1. ¿Tiʼ t-ximbʼetz Jehová at kyiʼj tmajen?

 OJTZQIʼN tuʼn Jehová tkyaqilju in bʼaj qiʼj, qa in qo tzalaj ex qa in qo bʼisun (Sal. 37:18). In tzalaj qiʼj aj tok tqʼoʼn twitz tiʼj qa in nok tilil quʼn tuʼn qajbʼen te, axpe ikx toj ambʼil kwest. Nya oʼkxju, ax ikx taj tuʼn tonin qiʼj ex tuʼn ttzaj tqʼuqbʼaʼn qkʼuʼj.

2. ¿Tiʼ in bʼant tuʼn Jehová kyiʼj qeju in che bʼisun ex tiʼ jaku bʼant quʼn tuʼn ttzaj qkʼamoʼn onbʼil in tzaj tqʼoʼn?

² Aj tyolin Salmo 147:3 kyiʼj qeju at «bʼis tuj kyanmi», in tzaj tqʼamaʼn qa in nok tqʼanin Jehová kʼixbʼilen tok kyiʼj. In tzaj tyekʼin texto lu alkye tten in nok t-xqʼuqin Jehová qeju at bʼis toj kyanmi. Pero, ¿tiʼ jaku bʼant quʼn tuʼn qok tqʼanin Jehová? Qo yolin tiʼj jun techel. Qa ma kʼixbʼi jun xjal, jaku txiʼ tukʼil jun tbʼanel doctor. Pero il tiʼj tuʼn t-xi tbʼiʼn tkyaqilju tzul tqʼamaʼn doctor qa tajbʼil tuʼn tqʼanit. Kʼelel qnikʼ tiʼj toj xnaqʼtzbʼil lu tiʼ in tzaj tqʼamaʼn Jehová kye qeju in che bʼisun ex tzeʼn jaku che japun consej kyuʼn, aqeju in tzaj tqʼoʼn tukʼil nim kʼujlabʼil.

IN TZAJ TNAʼN JEHOVÁ QE QA NIM QOKLEN TOJ TWTIZ

3. ¿Tiquʼn in kubʼ kynaʼn junjun xjal qa mintiʼ kyajbʼen?

³ Bʼisbʼajilxix tuʼnju in qo anqʼin toj jun ambʼil jatumel ya mintiʼ in kubʼ kyyekʼin xjal kʼujlabʼil kyxolx, in kubʼ kyyekʼin nya bʼaʼn kymod ex tuʼntzunju in kubʼ kynaʼn txqantl qa mintiʼ kyajbʼen. In tzaj tqʼamaʼn jun ermana Helen tbʼi jlu: a «In jaw chʼiye toj jun familia jatumel mintiʼ kubʼ kyyekʼin kʼujlabʼil. O qo ok bʼyoʼne tuʼn nmaʼne ex tkyaqil qʼij tzaj tqʼamaʼn qeye qa mintiʼ qajbʼene». ¿Axpe jlu o tzikʼ tiʼja? Bʼalo at jun kubʼ tyekʼin nya bʼaʼn tmod tukʼila, tzaj tqʼamaʼn nya bʼaʼn yol teya moqa ok tilil tuʼn tuʼn tkubʼ tnaʼna qa mintiʼ toklena.  Qa a jlu o bʼaj tiʼja, kwest-lo tuʼn t-xi tnimana qa kʼujlaʼna tuʼn Jehová.

4. ¿Tiʼ in tzaj ttziyen Jehová toj Salmo 34:18?

⁴ Maske o tzʼok bʼinchaʼn nya bʼaʼn tiʼja kyuʼn txqantl, jaku tzʼok qeʼ tkʼuʼja tiʼj qa kʼujlaʼna tuʼn Jehová ex qa nim toklena toj twitz. In tzaj tqʼamaʼn Salmo 34:18 (kjawil uʼjit) jlu: «Niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj». Qa aya jun kyxol qeju «mintiʼtl jatum tuʼn tok qeʼ kykʼuʼj», bʼaʼn tuʼn ttzaj tnaʼna qa ok tzʼok tqʼoʼn Jehová twitz tiʼj jun tbʼanel tanmiya ex o txi tqʼoʼn txokbʼil teya tuʼn toka te tmajen (Juan 6:44). Ex kukx ktel tukʼila tuʼn tonin tiʼja tuʼnju kʼujlaʼnxixa tuʼn.

