1. ¿Tiʼ jaku tzul toj qximbʼetz aj qximen tiʼj jun xjal in tzaj qʼaqʼin tkʼuʼj kyiʼj txqantl?

AJ QXIMEN tiʼj jun xjal in tzaj qʼaqʼin tkʼuʼj, bʼalo in qo ximen tiʼj jun xjal at tbʼanel tmod, mintiʼ in tzaj tqʼoj ex bʼaʼn bʼinchan xtalbʼil. Tuʼn jlu jakulo qo ximen tiʼj xjal te Samaria, aju yolin Jesús tiʼj. Kubʼ tyekʼin xjal lu tbʼanel tmod tiʼj jun xjal judiy otoq tzʼok bʼyoʼn kyuʼn eleqʼ. «Tzaj qʼaqʼan tkʼuʼj» xjal te Samaria tiʼj aj Judiy ex onin tkʼujlabʼil tiʼj tuʼn tbʼinchan xtalbʼil tiʼj xjal (Luc. 10:29-37). In tzaj tyekʼin txʼolbʼabʼil lu qa in tzaj qʼaqʼin tkʼuʼj Jehová qiʼj ex qa in kubʼ tyekʼin tkyaqil qʼij tuʼnju at toklen tukʼil tkʼujlabʼil.

2. ¿Alkye juntl tten in kubʼ tyekʼin jun xjal qa in tzaj qʼaqʼin tkʼuʼj tiʼj juntl?

² Ax ikx, jaku kubʼ tyekʼin jun xjal qa in tzaj qʼaqʼin tkʼuʼj tiʼj juntl qa mintiʼ ma kubʼ tqʼoʼn tkastiw maske at til. Atzun jlu in bʼant tuʼn Jehová qukʼil tuʼnju «mintiʼ in kubʼ tqʼoʼn qcastiw ik tzaʼn kyajlal qil» (Sal. 103:10). Noqtzun tuʼnj, at maj il tiʼj tuʼn t-xi tkawin Jehová jun xjal qa otoq bʼinchan il.

3. ¿Alkyeqe xjel che xel qtzaqʼweʼn toj xnaqʼtzbʼil lu?

³ Toj xnaqʼtzbʼil lu, kʼelel qnikʼ tiʼj tzaqʼwebʼil in tzaj tqʼoʼn Tyol Dios kyiʼj oxe xjel lu: ¿Tiquʼn in kubʼ tyekʼin Jehová qʼaqʼbʼil tkʼuʼj? ¿Tiʼ toklen qʼaqʼbʼil tkʼuʼj at tukʼilju aj t-xi tkawin jun xjal? ¿Ex tiʼ jaku tzʼonin qiʼj tuʼn tkubʼ qyekʼin mod lu?

4. ¿Tiquʼn in kubʼ tyekʼin Jehová qʼaqʼbʼil tkʼuʼj?

⁴ Tuʼnju kʼujlaʼn qoʼ tuʼn. Tuʼn tonbʼil xewbʼaj xjan, kubʼ ttzʼibʼin apóstol Pablo jlu: «Pero ate Dios nimxix tqʼaqʼbʼil tkʼuʼj». Tej tkubʼ ttzʼibʼin Pablo qe yol lu, atztoq in yolin tiʼj qʼuqbʼil kykʼuʼj skʼoʼn maj at tuʼn kyxiʼ anqʼil toj kyaʼj (Efes. 2:4-7).  Pero nya oʼkx in tzaj qʼaqʼin tkʼuʼj Jehová kyiʼj okslal skʼoʼn maj. ¿Tiquʼn in xi qqʼamaʼn jlu? Tuʼnju kubʼ ttzʼibʼin David jlu toj jun salmo: «Bʼaʼnte Qman kyukʼil kykyaqil, ex kʼujlaʼn kykyaqil tchʼisbʼen tuʼn» (Sal. 145:9). Tuʼnju kʼujlaʼn qe xjal tuʼn Jehová, in tzaj qʼaqʼin tkʼuʼj kyiʼj ex in jyon tumel toj alkye ambʼil jaku bʼant jlu tuʼn.

