Otoqlo tzikʼ mas te jun abʼqʼi t-xilen tzyet tuʼn tkubʼ kybʼinchaʼn erman te Betel jun estación te radio WBBR tbʼi atz Staten Island, Nueva York. Tnejel jaw kytxʼemin qe tzeʼ tuʼn tbʼaj limpiarit jatumel tuʼn tjaw bʼinchet kyja aqʼunal ex juntl ja jatumel tuʼn tokx qʼet radio. Tej tbʼant tkyaqil jlu, e ok ten erman aqʼunal tiʼj tuʼntzun t-xi tzyet tuʼn taqʼunan radio. Noqtzun tuʼnj, iltoq tiʼj tuʼn tkubʼ tiʼj junjun nya bʼaʼn kyuʼn.

Aju tnejel nya bʼaʼn e ok weʼ erman twitz aju tuʼn tjaw kywabʼin tnejel antena. Aju tnejel poste 91 metro twaʼl ex iltoq tiʼj tuʼn tjaw wabʼin kyxol kabʼe poste te 61 metro kyweʼ. Mintiʼ bʼant kyuʼn erman toj tnejel maj. Pero ok qeʼ kykʼuʼj tiʼj qa kʼoniltoq Jehová kyiʼj ex te tibʼajxi bʼant kyuʼn. Tzaj tqʼamaʼn Calvin Prosser, aju aqʼunan tiʼj aqʼuntl: «Noqwit bʼant quʼne toj tnejel maj, xiwtlo qqʼamaʼne jlu: ‹Tbʼanelxix aju ma bʼant quʼn›». Noqtzun tuʼnj a Jehová jaw kynimsaʼn erman. Pero nya oʼkx nya bʼaʼn lu e ok weʼ erman twitz.

Tzmatoq in che etz radio kyuʼn xjal toj ambʼil lu, tuʼntzunju kwesttoq tuʼn kykanet ex tuʼn kytzaj laqʼet qe tiʼchaq tuʼn tfuncionarin jun cabina. Pero toj lugar aju, kanet jun transmisor te 500 vatios kyuʼn erman aju otoq kubʼ tbʼinchaʼn jun xjal, maske nya akʼaj. Ex mintiʼ tzaj kylaqʼoʼn jun micrófono sino ajbʼen tmicrófono jun teléfono kyuʼn. Kubʼ kyximen tuʼn tbʼant jun prueba kyuʼn kyukʼil qe tiʼchaq otoq che kanet kyuʼn toj jun qonikʼan te xjaw febrero. Tuʼn tok kybʼiʼn qa ya jaku tzʼex transmisión, e ok ten bʼitzel kyiʼj qe bʼitz in netz tuʼn ttnam Jehová. In tzaj tqʼamaʼn ermano  Ernest Lowe qa akux in che bʼitzintoq erman oktz jun llamada tuʼn Rutherford, aju jwes, b tuʼn ttzaj tqʼamaʼn qa in bʼintoq tiʼj radio atz Brooklyn, aju tok junlo 25 kilómetros tiʼj radio.

«¡At nim bulla kyuʼne! ¡Kyyupinxe!, in che qʼajte ik tzeʼn qe wiẍ in che qʼojin» chi ermano Rutherford. Jun rat kubʼ kyyupin erman radio maske tzaj chʼin kychʼixwi pero el kynikʼ tiʼj qa ya in funcionarin radio tuʼn tex tbʼanel tqanil toj.

Tej tex tnejel transmisión tuʼn ermano Rutherford toj 24 te febrero te 1924, tqʼama qa kʼajbʼel radio kyuʼn tuʼn tpakbʼet «Tkawbʼil Mesías». Tqʼama qa otoq bʼaj bʼinchaʼn radio lu «tuʼntzun kyxi onit xjal te alkyexku okslabʼil tuʼn tel kynikʼ tiʼjju axix tok tkuʼx toj Biblia ex tuʼn tel kynikʼ tiʼj toj alkye ambʼil in qo anqʼin».

Tbʼanelxix ok tnejel transmisión. Aju radio WBBR, ajbʼen 33 abʼqʼi tuʼn ttnam Jehová.

