1. ¿Tiʼ jaku bʼant tuʼn Jehová tuʼntzun tjapun twi t-ximbʼetz?

JAKU tzʼok Jehová te alkyexku tuʼn tjapun twi t-ximbʼetz. Bʼaʼn tuʼn ttzaj qnaʼn qa o tzʼok Jehová te jun aj xnaqʼtzal, te jun mambʼaj in tzaj tqʼuqbʼaʼn qkʼuʼj ex te qʼol tbʼanel tqanil (Is. 48:17; 2 Cor. 7:6; Gál. 3:8). Maske ikju, kukx in che ajbʼen xjal tuʼn tuʼntzun tbʼant tajbʼil (Mat. 24:14; 28:19, 20; 2 Cor. 1:3, 4). Jaku tzaj tqʼoʼn Jehová tnabʼil alkyexku tmajen ex tipumal tuʼntzun tajbʼen tuʼn tuʼn tjapun twi t-ximbʼetz. Tkyaqil jlu at toklen tukʼil t-xilen tbʼi Jehová, ik tzeʼn in tzaj kyqʼamaʼn junjun xjal at kyojtzqibʼil.

2. a) ¿Tiquʼn at maj mintiʼ in nok qeʼ qkʼuʼj tiʼj qa jaku qo ajbʼen tuʼn Jehová? b) ¿Tiʼ qo xnaqʼtzal tiʼj toj xnaqʼtzbʼil lu?

² Qkyaqilx qaj tuʼn qajbʼen tuʼn Jehová, noqtzun tuʼnj, ateʼ junjun mintiʼ in nok qeʼ kykʼuʼj tiʼj qa jaku che ajbʼen tuʼn. ¿Tiquʼn? Tuʼnju in kubʼ kyximen qa mintiʼ in bʼant jun tbʼanel tiʼ kyuʼn, tuʼnju ma che tijen moqa tuʼnju in nikʼ toj kyanqʼibʼil. Atzun junjuntl in kubʼ kyximen qa ya mintiʼ tuʼn tok tilil kyuʼn tuʼnju in che tzalaj tiʼjju in bʼant kyuʼn. Toj xnaqʼtzbʼil lu, kʼelel qnikʼ tiʼj alkye tten jaku qo tzaj t-xnaqʼtzaʼn Jehová tuʼn tjapun twi t-ximbʼetz ex alkye tten onin kyiʼj junjun xinaq ex xuʼj tuʼn tten kygan ex kyipumal tuʼn kyajbʼen mas te. Ex te bʼajsbʼil, qo yolil tiʼj tiʼ jaku bʼant quʼn tuʼntzun qajbʼen tuʼn Jehová.

3. Ik tzeʼn in tzaj tqʼamaʼn Filipenses 2:13, ¿tzeʼn jaku tzʼonin Jehová qiʼj?

³ (Kjawil uʼjit Filipenses 2:13). * Jaku tzʼonin Jehová qiʼj tuʼn tten qgan tuʼn qajbʼen mas te. ¿Alkye tten? Bʼalo in nok qbʼiʼn qa kyaj erman onbʼil jatumel in nok qchmon qibʼ moqa in jaw kyuʼjin ansyan jun carta in tzaj samaʼn tuʼn ninja ex in tzaj qʼamaʼn qa kyaj erman onbʼil toj juntl lugar. Toj ambʼil lu jakulo kubʼ qxjelin tiʼ jaku bʼant quʼn tuʼn qonin. Ex bʼalo o tzaj qkʼamoʼn jun oklenj ex in kubʼ qxjelin qa jaku bʼant quʼn. Axlo ikx in jaw quʼjin jun taqikʼ Tyol Dios ex yajxitl in qo ximen tiʼj tzeʼn jaku tzʼajbʼen jlu quʼn tuʼn qonin kyiʼj txqantl. Mintiʼ in qo ok t-obligarin Jehová tuʼn tbʼant jun tiʼ quʼn, pero qa in nok tqʼoʼn twitz tiʼj qa qaj tuʼn tbʼant mas quʼn, kʼonil qiʼj tuʼn tten qgan tuʼn t-xi qbʼinchaʼn.

4. ¿Tzeʼn jaku tzaj tqʼoʼn Jehová qipumal tuʼn qajbʼen te?

