1. ¿Tiʼ kymod xjal in kubʼ kyyekʼin tiʼj nabʼil tkuʼx toj Tyol Dios? (Proverbios 1:20, 21).

 KYOJ nimku lugar, in che pakbʼan erman jatumel ateʼ nim xjal ex in che tzalaj aj t-xi kyqʼoʼn jun uʼj kye. ¿Ope pakbʼan teya jun maj ik tzeʼn jlu? Qa ikju, in tzajlo tnaʼna jun tbʼanel techel tkuʼx toj uʼj te Proverbios jatumel in tzaj qʼamaʼn qa in schʼin nabʼil kywitz xjal tuʼntzun t-xi kybʼiʼn tconsej (kjawil uʼjit Proverbios 1:20, 21). Jaku kanet tnabʼil Jehová quʼn toj Tyol ex kyoj quʼj. Ex atzun nabʼil lu jaku tzʼonin kyiʼj xjal tuʼn t-xi tzyet tuʼn kybʼet toj bʼe te chwinqlal. In qo tzalaj aj t-xi kyiʼn xjal jun quʼj, pero nya kykyaqil in bʼant jlu kyuʼn. Ateʼ junjun mintiʼ in nok kyqʼoʼn toklen aju in tzaj tqʼamaʼn Tyol Dios. Atzun junjuntl, in che xmayin qiʼj tuʼnju in kubʼ kyximen qa ya mintiʼ tajbʼen Tyol Dios. Ex ateʼ junjuntl in che yolin nya bʼaʼn kyiʼj kawbʼil tkuʼx toj Tyol Dios ex in tzaj kyqʼamaʼn qa nim qe kawbʼil in qo ok lepeʼ tiʼj. Maske ikju, kukx in xi tqʼoʼn Jehová ambʼil kye xjal tuʼn tel kynikʼ tiʼj tnabʼil. ¿Tzeʼn in bʼant jlu tuʼn?

2. ¿Tzeʼn jaku kanet nabʼil axix tok quʼn toj ambʼil jaʼlo, pero tiʼ in kubʼ kyximen xjal tuʼn tbʼant kyuʼn?

² In najbʼen Tyol Jehová tuʼn tuʼn ttzaj tyekʼin nabʼil axix tok kye xjal. Toj ambʼil jaʼlo, chʼixme kykyaqil xjal jaku ten jun Biblia kyukʼil. Ax ikx, jaku jaw kyuʼjin qe xnaqʼtzbʼil in che etz tuʼn ttnam Jehová toj mas te mil yol. In tzaj tbʼanel toj kyanqʼibʼil xjal qa ma kubʼ kyanqʼin aju in tzaj tqʼamaʼn Tyol Dios ex aju in tzaj kyqʼamaʼn uʼj. Noqtzun tuʼnj, mintiʼ in nok kyqʼoʼn xjal toklen nabʼil axix tok. Aj tkubʼ kyximen tiʼ tuʼn t-xi kybʼinchaʼn, in che ok lepeʼ tiʼj kynabʼil ex tiʼjju in tzaj kyqʼamaʼn txqantl kye. Ax ikx, jakulo che  xmayin qiʼj tuʼnju qaj tuʼn t-xi qnimen aju in tzaj tqʼamaʼn Tyol Dios. Toj xnaqʼtzbʼil lu, kʼelel qnikʼ tiʼj tiquʼn in kubʼ kyyekʼin xjal kymod lu. Pero tnejel qo yolin tiʼj tzeʼn jaku ten qnabʼil in tzaj tqʼoʼn Jehová.

3. ¿Tiʼ il tiʼj tuʼn tbʼant quʼn tuʼn tten qnabʼil axix tok?

³ ¿Tiʼ t-xilen tuʼn tten qnabʼil? A t-xilen tuʼn tajbʼen qojtzqibʼil quʼn aj tkubʼ qximen jun tiʼ. Noqtzun tuʼnj, tuʼn tkubʼ qyekʼin axix tok nabʼil, il tiʼj tuʼn tbʼant juntl tiʼ quʼn. In tzaj tqʼamaʼn Tyol Dios jlu: «Qa ma qo niman te Qman, atzun in xeʼt tuʼn tten qnabʼl, ex qa ma tzʼel qnikʼ tiʼj ju Dios Xjanxix, atzun in knet ojtzqibʼl quʼn» (Prov. 9:10). Tuʼntzunju aj tkubʼ qximen jun tiʼ nim toklen, bʼaʼn tuʼn tel «qnikʼ tiʼj ju Dios Xjanxix» moqa tiʼj t-ximbʼetz Jehová. Jaku bʼant jlu quʼn aj qjyon onbʼil toj Tyol Dios ex kyoj quʼj. Qa ma bʼant jlu quʼn, kbʼel qyekʼin nabʼil axix tok (Prov. 2:5-7).

