1, 2. ¿Tiʼ junxitl bʼant tuʼn Acab ex Manasés, ex alkye xjel kxel qtzaqʼweʼn?

QO YOLIN kyiʼj kabʼe aj kawil in yolin Tyol Dios tiʼj. Jun kawin toj tnam Israel ex kawin kyibʼaj lajaj kʼloj xjal, atzun juntl toj tnam Judá ex kawin kyibʼaj kabʼe kʼloj xjal. Maske mintiʼ e anqʼin aj kawil lu toj ax ambʼil, pero aʼyex tiʼchaq bʼaj kyiʼj. Kykabʼil mintiʼ e nimen te Jehová ex tuʼn kypaj e bʼinchan xjal il, e kʼulin kywitz nya ax tok dios ex kubʼ kybʼyoʼn xjal. Pero at jun tiʼ junxitl bʼant kyuʼn. Jun kukx bʼinchan il tzmaxi tej tkyim, atzunte juntl ajtz tiʼj tanmi ex kubʼ najsaʼn til. ¿Alqiʼj in qo yolin? Atz in qo yolin tiʼj aj kawil Acab ex tiʼj Manasés.

² Atz kawin Acab toj tnam Israel, atzunte Manasés toj tnam Judá. Aju bʼaj kyiʼj kabʼe xjal lu, in tzaj tyekʼin jun xnaqʼtzbʼil nim toklen qe tiʼjju tuʼn tajtz tiʼj qanmi (Hech. 17:30; Rom. 3:23). ¿Tiʼ t-xilen tuʼn tajtz tiʼj qanmi ex tzeʼn in kubʼ qyekʼin? Nim toklen tuʼn tel qnikʼ tiʼj jlu tuʼnju qkyaqilx qaj tuʼn tkubʼ tnajsaʼn Jehová qil aj qel txalpaj. Tuʼn t-xi qtzaqʼweʼn xjel lu, qo xnaqʼtzan tiʼjju bʼaj toj kyanqʼibʼil xjal lu ex tiʼ xnaqʼtzbʼil jaku tzʼel qiʼn kyiʼj. Yajxitl, qo xnaqʼtzal tiʼjju tqʼama Jesús tiʼjju tuʼn tajtz tiʼj qanmi.

3. ¿Tiʼ bʼant tuʼn Acab tej tkawin?

³ Ok Acab te twuqin aj kawil toj tnam Israel. Kubʼ mojeʼ tukʼil Jezabel, jun kyxol qe tmeʼjel aj kawil te Sidón, jun tnam qʼinun tok jawni tiʼj tnam Israel. Bʼalo onin mejebʼleʼn lu tuʼn tten mas kyqʼinumabʼil xjal, pero ax ikx tzaj tiʼn nya bʼaʼn tiʼj kyamiwbʼil tukʼil Jehová. In kʼulintoq Jezabel  twitz Baal ex ok tilil tuʼn tuʼn tkubʼ kykʼuʼj xjal tuʼn Acab tuʼn tbʼant axju kyuʼn. Tej kykʼulin xjal twitz Baal, in che yaẍintoq kyoj templo ex kubʼ kypatin qe kʼwal te chojbʼil. Toj ambʼil tej tkawin xuʼj lu, jakutoq tzaj nya bʼaʼn kyiʼj kykyaqil tprofeta Jehová. Axpe ikx, xi tqʼamaʼn tuʼn kykubʼ bʼyoʼn nim kye (1 Rey. 18:13). «Aju tbʼinchbʼen Acab mya bʼaʼn ela tuj twitz Qman, ex masxix mya bʼaʼn o tbʼincha kywitz qe txqantl rey, aqeju otoq che ten nej twitz» (1 Rey. 16:30). Ok tqʼoʼn Jehová twitz tiʼjju in bʼanttoq tuʼn Acab ex Jezabel, ex tzaj qʼaqʼin tkʼuʼj kyiʼj tmajen, tuʼntzunju xi tsamaʼn profeta Elías tuʼn tonin tiʼj Acab tuʼn tchʼexpaj tmod. Noqtzun tuʼnj, mintiʼ xi tbʼiʼn Acab ex Jezabel tyol Jehová.

