¿Tiquʼn mintiʼ in qoʼx toj qʼoj ik tzeʼn kye Israel toj ambʼil ojtxe?
TEJ tok Tkabʼ Nimaq Qʼoj twitz Tkyaqil Txʼotxʼ, xi tqʼamaʼn jun soldad jlu kye junjun testigo de Jehová tukʼil tkyaqil tqʼajqʼajel twiʼ: «Qa nya kyaje tuʼn kyqʼojine tukʼil Francia ex Inglaterra, che kyimele». Maske ateʼtoq nim soldad nqayin kyiʼj ex qʼiʼntoq arma kyuʼn, mintiʼ e onin erman tiʼj qʼoj. Kubʼ kyyekʼin erman lu qa mintiʼ e tzaj xobʼ. Ex in tzaj tyekʼin qa mintiʼ in cheʼx testigo de Jehová toj qʼoj. Tuʼntzunju, mintiʼ in qoʼx toj qʼoj maske in tzaj qʼamaʼn qe qa jaku qo kubʼ bʼyoʼn.
Noqtzun tuʼnj, junxitl kyximbʼetz okslabʼil tiʼj qʼoj. Nim kye in tzaj kyqʼamaʼn qa jaku che kolin okslal tiʼj kytnam ex qa il tiʼj tuʼn tbʼant jlu kyuʼn. Jakulo kubʼ kyximen: «E ok xjal te Israel te ttnam Dios ex in cheʼxtoq toj qʼoj. Qa ikju, ¿tiquʼntzun mintiʼ in bʼant jlu kyuʼn okslal toj ambʼil jaʼlo?». ¿Tiʼ jaku txi ttzaqʼweʼna te jun xjal qa ma tzaj tqanin jlu teya? Jaku txi qtzaqʼweʼn kye qa junxitl qe tiʼchaq e bʼaj kyiʼj xjal te Israel twitzju in bʼaj tiʼj ttnam Dios toj ambʼil jaʼlo. Qo xnaqʼtzan tiʼj jweʼ.
1. E ANQʼIN TMAJEN DIOS TOJ JUNX TNAM
Toj ambʼil ojtxe, jaw tskʼoʼn Jehová tnam te Israel tuʼn tok te ttnam. Xi tqʼamaʼn jlu kye: «Che okeltzune te jun kʼloj xjal etzan wuʼne kyxol kykyaqil nasyon» (Éx. 19:5). Ax ikx, xi tqʼamaʼn kye jatumel tuʼn kyanqʼin. Tuʼntzunju, tej kyqʼojin kyukʼil junjuntl tnam, mintiʼ e qʼojin kyukʼil junjuntl tmajen Dios ex mintiʼ e kubʼ kybʼyoʼn. *
Toj ambʼil jaʼlo, ateʼ tmajen Jehová «kyuj kykyaqil nasyon ex kykyaqil kyiyjil xjal, ex kykyaqil tnam, ex kykyaqil kʼloj xjal junxilchaq kyyol» (Apoc. 7:9). Qa ma cheʼx toj qʼoj, jaku che ok tzoqpaj kyiʼj kyerman ex jaku che kubʼ kybʼyoʼn.
2. TZAJ TQʼAMAʼN JEHOVÁ KYE XJAL TE ISRAEL TUʼN KYXIʼ TOJ QʼOJ
Toj ambʼil ojtxe, tzaj tqʼamaʼn Jehová toj alkye ambʼil ex tiquʼn tuʼn kyqʼojin xjal te Israel. Jun techel, tzaj tqʼamaʼn kye tuʼn kyqʼojin kyukʼil xjal te Canaán tuʼnju e kʼulin kywitz demonio, e yaẍin ex xi kyqʼoʼn kykʼwal te chojbʼil. Xi tqʼamaʼn Jehová kye xjal te Israel tuʼn tkubʼ kynajsaʼn qe xjal lu toj Txʼotxʼ Tziyen maj tuʼntzun miʼn tel kykanoʼn qe nya bʼaʼn kybʼinchbʼen (Lev. 18:24, 25). Tej ya in che anqʼintoq xjal te Israel toj Txʼotxʼ Tziyen maj, ax ikx tzaj tqʼoʼn Jehová ambʼil kye tuʼn kyqʼojin tuʼntzun miʼn tok bʼinchaʼn nya bʼaʼn kyiʼj kyuʼn aj qʼoj (2 Sam. 5:17-25). Pero mintiʼ xi tqʼoʼn Jehová ambʼil kye tuʼn tkubʼ kyximen toj alkye ambʼil tuʼn kyqʼojin. Tej kyxiʼ toj qʼoj ex mintiʼ tzaj tqʼamaʼn Jehová kye, chʼixme tkyaqil maj tzaj nya bʼaʼn kyiʼj (Núm. 14:41-45; 2 Crón. 35:20-24).