5. ¿Tiʼ xnaqʼtzbʼil jaku tzʼel qiʼn tiʼj tmod Jesús kubʼ tyekʼin kyiʼj xjal i el ikʼun?

⁵ Aju techel kubʼ tqʼoʼn Jesús in nonin qiʼj tuʼn tel qnikʼ tiʼj tiʼ in kubʼ tnaʼn Jehová. Tej tten Jesús tzalu twitz Txʼotxʼ, ok tqʼoʼn twitz kyiʼj xjal in che el ikʼun kyuʼn txqantl ex tzaj qʼaqʼin tkʼuʼj kyiʼj (Mat. 9:​9-12). Tej tok ttzyuʼn jun xuʼj ttxaʼn t-xbʼalun Jesús tuʼn tqʼanet tiʼj jun yabʼil, xi tqʼuqbʼaʼn Jesús tkʼuʼj ex xi tqʼamaʼn te qa tbʼanelxix tuʼnju at nim qʼuqbʼil tkʼuʼj (Mar. 5:​25-34). El tkanoʼn Jesús tkyaqil tmod Ttat (Juan 14:9). Tuʼntzunju, jaku tzʼok qeʼ tkʼuʼja tiʼj qa nim toklena toj twitz Jehová. Ax ikx in nok tqʼoʼn twitz kyiʼj tbʼanel tmoda, ik tzeʼn qʼuqbʼil tkʼuʼja ex tkʼujlabʼila in kubʼ tyekʼina tiʼj.

6. ¿Tiʼ jaku bʼant quʼn qa in kubʼ qnaʼn qa mintiʼ qajbʼen?

⁶ ¿Tiʼ jaku bʼant tuʼna qa kukx in kubʼ t-ximana qa mintiʼ toklena? Bʼaʼn tuʼn kyjaw tuʼjina texto in tzaj kyyekʼin qa nim toklena toj twitz Jehová ex bʼaʼn tuʼn t-ximana kyiʼj (Sal. 94:19). b Qa mintiʼ  xjapun twiʼ jun t-ximbʼetza moqa mlay bʼant qe tiʼchaq tuʼna ik tzeʼn kye txqantl, miʼn tzaj tbʼisa ex miʼn tzʼok tqʼoʼn twiʼya tiʼjju mlay bʼant tuʼna. In nel tnikʼ Jehová tiʼja ex mintiʼ in tzaj tqanin tuʼn tkubʼ tbʼinchaʼna aju mlay bʼant tuʼna (Sal. 103:​13, 14). Qa ok bʼinchaʼn nya bʼaʼn tiʼja toj ambʼil ojtxe, miʼn kubʼ t-ximana qa aya at tpaj tiʼjju bʼant tuʼn xjal. Bʼaʼn tuʼn ttzaj tnaʼna qa nya atz kxel tqanin Jehová kwent kye qeju o tzʼok bʼinchaʼn nya bʼaʼn kyiʼj, sino kye qeju in che bʼinchan nya bʼaʼn (1 Ped. 3:12). Ok bʼinchaʼn nya bʼaʼn tiʼj Sandra tej tal txin ex tqʼama jlu: «Tkyaqil qʼij in xi nqanine te Jehová tuʼn tonin wiʼje tuʼn tel nnikʼe tiʼj alkyeqe tbʼanel nmode in nok tqʼoʼn twitz tiʼj».

7. ¿Tzeʼn jaku tzʼajbʼen quʼn aju o tzikʼ qiʼj tuʼn qonin kyiʼj txqantl?

⁷ Jaku tzʼajbʼena tuʼn Jehová tuʼn tonina kyiʼj txqantl maske kwest tuʼn t-xi tnimana jlu. Jun techel, o tzaj tqʼoʼn toklena tuʼn tonina tiʼj pakbʼabʼil (1 Cor. 3:9). Nimxix jaku tzʼonina kyiʼj txqantl ex maslo jaku tzʼel tnikʼa tiʼjju in kubʼ kynaʼn tuʼnju o che ikʼ junjun tiʼchaq tiʼja toj ambʼil ojtxe. Tzaj tkʼamoʼn Helen onbʼil, aju ma qo yolin tiʼj toj párrafo 3, ex toj ambʼil jaʼlo bʼantni tten tuʼn tonin kyiʼj txqantl. Tqʼama jlu: «Tnejel kubʼ nnaʼne qa mintiʼ wajbʼene. Pero jaʼlo in kubʼ nnaʼne qa kʼujlaʼn qine tuʼn Jehová ex qa in chin ajbʼene tuʼn tuʼn wonine kyiʼj txqantl». Precursora regular Helen jaʼlo ex in kubʼ tnaʼn nimxix tzalajbʼil.

