XNAQʼTZBʼIL 41
Tzeʼn jaku qo onin tiʼj jun xjal tuʼn tjaw aʼ twiʼ (tnejel plaj)
«Tuʼj Crist qeye, ate Crist o tzʼibʼante noq tuʼn qaqʼunbʼene» (2 COR. 3:3).
BʼITZ 78 Qxnaqʼtzanx Tyol Dios
AJU KʼELEL QNIKʼ TIʼJ *
1. ¿Tzeʼn in nonin 2 Corintios 3:1 a 3 qiʼj tuʼn tel qnikʼ tiʼj qa jun tbʼanel oklenj aj qonin tiʼj jun xjal tuʼn tjaw aʼ twiʼ? (Qʼonka twitza tiʼj tilbʼilal tok tiʼj t-xkʼomil).
¿TIʼ IN kubʼ qnaʼn aj tjaw aʼ twi jun xjal in xnaqʼtzan tiʼj Tyol Dios toj kʼloj okslal jatumel in nok qchmon qibʼ? Nimxix in qo tzalaj (Mat. 28:19). Ex mas in qo tzalaj qa aqoʼ xi qʼonte xnaqʼtzbʼil te xjal (1 Tes. 2:19, 20). Aqeju t-xnaqʼtzbʼen Jesús tzma in jaw aʼ kywiʼ, in che ok te «jun uʼj te oqxenbʼil» tuʼnju nya oʼkx in che yolin bʼaʼn tiʼjju xi qʼonte xnaqʼtzbʼil kye, sino kyiʼj kykyaqil erman ateʼ toj kʼloj okslal (kjawil uʼjit 2 Corintios 3:1-3).
2. a) ¿Alkye xjel nim toklen bʼaʼn tuʼn qximen tiʼj ex tiquʼn? b) ¿Alqiʼj in yolin aj t-xi qʼet xnaqʼtzbʼil te jun xjal tiʼj Tyol Dios? (Qʼonka twitza tiʼj tqanil).
2 Nimxix in qo tzalaj tuʼnju kyoj qeju kyaje abʼqʼi o che ikʼ, o tzaj samaʼn tqanil tiʼj qa at jun promedio te 10 millón xjal in che xnaqʼtzan tiʼj Tyol Dios twitz tkyaqil Txʼotxʼ. * Ex kyojx abʼqʼi lu, at jun promedio te 280 mil xjal in jaw aʼ kywiʼ toj junjun abʼqʼi. Tuʼn jlu in nel qnikʼ tiʼj qa at nim millón xjal in che xnaqʼtzan tiʼj Tyol Dios jaku jaw aʼ kywiʼ. ¿Tzeʼn jaku qo onin kyiʼj? Kukx at tpasens Jehová ex in tzaj tqʼoʼn ambʼil kye tuʼn kyok te t-xnaqʼtzbʼen Jesús. Ya chʼix tbʼaj ambʼil, tuʼntzunju qaj tuʼn tok tilil quʼn tuʼn qonin kyiʼj tuʼn kychʼiy toj kyokslabʼil ex tuʼn tjaw aʼ kywiʼ (1 Cor. 7:29a; 1 Ped. 4:7).
3. ¿Tiʼ kʼelel qnikʼ tiʼj toj xnaqʼtzbʼil lu?