⁴ Jaku tzʼaj tqʼoʼn Jehová qipumal tuʼn qajbʼen te (Is. 40:29). Ax ikx jaku tzʼajbʼen xewbʼaj xjan tuʼn Jehová tuʼn tonin qiʼj tuʼn kybʼant mas tbʼanel qe tiʼchaq in che bʼant quʼn (Éx. 35:30-35). Ex jaku tzʼajbʼen ttnam tuʼn tuʼn qtzaj t-xnaqʼtzaʼn tuʼn tbʼant junjun aqʼuntl quʼn. Qa nya ojtzqiʼn quʼn tzeʼn tuʼn tbʼant jun oklenj, bʼaʼn tuʼn t-xi qqanin onbʼil kye erman. Ax ikx, qqaninx onbʼil te Jehová toj naʼj Dios tuʼn ttzaj tqʼoʼn nimxix qipumal (2 Cor. 4:7; Luc. 11:13). In che kanet tbʼanel techel quʼn toj Tyol Dios tiʼj tzeʼn xi tqʼoʼn Jehová xnaqʼtzbʼil kye xinaq ex xuʼj, ex tzeʼn onin kyiʼj tuʼn tten kygan ex kyipumal tuʼn kyajbʼen te. Qo xnaqʼtzan tiʼj junjun techel ex qo ximen tiʼj tzeʼn jaku qo ajbʼen tuʼn.

5. ¿Tiʼ xnaqʼtzbʼil jaku tzʼel qiʼn tiʼj alkye tten ajbʼen Moisés tuʼn Jehová tuʼn tklet ttnam ex toj alkye ambʼil?

⁵ Ajbʼen Moisés tuʼn Jehová tuʼn kyklet aj Israel. Noqtzun tuʼnj, ¿toj alkye ambʼil ajbʼen tuʼn? ¿Ape tej tkubʼ t-ximen Moisés qa ya otoq bʼant tten tuʼnju tzaj tkʼamoʼn kyxnaqʼtzbʼil aj Egipto? (Hech. 7:22-25). Miʼn, sino ajbʼen tuʼn Jehová tej otoq tzʼonin tiʼj tuʼn tok te mans ex tuʼn miʼn tjaw tnimsan tibʼ (Hech. 7:30, 34-36). Ex xi tqʼoʼn tipumal tuʼn tyolin tukʼil aj kawil mas nimtoq toklen toj Egipto (Éx. 9:13-19). ¿Tiʼ xnaqʼtzbʼil jaku tzʼel qiʼn tiʼj alkye tten ajbʼen Moisés tuʼn Jehová ex toj alkye ambʼil? Qa jaku che ajbʼen xjal tuʼn, aqeju at jun tbʼanel kyamiwbʼil tukʼil ex in nok qeʼ kykʼuʼj tiʼj tipumal (Filip. 4:13, TNM).

6. ¿Tiʼ xnaqʼtzbʼil in nel qiʼn tiʼjju alkye tten ajbʼen Barzilái tuʼn Jehová tuʼn tonin tiʼj aj kawil David?

⁶ Tej tikʼ nim syent abʼqʼi, ajbʼen Barzilái tuʼn Jehová tuʼn tonin tiʼj aj kawil David. El oq David ex qe tmajen twitz Absalón, aju tkʼwaʼl ex otoq che sikt, attoq waʼyij kyiʼj ex kʼaj moqa txqetlen. Maske otoq tijen Barzilái, onin junx kyukʼil junjuntl xjal tuʼn t-xi kyiʼn aju aj tajbʼen kye David. Mintiʼ kubʼ t-ximen Barzilái qa ya mlaytoq tzʼajbʼen tuʼn Jehová noq tuʼnju otoq tijen, sino xi tqʼoʼn aju attoq te tuʼn tonin kyiʼj tmajen Dios (2 Sam. 17:27-29). ¿Tiʼ in tzaj t-xnaqʼtzaʼn jlu qe? Qa noq jteʼxku qabʼqʼi, jaku qo ajbʼen tuʼn Jehová tuʼn qonin kyiʼj erman te alkyexku lugar twitz tkyaqil Txʼotxʼ tuʼntzun tten aju at tajbʼen kye (Prov. 3:27, 28; 19:17). Maske mlay  qoʼx onil kye jatumel ateʼ, pero jaku txi qqʼoʼn oyaj tiʼj aqʼuntl in bʼant twitz tkyaqil Txʼotxʼ ex iktzun tten jaku qo onin kyiʼj erman aj ttzaj jun xitbʼil kyiʼj (2 Cor. 8:14, 15; 9:11).