4. ¿Tiʼ nya bʼaʼn tqanil xi qʼamaʼn te Acab ex tiʼ tmod kubʼ tyekʼin?

⁴ Tej tikʼ ambʼil, bʼaj tpasens Jehová tiʼj Acab ex Jezabel. Tuʼntzunju, xi tsamaʼn Elías tuʼn t-xi tqʼamaʼn kye qa che kyimeltoq kykyaqilx toj kyja. Tej tok tbʼiʼn Acab tyol profeta Elías, tzaj tbʼis. Noq minabʼen kubʼ tin tibʼ Acab (1 Rey. 21:19-29).

5, 6. ¿Tiquʼn in xi qqʼamaʼn qa nya ax tok ajtz tiʼj tanmi Acab?

⁵ Kubʼ tin tibʼ Acab tej tok tbʼiʼn nya bʼaʼn tqanil xi qʼamaʼn te, pero kubʼ tyekʼin qa nya ax tok otoq tzʼajtz tiʼj tanmi. Kukx xi tqʼoʼn ambʼil kye xjal tuʼn kykʼulin te Baal ex mintiʼ xi tqʼamaʼn kye tuʼn kykʼulin te Jehová. Axpe ikx kubʼ tbʼinchaʼn junjuntl tiʼchaq aju kubʼ tyekʼin qa mintiʼ otoq tzʼajtz tiʼj tanmi.

⁶ Tej tikʼ ambʼil xi tqanin Acab onbʼil te Jehosafat, aju aj kawil te Judá, tuʼn tqʼojin tukʼil kyiʼj xjal te Siria. Xi tqʼamaʼn Jehosafat te Acab tuʼn t-xi tqanin onbʼil tnejel te jun tprofeta Jehová. Nya bʼaʼn ela jlu toj twitz Acab ex tqʼama jlu: «Atx juntl xjal bʼaʼn tuʼn t-xi qqanin te alkye tajbʼil Qman, atzun Micaías aju tkyʼajal Imla, ex ikʼun jlu wuʼne porke mintiʼ in tzaj tmaʼn jun yol bʼaʼn weye, noq oʼkx jun yol mya bʼaʼn in tzaj tmaʼn». Maske tqʼama Acab jlu, e yolin tukʼil Micaya ex xi tqʼamaʼn te Acab qa tzul nya bʼaʼn tiʼj Acab. Mintiʼ ajtz tiʼj tanmi Acab ex mintiʼ xi tqanin najsam te Jehová ex okx tqʼoʼn Micaya toj cárcel (1 Rey. 22:7-9, 23, 27). Maske okx tqʼoʼn Acab Micaya toj cárcel, kukx japun twi tyol Jehová. Tej t-xiʼ toj qʼoj, kubʼ bʼyoʼn (1 Rey. 22:34-38).

7. ¿Tiʼ tqʼama Jehová tiʼj Acab tej otoqxi kyim?

⁷ Tej otoqxi kyim Acab, tqʼama Jehová tiʼtoq t-ximbʼetz at tiʼj. Tej tmeltzʼaj aj kawil Jehosafat tja ex mintiʼ jun tiʼ otoq bʼaj tiʼj, xi tsamaʼn Jehová profeta Jehú tuʼn t-xi tkawin tuʼnju otoq tzʼok tmojbʼan tibʼ tukʼil Acab. Xi tqʼamaʼn jlu te: «¿Tiquʼn ma onina tiʼj ju xjal mya bʼaʼn ex ma tzʼok tmojbʼan tibʼa kyukʼil qe xjal in che ikʼun tiʼj Qman?» (2 Crón. 19:1, 2). Qo ximen tiʼj jlu, noqwit ajtz tiʼj tanmi Acab mintiʼwtlo tqʼama profeta Jehú qa ten kyxol nya bʼaʼn xjal ex kyxol qeju ikʼun Jehová kyuʼn. Tuʼn jlu, in nel qnikʼ tiʼj qa nya ax tok ajtz tiʼj tanmi Acab maske tzaj chʼin tbʼis tiʼjju otoq bʼant tuʼn.