3 Tuʼn tel nikʼbʼaj tiʼj qa nim toklen tuʼn qonin kyiʼj xjal tuʼn tjaw aʼ kywiʼ, o txi tqanin Kʼloj Xjal Qʼil Twitz Aqʼuntl junjun tqanil kyoj ninja qʼil twitz aqʼuntl. Toj xnaqʼtzbʼil lu ex toj juntl, kʼelel qnikʼ tiʼj tiʼ xnaqʼtzbʼil jaku tzʼel qiʼn kyiʼj junjun ansyan in che bʼet kyojele Ja te Chmabʼil, kyiʼj misionero ex kyiʼj precursor at kyojtzqibʼil tiʼj tzeʼn tuʼn qonin kyiʼj xjal (Prov. 11:14; 15:22). * Aju in tzaj kyqʼamaʼn, in nonin qiʼj tuʼn tel qnikʼ tiʼj tiʼ jaku bʼant kyuʼn qeju in che qʼon xnaqʼtzbʼil ex kyuʼn qeju in xi kykʼamoʼn tuʼntzun tonin kyiʼj. Ax ikx tzul tqʼamaʼn xnaqʼtzbʼil lu jweʼ tiʼchaq jaku bʼant kyuʼn qeju in che xnaqʼtzan tiʼj Tyol Dios ex tzeʼn jaku qo onin kyiʼj tuʼn tjaw aʼ kywiʼ.
TUʼN T-XNAQʼTZAN TKYAQIL SEMAN
4. ¿Tiʼ bʼaʼn tuʼn tel qnikʼ tiʼj qa atz ttzi kyja xjal in xi qqʼoʼn xnaqʼtzbʼil kye?
4 Ateʼ junjun erman in xi kyqʼoʼn xnaqʼtzbʼil kye xjal atz ttzi kyja. In nonin jlu tuʼn ttzaj kygan xjal tiʼj xnaqʼtzbʼil, noqtzun tuʼnj, chʼixme tkyaqil maj noq chʼin ambʼil jaku qo yolin kyukʼil ex mlaylo qo xnaqʼtzan kyukʼil tkyaqil seman. Tuʼn kukx tten kygan xjal tuʼn kyxnaqʼtzan, at maj in xi kyqanin erman junjun tqanil kyiʼj xjal, in chex llamarin kyiʼj moqa in xi kyqʼoʼn jun mensaje tuʼntzun kyyolin tiʼj jun xnaqʼtzbʼil tiʼj Tyol Dios. * Qa ma bʼaj jlu, jakulo txi tiʼn nim ambʼil ex mlaylo chʼiy xjal toj tokslabʼil.
5. ¿Alkyeqe techel ajbʼen tuʼn Jesús toj Lucas 14:27 a 33, aju jaku tzʼonin qiʼj kyukʼil qeju in che xnaqʼtzan?
5 Toj jun maj, ajbʼen kabʼe techel tuʼn Jesús tuʼn t-xi t-xnaqʼtzaʼn tiʼ kbʼantel tuʼn jun xjal tuʼn tok te t-xnaqʼtzbʼen. Yolin tiʼj jun xjal taj tuʼn tjaw tbʼinchaʼn jun ja ex tiʼj jun aj kawil taj tuʼn tex qʼojil tiʼj juntl tnam. Tqʼama qa taj jun xjal tuʼn tjaw tbʼinchaʼn jun ja, tnejel kbʼel ten ximel tiʼj qa jaku kanin tpwaq tuʼntzun tkyaj bʼant ja. Ax ikx te aj kawil, il tiʼj tuʼn tkubʼ qeʼ tnejel tuʼntzun tok tbʼiʼn qa bʼantni kyten soldad tuʼntzun kyxiʼ toj qʼoj (kjawil uʼjit Lucas 14:27-33). Ojtzqiʼntoq tuʼn Jesús qa chʼixme axju kbʼantel tuʼn jun xjal tuʼntzun tok te t-xnaqʼtzbʼen. Tnejel kbʼel ten ximel tiʼj tiʼ kbʼantel tuʼn tuʼntzun tjapun twi t-ximbʼetz. Tuʼn t-xi tbʼinchaʼn xjal ik tzeʼn tqʼama Jesús, nim toklen tuʼn t-xi qqʼoʼn xnaqʼtzbʼil te tkyaqil seman. ¿Tzeʼn jaku bʼant quʼn?
6. ¿Tiʼ jaku bʼant quʼn tuʼntzun tchʼiy jun xjal toj tokslabʼil?
