1. Chikʼbʼantza tiʼ in tnaʼn Jehová kyiʼj xjal in kubʼ kyin kyibʼ.

IN CHE ok tkʼujlaʼn Jehová qe xjal in kubʼ kyin kyibʼ. Oʼkx qeju in kubʼ kyin kyibʼ jaku che ok te tbʼanelxix tamiw. «Atzun qe xjal in jaw kyniman kyibʼ, najchaq in che tzaj tkeʼyin» (Sal. 138:6). Qkyaqilx qaj tuʼn ttzalaj Jehová quʼn ex qaj tuʼn qok tkʼujlaʼn, tuʼntzunju at nim tiquʼn tuʼn tkubʼ qin qibʼ.

2. ¿Tiʼ qo xnaqʼtzal tiʼj toj xnaqʼtzbʼil lu?

² Toj xnaqʼtzbʼil lu, kxel qqʼoʼn tzaqʼwebʼil kyiʼj oxe xjel. 1) ¿Tiʼ t-xilen aju tuʼn tkubʼ qin qibʼ? 2) ¿Tiquʼn nim toklen tuʼn tten qmod lu? 3) ¿Toj alkye ambʼil kwest tuʼn tkubʼ qin qibʼ? Ik tzeʼn kʼelel qnikʼ tiʼj, jaku tzalaj Jehová quʼn qa ma kubʼ qin qibʼ ex kʼonil jlu qiʼj (Prov. 27:11; Is. 48:17).

3. ¿Tiʼ t-xilen aju tuʼn tkubʼ qin qibʼ?

³ Aju xjal in kubʼ tin tibʼ, mintiʼ in kubʼ t-ximen qa mas nim toklen. Ax ikx in tzaj tyekʼin Tyol Dios qa aju xjal in kubʼ tin tibʼ, in nel tnikʼ tiʼj qa mas nim toklen Jehová twitz ex qa at jun tiʼ mas tbʼanel in bʼant kyuʼn txqantl twitz (Filip. 2:3, 4).

4, 5. ¿Tiquʼn mlay txi qqʼamaʼn qa in kubʼ qin qibʼ noq tuʼnju in kubʼ qyekʼin junjun qmod kywitz txqantl?

⁴ Ateʼ junjun xjal in kubʼ kyyekʼin qa in kubʼ kyin kyibʼ, pero nya ax tok kyuʼn. Bʼalo kygan tuʼn kyyolin kyukʼil txqantl, tuʼn kynimen ex in kubʼ kyyekʼin tbʼanel kymod  tuʼnju atzun tzaj xnaqʼtzaʼn kye kyuʼn kytat. Pero in jawlo kynimsan kyibʼ toj kyanmi. Pero kpol ambʼil tuʼn tkubʼ kyyekʼin tzeʼnxix kymod (Luc. 6:45).

⁵ Atzun qeju in kubʼ kyyekʼin qa qʼuqli kykʼuʼj kyiʼjx ex in xi kyqʼamaʼn aju in kubʼ kyximen, nya a t-xilen jlu qa in jaw kynimsan kyibʼ (Juan 1:46, 47). Maske ikju, aʼyeju mintiʼ in che tzaj xobʼ tuʼn kyyolin, il tiʼj tuʼn tok kyxqʼuqin kyibʼ tuʼntzun miʼn tok qeʼ kykʼuʼj tiʼjju in bʼant kyuʼn. Noq tzeʼnxku qmod at, qkyaqilx bʼaʼn tuʼn tok tilil quʼn tuʼn tkubʼ qin qibʼ.

