús tuʼnju attoq kyqʼinumabʼil, sino tuʼnju xi kyqʼoʼn ambʼil tuʼn ttzaj nya bʼaʼn tiʼj kyamiwbʼil tukʼil Jehová noq tuʼn qʼinumabʼil (Apoc. 3:14-17). Qa ma tzʼel qnikʼ tiʼj qa in pon qkʼuʼj tuʼn tten nim qqʼinumabʼil, tbʼanel tuʼn tok tilil quʼn tuʼn t-xi qjikumaʼn tiʼj qximbʼetz (1 Tim. 6:7, 8). Tuʼnju qa ma txi qqʼoʼn ambʼil te jlu, kʼokel qkʼujlaʼn kabʼe tiʼ ex nya taj Jehová jlu, tuʼnju taj tuʼn qajbʼen te tuʼn tkyaqil qanmi (Mar. 12:30). ¿Tiquʼn jaku tzʼok qqʼoʼn qwiʼ tiʼj pwaq?

7-9. ¿Tiʼ xnaqʼtzbʼil in nel qiʼn tiʼjju ikʼ tiʼj jun ansyan aju David tbʼi?

⁷ Qo xnaqʼtzan tiʼjju ikʼ tiʼj jun ansyan te Estados Unidos aju David tbʼi. Kubʼ t-ximen qa tbʼanel tzʼaqʼunan. Ok qʼoʼn jun toklen toj empresa jatumel aqʼunan, axpe ikx tzaj qʼamaʼn qa atzun jun kyxol qe xjal mas tbʼanel tzʼaqʼunan toj ttnam tiʼjju in bʼanttoq tuʼn. Tqʼama jlu: «Toj ambʼil aju, kubʼ nximane qa jun kʼiwlabʼil tuʼn Jehová tkyaqilju kanet wuʼne toj aqʼuntl». Pero, ¿axpe tok jlu?

⁸ El tnikʼ David tiʼj qa tzaj nya bʼaʼn tiʼj tamiwbʼil tukʼil Jehová tuʼn tpaj aqʼuntl. Tqʼama jlu: «In chin ximantoqe kyiʼj nya bʼaʼn in che tzaj toj aqʼuntl aj in chin tene kyoj chmabʼil, axpe ikx toj pakbʼabʼil. In tzaj qʼoʼntoq nim twi nkʼuʼje, pero mastoq in chin sikte ex xi ttzyet tuʼn ttzaj nya bʼaʼn toj nmejebʼleʼne».

⁹ Eltzun tnikʼ David tiʼj qa iltoq tiʼj tuʼn t-ximen juntl maj tiʼjju in bʼant tuʼn. Tqʼama jlu: «Kubʼ nximane tuʼn t-xi nbʼinchaʼne  tiʼj nya bʼaʼn». Tuʼntzunju, kubʼ t-ximen tuʼn tbʼant junjun chʼixpubʼil tuʼn toj taqʼun ex xi tqʼamaʼn jlu te tpatrón. Aju tzaj tuʼn jlu, el qʼin taqʼun. ¿Tiʼtzun bʼant tuʼn? Tqʼamatl jlu: «Toj juntl qʼij kubʼ nnojsaʼne solicitud tuʼn woke te precursor auxiliar toj tkyaqil ambʼil». Tuʼn tkanet aju at tajbʼen kye, xi tzyet tuʼn taqʼunan tukʼil t-xuʼjil tuʼn kybʼaj saqet ja. Tej tikʼ chʼintl ambʼil, xi tzyet tuʼn tajbʼen David te precursor regular ex yajxitl, ax ikx ok t-xuʼjil te precursora. Xi kyjyoʼn jun kyaqʼun aju nya kygan kykyaqil, pero nya a jlu mas nim toklen toj kywitz. Maske noq chʼin twi kykʼuʼj in kanet twitzju in kambʼet kyuʼn tnejel, tkyaqil xjaw in kanet aju at tajbʼen kye. Kyaj tuʼn tkubʼ kyqʼoʼn Jehová tnejel toj kyanqʼibʼil ex o tzʼok kyqʼoʼn kywitz tiʼj qa in xqʼuqin kyiʼj qeju in che jyon tnejel tiʼj Tkawbʼil (Mat. 6:31-33).

10. ¿Alkye tten jaku tzʼok qxqʼuqin qanmi?

