1, 2. a) ¿Tiʼ o bʼant kyuʼn junjun gobierno kyiʼj tmajen Jehová ex tiʼ kymod erman o kubʼ kyyekʼin? b) ¿Tiquʼn jaku qo tzalaj aj qel ikʼun? (Ax ikx yolina kyiʼj foto tok tiʼj t-xkʼomil).

 TOJ mas te 30 tnam ex lugar, o tzʼel qʼiʼn ambʼil kye junjun tmajen Jehová tuʼn kyajbʼen te, atzun junjuntl mintiʼ in tzaj qʼoʼn ambʼil kye tuʼn tbʼant junjun tiʼchaq kyuʼn. Ex kyoj junjun lugar, o che okx qʼoʼn erman toj cárcel. Toj twitz Jehová mintiʼ jun nya bʼaʼn o kubʼ kybʼinchaʼn erman lu. Pero in che okx qʼoʼn toj cárcel tuʼnju in che xnaqʼtzan tiʼj Tyol Dios, in che pakbʼan, in cheʼx kyoj chmabʼil ex tuʼnju mintiʼ in che onin tiʼj política. Maske o tzʼok bʼinchaʼn nya bʼaʼn kyiʼj erman lu, o che ten tzʼaqli twitz Jehová ex oʼkx in che ajbʼen te ex in che tzalaj tuʼn jlu. *

² Olo tzʼok tkeʼyina kyfoto erman lu ex in che tzalaj. In kubʼ kynaʼn jlu tuʼnju in tzalaj Jehová kyiʼj aj kyten tzʼaqli (1 Crón. 29:17a). Tqʼama Jesús jlu: «At tzalajbʼil kye qeju in che yajlanjtz tuʼn tlaj ju in kybʼinchaʼn aju tzʼaqlxix [...]. Che tzalajxe ex che tenxe alegr, porke aju oyaj ktzajel qʼoʼn kyeye tuj kyaʼj, maʼxix» (Mat. 5:10-12).

3. Ik tzeʼn in tzaj tqʼamaʼn Hechos 4:19 ex 20, ¿tiʼ bʼant kyuʼn apóstol tej kyel ikʼun ex tiquʼn?

³ In che el ikʼun erman toj ambʼil jaʼlo ik tzeʼn kye  apóstol toj tnejel syent abʼqʼi tej kyyolin tiʼj Jesús. Toj nimku maj, xi kyqʼamaʼn jwes te Sanedrín kye «tuʼn miʼn kyyolintl tiʼj Jesús» (Hech. 4:18; 5:27, 28, 40). ¿Tiʼtzun bʼant kyuʼn apóstol? (Kjawil uʼjit Hechos 4:19, 20). El kynikʼ tiʼj qa otoq tzaj qʼamaʼn kye tuʼn jun xjal mas nim toklen tuʼn kukx kyyolin tiʼj Jesús kyukʼil xjal (Hech. 10:42). Tuʼntzunju, xi tqʼamaʼn Pedro ex Juan kye jwes qa mlaytoq txi kynimen kyyol ex qa oʼkxtoq che nimel te Dios. Tej t-xi kyqʼamaʼn apóstol qe yol lu kye jwes ok ik tzeʼn xi kyqʼamaʼn jlu kye: «¿Tiquʼn in bʼant jlu kyuʼne? ¿In kubʼpe kyximane qa mas nim kyoklene twitz Dios?».

4. Ik tzeʼn in tzaj tqʼamaʼn Hechos 5:27 a 29, ¿alkye tbʼanel techel kyaj kyqʼoʼn apóstol kywitz okslal axix tok ex tzeʼn jaku tzʼel qkanoʼn kyiʼj?

⁴ Atxix ojtxe, o tzʼel kykanoʼn tmajen Jehová tiʼj tbʼanel techel kyaj kyqʼoʼn apóstol ex in xi kybʼiʼn qe yol lu: «Tnejel ilxix tiʼj tuʼn t-xi qnimane Dios, ex mya qe xjal» (kjawil uʼjit Hechos 5:27-29). Maske e bʼaj kʼixbʼisaʼn apóstol tuʼnju e ten tzʼaqli twitz Jehová, e «tzalaj tuʼnju bʼaʼn ela tuj twitz Dios tuʼn tkubʼ kychʼixwi kywitz xjal, noq tuʼn tlaj okslal qe tiʼj Jesús» (Hech. 5:40-42). Tuʼntzunju, kukx e pakbʼan.

5. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

⁵ Aj qximen tiʼj techel kyaj kyqʼoʼn apóstol qwitz, jakulo kubʼ qxjelin jlu: ¿Tzeʼn jakutoq che nimen apóstol te Dios ex nya kye xjal ex toj ax ambʼil tuʼn kynimen kye «aj sanjelal te gobierni»? (Rom. 13:1). Yajtzun qe, ¿tzeʼn jaku tzʼokx qqʼon qibʼ «tjaqʼ tkawbʼil gobierni» ik tzeʼn tqʼama apóstol Pablo ex toj ax ambʼil tuʼn qnimen te Jehová, aju aj kawil mas nim toklen? (Tito 3:1).

6. a) Ik tzeʼn in tzaj tqʼamaʼn Romanos 13:1, ¿tiʼ il tiʼj tuʼn tbʼant kyuʼn okslal? b) ¿Tiʼ bʼaʼn tuʼn ttzaj qnaʼn tiʼj kyoklen gobierno?

⁶ (Kjawil uʼjit Romanos 13:1). Nim toklen tuʼn kynimen okslal kye gobierno.  ¿Tiquʼn? Tuʼnju in che onin tuʼn tten mujbʼabʼil kyxol xjal, tuʼn tjapun kywi ley ex at maj in che kolin tiʼj ttnam Jehová (Apoc. 12:16). Tuʼntzunju, nim toklen tuʼn t-xi qchjoʼn impuesto, tuʼn qnimen kye ex tuʼn tok qqʼoʼn kyoklen (Rom. 13:7). Noqtzun tuʼnj, bʼaʼn tuʼn ttzaj qnaʼn qa in ten kyipumal gobierno noq tuʼnju in xi tqʼoʼn Jehová ambʼil kye. Kyaj tyekʼin Jesús qa ax tok jlu tej tyolin tukʼil Poncio Pilato. Tej t-xi tqʼamaʼn Pilato te Jesús qa attoq toklen tuʼn tkubʼ bʼyoʼn moqa tuʼn tklet, xi ttzaqʼweʼn Jesús jlu te: «Noqwit mya tuʼn Dios ma tzaj qʼoʼn toklena, mintiʼwtlo toklena wiʼje» (Juan 19:11). Ik tzeʼn te Pilato, mintiʼ kyoklen gobierno tibʼaj tkyaqil.

7. ¿Toj alkye ambʼil mlay chex qbʼiʼn gobierno ex tiʼ il tiʼj tuʼn tel kynikʼ tiʼj?

⁷ In xi kynimen okslal ley in kubʼ kyqʼoʼn gobierno qa mintiʼ in che ikʼ kyibʼaj tley Jehová. Pero mintiʼ in chex qbʼiʼn gobierno aj ttzaj kyqʼamaʼn tuʼn tkubʼ qbʼinchaʼn aju nya bʼaʼn in nela toj twitz Dios moqa aj tel kyiʼn ambʼil qe tuʼn qajbʼen te Jehová. Jun techel, jakulo tzaj kyqʼamaʼn gobierno kye kuʼxun tuʼn kyxiʼ kyxol soldad. * Moqa jaku tzʼel kyiʼn ambʼil qe tuʼn tten jun Biblia qukʼil, qe quʼj, tuʼn qpakbʼan ex tuʼn qten kyoj chmabʼil. Kxel kyqʼoʼn gobierno kwent te Dios qa nya toj tumel in najbʼen kyoklen kyuʼn ik tzeʼn aj tel kyikʼun qe t-xnaqʼtzbʼen Jesús. In nok tqʼoʼn Jehová twitz tiʼjju in bʼant kyuʼn (Ecl. 5:8).

8. ¿Tiquʼn junxitl Jehová kywitz xjal in che kawin?

