1. ¿Tiʼ qʼuqbʼil qkʼuʼj o tzaj tqʼoʼn Jehová?

 O TZAJ tqʼoʼn Jehová qʼuqbʼil qkʼuʼj tuʼn qanqʼin te jumajx. Ateʼ junjun tmajen che anqʼil toj kyaʼj ik tzeʼn kye anjel (1 Cor. 15:50, 53). Pero chʼixme kykyaqil tmajen che anqʼil te jumajx tzalu twitz Txʼotxʼ ex che tzalajel tiʼj jun tbʼanel kyanqʼibʼil (Apoc. 21:3, 4). Qkyaqilx in nok qqʼoʼn toklen qʼuqbʼil qkʼuʼj maske atz qo anqʼil tzalu twitz Txʼotxʼ moqa toj kyaʼj.

2. ¿Tiquʼn qʼuqli qkʼuʼj tiʼj qa ktel jun tbʼanel qanqʼibʼil?

² ¿Tiʼ t-xilen yol qʼuqbʼil qkʼuʼj in tzaj qʼamaʼn toj Tyol Dios? At maj, atz in yolin tiʼjju tuʼn tok qeʼ qkʼuʼj tiʼj qa ax tok che ul junjun tbʼanel tiʼchaq. Qʼuqli qkʼuʼj tiʼj qa ktel jun tbʼanel qanqʼibʼil toj ambʼil tzul tuʼnju a Jehová in tzaj qʼamante (Rom. 15:13). Ojtzqiʼn qe ttziybʼil quʼn ex kukx in japun twi tyol (Núm. 23:19). Qʼuqli qkʼuʼj tiʼj qa taj Jehová tuʼn t-xi tbʼinchaʼn aju o tzaj tqʼamaʼn ex kbʼantel tuʼn. Mintiʼ in kubʼ qximen qa ktel jun tbʼanel qanqʼibʼil noq tuʼnju atzun qaj moqa tuʼnju atzun in kubʼ qximen, sino tuʼnju qʼuqli qkʼuʼj tiʼj qa ax tok.

3. ¿Tiʼ kʼelel qnikʼ tiʼj toj xnaqʼtzbʼil lu? (Salmo 27:14).

³ Kʼujlaʼn qoʼ tuʼn Jehová ex taj tuʼn tok qeʼ qkʼuʼj tiʼj (kjawil uʼjit Salmo 27:14). Qa ma tzʼok qeʼ qkʼuʼj tiʼj Jehová, jaku tzikʼx alkyexku nya bʼaʼn quʼn ex jaku tzʼonin qiʼj tuʼn kukx qtzalaj. Toj xnaqʼtzbʼil lu, kʼelel qnikʼ tiʼj alkye tten in qo ok t-xqʼuqin qʼuqbʼil qkʼuʼj. Tnejel, qo xnaqʼtzan tiʼj tiquʼn in xi qqʼamaʼn qa in nok qʼuqbʼil qkʼuʼj ik tzeʼn jun tzyubʼil bark ex ik tzeʼn jun casco. Yajxitl, qo xnaqʼtzan  tiʼjju jaku tzʼonin qiʼj tuʼn tchʼiy qʼuqbʼil qkʼuʼj.

4. ¿Tiquʼn in nok qʼuqbʼil qkʼuʼj ik tzeʼn jun tzyubʼil bark? (Hebreos 6:19).

⁴ Toj uʼj te Hebreos, tqʼama apóstol Pablo qa in nok qʼuqbʼil qkʼuʼj ik tzeʼn jun tzyubʼil bark (kjawil uʼjit Hebreos 6:19). Tuʼnju kukx bʼet Pablo toj mar, ok tkeʼyin qa in che onin tzyubʼil bark kyiʼj tuʼn miʼn kyxi mulqʼaj toj aʼ. Jun maj, tej in che bʼettoq toj mar, tzaj jun kyqʼiqʼ jbʼal. Toj ambʼil lu, ok tkeʼyin qa kux kyxoʼn xjal tzyubʼil bark toj aʼ tuʼntzun miʼn tchokarin kyiʼj abʼj (Hech. 27:29, 39-41). In nonin tzyubʼil bark tiʼj tuʼn miʼn tyukch, ax ikx te qʼuqbʼil qkʼuʼj, in nonin qiʼj tuʼn miʼn tel qpan qibʼ tiʼj Jehová aj qok weʼ kywitz nya bʼaʼn in che ok ik tzeʼn jun kyqʼiqʼ jbʼal. Ax ikx, in nonin qiʼj tuʼn miʼn ttzaj bʼaj qkʼuʼj tuʼnju ojtzqiʼn quʼn qa tzul jun tbʼanel ambʼil. Miʼn tzikʼ tnaʼl quʼn qa kyaj tqʼamaʼn Jesús qa qo elel ikʼun (Juan 15:20). Qa ma qo ximen tiʼj qʼuqbʼil qkʼuʼj in tzaj ttziyen Jehová, in nonin qiʼj tuʼn kukx qajbʼen te.

