1, 2. ¿Tiʼ bʼaj tej kyjaʼtoq kyxiʼ kabʼe t-xnaqʼtzbʼen Jesús toj tnam Emaús?

 MA PON 16 te nisán te abʼqʼi 33. In che bʼisen t-xnaqʼtzbʼen Jesús ex in che xobʼ. Tok tnam Emaús 11 kilómetros tiʼj tnam Jerusalén. Ex atz ma cheʼx kabʼe t-xnaqʼtzbʼen Jesús toj tnam lu. Nimxix in che bʼisun tuʼnju ma kubʼ bʼyoʼn Jesús. In kubʼ kyximen qa ya mlay japun twi tkyaqilju kbʼanteltoq tuʼn Mesías. Pero mintiʼ ojtzqiʼn kyuʼn tiʼ chʼixtoq tbʼaj.

² Akux in bʼet kyxiʼ, pon laqʼeʼ jun xjal kytxlaj ex ok ten bʼetil junx kyukʼil. Pero mintiʼ ojtzqiʼn twitz xjal lu kyuʼn, xi kyqʼamaʼn te xjal lu qa in che bʼisun tuʼn tkyaqilju otoq tzʼok bʼinchaʼn tiʼj Jesús, pero chʼexpaj kyanqʼibʼil tuʼnju xi tqʼamaʼn xjal lu kye. Xi tchikʼbʼaʼn kye tiquʼn otoq tzikʼx nim kʼixkʼoj tuʼn Jesús ex tiquʼn otoq kubʼ bʼyoʼn. «Tzajnix qeʼ kyuj qe uʼj kyaj ttzʼibʼan Moisés ex tuj kyuʼjil kykyaqil t-sanjel Dios». Tej kypon kyoxil toj tnam Emaús el kynikʼ tiʼj qa atoq Jesús otoq jaw anqʼin. Ex nimxixlo e jaw tzalaj tej tel kynikʼ tiʼj qa itzʼtoq taʼ Jesús (Luc. 24:​13-​35).

3, 4. a) ¿Tiʼ bʼaj kyiʼj t-xnaqʼtzbʼen Jesús? (Hechos 1:3). b) ¿Tiʼ kʼelel qnikʼ tiʼj toj xnaqʼ­tzbʼil lu?

³ Tej atxtoq 40 qʼij tuʼn t-xiʼ Jesús toj kyaʼj, kubʼ tyekʼin tibʼ nimku maj kywitz qe t-xnaqʼtzbʼen (kjawil uʼjit Hechos 1:3). Xi tqʼuqbʼaʼn kykʼuʼj, tuʼntzunju, ya mintiʼ e bʼisun ex ya mintiʼ e xobʼ. Kubʼ kynaʼn tzalajbʼil juntl maj ex ten  kyipumal tuʼn kypakbʼan tiʼj tbʼanel tqanil tiʼj Tkawbʼil Dios. a

⁴ Jaku tzʼonin qiʼj qa ma qo xnaqʼtzan tiʼj tanqʼibʼil Jesús tej tten tzalu twitz Txʼotxʼ. Toj xnaqʼ­tzbʼil lu kʼelel qnikʼ tiʼj qa ajbʼen ambʼil tuʼn toj tumel. Tnejel, xi tqʼuqbʼaʼn kykʼuʼj t-xnaqʼtzbʼen. Tkabʼin, onin kyiʼj tuʼn tel mas kynikʼ tiʼj Tyol Dios. Ex toxin, xi tqʼoʼn xnaqʼ­tzbʼil kye tuʼn t-xi kykʼamoʼn mas oklenj. Toj teyele junjun kʼelel qnikʼ tiʼj tzeʼn jaku tzʼel qkanoʼn tiʼj techel kyaj tqʼoʼn Jesús.

¿TZEʼN JAKU TXI QʼUQBʼAʼN KYKʼUʼJ TXQANTL?

5. ¿Tiquʼn kyajtoq t-xnaqʼtzbʼen Jesús tuʼn t-xi qʼuqbʼaʼn kykʼuʼj?