7. a) ¿Tzeʼn ajbʼen Simeón tuʼn Jehová? b) ¿Tiquʼn in tzaj tqʼuqbʼaʼn jlu qkʼuʼj?

⁷ Kukx otoq tzʼajbʼen Simeón te Jehová ex atztoq in nanqʼin toj tnam Jerusalén. Otoq txi ttziyen Jehová te qa kʼokeltoq tkeʼyin Mesías naʼmxtoq tkyim. Nimlo xi qʼuqbʼaʼn tkʼuʼj kyuʼn yol lu, tuʼnju ayon nim ambʼil tuʼn tpon Mesías. Xi kʼiwlaʼn tuʼn Jehová tuʼnju kubʼ tyekʼin qʼuqbʼil tkʼuʼj tiʼj ex ikʼx tuʼn. Jun qʼij, tuʼn tonbʼil xewbʼaj xjan xiʼ Simeón toj tja Dios ex atz ok tkeʼyin Jesús. Toj ambʼil aju ajbʼen tuʼn Jehová tuʼn tkyaj tqʼamaʼn jun yol tiʼj tal kʼwaʼl, aju kʼokeltoq te Mesías (Luc. 2:25-35). Ax tok, mintiʼlo ok tkeʼyin Simeón tkyaqilju bʼant tuʼn Jesús tej tpakbʼan, pero xi tqʼoʼn chjonte tiʼj toklen xi tqʼoʼn Jehová. Ex toj akʼaj twitz Txʼotxʼ, ktzalajel Simeón aj tok tqʼoʼn twitz tiʼj tkyaqil kʼiwlabʼil tzul kykʼamoʼn xjal tjaqʼ tkawbʼil Jesús (Gén. 22:18). Ax ikx qe jaku txi qqʼoʼn chjonte te Jehová tuʼnju in tzaj tqʼoʼn qoklen tuʼn qajbʼen te.

8. ¿Tzeʼn jaku qo ajbʼen tuʼn Jehová?

⁸ Toj tnejel syent abʼqʼi at jun xjal José tbʼi ex bʼaʼntoq bʼinchan xtalbʼil, xi tqʼoʼn ambʼil tuʼn tajbʼen tuʼn Jehová (Hech. 4:36, 37). Ok kyqʼoʼn apóstol tbʼi te Bernabé, ex a t-xilen tbʼi «qʼuqbʼalte kykʼuʼj mastl», tuʼnju ojtzqiʼnlo tuʼn tzeʼn tuʼn t-xi qʼuqbʼet kykʼuʼj txqantl. Jun techel, tej tok Saulo te okslal, ateʼ junjun erman e tzaj xobʼ tuʼn kyok laqʼeʼ ttxlaj tuʼnju otoq tzʼok lipen kyiʼj okslal. Toj ambʼil aju onin Bernabé tiʼj. Nimlo xi tqʼoʼn Saulo chjonte te (Hech. 9:21, 26-28). Yajxitl, ok kybʼiʼn ansyan te Jerusalén qa kyajtoq okslal te Antioquía te Siria tuʼn t-xi qʼuqbʼet kykʼuʼj ex najchaq tok lugar lu. ¿Alkyetzulo xi kysamaʼn? Xi kysamaʼn Bernabé. Tbʼanel tej tkubʼ kyximen ansyan jlu, tuʼnju in tzaj tqʼamaʼn Tyol Dios qa onin Bernabé «tuʼn kykyaj ten [erman] waʼlxix tuj kyokslabʼl, ex tuʼn kyxi lpeʼ tiʼj Qajaw tuʼn tkyaqil kyanmi» (Hech. 11:22-24). Toj ambʼil jaʼlo, ax ikx jaku qo ajbʼen tuʼn Jehová tuʼn t-xi qqʼuqbʼaʼn kykʼuʼj erman, ik tzeʼn qeju o kyim jun toj kyja. Ax ikx jaku tzʼonin Jehová qiʼj tuʼn qxiʼ visitaril moqa tuʼn t-xi qllamarin jun erman yabʼ taʼ moqa at bʼis tiʼj tuʼntzun t-xi qqʼuqbʼaʼn tkʼuʼj. ¿Qajpe tuʼn qajbʼen tuʼn Jehová ik tzeʼn bʼant tuʼn tukʼil Bernabé? (1 Tes. 5:14).