5. ¿Tzeʼn onin qʼuqbʼil tkʼuʼj Jesús tiʼj maske ojtzqiʼntoq tuʼn qa kbʼel bʼyoʼn?

⁵ Qo xnaqʼtzan tiʼj tzeʼn onin qʼuqbʼil tkʼuʼj Jesús tiʼj tuʼn tten tzʼaqli twitz Jehová maske ojtzqiʼntoq tuʼn qa kbʼel bʼyoʼn. Toj Pentecostés te abʼqʼi 33, tqʼama apóstol Pedro jun profecía tkuʼx toj Salmo ex in tzaj tyekʼin qa ok qeʼ tkʼuʼj Jesús tiʼj Jehová. Tqʼama jlu: «Qʼuql nkʼuʼje tiʼj, [...] mlay kyaj tqʼoʼna wanmiye tuj kynajbʼil kyimni, ex mlay chin kyaj tqʼoʼna tuʼn ttzuwix nximlale, [...] ktzajel tqʼoʼna tzalajbʼil nim weye ok ntene tukʼila» (Hech. 2:25-28; Sal. 16:8-11). El tnikʼ Jesús tiʼj qa oktoq kbʼel bʼyoʼn, pero ok qeʼ tkʼuʼj tiʼj qa kjawil anqʼin tuʼn Jehová ex qa ktel juntl maj tukʼil toj kyaʼj (Heb. 12:2, 3).

6. ¿Tiʼ tqʼama jun ermano tiʼj qʼuqbʼil qkʼuʼj?

⁶ O tzʼonin qʼuqbʼil kykʼuʼj erman kyiʼj tuʼn kyex twitz nya bʼaʼn. Qo yolin tiʼjju bʼaj tiʼj Leonard Chinn, jun ermano te Inglaterra ten tzʼaqli twitz Jehová. Tej tok Tnejel Nimaq Qʼoj twitz Tkyaqil Txʼotxʼ, okx qʼoʼn toj cárcel tuʼnju nyatoq taj tuʼn t-xiʼ kyxol soldad. El paʼn kyiʼj txqantl toj kabʼe xjaw ex yajxitl ok obligarin aqʼunal. Tej tikʼ ambʼil, kubʼ ttzʼibʼin jlu: «Aju bʼaj wiʼje, tzaj tyekʼin weye qa nim toklen tuʼn tten qʼuqbʼil qkʼuʼj tuʼn tikʼx quʼn. Aju bʼaj tiʼj Jesús, kyiʼj apóstol, kyiʼj profeta ex aju in tzaj ttziyen Dios qe toj Tyol, in tzaj tqʼoʼn jun tbʼanel qʼuqbʼil qkʼuʼj tiʼj ambʼil tzul ex in tzaj tqʼoʼn qipumal tuʼn tikʼx quʼn». Onin qʼuqbʼil tkʼuʼj Leonard tiʼj ik tzeʼn jun tzyubʼil bark, ax ikx qe jaku tzʼonin qiʼj.

7. ¿Tzeʼn in chʼiy qʼuqbʼil qkʼuʼj aj qok weʼ kywitz nya bʼaʼn? (Romanos 5:3-5; Santiago 1:12).

⁷ In chʼiy qʼuqbʼil qkʼuʼj aj kyikʼx nya bʼaʼn quʼn, aj tok qkeʼyin qa in tzalaj Jehová qiʼj ex qa in nonin qiʼj (kjawil uʼjit Romanos 5:3-5; Santiago 1:12). Tuʼntzunju, jaku txi qqʼamaʼn qa mas o chʼiy qʼuqbʼil qkʼuʼj twitzju tej tok qojtzqiʼn axix tok. Taj Satanás tuʼn ttzaj bʼaj qkʼuʼj kyuʼn nya bʼaʼn, pero jaku qo ex kywitz tuʼn tonbʼil Jehová.

