1. ¿Alkye junjun oyaj o tzaj tqʼoʼn Jesús qe?

 NIMXIX o tzʼonin Jesús kyiʼj xjal. Jun techel, tej tten twitz Txʼotxʼ ajbʼen tipumal tuʼn tuʼn kybʼant junjun milagro tuʼn tuʼntzun tonin kyiʼj xjal (Luc. 9:​12-17). Ax ikx tzaj tqʼoʼn jun matij oyaj qe qkyaqilx tej t-xi tqʼoʼn tchwinqlal qiʼj (Juan 15:13). Ex atxix tej tjaw anqʼin, kukx in tzaj tqʼoʼn oyaj qe. Ik tzeʼn tzaj ttziyen, kukx in xi tqanin xewbʼaj xjan te Jehová tuʼn qtzaj t-xnaqʼtzan ex tuʼn ttzaj tqʼuqbʼaʼn qkʼuʼj (Juan 14:​16, 17; 16:13). Ex in che ajbʼen chmabʼil tuʼn tuʼn qtzaj t-xnaqʼtzaʼn tuʼn tbʼant-xix qpakbʼan ex qqʼon xnaqʼtzbʼil (Mat. 28:​18-20).

2. ¿Alkye junjun xjal in che ok ik tzeʼn jun «oyaj»? (Efesios 4:​7, 8).

² Ax ikx in tzaj tqʼoʼn Jesús junjuntl oyaj qe. Kubʼ ttzʼibʼin apóstol Pablo qa tej tjax Jesús toj kyaʼj «e tzaj tqʼoʼn xinaq ik tzeʼn qe oyaj» (kjawil uʼjit Efesios 4:​7, 8, TNM). Tzaj tqʼamaʼn Jesús qa e tzaj tqʼoʼn tuʼn kyonin toj nimku tten toj congregación (Efes. 1:​22, 23; 4:​11-13). Toj ambʼil jaʼlo, a qe siervo ministerial, qe ansyan ex qe ansyan in che bʼet kyojele Ja te Chmabʼil in che ok ik tzeʼn jun «oyaj». a Noqtzun tuʼnj, aj il qe ex in che el txalpaj (Sant. 3:2). Pero jun tbʼanelxix oyaj qe, tuʼnju in che ajbʼen tuʼn Jesús tuʼn kyonin qiʼj.

3. Chikʼbʼantza tukʼil jun techel alkye tten jaku qo onin kyiʼj erman in che ajbʼen tuʼn Jesús kyoj congregación.

³ Tzaj tqʼoʼn Jesús qe erman lu tuʼn kyonin kyoj congregación (Efes. 4:12). Noqtzun tuʼnj, qkyaqilx jaku qo onin  kyiʼj tuʼn tbʼant oklenj o tzaj qʼoʼn kye. Tuʼn tel qnikʼ tiʼj jlu, qo ximen tiʼ jun grupo erman in che aqʼunan tuʼn tbʼant jun Ja te Chmabʼil. Ateʼ junjun in che aqʼunan, atzun junjuntl in xi kyqʼoʼn kywa erman ex junjuntl tiʼchaq at tajbʼen kye. Ax ikx, in bʼant junjun aqʼuntl kyuʼn siervo ministerial, qe ansyan ex qe ansyan in che bʼet kyojele Ja te Chmabʼil. Ex qkyaqilx jaku qo onin kyiʼj tukʼil junjun tiʼchaq ex tukʼil qyol. Qo xnaqʼtzal tiʼj alkye tten in nonin qiʼj aju tbʼanel aqʼuntl in bʼant kyuʼn ex tzeʼn jaku kubʼ qyekʼin qa in xi qqʼoʼn chjonte kye ex te Jesús, tuʼnju in che onin qiʼj.

«IN CHE ONIN» QE SIERVO MINISTERIAL

4. ¿Alkye junjun aqʼuntl e bʼant kyuʼn siervo ministerial toj tnejel syent abʼqʼi?