Toj ambʼil jaʼlo, mintiʼ o tzaj tqʼamaʼn Jehová kye xjal tuʼn kyxiʼ toj qʼoj. In che qʼojin tnam tuʼnju oʼkx in che ximen kyiʼjx ex nya tiʼjju tajbʼil Dios. In xi tzyet jun qʼoj kyuʼn tuʼnju kyaj tuʼn tten mas kytxʼotxʼ, kypwaq moqa tuʼn tpaj política ex kyximbʼetz xjal. ¿Yajtzun qe xjal in che qʼojin toj tbʼi Dios tuʼntzun kykolin tiʼjju nimen kyuʼn moqa tuʼn tkubʼ kynajsaʼn qe aj qʼoj tiʼj Dios? ¿In tzalajpe Dios tiʼjju in bʼant kyuʼn? Mintiʼ. In tzaj tqʼamaʼn Jehová qa a kxqʼuqil kyiʼj tmajen ex qa che kbʼel tnajsaʼn aj qʼoj tiʼj toj ambʼil tzul. Kbʼantel jlu tuʼn toj qʼoj te Armagedón (Apoc. 16:14, 16). Toj qʼoj jlu, mlay che qʼojin tmajen Jehová ateʼ tzalu twitz Txʼotxʼ, sino oʼkx qe ateʼ toj kyaʼj (Apoc. 19:11-15).
3. MINTIʼ KUBʼ KYBʼYOʼN XJAL TE ISRAEL QEJU KUBʼ KYYEKʼIN QʼUQBʼIL KYKʼUʼJ TIʼJ JEHOVÁ
Qʼojin Dios te t-xel Israel tiʼj tnam Jericó, ¿axpe jlu in bʼant tuʼn toj ambʼil jaʼlo?
Toj ambʼil ojtxe, tzaj qʼaqʼin kykʼuʼj xjal te Israel kyiʼj qeju kubʼ kyyekʼin qʼuqbʼil kykʼuʼj ex kubʼ kybʼyoʼn qeju otoq kubʼ qʼoʼn kysentens tuʼn Jehová. Qo xnaqʼtzan tiʼj kabʼe techel. Tzaj tqʼamaʼn Jehová kye xjal te Israel tuʼn tkubʼ kynajsaʼn tnam Jericó, pero tuʼnju ten qʼuqbʼil tkʼuʼj Rahab mintiʼ kubʼ bʼyoʼn kyukʼil toj tja (Jos. 2:9-16; 6:16, 17). Ax ikx, mintiʼ e kubʼ bʼyoʼn xjal te Gabaón tuʼnju kubʼ kyyekʼin qa ok kyqʼoʼn toklen Dios (Jos. 9:3-9, 17-19).
Toj ambʼil jaʼlo, in che kubʼ bʼyoʼn kykyaqil xjal toj qʼoj, axpe ikx qeju in nok qeʼ kykʼuʼj tiʼj Dios ex qeju mintiʼ kyil.
4. ILTOQ TIʼJ TUʼN T-XI KYBʼIʼN AJ ISRAEL AJU TZAJ TQʼAMAʼN JEHOVÁ KYE TUʼN TBʼANT KYUʼN TOK QʼOJ
Toj ambʼil ojtxe, tzaj tqʼamaʼn Jehová kye xjal te Israel tiʼ tuʼn tbʼant kyuʼn toj qʼoj. Jun techel, at maj tnejel xi kyqanin kye junjun tnam qa kyajtoq tuʼn kykyaj ten tjaqʼ kykawbʼil (Deut. 20:10). Ax ikx, tzaj tqʼamaʼn Jehová kye soldad tuʼn tten kyxmilal saq ex tuʼn kyok lepeʼ kyiʼj tkawbʼil (Deut. 23:9-14). Nya oʼkxju, ax ikx tzaj tqʼamaʼn Jehová kye tuʼn miʼn kyok in tzeʼn junjuntl tnam ex tuʼn miʼn ttzaj kyviolarin qe xuʼj aj kykambʼan. Axpe ikx, qa tajtoq jun xjal te Israel tuʼn tkubʼ mojeʼ tukʼil jun xuʼj te tnam otoq kubʼ tiʼj kyuʼn, iltoq tiʼj tuʼn tkubʼ tayon tuʼn tikʼ jun xjaw (Deut. 21:10-13).
Toj ambʼil jaʼlo, o kubʼ kyximen chʼixme kykyaqil tnam alkyeqe ley tiʼj qʼoj. O bʼant jlu kyuʼn tuʼn kyxqʼuqin kyiʼj xjal, noqtzun tuʼnj, mintiʼ in japun twi ley kyuʼn.
5. QʼOJIN DIOS TE T-XEL TTNAM
Tej tqʼojin Jehová tiʼj tnam Jericó, mintiʼ kubʼ bʼyoʼn Rahab ex qe toj tja tuʼnju ten qʼuqbʼil tkʼuʼj, ¿axpe jlu in bʼaj toj ambʼil jaʼlo?