8. ¿Tiquʼn in nok qʼuqbʼil qkʼuʼj ik tzeʼn jun casco? (1 Tesalonicenses 5:8).

⁸ Ax ikx in tzaj tqʼamaʼn Tyol Dios qa in nok qʼuqbʼil qkʼuʼj ik tzeʼn jun casco  (kjawil uʼjit 1 Tesalonicenses 5:8). In najbʼen jun casco tuʼn jun soldad tuʼn miʼn tkʼixbʼi twiʼ kyuʼn aj qʼoj. Ax ikx qe jaku tzʼonin qʼuqbʼil qkʼuʼj qiʼj tuʼn tok qxqʼuqin qximbʼetz aj qqʼojin tukʼil Satanás. In najbʼen nim tiʼchaq tuʼn tuʼn tkubʼ tqʼoʼn tramp qwitz ex tuʼn tten nya bʼaʼn qximbʼetz. Ik tzeʼn in nonin jun casco tiʼj jun soldad, ax ikx qe in nonin qʼuqbʼil qkʼuʼj qiʼj tuʼn kukx qten tzʼaqli twitz Jehová.

9. ¿Tiʼ jaku bʼaj kyiʼj xjal qa mintiʼ qʼuqbʼil kykʼuʼj?

⁹ Qa ma tzʼok qqʼoʼn qwiʼ tiʼj qʼuqbʼil qkʼuʼj tuʼn qanqʼin te jumajx, jaku tzʼonin qiʼj tuʼn tjaw qjyoʼn aju mas bʼaʼn. Pero qa oʼkx ma tzʼok qqʼoʼn qwiʼ tiʼjju qex qajbʼil, jaku tzʼel qiʼn toklen qʼuqbʼil qkʼuʼj. Qo ximen tiʼjju bʼaj kyiʼj junjun okslal te Corinto. Ya mintiʼ ok qeʼ kykʼuʼj tiʼj qa che kjawil anqʼin kyimni (1 Cor. 15:12). Tqʼama Pablo qa aqeju mintiʼ ok qeʼ kykʼuʼj tiʼj xnaqʼtzbʼil lu, oʼkxtoq in che ximen tiʼjju bʼaj kyiʼj (1 Cor. 15:32). Toj ambʼil jaʼlo, mintiʼ in nok qeʼ kykʼuʼj xjal kyiʼj ttziybʼil Dios, tuʼntzunju in xi kybʼinchaʼn noq alkyexku tiʼ tuʼn kytzalaj. Atzun qe, in nok qeʼ qkʼuʼj tiʼj tbʼanel qanqʼibʼil in tzaj ttziyen Dios. In nok qʼuqbʼil qkʼuʼj ik tzeʼn jun casco ex in nonin qiʼj tuʼn tok qxqʼuqin qximbʼetz, tuʼn miʼn qximen oʼkx qiʼjx ex tuʼn miʼn t-xi qnajsaʼn qamiwbʼil tukʼil Jehová (1 Cor. 15:33, 34).

10. ¿Tzeʼn in nonin qʼuqbʼil qkʼuʼj qiʼj tuʼn miʼn tok qqʼoʼn qwiʼ kyiʼj nya ax tok yol?

¹⁰ Ax ikx jaku tzʼonin qʼuqbʼil qkʼuʼj qiʼj tuʼn miʼn tkubʼ qximen qa noqx gan in qo ajbʼen te Jehová. Jun techel, jakulo kubʼ t-ximen jun xjal jlu: «Mlayx tzaj qʼoʼn nchwinqlale te jumajx. Nya bʼaʼn xjal qine ex mlayx che japun tkawbʼil Jehová wuʼne». Bʼaʼn tuʼn ttzaj qnaʼn qa chʼixme ax jlu xi tqʼamaʼn Elifaz te Job. Tqʼama jlu: «Mintiʼ jun xjal saq tuj tanmi». Ex tqʼamatl jlu: «Milpe kyiʼj qe t-anjel mintiʼ nnoʼk qeʼ tkʼuʼj, ex myaʼlpe saq nneʼl ju kyaʼj tuj twitz» (Job 15:14, 15). Nya ax tok qe yol lu ex atzun taj Satanás tuʼn tkubʼ qximen. Ojtzqiʼn tuʼn qa jaku naj qʼuqbʼil qkʼuʼj qa kukx ma qo ximen tiʼj jlu. Tuʼntzunju, miʼn tzʼok qqʼoʼn qwiʼ kyiʼj tyol Satanás ex qqʼonk qwiʼ kyiʼj ttziybʼil Jehová. Bʼaʼn tuʼn tok qeʼ qkʼuʼj tiʼj qa taj Jehová tuʼn qanqʼin te jumajx ex kʼonil qiʼj tuʼn ttzaj tqʼoʼn oyaj lu qe (1 Tim. 2:3, 4).