4. ¿Tiquʼn in xi qqʼamaʼn qa tukʼil Jehová in tzaj nabʼil axix tok?

⁴ Oʼkx tukʼil Jehová in tzaj nabʼil axix tok (Rom. 16:27). ¿Tiquʼn in xi qqʼamaʼn jlu? Tnejel, tuʼnju a kubʼ Bʼinchaʼn qe ex ojtzqiʼn tkyaqil tuʼn kyiʼj tbʼinchbʼen (Sal. 104:24). Tkabʼin, tuʼnju in kubʼ tyekʼin tnabʼil tiʼj tkyaqilju in bʼant tuʼn (Rom. 11:33). Ex toxin, tuʼnju in che onin tconsej kyiʼj qeju in xi kybʼiʼn (Prov. 2:10-12). Qa qaj tuʼn tkubʼ qyekʼin nabʼil axix tok, bʼaʼn tuʼn tok qqʼoʼn qwiʼ kyiʼj oxe xnaqʼtzbʼil lu aj tkubʼ qximen jun tiʼ.

5. ¿Tzeʼn kyanqʼibʼil xjal tuʼnju mintiʼ in nok qeʼ kykʼuʼj tiʼj qa tukʼil Jehová in tzaj nabʼil axix tok?

⁵ In tzaj kyqʼamaʼn nim xjal toj pakbʼabʼil qa tbʼanel tkyaqilju in nok qkeʼyin, pero in kubʼ kyximen qa bʼant tkyaqil tuʼn evolución ex nya tuʼn Dios. Atzun junjuntl in nok qeʼ kykʼuʼj tiʼj Dios, pero in kubʼ kyximen qa mintiʼ tajbʼen nabʼil tkuʼx toj Tyol ex in kubʼ kybʼinchaʼn aju kyex kyaj. ¿Tiʼ o tzaj tuʼn jlu? ¿Maspe tbʼanel kyanqʼibʼil xjal tuʼnju in che ok lepeʼ tiʼj kyex kynabʼil ex nya tiʼj tnabʼil Dios? ¿In kubʼpe kynaʼn tzalajbʼil axix tok moqa at jun qʼuqbʼil kykʼuʼj? Mintiʼ. Aju in nok qqʼoʼn qwitz tiʼj, in tzaj tyekʼin qa ax tok qe yol lu: «Maske nim kynabʼl xjal ex nim kyojtzqibʼl ex mejor che ximan, pero mlay che xkyeʼ tiʼj Dios» (Prov. 21:30). Aj qximen tiʼj jlu, in nonin qiʼj tuʼn t-xi qqanin qnabʼil axix tok te Jehová. Bʼisbʼajilxix tuʼnju mintiʼ in bʼant jlu kyuʼn xjal. ¿Tiquʼn?

6. Ik tzeʼn in tzaj tqʼamaʼn Proverbios 1:22 a 25, ¿alkyeqe mintiʼ in xi kybʼiʼn nabʼil axix tok?

⁶ Nim qe xjal mintiʼ in xi kybʼiʼn «tqʼajqʼajel twiʼ ju qʼol nabʼl». In tzaj tqʼamaʼn Biblia qa at oxe clase xjal in nel kyikʼun nabʼil axix tok: qeju mintiʼ kynabʼil, qeju in che xmayin ex qeju mibʼan che bʼin (kjawil uʼjit Proverbios 1:22-25). Qo xnaqʼtzan tiʼj tiquʼn in nel kyikʼun xjal lu tnabʼil Dios ex tiʼ jaku bʼant quʼn tuʼn miʼn qok ik tzeʼn kye.

7. ¿Tiquʼn in kubʼ kyximen junjun xjal tuʼn kukx kyten mintiʼ kynabʼil?