6. Ik tzeʼn in tzaj tqʼamaʼn 1 Corintios 15:10, ¿tiʼ xnaqʼtzbʼil in nel qiʼn tiʼj techel kyaj tqʼoʼn apóstol Pablo?

⁶ Qo yolin tiʼj techel kyaj tqʼoʼn apóstol Pablo. Ajbʼen tuʼn Jehová tuʼn kyxi tzyet kʼloj okslal toj nimku lugar. Bʼalo mintiʼ bʼant nim aqʼuntl kyuʼn junjuntl apóstol ik tzeʼn te Pablo. Maske ikju, mintiʼ kubʼ t-ximen Pablo qa mastoq nim toklen kywitz txqantl erman, sino kubʼ tin tibʼ tej tqʼama jlu: «[Mas] tal chʼin qine kywitz qe mastl apostl, mya bʼaʼn qine tuʼn tok qʼoʼn nbʼiye apostl, porke e bʼaj nyajlaʼne qe okslal etzan qe tuʼn Dios» (1 Cor. 15:9). Yajxitl, tqʼama qa ok te tbʼanel tamiw Jehová noq tuʼnju kubʼ tyekʼin t-xtalbʼil tiʼj ex nya tuʼnju attoq nim toklen moqa tuʼnju bʼant nim tiʼchaq tuʼn (kjawil uʼjit 1 Corintios 15:10). Kyaj tqʼoʼn Pablo jun tbʼanel techel qwitz tiʼjju tuʼn tkubʼ qin qibʼ. Mintiʼ jaw tnimsan tibʼ tej t-xi ttzʼibʼin carta kye okslal te Corinto, maske ateʼ junjun e yolin nya bʼaʼn tiʼj (2 Cor. 10:10).

7. Maske ojtzqiʼntoq twitz jun erman, ¿alkye tten kubʼ tyekʼin qa kubʼ tin tibʼ?

⁷ Nim o tzʼonin aju txʼolbʼabʼil tiʼj tanqʼibʼil ermano Karl Klein kyiʼj nim erman aj  tjaw kyuʼjin. Ajbʼen erman lu toj Kʼloj Xjal Qʼil Twitz Aqʼuntl. Toj ttxʼolbʼabʼil, kubʼ tin tibʼ tuʼnju tzaj tqʼamaʼn alkyeqe tiʼchaq el txalpaj tiʼj ex alkyeqe nya bʼaʼn ok weʼ twitz. Qo xnaqʼtzan tiʼj junjun techel. Ex pakbʼal tnejel maj ttziyele ja kyoj abʼqʼi 1920 ex kwest ela jlu toj twitz, tuʼntzunju ya mintiʼ pakbʼan toj junlo kabʼe abʼqʼi. Yajxitl, toj jun ambʼil tzaj tqʼoj tiʼj jun erman tej tpon toj Betel, tuʼnju xi tqʼoʼn junjun consej te. Ax ikx, tzaj yabʼil tiʼj tuʼnju tzaj bʼaj tkʼuʼj ex sikt, pero bʼanix tej tbʼet ambʼil. Maske ikju, tzalaj kyiʼj junjun tbʼanel toklen. In nel qnikʼ tiʼj qa kubʼ tin tibʼ ermano tuʼnju ttzaj tqʼamaʼn aju el txalpaj tiʼj maske ojtzqiʼntoq twitz. Ateʼ nim erman kukx in tzaj kynaʼn ermano Klein tukʼil kʼujlabʼil ex tuʼnju tzaj tqʼamaʼn tkyaqilju ikʼ toj tanqʼibʼil. *

8. ¿Alkye tten in nonin 1 Pedro 5:6 qiʼj tuʼn tel qnikʼ tiʼj qa in tzalaj Jehová tiʼj jun xjal aj tkubʼ tin tibʼ?

⁸ Nim toklen tuʼn tkubʼ qin qibʼ tuʼnju in tzalaj Jehová qiʼj ex atzun jlu tzaj tchikʼbʼaʼn apóstol Pedro (kjawil uʼjit 1 Pedro 5:6). Kyiʼj tyol Pedro in tzaj tqʼama uʼj «Ven, sé mi seguidor» jlu: «Qa in jaw qnimsan qibʼ, in nok jlu ik tzeʼn jun veneno ex jaku qo kyim tuʼn. Qa in jaw tnimsan tibʼ jun xjal, maske at nim tiʼchaq in bʼant tuʼn, mintiʼ tajbʼen toj twitz Dios. Pero qa at jun xjal in kubʼ tin tibʼ, jaku tzʼajbʼen tuʼn Jehová maske nya nim tiʼchaq in bʼant tuʼn». Ax ikx, in tzaj tqʼamaʼn uʼj lu qa qo tzajel tkʼiwlaʼn Jehová «qa ma kubʼ qyekʼin qmod lu». * Mintiʼ juntl tiʼ mas nim toklen twitzju tuʼn ttzalaj tanmi Jehová quʼn (Prov. 23:15).

