1. ¿Tiquʼn at maj kwest in nela toj qwitz tuʼn qnimen?

 ¿ATPE maj kwest in nela toj twitza tuʼn tnimena? Axtzun jlu bʼaj tiʼj rey David, tuʼntzunju, xi tqanin jlu te Dios: «Bʼinchama wanmiye tuʼntzun nbʼinchanteya aju tajbʼila» (Sal. 51:12). Kʼujlaʼntoq Jehová tuʼn David, pero at maj kwest ela toj twitz tuʼn tnimen te. Ex ax jlu in bʼaj qiʼj. Tnejel, kwest in nela toj qwitz tuʼn qnimen tuʼnju aj il qoʼ. Tkabʼin, in nok tilil tuʼn Satanás tuʼn miʼn qnimen ik tzeʼn te (2 Cor. 11:3). Ex toxin, in qo anqʼin kyxol xjal «mibʼan che bʼin» (Efes. 2:2). Nim toklen tuʼn tok tilil quʼn tuʼn qnimen te Jehová ex kye xjal o txi tqʼoʼn kyoklen maske aj il qoʼ ex in nok tilil tuʼn Satanás ex kyuʼn xjal tuʼn miʼn tbʼant jlu quʼn.

2. ¿Tiʼ tajtoq Santiago tuʼn ttzaj tqʼamaʼn kyukʼil yol nya kwest in nela toj twitz jun xjal tuʼn tnimen qa at tnabʼil? (Santiago 3:17).

² (Kjawil uʼjit Santiago 3:17). Tqʼama Santiago qa nya kwest in nela toj twitz jun xjal tuʼn tnimen qa at tnabʼil. ¿Tiʼ tajtoq tuʼn ttzaj tqʼamaʼn? Qa il tiʼj tuʼn ttzaj anqʼin toj qanmi tuʼn qnimen kye qeju o txi tqʼoʼn Jehová kyoklen. Noqtzun tuʼnj, mintiʼ in tzaj tqʼamaʼn Jehová qe tuʼn qnimen kye qeju in tzaj kyqʼamaʼn tuʼn qikʼ kyibʼaj tkawbʼil (Hech. 4:18-20).

3. ¿Tiquʼn nim toklen toj twitz Jehová tuʼn qnimen kye qeju at jun kyoklen?

³ ¿Tiquʼn mas fácil jaku tzʼela toj qwitz tuʼn qnimen te Jehová kywitz xjal? Tuʼnju tzʼaqli qe tqanil in che tzaj tqʼoʼn qe (Sal. 19:7). Atzun kye xjal, nya tzʼaqli qe tqanil in che tzaj  kyqʼoʼn qe. Maske ikju, o txi tqʼoʼn Jehová kyoklen mambʼaj, qe aj kawil ex qe ansyan (Prov. 6:20; 1 Tes. 5:12; 1 Ped. 2:13, 14). Tuʼntzunju, qa ma qo nimen kye xjal lu, in qo nimen te Jehová. Toj xnaqʼtzbʼil lu, qo yolil tiʼjju jaku bʼant quʼn tuʼn qnimen kye qeju o txi tqʼoʼn Jehová jun kyoklen. Axpe ikx qa kwest in nela toj qwitz moqa nya qgan qe kawbʼil in che tzaj kyqʼoʼn qe.

4. ¿Tiquʼn chʼixmi kykyaqil kuʼxun mintiʼ in che nimen kye kyman?

⁴ Chʼixmi kykyaqil kuʼxun mintiʼ in che nimen kye kyman (2 Tim. 3:1, 2). ¿Tiquʼn in bʼant jlu kyuʼn? Tuʼnju in kubʼ kyximen qa mintiʼ in bʼant kyuʼn kyman aju in tzaj kyqʼamaʼn kye ex nya toj tumel in nela jlu toj kywitz. Atzun junjuntl kuʼxun, in kubʼ kyximen qa mintiʼ kyoklen consej in xi qʼoʼn kye moqa in nel tiʼn ambʼil kye tuʼn kybʼant junjun tiʼchaq kyuʼn. Qa ax lu in kubʼ t-ximana, kwestlo in nela toj twitza tuʼn t-xi tnimana tkawbʼil Jehová lu: «Kynimanxe kymane ik tzaʼn in tmaʼn Qajaw, porke tuj tumelxix jlu» (Efes. 6:1). Pero, ¿tiʼ jaku tzʼonin tiʼja?