⁷ Aqeju mintiʼ kynabʼil, atz in yolin kyiʼj xjal in xi kynimen tkyaqilju in xi qʼamaʼn kye ex jun rat in che kubʼ sbʼuʼn (Prov. 14:15). Nim maj in qo yolin kyukʼil xjal ik tzeʼn jlu toj pakbʼabʼil. Ax tok, ateʼ nim xjal o che kubʼ sbʼuʼn kyuʼn nejenel kye  okslabʼil ex tuʼn política. Ex aj tel kynikʼ tiʼj jlu, in tzaj nim kybʼis. Pero aqeju xjal in yolin Proverbios 1:22 tiʼj, mintiʼ kynabʼil tuʼnju atzun jlu kyaj tuʼn tbʼant kyuʼn (Jer. 5:31). Bʼaʼn in nela toj kywitz aju in kubʼ kyximen ex nya kyaj tuʼn tonin Biblia kyiʼj nix qe kawbʼil tkuʼx toj. Ateʼ nim xjal ik kyximbʼetz ik tzeʼn te jun xuʼj te Quebec atz Canadá. Xi tqʼamaʼn xuʼj jlu te jun erman: «Qa o qo kubʼ sbʼuʼne tuʼn pal, mintiʼ qpaje tiʼj, sino a te at tpaj». Tbʼanel qa mintiʼ ma qo ok ik tzeʼn qeju mintiʼ kynabʼil (Prov. 1:32; 27:12).

8. ¿Tiʼ kʼonil qiʼj tuʼn tten qnabʼil?

⁸ In tzaj tqʼamaʼn Biblia tuʼn miʼn qok ik tzeʼn qe xjal mintiʼ kynabʼil. Ex in tzaj tqʼoʼn consej lu qe: «Aju kynabʼle miʼn tzʼok ik tzaʼn tnabʼl jun kʼwaʼl, noq oʼkx ik tzaʼn tnabʼl jun tij xjal» (1 Cor. 14:20). In ten qnabʼil qa ma txi qbʼiʼn qe consej tkuʼx toj Tyol Dios. Ax ikx, chebʼe chebʼe kʼelel qnikʼ tiʼj qa in che onin consej lu qiʼj tuʼn tjaw qjyoʼn aju mas tbʼanel ex tuʼn miʼn ttzaj nya bʼaʼn qiʼj. Tuʼntzunju, bʼaʼn tuʼn qximen kyiʼj tiʼchaq in che bʼant quʼn. Jun techel, qa ya ma tzikʼ ambʼil in xnaqʼtzana tiʼj Tyol Dios ex in xiʼya kyoj chmabʼil, pero naʼmx txi tqʼamaʼna te Jehová tuʼn tajbʼena te ex naʼmx tbautisarina, bʼaʼn tuʼn t-ximana tiʼj tiquʼn naʼmx tbʼant tuʼna. Yajtzun qa ya o bautisarina, ¿maspe tbʼanel in pakbʼana jaʼlo ex maspe tbʼanel in qʼona xnaqʼtzbʼil? ¿In kubʼpe tyekʼina tukʼil tbʼinchbʼena qa in nok lepeʼya kyiʼj nabʼil tkuʼx toj Tyol Dios? ¿In kubʼpe tyekʼina tbʼanel tmoda kyukʼil txqantl ik tzeʼn te Jesús? Qa in nel qnikʼ tiʼj qa il tiʼj tuʼn kybʼant junjun chʼixpubʼil quʼn, bʼaʼn tuʼn tok qqʼoʼn qwiʼ kyiʼj tconsej Jehová aju in nok qnabʼil kyuʼn (Sal. 19:7).

9. ¿Tzeʼn in kubʼ kyyekʼin xjal in che xmayin qa in nel kyikʼun tnabʼil Jehová?

⁹ Aʼyeju tkabʼin clase xjal mintiʼ in xi kybʼiʼn tnabʼil Dios, aqeju in che xmayin. At maj, in che kanet xjal quʼn ik tzeʼn jlu toj pakbʼabʼil. Kygan tuʼn kyxmayin kyiʼj txqantl (Sal. 123:4). Kyaj qʼamaʼn toj Tyol Dios qa che tel xjal bʼaʼn che xmayin toj mankbʼil tqʼijlalil (2 Ped. 3:3, 4). Ik tzeʼn bʼant kyuʼn tjiʼ Lot, ateʼ nim xjal mintiʼ in nok kyqʼoʼn kywiʼ tiʼjju in tzaj tqʼamaʼn Tyol Dios (Gén. 19:14). Ex in che xmayin kyiʼj qeju in xi kybʼiʼn nabʼil tkuʼx toj. Aqeju xjal lu «in kybʼinchaʼn kyex kyajbʼil mya bʼaʼn» (Jud. 7, 17, 18). ¿Atpe toklen aju in tzaj tqʼamaʼn Tyol Dios tukʼil kybʼinchbʼen apóstata ex qe xjal in nel kyikʼun Jehová? At.