¹⁰ Qa at nim tiʼchaq qe moqa mintiʼ, qkyaqilx il tiʼj tuʼn tok qxqʼuqin qanmi. ¿Tzeʼn jaku bʼant quʼn? Jaku bʼant qa mintiʼ ma tzʼok qkʼujlaʼn qʼinumabʼil ex qa mintiʼ ma tzʼok qqʼoʼn toklen aqʼuntl tnejel twitzju qajbʼebʼil te Jehová. Tuʼn tel qnikʼ tiʼj qa in pon qkʼuʼj tiʼj pwaq, bʼaʼn tuʼn tkubʼ qxjelin jlu: «¿In chin okpe tene ximel tiʼj aqʼuntl aj in chin tene kyoj chmabʼil moqa aj wexe pakbʼal? ¿In tzajpe bʼaj nkʼuʼje tiʼjju tzeʼn tuʼn tten npwaqe toj ambʼil tzul? ¿In tzajpe nya bʼaʼn toj nmejebʼleʼne noq tuʼn tpaj pwaq ex qe tiʼchaq? ¿Jakupe tzaj nkʼamoʼne jun aqʼuntl aju nya kygan kykyaqil noq tuʼn wajbʼene te Jehová?» (1 Tim. 6:9-12). Aj qximen tiʼj jlu, bʼaʼn tuʼn ttzaj qnaʼn qa kʼujlaʼn qoʼ tuʼn Jehová ex in ttzaj ttziyen jlu kye qeju in che ajbʼen te tuʼn tkyaqil kykʼuʼj: «Mlay kyaj nkoline, ex mlay kyaj nqʼoʼne». Tuʼntzunju tqʼama apóstol Pablo nabʼil lu: «Miʼn pon kykʼuʼje tiʼj pwaq» (Heb. 13:5, 6).

11. ¿Tiʼ jaku tzaj qiʼj kyuʼn tiʼchaq in jaw qjyon tuʼn qtzalaj jun rat?

¹¹ Taj Jehová tuʼn qtzalaj tiʼj qanqʼibʼil, ex at junjun tiʼchaq jaku che onin tuʼn qtzalaj. Axpe ikx, in tzaj tqʼamaʼn Tyol Dios qa bʼaʼn tuʼn qwaʼn, tuʼn qkʼan ex tuʼn qtzalaj tiʼj qaqʼun (Ecl. 2:24). Noqtzun tuʼnj, chʼixme kykyaqil saqchbʼil jaku tzaj kyiʼn nya bʼaʼn tiʼj qamiwbʼil tukʼil Jehová, tuʼnju in netz yekʼin nya bʼaʼn kyoj  ex in nonin kyiʼj xjal tuʼn tok kykʼujlaʼn qe tiʼchaq in nel tikʼun Dios.

12. Ik tzeʼn in tzaj tqʼamaʼn 1 Corintios 10:21 ex 22, ¿tiquʼn nim toklen tuʼn tjaw qjyoʼn qe tbʼanel tiʼchaq tuʼn qtzalaj jun rat?

¹² Qaj tuʼn qajbʼen oʼkx te Jehová, tuʼntzunju mlay qo waʼn tiʼj tmes Jehová ex tiʼj kymes qe nya bʼaʼn anjel (kjawil uʼjit 1 Corintios 10:21, 22). Chʼixme tkyaqil maj, aj qwaʼn tiʼj tmes jun xjal in kubʼ qyekʼin qa in nok qamiwin qibʼ tukʼil. Qa ma jaw qjyoʼn qe nya bʼaʼn tiʼchaq tuʼn qtzalaj ik tzeʼn bʼiybʼil, yaẍbʼil, kyaqʼun chman moqa kyaqʼun yuẍ ex junjuntl tiʼchaq nya bʼaʼn in bʼant kyuʼn xjal, ik tten jlu ik tzeʼn in qo waʼn kyukʼil qeju aj qʼoj tiʼj Dios. Qa ma bʼant jlu quʼn, tzul qiʼn nya bʼaʼn qiʼj ex tiʼj qamiwbʼil tukʼil Jehová.

13, 14. a) ¿Alkye tten jaku tzʼok qmojbʼaʼn wabʼj kyukʼil tiʼchaq in jaw qjyoʼn tuʼn qtzalaj jun rat? b) Aj qximen tiʼjju in tzaj tqʼamaʼn Santiago 1:14 ex 15, ¿tiquʼn mintiʼ tuʼn t-xi qqʼoʼn ambʼil tuʼn tchʼiy jun nya bʼaʼn achbʼil toj qanmi?

