1. ¿Tiʼ kyxilen yol «at tajbʼen Dios» qe ex tiʼ toklen tukʼil tzalajbʼil?

 NYA noq oʼkx toj chʼin ambʼil jaku kubʼ qnaʼn axix tok tzalajbʼil, sino jaku kubʼ qnaʼn toj tkyaqil qanqʼibʼil. Toj Sermón del Monte, kyaj tqʼamaʼn Jesús tiʼ tuʼn tbʼant quʼn tuʼn tkanet axix tok tzalajbʼil quʼn. Tqʼama jlu: «At tzalajbʼil kye qeju nneʼl kynikʼ tiʼj qa at tajbʼen Dios kye» (Mat. 5:3). Ojtzqiʼntoq tuʼn Jesús qa o qo kubʼ bʼinchaʼn tuʼn tok qojtzqiʼn Jehová ex tuʼn qkʼulun te. Ex atzun jlu taj Biblia tuʼn ttzaj tqʼamaʼn aj tyolin kyiʼj qeju «at tajbʼen Dios kye». Tuʼnju a Jehová in nok te «Dios at-xix tzalajbʼil tukʼil», ax ikx qe jaku qo tzalaj aj qajbʼen te (1 Tim. 1:11).

2, 3. a) ¿Alkye junjuntl xjal tqʼama Jesús qa jaku kubʼ kynaʼn tzalajbʼil? b) ¿Tiʼ kʼelel qnikʼ tiʼj toj xnaqʼtzbʼil lu ex tiquʼn nim toklen tuʼn qxnaqʼtzan tiʼj?

² ¿Oʼkxpe jaku kubʼ qnaʼn tzalajbʼil qa mintiʼ in che tzaj nya bʼaʼn qiʼj? Nya ikju. Kyaj tqʼamaʼn Jesús toj Sermón del Monte qa «at tzalajbʼil kye qeju in che bʼisun», axpe ikx qa in che ok weʼ twitz nya bʼaʼn moqa in tzaj kybʼis tuʼn jun il otoq kubʼ kybʼinchaʼn. Ax ikx, tqʼama Jesús qa «at tzalajbʼil kye qeju in che yajlanjtz tuʼn tlaj ju in kybʼinchaʼn aju tzʼaqlxix» ex in che el ikʼun tuʼnju in che ok lepeʼ tiʼj (Mat. 5:4, 10, 11). ¿Tzeʼn jaku qo tzalaj maske in qo ok weʼ twitz nya bʼaʼn?

³ Mintiʼ kyaj tqʼamaʼn Jesús qa oʼkx jaku kubʼ qnaʼn axix tok tzalajbʼil qa mintiʼ jun nya bʼaʼn in tzaj toj qanqʼibʼil. Sino tqʼama qa jaku qo tzalaj qa ma qo jyon tiʼj Dios ex qa ma qo ok laqʼeʼ ttxlaj (Sant. 4:8). ¿Tzeʼn jaku bʼant jlu quʼn? Toj xnaqʼtzbʼil lu, kʼelel qnikʼ tiʼj oxe consej jaku che onin qiʼj tuʼntzun tkubʼ qnaʼn axix tok tzalajbʼil.

4. ¿Alkye tnejel consej jaku tzʼonin qiʼj tuʼn tkubʼ qnaʼn axix tok tzalajbʼil? (Salmo 1:1-3).

⁴ TNEJEL: Tuʼn tkubʼ qnaʼn axix tok tzalajbʼil, nim toklen tuʼn quʼjin ex tuʼn qxnaqʼtzan tiʼj Tyol Dios. Ok tmojbʼaʼn Jesús Tyol Dios tukʼil wabʼj. Tuʼn kukx kyanqʼin xjal ex txkup nim toklen tuʼn kywaʼn. Noqtzun tuʼnj, oʼkx qe xjal jaku che xnaqʼtzan tiʼj Tyol Dios ex jaku txi kybʼinchaʼn aju in tzaj tqʼamaʼn. Tuʼntzunju, tqʼama Jesús jlu: «Mya noq oʼkx tuʼn wabʼj kʼanqʼil xjal, ax ikx jaku tzʼanqʼin xjal tuʼn tkyaqil yol in tmaʼn Dios» (Mat. 4:4). In tzaj tyekʼin jlu qe qa nim toklen tuʼn qxnaqʼtzan tiʼj Tyol Dios tkyaqil qʼij. Tqʼama jun salmista jlu: «At tzalajbʼil teju xjal [...] in tzalaj tiʼj tley Qman Dios, ex kukx in ximan tiʼj qʼijl ex qonikʼan» (kjawil uʼjit Salmo 1:1-3).