6 Aju tnejel tuʼn tbʼant quʼn, bʼaʼn tuʼn qxnaqʼtzan mas ambʼil kyukʼil xjal ttzi kyja. Jun techel, bʼaʼn tuʼn tkubʼ qxnaqʼtzaʼn mas te jun taqikʼ Tyol Dios aj qpon junjun maj. Aj tnaqʼet xjal tiʼj tuʼn t-xnaqʼtzan mas ambʼil, jaku txi qqanin te qa at jun lugar jatumel tuʼn qkubʼ qeʼ tuʼntzun kukx qyolin. Iktzun tten kʼelel qnikʼ tiʼj qa in nok tqʼoʼn toklen xnaqʼtzbʼil. Axpe ikx, aj tbʼet chʼin ambʼil jaku txi qqanin te xjal qa jaku xnaqʼtzan kabʼe maj toj seman. Kʼonil jlu tiʼj tuʼn tchʼiy naj tamiwbʼil tukʼil Jehová. Qo xnaqʼtzan tiʼj juntl tiʼ jaku bʼant tuʼn xjal in xnaqʼtzan.
TUʼN TBʼAJ TBʼINCHAʼN TTEN TIʼJ XNAQʼTZBʼIL
7. ¿Tzeʼn kbʼajel qbʼinchaʼn qten aj qxiʼ qʼol xnaqʼtzbʼil tkyaqil maj?
7 Nim toklen tuʼn tbʼaj qbʼinchaʼn qten aj qxiʼ qʼol xnaqʼtzbʼil tkyaqil maj. Jaku txi tzyet tuʼn tjaw quʼjin xnaqʼtzbʼil ex tuʼn t-xi qjyoʼn qe taqikʼ Tyol Dios. Bʼaʼn tuʼn tel qnikʼ tiʼj alkyeqe xnaqʼtzbʼil mas nim kyoklen. Qo ximen tiʼj tbʼi xnaqʼtzbʼil, kyiʼj subtítulo, kyiʼj taqikʼ Tyol Dios che jawil uʼjit, kyiʼj xjel, kyiʼj tilbʼilal ex tiʼj alkyexku video jaku tzʼonin qiʼj tuʼn t-xi qchikʼbʼaʼn xnaqʼtzbʼil. Yajxitl, qo ximen tiʼj xjal in xnaqʼtzan ex tiʼj tzeʼn jaku tzʼonin xnaqʼtzbʼil tiʼj aj t-xi qchikʼbʼaʼn toj jun tten nya kwest tuʼntzun tel tnikʼ tiʼj ex tuʼn tkubʼ tbʼinchaʼn (Neh. 8:8; Prov. 15:28a).
8. Ik tzeʼn tqʼama Pablo toj Colosenses 1:9 ex 10, ¿tiʼ kbʼantel quʼn tuʼntzun qonin tiʼj xjal in xnaqʼtzan tiʼj Tyol Dios?
8 Ax ikx bʼaʼn tuʼn qnaʼn Dios tiʼj xjal in xnaqʼtzan ex tiʼjju in bʼaj tiʼj, ex at toklen jlu tukʼilju tuʼn tbʼaj qbʼinchaʼn qten. Qqaninx te tuʼn tajbʼen Tyol quʼn toj tumel tuʼntzun tpon toj tanmi xjal (kjawil uʼjit Colosenses 1:9, 10). Qo ximen tiʼj qa at jun tiʼ kwest tuʼn tel tnikʼ xjal tiʼj moqa kwest tuʼn t-xi tbʼinchaʼn. Bʼaʼn tuʼn ttzaj qnaʼn qa qaj tuʼn qonin tiʼj xjal tuʼn tjaw aʼ twiʼ.
9. ¿Tzeʼn jaku qo onin tiʼj xjal in xnaqʼtzan tiʼj Tyol Dios tuʼn tbʼaj tbʼinchaʼn tten tiʼj xnaqʼtzbʼil?
