XNAQʼTZBʼIL 43
BʼITZ 90 Qo onin qibʼ qxolx
¿Tiʼ jaku bʼant quʼn qa in jawje qkʼuʼj?
«Kykeʼyin bʼaje tkyaqil» (1 TES. 5:21).
¿TIʼ KʼELEL QNIKʼ TIʼJ?
Kʼelel qnikʼ tiʼj tiʼ jaku bʼant quʼn qa in jawje qkʼuʼj kyiʼj junjun tiʼchaq at toklen tukʼil qajbʼebʼil te Jehová.
1, 2. a) ¿Tiʼ jaku jawje qkʼuʼj tiʼj? b) ¿Tiʼ kʼelel qnikʼ tiʼj toj xnaqʼtzbʼil lu?
QKYAQILX, qa kuʼxun qoʼ moqa ma qo tijen, at maj in tzaj bʼaj qkʼuʼj ex nya segur atoʼ tiʼj qa at qoklen toj twitz Jehová, ex qa bʼaʼn aju kubʼ qximen tuʼn tbʼant quʼn ojtxe. Qo ximen tiʼj jun kuʼxun nya segur taʼ tiʼj qa in nok tqʼoʼn Jehová twitz tiʼj ex in tzaj xobʼ tuʼn tbautisarin. Moqa qo ximen tiʼj jun ermano ajbʼen ambʼil tuʼn tuʼn tkubʼ tqʼoʼn Jehová tnejel toj tanqʼibʼil tej kuʼxun ex nya tuʼn tkambʼet nim tpwaq. Atzun jaʼlo at tfamilia ex mintiʼ in kanin tpwaq tuʼn kykʼaʼchit, tuʼntzunju, in jawje tkʼuʼj tiʼj qa bʼaʼn aju jaw tskʼoʼn tej kuʼxuntoq. Qo ximen tiʼj juntl techel, in bʼisun jun ermana ma tijen tuʼnju ya mintiʼxix tipumal tuʼn kybʼant qe tiʼchaq tuʼn jaʼlo ik tzeʼn ojtxe. Axlo ikx teya olo ximana kyiʼj junjunx xjel ik tzeʼn jlu: «¿In nokpe tqʼoʼn Jehová twitz wiʼje? ¿Tbʼanelpe tuʼnju kubʼ nximane tuʼn wajbʼene te Jehová? ¿Kukxpe at wajbʼene te?».
2 Jaku chewix qʼuqbʼil qkʼuʼj, axpe ikx jaku kyaj qtzaqpiʼn tuʼn qajbʼen te Jehová kyuʼn qe ximbʼetz ik tzeʼn jlu. Toj xnaqʼtzbʼil lu, kʼelel qnikʼ tiʼj tzeʼn jaku tzʼonin Biblia qiʼj qa in kubʼ qximen qa mintiʼ in nok tqʼoʼn Jehová qoklen, qa in jawje qkʼuʼj tiʼjju bʼant quʼn ojtxe ex qa in kubʼ qnaʼn qa ya mintiʼtl qajbʼen te Jehová.
¿TIʼ JAKU BʼANT QUʼN QA IN JAWJE QKʼUʼJ?
3. ¿Tiʼ kʼonil qiʼj tuʼn miʼn tjawje qkʼuʼj?
3 Qa in jawje qkʼuʼj, jaku tzʼonin Tyol Dios qiʼj. Qa ma qo xnaqʼtzan tiʼj Biblia, kchʼiyil qʼuqbʼil qkʼuʼj ex qamiwbʼil tukʼil Jehová ex qo kbʼel weʼ kyuw toj qokslabʼl (1 Cor. 16:13).
4. ¿Tzeʼn jaku txi qbʼinchaʼn aju in tzaj tqʼamaʼn 1 Tesalonicenses 5:21?
4 (Kjawil uʼjit 1 Tesalonicenses 5:21). In tzaj tqʼamaʼn Biblia jlu qe: «Kykeʼyin bʼaje tkyaqil». Pero ¿tzeʼntzun jaku bʼant jlu quʼn? Aj tok qmojbʼaʼn aju in kubʼ qximen tukʼilju in tzaj tqʼamaʼn Biblia. Qo ximen tiʼjju kuʼxun in kubʼ tnaʼn qa mintiʼ in nok tqʼoʼn Jehová twitz tiʼj. ¿Bʼaʼnpe tuʼn kukx t-ximen kuʼxun tiʼj jlu? Miʼn, sino mas bʼaʼn qa ma txi tjyoʼn tqanil toj Biblia tuʼntzun tel tnikʼ tiʼj tiʼ t-ximbʼetz Jehová at tiʼj.