5. ¿Tzeʼn el tnikʼ Jesús tiʼj qa in tzaj qʼaqʼin tkʼuʼj Jehová kyiʼj txqantl?

⁵ Ojtzqiʼn tuʼn Jesús qa tgan Jehová tuʼn ttzaj qʼaqʼin tkʼuʼj kyiʼj txqantl. Ten nim mil abʼqʼi tukʼil Ttat toj kyaʼj tej naʼmxtoq tul tzalu twitz Txʼotxʼ (Prov. 8:30, 31). Nim maj ok tkeʼyin tzeʼn kubʼ tyekʼin Jehová qʼaqʼbʼil tkʼuʼj kyiʼj xjal maske aj il qe (Sal. 78:37-42). Tej t-xi tqʼoʼn xnaqʼtzbʼil kye txqantl, kukx yolin tiʼj qʼaqʼbʼil tkʼuʼj Jehová.

6. ¿Alkye techel yolin Jesús tiʼj tuʼn ttzaj t-xnaqʼtzaʼn qa in tzaj qʼaqʼin tkʼuʼj Jehová kyiʼj xjal?

⁶ Ik tzeʼn el qnikʼ tiʼj toj xnaqʼtzbʼil o kyaj, yolin Jesús tiʼj txʼolbʼabʼil tiʼj jun kʼwal el tzpet tuʼntzun ttzaj tyekʼin qa tgan Jehová tuʼn tkubʼ tyekʼin qʼaqʼbʼil tkʼuʼj. Tej tikʼ bʼet kʼwal tja, «bʼaj tnajsaʼn tkyaqilju tpwaq tiʼj achbʼil te twitz txʼotxʼ» (Luc. 15:13). Tej tikʼ ambʼil, ajtz tiʼj tanmi, tzaj tbʼis tiʼjju otoq bʼant tuʼn ex meltzʼaj tja. ¿Tiʼ tmod tman kubʼ tyekʼin tiʼj? Jun rat el tnikʼ kʼwalbʼaj tiʼj. Tqʼama Jesús jlu: «Naʼnxtoq tkanun, o ilwaj tuʼn tman, tzaj qʼaqʼan tkʼuʼj tman tiʼj, ex xiʼ qelan kanul tiʼj, tzaj tchleʼn, ex el ttzʼubʼan twitz». Mintiʼ el tiʼn mambʼaj toklen tkʼwal, sino tzaj qʼaqʼin tkʼuʼj tiʼj, kubʼ tnajsaʼn til ex okx tkʼamoʼn juntl maj toj tja. Otoq bʼant nim il tuʼn kʼwalbʼaj, pero kubʼ najsaʼn til tuʼn tman tuʼnju ax tok ajtz tiʼj tanmi. Aju mambʼaj in yolin txʼolbʼabʼil lu tiʼj, in kubʼ techlaʼn Jehová. Tej tyolin Jesús tiʼj txʼolbʼabʼil lu, kubʼ tyekʼin qa taj Jehová tuʼn tkubʼ tnajsaʼn kyil qeju in najtz tiʼj kyanmi (Luc. 15:17-24).

7. ¿Tiʼ toklen tnabʼil Jehová at tukʼilju tuʼn ttzaj qʼaqʼin tkʼuʼj?

⁷ Tuʼnju at nim tnabʼil. In najbʼen tnabʼil Jehová tuʼn toj tumel ex nya kyuw kyukʼil txqantl. In tzaj tqʼamaʼn Xjan Uʼj qa aju nabʼil «in tzaj tqʼoʼn Dios [...] at tqʼaqʼbʼil tkʼuʼj ex bʼaʼn tbʼinchbʼen» (Sant. 3:17). Ik tzeʼn jun tbʼanel mambʼaj, ojtzqiʼn tuʼn Jehová qa in nonin qʼaqʼbʼil tkʼuʼj kyiʼj tkʼwal (Sal. 103:13; Is. 49:15). Tuʼnju in tzaj qʼaqʼin tkʼuʼj kyiʼj xjal, at jun qʼuqbʼil kykʼuʼj toj ambʼil tzul maske aj il qe. Tuʼnju at nim tnabʼil, in jyon tiʼj ambʼil jatumel jaku kubʼ tyekʼin  qʼaqʼbʼil tkʼuʼj kyiʼj xjal. In najbʼen qʼaqʼbʼil tkʼuʼj Jehová tuʼn toj tumel tuʼnju mintiʼ in nikʼ tibʼaj ex mintiʼ in xi tqʼoʼn ambʼil kye xjal tuʼn t-xi kybʼinchaʼn tkyaqilju kyajbʼil.