⁸ Jaku ten kyipumal gobierno kyibʼaj txqantl ex jaku txi kybʼinchaʼn bʼaʼn. Pero nya a t-xilen jlu qa tzʼaqli qe ex qa aʼye mas nim kyoklen. ¿Tiquʼn in xi qqʼamaʼn jlu? Tuʼnju at Jun mas nim toklen kywitz txqantl ex tzʼaqli, ex atz in qo yolin tiʼj Jehová. Toj Tyol, in tzaj qʼamaʼn kyaje maj qa a in nok te «Dios maʼxix toklen» (Dan. 7:18, 22, 25, 27).

9. ¿Tiʼ ok tkeʼyin profeta Daniel toj junjun witzikʼ?

⁹ Ok tkeʼyin profeta Daniel junjun witzikʼ ex tzaj yekʼin te qa mas nim toklen Jehová twitz alkyexku juntl gobierno. Tnejel, ok tkeʼyin kyaje nimaq txkup kubʼ kyechlaʼn junjun gobierno te ojtxe ex te jaʼlo. Kubʼ kyechlaʼn txkup lu tkawbʼil tnam Babilonia, Medopersia, Grecia ex Roma, ex in kubʼ techlaʼn tkawbʼil Reino Unido ex Estados Unidos (Dan. 7:1-3, 17). Yajxitl, ok tkeʼyin Daniel qa qʼuqli Jehová toj kyaʼj ex in nok te jwes (Dan. 7:9, 10). Aju ok tkeʼyin Daniel yajxitl, in tzaj tnaʼn kye gobierno qa kxel kyqʼoʼn tajlal twitz Dios.

10. Ik tzeʼn in tzaj tqʼamaʼn Daniel 7:13, 14 ex 27, ¿alkyeqe xi tqʼoʼn Jehová kyoklen ex tiʼ in tzaj tyekʼin jlu qe?

¹⁰ (Kjawil uʼjit Daniel 7:13, 14, 27). Ok tkeʼyin Daniel qa el tiʼn Dios kyoklen gobierno ex xi tqʼoʼn kye junjuntl at mas kyipumal ex kyoklen. ¿Alkyeqe xi qʼoʼn kyoklen? Xi qʼoʼn toklen Jesús aju in tzaj tqʼamaʼn Tyol Dios qa «ik keʼyin ik tzaʼn jun xjal». Ax ikx, xi qʼoʼn kyoklen «xjal etzan tuʼn Dios maʼxix toklen» moqa aqeju 144,000 ex «che kawil tuj tkyaqil tabʼqʼiyil te jumajx» (Dan. 7:18). In tzaj tyekʼin jlu qa oʼkx Jehová at mas nim toklen tuʼnju oʼkx te jaku bʼant jlu tuʼn.

11. ¿Tiʼ mas tqʼama Daniel aju in tzaj tyekʼin qa mas nim toklen Jehová kywitz tnam?

 ¹¹ Aju ok tkeʼyin Daniel toj witzikʼ lu, in tzaj tyekʼin qa ax tok qe yol lu otoqxi tqʼama: «In che el tiʼn [Dios] qe rey tuj kykawbʼil ex in che ok tqʼoʼn junxitl rey te kyxel». Ex tqʼamatl jlu: «Ate Dios maʼ toklen ex at nim tipumal tuʼn tkawin kyibʼaj kykyaqil kykawbʼil xjal ex a Dios nnoʼk qʼonte toklen jun xjal tuʼn tkawin, noq alkye tajbʼil tuʼn tok tqʼoʼn» (Dan. 2:19-21; 4:17). ¿Ope tzʼel tiʼn Jehová toklen jun rey ex ope tzʼok tqʼoʼn toklen juntl? Oje.