5. Ik tzeʼn in tzaj tqʼamaʼn Lucas 2:46 a 52, ¿tiquʼn a Jesús jun tbʼanel techel qwitz tej tnimen kye tman?

⁵ Mas nya kwest jaku tzʼela toj qwitz tuʼn qnimen qa ma qo xnaqʼtzan tiʼj techel kyaj tqʼoʼn Jesús (1 Ped. 2:21-24). Maske nya tzʼaqlitoq qe tman Jesús kukx nimen kye, axpe ikx tej kyel txalpaj moqa mintiʼ el kynikʼ tiʼj (Éx. 20:12). Qo ximen tiʼjju bʼaj tiʼj tej qʼiʼntoq 12 abʼqʼi tuʼn (kjawil uʼjit Lucas 2:46-52). Xi qʼiʼn Jesús kyuʼn tman atz Jerusalén tuʼn tkubʼ kyikʼsaʼn jun kyxol qe fiesta e ok junjun abʼqʼi. Tej tpon ambʼil tuʼn kymeltzʼaj, mintiʼ ok tqʼoʼn José ex María twitz tiʼj qa kykyaqil kykʼwal otoq che meltzʼaj. Ex tej tkanet Jesús kyuʼn, ok kyqʼoʼn tpaj tiʼjju otoq bʼaj. Jakutoq txi tqʼamaʼn Jesús kye qa nya toj tumel jlu, pero mintiʼ bʼant tuʼn. Sino ok tqʼoʼn kyoklen ex yolin toj tumel kyukʼil. Pero mintiʼ el tnikʼ José ex María «tiʼj tyol Jesús aju tzaj tmaʼn kye». Maske ikju, kukx nimen kye.

6, 7. ¿Tiʼ jaku tzʼonin kyiʼj kuʼxun tuʼn kynimen kye kyman?

⁶ Aya kuʼxun, ¿kwestpe in nela toj twitza tuʼn tnimana kye tmana tuʼnju in che el txalpaj moqa mintiʼ in nel kynikʼ tiʼja? ¿Tiʼ jaku tzʼonin tiʼja kyoj ambʼil lu? Tnejel, ximana tiʼjju in kubʼ tnaʼn Jehová. In tzaj tqʼamaʼn Biblia qa «in tzalaj» Jehová aj kynimen kʼwal te kyman (Col. 3:20). Ojtzqiʼn tuʼn Jehová toj alkye ambʼil mintiʼ in nel kynikʼ tmana tiʼja moqa in kubʼ kyqʼoʼn junjun kawbʼil nya toj tumel. Pero qa kukx ma nimana kye, ktzalajel Jehová tiʼja.

⁷ Tkabʼin, ximana tiʼjju in kubʼ kynaʼn tmana. Aj tnimana kye, in che tzalaj tiʼja ex in nok qeʼ kykʼuʼj tiʼja (Prov. 23:22-25). Ax ikx teya mas ktzalajela. In tzaj tqʼamaʼn Alexandre jlu, jun ermano te Bélgica: «Tej t-xi nbʼinchaʼne aju tzaj kyqʼamaʼn nmane weye, mas ten mujbʼabʼil qxole ex o tzalaje». b Toxin, qa ma nimana kye tmana jaʼlo, kʼonil tiʼja toj ambʼil tzul. Tzaj tqʼamaʼn jun kuʼxun te Brasil jlu, aju Paulo tbʼi: «Mas fácil o tzʼela toj nwitze tuʼn nnimane te Jehová ex kye txqantl xjal at kyoklen tuʼnju in chin nimane kye nmane». In tzaj tqʼamaʼn Biblia qa nim toklen tuʼn kynimen kuʼxun kye kyman tuʼntzun tel bʼaʼn  tkyaqilju in bʼant kyuʼn ex tuʼn kyten «nim qʼij twitz txʼotxʼ» (Efes. 6:2, 3).

8. ¿Tiquʼn o kubʼ kyximen nim kuʼxun tuʼn kynimen kye kyman?