⁴ Toj tnejel syent abʼqʼi xi qʼoʼn kyoklen junjun erman te siervo ministerial (1 Tim. 3:8). Bʼalo atz kyiʼj yolin Pablo toj 1 Corintios 12:28 tej tqʼama qa «in che onin» kyiʼj txqantl. Bʼant junjun aqʼuntl kyuʼn, tuʼntzun kyqʼon ansyan xnaqʼtzbʼil ex tuʼn kyxqʼuqin kyiʼj erman. Jun techel, bʼalo e onin tuʼn kykubʼ bʼinchaʼn junjun copia tiʼj Tyol Dios moqa tuʼn kyxi loqʼel qe tiʼchaq at kyajbʼen tuʼn kybʼant mas copia.

5. ¿Alkye junjun aqʼuntl in bʼant kyuʼn siervo ministerial toj ambʼil jaʼlo?

⁵ ¿Alkye aqʼuntl in bʼant kyuʼn siervo ministerial toj ambʼil jaʼlo? (1 Ped. 4:10). Bʼalo in che onin tiʼj contabilidad, kyiʼj territorio, tuʼn kyxi qanit uʼj ex tuʼn kyxi qʼet kye erman, in che onin tiʼj audio ex video, te acomodador, ex tuʼn tbʼaj bʼinchet chʼintl Ja te Chmabʼil ex tuʼn tbʼaj saqset. Tkyaqil aqʼuntl lu in nonin tiʼj congregación (1 Cor. 14:40). Ax ikx in nikʼx kyqʼoʼn junjun kyoklen toj chmabʼil Kyanqʼibʼil Okslal ex Kypakbʼabʼil, axpe ikx in nikʼx kyqʼoʼn junjun chikʼbʼabʼil. Ex in che onin kyiʼj ansyan in che ex tiʼn jun kʼloj erman pakbʼal. Ax ikx in cheʼx tukʼil jun ansyan aj t-xi bʼinchal jun visita te pastoreo.

6. ¿Tiquʼn in nok qqʼoʼn toklen aqʼuntl in bʼant kyuʼn siervo ministerial?

⁶ ¿Tiquʼn tbʼanel aqʼuntl in bʼant kyuʼn siervo ministerial? Qo xnaqʼtzan tiʼjju kyqʼama junjun ermana kyiʼj. In tzaj tqʼama jun ermana Beberly b tbʼi te tnam Bolivia jlu: «Chjonte tuʼn aqʼuntl in bʼant kyuʼn siervo ministerial in chin tzalaje kyiʼj chmabʼil. Tuʼn aqʼuntl in bʼant kyuʼn in tzaj tqoʼn ambʼil weye tuʼn nbʼitzane ex tuʼn t-xi nqʼoʼne junjun nyole toj chmabʼil, tuʼn tok nqʼoʼne nwiʼye kyiʼj chikʼbʼabʼil, tuʼn tok nqʼoʼne nwitze kyiʼj video ex kyiʼj tilbʼilal. In che xqʼuqin kyiʼj erman ex in che onin kyiʼj qeju in nok kykonectarin kyibʼ toj videoconferencia. Aj tbʼaj chmabʼil in che onin tuʼn tbʼant limpieza ex tuʼn tbʼaj ajlet oyaj. Ax ikx in che onin tuʼn kyten qe uʼj at kyajbʼen qe. ¡In xi nqʼoʼne nimxix chjonte kye!». Ex in tzaj tqʼamaʼn Leslie te Colombia jlu, aju t-xuʼjil jun ansyan: «Nimxix in che onin siervo ministerial tiʼj nchmile. Maslo nim taqʼun nchmile at noqwit mintiʼ in che onin tiʼj kyukʼil junjun aqʼuntl. In xi nqʼoʼne chjonte kye tuʼnju kyaj tuʼn kyonin». Qkyaqilx in xi qqʼoʼn chjonte kye (1 Tim. 3:13).

7. ¿Tzeʼn jaku txi qqʼoʼn chjonte kye siervo ministerial tiʼj aqʼuntl in bʼant kyuʼn? (Ax ikx qʼonka twitza tiʼj tilbʼilal).

