Tej tchmet mas pakbʼal, iltoq tiʼj tuʼn kyetz mas uʼj. Ya in che etztoq imprimirin revista toj Betel te Brooklyn atz Nueva York te Estados Unidos, pero mintiʼtoq in che etz imprimirin qe libro kyuw kyxkʼomil, sino in xitoq chjoʼn kye junjun empresa tuʼn tbʼant aqʼuntl lu kyuʼn. Tuʼnju mintiʼ i etz libro kyuʼn empresa kyoj junjun xjaw, mintiʼtoq libro tuʼn tajbʼen kyuʼn erman toj pakbʼabʼil. Tej tbʼaj jlu, xi tqanin ermano Rutherford te ermano Robert Martin, aju nejenel toj fábrica, qa jakutoq bʼant tuʼn kyetz ky-imprimirin libro.

Tqʼama ermano Martin jlu: «O jaw labʼine tej tok qbʼiʼne jlu tuʼnju iltoq tiʼj tuʼn tten juntl fábrica tuʼn kyetz imprimirit uʼj». Tzaj kylaqʼoʼn erman qe máquina tuʼn kyetz imprimirit libro ex tzaj kymajen jun ja toj calle Concord, número 18 atz Brooklyn.

Nya kykyaqil e tzalaj tej tok kybʼiʼn tqanil lu. Pon jun nejenel kye empresa etz ky-imprimirin libro ex tqʼama jlu tej tok tkeʼyin fábrica: «Tbʼanel qe máquina o che tzaj kylaqʼoʼne, pero mintiʼ ojtzqiʼn kyuʼne tzeʼn tuʼn kyajbʼen. Aj tikʼ qaq xjaw, ya otoq che kubʼ xitj kyuʼne».

Tqʼamatl ermano Martin jlu: «Jakutoq txi qnimen tyol xjal lu, pero mintiʼtoq ojtzqiʼn tuʼn qa in nonin Qajaw qiʼje ex kukxtoq kbʼantel tuʼn». Ax tok qe tyol ermano Martin tuʼnju tej tikʼ chʼin ambʼil, ya in che etztoq imprimirit 2,000 libro junjun qʼij.

Nya oʼkx xi tzyet tuʼn tetz ky-imprimirin erman junjun libro, sino ax ikx ajbʼen radio kyuʼn tuʼn t-xi pakbʼet tbʼanel tqanil. Etz tqʼoʼn ermano Rutherford tnejel tchikʼbʼabʼil toj radio toj jun domingo te qale te 26 te febrero te 1922. Etz tqʼoʼn jun chikʼbʼabʼil tok  tbʼi «Millones que ahora viven no morirán jamás», toj jun radio KOG tbʼi te Los Ángeles California te Estados Unidos.

Oklo kybʼiʼn junlo 25 mil xjal chikʼbʼabʼil. Ateʼ junjun pon kysamaʼn qe carta te qʼobʼil chjonte. Kyxol xjal lu ten Willard Ashford, jun xjal anqʼin atz Santa Ana California. Xi tqʼoʼn chjonte te ermano Rutherford tuʼnju otoq tzʼex tqʼoʼn jun tbʼanel chikʼbʼabʼil. Tqʼama jlu: «Noqwit mintiʼ etz kyqʼoʼne chikʼbʼabʼil toj radio, mintiʼwtlo ok qbʼiʼne tuʼnju at oxe yabʼ toj qjaye, axpe ikx mintiʼwtlo qbʼiye noqwit atz nqayin tzalu».

Kyoj junjuntl seman, i etz qʼoʼn mas chikʼbʼabʼil. Tej tkubʼaj abʼqʼi, etz qʼamaʼn toj revista The Watch Tower qa otoq tzʼok kybʼiʼn junlo 300 mil xjal tbʼanel tqanil toj radio.

Tuʼnju ok kybʼiʼn nim xjal tbʼanel tqanil, kubʼ kyximen Xnaqʼtzal tiʼj Tyol Dios tuʼn tten jun kyex ky-emisora te radio. Tuʼntzunju, jaw kybʼinchaʼn jun atz Staten Island nqayin tiʼj Betel te Brooklyn. Kyoj junjun abʼqʼi, ajbʼen emisora WBBR kyuʼn Xnaqʼtzal tiʼj Tyol Dios tuʼn t-xi pakbʼet tbʼanel tqanil tiʼj Tkawbʼil Dios.