TAJ JEHOVÁ TUʼN TOK QEʼ QKʼUʼJ TIʼJ QA O KUBʼ TNAJSAʼN QIL

8. ¿Tiʼ in tzaj ttziyen Jehová qe toj Isaías 1:18?

⁸ Kukx in kubʼ kynaʼn junjun tmajen Jehová nya bʼaʼn kyuʼn junjun il kubʼ kybʼinchaʼn toj ambʼil ojtxe, bʼalo kubʼ kybʼinchaʼn tej naʼmxtoq kybautisarin moqa tej otoqxi che bautisarin. Pero bʼaʼn tuʼn ttzaj qnaʼn qa tzaj tqʼoʼn Jehová chojbʼil tuʼnju at nimxix tkʼujlabʼil qiʼj. In tzaj tyekʼin jlu qa tajbʼil tuʼn ttzaj qkʼamoʼn aju oyaj o tzaj tqʼoʼn. In tzaj tqʼamaʼn Jehová jlu qe: «Kytzaje, qo yolin tuʼn tbʼant tiʼj jlu quʼn». c Qa ma txi qbʼinchaʼn tiʼj jlu, kbʼel tnajsaʼn tkyaqil qil (kjawil uʼjit Isaías 1:18). In xi qqʼoʼn nimxix chjonte te Qman Jehová tuʼnju in nikʼ tnaʼl tuʼn tkyaqil nya bʼaʼn kubʼ qbʼinchaʼn ojtxe, pero mintiʼ in nikʼ tnaʼl tuʼn qe tbʼanel qbʼinchbʼen (Sal. 103:​9, 12; Heb. 6:10).

9. ¿Tiquʼn mas bʼaʼn tuʼn tok qqʼoʼn qwiʼ tiʼjju in bʼant quʼn jaʼlo ex tiʼjju kbʼantel quʼn toj ambʼil tzul?

⁹ ¿Tiʼ jaku tzʼonin tiʼja qa kukx in ximana kyiʼj il e kubʼ tbʼinchaʼna toj ambʼil ojtxe? Qʼonka tilil tuʼn tok tqʼoʼn twiʼya tiʼjju in bʼant tuʼna jaʼlo ex tiʼjju kbʼantel tuʼna toj ambʼil tzul. Ximana tiʼj techel kubʼ tqʼoʼn apóstol Pablo. Tzaj tbʼis tuʼnju otoq tzʼok tbʼinchaʼn nya bʼaʼn kyiʼj okslal, pero ojtzqiʼntoq tuʼn qa otoq kubʼ tnajsaʼn Jehová til (1 Tim. 1:​12-15). ¿Kukxpe ximen kyiʼj il otoq che bʼant tuʼn toj ambʼil ojtxe? Mintiʼ. Ik tzeʼn otoq bʼant tuʼn kyiʼj toklen ten kyxol Judiy, aju otoq tzikʼ tnaʼl tuʼn (Filip. 3:​4-8, 13-15). Sino ok tilil tuʼn tuʼn ttzalaj tiʼj pakbʼabʼil ex tuʼn tok tqʼoʼn twiʼ tiʼj ambʼil tzul. Ik tzeʼn te Pablo mlaytoq che chʼexpaj qe tiʼchaq otoq che bʼant tuʼn, ax ikx teya mlay che chʼexpaj qe tiʼchaq o che bʼant tuʼna ojtxe. Pero jaku tzʼok tilil tuʼna tuʼn ttzalaj Jehová tiʼja toj ambʼil jaʼlo ex tuʼn tjaw tnimsaʼna. Ex jaku ximana tiʼjju in tzaj ttziyen tuʼn ttzaj tqʼoʼn teya toj ambʼil tzul.

10. ¿Tiʼ jaku bʼant quʼn qa o tzʼok qbʼinchaʼn nya bʼaʼn kyiʼj txqantl?