⁷ Bʼalo in kubʼ qnaʼn qa in xi qqʼoʼn chjonte kyiʼj siervo ministerial, pero in tzaj tqʼamaʼn Biblia jlu: «Kyqʼonxe chjonte te Dios» (Col. 3:15). In bʼant jlu tuʼn jun  ansyan te Finlandia, aju Daavid tbʼi: «In xi ntzʼibʼine jun mensaje moqa in xi nsamaʼne jun tarjeta tukʼil jun texto ex in xi nqʼamaʼne te tzeʼn tzaj tqʼuqbʼaʼn nkʼuʼje, moqa in xi nqʼoʼne chjonte te tiʼj jun aqʼuntl otoq bʼant tuʼn». Atzun te Pascal ex Jael, te Nueva Caledonia, in che naʼn Dios kyiʼj siervo ministerial. In tzaj kyqʼamaʼn jlu: «In xi qqʼoʼne chjonte te Jehová tuʼnju ateʼ qe siervo ministerial toj congregación ex in xi qqanine te tuʼn tonin kyiʼj». In qo tzaj tbʼiʼn Jehová aj qnaʼj Dios kyiʼj ex in nonin jlu kyiʼj congregación (2 Cor. 1:11).

NIMXIX IN CHE AQʼUNAN QE ANSYAN

8. ¿Tiquʼn tqʼama Pablo qa nimxix e aqʼunan qe ansyan toj tnejel syent abʼqʼi? (1 Tesalonicenses 5:​12, 13).

⁸ Nimxix e aqʼunan qe ansyan toj tnejel syent abʼqʼi (kjawil uʼjit 1 Tesalonicenses 5:​12, 13; 1 Tim. 5:17). E kubʼ nej kywitz congregación tuʼn kyok chmabʼil ex tuʼn tkubʼ kyximen tiʼ tuʼn tbʼant kyuʼn kyiʼj junjun tiʼchaq toj congregación. Ax ikx xi kyqʼoʼn consej kye erman tuʼn kukx kyten tzʼaqli twitz Jehová (1 Tes. 2:​11, 12; 2 Tim. 4:2). Ex ok tilil kyuʼn tuʼn kyten kyuw toj kyokslabʼil ex tuʼn kyxqʼuqin kyiʼj kyfamilia (1 Tim. 3:​2, 4; Tito 1:​6-9).

9. ¿Alkye junjun aqʼuntl in bʼant kyuʼn ansyan toj ambʼil jaʼlo?

⁹ Ax ikx qe ansyan toj ambʼil jaʼlo at nim aqʼuntl in bʼant kyuʼn. In nok tilil kyuʼn tuʼn kypakbʼan (2 Tim. 4:5). In kubʼ kyqʼoʼn jun tbʼanel techel qwitz toj pakbʼabʼil, in kubʼ kyximen tzeʼn tuʼn qpakbʼan toj territorio ex in qo tzaj kyxnaqʼtzan tuʼn tbʼant-xix qpakbʼan ex qqʼon xnaqʼtzbʼil. In che ok te tbʼanel jwes ex in kubʼ kyyekʼin qʼaqʼbʼil kykʼuʼj. Qa at jun erman in kubʼ tbʼinchaʼn il, in che onin tiʼj tuʼn tten juntl maj tamiwbʼil tukʼil Jehová, pero in xi kyqʼoʼn kawbʼil kye junjun tuʼntzun tten congregación saq (1 Cor. 5:​12, 13; Gál. 6:1). Ax ikx in che ok ik tzeʼn xqʼuqil rit (1 Ped. 5:​1-3). In nex kyqʼoʼn qe tbʼanel chikʼbʼabʼil, in nok tilil kyuʼn tuʼn tok kyojtzqiʼn kywitz kykyaqil erman toj congregación ex in cheʼx visitaril kye erman tuʼn t-xi kyqʼuqbʼaʼn kykʼuʼj. Ax ikx ateʼ junjun ansyan in che onin tuʼn kyjaw bʼinchet akʼaj Ja te Chmabʼil moqa tuʼn kybʼaj bʼinchet chʼintl, junjuntl in che onin tuʼn kybʼaj nukʼet asamblea te oxe qʼij, junjuntl in che onin tukʼil Kʼloj Yolil kyukʼil aj Qʼanil ex tukʼil Kʼloj in cheʼx Visitaril kye Yabʼ toj Ja te Qʼanil, ex in che onin kyiʼj junjuntl oklenj. ¡Nimxix in che onin ansyan qiʼj!