10. Ik tzeʼn in tzaj tqʼamaʼn Salmo 1:1, ¿tiʼ jaku bʼant quʼn tuʼn miʼn qok ik tzeʼn qe xjal in che xmayin?

¹⁰ ¿Tiʼ jaku bʼant quʼn tuʼn miʼn qok ik tzeʼn kye xjal in che xmayin? Jun techel, mintiʼ tuʼn tok qmojbʼan qibʼ kyukʼil xjal in che yolin nya bʼaʼn tiʼj tkyaqil (kjawil uʼjit Salmo 1:1). Tuʼntzunju, mintiʼ tuʼn t-xi qbʼiʼn ex mintiʼ tuʼn tjaw quʼjin aju in tzaj kyqʼamaʼn apóstata. Qa mintiʼ ma tzʼok qxqʼuqin qibʼ, jun rat jaku txi tzyet tuʼn qyolin nya bʼaʼn tiʼj Jehová ex kyiʼj tqanil in tzaj tqʼoʼn ttnam. Pero tuʼn miʼn tbʼaj jlu qiʼj, bʼaʼn tuʼn tkubʼ qxjelin jlu: «¿Tiʼ nmode in kubʼ nyekʼine aj ttzaj qʼamaʼn jun akʼaj xnaqʼtzbʼil moqa jun akʼaj tqanil? ¿In nokpe nqʼoʼne nwitze tiʼj kypaltil erman in che kubʼ nej qwitz?». Qa ma tzʼel qnikʼ tiʼj qa il tiʼj tuʼn tbʼant jun chʼixpubʼil quʼn ex qa ma txi qbʼinchaʼn, ktzalajel Jehová qiʼj (Prov. 3:34, 35).

11. ¿Tiʼ kyximbʼetz xjal mintiʼ kynabʼil at kyiʼj tkawbʼil Jehová?

¹¹ Aʼyeju toxin clase xjal mintiʼ in xi  kybʼiʼn tnabʼil Dios, aqeju mibʼan che bʼin. In nok qʼoʼn kybʼi ik tzeʼn jlu tuʼnju nya kyaj tuʼn t-xi kybʼiʼn qe kawbʼil tkuʼx toj Tyol Dios. Ex in kubʼ kybʼinchaʼn aju mas bʼaʼn in nela toj kywitz (Prov. 12:15). In nel kyikʼun Jehová, aju tajaw nabʼil (Sal. 53:1). Aj qpakbʼan, chʼixme tkyaqil maj in che xmayin qiʼj tuʼnju in nok qqʼoʼn kyoklen nabʼil tkuʼx toj Tyol Dios. Pero mlayx che onin qiʼj tuʼn tten jun tbʼanel qanqʼibʼil. In tzaj tqʼamaʼn Tyol Dios jlu: «Aju xjal mintiʼ tnabʼl, mintiʼ bʼaʼn tuʼn alkye yol tuʼn t-xi tmaʼn kywitz aj sanjelal, tuʼnju maʼ t-xilen ju nabʼl ex mlay tzʼel tnikʼ tiʼj» (Prov. 24:7). Mintiʼ jun tbʼanel consej jaku tzaj kyqʼoʼn xjal mintiʼ kynabʼil qe. Tuʼntzunju, in tzaj tqʼamaʼn Jehová jlu qe: «Paʼn el tibʼa tiʼj ju xjal mintiʼ tnabʼl» (Prov. 14:7).

12. ¿Tiʼ jaku tzʼonin qiʼj tuʼn miʼn qok ik tzeʼn qe xjal mintiʼ kynabʼil?

¹² In nel kyikʼun xjal tconsej Jehová, atzun qe in nok qkʼujlaʼn ex qaj tuʼn tten qximbʼetz ik tzeʼn te. Jaku chʼiy mas qkʼujlabʼil tiʼj Jehová aj qximen tiʼjju jaku bʼaj qiʼj qa ma chex qbʼiʼn tconsej ex qa mintiʼ ma chex qbʼiʼn. Bʼaʼn tuʼn qximen tiʼj kyanqʼibʼil xjal in nel kyikʼun tconsej Jehová ex qo ximen tiʼj tbʼanel qanqʼibʼil at tuʼnju in qo nimen te Dios (Sal. 32:8, 10).

13. ¿In qo okpe t-obligarin Jehová tuʼn t-xi qbʼiʼn tconsej?