8. ¿Tiʼ xnaqʼtzbʼil in nel qiʼn tiʼj Acab tiʼjju tuʼn tajtz tiʼj qanmi?

⁸ ¿Tiʼ xnaqʼtzbʼil in nel qiʼn tiʼjju bʼaj tiʼj Acab? Tej t-xi tqʼamaʼn Elías te Acab qa ktzajeltoq nya bʼaʼn kyiʼj toj tja, tzaj tbʼis. Toj tumel tej tbʼant jlu tuʼn, pero mintiʼ kubʼ tyekʼin tukʼil tbʼinchbʼen qa ax tok ajtz tiʼj tanmi. Tuʼntzunju, tuʼn tkubʼ qyekʼin qa in najtz tiʼj qanmi, nya oʼkx tuʼn t-xi qqʼamaʼn qa in tzaj chʼin qbʼis tiʼjju otoq bʼant quʼn. Qo xnaqʼtzan tiʼj juntl  techel aju kʼonil qiʼj tuʼn tel qnikʼ tiʼj tiʼ t-xilen tuʼn tajtz tiʼj qanmi.

9. ¿Tiʼ bʼant tuʼn Manasés tej tok te aj kawil?

⁹ Tej tikʼ junlo 200 abʼqʼi, ok Manasés te aj kawil toj tnam Judá. Bʼalo mas nim il bʼant tuʼn twitzju bʼant tuʼn Acab. In tzaj tqʼamaʼn Tyol Dios jlu: «Jumajx mya bʼaʼn e ela qe tbʼinchbʼen tuj twitz Qman, ex tuʼn jlu tzaj tqʼoj Qman tiʼj» (2 Crón. 33:1-9). Jaw tbʼinchaʼn Manasés qe altar tuʼn kykʼulin xjal kywitz nya ax tok dios, axpe ikx okx tqʼoʼn jun sant toj tja Jehová ex atlo toklen tukʼil yaẍbʼil. Ajbʼen magia tuʼn ex kyaqʼun chman moqa aj yoʼẍ. Ax ikx, «e kubʼ tbʼyoʼn Manasés nimku xjal mintiʼ kyil» ex «kubʼ tpatun tkʼwaʼl te chojbʼil» kywitz dios nya ax tok (2 Rey. 21:6, 7, 10, 11, 16).

10. ¿Tzeʼn xi tkawin Jehová Manasés ex tiʼ tmod kubʼ tyekʼin?

¹⁰ Ik tzeʼn bʼant tuʼn Acab, mintiʼ xi tbʼiʼn Manasés qe kawbʼil xi qʼoʼn te kyuʼn tprofeta Jehová. «Tuʼntzun jlu e tzaj tiʼn Qman qe nejenel kye t-soldad rey te Asiria [tiʼj Judá], tzyet Manasés kyuʼn, ok kyqʼoʼn kʼuxbʼil tqul tqʼabʼ, bʼaj kykʼaloʼn tuʼn caden qʼan kʼuxbʼil ex xi kyiʼn tuj Babilonia». Tej tokx qʼoʼn Manasés toj cárcel toj tnam Babilonia, bʼalo ximen tiʼjju otoq bʼant tuʼn. «Kubʼ tmansinxix tibʼ twitz Dios aju Kydios qtzan t-xeʼchel». Pero nya oʼkx jlu bʼant tuʼn Manasés, sino kukx «ok ten naʼl Dios». Ok tilil tuʼn tuʼn tchʼexpaj tmod. «Eltzun tnikʼ Manasés tiʼj, ate Qman aju Dios axix tok» ex kukx naʼn Dios te (2 Crón. 33:10-13).