¹³ ¿Alkye tten jaku tzʼok qmojbʼaʼn wabʼj kyukʼil tiʼchaq in jaw qjyoʼn tuʼn qtzalaj jun rat? Aj qwaʼn, in nok qxqʼuqin aju in nokx qqʼoʼn toj qtziʼ. Pero aj t-xi qbʼilqʼuʼn, in xi tzyet tuʼn taqʼunan wabʼj toj qxmilal ex in xi tsipen tibʼ tuʼntzun tonin tiʼj qxmilal. In nonin tbʼanel wabʼj tuʼn miʼn ttzaj yabʼil qiʼj, atzunju nya bʼaʼn wabʼj jaku tzaj tiʼn yabʼil qiʼj. Nya jun rat kʼelel nikʼbʼaj tiʼj jlu, sino kxel tiʼn ambʼil.

¹⁴ Chʼixme axju in bʼaj aj tjaw qjyoʼn qe tiʼchaq tuʼn qtzalaj jun rat. In nok qxqʼuqin aju nokx qqʼoʼn toj qwiʼ, pero tibʼajxi jlu in xi tzyet tuʼn qximen tiʼj. Qa ma jaw qjyoʼn qe tbʼanel saqchbʼil, qo tzalajel kyuʼn, atzun qeju nya bʼaʼn, tzul kyiʼn nya bʼaʼn qiʼj (kjawil uʼjit Santiago 1:14, 15). Nyalo jun rat kʼelel toj qʼanchaʼl aju nya bʼaʼn jaku tzaj qiʼj kyuʼn, pero aj tbʼet ambʼil kʼelel toj qʼanchaʼl. Tuʼntzunju in tzaj tqʼamaʼn Tyol Dios jlu qe: «Miʼn che el tzpete tiʼj: Ate Dios mlay bʼant t-xmayinjtz, porke alkyeju in kuʼx tawaʼn xjal, axtzunju kjawil tchmoʼn. Porke aju xjal in tbʼinchaʼn tajbʼil tchibʼjal, knajel tuʼn tajbʼil tchibʼjal» (Gál. 6:7, 8). Tuʼn jlu in nel qnikʼ tiʼj qa nim toklen tuʼn tel qikʼun qe saqchbʼil in nel tikʼun Jehová (Sal. 97:10).

15. ¿Alkye oyaj o tzaj tqʼoʼn Jehová qe?

¹⁵ Ateʼ nim tmajen Jehová kygan tuʼn tok kyqʼoʼn kywitz tiʼj JW Broadcasting^®, aju canal te televisión at toj Internet. Tqʼama jun ermana Marilyn tbʼi jlu: «O tzʼonin canal lu wiʼje tuʼn tten tbʼanel nximbʼetze ex nya il tiʼj tuʼn tok nxqʼuqine aju in nok nkeʼyine. Aj tkubʼ nnaʼne qa njunalxe atine moqa in chin bʼisune, toj tkyaqil ambʼil in kanet jun chikʼbʼabʼil wuʼne moqa jun xnaqʼtzbʼil tiʼj taqikʼ Tyol Dios te qlax ex in nonin jlu wiʼje tuʼn ntzalaje. Tuʼn jlu, in chin ok laqʼeʼye mas ttxlaj Jehová ex tiʼj ttnam. O chʼexpaj wanqʼibʼile tuʼn JW Broadcasting». ¿In najbʼenpe oyaj lu quʼn aju o tzaj tqʼoʼn Jehová qe? Ax ikx bʼaʼn tuʼn tok qqʼoʼn qwitz kyiʼj tbʼanel video, tuʼn tok qbʼiʼn qe audio ex qe tbʼanel bʼitz ateʼ toj, ex nya oʼkx aju programa in netz tkyaqil xjaw.

16, 17. ¿Tiquʼn nim toklen tuʼn tok qxqʼuqin ambʼil in nel qpaʼn kyiʼj junjun tiʼchaq tuʼn qtzalaj ex tzeʼn jaku bʼant jlu quʼn?