8. ¿Tiʼ il tiʼj tuʼn tbʼant junjun maj ex tiquʼn?

⁸ Atzun jaʼlo, ¿tiʼ jaku bʼaj qa ma kubʼ t-ximen jun tmajen Jehová tuʼn tkubʼ tbʼinchaʼn il? Kubʼ ttzʼibʼin apóstol Pablo jlu: «Miʼn tzʼok kymojbʼan kyibʼe tukʼil» (1 Cor. 5:11). Qa ma bʼinchan jun tmajen Jehová il ex mintiʼ in najtz tiʼj tanmi, in nex lajoʼn toj ttnam. In bʼant jlu tuʼntzun kyok xqʼuqit erman ex tuʼn tjapun kywi tkawbʼil Jehová. Noqtzun tuʼnj, ateʼ junjun in kubʼ kyximen qa mintiʼ in kubʼ tyekʼin Jehová qʼaqʼbʼil tkʼuʼj aj tex lajoʼn jun erman toj ttnam. Qo xnaqʼtzan tiʼj qa ax tok aju in kyqʼamaʼn.

9, 10. a) Ik tzeʼn in tzaj tyekʼin Hebreos 12:5 ex 6, ¿tiquʼn in xi qqʼamaʼn qa in tzaj qʼaqʼin tkʼuʼj Jehová tiʼj jun tmajen aj tex lajoʼn toj ttnam? b) ¿Alkye techel in nonin qiʼj tuʼn tel qnikʼ tiʼj?

⁹ In tzaj nim qbʼis aj tetz qʼamaʼn toj chmabʼil qa «ya nya testigo de Jehová» jun xjal kʼujlaʼn quʼn. Jakulo kubʼ qximen qa nyatoq il tiʼj tuʼn tex lajoʼn. Aj tex lajoʼn, ¿axpe tok in kubʼ tyekʼin Jehová qʼaqʼbʼil tkʼuʼj tiʼj? Ikju. Qa il tiʼj tuʼn t-xi kawit jun xjal, mas bʼaʼn tuʼn t-xi qʼet te ex jun yekʼbʼil jlu tiʼj qkʼujlabʼil at tiʼj (Prov. 13:24). ¿Jakupe tzʼonin tiʼj jun xjal mintiʼ in najtz tiʼj tanmi aj tex lajet? Jaku. Ateʼ nim erman bʼant jun il kyuʼn o tzʼel kynikʼ tiʼj qa aju bʼant kyuʼn ansyan, atzun onin kyiʼj tuʼn tchʼexpaj kyximbʼetz ex tuʼn kymeltzʼaj tukʼil Jehová (kjawil uʼjit Hebreos 12:5, 6).

¹⁰ Qo ximen tiʼj techel lu. In nel tnikʼ jun pastor tiʼj qa otoq tzaj yabʼil tiʼj jun t-ẍneʼl. Ojtzqiʼn tuʼn qa il tiʼj tuʼn tel tpaʼn tal ẍneʼl kyiʼj txqantl tuʼntzun tbʼant. Pero kygan tal ẍneʼl tuʼn kyten junx, tuʼntzunju, in che jaw lipen aj in che el paʼn kyiʼj txqantl. Aj tel tpaʼn pastor jun ẍneʼl kyiʼj txqantl tuʼnju otoq tzaj yabʼil tiʼj, ¿ape t-xilen jlu qa in kubʼ tyekʼin nya bʼaʼn tmod tukʼil? Miʼn. ¿Tiquʼn? Tuʼnju ojtzqiʼn tuʼn qa jaku tzaj yabʼil kyiʼj txqantl qa kukx ma kyaj tqʼoʼn kyxol. Pero qa ma tzʼel tpaʼn, tuʼn jlu in nok t-xqʼuqin kykyaqil ẍneʼl (mojbʼanka tukʼil Levítico 13:3, 4).