5, 6. a) ¿Tiʼ jaku tzʼel qnikʼ tiʼj toj Tyol Dios? b) ¿Tzeʼn in nonin qiʼj aj quʼjin tiʼj Tyol Dios?

⁵ Tuʼnju kʼujlaʼn qoʼ tuʼn Jehová, in tzaj tqʼamaʼn toj Tyol tiʼ jaku bʼant quʼn tuʼn qtzalaj. Jun techel, in tzaj t-xnaqʼtzaʼn qe tiquʼn in qo anqʼin, tiʼ jaku bʼant quʼn tuʼn qok te tamiw ex tiʼ jaku bʼant quʼn tuʼn tkubʼ tnajsaʼn qil. Nya oʼkxju, ax ikx in tzaj tqʼoʼn jun tbʼanel qʼuqbʼil qkʼuʼj tiʼj ambʼil tzul (Jer. 29:11). In kubʼ qnaʼn nimxix tzalajbʼil aj tel qnikʼ kyiʼj tbʼanel xnaqʼtzbʼil lu tkuʼx toj Tyol Dios.

⁶ Ik tzeʼn o tzʼel qnikʼ tiʼj, ateʼ nim tbʼanel consej toj Tyol Dios ex jaku che onin qiʼj toj qanqʼibʼil. Qa ma chex qbʼiʼn consej lu, jaku qo tzalaj. Tuʼntzunju, tbʼanel qa ma tzʼel qpaʼn mas ambʼil tuʼn quʼjin ex  tuʼn qximen tiʼj Tyol Dios aj ttzaj qbʼis kyuʼn nya bʼaʼn. Tqʼama Jesús jlu: «At tzalajbʼil kye qeju in xi kybʼiʼn tyol Dios ex in xi kyniman» (Luc. 11:28).

7. ¿Tzeʼn jaku tzʼajbʼen ambʼil quʼn aj quʼjin tiʼj Tyol Dios?

⁷ Aj quʼjin tiʼj Tyol Dios, nim toklen tuʼn tel qpaʼn ambʼil tuʼn qtzalaj tiʼj. ¿Tzeʼn jaku bʼant jlu quʼn? Qo ximen tiʼj jun techel. Qo ximen tiʼj qa in kubʼ tbʼinchaʼn jun xjal aju qwa mas qgan. Pero mintiʼ in kubʼ qnikʼbʼeʼn tuʼnju jun rat in xi qwaʼn moqa tuʼnju in qo ximen kyiʼj junjun nya bʼaʼn in qo ok weʼ twitz. Aj qbʼaj waʼn, jakulo kubʼ qximen tiquʼn mintiʼ xkubʼ qnikʼbʼeʼn qwa. Chʼixme ax jlu jaku bʼaj qiʼj aj quʼjin tiʼj Tyol Dios. At maj, mintiʼxix ambʼil qiʼj ex mintiʼ in nok qqʼoʼn qwiʼ tiʼjju in jaw quʼjin. Pero tuʼn miʼn tbʼaj jlu qiʼj, bʼaʼn tuʼn tel qpaʼn ambʼil tuʼn qximen tiʼjju in jaw quʼjin ex kyiʼj qe xjal in yolin txʼolbʼabʼil tiʼj. Qa ma bʼant jlu quʼn, jaku qo tzalaj.

8. ¿Tzeʼn in japun toklen «majen in bʼant taqʼun [...] ex at tnabʼl»? (Qʼonka twitza tiʼj tqanil).

⁸ O txi tqʼoʼn Jesús toklen «majen in bʼant taqʼun [...] ex at tnabʼl» tuʼn ttzaj tqʼoʼn xnaqʼtzbʼil qe toj ambʼil mas tbʼanel ex atzun jlu in bʼant tuʼn (Mat. 24:45). * Tkyaqil xnaqʼtzbʼil in tzaj tqʼoʼn, atz in jatz toj Tyol Dios ex in che onin qiʼj tuʼn tel qnikʼ tiʼj t-ximbʼetz Jehová (1 Tes. 2:13). Tuʼntzunju, kukx in che jaw quʼjin uʼj Aju Xqʼuqil ex ¡Weʼktza!, ex qe xnaqʼtzbʼil in che kubʼ qʼoʼn toj jw.org. Ax ikx, in kubʼ qbʼinchaʼn qten kyiʼj chmabʼil in che ok txolekxi qʼij ex aj tkubʼaj seman. Ex in nok qqʼoʼn qwitz tiʼj programa te JW Broadcasting^® tkyaqil xjaw qa in netz toj qyol. Qa ma tzʼok qqʼoʼn qwiʼ tiʼj tkyaqil xnaqʼtzbʼil lu, kʼonil qiʼj tuʼn tok qqʼoʼn qwiʼ tiʼj tkabʼin consej jaku tzʼonin qiʼj tuʼn tkubʼ qnaʼn axix tok tzalajbʼil.