Etz qʼamaʼn toj revista The Watch Tower te 15 te junio te 1922 qa kʼokeltoq jun asamblea toj tnam te Cedar Point Ohio toj 5 a 13 te septiembre te 1922. Nim e tzalaj Xnaqʼtzal tiʼj Tyol Dios tej kypon toj tnam te Cedar Point.

Toj tnejel chikʼbʼabʼil, xi tqʼamaʼn ermano Rutherford jlu kye qeju in che bʼin tiʼj: «Qʼuqli nkʼuʼje tiʼj Qajaw [...] qa ktzajel tkʼiwlaʼn asamblea lu tuʼntzun t-xi pakbʼet tbʼanel tqanil kye xjal ik tzeʼn naʼmx tbʼant quʼn». Kykyaqil qeju erman ex kyqʼoʼn jun chikʼbʼabʼil, xi kyqʼamaʼn kye erman tuʼn tok tilil kyuʼn tuʼn kypakbʼan.

Toj viernes 8 te septiembre, e pon junlo 8 mil xjal ex kyajtoq tuʼn tok kybʼiʼn tchikʼbʼabʼil ermano Rutherford. Kyajtoq tuʼn tel kynikʼ tiʼj tiʼ kyxilen letra «ADV», aju ok qʼoʼn kyiʼj txokbʼil. Tej kykubʼ qeʼ erman, nim kye ok  kyqʼoʼn kywitz tiʼj jun lona bʼalqʼiʼn tibʼaj plataforma. Otoq tzaj Arthur Claus toj tnam te Tulsa te Oklahoma Estados Unidos ex in jyontoq tiʼj jun tlugar jatumel jakutoq tzʼok tbʼiʼn chikʼbʼabʼil. Noqtzun tuʼnj, kwesttoq tuʼn tkanet kyuʼn tuʼnju mintiʼtoq micrófono ex qe bocina toj ambʼil aju.

Tuʼn miʼn tten bulla, etz tqʼamaʼn erman xi tzyunte chmabʼil qa ya mlaytoq che okx xjal qa otoq txi tzyet tchikʼbʼabʼil ermano Rutherford. Te las 9 y media te prim, xi tzyet tchikʼbʼabʼil ermano Rutherford kyukʼil yol tkuʼx toj Mateo 4:17: «Aju kawbʼil in tzaj tuj kyaʼj ma tzul laqʼeʼ». Tej tyolin tiʼj tzeʼn kʼokel kybʼiʼn xjal tbʼanel tqanil, tqʼama jlu: «Kyaj tqʼamaʼn Jesús qa aj ttzaj tqʼoʼn twitz kyiʼj xjal, kjawil tchmon twitz awal ex che okel tchmon qe ax tok tmajen otoq che ten tzʼaqli twitz».

Attoq ermano Claus kyxol xjal in che bʼin tiʼj chikʼbʼabʼil, tqʼama jlu: «Ok qqʼoʼne qwiʼye tiʼj tkyaqil chikʼbʼabʼil». Pero noq minabʼen tzaj jun yabʼil tiʼj ermano Claus ex etz tiʼjxi lugar jatumel ok asamblea. Bʼant jlu tuʼn maske nyatoq taj tuʼn tetz tuʼnju mlaytoq tzaj qʼoʼn ambʼil te tuʼn tokx juntl maj.

Tej tikʼ chʼin ambʼil, bʼanix chʼintl. Tzaj tqʼamaʼn ermano qa tej tmeltzʼaj, ok tbʼiʼn qa in che aplaudirin qeju in che bʼin tiʼj chikʼbʼabʼil. Jaw tzalaj tej tok tbʼiʼn jlu. Kubʼ t-ximen qa iltoq tiʼj tuʼn tjax twi ja tuʼntzun tok tbʼiʼn chikʼbʼabʼil. Toj ambʼil aju tzmatoq qʼiʼn 23 abʼqʼi tuʼn, tuʼntzunju bʼant tuʼn tjax twi ja. Jaqoʼn qetoq tragaluz ex mas tbʼanel ok tbʼiʼn chikʼbʼabʼil atz.

