1. ¿Tiquʼn in che tzalaj testigos de Jehová?

IN QO tzalaj tuʼnju testigo de Jehová qoʼ. Tok tbʼi Jehová qiʼj ex in kubʼ qyekʼin qa in qo ok te ttestiw tuʼnju in qo pakbʼan kye xjal ex in xi qqʼoʼn xnaqʼtzbʼil kye. In qo tzalaj aj qonin kyiʼj «kykyaqil qeju at jun tbʼanel kyanmi tuʼn tten kychwinqlal te jumajx» ex tuʼn kyok te tmajen Jehová (Hech. 13:48, TNM). Ax tzalajbʼil in kubʼ qnaʼn ik tzeʼn te Jesús tej kymeltzʼaj t-xnaqʼtzbʼen ex xi kyqʼamaʼn te aju otoq bʼaj kyiʼj toj pakbʼabʼil (Luc. 10:1, 17, 21).

2. ¿Tzeʼn in kubʼ qyekʼin qa nim toklen pakbʼabʼil toj qwitz?

² Nim toklen pakbʼabʼil toj qwitz. Xi tqʼoʼn apóstol Pablo consej jlu te Timoteo: «Kwentin ok tibʼa, ex qʼoʼnka kwent tiʼj ju xnaqʼtzbʼil in tqʼoʼna». Ex tqʼamatl jlu: «Qa ma tbʼinchaya jlu, axa ok kletel kyukʼix qeju in che bʼin tiʼj tyola» (1 Tim. 4:16). Tuʼn jlu in nel qnikʼ tiʼj qa jaku che klet junjun xjal tuʼnju in qo pakbʼan. In nok qkwentin qmod tuʼnju qaj tuʼn qanqʼin tjaqʼ Tkawbʼil Dios. Qaj tuʼn tjaw qnimsaʼn Jehová tukʼilju in bʼant quʼn ex qaj tuʼn tkubʼ qyekʼin qa in nok qe qkʼuʼj tiʼj tbʼanel tqanil in qo pakbʼan tiʼj (Filip. 1:27). Ex in nok qqʼoʼn qwiʼ tiʼj xnaqʼtzbʼil in xi qqʼoʼn kye xjal aj tbʼaj qbʼinchaʼn qten tiʼj pakbʼabʼil ex aj t-xi qqanin te Jehová tuʼn tonin qiʼj aj qyolin tiʼj Tyol.

3. ¿Alkye kymod xjal jaku kubʼ kyyekʼin tiʼj tbʼanel tqanil ex tiʼ techel in nonin qiʼj?

³ Maske in nok tilil quʼn tuʼn qpakbʼan, at maj oʼkx junjun xjal in nok kybʼiʼn tbʼanel tqanil moqa atlo maj ni jun. Qo ximen tiʼjju bʼaj tiʼj ermano Georg Lindal, aju pakbʼan tjunalx toj tnam te Islandia toj abʼqʼi 1929 a 1947. Kyaj tqʼoʼn nim uʼj kye xjal, pero ni jun ok te testigo de Jehová. Kubʼ ttzʼibʼin jlu: «Ateʼ junjun o tzʼel kyikʼun axix tok, atzun junjuntl mintiʼx jun tiʼ in kyqʼamaʼn». Yajxitl, e pon samaʼn misionero tuʼn kyonin tiʼj pakbʼabʼil, pero ax ikx  mintiʼ ok kyqʼoʼn xjal kywiʼ tiʼj tbʼanel tqanil. Tej tikʼ bʼeljaj abʼqʼi, xi kyqʼamaʼn junjun xjal te Jehová tuʼn kyajbʼen te ex e bautisarin. *

4. ¿Tiʼ jaku kubʼ qnaʼn qa mintiʼ in nok kybʼiʼn xjal tbʼanel tqanil?