9. ¿Alkye tkabʼin consej il tiʼj tuʼn t-xi qbʼinchaʼn tuʼntzun tkubʼ qnaʼn axix tok tzalajbʼil?

⁹ TKABʼIN: Tuʼn tkubʼ qnaʼn axix tok tzalajbʼil, nim toklen tuʼn kyxi qbʼiʼn tkawbʼil Jehová. Kubʼ ttzʼibʼin jun salmista jlu: «At tzalajbʼil kye qe xjal in che xobʼ twitz Qman ex bʼaʼn che niman te» (Sal. 128:1). Tuʼn qxobʼ te Jehová, a t-xilen tuʼn tok qqʼoʼn toklen ex nya qaj tuʼn ttzaj tbʼis (Prov. 16:6). Tuʼntzunju, in nok tilil quʼn tuʼn t-xi qbʼiʼn qe tkawbʼil tkuʼx toj Tyol tiʼj bʼaʼn ex tiʼj nya bʼaʼn (2 Cor. 7:1). Qa ma txi qbʼinchaʼn aju taj Jehová ex qa ma tzʼel qikʼun nya bʼaʼn, qo tzalajel (Sal. 37:27; 97:10; Rom. 12:9).

10. Aj tel qnikʼ tiʼjju tajbʼil Dios, ¿tiʼ mas kbʼantel quʼn? (Romanos 12:2).

¹⁰ (Kjawil uʼjit Romanos 12:2). Nya oʼkx tuʼn tel tnikʼ jun xjal tiʼj qa at toklen Jehová tuʼn ttzaj tqʼamaʼn alkye bʼaʼn ex alkye nya bʼaʼn. Sino ax ikx il tiʼj tuʼn t-xi tnimen qe tkawbʼil. Qo ximen tiʼj jun techel. Jaku tzʼel tnikʼ jun xjal tiʼj qa at toklen gobierno tuʼn ttzaj tqʼamaʼn jniʼ tvelocidad jun kar jaku ten toj carretera, pero jaku kubʼ t-ximen tuʼn miʼn t-xi tnimen ley ex in nikʼ tibʼaj. Tuʼntzunju, bʼaʼn tuʼn tkubʼ qyekʼin tukʼil qmod qa mas tbʼanel qe tkawbʼil Jehová twitz alkyexku juntl tiʼ (Prov. 12:28). Atzun jlu kubʼ t-ximen David, tuʼntzunju xi tqʼamaʼn te Jehová: «Tzul tyekʼuna weye aju tbʼeyil chwinqlal. At nim tzalajbʼil tuʼn ntene tukʼila, at nim achbʼil tukʼila te jumajx» (Sal. 16:11).

11, 12. a) ¿Tiquʼn il tiʼj tuʼn tok qxqʼuqin qibʼ aj ttzaj bʼaj qkʼuʼj moqa aj ttzaj qbʼis? b) ¿Tzeʼn jaku che onin yol tkuʼx toj Filipenses 4:8 qiʼj aj tjaw qskʼoʼn jun saqchbʼil?

 ¹¹ Aj ttzaj bʼaj qkʼuʼj moqa aj ttzaj qbʼis, jakulo kubʼ qximen tuʼn t-xi qbʼinchaʼn jun tiʼ tuʼntzun tkubʼ qnaʼn bʼaʼn. Tbʼanel qa ma bʼant jlu quʼn, noqtzun tuʼnj, nim toklen tuʼn tok qxqʼuqin qibʼ tuʼntzun miʼn tkubʼ qbʼinchaʼn jun nya bʼaʼn toj twitz Jehová (Efes. 5:10-12, 15-17).