11. ¿Tiquʼn il tiʼj tuʼn tten qpasens akux in pon ambʼil tuʼn tjapun twi ttziybʼil Jehová?

¹¹ At maj kwest in nela toj qwitz tuʼn tten qʼuqbʼil qkʼuʼj kyuw. Ex jakulo bʼaj qpasens akux in qo ayon tuʼn tjapun twi ttziybʼil Jehová. Tuʼnju kukx o ten Jehová, junxitl tumel in nok tqʼoʼn twitz tiʼj tajlal ambʼil (2 Ped. 3:8, 9). Kjapunel twi t-ximbʼetz tuʼn toj ambʼil mas bʼaʼn toj twitz ex nya toj ambʼil mas bʼaʼn toj qwitz. ¿Tiʼ kʼonil qiʼj tuʼn tten qʼuqbʼil qkʼuʼj kyuw ex tuʼn tten qpasens akux in japun kywi tyol Jehová? (Sant. 5:7, 8).

12. Ik tzeʼn in tzaj tqʼamaʼn Hebreos 11:1 ex 6, ¿tiʼ toklen qʼuqbʼil qkʼuʼj at tukʼilju in xi qokslaʼn?

¹² Jaku ten qʼuqbʼil qkʼuʼj kyuw qa ma qo ten nqayin ttxlaj Jehová tuʼnju oʼkx te jaku tzaj qʼonte qchwinqlal te jumajx. In tzaj tqʼamaʼn Tyol Dios qa in kubʼ qyekʼin qʼuqbʼil qkʼuʼj aj t-xi qokslaʼn qa at Dios ex qa in tzaj tqʼoʼn «oyaj kye qeju in che jyon tiʼj» (kjawil uʼjit Hebreos 11:1, 6). Qa ma tzʼok qeʼ qkʼuʼj tiʼj qa ax tok at Jehová,  mas kʼokel qeʼ qkʼuʼj tiʼj qa che kjapunel twi ttziybʼil. Qo xnaqʼtzan tiʼj tzeʼn jaku ten jun tbʼanel qamiwbʼil tukʼil tuʼntzun tten qʼuqbʼil qkʼuʼj kyuw.

13. ¿Tzeʼn jaku qo ok te tamiw Dios?

¹³ Qo naʼn Dios te Jehová ex quʼjinktz Tyol. Mintiʼ in nok qkeʼyin Jehová, pero jaku qo ok te tamiw. Jaku qo yolin tukʼil aj qnaʼn Dios ex qʼuqli qkʼuʼj tiʼj qa in qo tzaj tbʼiʼn (Jer. 29:11, 12). Ex jaku tzʼok qbʼiʼn aj tjaw quʼjin Tyol ex aj qximen tiʼj. Aj tjaw quʼjin qa xqʼuqin Jehová kyiʼj tmajen toj ambʼil ojtxe, mas in chʼiy qʼuqbʼil qkʼuʼj. «Tkyaqil aju o tzʼibʼanjtz tuj Tuʼjil ojtxi, o tzʼibʼanjtz te xnaqʼtzbʼil qe, tuʼn tten qpasens ex tuʼn tqeʼ qkʼuʼj tuʼnju yol tzʼibʼan tuj Tuʼjil, tuʼntzun tqeʼxix qkʼuʼj tiʼj Dios» (Rom. 15:4).

14. ¿Tiquʼn bʼaʼn tuʼn qximen tiʼjju o bʼant tuʼn Jehová kyiʼj txqantl?