⁵ Kyajtoq t-xnaqʼtzbʼen Jesús tuʼn t-xi qʼuqbʼet kykʼuʼj. ¿Tiquʼn? Tuʼnju ateʼ junjun otoq kyaj kyqʼoʼn kyja, kyfamilia ex kynegocio tuʼn kyok lepeʼ tiʼj Jesús toj tkyaqil ambʼil (Mat. 19:​27). Ateʼ junjuntl otoq che el ikʼun tuʼnju e ok te t-xnaqʼtzbʼen Jesús (Juan 9:​22). Pero bʼant tkyaqil jlu kyuʼn tuʼnju ok qeʼ kykʼuʼj tiʼj qa a Jesús Mesías (Mat. 16:​16). Pero tej tkubʼ bʼyoʼn Jesús, ya mintiʼ el kynikʼ tiʼj tiʼtoq kbʼajel ex tzaj nim kybʼis.

6. ¿Tiʼ bʼant tuʼn Jesús tej otoqxi jaw anqʼin?

⁶ Tzaj nim kybʼis t-xnaqʼtzbʼen Jesús tej tkyim, pero el tnikʼ Jesús kyiʼj. Ojtzqiʼntoq tuʼn qa nya tuʼnju in che bʼisun otoq naj qʼuqbʼil kykʼuʼj. Tuʼntzunju, xi tqʼuqbʼaʼn kykʼuʼj tamiw toj qʼij tej tjaw anqʼin. Tej in noqʼtoq María Magdalena ttzi jul jatumel otoq tzʼokx maquʼn, kubʼ tyekʼin tibʼ twitz (Juan 20:​11, 16). Ax ikx, kubʼ tyekʼin tibʼ kywitz kabʼe t-xnaqʼtzbʼen ma qo yolin tiʼj tej saj tzyet xnaqʼ­tzbʼil lu. Ex kubʼ tyekʼin tibʼ twitz apóstol Pedro (Luc. 24:​34). ¿Tiʼ xnaqʼ­tzbʼil jaku tzʼel qiʼn tiʼj Jesús? Qo xnaqʼtzan tiʼj tiʼ bʼant tuʼn tej tkubʼ tyekʼin tibʼ twitz María Magdalena.

7. ¿Tiʼ in bʼanttoq tuʼn María tej tok tqʼoʼn twitz Jesús tiʼj ex tiʼ bʼant tuʼn tuʼn tonin tiʼj? (Juan 20:​11-​16; ax ikx qʼonka twitza tiʼj tilbʼilal).

⁷ (Kjawil uʼjit Juan 20:​11-​16). E pon jun kʼloj xuʼj ttzi jul jatumel  otoq tzʼokx maquʼn Jesús te prim toj 16 te nisán (Luc. 24:​1, 10). Ax ikx te María Magdalena pon ex ok tqʼoʼn twitz tiʼj qa ya mintiʼtoq t-xmilal Jesús toj jul. Tuʼntzunju, xi ojqelan qʼamalte te apóstol Pedro ex Juan, ax ikx kye i ex ojqelan keʼyilte ttzi jul ex xi lepeʼ María kyiʼj. Tej tok kyqʼoʼn Pedro ex Juan kywitz tiʼj qa mintiʼtoq at toj jul e meltzʼaj kyja. Atzunte María mintiʼ aj tja sino kyaj ten oqʼel ttzi jul, pero mintiʼ ojtzqiʼn tuʼn qa in keʼyintoq Jesús tiʼj. Tej tel taʼl twitz María Magdalena, tzaj qʼaqʼin tkʼuʼj Jesús tiʼj. Kubʼ tyekʼin tibʼ twitz ex bʼant jun tiʼ tuʼn tuʼn tchewix tanmi. Yolin tukʼil ex xi tqʼamaʼn te tuʼn t-xiʼ qʼamalte kye terman qa otoq jaw anqʼin (Juan 20:​17, 18).

8. ¿Tzeʼn jaku tzʼel qkanoʼn techel kyaj tqʼoʼn Jesús?