9. ¿Tiʼ xnaqʼtzbʼil in nel qiʼn tiʼjju tzeʼn onin Jehová tiʼj ermano Vasily?

⁹ Onin Jehová tiʼj ermano Vasily tuʼn tbʼant t-xqʼuqin kyiʼj erman. Qʼiʼntoq 26 abʼqʼi tuʼn tej tok qʼoʼn toklen te ansyan, kubʼ t-ximen qa naʼmxtoq tbʼant tten tuʼn tonin kyiʼj erman, ex mas kyiʼj qeju in tzajtoq jun nya bʼaʼn kyiʼj. Pero xi kyqʼoʼn ansyan attoq kyojtzqibʼil tbʼanel xnaqʼtzbʼil te ex tzaj tkʼamoʼn tbʼanel onbʼil toj Xnaqʼtzbʼil kye ansyan ex kye onil kye ansyan. Ok tilil tuʼn tuʼn tbʼant tbʼanel taqʼun. Jun techel, kubʼ ttzʼibʼin twitz jun uʼj aju tajtoq tuʼn tbʼant tuʼn. Tej tjapun twi junjun t-ximbʼetz, chebʼe chebʼe el t-xobʼil tiʼj. In tzaj tqʼamaʼn jlu: «Aju in chin xobʼtoqe tuʼn tnejel, in chin tzalaje tuʼn toj ambʼil jaʼlo. Aj in nonin Jehová wiʼje tuʼn tkanet jun texto wuʼne tuʼn t-xi nqʼuqbʼaʼne tkʼuʼj jun ermano moqa jun ermana, nim in chin tzalaje tuʼn jlu». Aqeye erman, qa ma tzʼok tilil kyuʼne tuʼn tel kykanoʼne tiʼj ermano Vasily ex kyaje tuʼn kyajbʼene tuʼn Jehová, tzul  tqʼoʼn xnaqʼtzbʼil kyeye tuʼntzun tbʼant mas aqʼuntl kyuʼne toj kʼloj okslal.

10. ¿Tiʼ bʼant tuʼn Abigaíl ex tiʼ xnaqʼtzbʼil jaku tzʼel qiʼn tiʼj?

¹⁰ Toj ambʼil tej tok tzoqpaj aj kawil Saúl tiʼj David ex kyiʼj tmajen e ten tukʼil, kyajtoq onbʼil toj ambʼil aju. Toj jun ambʼil, xi kyqanin tmajen David chʼin kywa te jun aj Israel, aju Nabal tbʼi. Bʼant jlu kyuʼn tuʼnju otoq che xqʼuqin kyiʼj t-ẍneʼl Nabal toj tzqij txʼotxʼ. Noqtzun tuʼnj, oʼkx ximen Nabal tiʼjx ex mintiʼ xi tqʼoʼn chʼin kywa. Tzaj tqʼoj David tuʼn jlu ex kubʼ t-ximen tuʼn kykubʼ tbʼyoʼn kykyaqil toj tja Nabal (1 Sam. 25:3-13, 22). Toj ambʼil lu bʼant jun tiʼ tuʼn Abigaíl aju t-xuʼjil Nabal ex tbʼaneltoq keʼyin. Attoq tnabʼil xuʼj lu ex mintiʼ tzaj xobʼ, tuʼntzunju xiʼ jyol David, kubʼ ẍmejeʼ twitz ex xi tqʼamaʼn te tuʼn miʼn taj tqʼoʼn t-xel nya bʼaʼn ex tuʼn miʼn tel tiʼn tchwinqlal jun xjal. Toj tumel yolin xuʼj lu tukʼil David ex xi tqʼamaʼn te tuʼn tkyaj tqʼoʼn tkyaqil toj tqʼabʼ Jehová. E onin qe tbʼanel tyol ex qe tbʼanel tbʼinchbʼen tiʼj David ex el tnikʼ tiʼj qa otoq tzaj samaʼn xuʼj lu tuʼn Jehová (1 Sam. 25:23-28, 32-34). Otoq che ten tbʼanel tmod Abigaíl ex tuʼntzunju ajbʼen tuʼn Jehová. Chʼixme ik tzeʼn jlu, aʼyeju ermana in che yolin toj tumel ex in nel kynikʼ tiʼjju in bʼaj kyiʼj txqantl, jaku che ajbʼen tuʼn Jehová tuʼn t-xi kyqʼuqbʼaʼn kykʼuʼj toj kyja ex qe erman (Prov. 24:3; Tito 2:3-5).