9. ¿Tiquʼn mas kygan xjal tuʼn kyten kyukʼil qeju in kubʼ kyin kyibʼ?

⁹ Aj tkubʼ qin qibʼ, nya oʼkx in tzalaj Jehová tuʼn jlu sino ax ikx in nonin qiʼj. In che ok laqʼeʼ xjal qtxlaj qa mintiʼ in jaw qnimsan qibʼ. Tuʼn tel qnikʼ tiʼj tiquʼn in bʼaj jlu, qo ximen tiʼj alkyeqe xjal qgan tuʼn qten kyukʼil (Mat. 7:12). Chʼixme tkyaqil maj mintiʼ in qo tzalaj tukʼil jun xjal in nok ten qʼamalte kye txqantl tiʼ kbʼantel kyuʼn ex mintiʼ in xi tbʼiʼn jun nabʼil. Pero in qo tzalaj aj qten tukʼil jun erman in ximen kyiʼj txqantl, at qʼaqʼbʼil  tkʼuʼj, at tkʼujlabʼil ex in kubʼ tin tibʼ (1 Ped. 3:8). Qa ik qximbʼetz ik tzeʼn jlu, che tzalajel txqantl aj kyten qukʼil qa in kubʼ qin qibʼ.

10. Qa ma kubʼ qin qibʼ, ¿tiquʼn in nonin qiʼj tuʼn qex kywitz nya bʼaʼn in che tzaj toj qanqʼibʼil?

¹⁰ Aj tkubʼ qin qibʼ, ax ikx in nonin qiʼj tuʼn qex kywitz nya bʼaʼn. Tuʼnju aj il qoʼ, jaku kubʼ qximen qa nya toj tumel in che bʼant junjun tiʼchaq. El tnikʼ aj kawil Salomón tiʼj jlu tej tqʼama: «O wile qe majen in che bʼet kyjax qe kyibʼaj chej, ex atzun qe xjal maʼ kyoklen in che bʼet tuʼn kyqan, mer ik tzaʼn majen qe» (Ecl. 10:7). Nya tkyaqil maj in nok qʼoʼn kyoklen xjal in bʼant jun tbʼanel aqʼuntl kyuʼn, tuʼnju at maj mas in nok qʼoʼn kyoklen qeju nyaxix tbʼanel aqʼuntl in bʼant kyuʼn. Pero el tnikʼ Salomón tiʼj qa mas bʼaʼn tuʼn tel qnikʼ tiʼj tzeʼnxix qanqʼibʼil ex nya tuʼn ttzaj bʼaj qkʼuʼj kyiʼj tiʼchaq in che tzaj qiʼj (Ecl. 6:9). Qa in kubʼ qin qibʼ, mas nya kwest kʼelel qnikʼ tiʼj qa qo okel weʼ kywitz junjun nya bʼaʼn.

11. ¿Tiquʼn nim toklen tuʼn tkubʼ qin qibʼ aj ttzaj qʼoʼn jun consej qe?

¹¹ Tkyaqil qʼij, at nim tumel tzeʼn tuʼn tkubʼ qyekʼin qa in kubʼ qin qibʼ. Qo xnaqʼtzan tiʼj toj alkye tten. Aj ttzaj qʼoʼn jun consej qe. Qa ma tzʼel tpaʼn jun erman ambʼil tuʼn qtzaj tkawin, bʼalo ma bʼant jlu tuʼn tuʼnju matij qpaltil ma bʼant ex nya ik tzeʼn in kubʼ qximen. Aj tbʼaj jlu, jakulo kubʼ qximen tuʼn miʼn t-xi qnimen consej ma tzaj tqʼoʼn qe. Ax ikx, jaku qo ok ten yolil nya bʼaʼn tiʼj erman saj qʼonte consej qe moqa tiʼjju alkye tten saj tqʼamaʼn. Pero qa ma kubʼ qin qibʼ, kʼokel tilil quʼn tuʼn t-xi qbʼiʼn consej.

12. Ik tzeʼn in tzaj tqʼamaʼn Proverbios 27:5 ex 6, ¿tiquʼn nim toklen tuʼn t-xi qqʼoʼn chjonte aj ttzaj qʼoʼn jun consej qe tuʼn jun erman? Qʼamantza jun techel.