10. ¿Tiquʼn in che ok qkʼujlaʼn qe ansyan?

¹⁰ Kyaj tqʼamaʼn Jehová qa che xqʼuqil pastor kyiʼj rit «tuʼntzun miʼn kyxobʼ ex tuʼn miʼn kyjaw sekʼpaj» (Jer. 23:4). Atzun jlu bʼant kyuʼn tiʼj ermana Johanna te Finlandia tej ttzaj yabʼil tiʼj ttxuʼ. In tzaj tqʼamaʼn jlu: «Kwest tuʼn nyoline kyukʼil txqantl tiʼjju in kubʼ nnaʼne. Pero onin jun ansyan wiʼje aju naʼmxtoq tok wojtzqiʼnxixe twitz. Naʼn Dios wukʼile ex tzaj tqʼamaʼn qa kʼujlaʼn qine tuʼn Jehová. Ya mintiʼ naʼn wuʼne tiʼ tzaj tqʼamaʼn weʼye, pero kubʼ nnaʼne bʼaʼn tej nyoline tukʼil. In kubʼ nximane qa a Jehová tzaj samante tuʼn tonin wiʼje toj ambʼil mas kwest». Yajtzun teya, ¿tzeʼn o che onin ansyan tiʼja?

11. ¿Tzeʼn jaku kubʼ qyekʼin qa in xi qqʼoʼn chjonte kye ansyan tiʼj tbʼanel aqʼuntl in bʼant kyuʼn? (Ax ikx qʼonka twitza tiʼj tilbʼilal).

¹¹ Taj Jehová tuʼn kyok qkʼujlaʼn qe ansyan tuʼn tbʼanel aqʼuntl in bʼant kyuʼn (1 Tes. 5:​12, 13). In tzaj tqʼamaʼn ermana Henrietta te Finlandia jlu: «In che onin ansyan kyiʼj txqantl tuʼn tkyaqil kykʼuʼj,  pero nya a t-xilen jlu qa at mas ambʼil kyiʼj moqa mintiʼ in che sikt ex qa mintiʼ in che ok weʼ twitz junjun nya bʼaʼn. Tuʼntzunju, at maj in xi nqʼamaʼne te jun erman qa jun tbʼanel ansyan». Ex in tzaj tqʼamaʼn jun ermana te Turquía, aju Sera tbʼi: «Ax ikx kye ansyan kyaj tuʼn t-xi qʼuqbʼet kykʼuʼj tuʼn kukx kyaqʼunan. In xi ntzʼibʼine junjun tarjeta kye, in chex ntxkoʼne waʼl ex in chin pakbʼane kyukʼil». ¿Taj teya tuʼn t-xi tqʼoʼna chjonte te jun ansyan? Qa ikju, bʼaʼn tuʼn t-xi tjyoʼna tumel tuʼn t-xi tqʼoʼna chjonte te (1 Cor. 16:18).

IN CHE ONIN ANSYAN IN CHE BʼET KYOJELE JA TE CHMABʼIL KYIʼJ CONGREGACIÓN

12. ¿Alkye juntl oyaj xi tqʼoʼn Jesús kye congregación? (1 Tesalonicenses 2:​7, 8).

¹² At juntl oyaj xi tqʼoʼn Jesús kye congregación. Toj tnejel syent abʼqʼi xi samaʼn Pablo, Bernabé ex junjuntl okslal visitaril qe congregación kyuʼn ansyan te Jerusalén (Hech. 11:22). ¿Tiquʼn i ex samaʼn? Tuʼn t-xi kyqʼuqbʼaʼn kykʼuʼj erman kyoj congregación, ik tzeʼn in bʼant kyuʼn siervo ministerial ex kyuʼn ansyan (Hech. 15:​40, 41). Bʼant nim tiʼ kyuʼn tuʼn t-xi kyqʼuqbʼaʼn kykʼuʼj erman ex at maj chʼixme e kyim (kjawil uʼjit 1 Tesalonicenses 2:​7, 8).