9 Qaj tuʼn tonin xnaqʼtzbʼil tiʼj Tyol Dios tiʼj xjal tuʼn tok tqʼoʼn toklen aju o bʼant tuʼn Jehová ex tuʼn Jesús tiʼj, ex tuʼn tkubʼ t-ximen tuʼn tel mas tnikʼ (Mat. 5:3, 6). Tuʼn tonin xnaqʼtzbʼil tiʼj xjal, nim toklen tuʼn tok tqʼoʼn twiʼ tiʼjju in nel tnikʼ tiʼj. Tuʼntzunju, bʼaʼn tuʼn t-xi qnaʼn te xjal qa nim toklen tuʼn t-xnaqʼtzan tiʼj xnaqʼtzbʼil naʼmxtoq qpon tukʼil ex tuʼn t-ximen tiʼj tzeʼn jaku kubʼ tbʼinchaʼn. Jaku qo onin tiʼj qa ma kubʼ qbʼinchaʼn qten tiʼj jun xnaqʼtzbʼil junx tukʼil tuʼntzun tok tkeʼyin tzeʼn tuʼn tbʼaj qbʼinchaʼn qten. * Qyekʼinx te tzeʼn jaku che kanet tzaqʼwebʼil kyiʼj xjel ex qqʼamanx te tuʼn tkux tsubrayarin junjun txol yol tuʼntzun ttzaj tnaʼn tzaqʼwebʼil. Ax ikx, bʼaʼn tuʼn t-xi qqanin te tuʼn ttzaj ttzaqʼweʼn toj tex tyol. Iktzun tten kʼelel qnikʼ tiʼj qa in nel tnikʼ tiʼj xnaqʼtzbʼil. Qo xnaqʼtzan tiʼjju toxin tiʼ tuʼn tbʼant tuʼn xjal in xnaqʼtzan.
TUʼN TYOLIN TUKʼIL JEHOVÁ TKYAQIL QʼIJ
10. ¿Tiquʼn nim toklen tuʼn tuʼjin xjal tiʼj Tyol Dios tkyaqil qʼij ex tiʼ kbʼantel tuʼn tuʼntzun tonin tiʼj aj tjaw tuʼjin?
10 At junjun tiʼchaq jaku bʼant tkyaqil qʼij tuʼn xjal in xnaqʼtzan tiʼj Tyol Dios ex nya oʼkx tuʼn t-xi tkʼamoʼn xnaqʼtzbʼil junjun seman. Il tiʼj tuʼn tyolin tukʼil Jehová aj tok tbʼiʼn te ex aj tyolin tukʼil. Jaku tzʼok tbʼiʼn Jehová aj tuʼjin tiʼj Xjan Uʼj tkyaqil qʼij (Jos. 1:8; Sal. 1:1-3). Bʼaʼn tuʼn t-xi qyekʼin programa tuʼn quʼjin tiʼj Tyol Dios te aju at toj jw.org ex jaku tzʼetz imprimirit. * Tuʼn tonin Tyol Dios tiʼj xjal aj tjaw tuʼjin, qqʼamanx te tuʼn t-ximen tiʼj tiʼ xnaqʼtzbʼil jaku tzʼel tiʼn tiʼj Jehová ex tzeʼn jaku kubʼ tanqʼiʼn aju in tzaj tqʼamaʼn Xjan Uʼj (Hech. 17:11; Sant. 1:25).
11. ¿Tzeʼn jaku qo onin tiʼj jun xjal tuʼn t-xi t-xnaqʼtzan tibʼ tuʼn tnaʼn Dios ex tiquʼn nim toklen tuʼn tbʼant tuʼn tkyaqil qʼij?