11. ¿Tzeʼn kubʼ tyekʼin Manasés qa ax tok ajtz tiʼj tanmi? (2 Crónicas 33:15, 16).

¹¹ Tej tbʼet ambʼil, tzaj ttzaqʼweʼn Jehová tnaʼj Dios Manasés. El tnikʼ tiʼj qa otoq chʼexpaj tanmi ex kubʼ tyekʼin jlu toj tnaʼj Dios. Tzaj qʼaqʼan tkʼuʼj Jehová tiʼj ex xi tqʼoʼn ambʼil te tuʼn tkawin juntl maj. Ok tilil tuʼn Manasés tuʼn tkubʼ tyekʼin qa ax tok otoq tzʼajtz tiʼj tanmi. Junxitl bʼant tuʼn Manasés twitz Acab, chʼexpaj tmod, el tiʼn kʼulbʼil nya ax tok ex xi tqʼamaʼn kye xjal tuʼn kykʼulin te Jehová (kjawil uʼjit 2 Crónicas 33:15, 16). Jaku txi qqʼamaʼn qa ten nim qʼuqbʼil tkʼuʼj Manasés ex tipumal tuʼn tbʼant jlu tuʼn tuʼnju otoq kubʼ tqʼoʼn jun nya bʼaʼn techel kywitz toj tja, kywitz xjal ex kywitz qeju at kyoklen. Tej ttijen, ok tilil tuʼn tuʼn tel tiʼn aju nya bʼaʼn otoq bʼant tuʼn ex oninlo tiʼj Josías, aju ok te jun tbʼanel aj kawil (2 Rey. 22:1, 2).

12. ¿Tiʼ xnaqʼtzbʼil in nel qiʼn tiʼj Manasés tiʼjju tuʼn tajtz tiʼj qanmi?

¹² ¿Tiʼ xnaqʼtzbʼil in nel qiʼn tiʼjju bʼaj tiʼj Manasés? Nya oʼkx tzaj tbʼis Manasés, sino ax ikx naʼn Dios, kubʼsan twitz Jehová  tuʼn ttzaj qʼaqʼan tkʼuʼj tiʼj ex kubʼ tchʼexpuʼn tmod. Nya oʼkxju, ax ikx ok tilil tuʼn tuʼn tkyaj nya bʼaʼn toj ttxolil, tuʼn tkʼulin te Jehová ex onin kyiʼj xjal tuʼn tbʼant axju kyuʼn. Aju bʼaj tiʼj Manasés, jaku txi tqʼuqbʼaʼn tkʼuʼj alkyexku erman maske otoq bʼant nim il tuʼn. In tzaj tyekʼin qa tbʼanel te Jehová tmod ex qa in kubʼ tnajsaʼn kyil xjal (Sal. 86:5). Qa ax tok in najtz tiʼj tanmi jun erman, jaku kubʼ najsaʼn til tuʼn Jehová.

13. ¿Alkye techel in nonin qiʼj tuʼn tel qnikʼ tiʼj tiʼ t-xilen tuʼn tajtz tiʼj qanmi?