⁸ O tzʼel kynikʼ nim kuʼxun tiʼj qa mas tbʼanel in che ela tiʼchaq aj kynimen kye kyman. Qo yolin tiʼj Luiza, jun txin te tnam Brasil. Tnejel, mintiʼ el tnikʼ tiʼj tiquʼn mintiʼ xi kyqʼoʼn tman ambʼil te tuʼn tten jun tcelular tuʼnju kykyaqil kuʼxun attoq jun kye. Pero yajxitl el tnikʼ tiʼj qa e xqʼuqin tman tiʼj. Tqʼama jlu: «Aʼyeju consej in tzaj kyqʼoʼn nmane weye tuʼn t-xi nbʼiʼne, aʼyetzun mas tbʼanel ex mintiʼ in nel kyiʼn ambʼil weye tuʼn tkubʼ nbʼinchaʼne junjun tiʼchaq». Atzunte juntl txin te Estados Unidos aju Elizabeth tbʼi, at maj kwest in nela toj twitz tuʼn tnimen kye tman. Pero tqʼama tiʼ in bʼant tuʼn: «Qa mintiʼ in nel nnikʼe tiʼj jun kawbʼil in kubʼ kyqʼoʼn nmane, in chin ximane tiʼj tzeʼn o che onin junjuntl kykawbʼil wiʼje». Atzunte Monica, te tnam Armenia, in tzaj tqʼamaʼn qa mas tbʼanel in che ela qe tiʼchaq in xi tbʼinchaʼn qa ma nimen kye tman.

9. ¿Tiʼ kyximbʼetz xjal at kyiʼj ley in kubʼ tqʼoʼn gobierno?

⁹ Kykyaqil xjal in nel kynikʼ tiʼj qa nim toklen tuʼn kyten gobierno ex qa nim toklen tuʼn t-xi qnimen junjun ley in kubʼ kyqʼoʼn (Rom. 13:1). Noqtzun tuʼnj, maslo kwest jaku tzʼela toj kywitz tuʼn t-xi kynimen jun ley qa nya kygan moqa nya tzʼaqli in nela toj kywitz. Jun techel, qo yolin kyiʼj impuesto. Toj jun tnam te Europa, xi qanin junjun xjel kye xjal kyiʼj impuesto ex jun kyxol kyaje xjal tzaj kyqʼamaʼn qa «nya il tiʼj tuʼn t-xi tchjoʼn jun xjal jun impuesto qa nya tzʼaqli in nela toj twitz». Tuʼnju in kubʼ kyximen jlu, mintiʼ in xi kychjoʼn xjal te tnam tkyaqil impuesto in tzaj tqanin Gobierno.

10. ¿Tiquʼn in chex qnimen ley maske at maj nya bʼaʼn in che ela toj qwitz?

¹⁰ In tzaj tqʼamaʼn Biblia qa in tzaj kybʼis xjal kyuʼn gobierno tuʼnju ateʼ tjaqʼ tkawbʼil Satanás ex qa ya chʼinx kykubʼ najsaʼn (Sal. 110:5, 6; Ecl. 8:9; Luc. 4:5, 6). Noqtzun tuʼnj, ax ikx in tzaj tqʼamaʼn Biblia jlu: «Alkye jun xjal tkʼiʼ niman kye aj sanjelal [moqa gobierno], tuʼn jlu mintiʼ in xi tniman tley Dios». Toj ambʼil jaʼlo, in xi tqʼoʼn Jehová ambʼil tuʼn kyten gobierno tuʼn ttzaj kyqʼamaʼn qe tiʼ tuʼn t-xi qbʼinchaʼn ex taj tuʼn qnimen kye. Tuʼntzunju, il tiʼj tuʼn t-xi qqʼoʼn kye gobierno tkyaqilju at kyoklen tiʼj, ik tzeʼn qe impuesto, tuʼn tok qqʼoʼn kyoklen ex tuʼn qnimen kye (Rom. 13:1-7). Jakulo kubʼ qximen qa mlay tzʼonin jun ley qiʼj, qa jaku txi qnajsaʼn nim pwaq tuʼn moqa nya tzʼaqli in nela toj qwitz. Noqtzun tuʼnj, taj Jehová tuʼn qnimen kye gobierno akux mintiʼ in tzaj  kyqʼamaʼn qe tuʼn miʼn qikʼ kyibʼaj tkawbʼil (Hech. 5:29).

11, 12. ¿Tiʼ bʼant tuʼn José ex María tuʼn t-xi kynimen jun ley ex tiʼ tzaj tuʼn jlu? (Lucas 2:1-6) (Ax ikx qʼonka twitza kyiʼj tilbʼilal).