5. ¿Tzeʼn in tzaj ttzaqʼweʼn Jehová qe qxjel?
5 Aj quʼjin tiʼj Tyol Dios in nok ik tzeʼn in yolin Jehová qukʼil. Ex jaku txi qbʼiʼn aj tok tilil quʼn tuʼn t-xi qjyoʼn qe texto in che yolin tiʼjju in jawje qkʼuʼj tiʼj ex tuʼn t-xi qjyoʼn mas tqanil kyoj uʼj o che etz tuʼn ttnam Jehová (Prov. 2:3-6). Ax ikx, nim toklen tuʼn t-xi qqanin onbʼil te Jehová tuʼn qtzaj tonin tuʼn tkanet tzaqʼwebʼil quʼn kyiʼj qxjel. Bʼaʼn tuʼn t-xi qjyoʼn qe texto ex qe nabʼil jaku che onin qiʼj. Ex bʼaʼn tuʼn t-xi qjyoʼn junjun txʼolbʼabʼil toj Tyol Dios kyiʼj xjal o tzikʼ qe tiʼchaq kyiʼj ik tzeʼn qe.
6. ¿Tzeʼn in che onin chmabʼil tuʼn kytzaqʼwet qe qxjel?
6 Ax ikx in yolin Jehová qukʼil aj qxiʼ kyoj chmabʼil. Qa kukx ma qo bʼet kyoj chmabʼil, at maj jaku tzʼok qbʼiʼn tzaqʼwebʼil kyiʼj qxjel toj jun chikʼbʼabʼil moqa toj jun comentario (Prov. 27:17). Atzun jaʼlo qo yolil kyiʼj junjun xjel ex tzeʼn jaku kanet tzaqʼwebʼil kyiʼj quʼn.
¿TIʼ JAKU BʼANT TUʼNA QA IN KUBʼ T-XIMANA QA MINTIʼ IN NOK TQʼOʼN JEHOVÁ TWITZ TIʼJA?
7. ¿Tiʼ jakulo kubʼ qxjelin?
7 Bʼalo o kubʼ t-ximana jun maj qa ax tok in nok tqʼoʼn Jehová twitz tiʼja moqa miʼn. Qa in kubʼ tnaʼna qa mintiʼ toklena, jakulo kubʼ t-ximana qa mlayx tzʼoka te tamiw Jehová, aju Bʼinchal tkyaqil. Axlo jlu kubʼ t-ximen rey David. Kwest-toq tuʼn t-xi tnimen qa nim kyoklen xjal toj twitz Jehová, tuʼntzunju, xi tqanin jlu te: «Nman Dios, ¿ti kyxilen qe xjal tuʼnju kukx in ximana kyiʼj? ¿Ti kyxilen qe xjal tuʼnju kʼujlaʼn qe tuʼna?» (Sal. 144:3). Qo yolin tiʼj tzeʼn jaku kanet tzaqʼwebʼil tiʼj xjel lu quʼn.
8. Ik tzeʼn in tzaj tqʼamaʼn 1 Samuel 16:6, 7, 10-12, ¿tiʼ in nok tqʼoʼn Jehová twitz tiʼj?
8 In tzaj tyekʼin Biblia qa in nok tqʼoʼn Jehová twitz kyiʼj qeju in kubʼ kyximen qa nya nim kyoklen. Jun techel, xi tsamaʼn Jehová Samuel tja Jesé tuʼn tjaw tjyoʼn jun tkʼwal tuʼn tok te rey kyibʼaj aj Israel. Tzaj tiʼn Jesé qe wuq tkʼwal, pero mintiʼ tzaj tiʼn David, aju mas chʼin. a Noqtzun tuʼnj, a David otoq jaw skʼoʼn tuʼn Jehová (kjawil uʼjit 1 Samuel 16:6, 7, 10-12). ¿Tiquʼn a David jaw skʼoʼn tuʼn Jehová? Tuʼnju otoq tzʼok tqʼoʼn twitz tiʼjju tkux toj tanmi ex otoq tzʼel tnikʼ tiʼj qa kʼujlaʼntoq tuʼn.