11 Qo onin tiʼj xjal in xnaqʼtzan tuʼn tnaʼn Dios te Jehová tkyaqil qʼij. Qo naʼn Dios tuʼn tkyaqil qkʼuʼj aj t-xi tzyet xnaqʼtzbʼil ex aj tkubʼaj ex qqʼamanx tbʼi xjal in xnaqʼtzan qukʼil. Iktzun tten kbʼantel tnaʼn Dios tuʼn tkyaqil tkʼuʼj te Jehová ex tuʼn tajbʼen tbʼi Jesús tuʼn (Mat. 6:9; Juan 15:16). Qo ximen tiʼj jniʼ jaku tzʼonin tiʼj aj tuʼjin tiʼj Xjan Uʼj tkyaqil qʼij ex aj tnaʼn Dios (Sant. 4:8). Qa ma naqʼet tuʼn tbʼant jlu tuʼn, kʼonil tiʼj tuʼn tkubʼ t-ximen tuʼn t-xi tqʼamaʼn te Jehová tuʼn tajbʼen te ex tuʼn tjaw aʼ twiʼ. Qo xnaqʼtzan tiʼj alqiʼj in qo yolin.
TUʼN TOK TE TAMIW JEHOVÁ
12. ¿Tzeʼn jaku qo onin tiʼj xjal in xnaqʼtzan tuʼn tok te tamiw Jehová?
12 Nya oʼkx tuʼn tel tnikʼ xjal tiʼj xnaqʼtzbʼil, sino il tiʼj tuʼn tpon toj tanmi. ¿Tiquʼn? Tuʼnju kʼonil tiʼj tuʼn tkubʼ tbʼinchaʼn aju in nel tnikʼ tiʼj, ex at toklen jlu tukʼilju in kubʼ tnaʼn, in kubʼ t-ximen ex tukʼilju taj tuʼn tbʼant tuʼn. El kynikʼ xjal tiʼj tyol Jesús tuʼnju toj ttxolil xi t-xnaqʼtzaʼn kye. Ax ikx, e ok lepeʼ xjal tiʼj tuʼnju pon xnaqʼtzbʼil toj kyanmi (Luc. 24:15, 27, 32). Il tiʼj tuʼn tel tnikʼ xjal tiʼj qa ax tok at Jehová, qa jaku tzʼok te Tman, te Tdios ex te Tamiw (Sal. 25:4, 5). Qo yolin kyiʼj tbʼanel tmod Jehová tukʼil xjal akux in qo qʼon xnaqʼtzbʼil te (Éx. 34:5, 6; 1 Ped. 5:6, 7). Noq alkyexku xnaqʼtzbʼil in qo xnaqʼtzan tiʼj, qo onin tiʼj xjal tuʼn tel tnikʼ kyiʼj tbʼanel tmod Jehová. Qo onin tiʼj tuʼn tok tqʼoʼn toklen tkʼujlabʼil Jehová, qʼaqʼbʼil tkʼuʼj ex t-xtalbʼil. Tqʼama Jesús qa aju mandamyent mas nim toklen kywitz kykyaqil, aju «Kykʼujlame Qman Dios» (Mat. 22:37, 38). Tzʼok tilil quʼn tuʼn tten nim tkʼujlabʼil xjal tiʼj Jehová.
13. Chikʼbʼantza tukʼil jun techel tzeʼn jaku qo onin tiʼj jun xjal tuʼntzun tel tnikʼ tiʼj Jehová.
13 Aj qyolin tukʼil xjal in xnaqʼtzan, qqʼamanx te tiʼ in qnaʼn tiʼj Jehová. Bʼalo jaku tzʼonin jlu tiʼj tuʼn tel tnikʼ tiʼj qa nim toklen tuʼn tten tex tamiwbʼil tukʼil Jehová ex tuʼn tok tkʼujlaʼn (Sal. 73:28). Jun techel, aj qxnaqʼtzan tiʼj jun uʼj moqa jun taqikʼ Tyol Dios jatumel in yolin tiʼj tkʼujlabʼil Jehová, tiʼj tipumal, tiʼj tnabʼil moqa tiʼjju tzʼaqli, toj ambʼil lu, bʼaʼn tuʼn t-xi qqʼamaʼn qa atzun jun kyxol qeju nim tiquʼn kʼujlaʼn Jehová quʼn. Atzun jaʼlo, qo xnaqʼtzan tiʼjju tjweʼyin tiʼ kbʼantel tuʼn jun xjal in xnaqʼtzan tuʼntzun tjaw aʼ twiʼ.