12. Qʼamantza jun techel tzeʼn el tiʼn Jehová kyoklen rey toj ambʼil ojtxe. (Qʼonka twitza tiʼj dibujo).

¹² O kubʼ tyekʼin Jehová qa mas nim toklen kywitz «aj sanjelal te gobierni». Qo xnaqʼtzan tiʼj oxe techel. Tnejel, ok tqʼoʼn faraón te Egipto qe xjal te Israel te tmajen ex nyatoq taj tuʼn kyetz ttzaqpiʼn. Pero e klet tuʼn Jehová ex kux mulqʼaj faraón toj mar Rojo (Éx. 14:26-28; Sal. 136:15). Tkabʼin, kubʼ tikʼsaʼn rey Belsasar te Babilonia jun ninqʼij ex ok ten «xmayil tiʼj Qman aju at tuj kyaʼj». Ax ikx, mintiʼ jaw tnimsaʼn Jehová, sino jaw tnimsaʼn «kybʼi qe dios qʼan pwaq, [ex] saq pwaq» kytxʼotxʼil (Dan. 5:22, 23). Tuʼntzunju, kubʼ qʼoʼn tchʼixwi tuʼn Dios. Toj qonikʼen aju, «kubʼ bʼyoʼn Belsasar» ex xi qʼoʼn tkawbʼil kye xjal te Medopersia (Dan. 5:28, 30, 31). Toxin, kubʼ bʼyoʼn apóstol Santiago tuʼn rey Herodes Agripa I te Palestina ex yajxitl, okx tqʼoʼn apóstol Pedro toj cárcel tuʼntzun tkubʼ bʼyoʼn. Pero mintiʼ xi tqʼoʼn Dios ambʼil tuʼn tjapun twi t-ximbʼetz. Tuʼntzunju, «kʼixbʼisanjtz Herodes tuʼn jun t-anjel» ex kyim (Hech. 12:1-5, 21-23).

13. Qʼamantza jun techel tzeʼn kubʼ kyiʼj nim rey tuʼn Jehová.

¹³ Ax ikx o kubʼ tyekʼin Jehová qa mas nim tipumal kywitz nim gobierno. Toj jun ambʼil, onin Jehová tiʼj tnam Israel tuʼn tkubʼ kyiʼj 31 rey te Canaán ex tuʼn kykambʼan tiʼj jun plaj Txʼotxʼ Tziyen maj (Jos. 11:4-6, 20; 12:1, 7, 24). Nya oʼkxju, ax ikx onin Jehová tiʼj tnam Israel tuʼn tkubʼ tiʼj rey Ben-Hadad ex juntl 32 rey te Siria (1 Rey. 20:1, 26-29).

14, 15. a) ¿Tiʼ tqʼama rey Nabucodonosor ex Darío tiʼj toklen Jehová tuʼn tkawin? b) ¿Tiʼ tqʼama jun salmista tiʼj Jehová ex tiʼj ttnam?

 ¹⁴ O kubʼ tyekʼin Jehová nim maj qa mas nim toklen kywitz txqantl. Atzun jaʼlo, qo yolin tiʼjju bʼaj tiʼj rey Nabucodonosor te Babilonia. Mintiʼ jaw tnimsaʼn Dios tej tten nim tipumal ex toklen, sino jaw tnimsan tibʼ. Tuʼntzunju, el tzpet tnabʼil tuʼn Dios. Tej tten tnabʼil Nabucodonosor juntl maj, jaw tnimsaʼn Jehová ex el tnikʼ tiʼj qa oʼkx te jaku kawin te jumajx. Ex tqʼama qa mintiʼ jun tiʼ jaku tzʼel qʼinte ambʼil te tuʼn tjapun twi t-ximbʼetz (Dan. 4:30, 33-35). Tej otoq tzʼok qʼuqbʼil tkʼuʼj Daniel toj prueba ex tej otoq klet tuʼn Jehová toj kytzi león, etz tqʼoʼn rey Darío orden lu: «Tuj tkyaqil txʼotxʼ jatum in chin kawine, tuʼn kynimane kykyaqile te Dios, aju Tdios Daniel, ex tuʼn kyxobʼe twitz. Porke atzun Dios itzʼ, ex kukx tten te jumajx. Aju tkawbʼil mlay naj ex aju tipumal mintiʼ bʼajsbʼil te» (Dan. 6:7-10, 19-22, 26, 27).

¹⁵ Tqʼama jun salmista jlu: «In bʼaj ttzakun Qman aju in kubʼ kyximan qe txqantl nasyon tuʼn tbʼinchet kyuʼn». Ex tqʼamatl jlu: «At tzalajbʼil teju nasyon a Qman ma tzʼok te Kydios, aju ma jaw t-skʼoʼn Dios tuʼn tok te tekuxix» (Sal. 33:10, 12). Aj tel qnikʼ tiʼj jlu, tbʼanelxix tuʼn qten tzʼaqli twitz Jehová.