11. a) ¿Tiquʼn in nok jun okslal in nex lajoʼn ik tzeʼn jun ẍneʼl otoq tzaj yabʼil tiʼj? b) ¿Alkyeqe tiʼchaq kukx jaku che onin kyiʼj qeju o che ex lajoʼn?

¹¹ Jaku txi qqʼamaʼn qa in nok jun okslal in nex lajoʼn ik tzeʼn jun ẍneʼl otoq tzaj yabʼil tiʼj tuʼnju otoq tzaj nya bʼaʼn tiʼj tamiwbʼil tukʼil Jehová (Sant. 5:14). Ik tzeʼn jaku tzʼel qiqen jun yabʼil kyiʼj txqantl, ax ikx jaku tzaj nya bʼaʼn tiʼj qamiwbʼil tukʼil Jehová qa kukx ma tzʼok qmojbʼan qibʼ tukʼil jun xjal otoq bʼinchan il. Tuʼntzunju, at maj il tiʼj tuʼn tel paʼn jun aj il kyiʼj txqantl. Aj tbʼant jlu, in kubʼ tyekʼin Jehová tkʼujlabʼil kyiʼj txqantl erman ex jaku tzʼonin tiʼj aj il tuʼn tajtz tiʼj tanmi ex tuʼn tmeltzʼaj. Aj tex lajoʼn jun okslal, kukx jaku ten kyoj chmabʼil tuʼntzun tchʼiy qʼuqbʼil tkʼuʼj juntl maj. Ax ikx, jaku jaw tuʼjin qe uʼj ex jaku tzʼok tkeʼyin qe video toj JW Broadcasting^®. Aj tok kykeʼyin ansyan qa in nok tilil tuʼn, jaku txi kyqʼoʼn junjun nabʼil te tuʼntzun kyonin tiʼj tuʼn tmeltzʼaj ex tuʼn tok juntl maj te testigo de Jehová. *

12. ¿Alkye mas tbʼanel jaku bʼant kyuʼn ansyan qa mintiʼ in najtz tiʼj tanmi jun okslal?

¹² Nim toklen tuʼn ttzaj qnaʼn qa oʼkx in nex lajoʼn jun okslal qa mintiʼ in najtz tiʼj tanmi. Ojtzqiʼn kyuʼn ansyan qa nya jun yaqbʼil jlu ex il tiʼj tuʼn tel kypaʼn ambʼil tuʼn  t-xi bʼinchet tiʼj. Ax ikx ojtzqiʼn kyuʼn qa in che tzaj tkawin Jehová qe tmajen ik tzeʼnx kybʼinchbʼen (Jer. 30:11). Kʼujlaʼn qe erman kyuʼn ansyan ex nya kyaj tuʼn t-xi kybʼinchaʼn jun tiʼ aju jaku tzaj tiʼn nya bʼaʼn tiʼj kyamiwbʼil tukʼil Jehová. Pero at maj il tiʼj tuʼn tex lajet jun okslal toj ttnam Jehová ex in bʼant jlu kyuʼn tuʼnju at kykʼujlabʼil ex qʼaqʼbʼil kykʼuʼj kyiʼj erman.

13. ¿Tiquʼn iltoq tiʼj tuʼn tex lajoʼn jun okslal te tnam Corinto?