⁴ Qa mintiʼ in nok kybʼiʼn xjal tbʼanel tqanil, in tzaj qbʼis. Jakulo kubʼ qnaʼn ik tzeʼn te Pablo tej tqʼama jlu: «Nim nbʼise at ex kukx tchyoʼn tuj wanmiye». Tqʼama jlu tuʼnju mintiʼ xi kynimen aj Judiy qa a Jesús ok te Mesías (Rom. 9:1-3). ¿Yajtzun qa in xi qqʼoʼn xnaqʼtzbʼil te jun xjal, pero mintiʼ in chʼiy toj tokslabʼil maske in nok tilil quʼn ex in qo naʼn Dios? ¿Tiʼ qximbʼetz ktel aj tkyaj qtzaqpiʼn tuʼn qxnaqʼtzan tukʼil? ¿Moqa tiʼ qximbʼetz ktel qa naʼmx qonin tiʼj jun xjal tuʼn tbautisarin? ¿Tzulpe qbʼis ex kbʼelpe qximen qa mintiʼ in tzaj tkʼiwlaʼn Jehová qaqʼun? Toj xnaqʼtzbʼil lu, kxel qqʼoʼn tzaqʼwebʼil kyiʼj kabʼe xjel lu: ¿Tiquʼn in nok qeʼ qkʼuʼj tiʼj qa in bʼant jun tbʼanel aqʼuntl quʼn? ¿Ex tiʼ qximbʼetz ktel tiʼj pakbʼabʼil?

5. ¿Tiquʼn at maj mintiʼ in nel bʼaʼn tkyaqilju in kubʼ qximen toj qajbʼebʼil te Jehová?

⁵ Aj tyolin Xjan Uʼj tiʼj jun xjal in kubʼ tbʼinchaʼn tajbʼil Dios, in tzaj tqʼamaʼn jlu: «Tkyaqilju in tbʼinchaʼn bʼaʼn nneʼla» (Sal. 1:3). Pero nya a t-xilen jlu qa tbʼanel kʼelel tkyaqilju in kubʼ qximen toj qajbʼebʼil te Jehová. Tuʼnju aj il qoʼ ex aj il qeʼ txqantl, «nimku yajbʼil in tzaj» toj qanqʼibʼil (Job 14:1). Ax ikx, at maj jaku tzʼel kyiʼn xjal ambʼil qe tuʼn qpakbʼan toj jun ambʼil (1 Cor. 16:9; 1 Tes. 2:18). Qa ikju, ¿tzeʼn in nel tnikʼ Jehová tiʼj qa in bʼant jun tbʼanel aqʼuntl quʼn? Qo xnaqʼtzan kyiʼj junjun nabʼil toj Tyol Dios jaku che onin qiʼj tuʼn t-xi qtzaqʼweʼn xjel lu.

6. ¿Tzeʼn in nel tnikʼ Jehová tiʼj qa in bʼant jun tbʼanel aqʼuntl quʼn?

⁶ In nok tqʼoʼn Jehová twitz tiʼj qa in nok tilil quʼn tuʼn tbʼant aqʼuntl. In kubʼ t-ximen Jehová qa in bʼant jun tbʼanel aqʼuntl quʼn tuʼnju in nok tilil quʼn tuʼn qpakbʼan ex tuʼnju in nok qkʼujlaʼn maske mintiʼ in nok kybʼiʼn xjal tbʼanel tqanil. Kubʼ ttzʼibʼin apóstol Pablo jlu: «Porke ate Dios tzʼaqlxix, mlay tzikʼ tnaʼl tuʼn aju kyaqʼunbʼene; xi kyyekʼune qa at kykʼujlalile tiʼj Dios tuʼnju e ajbʼene kye okslal ex kukx in che ajbʼene kye» (Heb. 6:10). Mintiʼ in nikʼ tnaʼl qaqʼunbʼen tuʼn Jehová ex aju qkʼujlabʼil in kubʼ qyekʼin tiʼj tbʼi maske naʼmx qonin tiʼj jun xjal tuʼn tbautisarin. Tuʼntzunju, aʼyex yol jaku txi qqʼamaʼn qiʼjx ik tzeʼn qe yol xi tqʼamaʼn Pablo kye okslal te Corinto: «Aju aqʼuntl in kybʼinchaʼne te Qajaw mya noqx gan» (1 Cor. 15:58). Ax tok qe yol lu maske mintiʼ in bʼant aqʼuntl ik tzeʼn ximen quʼn.