¹³ Ik tzeʼn ma tzʼel qnikʼ tiʼj, nya oʼkx tzaj tbʼis Manasés tiʼjju otoq bʼant tuʼn. A jlu in tzaj tyekʼin jun xnaqʼtzbʼil nim toklen qe tiʼjju tuʼn tajtz tiʼj qanmi. Tuʼn tel qnikʼ tiʼj, qo xnaqʼtzan tiʼj jun techel. Qo ximen tiʼj qa ma qoʼx loqʼel jun pastel toj jun panadería. Pero aj t-xi qqanin, oʼkx in tzaj qʼoʼn jos qe. ¿Jakupe qo tzalaj tuʼn jlu? Mlay. ¿Yajtzun qa ma tzaj qʼamaʼn qe qa nimxix toklen jos tuʼn tbʼant pastel? Ax ikx mlaylo qo tzalaj tuʼn jlu. Chʼixme ax jlu in bʼaj tiʼj jun xjal aj tkubʼ tbʼinchaʼn jun matij il. In xi tqanin Jehová te tuʼn tajtz tiʼj tanmi tuʼn tkyaqil tkʼuʼj. Toj tumel qa ma tzaj tbʼis tiʼjju otoq bʼant, tuʼnju in kubʼ tyekʼin qa in najtz tiʼj tanmi. Pero nya oʼkx jlu tuʼn tbʼant tuʼn. Tuʼn tel qnikʼ tiʼj tiʼ mas jaku bʼant tuʼn, qo xnaqʼtzan tiʼj jun techel yolin Jesús tiʼj.

14. ¿Tzeʼn kubʼ tyekʼin kʼwalbʼaj yolin Jesús tiʼj qa otoq tzʼajtz tiʼj tanmi?

¹⁴ Yolin Jesús tiʼj jun txʼolbʼabʼil tiʼj jun kʼwal el tzpet, aju in jaw quʼjin toj Lucas 15:11 a 32. Mintiʼ nimen kʼwal te tman, kyaj tkolin tja ex «xiʼ tuj juntl tnam najchaq». Tej tpon toj juntl tnam, bʼant nim nya bʼaʼn tuʼn. Tejtzun ttzaj nya bʼaʼn tiʼj, ok ten ximel tiʼjju otoq bʼant tuʼn ex ok ten ximel tiʼj tbʼanel tanqʼibʼil attoq tja tman. Ik tzeʼn tqʼama Jesús «ultzun tiʼj tkʼuʼj». Tuʼntzunju, kubʼ t-ximen tuʼn tmeltzʼaj tja tman ex tuʼn t-xi tqanin najsam te. Nimtoq toklen tuʼn tel tnikʼ tiʼj qa otoq tzʼel txalpaj, pero nya oʼkxtoq jlu tuʼn tbʼant tuʼn. Iltoq tiʼj tuʼn kybʼant chʼixpubʼil tuʼn.

15. ¿Tiʼ bʼant tuʼn kʼwalbʼaj yolin Jesús tiʼj tuʼn tkubʼ tyekʼin qa ax tok otoq tzʼajtz tiʼj tanmi?

¹⁵ ¿Tzeʼn kubʼ tyekʼin kʼwalbʼaj qa ax tok otoq tzʼajtz tiʼj tanmi? Kubʼ t-ximen tuʼn tmeltzʼaj tja. Tej tpon ex tej tok tkeʼyin tman, xi tqʼamaʼn jlu te: «Tat, ma chin bʼinchane il twitz Dios, ax ikx twitza; mya bʼaʼn qintle tuʼn tok nbʼiye tkʼwaʼla» (Luc. 15:21). Tukʼilju tqʼama, kubʼ tyekʼin qa tajtoq tuʼn tten juntl maj tamiwbʼil tukʼil Jehová. Ax ikx el tnikʼ tiʼj qa otoq tzaj tbʼis tman tuʼn. Ex ok tilil tuʼn tuʼn ttzalaj tman tiʼj juntl maj, axpe ikx tqʼama qa jakutoq  tzʼok ik tzeʼn jun tmajen (Luc. 15:19). Nya oʼkx jun tbʼanel txʼolbʼabʼil lu, sino in tzaj tyekʼin junjun tbʼanel nabʼil jaku che onin kyiʼj ansyan tuʼn tel kynikʼ tiʼj qa ax tok otoq tzʼajtz tiʼj tanmi jun erman otoq bʼinchan jun matij il.

16. ¿Tiquʼn at maj kwest tuʼn tel kynikʼ ansyan tiʼj qa ax tok otoq tzʼajtz tiʼj tanmi jun erman?