¹⁴ Qo ximen tiʼj alkye tten o japun kywi ttziybʼil Jehová. Qo ximen tiʼjju bʼant tuʼn tiʼj Abrahán ex Sara. Tuʼnju ya otoq che tijen, ya mlaytoq tzul jun kykʼwal, pero xi tqʼamaʼn Jehová kye qa tzul jun kykʼwal (Gén. 18:10). ¿Tiʼ tmod Abrahán kubʼ tyekʼin? In tzaj tqʼamaʼn Tyol Dios jlu: «Qeʼxix tkʼuʼj tiʼj tuʼn tok te mambʼaj kye nimku xjal» (Rom. 4:18). Kwest jaku tzʼela toj twitz jun xjal tuʼn t-xi tnimen jlu, pero ok qeʼ tkʼuʼj Abrahán tiʼj qa kjapunel twi ttziybʼil Jehová. Ex atzun jlu bʼant tuʼn (Rom. 4:19-21). In tzaj kyyekʼin txʼolbʼabʼil ik tzeʼn jlu qa kukx in japun twi tyol Jehová maske kwest jaku tzʼela toj qwitz.

15. ¿Tiquʼn bʼaʼn tuʼn qximen tiʼjju o bʼant tuʼn Jehová qiʼj?

¹⁵ Qo ximen tiʼjju o bʼant tuʼn Jehová qiʼj. ¿Ope ximen teya tiʼj tzeʼn o japun twi jun ttziybʼil Jehová ex tzeʼn o tzʼonin tiʼja?  Jun techel, kyaj tqʼamaʼn Jesús qa tzul tqʼoʼn Jehová aju at tajbʼen qe (Mat. 6:32, 33). Ax ikx, kyaj tqʼamaʼn qa tzul tqʼoʼn Jehová xewbʼaj xjan qa ma txi qqanin te (Luc. 11:13). O japun kywi tyol Jehová lu. Ex jakulo che tzaj qnaʼn junjuntl ttziybʼil ik tzeʼn qa kbʼel tnajsaʼn qil, qa tzul tqʼuqbʼaʼn qkʼuʼj ex qa tzul tqʼoʼn xnaqʼtzbʼil qe (Mat. 6:14; 24:45; 2 Cor. 1:3). Qa ma qo ximen tiʼj tkyaqilju o bʼant tuʼn Jehová qiʼj, mas kʼokel qeʼ qkʼuʼj tiʼj qa che kjapunel ttziybʼil toj ambʼil tzul.

16. ¿Tiquʼn jun tbʼanel oyaj qʼuqbʼil qkʼuʼj?

¹⁶ Jun tbʼanel oyaj qʼuqbʼil qkʼuʼj o tzaj tqʼoʼn Jehová. Qaj tuʼn tpon ambʼil tuʼn tten qchwinqlal te jumajx ex qʼuqli qkʼuʼj tiʼj qa kjapunel twiʼ. In nok qʼuqbʼil qkʼuʼj ik tzeʼn jun tzyubʼil bark tuʼnju in nonin qiʼj tuʼn qex kywitz nya bʼaʼn, tuʼn tikʼx ikʼbʼil quʼn ex tuʼn tten qipumal aj qok weʼ twitz kamik. Ax ikx, in nok ik tzeʼn jun casco tuʼnju in nonin tiʼj qximbʼetz, in nonin qiʼj tuʼn tel qikʼen nya bʼaʼn ex tuʼn tkubʼ qbʼinchaʼn aju bʼaʼn. Mas in qo ok laqʼeʼ ttxlaj Jehová tuʼn qʼuqbʼil qkʼuʼj ex in tzaj tyekʼin qe qa kʼujlaʼn qoʼ tuʼn. Qa ma tzʼok tilil quʼn tuʼn tten qʼuqbʼil qkʼuʼj kyuw, tzul tiʼn nim tbʼanel qe.

17. ¿Tiquʼn in qo tzalaj tiʼj qʼuqbʼil qkʼuʼj?

¹⁷ Toj uʼj xi ttzʼibʼin Pablo kye okslal te Roma, tqʼama jlu: «Che tzalajxe tuʼnju qʼuql kykʼuʼje» (Rom. 12:12). Jakutoq tzalaj Pablo tuʼnju ojtzqiʼntoq tuʼn qa tzul qʼoʼn tchwinqlal te jumajx toj kyaʼj qa ma ten tzʼaqli twitz Jehová. Ax ikx qe, jaku qo tzalaj tiʼj qʼuqbʼil qkʼuʼj tuʼnju ojtzqiʼn quʼn qa kjapunel twi tyol Jehová. Tqʼama jun salmista jlu: «At tzalajbʼil teju xjal [...] nnoʼk qeʼ tkʼuʼj tiʼj Qman [...]. Kukx in japun tuʼn Dios aju yol in tzaj ttziyan» (Sal. 146:5, 6).