 ¹⁰ Bʼalo in tzaj tbʼisa tuʼnju kukx in tzaj nya bʼaʼn kyiʼj qeju ok tbʼinchaʼna nya bʼaʼn kyiʼj ojtxe. Qa in bʼaj jlu tiʼja, ¿tiʼ jaku bʼant tuʼna? Bʼaʼn tuʼn t-xi tqanina najsam kye tuʼn tkyaqil tkʼuʼja ex bʼaʼn tuʼn tok tilil tuʼna tuʼn tonina kyiʼj (2 Cor. 7:11). Qaninxa te Jehová tuʼn tonin kyiʼj qeju o tzaj nya bʼaʼn kyiʼj kyuʼn tbʼinchbʼena. Jaku tzʼonin Jehová kyiʼj ex tiʼja tuʼn tkubʼ kynaʼne juntl maj bʼaʼn.

11. ¿Tiʼj xnaqʼtzbʼil in nel qiʼn tiʼjju bʼant tuʼn Jonás? (Ax ikx qʼonka twitza tiʼj tilbʼilal toj).

¹¹ Qʼonka tilil tuʼn miʼn tkubʼ tbʼinchaʼna juntl maj nya bʼaʼn ex qʼonxa ambʼil te Jehová tuʼn tajbʼena tuʼn. Naʼntza aju bʼaj tiʼj profeta Jonás. Xi tqʼamaʼn Dios te tuʼn t-xiʼ toj tnam Nínive, pero xi oq toj juntl tnam. Xi kawin tuʼn Jehová ex xi tnimen (Jon. 1:​1-4, 15-17; 2:​7-10). Kukx ajbʼen Jonás tuʼn Jehová, xi tqʼoʼn juntl maj ambʼil te tuʼn t-xiʼ atz Nínive ex jun rat xi tbʼiʼn Jonás. Tzaj tbʼis tiʼjju otoq bʼant tuʼn, pero mintiʼ el tiʼn jlu ambʼil te tuʼn ttzaj tkʼamoʼn juntl akʼaj toklen tzaj tqʼoʼn Jehová (Jon. 3:​1-3).

IN TZAJ TQʼUQBʼAʼN JEHOVÁ QKʼUʼJ TUʼN XEWBʼAJ XJAN

12. ¿Tzeʼn in tzaj tqʼoʼn Jehová mujbʼabʼil toj qanmi aj qok weʼ twitz jun nya bʼaʼn? (Filipenses 4:​6, 7).

¹² Qa ma che tzaj nya bʼaʼn qiʼj ex qa ma qo ok weʼ twitz jun ambʼil kwest, jaku tzʼajbʼen xewbʼaj xjan tuʼn Jehová tuʼn ttzaj tqʼuqbʼaʼn qkʼuʼj. Atzun jlu bʼaj tiʼj Ron ex Carol tej tkubʼ tbʼyon tibʼ jun kykʼwal otoq chʼiy. Kyqʼama jlu: «Nyatoq tnejel maj in qo ok weʼye twitz jun ambʼil kwest, pero a jlu mas kwest kywitz txqantl. Tuʼnju nim maj mintiʼtoq in qo jtane te qonikʼan, in qo naʼne Dios te Jehová ex in kubʼ qnaʼne mujbʼabʼil toj qanmiye ik tzeʼn in tzaj tqʼamaʼn Filipenses 4:6 ex 7» (kjawil uʼjit). Qa in nok weʼya twitz jun nya bʼaʼn ex qa in kubʼ tnaʼna bʼis, qʼamanxa te Jehová tkyaqilju in kubʼ tnaʼna. Jaku yolina tukʼil nimku maj ex jniʼxku ambʼil taja (Sal. 86:3; 88:1). Miʼn sikta tuʼn kukx t-xi tqanina xewbʼaj xjan te. Bʼaʼn tuʼn tok qeʼ tkʼuʼja tiʼj qa ktzajel tbʼiʼn tnaʼj Diosa (Luc. 11:​9-13).

13. ¿Tzeʼn jaku tzʼonin xewbʼaj xjan qiʼj tuʼn kukx qajbʼen te Jehová? (Efesios 3:16).