⁸ ¿Tzeʼn jaku tzʼel qkanoʼn techel kyaj tqʼoʼn Jesús? Aj qonin kyiʼj erman tuʼn kukx kyajbʼen te Jehová. Ik tzeʼn bʼant tuʼn Jesús, nim toklen tuʼn tok qqʼoʼn qwiʼ tiʼj alkye qe nya bʼaʼn in che ikʼ erman toj. Bʼaʼn tuʼn tok tilil quʼn tuʼn tel qnikʼ tiʼj tiʼ in kubʼ kynaʼn ex tuʼn t-xi qqʼuqbʼaʼn kykʼuʼj. Kʼelel qnikʼ tiʼjju bʼaj tiʼj jun ermana Jocelyn tbʼi, aju o kyim jun titzʼin toj jun accident. Tzaj tqʼamaʼn jlu. «Ikʼ nim xjaw in chin bʼisune wen». Pero xi qʼoʼn txokbʼil tiʼj tuʼn jun mejebʼlen, ok bʼiʼn kyuʼn ex xi kynaʼn te qa nimtoq toklen toj twitz Jehová. Tqʼamatl jlu: «Ya mintiʼtoq in nel nnikʼe tiʼj tiʼtoq tuʼn tbʼant wuʼne, ok jlu ik tzeʼn chʼixtoq nxi mulqʼaje toj mar. Pero e ajbʼen erman lu tuʼn Jehová tuʼn nklete kyuʼn. E onin wiʼje tuʼn ntzalaje juntl maj toj wajbʼebʼile te Jehová». Qa qaj tuʼn qonin kyiʼj txqantl, bʼaʼn tuʼn t-xi qʼoʼn ambʼil kye tuʼn kyyolin qukʼil ex tuʼn tok qqʼoʼn qwiʼ tiʼjju in tzaj kyqʼamaʼn qe. Iktzun kʼelel qnikʼ tiʼj alkye tten jaku txi qqʼuqbʼaʼn kykʼuʼj ex alkye tten jaku qo onin kyiʼj tuʼn kukx kyajbʼen te Jehová (Rom. 12:​15).

¿TZEʼN JAKU QO ONIN KYIʼJ TXQANTL TUʼN TEL MAS KYNIKʼ TIʼJ TYOL DIOS?

9. ¿Tiʼ atxtoq taj tuʼn tel kynikʼ t-xnaqʼtzbʼen Jesús tiʼj ex tzeʼn onin kyiʼj?

⁹ In noktoq qeʼ kykʼuʼj t-xnaqʼtzbʼen Jesús tiʼj Tyol Dios ex in noktoq tilil kyuʼn tuʼn tkubʼ kybʼinchaʼn aju in neltoq kynikʼ tiʼj (Juan 17:6). Pero mintiʼtoq el kynikʼ tiʼj tiquʼn otoq kyim Jesús ik tzeʼn jun eleqʼ. Ojtzqiʼn tuʼn Jesús qa attoq jun tbʼanel kyanmi t-xnaqʼtzbʼen, pero ax ikx ok tqʼoʼn twitz tiʼj qa atxtoq taj tuʼn tel kynikʼ tiʼj Tyol Dios (Luc. 9:​44, 45; Juan 20:9). Tuʼntzunju, onin kyiʼj tuʼn tel kynikʼ tiʼjju in jawtoq kyuʼjin. Qo xnaqʼtzan tiʼjju bʼant tuʼn tej tkubʼ tyekʼin tibʼ kywitz kabʼe t-xnaqʼtzbʼen kyjaʼtoq kyxiʼ toj tnam Emaús.

10. ¿Tzeʼn onin Jesús kyiʼj t-xnaqʼtzbʼen tuʼn tok qeʼ kykʼuʼj tiʼj qa a Mesías? (Lucas 24:​18-​27).

¹⁰ (Kjawil uʼjit Lucas 24:​18-​27). ¿Xipe tqʼamaʼn naj Jesús kye t-xnaqʼtzbʼen alkyetoq? Mintiʼ, sino xi tqanin junjun xjel kye. ¿Tiquʼn? Bʼalo tajtoq tuʼn tel tnikʼ tiʼj alkye kyxim ex tiʼtoq in kubʼ kynaʼn. Ex atzun jlu bʼaj, tuʼnju xi kyqʼamaʼn t-xnaqʼtzbʼen te qa in che ayontoq tuʼn ttzaqpaj tnam Israel tjaqʼ kykawbʼil xjal te Roma tuʼn Jesús. Tej tbʼaj kyqʼamaʼn t-xnaqʼtzbʼen te tiʼtoq in bʼaj kykʼuʼj tiʼj, ajbʼen Tyol Dios tuʼn tuʼn tonin kyiʼj tuʼn tel kynikʼ tiʼj qa otoq japun kywi nim profecía. b Tej tok qonikʼen te qʼij aju, ax ikx kubʼ tyekʼin tibʼ Jesús kywitz mas t-xnaqʼtzbʼen ex xi tchikʼbʼaʼn kye tiʼtoq kyxilen profecía lu (Luc. 24:​33-​48). ¿Tiʼ xnaqʼ­tzbʼil jaku tzʼel qiʼn tiʼj jlu?