TUʼN T-XIʼ KYOJ CHMABʼIL
14. Ik tzeʼn in tzaj tqʼamaʼn Hebreos 10:24 ex 25, ¿tiʼ jaku tzʼonin tiʼj jun xjal tuʼn tchʼiy toj tokslabʼil?
14 Qkyaqilx qaj tuʼn tjaw aʼ kywiʼ xjal in che xnaqʼtzan tiʼj Tyol Dios. Jaku qo onin kyiʼj aj t-xi qqʼamaʼn kye qa nim toklen tuʼn kyxiʼ kyoj chmabʼil. In tzaj kyqʼamaʼn erman ya ojtzqiʼn kyuʼn tzeʼn tuʼn t-xi qʼet xnaqʼtzbʼil qa jun rat in chʼiy jun xjal toj tokslabʼil qa ma pon kyoj chmabʼil (Sal. 111:1). Ateʼ junjun in xi kyqʼamaʼn kye xjal in che xnaqʼtzan qa kxel qʼet mij xnaqʼtzbʼil kye aj kypon kyukʼil, atzun juntl mij jaku tzaj kykʼamoʼn kyoj chmabʼil. Bʼaʼn tuʼn tjaw quʼjin Hebreos 10:24, 25 tukʼil xjal ex qyekʼinx te tzeʼn jaku tzʼonin tiʼj qa ma pon kyoj chmabʼil (uʼjinktza). Ax ikx, jaku txi qyekʼin video ¿Tiʼ in bʼaj toj jun Ja te Chmabʼil? * Qo onin tiʼj xjal tuʼn tkubʼ t-ximen tuʼn t-xiʼ kyoj kykyaqil chmabʼil.
15. ¿Tiʼ jaku bʼant quʼn tuʼn qonin tiʼj xjal in xnaqʼtzan qukʼil tuʼn t-xiʼ kyoj kykyaqil chmabʼil?
15 ¿Tiʼ jaku bʼant quʼn qa naʼmx tpon xjal jun maj toj chmabʼil moqa oʼkx in pon junjun maj? Qqʼamanx te tukʼil tzalajbʼil jun akʼaj xnaqʼtzbʼil el qnikʼ tiʼj toj jun chmabʼil kʼitzqe ok. Mas jaku tzʼonin jlu tiʼj twitzju qa noq xi qqʼamaʼn te tuʼn tpon. Qqʼonx jun tuʼj Aju Xqʼuqil moqa Uʼj te aqʼuntl toj chmabʼil aju in kubʼ xnaqʼtzet toj ambʼil aju. Qyekʼinx te tiʼ kbʼel xnaqʼtzet toj juntl chmabʼil ex qqaninx te alkye mas tbʼanel in nela toj twitz. Aju kʼokel tkeʼyin toj tnejel chmabʼil, kʼokel te mas tbʼanel twitzju o tzʼok tkeʼyin moqa o tzʼok tbʼiʼn toj alkyexku juntl okslabʼil (1 Cor. 14:24, 25). Kʼokel tojtzqiʼn junjuntl erman in kubʼ kyqʼoʼn jun tbʼanel techel twitz ex che onil tiʼj tuʼn tjaw aʼ twiʼ.
16. a) ¿Tzeʼn jaku qo onin tiʼj jun xjal tuʼn tjaw aʼ twiʼ? b) ¿Tiʼ qo xnaqʼtzal tiʼj toj juntl xnaqʼtzbʼil?