¹³ Qo xnaqʼtzan tiʼj tiʼ bʼant tuʼn apóstol Pablo tej t-xi tkawin jun okslal te Corinto tuʼnju mintiʼ ajtz tiʼj tanmi. In yaẍintoq okslal lu tuʼnju in nanqʼintoq tukʼil t-xuʼjil tman. ¡Chʼixbʼajilxix jlu! Otoq tqʼama Jehová jlu kye aj Israel: «Qa at jun xinaq ma kubʼ tan tukʼil juntl t-xuʼjil tman, kbʼel tqʼoʼn tchʼixwi tman tuʼn jlu. Kyjaʼtzun kbʼel t-sentens xinaq tuʼn tkyim tukʼix xuʼj» (Lev. 20:11). Ax tok, mlaytoq txi tqʼamaʼn apóstol Pablo kye okslal te Corinto tuʼn tkubʼ bʼyoʼn xjal otoq bʼinchan il, pero xi tqʼamaʼn kye tuʼn tex kylajoʼn toj kʼloj okslal. Tzaj nya bʼaʼn kyiʼj junjun okslal tuʼnju otoq bʼant tuʼn xjal bʼinchan il. Axpe ikx, ateʼ junjun kubʼ kyximen qa nya jun matij il aju otoq bʼant tuʼn (1 Cor. 5:1, 2, 13).

14. ¿Tzeʼn kubʼ tyekʼin apóstol Pablo qʼaqʼbʼil tkʼuʼj tiʼj xjal ex lajoʼn toj kʼloj okslal te Corinto, ex tiquʼn? (2 Corintios 2:5-8, 11).

¹⁴ Tej tbʼet ambʼil, ok tbʼiʼn apóstol Pablo qa otoq bʼant chʼixpubʼil tuʼn xjal ex qa ax tok otoq tzʼajtz tiʼj tanmi. Otoq bʼaj ttzʼilsaʼn xjal tbʼi kʼloj okslal, pero xi tqʼamaʼn Pablo kye ansyan qa nyatoq taj tuʼn tok kyuw tukʼil. Tuʼntzunju, xi tqʼoʼn kawbʼil lu kye okslal: «Jaʼlotzun, noq oʼkx tuʼn tkubʼ kynajsaʼne til ex tuʼn t-xi kyqʼuqbʼaʼne tkʼuʼj». Tqʼama Pablo qa iltoq tiʼj tuʼn tbʼant jlu kyuʼn «tuʼntzun miʼn tkyaj ten tuj nim bʼis». Tzaj qʼaqʼin tkʼuʼj Pablo tiʼj xjal tuʼnju otoq tzʼajtz tiʼj tanmi. Nyatoq taj Pablo tuʼn ttzaj bʼaj tkʼuʼj xjal nix tuʼn tkubʼ tnaʼn nim bʼis tuʼnju mlaytoq tzʼonin jlu tiʼj tuʼn tajtz tiʼj tanmi (kjawil uʼjit 2 Corintios 2:5-8, 11).

15. ¿Tzeʼn in kubʼ kyyekʼin ansyan qʼaqʼbʼil kykʼuʼj toj tumel?

¹⁵ Ik tzeʼn in bʼant tuʼn Jehová, ax ikx kye ansyan kygan tuʼn tkubʼ kyyekʼin qʼaqʼbʼil kykʼuʼj kyiʼj txqantl. In chex kykawin qe erman qa il tiʼj, pero ax ikx in tzaj qʼaqʼin kykʼuʼj kyiʼj qa at tiquʼn tuʼn tbʼant kyuʼn. Qa mintiʼ ma txi kykawin ansyan jun okslal in bʼinchan il, mintiʼ in kubʼ kyyekʼin qʼaqʼbʼil kykʼuʼj tiʼj, sino in xi kyqʼoʼn ambʼil te tuʼn  tkubʼ tbʼinchaʼn nya bʼaʼn. Pero ¿oʼkxpe qe ansyan jaku kubʼ kyyekʼin qʼaqʼbʼil kykʼuʼj?

16. Ik tzeʼn in tzaj tqʼamaʼn Proverbios 21:13, ¿tiʼ in bʼant tuʼn Jehová kyiʼj qeju mintiʼ in tzaj qʼaqʼin kykʼuʼj kyiʼj txqantl?