¹¹ Jaku tzʼel qiʼn nim xnaqʼtzbʼil tiʼj José ex María. Kubʼ kyximen tuʼn kynimen te gobierno, axpe ikx kyoj ambʼil kwest (kjawil uʼjit Lucas 2:1-6). Tej chʼinxtoq tul itzʼj tal María, xi tqanin gobierno kye tuʼn tbʼant jun tiʼ kwest kyuʼn. Tzaj tqʼamaʼn aj kawil César Augusto tuʼn kyxiʼ kykyaqil xjal ateʼ tjaqʼ tkawbʼil Roma tzʼibʼil kybʼi kyoj lugar jatumel e ul itzʼj. Tuʼn t-xi tbʼiʼn José ex María ley lu, iltoq tiʼj tuʼn t-xi kybʼetin junlo 150 kilómetro bʼe kyxol witz tuʼntzun kypon atz Belén. Nyatoq fácil tuʼn tbʼant jlu kyuʼn ex mas te María. Tuʼntzunju, tzajlo bʼaj tkʼuʼj José tiʼj María ex tiʼj tal neʼ. Axlo ikx tzaj bʼaj kykʼuʼj tiʼjju qa ma tzul itzʼj neʼ toj bʼe. Kubʼlo kyximen tzeʼn jakutoq che kwentin tiʼj tal neʼ tuʼnju a Mesías. Pero, ¿tuʼnpe jlu mintiʼ xi kybʼiʼn kawbʼil otoq tzaj qʼamaʼn?

¹² Maske tzaj bʼaj tkʼuʼj José ex María, xi kybʼiʼn aju ley otoq tzʼetz qʼoʼn. Ex tuʼnju bʼant jlu kyuʼn e tzaj kʼiwlaʼn tuʼn Jehová. Pon María atz Belén, mintiʼ yabʼil tiʼj tal tej tul itzʼj ex onin tuʼn tjapun twi jun profecía (Miq. 5:2).

13. ¿Jakupe qo onin kyiʼj erman tuʼnju bʼaʼn qo nimen?

¹³ Qa ma txi qnimen ley in tzaj tqʼoʼn gobierno, tzul tiʼn tbʼanel qe ex kye txqantl xjal. Jun techel, mlay kubʼ qʼoʼn qkastiw tuʼnju mintiʼ in qo ikʼ kyibʼaj ley (Rom. 13:4). Ax ikx, qa ma qo nimen jaku tzʼonin kyiʼj gobierno tuʼn tten jun tbʼanel kyximbʼetz kyiʼj testigo de Jehová. Atzun jlu bʼaj toj tnam Nigeria ma tzikʼ junjun abʼqʼi. Tej tzmatoq ateʼ erman toj reunión, e okx junjun soldad toj Ja te Chmabʼil. In che jyontoq kyiʼj xjal in che manifestarin tuʼnju nyatoq kyaj tuʼn t-xi kychjoʼn impuesto. Pero xi tqʼamaʼn nejenel kye soldad kye tuʼn kyetz ex tqʼama jlu: «Mintiʼ in che manifestarin testigo de Jehová kyiʼj impuesto». Aj kyxi qbʼiʼn qe ley, in nonin  kyiʼj txqantl tuʼn kyyolin bʼaʼn kyiʼj testigos de Jehová. Qa ma bʼant jlu quʼn, ax ikx jakulo tzʼonin kyiʼj erman tuʼn miʼn ttzaj nya bʼaʼn kyiʼj (Mat. 5:16).

14. ¿Tiʼ onin tiʼj jun ermana tuʼn t-xi tbʼiʼn aju tzaj kyqʼamaʼn gobierno?