¹⁶ Nya oʼkx kʼokel qxqʼuqin alkyeqe tiʼchaq kjawil qjyoʼn tuʼn qtzalaj kyiʼj. Ax ikx kʼokel qxqʼuqin jniʼ ambʼil kʼokel qqʼoʼn kyiʼj, tuʼnju qa mintiʼ ma bʼant quʼn, jaku tzʼok qqʼoʼn mas ambʼil kyiʼj jlu twitzju qajbʼebʼil te Jehová. At maj kwest tuʼn tok kyxqʼuqin kyibʼ junjun. Jun techel, tqʼama Abigail jlu, jun ermana te 18 abʼqʼi: «Aj tbʼant nim tiʼchaq wuʼne toj jun qʼij, in  chin kubʼ qeʼye jun rat keʼyil televisión tuʼn wojlane chʼin. Pero qa mintiʼ ma tzʼok nxqʼuqin wibʼe, jaku chin kubʼ qeʼye nim or twitz televisión». Atzun juntl kuʼxun Samuel tbʼi, tqʼama jlu: «At maj, in chin ok tene keʼyil video chʼin kyqan toj Internet. Tnejel in nok nqʼoʼn nwitze tiʼj jun ex aj ttzaj nnaʼne otoq tzʼex oxe moqa kyaje or wuʼne tiʼj».

¹⁷ ¿Alkye tten jaku tzʼok qxqʼuqin ambʼil in nel qpaʼn kyiʼj tiʼchaq in qo tzalaj kyuʼn? Bʼaʼn tuʼn qximen tiʼj jniʼ ambʼil in nel qpaʼn kyiʼj. Jaku kux qtzʼibʼin toj jun uʼj jniʼ ambʼil in nel qpaʼn toj jun seman tiʼj televisión, tiʼj Internet moqa kyiʼj juegos toj qyolbʼil moqa toj qtableta. Qa ma tzʼel qnikʼ tiʼj qa in nel qpaʼn nim ambʼil kyiʼj tiʼchaq lu, bʼaʼn tuʼn qximen tiʼj tzeʼn kʼajbʼel ambʼil quʼn. Tnejel, bʼaʼn tuʼn tel qpaʼn ambʼil kyiʼj tiʼchaq mas nim kyoklen ex qatzun at chʼintl ambʼil qiʼj, bʼaʼn tuʼn tajbʼen quʼn tuʼn qtzalaj kyiʼj junjuntl tiʼchaq. Tibʼajxi jlu, qqaninx te Jehová tuʼn tonin qiʼj tuʼn qok lepeʼ tiʼjju ma kubʼ qximen. Iktzun tten ktel ambʼil qiʼj ex qjwers tuʼn qxnaqʼtzan qjunalx tiʼj Tyol Dios, tuʼn tok qkʼulbʼil kyukʼil toj qja, tuʼn qxiʼ kyoj chmabʼil, tuʼn qex pakbʼal ex tuʼn qxiʼ qʼol xnaqʼtzbʼil kye xjal. Iktzun tten, mlay kubʼ qnaʼn nya bʼaʼn aj tel qpaʼn ambʼil kyiʼj junjun tiʼchaq tuʼn qtzalaj.

18, 19. ¿Alkye tten jaku kubʼ qyekʼin qa in qo ajbʼen oʼkx te Jehová?

¹⁸ Tej otoqxi kubʼ ttzʼibʼin apóstol Pedro qa kbʼel xiten tkyaqilju tokx tjaqʼ tkawbʼil Satanás ex qa kʼokel Txʼotxʼ te Tbʼanel Najbʼil, tqʼama jlu: «Aqeye at nkʼuʼje kyiʼje, che ayone tiʼj tkyaqil jlu, tzʼok tililx kyuʼne tuʼn kytene mintiʼ chʼin tzʼil kyiʼje ok tul Qajaw, ex mintiʼ kypaltile, ex tuʼn tten kymojbʼabʼl kyibʼe» (2 Ped. 3:14). Qa ma txi qbʼiʼn nabʼil lu ex qa tzʼok tilil quʼn tuʼn qten saq toj qokslabʼil ex toj qanqʼibʼil, kbʼel qyekʼin qa in qo ajbʼen oʼkx te Jehová.

¹⁹ Kʼokel tilil tuʼn Satanás ex tuʼn tkyaqilju tokx tjaqʼ tkawbʼil tuʼn miʼn tok qqʼoʼn qwiʼ kyiʼj tiʼchaq mas nim kyoklen (Luc. 4:13). Noqtzun tuʼnj, noq alkyexku nya bʼaʼn qo okel weʼ twitz, miʼn txi qqʼoʼn ambʼil te jun tiʼ tuʼn tok te t-xel qajbʼebʼil te Jehová. Bʼaʼn tuʼn tkubʼ qximen tuʼn qajbʼen oʼkx te Jehová.