¹² Aju xjal in kubʼ tin tibʼ, in xi tqʼoʼn chjonte tiʼj consej in xi qʼoʼn te. Qqʼonku jun techel tiʼj jlu. Qo ximen tiʼj qa in qo yolin kyukʼil junjun erman toj Ja te Chmabʼil. Pero in tzaj tqʼamaʼn jun kyxol erman qa taj tuʼn tyolin qukʼil, ajtzun qpon tukʼil in tzaj tqʼamaʼn qe qa at chʼin wabʼj tokx t-xe qeʼ. In tzaj qchʼixwi tiʼj jlu, pero in xi qqʼoʼn chjonte te tuʼnju ma tzaj tqʼamaʼn qe. Jakulo kubʼ qximen qa maslo bʼaʼn noqwit jun rat saj qʼamaʼn qe. Chʼixme ax jlu jaku bʼant quʼn aj ttzaj qʼoʼn jun consej qe, bʼaʼn tuʼn tkubʼ qin qibʼ ex bʼaʼn tuʼn t-xi qqʼoʼn chjonte te erman tuʼnju ma ten tipumal tuʼn ttzaj tqʼamaʼn.  Miʼn kubʼ qximen qa aj qʼoj erman qiʼj ex qa in qo el tikʼun, sino bʼaʼn tuʼn tkubʼ qximen qa kʼujlaʼn qoʼ tuʼn (kjawil uʼjit Proverbios 27:5, 6; Gál. 4:16).

13. ¿Tzeʼn in kubʼ qyekʼin qa in kubʼ qin qibʼ aj ttzaj qʼoʼn kyoklen junjuntl erman?

¹³ Aj ttzaj qʼoʼn kyoklen junjuntl erman. In tzaj tqʼamaʼn jun ansyan jlu, aju Jason tbʼi: «Aj tok nkeʼyine aj ttzaj qʼoʼn kyoklen junjuntl, at maj in kubʼ nxjeline tiquʼn nya weye saj qʼoʼn». ¿Ope tzikʼ jlu qiʼj jun maj? Tbʼanel qa in nok tilil quʼn tuʼn qajbʼen mas te Jehová, pero nim toklen tuʼn tok qxqʼuqin qximbʼetz, tuʼnju jaku txi tzyet tuʼn tjaw qnimsan qibʼ (1 Tim. 3:1). Jun techel, jakulo kubʼ t-ximen jun ermano qa mas at tojtzqibʼil tuʼn tbʼant jun oklenj tuʼn. Ax ikx, jakulo kubʼ t-ximen jun ermana qa at mas tojtzqibʼil tchmil twitz juntl ermano tuʼn tbʼant jun oklenj. Qa axix tok in kubʼ qin qibʼ, mlay ten qximbʼetz ik tzeʼn jlu.

14. ¿Tiʼ xnaqʼtzbʼil in nel qiʼn tiʼj tmod Moisés kubʼ tyekʼin tej t-xi qʼoʼn kyoklen junjuntl?

¹⁴ Qo ximen tiʼj alkye xnaqʼtzbʼil jaku tzʼel qiʼn tiʼj tiʼ tmod Moisés kubʼ tyekʼin tej t-xi qʼoʼn kyoklen junjuntl aj Israel. Ok tqʼoʼn Moisés toklen aqʼuntl tzaj qʼoʼn te tuʼn tkubʼ nej kywitz aj Israel. Pero ¿tiʼ tmod kubʼ tyekʼin tej t-xi tqʼoʼn Jehová kyoklen junjun aj Israel tuʼntzun kyonin tiʼj? Mintiʼ tzaj txʼaʼl tiʼj tkʼuʼj (Núm. 11:24-29). Ax ikx, kubʼ tin tibʼ tej t-xi tqʼoʼn ambʼil kye junjuntl tuʼn t-xi kybʼinchaʼn kyiʼj nya bʼaʼn tzaj kyxol xjal (Éx. 18:13-24). Tej kyten mas jwes, mas jun rat xi kybʼinchaʼn kyiʼj nya bʼaʼn ex mintiʼ e ayon aj Israel nim ambʼil. Mas ximen Moisés kyiʼj xjal ex nya tiʼj toklen. Kyaj tqʼoʼn jun tbʼanel techel qwitz. Qa qaj tuʼn qajbʼen tuʼn Jehová, bʼaʼn tuʼn ttzaj qnaʼn qa mas nim toklen tuʼn tkubʼ qin qibʼ twitzju qojtzqibʼil at. In tzaj tqʼamaʼn Salmo 138:6 qa «maʼxix toklen Qman, pero in che tzaj tkeʼyin qe xjal mans».