¹⁴ Atlo maj kwest jaku tzʼela toj qwitz tuʼn t-xi qnimen qe gobierno. In tzaj tqʼamaʼn jun ermana te Estados Unidos jlu, aju Joanna tbʼi: «Kwest ela toj nwitze tuʼn t-xi nnimane aju tzaj tqʼamaʼn gobierno tuʼnju otoq tzʼok bʼinchaʼn nya bʼaʼn qiʼje kyuʼn». Pero kubʼ t-ximen Joanna tuʼn tkubʼ tchʼexpuʼn t-ximbʼetz. ¿Tiʼ onin tiʼj? Tnejel, ya mintiʼ jaw tuʼjin qe mensaje in che yolin nya bʼaʼn kyiʼj gobierno toj redes sociales (Prov. 20:3). Tkabʼin, kubʼsan twitz Jehová tuʼn tonin tiʼj tuʼn tok qeʼ tkʼuʼj tiʼj ex tuʼn miʼn tayon tiʼj jun gobierno jaku tzʼel tiʼn nya bʼaʼn (Sal. 9:9, 10). Ex toxin, jaw tuʼjin qe xnaqʼtzbʼil in tzaj kyqʼamaʼn qa nya toj tumel tuʼn qyolin nya bʼaʼn kyiʼj gobierno (Juan 17:16). In tzaj tqʼamaʼn Joanna qa in tzalaj tuʼnju o tzʼok tqʼoʼn kyoklen gobierno ex e nimen kye.

15. ¿Tiquʼn at maj kwest jaku tzʼela toj qwitz tuʼn t-xi qnimen qe tqanil in tzaj tqʼoʼn ttnam Jehová?

¹⁵ In tzaj tqʼamaʼn Jehová qe tuʼn qnimen kye qeju in che kubʼ nej twitz aqʼuntl toj congregación (Heb. 13:17). A Jesús in kubʼ nej twitz aqʼuntl ex tzʼaqli te. Pero aʼyeju xjal o che jaw tskʼoʼn tuʼn kykubʼ nej qwitz toj congregación, nya tzʼaqli qe. Atlo maj kwest jaku tzʼela toj qwitz tuʼn t-xi qbʼinchaʼn aju in tzaj kyqʼamaʼn qe, mas qa nya qaj tuʼn t-xi qbʼinchaʼn. Atzun jlu bʼaj tiʼj apóstol Pedro. Toj jun ambʼil, xi tqʼamaʼn jun anjel te tuʼn t-xi tchyoʼn kychibʼjal txkup aqeju tzaj tqʼamaʼn Tley Moisés qa nya saq qe. Pero xi tqʼamaʼn Pedro oxe maj te anjel qa mlaytoq bʼant jlu tuʼn (Hech. 10:9-16). Junxitl tqanil tzaj qʼoʼn te Pedro tuʼn anjel twitzju otoq bʼant tuʼn toj tkyaqil tanqʼibʼil. Tuʼntzunju, kubʼ t-ximen qa nya toj tumel aju tzaj qʼamaʼn te. Mintiʼ tuʼn ttzaj qbʼis qa kwest in nela toj qwitz tuʼn qnimen kye qeju o txi tqʼoʼn Jehová kyoklen tuʼnju ax ikx te Pedro kwest ela toj twitz tuʼn tnimen te jun anjel tzʼaqli.

16. ¿Tiʼ bʼant tuʼn apóstol Pablo tej t-xi qʼamaʼn junjun tqanil nya toj tumel ela toj twitz? (Hechos 21:23, 24, 26).

¹⁶ Kubʼ tyekʼin apóstol Pablo qa bʼaʼn nimen tej t-xi tbʼiʼn jun tqanil maske nya toj tumel ela toj twitz. Otoq tzʼok kybʼiʼn junjun okslal judiy qa xi tqʼamaʼn Pablo kye txqantl tuʼn «tkyaj kykolin tley Moisés» ex qa mintiʼtoq in nok tqʼoʼn toklen ley (Hech. 21:21). Tuʼntzunju, xi kyqʼamaʼn ansyan te Jerusalén te Pablo tuʼn tkubʼ tyekʼin qa xi tnimen ley. Xi kyqʼamaʼn te tuʼn t-xiʼ toj templo tukʼil kyaje xinaq tuʼn tbʼaj kysaqin kyibʼ. Maske ojtzqiʼntoq tuʼn Pablo qa otoq tzʼel qʼiʼn toklen ley ex qa mintiʼ jun nya bʼaʼn kubʼ tbʼinchaʼn, xi tnimen kyyol ansyan. In tzaj tqʼamaʼn txʼolbʼabʼil jlu: «E jeʼxtzun tiʼn Pablo qe kyaje xinaq lu, ex te juntl qʼij xi tqʼoʼn aju chojbʼil te txʼajbʼil te junx kyukʼil» (kjawil uʼjit Hechos 21:23, 24, 26). Tuʼnju nimen Pablo onin tuʼn tten mujbʼabʼil kyxol erman (Rom. 14:19, 21).