¹³ In xi tqʼoʼn Jehová ambʼil kye kykyaqil xjal tuʼn tok kyojtzqiʼn tnabʼil, pero mintiʼ in che ok t-obligarin. Noqtzun tuʼnj, in tzaj tqʼamaʼn tiʼ kbʼajel kyiʼj qeju mintiʼ in nok kyqʼoʼn kywiʼ tiʼj tnabʼil (Prov. 1:29-32). Kykyaqil qeju in kubʼ kyximen tuʼn miʼn kynimen te Jehová, che okel weʼ kywitz nya bʼaʼn tuʼn tpaj kymod. Aj tikʼ ambʼil, tzul nya bʼaʼn kyiʼj ex te mankbʼil che kbʼel najsaʼn. Atzun qeju in che nimen te Jehová, che kjapunel yol lu kyiʼj: «Atzunju xjal ma tzaj tqʼoʼn twiʼ tiʼj nyole, ok kʼanqʼil tuj tzalajbʼil ex mlayx tzaj t-xobʼil twitz noq alkye tzul tiʼj» (Prov. 1:33).

14, 15. ¿Tiʼ xnaqʼtzbʼil jaku tzʼel qiʼn tiʼj Proverbios 4:23?

¹⁴ In qo tzalaj aj t-xi qbʼiʼn qe tnabʼil Dios. Ik tzeʼn ma tzʼel qnikʼ tiʼj, in tzaj tqʼoʼn Jehová ambʼil kye kykyaqil xjal tuʼn tel kynikʼ kyiʼj tconsej. Jun techel, in che tzaj tqʼoʼn tbʼanel consej qe toj uʼj te Proverbios, aqeju jaku che onin qiʼj toj tkyaqil ambʼil ex jaku che onin qiʼj tuʼn tten jun tbʼanel qanqʼibʼil. Qo xnaqʼtzan kyiʼj kyaje consej lu.

¹⁵ Qxqʼuqink qanmi moqa qximbʼetz. In tzaj tqʼamaʼn Tyol Dios jlu: «Aju mas bʼaʼn tuʼn tbʼinchanteya twitz tkyaqil, qʼonka kwent tiʼj t-ximbʼetza, porke tiʼj jlu  in tzaj chwinqlal» (Prov. 4:23). Qo ximen tiʼjju il tiʼj tuʼn tbʼant quʼn tuʼn tok qxqʼuqin qanmi. Nim toklen tuʼn qwaʼn kyiʼj tbʼanel wabʼj, tuʼn qbʼinchan ejercicio ex tuʼn miʼn qnaqʼet kyiʼj junjun tiʼchaq jaku tzaj kyiʼn nya bʼaʼn qiʼj. Chʼixme ax jlu jaku bʼant quʼn tuʼn tok qxqʼuqin qximbʼetz. Nim toklen tuʼn qxnaqʼtzan tiʼj Tyol Dios tkyaqil qʼij, tuʼn tbʼaj qbʼinchaʼn qten kyiʼj chmabʼil, tuʼn qten kyoj ex tuʼn t-xi qqʼoʼn jun qyol. Ax ikx, il tiʼj tuʼn kukx qpakbʼan ex tuʼn tel qpan qibʼ kyiʼj tiʼchaq jaku tzaj kyiʼn nya bʼaʼn qiʼj, ik tzeʼn qe saqchbʼil at yaẍbʼil kyoj ex qe nya bʼaʼn amiw.

16. ¿Tzeʼn in nonin nabʼil tkuʼx toj Proverbios 23:4 ex 5 qiʼj?

¹⁶ Qo tzalaj tiʼjju at qe. In tzaj tqʼoʼn Tyol Dios consej lu qe: «Miʼn bʼaj t-siksan tibʼa tuʼn toka te qʼinun; [...] Qa ma tzʼok tqʼoʼn tkwenta tiʼj qʼinumabʼl, kʼelel tnikʼa tiʼj qa mya nim in ten, porke jurat kbʼel naj ik tzaʼn jun tʼiw jurat nnikʼ lipan ex najchaq in pon» (Prov. 23:4, 5). Maske jun rat jaku naj qʼinumabʼil, in nok tilil kyuʼn xjal qʼinun ex qe mebʼa tuʼn tkambʼet mas pwaq kyuʼn. Tuʼntzunju, in bʼant alkyexku tiʼ kyuʼn tuʼn tkambʼet pwaq maske jaku tzaj nya bʼaʼn tiʼj kyamiwbʼil kyukʼil txqantl, jaku kubʼ kyyekʼin nya bʼaʼn kymod ex jaku tzaj yabʼil kyiʼj (Prov. 28:20; 1 Tim. 6:9, 10). Atzunte nabʼil, in nonin qiʼj tuʼn tten qximbʼetz toj tumel tiʼj pwaq. Ax ikx, in xqʼuqin qiʼj tuʼn miʼn tpon qkʼuʼj kyiʼj nim tiʼchaq ex tuʼn qtzalaj tiʼjju at qe (Ecl. 7:12).