¹⁶ Kwest tuʼn tel kynikʼ ansyan tiʼj qa ax tok otoq tzʼajtz tiʼj tanmi jun erman tuʼnju mintiʼ in nel kynikʼ tiʼjju tkuʼx toj tanmi. Tuʼntzunju, in nok tilil kyuʼn ansyan tuʼn telxix kynikʼ tiʼj qa otoq chʼexpaj tmod ex qa in nel tikʼun aju nya bʼaʼn otoq bʼant tuʼn. At maj, mintiʼxix in nel kynikʼ ansyan tiʼj qa otoq tzʼajtz tiʼj tanmi jun erman tuʼnju otoq bʼant jun matij il tuʼn.

17. a) ¿Alkye techel in tzaj tyekʼin qa mintiʼlo otoq tzʼajtz tiʼj tanmi jun xjal maske in kubʼ tyekʼin qa in tzaj tbʼis? b) ¿Tiʼ il tiʼj tuʼn tbʼant tuʼn jun xjal tuʼn tkubʼ tyekʼin qa ax tok otoq tzʼajtz tiʼj tanmi? (2 Corintios 7:11).

¹⁷ Qo yolin tiʼj jun techel. In yaẍin jun erman toj nimku ambʼil. In kubʼ tewin til twitz t-xuʼjil, kywitz tamiw ex kywitz ansyan. Pero in pon jun qʼij jatumel in nok kybʼiʼn ansyan aju in bʼant tuʼn. Aj t-xi kyqʼamaʼn ansyan te qa at yekʼbʼil tiʼj qa in yaẍin, mintiʼ in kubʼ tewin til ex in tzajlo tbʼis tiʼjju otoq bʼant tuʼn. ¿In tzajpe tyekʼin jlu qa otoq tzʼajtz tiʼj tanmi? Mintiʼ. Sino il tiʼj tuʼn tbʼant junjuntl tiʼchaq tuʼn. Nya oʼkx jun maj el txalpaj erman lu, sino kubʼ t-ximen tuʼn tkubʼ tbʼinchaʼn nya bʼaʼn toj nimku ambʼil. Ax ikx, mintiʼ xi qʼamalte qa otoq bʼinchan il, sino junxitl erman xi qʼamante kye ansyan. Tuʼntzunju, il tiʼj tuʼn telxix kynikʼ ansyan tiʼj qa ax tok otoq chʼexpaj t-ximbʼetz ex tbʼinchbʼen (kjawil uʼjit 2 Corintios 7:11). Bʼalo kxel tiʼn ambʼil tuʼn kybʼant chʼixpubʼil tuʼn ex tuʼn tkubʼ tyekʼin qa otoq tzʼajtz tiʼj tanmi. Tuʼntzunju, il-lo tiʼj tuʼn tex lajet toj ttnam Jehová (1 Cor. 5:11-13; 6:9, 10).

18. ¿Tzeʼn in kubʼ tyekʼin jun xjal o tzʼex lajoʼn toj ttnam Jehová qa ax tok otoq tzʼajtz tiʼj tanmi?

¹⁸ ¿Tzeʼn in kubʼ tyekʼin jun xjal o tzʼex lajoʼn toj ttnam Jehová qa ax tok otoq tzʼajtz tiʼj tanmi? Nim toklen tuʼn kukx tbʼet kyoj chmabʼil ex tuʼn t-xi tbʼiʼn nabʼil in xi kyqʼoʼn ansyan te tuʼn kukx tnaʼn Dios ex tuʼn t-xnaqʼtzan tiʼj Xjan Uʼj. Ax ikx, il tiʼj tuʼn tok t-xqʼuqin tibʼ kyiʼj tiʼchaq jaku kubʼ tzʼaq juntl maj tuʼn. Qa ma tzʼok tilil tuʼn tuʼn tten juntl maj tamiwbʼil tukʼil Jehová, jaku tzʼok qeʼ tkʼuʼj tiʼj qa kbʼel najsaʼn til tuʼn ex qa che onil ansyan tiʼj tuʼn tmeltzʼaj juntl maj toj kʼloj okslal. Ojtzqiʼn kyuʼn ansyan qa junxichaq tiʼ in bʼaj kyiʼj erman in che bʼinchan il, tuʼntzunju, in ten kynabʼil aj t-xi kybʼinchaʼn tiʼj jun nya bʼaʼn.