9. ¿Tiquʼn jaku tzʼok qeʼ tkʼuʼja tiʼj qa in ximen Jehová tiʼja? (Ax ikx qʼonka twitza tiʼj tilbʼilal).
9 Ximana tiʼjju o bʼant tuʼn Jehová tuʼn ttzaj tyekʼin teya qa in ximen tiʼja. In tzaj tqʼoʼn qe consej at-xix kyajbʼen teya (Sal. 32:8). ¿Tiquʼn? Tuʼnju ojtzqiʼnxix twitza tuʼn (Sal. 139:1). Aj t-xi tnimana qe consej in tzaj tqʼoʼn ex aj tok tqʼoʼna twitza tiʼj qa in che onin tiʼja, kʼokel qeʼ tkʼuʼja tiʼj qa in ximen Jehová tiʼja (1 Crón. 28:9; Hech. 17:26, 27). In nok tqʼoʼn Jehová twitz kyiʼj tbʼanel tmoda ex taj tuʼn tok te tamiwa (Jer. 17:10). Nimxix ktzalajel qa ma bʼant jlu tuʼna (1 Juan 4:19).
«Qa ma jyona tiʼj, knetel tuʼna» (1 Crón. 28:9). (Qʼonka twitza tiʼj párrafo 9). b
¿TIʼ JAKU BʼANT TUʼNA QA IN KUBʼ T-XIMANA QA MINTIʼ JAW TJYOʼNA AJU MAS BʼAʼN?
10. ¿Tiʼ jaku kubʼ t-xjelina aj t-ximana tiʼjju jaw tskʼoʼna ojtxe?
10 Bʼalo in kubʼ t-ximana qa mintiʼ jaw tjyoʼna aju mas bʼaʼn toj ambʼil ojtxe. Bʼalo kyaj tqʼoʼna jun tbʼanel aqʼuntl moqa kubʼ t-ximana tuʼn miʼn tkubʼ tqʼoʼna jun negocio noq tuʼn tajbʼena mas te Jehová. Pero tej tikʼ ambʼil, ok tqʼoʼna twitza tiʼj qa ateʼ junjun tfamiliara moqa tamiwa ok kyqʼoʼn kywiʼ tiʼj pwaq at tbʼanel tiʼchaq kye jaʼlo. Jakulo kubʼ t-xjelina jlu: «¿Tbʼanelpe tuʼnju kubʼ nximane tuʼn wajbʼene te Jehová? ¿Maspe bʼaʼn noqwit kubʼ nximane tuʼn tkanet mas npwaqe?».
11. ¿Tiquʼn tzaj bʼaj tkʼuʼj aj tzʼibʼil tiʼj Salmo 73?
11 Qa o kubʼ t-xjelina jlu jun maj, bʼaʼn tuʼn t-ximana tiʼjju kubʼ tnaʼn aj tzʼibʼil tiʼj Salmo 73. Ok tqʼoʼn twitz kyiʼj xjal mintiʼ in che ajbʼen te Jehová ex el tnikʼ tiʼj qa attoq jun tbʼanel kyanqʼibʼil, mintiʼtoq in tzaj yabʼil kyiʼj ex attoq kyqʼinumabʼil (Sal. 73:3-5, 12). Tuʼntzunju kubʼ t-ximen qa mintiʼ toklen aju otoq bʼant tuʼn toj tajbʼebʼil te Jehová. Kukx ul nya bʼaʼn ximbʼetz lu toj twiʼ, tuʼntzunju tqʼama jlu: «Tuj enter qʼij in chin kʼixbʼisanjtze» (Sal. 73:13, 14). Pero, ¿tiʼ onin tiʼj?