Toj julio te 1924, ok kychmon kyibʼ Xnaqʼtzal tiʼj Tyol Dios toj asamblea atz Columbus, Ohio. E pon nim erman toj tkyaqil twitz Txʼotxʼ ex ok kybʼin qe chikʼbʼabʼil kyoj yol alemán, árabe, francés, griego, húngaro, ex kyoj junjuntl yol te norte te Europa ik tzeʼn inglés, italiano, lituano, polaco, ruso ex ucraniano. Ex at junjun chikʼbʼabʼil ex qʼoʼn toj radio, axpe ikx kubʼ ximen tuʼn tex tqanil toj periódico Ohio State Journal tiʼjju in bʼajtoq toj junjun qʼij te asamblea.

Toj jueves 24 te julio, ex qʼij toj pakbʼabʼil kyuʼn qeju mas te 5 mil erman otoq che pon toj asamblea ex kyaj kyqʼoʼn chʼixme 30 mil libro ex xi tzyet nim mil xnaqʼtzbʼil kyuʼn. Tqʼama uʼj The Watch Tower (Aju Xqʼuqil), qa aju qʼij «te asamblea lu ok te mas tbʼanel».

Ax ikx bʼaj juntl tiʼ nim toklen toj viernes 25 te julio, jaw tuʼjin ermano Rutherford jun uʼj ex mintiʼ tzaj xobʼ tej tetz tqʼamaʼn aju nya bʼaʼn kybʼinchbʼen txqantl okslabʼil. Aju tqanil etz tleerin ermano, ok ik tzeʼn jun uʼj qʼoʼn toklen tuʼn ley ex tzaj tqʼamaʼn qe nya bʼaʼn in bʼant kyuʼn aj kawil, kyuʼn okslabʼil ex kyuʼn nimaq kʼaẍjel, «tuʼnju mintiʼ otoq txi kyxnaqʼtzaʼn kye xjal tiʼ taj Dios tuʼn tbʼant kyuʼn tuʼntzun kytzaj kʼiwlan ex tuʼn kukx kyanqʼin». Ax ikx tzaj  tqʼamaʼn tqanil qa nya bʼaʼn in bʼant kyuʼn tuʼnju mastoq «in che onin tiʼj Naciones Unidas ex in kyqʼamaʼn qa iktzun tten in kawin tkawbʼil Dios tzalu twitz Txʼotxʼ». Iltoq tiʼj tuʼn tten nim kyipumal erman tuʼn t-xi kybʼiʼn tqanil lu ex tuʼn t-xi kyqʼamaʼn kye xjal.

Tqʼama uʼj The Watch Tower tiʼ tbʼanel tzaj tuʼn asamblea: «Aju kʼloj tsoldad Cristo ok kychmon kyibʼ toj asamblea toj tnam Columbus [ . . . ], chʼiy qʼuqbʼil kykʼuʼj ex kyipumal tuʼntzun miʼn tkubʼ kyiʼj tuʼn nya bʼaʼn jaku tzʼok kybʼinchaʼn xjal kyiʼj». Tzaj tqʼamaʼn ermano Leo Claus, jun ermano ten toj asamblea jlu: «Kubʼ qnaʼne nim tzalajbʼil ex qajtoqe tuʼn t-xi qqʼamaʼne aju tqanil lu kye xjal jatumel in qo pakbʼane».

Toj octubre xi kysipen Xnaqʼtzal tiʼj Tyol Dios nim millón tratado tok tbʼi Ecclesiastics Indicted (Qe nya bʼaʼn in bʼant kyuʼn qeju at jun kyoklen toj okslabʼil). Yolin uʼj lu tiʼjju nya bʼaʼn kymod okslal otoq tzʼetz tuʼjin ermano Rutherford toj asamblea. Toj tal tnam Cleveland, Oklahoma, bʼaj tsipen erman Frank Johnson tratado toj lugar jatumel taʼ tterritorio ex bʼant jlu tuʼn toj 20 minut naʼmxtoq kyikʼ erman qʼilte. Mlaytoq bʼant tuʼn tkyaj ten ayol toj alkyexku lugar, tuʼnju ateʼtoq junjun tvesin otoq tzaj kyqʼoj tiʼj tuʼnju in pakbʼantoq. Tuʼntzunju kubʼ t-ximen ermano Johnson tuʼn tokx tewin tibʼ toj jun iglesia. Tuʼnju mintiʼtoq jun xjal at toj, kyaj tqʼoʼn jun tal uʼj toj Tbiblia nejenel te iglesia ex kyojele qʼuqbʼil, ex jun rat etz toj iglesia. Pero tuʼnju atxtoq chʼintl ambʼil tiʼj kyaj tqʼoʼn qe uʼj toj juntl kabʼe iglesia.