7. ¿Tiʼ xnaqʼtzbʼil jaku tzʼel qiʼn tiʼjju tqʼama apóstol Pablo tiʼj tpakbʼabʼil?

 ⁷ Bʼant jun tbʼanel aqʼuntl tuʼn Pablo tej tok te misionero ex onin tuʼn kyten kʼloj okslal kyoj nimku tnam. Noqtzun tuʼnj, ateʼ junjun okslal jaw kynimsan kyibʼ ex kyqʼama qa nya jun tbʼanel aj xnaqʼtzal Pablo. Maske ikju, mintiʼ tqʼama Pablo jteʼ xjal otoq tzʼonin kyiʼj tuʼn kybautisarin. Noq oʼkx tqʼama jlu: «Mas nim ma chin aqʼnane» (2 Cor. 11:23). Qkanoʼmil techel kyaj tqʼoʼn Pablo ex bʼaʼn tuʼn ttzaj qnaʼn qa mas nim toklen toj twitz Jehová tuʼn tok tilil quʼn tuʼn qpakbʼan.

8. ¿Tiʼ bʼaʼn tuʼn ttzaj qnaʼn aj qpakbʼan?

⁸ In tzalaj Jehová tiʼj qpakbʼabʼil. Jun maj, xi tsamaʼn Jesús 70 t-xnaqʼtzbʼen tuʼn kyxiʼ pakbʼal tiʼj Tkawbʼil Dios. In tzaj tqʼamaʼn Tyol Dios qa «in che tzalaj» tej kymeltzʼaj. ¿Tiquʼn in che tzalajtoq? Kyqʼama jlu: «Tat, ikx qe juʼẍ in qoʼx nimane kyuʼn noq tuʼn tipumal tbʼiya». Pero i ex kawin tuʼn Jesús tej t-xi tqʼamaʼn jlu kye: «Miʼn che jaw tzalaje tuʼnju in che nimanjtze kyuʼn juʼẍ, oʼkx che tzalajxe tuʼnju tzʼibʼan kybʼiye tuj kyaʼj» (Luc. 10:17-20). Ojtzqiʼntoq tuʼn Jesús qa nya tkyaqil maj kʼokel kybʼiʼn xjal tbʼanel tqanil. Kyxol qeju xjal e pakbʼan t-xnaqʼtzbʼen Jesús kye, mintiʼ ojtzqiʼn quʼn jteʼ kybʼet e ok te okslal. Tuʼn jlu in nel qnikʼ tiʼj qa nya oʼkx jakutoq che tzalaj t-xnaqʼtzbʼen Jesús tuʼnju e ok bʼiʼn kyuʼn xjal, sino tuʼnju tzalaj Jehová tej tok tilil kyuʼn tuʼn kypakbʼan.

9. Ik tzeʼn in tzaj tqʼamaʼn Gálatas 6:7 a 9, ¿tiʼ tzul qʼoʼn qe qa kukx ma qo pakbʼan?

⁹ Tzul qʼoʼn qchwinqlal te jumajx qa kukx ma qo pakbʼan. Aj tok tilil quʼn tuʼn qpakbʼan ex tuʼn qqʼon xnaqʼtzbʼil ik tzeʼn «tajbʼil Xewbʼaj Xjan», in xi qqʼoʼn ambʼil te tuʼn tonin qiʼj. Qa mintiʼ ma qo sikt, in ttzaj ttziyen Jehová qa ktzajel tqʼoʼn qchwinqlal te jumajx maske mintiʼ ma qo onin tiʼj jun xjal tuʼn tbautisarin (kjawil uʼjit Gálatas 6:7-9).

10. ¿Tiquʼn nya kykyaqil xjal in nok kybʼiʼn tbʼanel tqanil?