¹³ ¿Ope tzikʼa toj jun ambʼil kwest ex in kubʼ tnaʼna qa ya mintiʼ tipumala? Jaku tzaj tqʼoʼn Jehová xewbʼaj xjan tuʼn tten tipuna ex tuʼn kukx tajbʼena te (kjawil uʼjit Efesios 3:16). Qo yolin tiʼjju ikʼ tiʼj jun ermana Flora tbʼi. Ajbʼen te misionera junx tukʼil tchmil, pero xi tjyoʼn tchmil juntl t-xuʼjil, tuʼntzunju, kubʼ tdivorciarin tibʼ Flora. Tqʼama jlu: «Kubʼ nnaʼne nim bʼis tuʼnju bʼant tuʼn ex oʼkxtoq in chin ximane tiʼj jlu tkyaqil qʼij ex tkyaqil qonikʼan. Tuʼntzunju, xi nqanine xewbʼaj xjan te Jehová tuʼntzun tikʼx nya bʼaʼn lu wuʼne. Ok tqʼanin Jehová bʼis toj wanmiye ex onin wiʼje tuʼn tikʼx nya bʼaʼn wuʼne maske kubʼ nximane qa mlayxtoq chin exe toj nya bʼaʼn». In kubʼ tnaʼn Flora qa mas in nok qeʼ tkʼuʼj tiʼj Jehová jaʼlo twitzju toj ambʼil ojtxe. Ex qʼuqli tkʼuʼj tiʼj qa kʼonil tiʼj aj tok weʼ twitz alkyexku nya bʼaʼn. Ex tqʼamatl: «Onin Jehová wiʼje ik tzeʼn in tzaj tqʼamaʼn Salmo 119:32: ‹Nnoʼk tilil wuʼne tuʼn kyjapun qe tmandamyenta ex nojni wanmiye tuʼn tzalajbʼil tuʼna›».

14. ¿Tiʼ jaku bʼant quʼn tuʼn ttzaj qkʼamoʼn xewbʼaj xjan?

¹⁴ Otoqxi txi tqanina xewbʼaj xjan te Jehová, ¿tiʼ mastl jaku bʼant tuʼna? Bʼaʼn tuʼn tkubʼ tbʼinchaʼna junjun tiʼchaq jaku tzʼonin tiʼja tuʼn ttzaj tkʼamoʼna xewbʼaj xjan, ik tzeʼn tuʼn t-xiʼya kyoj chmabʼil ex tuʼn texa pakbʼal. Ax ikx bʼaʼn tuʼn tjaw  tuʼjina Tyol Dios tkyaqil qʼij tuʼntzun tten t-ximbʼetza ik tzeʼn te Jehová (Filip. 4:​8, 9). Aj tjaw tuʼjina, bʼaʼn tuʼn t-ximana tiʼj nya bʼaʼn e ok weʼ tmajen Jehová twitz ex ximana tiʼj alkye tten onin kyiʼj. Ok weʼ Sandra twitz nim nya bʼaʼn, aju ma qo yolin tiʼj toj párrafo 6. Tqʼamaʼn jlu: «Kukx in nonin wiʼje aju bʼaj tiʼj José. Maske ok bʼinchaʼn nim nya bʼaʼn tiʼj, pero mintiʼ xi tqʼoʼn ambʼil tuʼn tnaj tamiwbʼil tukʼil Jehová» (Gén. 39:​21-23).

IN CHE AJBʼEN ERMAN TUʼN JEHOVÁ TUʼN TTZAJ TQʼUQBʼAʼN QKʼUʼJ

15. ¿Alkyeqe jaku tzaj kyqʼuqbʼaʼn qkʼuʼj ex alkye tten jaku bʼant kyuʼn? (Ax ikx qʼonka twitza tiʼj tilbʼilal).

¹⁵ Nim jaku qʼuqbʼanjtz qkʼuʼj kyuʼn erman aj qok weʼ kywitz nya bʼaʼn (Col. 4:11). In che ajbʼen erman tuʼn Jehová tuʼn ttzaj tyekʼin qa nimxix kʼujlaʼn qo tuʼn. Jaku tzaj kyqʼuqbʼaʼn erman qkʼuʼj aj qok bʼiʼn kyuʼn ex aj kyten qukʼil. Atlo maj jaku tzaj kyuʼjin jun texto qe moqa jaku che naʼn Dios qukʼil (Rom. 15:4). d Ax ikx at maj in tzaj kynaʼn erman qe alkye t-ximbʼetz Jehová kyiʼj qe tiʼchaq ex in nonin qiʼj tuʼn miʼn ttzaj bʼajxix qkʼuʼj. Ex at maj in che onin erman qiʼj ik tzeʼn aj kypon qʼol jun qwa.