¹⁶ Qkyaqilx qaj tuʼn ttzaj qʼaqʼin qkʼuʼj kyiʼj txqantl ik tzeʼn te Jehová. ¿Tiquʼn? Tuʼnju qa mintiʼ ma tzaj qʼaqʼin qkʼuʼj kyiʼj txqantl, mlay tzaj tbʼiʼn Jehová qnaʼj Dios (kjawil uʼjit Proverbios 21:13). Tuʼnju qaj tuʼn ttzaj tbʼiʼn Jehová qnaʼj Dios, in nok tilil quʼn tuʼn tkubʼ qyekʼin tbʼanel qmod kyukʼil txqantl. Tuʼntzunju, in nok qbʼiʼn kyyol qeju kyaj onbʼil. Ax ikx, in nok qqʼoʼn toklen kawbʼil lu, aju in tzaj tqʼoʼn Tyol Dios: «Porke ok tkubʼ kysentens xjal, mlay tzaj qʼaqʼan tkʼuʼj Dios tiʼj jun xjal mintiʼ in tzaj qʼaqʼan tkʼuʼj tiʼj tukʼil» (Sant. 2:13). Qa mintiʼ ma jaw qnimsan qibʼ ex qa ma tzʼel qnikʼ tiʼj qa ax ikx qe qaj tuʼn ttzaj qʼaqʼin kykʼuʼj txqantl qiʼj, kʼonil qiʼj tuʼn ttzaj qʼaqʼin qkʼuʼj kyiʼj txqantl. Mas kbʼantel jlu quʼn tiʼj jun erman in meltzʼaj toj ttnam Jehová.

17. ¿Alkye tten kubʼ tyekʼin aj kawil David qa tzaj qʼaqʼin tkʼuʼj kyiʼj txqantl?

¹⁷ In che kanet tbʼanel techel quʼn toj Tyol Dios tuʼntzun tel qnikʼ tiʼj tzeʼn jaku kubʼ qyekʼin qʼaqʼbʼil qkʼuʼj kyiʼj txqantl ex tuʼn miʼn tkubʼ qyekʼin nya bʼaʼn qmod kyukʼil. Qo ximen tiʼj aj kawil David, aju tzaj qʼaqʼin tkʼuʼj kyiʼj txqantl. Maske tajtoq Saúl tuʼn tkubʼ tbʼyoʼn David, tzaj qʼaqʼin tkʼuʼj David tiʼj tuʼnju otoq jaw skʼoʼn tuʼn Jehová ex mintiʼ aj tqʼoʼn t-xel nya bʼaʼn (1 Sam. 24:9-12, 18, 19).

18, 19. ¿Toj alkye ambʼil mintiʼ tzaj qʼaqʼin tkʼuʼj David kyiʼj txqantl?

¹⁸ Nya toj tkyaqil ambʼil kubʼ tyekʼin David qa tzaj qʼaqʼin tkʼuʼj kyiʼj txqantl. Jun techel, tej mintiʼ xi qʼoʼn twa David kyukʼil t-xjalil tuʼn Nabal ex tej tok ten yasil kyiʼj, tzaj tqʼoj David ex kubʼ t-ximen tuʼn tkubʼ tbʼyoʼn Nabal kyukʼil xjal ateʼ toj tja. Noq tuʼnju ten tnabʼil ex tpasens Abigaíl, aju t-xuʼjil Nabal, mintiʼ kubʼ tbʼinchaʼn David jun il ex mintiʼ el tiʼn kychkʼel xjal (1 Sam. 25:9-22, 32-35).

¹⁹ Toj juntl maj, xi tqʼamaʼn profeta Natán te David qa xi telqʼaʼn jun xjal qʼinun t-rit jun xjal mebʼa aju kʼujlaʼntoq tuʼn. Tzaj tqʼoj David ex tqʼama jlu: «Kxel nmaʼne teya jun nyole axix tok twitz Qman; aju xjal ma bʼant tuʼn ikju, bʼaʼn tuʼn tkyim» (2 Sam. 12:1-6). Ojtzqiʼntoq tuʼn David qa in tzajtoq tqʼamaʼn Tley Moisés qa iltoq tiʼj tuʼn t-xi tqʼoʼn jun xjal kyaje rit te t-xel jun qa ma txi telqʼaʼn (Éx. 22:1). Tuʼntzunju, tej t-xi tqʼamaʼn David qa iltoq tiʼj tuʼn tkubʼ bʼyoʼn xjal, ikʼ tibʼajju in tzaj tqʼamaʼntoq Ley. Noq ajbʼen techel lu tuʼn Natán tuʼn t-xi tqʼamaʼn te David qa mas nim il otoq bʼant tuʼn twitzju xjal qʼinun. Mas tzaj qʼaqʼin tkʼuʼj Jehová tiʼj David twitzju qʼaqʼbʼil tkʼuʼj David ten tiʼj xjal yolin Natán tiʼj toj techel (2 Sam. 12:7-13).

20. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn David?

²⁰ Tej ttzaj tqʼoj David, tqʼama qa iltoq tiʼj  tuʼn tkyim Nabal ex qe t-xjalil. Ex jun rat xi tqʼamaʼn te Natán qa iltoq tiʼj tuʼn tkyim xjal qʼinun. Ojtzqiʼn quʼn qa tbʼanel xjal te David, tuʼntzunju, jakulo kubʼ qximen tiquʼn kyuw tkastiw xjal qʼinun kubʼ tqʼoʼn. Qo ximen tiʼj tiʼtoq in bʼaj tiʼj David. Toj ambʼil aju, mintiʼtoq in tzalaj. Qa jun rat in kubʼ t-ximen jun xjal tuʼn tkubʼ tkastiw juntl tuʼnju otoq tzʼel txalpaj, in tzaj tyekʼin jlu qa nya bʼaʼn taʼ tamiwbʼil tukʼil Jehová. Kyaj tqʼamaʼn Jesús jlu: «Porke ik tzaʼn in che yoline tiʼj kyukʼile, ax ikxtzun kbʼel kysentense tuʼn Dios, ex ax ju malbʼil kʼajbʼel tuʼn Dios kyeye jatum in xi kymaloʼne te juntl» (Mat. 7:1, 2). Tuʼntzunju, bʼaʼn tuʼn tok tilil quʼn tuʼn tkubʼ qyekʼin tbʼanel qmod kyukʼil txqantl ex tuʼn ttzaj qʼaqʼin qkʼuʼj kyiʼj ik tzeʼn te Jehová.

21, 22. ¿Kyoj alkye ambʼil jaku kubʼ qyekʼin qa in tzaj qʼaqʼin qkʼuʼj kyiʼj txqantl?

²¹ Aj in tzaj qʼaqʼin qkʼuʼj kyiʼj txqantl, nya oʼkx in kubʼ qnaʼn jlu, sino il tiʼj tuʼn tkubʼ qyekʼin tukʼil qbʼinchbʼen. Qkyaqilx jaku qo ximen tiʼj tzeʼn jaku qo onin kyiʼj toj qja, kyiʼj erman ex kyiʼj xjal toj pakbʼabʼil. Aj tbʼant jlu quʼn, jakulo che kanet nim tumel quʼn tuʼn tkubʼ qyekʼin qʼaqʼbʼil qkʼuʼj. ¿Ojtzqiʼnpe jun xjal quʼn aju taj qʼuqbʼil tkʼuʼj? ¿Jakupe txi qiʼn chʼin twa jun erman moqa jaku qo onin tiʼj toj junjuntl tten? ¿Atpe jun erman tzma in meltzʼaj toj ttnam Jehová ex taj tuʼn t-xi qʼuqbʼet tkʼuʼj? ¿Jakupe txi qqʼamaʼn tbʼanel tqanil kye txqantl xjal? Atzun junjun tumel jaku kubʼ qyekʼin qa in tzaj qʼaqʼin qkʼuʼj kyiʼj txqantl (Job 29:12, 13; Rom. 10:14, 15; Sant. 1:27).

²² Qa in qo ximen tiʼjju in bʼaj kyiʼj txqantl, kʼelel qnikʼ tiʼj qa at nim tumel tuʼn tkubʼ qyekʼin qa in tzaj qʼaqʼin qkʼuʼj kyiʼj. Qa ma bʼant jlu quʼn, nim ktzalajel Jehová quʼn, aju Qtat at toj kyaʼj ex aju Dios at nimxix qʼaqʼbʼil tkʼuʼj.