¹⁰ At toklen kymod xjal in kubʼ kyyekʼin tiʼj tbʼanel tqanil tukʼilju tkuʼx toj kyanmi. Tzaj tchikʼbʼaʼn Jesús jlu tej tyolin tiʼj jun xjal in nawan. Toj txʼolbʼabʼil lu, yolin Jesús tiʼj jun xjal kux tawan ijaj toj junxichaq wiq txʼotxʼ, pero oʼkx tzaj chʼiy ijaj kux tawan toj tbʼanel txʼotxʼ (Luc. 8:5-8). Tqʼama Jesús qa kubʼ techlaʼn junxichaq wiq txʼotxʼ kyanmi xjal tuʼnju junxichaq kymod in kubʼ kyyekʼin aj tok kybʼiʼn «tyol Dios» (Luc. 8:11-15). Ik tzeʼn in bʼaj tiʼj xjal in nawan, ax ikx qe mintiʼ ojtzqiʼn quʼn alkyeqe xjal at jun tbʼanel kyanmi. Tuʼntzunju, oʼkx qaj tuʼn tkux qawan iyaj tiʼj Tkawbʼil Dios. Ik tzeʼn tqʼama apóstol Pablo, «teyle junjun ok tkʼmaʼ chojbʼil te tiʼj ju taqʼunbʼen» ex nya tuʼnju in tzaj tuʼn taqʼunbʼen (1 Cor. 3:8).

11. ¿Tiquʼn jaku txi qqʼamaʼn qa bʼant jun tbʼanel aqʼuntl tuʼn Noé tej t-xi tqʼamaʼn «kye xjal tuʼn kybʼinchante aju tzʼaqlxix»? (Qʼonka twitza tiʼj tilbʼilal tok tiʼj t-xkʼomil).

¹¹ Atxix toj ambʼil ojtxe, o tzʼok tilil kyuʼn tmajen Jehová tuʼn kypakbʼan kye xjal maske mintiʼ in che ok bʼiʼn. Jun techel, «xi tpakbʼaʼn Noé kye xjal tuʼn kybʼinchante aju tzʼaqlxix» toj nimku ambʼil (2 Ped. 2:5). Bʼalo tajtoq Noé tuʼn tok bʼiʼn kyuʼn xjal, pero mintiʼ xi tqʼamaʼn Jehová te qa atzun jlu tuʼn tbʼaj. Sino xi tqʼamaʼn Jehová tqanil lu te tej tkubʼ tbʼinchaʼn ark: «Kʼokexa tuj matij barc kyukʼix qe tkyʼajala, tukʼix t-xuʼjila ex qe tlibʼa»  (Gén. 6:18). Tuʼnju nya matij ark xi tqʼamaʼn Jehová te Noé tuʼn tkubʼ tbʼinchaʼn, el-lo tnikʼ tiʼj qa nya nimtoq xjal kʼokel kybʼiʼn tyol Jehová (Gén. 6:15). Ex atzun jlu bʼaj. Ni jun xjal ok tqʼoʼn twiʼ tiʼj tqanil xi tqʼamaʼn Noé (Gén. 7:7). ¿Kubʼpe t-ximen Jehová qa mintiʼ bʼant jun tbʼanel taqʼun Noé? Mintiʼ. Sino kubʼ t-ximen qa bʼant jun tbʼanel aqʼuntl tuʼn tuʼnju xi tbʼiʼn tkyaqilju xi tqʼamaʼn te (Gén. 6:22).

12. ¿Tiʼ bʼant tuʼn Jeremías tuʼn ttzalaj tiʼj pakbʼabʼil maske mintiʼ ok bʼiʼn kyuʼn xjal ex el ikʼun?

¹² Ax ikx te profeta Jeremías, pakbʼan nim abʼqʼi kye xjal maske mintiʼ ok bʼiʼn kyuʼn, el ikʼun ex e xmayin tiʼj. Tuʼn tkyaqil jlu tzaj bʼaj tkʼuʼj Jeremías ex kubʼ t-ximen tuʼn ya miʼn tpakbʼan (Jer. 20:8, 9). Pero mintiʼ kubʼ numj Jeremías. ¿Tiʼtzun onin tiʼj tuʼn miʼn tten nya bʼaʼn t-ximbʼetz ex tuʼn kukx ttzalaj tiʼj pakbʼabʼil? Ok tqʼoʼn twiʼ tiʼj kabʼe tiʼ nim toklen. Tnejel, ximen tiʼj qa jakutoq tzʼonin kyiʼj xjal tuʼn tten qʼuqbʼil kykʼuʼj qa kukx ma pakbʼan (Jer. 29:11). Ex tkabʼin, otoq jaw skʼoʼn tuʼn Jehová tuʼn tyolin tiʼj tbʼi (Jer. 15:16). Ax jlu in bʼant quʼn toj ambʼil jaʼlo, in qo onin kyiʼj xjal tuʼn tten jun qʼuqbʼil kykʼuʼj ex tok tbʼi Jehová qiʼj tuʼnju o qo ok te ttestiw. Qa ma tzʼok qqʼoʼn qwiʼ kyiʼj kabʼe tiʼ lu, kʼonil qiʼj tuʼn qtzalaj tiʼj pakbʼabʼil maske mintiʼ in qo ok bʼiʼn kyuʼn xjal.