Pero nya tjunalx ermano Arthur Claus bʼant jlu tuʼn. Ax ikx, ateʼtoq junjun tamiw tukʼil. Jun kyxol, ten Frank Johnson ex xi tqanin jlu te: «¿Atpe jun navaja qʼiʼn tuʼna?».

Xi ttzaqʼweʼn Arthur qa at.

Xi tqʼamaʼn Frank jlu te: «Aya ma tzʼok te  tzaqʼwebʼil qnaʼj Diose». Xi tqʼamaʼntl jlu te: «¿Ma tzʼok tkeʼyina lona bʼalqʼiʼn? Tkubʼ jun anuncio twitz ex tzyuʼn kyuʼn clav lu. Qʼonka twiʼya tiʼjju in tzaj tqʼamaʼn jwes. * Aj ttzaj tqʼamaʼn ‹kyqʼamanxe, kyqʼamanxe...›, bʼaʼn tuʼn tajbʼen navaja tuʼna ex tzaqpinxa lona».

Qʼiʼntoq navaja tuʼn Arthur toj tqʼabʼ ex in nayontoq tuʼn tetz tqʼoʼn ermano Rutherford tqanil. Tej chʼixtoq tkubʼaj tchikʼbʼabʼil ermano Rutherford, tukʼil tkyaqil tqʼajqʼajel twiʼ ex tukʼil tzalajbʼil tqʼama: «Che oke te axix tok testiw tiʼj Qajaw ex che tene tzʼaqli twitz. Kukx tzʼok tilil kyuʼne ajxi tkubʼ najsaʼn nya axix tok okslabʼil. Che pakbʼane toj tkyaqil lugar. Il tiʼj tuʼn tel kynikʼ xjal tiʼj qa a Jehová Dios ex qa a Jesús Rey kyibʼaj kykyaqil qe rey ex atzun Kyajaw kykyaqil qeju at kyoklen. In qo anqʼin toj jun ambʼil nim toklen. ¡Ya in kawin Rey!, ex aqeye che xel qʼonte tqanil kye xjal. Tuʼntzunju, kyqʼamanxe, kyqʼamanxe, kyqʼamanxe aju Rey ex aju tkawbʼil kye xjal».

Tej tok tbʼiʼn Arthur lu kyukʼil erman, ajbʼen navaja tuʼn ex chebʼe tzaj likʼpuʼn lona. In tqʼamaʼntoq anuncio jlu: «Kyqʼamanxe aju Rey ex aju tkawbʼil kye xjal». Aʼyeju oxe letra «ADV», in che ajbʼen tiʼj yol inglés advertise, aju a t-xilen «kyqʼamanxe».

Onin asamblea te Cedar Point kyiʼj erman tuʼn tok kyqʼoʼn kywiʼ tiʼj pakbʼabʼil. Kykyaqil erman kyajtoq tuʼn kypakbʼan, e tzalaj tej tbʼant aqʼuntl lu kyuʼn. Kubʼ ttzʼibʼin jun colportor moqa precursor te Oklahoma jlu: «O pakbʼane jatumel ateʼ mina te carbón ex nyatoq nim kypwaq xjal at». Tqʼama qa in che jawtoq oqʼ xjal aj tok kybʼiʼn tqanil tkuʼx toj revista The Golden Age. Toj chʼin yol tqʼama jlu: «In qo tzalaje aj t-xi qqʼuqbʼaʼne kykʼuʼj».

El kynikʼ Xnaqʼtzal tiʼj Tyol Dios qa iltoq tiʼj tuʼn t-xi kybʼiʼn qe tyol Jesús tkuʼx toj Lucas 10:2, jatumel in tzaj qʼamaʼn: «Nimxix twitz awal at, atzun qe aqʼnal mya nim». Tej tkubʼaj abʼqʼi aju, otoq kubʼ kyximen tuʼn t-xi kypakbʼaʼn tbʼanel tqanil kye kykyaqil xjal.