17. ¿Tzeʼn jaku che ok qyol ik tzeʼn «kyyol qe xjal at kynabʼl» in yolin Proverbios 12:18 tiʼj?

¹⁷ Bʼaʼn tuʼn qximen kyiʼj qyol kxel qqʼamaʼn. Qa mintiʼ ma tzʼok qxqʼuqin qibʼ, jaku tzʼok qbʼinchaʼn nya bʼaʼn kyiʼj txqantl kyuʼn qyol. In tzaj tqʼamaʼn Tyol Dios jlu: «At xjal in kʼixbʼisan tiʼj juntl kyuʼn qe tyol, atzun kyyol qe xjal at kynabʼl nnoʼk te qʼanbʼil kye txqantl» (Prov. 12:18). Qa mintiʼ ma qo yolin tiʼj kypaltil txqantl, kʼonil qiʼj tuʼn tten jun tbʼanel qamiwbʼil kyukʼil (Prov. 20:19). Tuʼn miʼn  tok qbʼinchaʼn nya bʼaʼn kyiʼj txqantl tukʼilju in xi qqʼamaʼn ex tuʼn t-xi qqʼuqbʼaʼn kykʼuʼj, bʼaʼn tuʼn tjaw quʼjin ex tuʼn qximen tiʼj Tyol Dios (Luc. 6:45). Qa ma bʼant jlu quʼn, jaku che onin qyol kyiʼj txqantl (Prov. 18:4).

18. ¿Tzeʼn in nonin Proverbios 24:6 qiʼj toj pakbʼabʼil?

¹⁸ Qbʼinx qe tqanil in tzaj tqʼamaʼn ttnam Jehová. In tzaj tqʼoʼn Tyol Dios consej lu qe: «Qa ma tzʼok jun qʼoj, chebʼa in kubʼ ximet tzaʼn tten tuʼn ttzyet, ex qa at nim xjal in kyqʼoʼn consej, jaku kubʼ tiʼj aj qʼoj» (Prov. 24:6). ¿Tzeʼn jaku tzʼonin texto jlu qiʼj aj qpakbʼan ex aj qqʼon xnaqʼtzbʼil? Aj qpakbʼan, mintiʼ in kubʼ qbʼinchaʼn aju qex qximbʼetz, sino in qo ok lepeʼ kyiʼj tqanil in che tzaj qʼoʼn qe. Kyoj chmabʼil, jaku tzʼel qiʼn jun tbʼanel xnaqʼtzbʼil kyiʼj chikʼbʼabʼil ex kyiʼj yekʼbʼil in netz kyqʼoʼn erman. Ax ikx, in tzaj tqʼoʼn ttnam Jehová qe uʼj ex qe video tuʼntzun tel kynikʼ xjal tiʼj Tyol Dios. ¿In che ajbʼenpe onbʼil lu tuʼna toj tumel?

19. ¿Tiʼ t-ximbʼetza at tiʼj nabʼil in tzaj tqʼoʼn Jehová? (Proverbios 3:13-18).

¹⁹ (Kjawil uʼjit Proverbios 3:13-18). In xi qqʼoʼn nimxix chjonte te Jehová kyiʼj consej tkuʼx toj Tyol tuʼnju nimxix in che onin qiʼj. Toj xnaqʼtzbʼil lu, ma qo xnaqʼtzan kyiʼj junjun consej tkuʼx toj uʼj te Proverbios. Ax ikx, jaku che kanet mas nabʼil quʼn kyoj txqantl uʼj tkuʼx toj Tyol Dios. Tuʼntzunju, bʼaʼn tuʼn qok lepeʼ tiʼj tnabʼil Dios ex mintiʼ tuʼn tok qqʼoʼn qwiʼ tiʼjju in kubʼ kyximen xjal. Qʼuqli qkʼuʼj tiʼj qa «at tzalajbʼil te kye qeju mintiʼ in xi kytzoqpiʼn» nabʼil.