Meltzʼaj ermano Frank jatumel otoq kyaj bʼant tiʼj kyuʼn tuʼn kyikʼ erman qʼilte, xi tewin tibʼ tiʼjxe jun gasolinera ex in keʼyintoq qa lepchiqex nya bʼaʼn xjal tiʼj. Toj kar e ikʼ xjal lu pero mintiʼ kylom. Ex tzmatoq kyikʼlen tej kypon erman qʼilte, ex xiʼ Frank kyukʼil.

Tzaj tnaʼn jun erman jlu: «Tej qetze toj tnam, ok qkeʼyine qa otoq che pon junlo 50 xjal kywitz qeju oxe iglesia lu. Ateʼ junjun in che uʼjintoq tiʼj tratado, atzun junjuntl, in xitoq kyyekʼin kye nejenel te iglesia. Chʼixme o tzyete, pero xi qqʼoʼne chjonte te Jehová tuʼnju kukx onin qiʼje ex xqʼuqin tuʼn miʼn qtzyete kyuʼn aj qʼoj tiʼj Tkawbʼil Dios».

Ax ikx kyoj junjuntl ttnam mintiʼ e tzaj xobʼ Xnaqʼtzal tiʼj Tyol Dios tuʼn kypakbʼaʼn. Jun techel, pakbʼaʼn ermano Józef Krett toj tnam Francia kye xjal e tzaj toj ttnam Polonia, aqeju in che aqʼunantoq kyoj mina. Bʼaj kyximen tuʼn tex qʼet jun chikʼbʼabʼil tok tbʼi: «Chʼix tpon ambʼil tuʼn kyjaw anqʼin kyimni». Tej t-xi sipin txokbʼil kye xjal toj tnam, xi tqʼamaʼn jun pal kye xjal in che pon toj iglesia tuʼn miʼn kyxiʼ. Pero noqx gan aju xi tqʼamaʼn, tuʼnju nim xjal e pon bʼil chikʼbʼabʼil. Mas te 5 mil xjal e pon, axpe ikx te pal. Xi tqʼamaʼn ermano te pal qa jaku bʼant tuʼn tkolin tiʼj tokslabʼil qa taj, pero mintiʼ bʼant tuʼn. Kyaj tqʼoʼn erman tkyaqil uʼj xi tiʼn tuʼnju kyajtoq xjal tuʼn tel mas kynikʼ tiʼj Tyol Dios (Amós 8:11).

Pakbʼan ermano Claude Brown tiʼj tbʼanel tqanil toj tnam Costa de Oro, aju tok tbʼi jaʼlo te Ghana, toj continente te África. Onin qe tchikʼbʼabʼil erman ex qe uʼj xi t-sipin tuʼn t-xi pakbʼet naj tbʼanel tqanil toj tkyaqil tnam. At jun xjal John Blankson tbʼi in xnaqʼtzaʼn tuʼn kybʼant qʼanbʼil tuʼn, ok tbʼiʼn tchikʼbʼabʼil ermano Brown ex jun rat el tnikʼ tiʼj qa otoq kanet axix tok tuʼn. In tzaj tqʼamaʼn jlu: «Ngantoqe tuʼn nyoline tiʼj axix tok kyukʼil wukʼile in che xnaqʼtzan tiʼj qʼanbʼil».

 Jun maj xiʼ John toj iglesia anglicana ex xi tqanin junjun xjel te pal tiʼj Trinidad tuʼnju otoq tzʼel tnikʼ tiʼj qa nya atz in jatz xnaqʼtzbʼil lu toj Biblia. Etz lajoʼn tuʼn pal, ex tukʼil tqʼajqʼajel twiʼ tqʼama: «¡Nya te Dios teya, te Tajaw il teya! ¡Texa tzalu bʼiʼx jaʼlo!».

