Tuʼn kyokx xjal tojju lugar Xjan iltoq tiʼj tuʼn kyokx twitz templo. Pero, ¿jniʼtoq tweʼ aju twitz templo? Antes te 2023, in tzaj tqʼamaʼn 2 Crónicas 3:4 toj Traducción del Nuevo Mundo jlu: «El pórtico en la parte delantera tenía el mismo ancho que la casa: 20 codos, y su altura era de 120». Ax ikx in tzaj kyqʼamaʼn junjuntl traducción qa «120 codo» tweʼ. In tzaj tyekʼin jlu qa 53 metro moqa 175 pies tweʼ.

Noqtzun tuʼnj, toj abʼqʼi 2023 chʼixpet versículo toj Traducción del Nuevo Mundo, ex jaʼlo in tzaj tqʼamaʼn jlu: «Su altura era de 20 codos», toj juntl yol junlo 9 metro moqa 30 pies tweʼ. a Qo xnaqʼtzan tiʼj tiquʼn bʼant chʼixpubʼil lu.

Toj 1 Reyes mintiʼ in tzaj qʼamaʼn jniʼ tweʼ twitz templo. Jun techel, toj 1 Reyes 6:3 tqʼama Jeremías jniʼ tnuqbʼil ex twitz, pero mintiʼ tqʼama jniʼ tweʼ. Ex toj juntl capítulo in tzaj tqʼamaʼn junjuntl tiʼchaq tok ttxlaj templo, ik tzeʼn «nintz pil puro qʼan kʼuxbʼil ttxʼotxʼil», qe lajaj «tkubʼil aʼ» ex qe kabʼe tqan adorn kubʼ ten twitz tja Dios (1 Rey. 7:​15-37). Noqwit ax tok 50 metro tweʼ, maslo matij tweʼ twitz templo. ¿Tiquʼn mintiʼ yolin Jeremías tiʼj jlu? Tej tikʼ junjun syent abʼqʼi kyqʼama junjun aj xnaqʼtzal judiy qa nya mas matij tweʼ aju twitz.

In tzaj kyqʼamaʼn junjun científico qa noqwit 120 codo tweʼ twitz tja Dios, mintiʼlo tipaʼ qe pared talil. Toj ambʼil ojtxe, tej kyjaw bʼinchaʼn junjun ja tiʼj abʼj moqa ladrillo ex nimaq kyweʼ, ik tzeʼn qe entrada kye templo te Egipto, aj kytzaj tzyet twitz txʼotxʼ nim kywitz ex aj tjapun bʼaj kyweʼ chʼin kywitz. Pero nya ik tten jaw bʼinchaʼn aju templo te Salomón. In tzaj kyqʼamaʼn junjun xjal qa junlo 2.7 metro moqa 9 pies kypiʼmil pared. Tqʼama Theodor Busink jlu, jun xjal in xnaqʼtzan kyiʼj ja e jaw bʼinchaʼn ojtxe: «Qa ma qo ximen tiʼj jniʼ tpiʼmal pared, mlay ten 120 codo tweʼ twitz templo».

Bʼalo el txalpaj qe xjal tej ttzaj kykopiarin texto te 2 Crónicas 3:4. Kyoj junjun ojtxe uʼj in tzaj qʼamaʼn qa «120» codo, atzun kyoj junjuntl in tzaj qʼamaʼn qa «20» codo, ik tzeʼn toj Códice alejandrino, te tjweʼyin syent abʼqʼi ex toj Códice ambrosiano, te tqaqin syent abʼqʼi. ¿Tiquʼnlo i el txalpaj? Toj yol hebreo chʼixmi ax tten in kubʼ tzʼibʼit yol cien tukʼil yol codo. Tuʼntzunju, tejlo tel tcopiarin jun xjal, kubʼlo tqʼoʼn «ciento veinte» ex nya «veinte codos».

Maske bʼaʼn tuʼn tel qnikʼ tiʼj alkye tten bʼaj bʼinchaʼn templo te Salomón, pero mas nim toklen aju templo kubʼ techlaʼn: Aju templo mintiʼ qʼanchaʼl. In xi qqʼoʼn nimxix chjonte te Jehová tuʼnju in tzaj tqʼoʼn txokbʼil kye tmajen tuʼn kykʼulin te toj templo lu (Heb. 9:​11-14; Apoc. 3:12; 7:​9-17).