11, 12. a) ¿Tiʼ xnaqʼ­tzbʼil jaku tzʼel qiʼn tiʼj alkye tten ajbʼen Tyol Dios tuʼn Jesús? (Ax ikx qʼonka twitza kyiʼj tilbʼilal). b) ¿Alkye tten xi onin Nortey tuʼn ermano xi qʼonte xnaqʼ­tzbʼil te?

¹¹ ¿Tzeʼn jaku tzʼel qkanoʼn techel kyaj tqʼoʼn Jesús? Aj t-xi qqʼoʼn xnaqʼ­tzbʼil te jun xjal,  bʼaʼn tuʼn tok tilil quʼn tuʼn t-xi qqanin junjun xjel toj tumel te tuʼntzun tel qnikʼ tiʼj tiʼ in kubʼ t-ximen ex tiʼ in kubʼ tnaʼn (Prov. 20:5). Ajtzun tel qnikʼ tiʼjju in kubʼ tnaʼn, bʼaʼn tuʼn t-xi qyekʼin te tzeʼn jaku kanet junjun texto tuʼn tuʼntzun tonin tiʼj. Miʼn txi qqʼamaʼn te tiʼ il tiʼj tuʼn tbʼant tuʼn, mas bʼaʼn tuʼn t-xi qqanin junjuntl xjel te tiʼj texto tuʼntzun tel tnikʼ tiʼj tzeʼn jaku tzʼajbʼen tuʼn toj tanqʼibʼil. Qo yolin tiʼjju ikʼ tiʼj jun ermano Nortey tbʼi te tnam Ghana.

¹² Xi tzyet tuʼn t-xnaqʼtzan Nortey tiʼj Tyol Dios tej qʼiʼntoq 16 abʼqʼi tuʼn. Tej tikʼ chʼintl ambʼil, tzaj kyqʼoj qeju toj tja tiʼj. ¿Tiʼ onin tiʼj tuʼn kukx t-xnaqʼtzan? Ajbʼen capítulo 10 te Mateo tuʼn ermano tuʼn t-xi tchikʼbʼaʼn te qa che kʼelel ikʼun axix tok okslal. Tqʼamaʼn Nortey jlu: «Tej wel ikʼune kyuʼn toj njaye el nnikʼe tiʼj qa otoq kanet axix tok wuʼne». Ajbʼen Mateo 10:​16 tuʼn ermano tuʼn t-xi tyekʼin te Nortey qa il tiʼj tuʼn tten qnabʼil aj qyolin tiʼj qokslabʼil kyukʼil toj qja. Ex atzun jlu bʼant tuʼn. Tej tbautisarin Nortey tajtoq tuʼn tok te precursor, atzunte tman tajtoq tuʼn t-xiʼ toj universidad. Mintiʼ xi tqʼamaʼn ermano te tiʼ iltoq tiʼj tuʼn tbʼant tuʼn, sino xi tqanin junjun xjel te ex onin tiʼj tuʼn t-ximen kyiʼj junjun texto toj Tyol Dios. ¿Tiʼ tzaj tuʼn jlu? Ok Nortey te precursor, pero etz lajoʼn tuʼn tmaʼn toj tja. Tzaj tqʼamaʼn Nortey jlu tiʼjju bʼaj tiʼj: «Qʼuqli nkʼuʼje tiʼj qa atzun jlu mas bʼaʼn bʼant wuʼne». Aj qonin kyiʼj txqantl tuʼn tel mas kynikʼ tiʼj Tyol Dios jaku qo onin kyiʼj tuʼn kychʼiy toj kyokslabʼil (Efes. 3:​16-​19).

¿TZEʼN JAKU QO ONIN KYIʼJ ERMAN TUʼN KYOK IK TZEʼN JUN OYAJ?

13. ¿Tiʼ bʼant tuʼn Jesús tuʼn kukx t-xi pakbʼet tbʼanel tqanil otoqxi tzʼaj toj kyaʼj? (Efesios 4:8; TNM).