13. ¿Alkye junjun aqʼuntl in bʼant kyuʼn ansyan in che bʼet kyojele Ja te Chmabʼil?

¹³ Siempre in che viajarin ansyan in che bʼet kyojele Ja te Chmabʼil. In xi kybʼetin nim kilómetro tuʼn kypon toj teyele junjun congregación. Tkyaqil seman in nex kyqʼoʼn chikʼbʼabʼil, in cheʼx visitaril kye erman tuʼn t-xi kyqʼuqbʼaʼn kykʼuʼj. In nok chmabʼil kyuʼn kyukʼil precursor, kyukʼil ansyan ex kyukʼil erman in che ex pakbʼal.  Ax ikx in bʼaj kynukʼun qe asamblea te jun qʼij ex te oxe qʼij. Ex in bʼaj kynukʼun escuela kye precursor, qe chmabʼil kyukʼil precursor te tkyaqil circuito ex in xi kybʼinchaʼn junjuntl aqʼuntl in tzaj tqanin sucursal kye, ex at maj il tiʼj tuʼn tbʼant naj kyuʼn.

14. ¿Tiquʼn in nok qqʼoʼn toklen aqʼuntl in bʼant kyuʼn ansyan in che bʼet kyojele Ja te Chmabʼil?

¹⁴ ¿Tzeʼn in nonin tbʼanel aqʼuntl in bʼant kyuʼn ansyan in che bʼet kyojele Ja te Chmabʼil kyiʼj congregación? In tzaj tqʼamaʼn jun ermano te Turquía jlu: «Aj kyul visitaril in che onin wiʼje tuʼn kukx tel npaʼne ambʼil tuʼn ntene kyukʼil erman ex tuʼn wonine kyiʼj. O tzʼok wojtzqiʼne nim ansyan in che bʼet kyojele Ja te Chmabʼil, ex nijun kye kubʼ tyekʼin qa mintiʼ ambʼil tiʼj tuʼn tyolin wukʼile». Pakbʼan Johanna, aju ma qo yolin tiʼj toj párrafo 10, tukʼil jun ansyan in bʼet kyojele Ja te Chmabʼil ex mintiʼ kanet jun xjal kyuʼn toj pakbʼabʼil. In tzaj tqʼamaʼn ermana jlu: «Maske bʼaj jlu, kukx tzul nnaʼne qʼij aju. In chin bʼisune kyiʼj kabʼe wermane otoq cheʼx toj juntl lugar. Tzaj qʼuqbʼaʼn nkʼuʼje tuʼn ermano ex tzaj tyekʼin weye qa noq chʼin ambʼil kʼelel qpaʼn qibʼe, tuʼnju toj akʼaj twitz Txʼotxʼ ktel nim ambʼil tuʼn qtene junx». Bʼalo ax ikx qe, in che ok qkʼujlaʼn qe ansyan in che bʼet kyojele Ja te Chmabʼil tuʼnju alkye tten o che onin qiʼj (Hech. 20:​37–21:1).

15. a) ¿Tzeʼn jaku kubʼ qbʼinchaʼn aju in tzaj tqʼamaʼn 3 Juan 5 a 8 tuʼn tkubʼ qyekʼin qa in nok qqʼoʼn toklen kyaqʼun ansyan in che bʼet kyojele Ja te Chmabʼil? (Ax ikx qʼonka twitza tiʼj tilbʼilal). b) ¿Tiquʼn bʼaʼn tuʼn tok qqʼoʼn toklen onbʼil in tzaj tqʼoʼn kyxuʼjil erman, ex tzeʼn jaku bʼant quʼn? (Qʼonka twitz tiʼj recuadro « Bʼaʼn tuʼn tok qqʼoʼn toklen onbʼil in tzaj tqʼoʼn kyxuʼjil erman»).