15. ¿Alkye chʼixpubʼil o bʼaj kyiʼj junjun erman?

 ¹⁵ Aj kychʼexpaj tiʼchaq toj qanqʼibʼil. Kyoj abʼqʼi tzma in che ikʼ, o chʼexpaj kyoklen junjun erman ma tzikʼ nim ambʼil in che ajbʼen toj tkyaqil ambʼil te Jehová. Jun techel, toj abʼqʼi 2014, xi qʼoʼn txokbʼil kyiʼj superintendente te distrito kyukʼil kyxuʼjil tuʼn kyajbʼen toj tkyaqil ambʼil te Jehová toj junjuntl oklenj. Ex atxix toj abʼqʼi aju, tzaj qʼamaʼn tuʼn tkyaj kyqʼoʼn ansyan in che bʼet kyojele Ja te Chmabʼil kyoklen aj kyjapun twi 70 abʼqʼi. Ax ikx, aj kyjapun ansyan twi 80 abʼqʼi, ya mlay bʼant tuʼn kyajbʼen te qʼol kyaqʼun kʼloj ansyan. Ex kyoj qe abʼqʼi o che ikʼ, o txi qʼoʼn txokbʼil kyiʼj nim erman in che ajbʼen toj Betel tuʼn kyajbʼen te precursor. Atzun junjuntl, o kyaj kyqʼoʼn kyoklen toj tkyaqil ambʼil te Jehová tuʼnju tzaj jun yabʼil kyiʼj, tuʼnju il tiʼj tuʼn kyxqʼuqin kyiʼj toj kyja moqa tuʼn junjuntl tiʼchaq.

16. ¿Alkye tten o kubʼ kyyekʼin junjun erman qa in kubʼ kyin kyibʼ?

¹⁶ Kwest i ela qe chʼixpubʼil toj kywitz erman lu. Tuʼnju otoq che ajbʼen nim abʼqʼi toj kyoklen ex otoq che naqʼet tiʼj, tzaj nim kybʼis tej tkyaj kyqʼoʼn. Noqtzun tuʼnj, tej tikʼ ambʼil e naqʼet kyiʼj chʼixpubʼil. ¿Tiquʼn? Tuʼnju kʼujlaʼnxix Jehová kyuʼn. El kynikʼ tiʼj qa otoq txi kyqʼoʼn kychwinqlal te Jehová ex nya te jun oklenj moqa te jun título (Col. 3:23). In che tzalaj tuʼnju in che ajbʼen te Jehová toj alkyexku oklenj ex in kubʼ kyin kyibʼ. Tkyaqilju in tzaj bʼaj kykʼuʼj erman lu tiʼj, in kyaj kyqʼoʼn toj tqʼabʼ Jehová tuʼnju ojtzqiʼn kyuʼn qa kʼujlaʼn qe tuʼn (1 Ped. 5:6, 7).

17. ¿Tiquʼn in xi qqʼoʼn chjonte tuʼnju in tzaj tqʼamaʼn Tyol Dios tuʼn tkubʼ qin qibʼ?

¹⁷ In xi qqʼoʼn chjonte tuʼnju in tzaj tqʼamaʼn Tyol Dios qe tuʼn tkubʼ qin qibʼ. Qa ma ten qmod ik tzeʼn jlu, kʼonil qiʼj ex kyiʼj txqantl. Noq tuʼn tbʼanel mod lu, in nel qnikʼ tiʼj tzeʼn jaku qo ex kywitz nya bʼaʼn, ex aju mas nim toklen, in qo ok laqʼeʼ mas ttxlaj Qtat Jehová. Maske at Jehová toj kyaʼj ex at nim toklen, in qo tzalaj aj tel qnikʼ tij qa in che ok tkʼujlaʼn tmajen in kubʼ kyin kyibʼ ex in nok tqʼoʼn kyoklen (Is. 57:15, TNM).