16. ¿Tiʼ il tiʼj tuʼn tbʼant quʼn tuʼn kyonin txqantl qiʼj?

¹⁶ Tuʼn ttzaj tkʼamoʼna onbʼil, at maj il tiʼj tuʼn t-xi tqanina. Kʼujlaʼna kyuʼn erman ex kyajbʼil tuʼn kyonin tiʼja (Prov. 17:17). Pero atlo maj mintiʼ ojtzqiʼn kyuʼn tiʼ  in kubʼ tnaʼna ex tiʼ onbʼil taja (Prov. 14:10). Qa in bʼisuna, bʼaʼn tuʼn tyolina kyukʼil tamiwa ma che chʼiy toj kyokslabʼil ex qʼamanxa kye tiʼ in kubʼ tnaʼna. Bʼaʼn tuʼn t-xi tqʼamaʼna kye tzeʼn jaku che onin tiʼja. Jaku yolina tukʼil jun moqa kyukʼil kabʼe ansyan qʼuqli tkʼuʼja kyiʼj. Ex ateʼ ermana mas in kubʼ kynaʼn bʼaʼn aj kyyolin tukʼil juntl ermana o chʼiy toj tokslabʼil.

17. ¿Tiquʼn at maj kwest tuʼn ttzaj qkʼamoʼn onbʼil in tzaj kyqʼoʼn erman?

¹⁷ Qʼonka tilil tuʼn miʼn tel tpan tibʼa kyiʼj txqantl, maske nya taja tuʼn ttena kyukʼil qa in bʼisuna. Atlo maj mlay tzʼel kynikʼ erman tiʼja ex jaku tzaj kyqʼamaʼn jun kyyol nya toj tumel (Sant. 3:2). Pero miʼn txi tqʼoʼna ambʼil te jlu tuʼn tel tpan tibʼa kyiʼj tuʼnju jaku che ajbʼen tuʼn Jehová tuʼn kyonin tiʼja. Tok depresión tiʼj jun ansyan Gavin tbʼi ex in tzaj tqʼamaʼn jlu: «Nim maj nya waje tuʼn nyoline nix tuʼn ntene kyukʼil wamiwe». Maske in bʼaj jlu tiʼj, in nok tilil tuʼn tuʼn tten kyukʼil txqantl ex in onin jlu tiʼj tuʼn tkubʼ tnaʼn bʼaʼn. In tzaj tqʼamaʼn jun ermana Amy tbʼi jlu: «Kyuʼn junjun tiʼchaq o che ikʼ toj wanqʼibʼile, kwest tuʼn tok qeʼ nkʼuʼje kyiʼj xjal. Pero in nok tilil wuʼne tuʼn kyok nkʼujlaʼne erman ex tuʼn tok qeʼ nkʼuʼje kyiʼj, ik tzeʼn in bʼant tuʼn Jehová. Aj tbʼant jlu wuʼne in tzalaj Jehová tuʼn, ax ikx weye».

IN TZAJ QʼUQBʼAʼN QKʼUʼJ KYUʼN YOL O TZAJ TTZIYEN JEHOVÁ

18. ¿Tiʼ kbʼajel toj ambʼil tzul ex tiʼ jaku bʼant quʼn jaʼlo?

¹⁸ Chʼix tpon ambʼil tuʼn tel tiʼn Jehová tkyaqilju in tzaj bʼaj qkʼuʼj tuʼn (Apoc. 21:​3, 4). Toj akʼaj twitz Txʼotxʼ «mi aʼl jun ktzajel naʼntl te» tkyaqilju nya bʼaʼn ikʼx tuʼn (Is. 65:17). Ax ikx toj ambʼil jaʼlo in qo ok t-xqʼuqin Jehová. O tzaj tqʼoʼn nim tumel tuʼn ttzaj tqʼuqbʼaʼn qkʼuʼj ex tuʼn tonin qiʼj. Tuʼntzunju, tbʼanel tuʼn kyajbʼen quʼn. Qeʼk tkʼuʼja tiʼj qa kʼujlaʼna tuʼn Jehová (1 Ped. 5:7).