17. ¿Tiʼ xnaqʼtzbʼil jaku tzʼel tiʼna tiʼj Stephanie?

¹⁷ In tzaj tqʼamaʼn jun ermana Stephanie tbʼi, qa kwest ela toj twitz tuʼn t-xi tnimen jun tiʼ tzaj tqʼamaʼn sucursal. In najbʼentoq ermana lu tukʼil tchmil toj jun grupo toj juntl yol ex in che tzalajtoq. Noqtzun tuʼnj, tzaj tqʼamaʼn sucursal tuʼn tkubʼ naj grupo ex xi qʼamaʼn te ermana tukʼil tchmil tuʼn kymeltzʼaj toj jun congregación toj kyex kyyol. ¿Tiʼ kubʼ tnaʼn Stephanie tej tbʼaj jlu? Tqʼama: «Tzaj nbʼise ex kubʼ  nximane qa mintiʼtoq necesidad toj jun congregación toj qyole». Maske ikju, onin Stephanie tiʼj chʼixpubʼil. Tqʼamatl jlu: «Tej tikʼ ambʼil, el nnikʼe tiʼj qa jaw kyjyoʼn erman aju mas tbʼanel. Toj congregación jatumel in qoʼxe jaʼlo, ateʼ nim erman kyjunalx in che ajbʼen te Jehová. Tuʼntzunju, o qo oke iktzun jun familia te kye. Ax ikx, in xi nqʼoʼne xnaqʼtzbʼil te jun ermana kʼitzqeku txi tzyet tuʼn tajbʼen juntl maj te Jehová ex at mas ambʼil wiʼje tuʼn nxnaqʼtzane njunalxe». Te mankbʼil tqʼama jlu: «O tzʼok tilil wuʼne tuʼn nnimane, tuʼntzunju in kubʼ nnaʼne bʼaʼn».

18. ¿Tzeʼn jaku tzʼonin qiʼj qa ma qo nimen?

¹⁸ Qkyaqilx jaku bʼaj qxnaqʼtzan qibʼ tuʼn qnimen. El tnikʼ Jesús tiʼj tzeʼn tuʼn tnimen te Dios «tuʼnju nimku ikʼx tuʼn» (Heb. 5:8). Ik tzeʼn te Jesús, ax ikx qe in nel qnikʼ tiʼj tzeʼn tuʼn qnimen aj qok weʼ kywitz ambʼil kwest. Qo ximen tiʼjju bʼaj tej t-xi tzyet pandemia te COVID-19. Tzaj qʼamaʼn qe tuʼn miʼn qxiʼ kyoj Ja te Chmabʼil ex tuʼn miʼn qxiʼ pakbʼal ttziyele kyja xjal. Tej tok tbʼiʼna tqanil lu, ¿kwestpe ela toj twitza tuʼn t-xi tnimana? Noq tiʼxku bʼaj, tzalaj Jehová tiʼja, onina tuʼn tten mujbʼabʼil toj congregación ex mintiʼlo tzaj nya bʼaʼn tiʼja. Toj ambʼil jaʼlo, ya bʼantni qten tuʼn t-xi qbʼiʼn alkyexku tqanil tzul qʼoʼn qe toj nimxix yajbʼil. Qa ma qo nimen, jaku qo klet (Job 36:11).

19. ¿Tiquʼn taj teya tuʼn tnimana?

¹⁹ Ma tzʼel qnikʼ tiʼj qa in tzaj qkʼamoʼn nim kʼiwlabʼil qa bʼaʼn qo nimen. Pero aju mas nim toklen, bʼaʼn tuʼn qnimen te Jehová tuʼnju kʼujlaʼn quʼn ex qaj tuʼn ttzalaj qiʼj (1 Juan 5:3). Mlayx bʼant tuʼn t-xi qchjoʼn te Jehová tkyaqilju o bʼant tuʼn qiʼj (Sal. 116:12). Pero jaku tzalaj quʼn qa ma qo nimen te ex kye qeju o txi tqʼoʼn kyoklen. Qa ma qo nimen, in kubʼ qyekʼin qa at qnabʼil ex qa jaku tzalaj Jehová quʼn (Prov. 27:11).