Toj ambʼil ojtxe, qʼojin Jehová te kyxel xjal te Israel ex nimku maj e bʼant milagr tuʼn tuʼn kykambʼan. Jun techel, onin kyiʼj tuʼn kykambʼan tiʼj tnam Jericó. Xi kybʼiʼn tyol Jehová ex «e ok ten schʼil ex jaw tqʼajqʼajel kywiʼ kyuwxix wen, atzunju muro te tnam kubʼ tilj». Iktzun tten onin Jehová kyiʼj tuʼn tkubʼ tiʼj tnam kyuʼn (Jos. 6:20). Yajxitl, kubʼ kyiʼj amorreo kyuʼn. ¿Tzeʼn onin Jehová kyiʼj toj ambʼil lu? In tzaj tqʼamaʼn Biblia jlu: «Tzaj t-xoʼn Qman txqan saqbʼaqun kyibʼaj, nmaq qe wen ik tzaʼn abʼj, ex mas nim aj Amorreo e kyim tuʼn saqbʼaqun kywitz qeju e kyim tuʼn spad kyuʼn aj Israel» (Jos. 10:6-11).
Toj ambʼil jaʼlo, mintiʼ in qʼojin Jehová te t-xel jun tnam. «Mya te twitz txʼotxʼ» Tkawbʼil ex o txi tqʼoʼn toklen Jesús tuʼn tkawin toj (Juan 18:36). Atzun kye xjal kykawbʼil, tokx tjaqʼ tkawbʼil Satanás. Tuʼntzunju, in tzaj kyyekʼin qʼoj in che bʼaj twitz Txʼotxʼ aju nya bʼaʼn tmod (Luc. 4:5, 6; 1 Juan 5:19).
IN NOK TILIL KYUʼN AXIX TOK OKSLAL TUʼN TTEN MUJBʼABʼIL
Ik tzeʼn ma tzʼel qnikʼ tiʼj, junxitl in bʼaj qiʼj ik tzeʼn kye xjal te Israel. Pero nya oʼkx tuʼn jlu mintiʼ in qoʼx toj qʼoj. Jun techel, tqʼama Jehová qa aqeju ma txi kybʼiʼn t-xnaqʼtzbʼil toj mankbʼil tqʼijlalil, «mlayx kykʼam juntl maj xnaqʼtzbʼil tuʼn tbʼant kyqʼojin». Ex mlayxtoq cheʼx toj qʼoj (Is. 2:2-4). Ax ikx, tqʼama Jesús qa «mya te twitz txʼotxʼ» qe t-xnaqʼtzbʼen ex qa mlaytoq tzʼokx kyqʼon kyibʼ toj qʼoj (Juan 15:19).
Pero nya oʼkx jlu xi tqʼamaʼn Jesús kye t-xnaqʼtzbʼen. Sino ax ikx xi tqʼamaʼn kye tuʼn miʼn tkubʼ kybʼinchaʼn jun tiʼ jaku tzaj tqʼoj juntl tuʼn (Mat. 5:21, 22). Ax ikx, xi tqʼamaʼn kye tuʼn kyten toj mujbʼabʼil ex tuʼn tok kykʼujlaʼn qe aj qʼoj kyiʼj (Mat. 5:9, 44).
¿Tiʼ in tzaj tyekʼin jlu te teyele junjun qe? Mlaylo qoʼx toj qʼoj. Pero, ¿atpe jun tiʼ in bʼant quʼn jaku tzaj tiʼn nya bʼaʼn moqa qʼoj toj congregación? Qa ikju, bʼaʼn tuʼn tok tilil quʼn tuʼn tchʼexpaj qmod moqa qbʼinchbʼen (Sant. 4:1, 11).
Mintiʼ in qo onin tiʼj qʼoj, sino in nok tilil quʼn tuʼn tten mujbʼabʼil qxol ex tuʼn tkubʼ qyekʼin kʼujlabʼil (Juan 13:34, 35). Kukx qqʼonk tilil tuʼn miʼn qonin kyiʼj qʼoj akux in pon ambʼil tuʼn tel tiʼn Jehová te jumajx (Sal. 46:9).
^ At maj e qʼojin tribu te Israel kyxolx, pero nya bʼaʼn ela jlu toj twitz Jehová (1 Rey. 12:24). Pero at maj xi tqʼoʼn Jehová ambʼil kye tuʼn kyqʼojin kyxolx tuʼnju mintiʼ otoq che nimen junjun tribu moqa tuʼnju otoq kubʼ kybʼinchaʼn nim il (Juec. 20:3-35; 2 Crón. 13:3-18; 25:14-22; 28:1-8).
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tiquʼn mintiʼ in cheʼx testigo de Jehová toj qʼoj?
Ojtzqiʼn kywitz testigo de Jehová twitz tkyaqil Txʼotxʼ qa mintiʼ in cheʼx toj qʼoj. Bʼaʼn tuʼn tel tnikʼa tiquʼn in bʼant jlu kyuʼn.