16 Tuʼn tkubʼaj, ¿tzeʼn jaku qo onin tiʼj jun xjal tuʼn tjaw aʼ twiʼ? Tuʼn qonin tiʼj tuʼn tok tqʼoʼn toklen xnaqʼtzbʼil, qqʼamanx te tuʼn t-xnaqʼtzan tkyaqil seman ex tuʼn tbʼaj tbʼinchaʼn tten tiʼj teyele junjun xnaqʼtzbʼil. Qxnaqʼtzanx te tuʼn tnaʼn Dios tkyaqil qʼij ex tuʼn tok te tamiw Jehová. Ex qo onin tiʼj tuʼn tpon kyoj chmabʼil. (Qʼonka twitza tiʼj recuadro « Aju il tiʼj tuʼn tbʼant tuʼn xjal in xnaqʼtzan tiʼj Tyol Dios»). Noqtzun tuʼnj, ax ikx il tiʼj tuʼn tbʼant jweʼ tiʼ kyuʼn qeju in che qʼon xnaqʼtzbʼil tuʼntzun kyonin kyiʼj qeju in che xnaqʼtzan kyukʼil tuʼn tjaw aʼ kywiʼ, ex atzun jlu kʼelel qnikʼ tiʼj toj juntl xnaqʼtzbʼil.
BʼITZ 76 ¿Tiʼ in kubʼ tnaʼna tiʼjju in bʼant tuʼna?
^ taqik' 5 Aj t-xi qqʼoʼn xnaqʼtzbʼil te jun xjal, a t-xilen tuʼn qonin tiʼj tuʼn t-ximen, tuʼn tkubʼ tnaʼn jun tiʼ moqa tuʼn tbʼant junjun chʼixpubʼil tuʼn. Ma tzaj tnaʼn taqikʼ Tyol Dios te abʼqʼi 2020 qe qa nim toklen tuʼn t-xi qqʼoʼn xnaqʼtzbʼil tiʼj Tyol Dios kye xjal ex tuʼn t-xi qyekʼin kye tiʼ tuʼn tbʼant kyuʼn tuʼntzun kyok te t-xnaqʼtzbʼen Jesús (Mat. 28:19). Toj xnaqʼtzbʼil lu ex toj juntl, kʼelel qnikʼ tiʼj tzeʼn jaku bʼant aqʼuntl lu quʼn tojxix tumel.
^ taqik' 2 YOL NIM TOKLEN: Qa kukx in qo yolin tukʼil jun xjal tiʼj Xjan Uʼj ex in najbʼen jun uʼj quʼn, ya in qo qʼon jun xnaqʼtzbʼil tiʼj Tyol Dios. Ex qa ma txi qqʼoʼn kabʼe maj xnaqʼtzbʼil te tej otoqxi txi qyekʼin tzeʼn in xi qʼet jun xnaqʼtzbʼil ex qa in kubʼ qximen qa kukx jaku xnaqʼtzan, jaku kux qtzʼibʼin toj informe.
^ taqik' 3 Ax ikx at junjun nabʼil tkuʼx toj xnaqʼtzbʼil lu ex toj juntl aju in yolin tiʼj kʼloj xnaqʼtzbʼil «Dirijamos estudios bíblicos progresivos», aju etz toj xjaw te julio te 2004 a mayo te 2005 toj uʼj Nuestro Ministerio del Reino.
^ taqik' 4 Noq jaxku tumel in qo pakbʼan, nim toklen tuʼn qok lepeʼ tiʼjju in tzaj tqʼamaʼn ley toj jun tnam aj t-xi qqanin tqanil tiʼj jun xjal.
^ taqik' 9 Keʼyinka video te kyaje minut Yekʼinxa te xjal in xnaqʼtzan tukʼila tuʼn tkubʼ tbʼinchaʼn tten. Txiʼya toj jw.org, > KʼUBʼIL UʼJ > VIDEOS > QE QCHMABʼILE EX QPAKBʼABʼILE.
^ taqik' 10 Txiʼya toj jw.org, jatumel in tzaj tqʼamaʼn KʼUBʼIL UʼJ > UʼJ EX NIMAQ UʼJ.
^ taqik' 14 Txiʼya toj jw.org, jatumel in tzaj tqʼamaʼn KʼUBʼIL UʼJ > VIDEOS > QE QCHMABʼILE EX QPAKBʼABʼILE > ONBʼIL TUʼN QPAKBʼAN.
