NIM toklen bʼitz kye aj Israel toj ambʼil ojtxe. In tzaj tqʼamaʼn Biblia qa e ten junjun tokarin kyiʼj junjun instrumento ex e bʼitzin. Toj tkyaqil Biblia in kanet 10% bʼitz. Ik tzeʼn uʼj te Salmos, El Cantar de los Cantares ex Lamentaciones, e kubʼ tzʼibʼin tuʼn kyxi bʼitzet. In tzaj tqʼamaʼn jun libro in yolin tiʼj ambʼil tej tkubʼ tzʼibʼit Biblia qa ajbʼen bʼitz kyuʼn aj Israel toj junxichaq tten kyanqʼibʼil.

Ajbʼen bʼitz kyuʼn aj Israel. Ajbʼen kyuʼn tuʼn t-xi kyqʼamaʼn aju in kubʼtoq kynaʼn (Is. 30:29). E bʼitzin qe xuʼj tukʼil tzalajbʼil, e bʼixin ex e tokarin tiʼj pandereta aj t-xi qʼoʼn toklen jun xjal te Rey, aj kykambʼan toj qʼoj ex aj tok junjun k-fiesta (Juec. 11:34; 1 Sam. 18:​6, 7; 1 Rey. 1:​39, 40). Ax ikx e bʼitzin aj Israel tej tkyim jun xjal tuʼn tkubʼ kyyekʼin qa in che bʼisintoq (2 Crón. 35:25). In tzaj tqʼamaʼn jun uʼj qa «nimxix toklen bʼitz kye aj Hebreo» (Cyclopedia, te McClintock ex Strong).

Kygan qe rey te Israel qe bʼitz. Xi tqʼamaʼn Saúl te David tuʼn ttocarin arpa (1 Sam. 16:​18, 23). Tej tok David te rey, e kubʼ tbʼinchaʼn junjun instrumento ex junjun tbʼanel bʼitz. Ax ikx bʼaj tnukʼun jun orquesta tuʼntzun kybʼitzin toj templo (2 Crón. 7:6; Amós 6:5). Ax ikx te rey Salomón e jaw tjyoʼn xinaq ex xuʼj tuʼn kybʼitzin toj palacio (Ecl. 2:8).

Ajbʼen bʼitz kyuʼn aj Israel toj kykʼulbʼil te Jehová. Toj templo te Jerusalén e ten 4 mil xjal in bʼant-xix kytokarin kyiʼj instrumento, ik tzeʼn qe címbalo, qe instrumento de cuerda, qe arpa ex qe trompeta (1 Crón. 23:5; 2 Crón. 5:12). Nya oʼkx qeju e ten toj templo ajbʼen bʼitz kyuʼn toj kykʼulbʼil te Jehová. Ax ikx e bʼitzin qe aj Israel akux in che bʼet tuʼn kypon toj tnam Jerusalén tuʼntzun tkubʼ kyikʼsaʼn qe ninqʼij (Sal. 120-134). In tzaj kyqʼamaʼn junjun uʼj kye aj Judiy qa in che bʼitzintoq aj Israel tiʼj Hallel toj Wabʼj te qale te Xjan Qʼij. a

Ax ikx toj ambʼil jaʼlo, nim toklen bʼitz toj kywitz tmajen Jehová (Sant. 5:13). In qo bʼitzin kyiʼj bʼitz tuʼn tjaw qnimsaʼn tbʼi (Efes. 5:19). Ax ikx, in che onin tuʼn tten mujbʼabʼil qxol kyukʼil erman ex tuʼn tikʼx junjun nya bʼaʼn quʼn (Hech. 16:25; Col. 3:16). Ex in che onin tuʼn t-xi qqʼamaʼn qa qʼuqli qkʼuʼj tiʼj Jehová ex qa kʼujlaʼn quʼn.