12. Ik tzeʼn in tzaj tqʼamaʼn Salmo 73:16-18, ¿tiʼ onin tiʼj salmista tuʼn miʼn ttzaj tbʼis?
12 (Kjawil uʼjit Salmo 73:16-18). Xiʼ toj tja Jehová ex onin tiʼj tuʼn t-ximen toj tumel. El tnikʼ tiʼj qa maske attoq jun tbʼanel kyanqʼibʼil xjal, mintiʼtoq jun qʼuqbʼil kykʼuʼj. Tuʼntzunju, el tnikʼ tiʼj qa mas tbʼanel tej tkubʼ tqʼoʼn Jehová tnejel toj tanqʼibʼil. Onin jlu tiʼj tuʼn ttzalaj ex tuʼn kukx tajbʼen te Jehová (Sal. 73:23-28).
13. ¿Tzeʼn jaku kubʼ kyiʼj nya bʼaʼn ximbʼetz tuʼna? (Ax ikx qʼonka twitza kyiʼj tilbʼilal).
13 Ik tzeʼn te salmista, ax ikx teya jaku kubʼ kyiʼj nya bʼaʼn ximbʼetz tuʼna. ¿Tzeʼn jaku bʼant tuʼna? Bʼaʼn tuʼn t-ximana kyiʼj tbʼanel tiʼchaq at teya, axpe ikx kyiʼj kʼiwlabʼil in tzaj tqʼoʼn Jehová teya. Atzun kye xjal mintiʼ in che ajbʼen te Jehová, mintiʼ in nonin kyiʼj. Oʼkx tok kywiʼ tiʼjju jaku kambʼet kyuʼn toj ambʼil jaʼlo ex mintiʼ jun qʼuqbʼil kykʼuʼj toj ambʼil tzul. Atzun qe, in tzaj ttziyen Jehová tuʼn ttzaj tqʼoʼn mas twitzju in kubʼ qximen (Sal. 145:16). Mlay tzʼel qnikʼ tiʼj tzeʼnwitlo taʼ qanqʼibʼil jaʼlo noqwit kubʼ qximen tuʼn tbʼant junxitl tiʼ quʼn. Pero bʼiʼn quʼn qa kukx tzul tqʼoʼn Jehová aju at tajbʼen qe qa kukx ma che bʼant junjun tiʼchaq quʼn, noq tuʼn qkʼujlabʼil at tiʼj Jehová ex kyiʼj xjal.
Kukx qo ximen kyiʼj ttziybʼil Jehová. (Qʼonka twitza tiʼj párrafo 13). c
¿TIʼ JAKU BʼANT TUʼNA QA IN KUBʼ T-XIMANA QA NYA NIM TOKLENA TOJ TWITZ JEHOVÁ?
14. ¿Alkye junjun tiʼchaq in che ok weʼ tmajen Jehová twitz ex tiʼ jaku kubʼ kyxjelin?
14 Ateʼ junjun tmajen Jehová kyaj tuʼn tbʼant mas kyuʼn toj kyajbʼebʼil te, pero mlay bʼant kyuʼn tuʼnju ma che tijen, at jun yabʼil kyiʼj moqa nya tzʼaqli kyxmilal. Bʼalo tuʼn jlu in kubʼ kynaʼn qa nya nim kyoklen toj twitz Jehová. Ex in kubʼlo kyxjelin jlu: «¿Atpe wajbʼene te Jehová?».
15. ¿Tiʼ ok qeʼ tkʼuʼj aj tzʼibʼil te Salmo 71 tiʼj?
15 Chʼixme ax jlu kubʼ tnaʼn aj tzʼibʼil tiʼj Salmo 71. Tqʼama jlu te Jehová: «Miʼn chin kyaj tkolina ok mintiʼtl wipune» (Sal. 71:9, 18). Ok qeʼ tkʼuʼj tiʼj qa kʼonil Jehová tiʼj qa kukx ma ten tzʼaqli twitz. El tnikʼ tiʼj qa in tzalaj Jehová kyiʼj qeju in nok tilil kyuʼn tuʼn kyajbʼen te, maske at maj kwest tuʼn tbʼant kyuʼn (Sal. 37:23-25).
16. ¿Tiquʼn in xi qqʼamaʼn qa nim kyoklen qe erman o che tijen toj twitz Jehová? (Salmo 92:12-15).