¹² Toj carta xi ttzʼibʼin apóstol Pablo kye okslal te Filipos, xi tqʼamaʼn kye tuʼn kyximen kyiʼj tiʼchaq tbʼanel, saq, tzʼaqli ex in kubʼ kyyekʼin kʼujlabʼil (kjawil uʼjit Filipenses 4:8). Tej tkubʼ ttzʼibʼin Pablo texto lu, mintiʼ yolin kyiʼj saqchbʼil, pero jaku che onin tyol qiʼj aj tel qpaʼn ambʼil tuʼn qtzalaj jun rat. Aj tjaw quʼjin texto lu, bʼaʼn tuʼn tkubʼ qchʼexpuʼn chʼin ex jaku jaw quʼjin kyjalu: «¿Saq qe bʼitz in che ok nbʼiʼne, tbʼanilxix qe película in che ok nkeʼyine moqa in che yolin txqantl bʼaʼn kyiʼj videojuego in chin saqchane kyiʼj?». Qa ma bʼant jlu quʼn, kʼelel qnikʼ tiʼj alkyeqe saqchbʼil bʼaʼn in che ela toj twitz Dios ex alkyeqe nya. Qajbʼil tuʼn qok lepeʼ kyiʼj tkawbʼil Jehová (Sal. 119:1-3). Aj tbʼant jlu quʼn, in kubʼ qnaʼn bʼaʼn ex iktzun tten jaku qo yolin tiʼj toxin consej jaku tzʼonin qiʼj tuʼn tkubʼ qnaʼn axix tok tzalajbʼil (Hech. 23:1).

13. ¿Alkye toxin consej il tiʼj tuʼn tbʼant quʼn tuʼntzun tkubʼ qnaʼn axix tok tzalajbʼil? (Juan 4:23, 24).

¹³ TOXIN: Nim toklen tuʼn tkubʼ qqʼoʼn qajbʼebʼil te Jehová tnejel toj qanqʼibʼil. Tuʼnju a Jehová kubʼ Bʼinchaʼn qe, at toklen tuʼn qkʼulin te (Apoc. 4:11; 14:6, 7). Tuʼntzunju, nim toklen tuʼn qkʼulin te ik tzeʼn taj, tuʼn tkyaqil qanmi ex axix tok quʼn (kjawil uʼjit Juan 4:23, 24). Qaj tuʼn tkubʼ nej xewbʼaj xjan qwitz aj qkʼulin te Jehová tuʼntzun qok lepeʼ kyiʼj nabʼil tkuʼx toj Biblia. Nim toklen tuʼn tkubʼ qqʼoʼn qajbʼebʼil te Jehová tnejel toj qanqʼibʼil, axpe ikx qa o tzʼel tiʼn gobierno ambʼil tuʼn qajbʼen te. Toj ambʼil jaʼlo, mas te jun syent erman o che okx qʼoʼn toj cárcel noq tuʼnju in che ajbʼen te Jehová. * Maske ikju, kukx in che tzalaj tuʼnju in nok tilil kyuʼn tuʼn kynaʼn Dios, tuʼn kyxnaqʼtzan ex tuʼn kyyolin tiʼj Jehová ex tiʼj Tkawbʼil. Jakulo qo el ikʼun ex jakulo che yolin txqantl nya bʼaʼn qiʼj, pero in qo tzalaj aj tel qnikʼ tiʼj qa in nonin Jehová qiʼj tuʼn tikʼx quʼn (Sant. 1:12; 1 Ped. 4:14).

14. ¿Tiʼ bʼaj tiʼj jun ermano te Tayikistán ex tiquʼn?

¹⁴ In tzaj kyyekʼin junjun experiencia qa jaku kubʼ qnaʼn axix tok tzalajbʼil qa ma chex qbʼiʼn oxe consej ma qo xnaqʼtzan tiʼj, axpe ikx qa in qo ok weʼ twitz jun nya bʼaʼn. Qo yolin tiʼj Yovidón Boboyónov, jun kuʼxun te 19 abʼqʼi in nanqʼin atz Tayikistán. Tuʼnju nyatoq taj tuʼn t-xiʼ kyxol soldad, pon qʼiʼbʼaj toj tja toj 4 te octubre te 2019 tuʼntzun t-xi qʼiʼn toj cárcel. Ten junjun xjaw toj cárcel ex ok qʼoʼn ik tzeʼn jun eleqʼ. Etz qʼamaʼn toj noticia kyoj nimku tnam aju bʼaj tiʼj ermano lu. Ax ikx, etz qʼamaʼn qa otoq tzʼok kʼixbʼisaʼn tuʼnju mintiʼ ok tqʼoʼn ky-uniforme soldad tiʼj ex tuʼnju mintiʼ xi  tbʼinchaʼn aju xi kyqʼamaʼn te. Tej tbʼaj jlu, kubʼ qʼoʼn tsentens ex ok obligarin tuʼn taqʼunan tzmaxi tej t-xi tqʼoʼn president ambʼil tuʼn tetz tzaqpiʼn. Maske ok weʼ Yovidón twitz nya bʼaʼn lu, kukx ten tzʼaqli twitz Jehová ex kukx tzalaj. ¿Tiʼ onin tiʼj? Onin tiʼj tej tok tqʼoʼn toklen tamiwbʼil tukʼil Jehová.