¹⁵ Xi tqʼamaʼn apóstol Juan te Gayo tuʼn tonin kyiʼj erman in che pon visitaril qe congregación. Tqʼama jlu: «Bʼaʼnxix in  tbʼinchaʼna qa ma txi tqʼoʼna chʼin onbʼil kye tuj kybʼe, porke in che ajbʼen te Dios» (kjawil uʼjit 3 Juan 5-8). ¿Tzeʼn jaku bʼant jlu quʼn? Jaku chex qtxkoʼn qja tuʼn t-xi qqʼoʼn jun kywa ex jaku qo ex pakbʼal kyukʼil toj seman aj kyul visitaril qe. Tqʼama Leslie, aju ma qo yolin tiʼj toj párrafo 6, tiʼ in bʼant tuʼn tuʼn tkubʼ tyekʼin qa in xi tqʼoʼn chjonte kye. Tqʼama jlu: «In xi nqʼamaʼne te Jehová tuʼn kukx t-xi tqʼoʼn aju at tajbʼen kye. Ex junx tukʼil nchmile in xi qtzʼibʼine carta kye tuʼn t-xi qqʼamaʼne qa nimxix in tzaj kyqʼuqbʼaʼn qkʼuʼje aj kyul visitaril qeye». Bʼaʼn tuʼn ttzaj qnaʼn qa ax ikx kye ansyan in che bʼet kyojele Ja te Chmabʼil in che sikt ex in che ok weʼ twitz nya bʼaʼn. At maj in tzaj yabʼil kyiʼj ex in tzaj bʼaj kykʼuʼj. Jakulo qo ajbʼen tuʼn Jehová tuʼn ttzaj ttzaqʼweʼn kynaʼj Dios aj t-xi qqʼamaʼn tbʼanel yol kye moqa aj t-xi qqʼoʼn jun oyaj kye (Prov. 12:25).

QAJ TUʼN KYONIN MAS ERMAN

16. ¿Tiʼ bʼaʼn tuʼn tkubʼ kyxjelin ermano? (Proverbios 3:27).

¹⁶ Twitz tkyaqil Txʼotxʼ atx taj mas ermanos tuʼn kyonin kyoj congregación. Qa o bautisarin teya, ¿jakupe bʼant tuʼn tonina? (kjawil uʼjit Proverbios 3:27). ¿In nokpe tilil tuʼna tuʼn toka te siervo ministerial? Ex qa ya o tzʼoka te siervo ministerial, ¿ope kubʼ t-ximana tuʼn toka te ansyan? c ¿Jakupe bʼant junjun chʼixpubʼil tuʼna tuʼn t-xiʼya toj Xnaqʼtzbʼil kye Pakbʼal tiʼj Tkawbʼil Dios? Qa ma txiʼya toj xnaqʼtzbʼil lu, jaku tzʼajbʼena mas tuʼn Jesús. Qa in kubʼ t-ximana qa mlay bʼant jlu tuʼna, qʼamanxa te Jehová. Qaninxa xewbʼaj xjan te tuʼn tonin tiʼja tuʼn tjapun alkyexku oklenj o tzaj qʼoʼn teya (Luc. 11:13; Hech. 20:28).

17. ¿Tiʼ in tzaj tyekʼin tbʼanel aqʼuntl in bʼant kyuʼn erman o che tzaj tqʼoʼn Jesús ik tzeʼn oyaj?

¹⁷ Tuʼn tbʼanel aqʼuntl in bʼant kyuʼn erman ma qo yolin kyiʼj toj xnaqʼtzbʼil lu, in tzaj tyekʼin qa nejni Jesús qwitz kyoj bʼajsbʼil tqʼijlalil (Mat. 28:20). Kʼujlaʼn qo tuʼn Jesús, in tzaj tqʼoʼn aju at tajbʼen qe ex in tzaj tqʼoʼn qe erman tuʼn kyonin qiʼj. ¿In xipe qqʼoʼn chjonte te Jesús ex kye erman? Bʼaʼn tuʼn t-xi qjyoʼn junjun tumel tuʼn tbʼant jlu quʼn. Ax ikx bʼaʼn tuʼn t-xi qqʼoʼn chjonte te Jehová, tuʼnju «tkyaqil oyaj bʼaʼn ex tkyaqil oyaj tbʼanilxix, [ . . . ] atzun in tzaj tukʼil Dios» (Sant. 1:17).