¹³ Tej tten Jesús tzalu twitz Txʼotxʼ bʼant aqʼuntl tuʼn ik tzeʼnxix otoq tzaj tqʼamaʼn Tman te (Juan 17:4). Pero mintiʼ kubʼ t-ximen qa oʼkx te jaku bʼant tuʼn aju tajtoq Jehová tuʼn tbʼant. Sino xi tqʼoʼn xnaqʼ­tzbʼil kye txqantl tej tten oxe abʼqʼi tukʼil mij tzalu twitz Txʼotxʼ. Ok qeʼ tkʼuʼj kyiʼj t-xnaqʼtzbʼen, tuʼntzunju, xi tqʼoʼn kyoklen tuʼn kypakbʼan, tuʼn t-xi kyqʼoʼn xnaqʼ­tzbʼil tiʼj  Tyol Dios ex tuʼn tok kyxqʼuqin qe t-rit Jehová. Maske ateʼ junjun naʼmxtoq kyjapun twi 30 abʼqʼi (kjawil uʼjit Efesios 4:8, TNM). Otoq che aqʼunan kyuw tukʼil Jesús ex kukx e ok lepeʼ tiʼj, maske ikju, tej chʼixtoq t-xiʼ Jesús toj kyaʼj xi tqʼoʼn mas xnaqʼ­tzbʼil kye tuʼntzun kyok ik tzeʼn jun oyaj. Kʼelel qnikʼ tiʼj tzeʼn bʼant tuʼn.

14. ¿Tej atxtoq 40 qʼij tuʼn tmeltzʼaj Jesús toj kyaʼj, alkye tten onin kyiʼj t-xnaqʼtzbʼen tuʼn kychʼiy toj kyokslabʼil? (Ax ikx qʼonka twitza tiʼj tilbʼilal).

¹⁴ Tukʼil kʼujlabʼil xi tqʼoʼn Jesús junjun consej kye t-xnaqʼtzbʼen tuʼntzun tonin kyiʼj. Xi tqʼamaʼn kye tuʼn miʼn tjawje kykʼuʼj tej tok tqʼoʼn twitz tiʼj qa ateʼ junjun mintiʼ ok qe kykʼuʼj tiʼj qa otoq jaw anqʼin (Luc. 24:​25-​27; Juan 20:​27). Ax ikx, xi tnaʼn kye tuʼn kyonin kyiʼj tmajen Dios ex nya tuʼn kykambʼan tiʼj pwaq (Juan 21:​15). Ex xi tnaʼn kye qa mintiʼtoq tuʼn tok kyqʼoʼn kywiʼ tiʼj oklenj xi qʼoʼn kye txqantl (Juan 21:​20-​22). El tnikʼ tiʼj qa ten junjun kyximbʼetz nya toj tumel tiʼj Tkawbʼil Dios, tuʼntzunju, xi tqʼoʼn kynabʼil ex onin kyiʼj tuʼn tkubʼ kyqʼoʼn pakbʼabʼil tnejel toj kyanqʼibʼil (Hech. 1:​6-8). ¿Tiʼ xnaqʼ­tzbʼil jaku tzʼel kyiʼn ansyan tiʼj Jesús?

15, 16. a) ¿Tzeʼn jaku tzʼel kykanoʼn ansyan tiʼj Jesús? b) ¿Tzeʼn e onin consej xi qʼoʼn te Patrick?

¹⁵ ¿Tzeʼn jaku tzʼel kykanoʼn ansyan tiʼj Jesús? Jaku tzʼel kykanoʼn tiʼj Jesús aj t-xi kyqʼoʼn xnaqʼ­tzbʼil kye ermano ex kye kuʼxun tuʼntzun ttzaj kykʼamoʼn mas kyoklen. c Mintiʼ in che ayon ansyan tuʼn kyok ermano te tzʼaqli. Sino in nok tilil kyuʼn tuʼn t-xi kyqʼoʼn consej kye kuʼxun tukʼil kʼujlabʼil tuʼntzun tel kynikʼ kyiʼj junjun tiʼchaq ex tuʼn tkubʼ kyiʼn kyibʼ, tuʼn tok qe kykʼuʼj txqantl kyiʼj ex tuʼn tten tbʼanel kymod kyukʼil txqantl (1 Tim. 3:1; 2  Tim. 2:2; 1 Ped. 5:5).