11. ¿Tiʼ bʼant kyuʼn tmeʼjel Salum ex alkyeqe in nel kykanoʼn kyiʼj toj ambʼil jaʼlo?

¹¹ Tej tikʼ nim syent abʼqʼi, e ten tmeʼjel Salum kyxol qeju xjal e ajbʼen tuʼn Jehová tuʼn kyjaw bʼinchet juntl maj tmuro Jerusalén (Neh. 2:20; 3:12). Maske nimtoq toklen Salum, kubʼ kyximen tmeʼjel tuʼn kyonin tiʼj aqʼuntl aju kwesttoq ex jakutoq tzaj nya bʼaʼn kyiʼj tuʼn (Neh. 4:15-18). Junxitl kymod txin lu ten kywitz qeju xjal at kyoklen toj Tecoa, aʼyeju «mintiʼ o kyajbʼe» tuʼn kyonin tiʼj aqʼuntl (Neh. 3:5). Noqpe qo ximen tiʼj tzalajbʼil kubʼ kynaʼn tej tkubʼaj aqʼuntl ex oʼkx xi tiʼn 52 qʼij (Neh. 6:15). Toj ambʼil jaʼlo, ateʼ nim ermana in che tzalaj tuʼn kyajbʼen te Jehová toj junjun oklenj: ik tzeʼn tuʼn kyjaw bʼinchet ja tuʼn qkʼulin te Jehová moqa tuʼn kybʼaj bʼinchet chʼintl. Nim toklen tkyaqilju onbʼil in tzaj kyqʼoʼn ermana tuʼn kybʼant aqʼuntl.

12. Ik tzeʼn bʼaj tiʼ Tabita, ¿tzeʼn jaku qo ajbʼen tuʼn Jehová?

¹² Onin Jehová tiʼj Tabita tuʼn t-xi tbʼinchaʼn tbʼanel tiʼchaq kyiʼj xjal ex tuʼn tonin kyiʼj qeju atx taj kye, mas kyiʼj xuʼj viud (Hech. 9:36). E jaw oqʼ nim xjal tiʼj Tabita tej tkyim, tuʼnju tgantoq tuʼn tbʼinchan xtalbʼil ex tbʼaneltoq tmod. Pero nim e jaw tzalaj tej tjaw anqʼin juntl maj tuʼn apóstol Pedro (Hech. 9:39-41). ¿Tiʼ xnaqʼtzbʼil jaku tzʼel qiʼn tiʼj Tabita? Qa kuʼxun qoʼ moqa ma qo tijen, qa xinaq qoʼ moqa xuʼj, qkyaqilx jaku che bʼant tbʼanel tiʼchaq quʼn tuʼn qonin kyiʼj erman (Heb. 13:16).

13. ¿Tzeʼn o tzʼajbʼen ermana Ruth tuʼn Jehová aju in xobʼtoq ex tiʼ tzaj tqʼamaʼn?