Tej tmeltzʼaj John tja, xi ttzʼibʼin jun carta te pal ex xi tqʼamaʼn te tuʼn ttzaj tchikʼbʼaʼn xnaqʼtzbʼil tiʼj Trinidad kywitz txqantl xjal. Atzunte pal tzaj tqʼamaʼn tuʼn t-xiʼ John toj t-oficina profesor in qʼon xnaqʼtzbʼil tiʼj qʼanbʼil. Tej tpon John, xi tqanin profesor te qa otoq txi ttzʼibʼin jun carta te pal.

«Ikju», chi John xi ttzaqʼweʼn.

Xi tqʼamaʼn profesor tuʼn t-xi ttzʼibʼin John jun carta tuʼn t-xi tqanin najsam te pal. Tuʼntzunju, kubʼ ttzʼibʼin John jlu:

«Aya pal, ma tzaj tqʼamaʼn profesor weye tuʼn t-xi ntzʼibʼine carta lu teya tuʼn t-xi qanine najsam teya, pero oʼkx kbʼantel jlu wuʼne qa ma tzaj tqʼamaʼna qa nya ax tok junjun xnaqʼtzbʼil in xi t-xnaqʼtzana».

Tej tok tqʼoʼn profesor twitz tiʼj carta, mintiʼ el tnikʼ tiʼj ex xi tqanin: «Blankson, ¿atzun jlu taja tuʼn t-xi ttzʼibʼina?».

«Ikju, atzun jlu waje tuʼn tkubʼ ntzʼibʼine».

«Qa ikju, oklo kʼelex lajeta. Mlay bʼant tuʼn ttena toj tja xnaqʼtzbʼil qa kukx in yolina nya bʼaʼn tiʼj pal te jun okslabʼil aju o tzaj tqʼoʼn Gobierno toklen».

«Pero, Profe, [ . . . ] in tzaj tqʼoʼn teya ambʼil qeye tuʼn t-xi qqanine junjun xjel teya qa mintiʼ in nel qnikʼe kyiʼj xnaqʼtzbʼil in tzaj tqʼoʼna».

«Ikju, ax tok».

«Pero axtzun jlu bʼaj tukʼil pal. In tzaj t-xnaqʼtzantoq Biblia qeye ex xi nqanine jun xjel te. Pero qa mintiʼ bʼant ttzaqʼwet tuʼn, in kubʼ nximane qa nya il tiʼj tuʼn t-xi ntzʼibʼine jun carta tuʼn t-xi nqanine najsam te».

Te tibʼajxi, ya mintiʼ ex lajoʼn Blankson toj tja xnaqʼtzbʼil ex ya mintiʼ xi tsamaʼn jun carta tuʼn t-xi tqanin najsam.

Tzaj tqʼamaʼn uʼj The Watch Tower, jlu tiʼj aqʼuntl te abʼqʼi toj chʼin yol: «Jaku txi qqʼamaʼn ik tzeʼn te David tej tqʼama: ‹Aya tzaj qʼonte wipumale tuj qʼoj› (Salmo 18:39). Tbʼanel ma tzʼok abʼqʼi lu tuʼnju o tzʼonin Qman Dios qiʼj. [ . . . ] Aqeju axix tok tkʼwal Dios [ . . . ] kukx o txi kyqʼamaʼn Tyol Dios tukʼil tzalajbʼil».

Tej tkubʼaj abʼqʼi, ok tilil kyuʼn erman tuʼn t-xi kypakbʼaʼn Tyol Dios toj radio. Kubʼ kyqʼoʼn jun estación te radio nqayin tiʼj tnam Chicago. Ok kyqʼoʼn tbʼi estación lu te WORD. Aju t-xilen bʼibʼaj lu toj inglés: TYOL Dios. Ajbʼen jun transmisor kyuʼn te 5 mil vatios. Ten nim tipumal radio lu tuʼn t-xi tpakbʼaʼn Tkawbʼil Dios najchaq ik tzeʼn toj norte te Canadá.

Onin Jehová kyiʼj erman toj 1925 tuʼn tel kynikʼ tiʼj akʼaj tqanil tiʼj capítulo 12 te Apocalipsis. Nya bʼaʼn ela akʼaj xnaqʼtzbʼil lu toj kywitz junjun, pero tbʼanel ela toj kywitz txqantl. Ex e tzalaj tej tel kynikʼ kyiʼj junjun tiʼchaq e bʼaj toj kyaʼj ex tiʼj tiʼ toklen jlu tukʼil ttnam Dios tzalu twitz Txʼotxʼ.