15. ¿Tiʼ onin tiʼj Yovidón tuʼn kukx t-xnaqʼtzan tiʼj Jehová tej tten toj cárcel?

¹⁵ Tej tten Yovidón toj cárcel, kukx xnaqʼtzan tiʼj Jehová maske mintiʼtoq jun Biblia tukʼil nix jun uʼj. Qa ikju, ¿tiʼ onin tiʼj? Tej t-xi kyiʼn erman twa, ok kytzʼibʼin texto diario tiʼj bols tkubʼil twa. Tuʼn jlu, jakutoq jaw tuʼjin Yovidón Tyol Dios tkyaqil qʼij ex jakutoq ximen tiʼj. Tej tetz toj cárcel, xi tqʼoʼn consej jlu kye qeju naʼmx kyok weʼ twitz jun ambʼil kwest: «Bʼaʼn tuʼn tajbʼen ambʼil kyuʼne jaʼlo tuʼn kyok laqʼeʼye ttxlaj Jehová. Tuʼntzunju, bʼaʼn tuʼn tjaw kyuʼjine Tyol Dios ex qe quʼj».

16. ¿Tiʼ ok tqʼoʼn Yovidón twiʼ tiʼj?

¹⁶ Ok tilil tuʼn ermano Yovidón tuʼn t-xi tnimen qe tkawbʼil Jehová. Mintiʼ ok tqʼoʼn twiʼ tiʼj nya bʼaʼn ex mintiʼ kubʼ tbʼinchaʼn, sino ok tqʼoʼn twiʼ tiʼj Jehová ex tiʼjju  mas nim toklen toj twitz. Nya oʼkxju, ax ikx el tpaʼn ambʼil tuʼn tok tqʼoʼn twitz kyiʼj tbʼinchbʼen Jehová. Tkyaqil prim ok tbʼiʼn tqʼajqʼajel kywiʼ pájaro ex te qonikʼen ok tkeʼyin Xjaw ex qe cheʼw. Tqʼama jlu: «In tzalaje tej tok nqʼoʼne nwitze kyiʼj tbʼanel oyaj o che tzaj tqʼoʼn Jehová qe». Aj tok qqʼoʼn qwitz tiʼj tkyaqilju in tzaj tqʼoʼn Jehová qe tuʼn tten jun tbʼanel qamiwbʼil tukʼil ex tuʼn qok t-xqʼuqin, in qo tzalaj ex in nonin qiʼj tuʼn tikʼx quʼn.

17. ¿Tzeʼn jaku tzʼonin texto te 1 Pedro 1:6 ex 7 tiʼj jun erman in nok weʼ twitz jun nya bʼaʼn ik tzeʼn te Yovidón?

¹⁷ Kubʼ tqʼoʼn Yovidón tajbʼebʼil te Jehová tnejel toj tanqʼibʼil. El tnikʼ tiʼj qa nim toklen tuʼn kukx tten tzʼaqli twitz Jehová. Tqʼama Jesús jlu: «Twitz Qman tuʼn kykʼulune, aju Kydiose, ex oʼkx te tuʼn kyajbʼene» (Luc. 4:8). Ok tilil kyuʼn soldad ex qe nejenel tuʼn tkyaj ttzaqpiʼn Yovidón tokslabʼil. Pero kubʼsan qʼijtl ex qonikʼen twitz Jehová tuʼn tonin tiʼj tuʼn kukx tikʼx tuʼn ex tuʼn tten tzʼaqli twitz. Maske ok bʼinchaʼn nya bʼaʼn tiʼj toj cárcel ex ok kʼixbʼisaʼn, kukx ok tilil tuʼn. Atzun jaʼlo, in tzalaj tuʼnju o tzʼel tnikʼ tiʼj qa kyuw taʼ qʼuqbʼil tkʼuʼj (kjawil uʼjit 1 Pedro 1:6, 7).

18. ¿Tiʼ jaku bʼant quʼn tuʼn kukx qtzalaj?

¹⁸ Ojtzqiʼn tuʼn Jehová tiʼ jaku tzʼonin qiʼj tuʼn tkubʼ qnaʼn axix tok tzalajbʼil. Qa ma chex qbʼiʼn oxe consej ma che tzaj qʼoʼn qe toj xnaqʼtzbʼil lu, kukx jaku qo tzalaj maske in qo ok weʼ twitz nya bʼaʼn. Ex jaku chex qqʼamaʼn qe yol lu: «At tzalajbʼil kye xjal a Qman tok te Kydios» (Sal. 144:15).