¹³ Jun ermana Ruth tbʼi in tzajtoq xobʼ tuʼn tyolin ex tajtoq tuʼn tok te misionera. Tej tzmatoq txin, jun rattoq in nikʼ bʼet ttziʼ jun ja tuʼntzun t-xiʼ ttzi juntl noq tuʼn tkyaj tqʼoʼn jun tratado. Tqʼama jlu: «Ngantoqe tuʼn qpakbʼane». Pero kwesttoq in nela toj twitz tuʼn tyolin ttzi kyja xjal tiʼj Tkawbʼil Dios. Maske in tzajtoq xobʼ tuʼn tyolin, ok Ruth te precursora regular tej qʼiʼntoq 18 abʼqʼi tuʼn. Ex toj 1946 ten toj Xnaqʼtzbʼil te  Galaad te Watchtower ex ajbʼen toj tnam Hawái ex Japón. Ajbʼen ermana lu tuʼn Jehová tuʼn tok kybʼiʼn xjal tbʼanel tqanil kyoj lugar aju. Tuʼnju o tzʼajbʼen ermana Ruth 80 abʼqʼi toj pakbʼabʼil, tqʼama jlu: «O tzaj tqʼoʼn Jehová wipumale. O tzʼonin wiʼje tuʼn miʼn ntzaj xobʼe. Qʼuqli nkʼuʼje tiʼj qa jaku tzʼajbʼen alkyexku erman tuʼn Jehová qa ma tzʼok qeʼ tkʼuʼj tiʼj».

14. Ik tzeʼn in tzaj tqʼamaʼn Colosenses 1:29, ¿tiʼ kbʼantel quʼn qa qaj tuʼn qajbʼen tuʼn Jehová?

¹⁴ Atxix ojtxe, kukx o che ajbʼen tmajen Jehová tuʼn toj junxichaq tten. Yajtzun qe, ¿tiʼ jaku bʼant tuʼn Jehová tuʼn qajbʼen mas tuʼn? Atz tok jlu tiʼj qa ma tzʼok tilil quʼn (kjawil uʼjit Colosenses 1:29). Qa ma txi qqʼoʼn ambʼil te Jehová tuʼn qajbʼen tuʼn, kʼonil qiʼj tuʼn qpakbʼan tukʼil tzalajbʼil, tuʼn qok te tbʼanel aj xnaqʼtzal, tuʼn t-xi qqʼuqbʼaʼn kykʼuʼj txqantl, tuʼn qok te tbʼanel aqʼunal, tuʼn qok te tbʼanel amiw moqa te alkyexku juntl tiʼ tuʼntzun tjapun twi t-ximbʼetz.

15. Ik tzeʼn in tzaj tqʼamaʼn 1 Timoteo 4:12 ex 15, ¿tiʼj jaku txi kyqanin kuʼxun te Jehová?

¹⁵ ¿Ope tzʼokx teya toj tkuʼxumala ex ya o tzʼok tnabʼila? Toj ttnam Jehová at nim aqʼuntl tuʼn tbʼant ex kyaj erman tuʼn kyonin kuʼxun kyaj che aqʼunan ex tuʼn kyok te onil kye ansyan. Kyoj nim kʼloj okslal, ateʼ mas ansyan kywitz qe onil kye ansyan. ¿Jakupe kubʼ t-ximana tuʼn tbʼant mas tuʼna toj kʼloj okslal? At maj in tzaj kyqʼamaʼn junjun erman jlu: «Bʼaʼnte qa oʼkx pakbʼal qine». Qa ik t-ximbʼetza, qaninxa onbʼil te Jehová tuʼn tten tgana tuʼn toka te onil kye ansyan ex tuʼn ttzaj tqʼoʼn tipumala tuʼn tbʼant mas tuʼna toj tajbʼebʼila te (Ecl. 12:1). Qaje tuʼn tonina (kjawil uʼjit 1 Timoteo 4:12, 15).

16. ¿Tiʼ bʼaʼn tuʼn t-xi qqanin te Jehová ex tiquʼn?

¹⁶ Jaku qo ok te alkyexku tuʼn Jehová tuʼn tjapun twi t-ximbʼetz. Tuʼntzunju, qqaninx te tuʼn ttzaj tqʼoʼn qgan tuʼn qajbʼen mas te ex yajxitl qqaninx qipumal te tuʼn tbʼant quʼn. Qa kuʼxun qoʼ moqa ma qo chʼiy, tzʼajbʼenx ambʼil, qipumal, aju jaku bʼant quʼn ex qe tiʼchaq at qe tuʼn tjaw qnimsaʼn Jehová (Ecl. 9:10). Miʼn txi qqʼoʼn ambʼil te xobʼajil moqa te nya bʼaʼn qximbʼetz tuʼn tel tiʼn tbʼanel ambʼil qe tuʼn qajbʼen te Jehová. Qa in bʼant nim quʼn moqa nya nim, qkyaqilx jaku jaw qnimsaʼn Jehová ik tzeʼn taj.