13. ¿Tiʼ xnaqʼtzbʼil jaku tzʼel qiʼn tiʼj txʼolbʼabʼil yolin Jesús tiʼj toj Marcos 4:26 a 29?

¹³ In xi tiʼn ambʼil tuʼn tchʼiy jun xjal toj tokslabʼil. Yolin Jesús tiʼj jlu toj txʼolbʼabʼil tiʼj xjal in awan ex yajxitl in xiʼ jtal (kjawil uʼjit Marcos 4:26-29). Chebʼe chebʼe ok tqʼoʼn xjal twitz tiʼj taqʼunbʼen ex mlaytoq bʼant jun tiʼ tuʼn tuʼn tel naj twitz tawal. Chʼixme ax jlu jaku bʼaj qiʼj, jakulo txi tiʼn ambʼil tuʼn tok qqʼoʼn qwitz tiʼj qa in kubʼ tanqʼiʼn xjal aju in nel tnikʼ tiʼj. Mlay bʼant jun tiʼ tuʼn jun xjal tuʼn tchʼiy naj tawal ik tzeʼn taj, ax ikx qe mlay bʼant tuʼn tok q-obligarin jun xjal tuʼn tchʼiy toj tokslabʼil ik tzeʼn qaj. Tuʼntzunju, miʼn tzaj bʼaj qkʼuʼj ex kukx qqʼonk tilil tuʼn qonin tiʼj jun xjal maske chebʼe chebʼe in chʼiy toj tokslabʼil. Nim toklen tuʼn tten qpasens aj qpakbʼan ex aj qqʼon xnaqʼtzbʼil (Sant. 5:7, 8).

14. ¿Alkye techel in tzaj tyekʼin qa jaku txi tiʼn ambʼil tuʼn tok kybʼiʼn xjal tbʼanel tqanil?

¹⁴ Kyoj junjun lugar, at maj in xi tiʼn nim ambʼil tuʼn tbautisarin jun xjal. Qo xnaqʼtzan tiʼjju bʼaj kyiʼj kabʼe ermana kyitzʼin kyibʼ te Canadá aju Gladys ex Ruby Allen kybʼi. Toj 1959, xi qʼoʼn kyoklen te precursora regular ex i ex samaʼn tuʼn kypakbʼan toj jun lugar te Quebec. * In che xobʼtoq xjal kye pal te Iglesia católica ex tiʼjju jakutoq kubʼ kyximen txqantl qa ma tzʼok kybʼiʼn tbʼanel tqanil. Tuʼntzunju, mintiʼ ok kyqʼoʼn kywiʼ kyiʼj ermana tej kypakbʼan. Tqʼama Gladys jlu: «Toj kabʼe abʼqʼi, o pakbʼane 8 or junjun qʼij ttziʼ kyja xjal ex ni jun ok bʼinte qeye. Oʼkx etz kykeʼyin qoʼye ttzi ja ex in nokxtoq kyewin kyibʼ. Pero mintiʼ xi qqʼoʼne ambʼil tuʼn qsikte». Tej tikʼ ambʼil, chʼexpaj kymod xjal ex ok kybʼiʼn tbʼanel tqanil. Toj ambʼil jaʼlo, at oxe kʼloj okslal toj lugar aju (Is. 60:22).

15. ¿Tiʼ in tzaj tyekʼin 1 Corintios 3:6 ex 7 qe tiʼjju tuʼn qonin tuʼn kyok xjal te t-xnaqʼtzbʼen Jesús?