19. ¿Tiʼ kbʼantel tuʼn jun erman tuʼn tkubʼ tyekʼin qa ax tok o tzʼajtz tiʼj tanmi? (Ezequiel 33:14-16).

 ¹⁹ Ik tzeʼn ma tzʼel qnikʼ tiʼj, tuʼn tkubʼ tyekʼin jun aj il qa otoq tzʼajtz tiʼj tanmi, nya oʼkx tuʼn t-xi tqʼamaʼn qa in tzaj tbʼis tiʼjju otoq bʼant tuʼn, sino ax ikx il tiʼj tuʼn tkubʼ tyekʼin tukʼil tbʼinchbʼen qa o kubʼ tchʼixpuʼn t-ximbʼetz ex tmod. Il tiʼj tuʼn tkyaj ttzaqpiʼn nya bʼaʼn tbʼinchbʼen ex il tiʼj tuʼn t-xi tnimen qe tkawbʼil Jehová (kjawil uʼjit Ezequiel 33:14-16). Aju mas nim toklen tuʼn tkubʼ t-ximen, aju tuʼn tten juntl maj tamiwbʼil tukʼil Jehová.

20, 21. ¿Alkye tten jaku qo onin tiʼj jun erman qa ma kubʼ tbʼinchaʼn jun matij il?

²⁰ Tzaj tchikʼbʼaʼn Jesús alkye jun tiʼ nim toklen tuʼn tbʼant tuʼn tej tqʼama jlu: «Ma chin ule txkol kye xjal aj il tuʼn tajtz tiʼj kyanmi» (Luc. 5:32). Ax jlu qaj tuʼn tbʼant quʼn. Qa ikju, ¿tiʼ jaku bʼant quʼn aj tok qbʼiʼn qa otoq kubʼ tbʼinchaʼn jun qamiw jun matij il?

²¹ Qa ma kubʼ qewin til, oʼkx jaku tzaj qiʼn mas nya bʼaʼn tiʼj. Ex mintiʼx tajbʼen jlu tuʼnju tkyaqil in nok tkeʼyin Jehová (Prov. 5:21, 22; 28:13). Jaku qo onin tiʼj qamiw aj t-xi qqʼamaʼn te qa kyaj ansyan tuʼn kyonin tiʼj. Qa nya taj tuʼn t-xi tqʼamaʼn til, il tiʼj tuʼn qxiʼ qʼamalte kye ansyan. Iktzun tten kbʼel qyekʼin qa ax tok qaj tuʼn qonin tiʼj. Jaku tzaj nya bʼaʼn tiʼj tamiwbʼil tukʼil Jehová.

22. ¿Tiʼ kʼelel qnikʼ tiʼj toj juntl xnaqʼtzbʼil?

²² ¿Yajtzun qa at jun erman o bʼinchan il toj nimku ambʼil ex in kubʼ kyximen ansyan tuʼn tex lajoʼn toj ttnam Jehová? ¿Ape t-xilen jlu qa mintiʼ otoq tzaj qʼaqʼin kykʼuʼj ansyan tiʼj? Toj juntl xnaqʼtzbʼil, kʼelel qnikʼ tiʼj qa in tzaj qʼaqʼin tkʼuʼj Jehová kyiʼj tmajen aj in chex tkawin ex tzeʼn jaku tzʼel qkanoʼn tiʼj techel in kubʼ tqʼoʼn.