16 Qa ma tijena, ximana tiʼjju in kubʼ tnaʼn Jehová tiʼja. Maske in kubʼ t-ximana qa mlay bʼant nim tiʼchaq tuʼna, pero jaku tzʼonina kyiʼj txqantl (kjawil uʼjit Salmo 92:12-15). Miʼn kubʼ t-ximana qa mlayx bʼant jun tiʼ tuʼna, tuʼnju jaku tzʼonina kyiʼj txqantl tukʼil tbʼanel techel in kubʼ tqʼoʼna ex aj tkubʼ tyekʼina qa in ximana kyiʼj. Jaku txi tqʼamaʼna kye tzeʼn o tzʼonin Jehová tiʼja toj tkyaqil tanqʼibʼila ex qa taja tuʼn tjapun kywi ttziybʼil. Ex miʼn tzikʼ tnaʼl tuʼna qa nimxix jaku che onin tnaʼj Diosa kyiʼj txqantl (1 Ped. 3:12). Noq tiʼxku in nikʼ toj qanqʼibʼil, qkyaqilx jaku bʼant nim tiʼchaq quʼn tiʼj Jehová ex kyiʼj txqantl.
17. ¿Tiquʼn nya bʼaʼn tuʼn tok qmojbʼan qibʼ kyukʼil txqantl?
17 Qa in tzaj bʼaj tkʼuʼja tuʼnju mlay bʼant nim tiʼ tuʼna toj tajbʼebʼila te Jehová ik tzeʼn taja, bʼaʼn tuʼn tok qeʼ tkʼuʼja tiʼj qa in nok tqʼoʼn Jehová toklen aju in bʼant tuʼna. Atlo maj jaku kubʼ t-ximana tuʼn tok tmojbʼan tibʼa kyukʼil txqantl, pero mas bʼaʼn qa miʼn xbʼant jlu tuʼna. ¿Tiquʼn? Tuʼnju mintiʼ in qo ok tmojbʼaʼn Jehová kyukʼil txqantl (Gál. 6:4). Jun techel, el ttxʼajoʼn María tqan Jesús tukʼil jun aceite nimxix twiʼ (Juan 12:3-5). Atzunte xuʼj prow, kux tqʼoʼn kabʼe tal pwaq nya nim tvalor toj tkubʼil pwaq toj templo (Luc. 21:1-4). Pero mintiʼ ok tmojbʼan Jesús aju bʼant kyuʼn kabʼe xuʼj lu, sino ok tqʼoʼn twitz tiʼj qa ten qʼuqbʼil kykʼuʼj. El tkanoʼn Jesús tiʼj Ttat. Tuʼntzunju, jaku tzʼok qeʼ tkʼuʼja tiʼj qa in nok tqʼoʼn Jehová twitz tiʼj tkyaqilju in bʼant tuʼna, tuʼnju qʼuqli tkʼuʼja tiʼj ex kʼujlaʼn tuʼna. Nimxix toklen aju in bʼant tuʼna toj twitz Jehová, maske in kubʼ t-ximana qa noq chʼin.
18. ¿Tiʼ kʼonil tiʼja tuʼn kytzaqʼwet qe t-xjela? (Ax ikx qʼonka twitza tiʼj recuadro « Jaku tzʼonin Tyol Dios tiʼja tuʼn kytzaqʼwet qe t-xjela»).
18 Qkyaqilx at maj in jawje qkʼuʼj. Pero ma tzʼel qnikʼ tiʼj, qa jaku tzʼonin Tyol Dios qiʼj. Tuʼntzunju, kukx jyona tzaqʼwebʼil kyiʼj t-xjela, tuʼntzun ya miʼn tjawje tkʼuʼja. In nok tqʼoʼn Jehová twitz tiʼja, in nok tqʼoʼn twitz tiʼjju in bʼant tuʼna ex taj tuʼn ttzaj tqʼoʼn t-xel teya. Miʼn tzikʼ tnaʼl jlu tuʼna: In nok tqʼoʼn Jehová toklen teyele junjun tmajen ex in che ok tkʼujlaʼn.
BʼITZ 111 Aʼyeju tiquʼn in kubʼ qnaʼn tzalajbʼil
Maske mintiʼ in tzaj tqʼamaʼn Biblia jteʼ abʼqʼi David tej tjaw skʼoʼn tuʼn Jehová, pero tzmatoq tal kuʼxun (qʼonka twitza tiʼj uʼj La Atalaya, 1 te septiembre te 2011, página 29, párrafo 2)..