16. ¿Tiʼ jaku tzʼok qeʼ qkʼuʼj tiʼj ex tiquʼn? (Qʼonka twitza tiʼj dibujo).

¹⁶ Ma tzʼel qnikʼ tiʼj tiʼ bʼant tuʼn Jehová toj ambʼil ojtxe. Yajtzun toj ambʼil tzul, ¿tiʼ kbʼantel tuʼn? Jaku tzʼok qeʼ qkʼuʼj tiʼj qa che kletel tmajen tuʼn toj ambʼil te «kʼixbʼisabʼl maʼxix» (Mat. 24:21; Dan. 12:1). Che kletel tmajen tuʼn twitz tkyaqil Txʼotxʼ aj tok tzoqpaj jun kʼloj tnam moqa Gog te Magog kyiʼj.  Axpe ikx, jaku kambʼan Jehová ex qeju ateʼ toj kyaʼj kyiʼj qeju 193 tnam te Naciones Unidas qa ma che ok tzoqpaj kyiʼj tmajen. In tzaj ttziyan Jehová jlu: «Kyjaʼtzun tten kxel nyekʼune kye nimku nasyon aju woklene maʼxix ex qa xjanxix qine. Kxel nyekʼun wibʼe kye, ex kʼeleltzun kynikʼ tiʼj, aqine Dios» (Ezeq. 38:14-16, 23; Sal. 46:10).

17. ¿Tiʼ kbʼajel kyiʼj rey twitz tkyaqil Txʼotxʼ ex tiʼ kbʼajel kyiʼj qeju in che anqʼin toj tumelxix?

¹⁷ Aj tok tzoqpaj Gog kyiʼj tmajen Jehová, kxel tzyet qʼoj te Armagedón ex che kbʼel najsaʼn qe «rey tuj tkyaqil twitz txʼotxʼ» (Apoc. 16:14, 16; 19:19-21). Atzun «qeju in che anqʼin tuj tumelxix ex mintiʼ kypaltil, kukx che anqʼil twitz txʼotxʼ» (Prov. 2:21).

18. ¿Tiʼ o bʼant kyuʼn junjun tmajen Jehová ex tiquʼn? (Daniel 3:28).

¹⁸ Atxix ojtxe, o tzʼok tilil kyuʼn tmajen Jehová tuʼn kyajbʼen te maske jaku che okx qʼoʼn toj cárcel moqa jaku che kubʼ bʼyoʼn. Ex in bʼant jlu kyuʼn tuʼnju kʼujlaʼn Jehová kyuʼn. Kyaj tuʼn kyten tzʼaqli twitz Dios maʼxix toklen ik tzeʼn bʼant kyuʼn oxe hebreo e klet tuʼn kykyim toj qʼaqʼ (kjawil uʼjit Daniel 3:28).

19. ¿Tiʼ kʼokel tqʼoʼn Jehová twitz tiʼj aj qok toj xjel tuʼn ex tiʼ il tiʼj tuʼn tbʼant quʼn jaʼlo?

¹⁹ Tqʼama David qa nim toklen tuʼn qten tzʼaqli twitz Jehová. Kubʼ ttzʼibʼin jlu: «Aya Nman, tuʼna in che ok qe nasyon tuj xjel tiʼj kybʼinchbʼen; bʼinchantza wiʼje ik tzaʼnx ntene tzʼaqlxix qine ex mintiʼ wile» (Sal. 7:8). Ax ikx tqʼama jlu: «Tzʼajbʼenxwit te kolbʼil weye aju nmodiye bʼaʼn ex tuʼnju mintiʼ wile» (Sal. 25:21). Aju mas tbʼanel jaku bʼant quʼn, aju qa ma qo ten tzʼaqli twitz Jehová ex noq tiʼxku jaku bʼaj. Qa ma bʼant jlu quʼn, jaku txi qqʼamaʼn qe yol lu ik tzeʼn te salmista: «At tzalajbʼil kye qeju in che bʼet mintiʼ kypaltil ex in japun tley Qman kyuʼn» (Sal. 119:1).