¹⁵ Nim toklen tuʼn qaqʼunan junx tuʼn kyok xjal te t-xnaqʼtzbʼen Jesús. O tzʼel qnikʼ tiʼj qa nim toklen tuʼn tonin jun kʼloj  okslal tuʼn tbautisarin jun xjal (kjawil uʼjit 1 Corintios 3:6, 7). Jun techel, jakulo kyaj tqʼoʼn jun erman jun tratado moqa jun revista te jun xjal taj tuʼn tel mas tnikʼ tiʼj Tyol Jehová. Noqtzun tuʼnj, mintiʼ ambʼil tiʼj erman tuʼn tmeltzʼaj tukʼil. Tuʼntzunju, in xi tqanin onbʼil te juntl erman. In xi tzyet tuʼn t-xnaqʼtzan erman lu tukʼil xjal ex in xi tqʼoʼn txokbʼil kyiʼj junjuntl erman tuʼn kyxiʼ qʼol xnaqʼtzbʼil tukʼil, ex junxichaq tten in che onin erman tiʼj xjal. Teyele junjun erman in nok tojtzqiʼn xjal ex in nonin tiʼj tuʼn tchʼiy toj tokslabʼil. Ik tzeʼn tqʼama Jesús, qkyaqilx jaku qo tzalaj aj qonin tiʼj jun xjal tuʼn tok te t-xnaqʼtzbʼen (Juan 4:35-38).

16. Maske ya mintiʼ tipumala moqa at jun yabʼil tiʼja, ¿tiquʼn jaku tzalaja tiʼj pakbʼabʼil?

¹⁶ ¿Yajtzun qa mintiʼ in pakbʼana moqa mintiʼ in qʼona xnaqʼtzbʼil ik tzeʼn ojtxe tuʼnju ya mintiʼ tipumala moqa tuʼnju at jun yabʼil tiʼja? Maske ikju, jaku tzalaja tiʼjju jaku bʼant tuʼna toj taqʼun Jehová. Qo xnaqʼtzan tiʼjju bʼaj tiʼj aj kawil David ex qe xjal in che bʼettoq tukʼil. Jun maj, xi elqʼaʼn qe tiʼchaq kye ex xi secuestrarin qe toj kyja. Otoq che sikt kabʼe syent xjal ex mlaytoq bʼant tuʼn kyxiʼ toj qʼoj. Tuʼntzunju, ax e kyaj ten xjal lu xqʼuqil junjuntl tiʼchaq kye. Atzun kye txqantl, i ex lepeʼ kyiʼj xjal tuʼn kyklet qe toj kyja ex qe tiʼchaq kye. Tejtzun kymeltzʼaj toj qʼoj, tqʼama David qa parej tuʼn t-xi sipet qe tiʼchaq kyxol (1 Sam. 30:21-25). Ax jlu in bʼaj toj ambʼil jaʼlo, teyele junjun qe in xi qqʼoʼn aju mas tbʼanel te Jehová, axpe ikx teya. Tuʼntzunju, qkyaqilx jaku qo tzalaj aj tklet jun xjal ex aj qonin tiʼj tuʼn tbʼet toj bʼe te chwinqlal.

17. ¿Tiquʼn bʼaʼn tuʼn t-xi qqʼoʼn chjonte te Jehová?

¹⁷ In xi qqʼoʼn chjonte te Jehová tuʼnju in nok tqʼoʼn toklen qajbʼebʼil te. Ojtzqiʼn tuʼn qa mlay tzʼok q-obligarin qe xjal tuʼn tok kybʼiʼn tbʼanel tqanil ex tuʼn kyajbʼen te. Pero in qo tzaj tkʼiwlaʼn tuʼnju in nok tilil quʼn ex tuʼnju in kubʼ qyekʼin qkʼujlabʼil tiʼj. Ax ikx in nonin qiʼj tuʼn qtzalaj tiʼjju jaku bʼant quʼn toj pakbʼabʼil (Juan 14:12). Miʼn tzikʼ tnaʼl quʼn qa ktzalajel Jehová qiʼj qa kukx ma tzʼok tilil quʼn.