¹⁶ Qo yolin tiʼjju ikʼ tiʼj jun ermano Patrick tbʼi. Tej tzmatoq kuʼxun nyatoq bʼaʼn tmod ex kyuwtoq yolin kyukʼil txqantl, axpe ikx kyukʼil ermana. El tnikʼ jun ansyan tiʼj qa iltoq tiʼj tuʼn tbʼant junjun  chʼixpubʼil tuʼn Patrick. Tuʼntzunju, tukʼil kʼujlabʼil xi tqʼamaʼn te tiʼ iltoq tiʼj tuʼn tbʼant tuʼn. Ex tzaj tqʼamaʼn Patrick jlu: «In xi nqʼoʼne chjonte te ansyan tuʼnju onin wiʼje. In kubʼtoq nnaʼne nya bʼaʼn aj t-xi qʼoʼn junjun oklenj kye junjuntl erman aju wajtoqe tuʼn ttzaj qʼoʼn weye. Pero tej tyolin ansyan wukʼile, onin wiʼje tuʼn wajbʼene kye erman ex nya tuʼn tok nqʼoʼne nwiʼye kyiʼj junjun oklenj». Tuʼnju xi tbʼiʼn Patrick consej, xi qʼoʼn toklen te ansyan tej qʼiʼntoq 23 abʼqʼi tuʼn (Prov. 27:9).

17. ¿Tzeʼn kubʼ tyekʼin Jesús qa ok qeʼ tkʼuʼj kyiʼj t-xnaqʼtzbʼen?

¹⁷ Nya oʼkx xi tqʼamaʼn Jesús kye t-xnaqʼtzbʼen tuʼn kyxiʼ pakbʼal, sino ax ikx tuʼn t-xi kyqʼoʼn xnaqʼ­tzbʼil (Mateo 28:​20). Kubʼlo kyximen qa mlaytoq bʼant aqʼuntl lu kyuʼn, pero ok qeʼ tkʼuʼj Jesús tiʼj qa jakutoq bʼant kyuʼn ex tajtoq tuʼn t-xi tqʼamaʼn kye. Tuʼntzunju xi tqʼamaʼn jlu kye: «Ik tzeʼn ma chin tzaj samaʼne tuʼn nmane ax ikxtzun kyeye che xel nsamaʼne» (Juan 20:​21).

18. ¿Tzeʼn jaku tzʼel kykanoʼn ansyan tiʼj Jesús?

¹⁸ ¿Tzeʼn jaku tzʼel kykanoʼn ansyan tiʼj Jesús? Aqeju ansyan ma che chʼiy toj kyokslabʼil in nel kynikʼ tiʼj qa il tiʼj tuʼn t-xi kyqʼoʼn aqʼuntl kye txqantl ex qa il tiʼj tuʼn t-xi kyqʼoʼn xnaqʼ­tzbʼil kye tiʼj alkye tten tuʼn tbʼant kyuʼn (Filip. 2:​19-​22). Jun techel, jaku txi kyqʼamaʼn kye kuʼxun tuʼn kyonin tiʼj limpieza ex tiʼj mantenimiento te Ja te Chmabʼil. In kubʼ kyyekʼin ansyan qa in nok qe kykʼuʼj kyiʼj erman aj t-xi kyqʼoʼn junjun aqʼuntl kye ex aj t-xi kyqʼoʼn xnaqʼ­tzbʼil kye tiʼj tzeʼn tuʼn t-xi kybʼinchaʼn. At jun ansyan kʼitzqeku txi qʼoʼn toklen, aju Matthew tbʼi, ex in tzaj tqʼamaʼn qa in tzalaj tuʼnju in xi qʼoʼn xnaqʼ­tzbʼil te kyuʼn junjun ansyan ex in nok qe kykʼuʼj tiʼj qa kbʼantel jun tbʼanel aqʼuntl tuʼn. In tzaj tqʼamaʼn jlu: «Aj wel tzpete tiʼj jun tiʼ, in che onin wiʼje tuʼn tbʼant mas toj tumel wuʼne toj juntl maj». d

19. ¿Tiʼ bʼaʼn tuʼn tbʼant quʼn?

¹⁹ Tej atxtoq 40 qʼij tuʼn tmeltzʼaj Jesús toj kyaʼj, e ajbʼen qʼij lu tuʼn tuʼn t-xi tqʼuqbʼaʼn kykʼuʼj t-xnaqʼtzbʼen, tuʼn t-xi tqʼoʼn xnaqʼ­tzbʼil kye ex tuʼn tonin kyiʼj tuʼn ttzaj kykʼamoʼn mas kyoklen. Bʼaʼn tuʼn tok tilil quʼn tuʼn tel qkanoʼn techel kubʼ tqʼoʼn (1 Ped. 2:​21). Ok kʼonil Jesús qiʼj tuʼn tbʼant jlu quʼn tuʼnju o tzaj ttziyen jlu qe: «Chin tele kyukʼile tkyaqil qʼij akutzun in japun bʼaj mankbʼil tqʼijlalil» (Mat. 28:​20).