Jaku qo ok ten ximel tiʼjju in tzaj tqʼamaʼn Eclesiastés 5:8, tuʼnju in tzaj tqʼamaʼn jlu: «Miʼn jaw labʼina tiʼj qa ma tila tuj jun tnam in che yajlanjtz qe xjal mebʼa ex mintiʼ in xi bʼinchaʼn kyiʼj tuj tumelxix, porke jun xjal maʼ toklen in kyaj tjaqʼ tkawbʼil juntl xjal mas maʼ toklen twitz, ex kykabʼil qe jlu in che kyaj tjaqʼ tkawbʼil juntl mas maʼ toklen kywitz».

Jaku kubʼ qximen qa oʼkx in yolin taqikʼ lu kyiʼj aj kawil. Noqtzun tuʼnj, qa ma qo ximen chʼin tiʼj, in tzaj tyekʼin taqikʼ lu jun axix tok tiʼj Jehová ex in tzaj tqʼuqbʼaʼn qkʼuʼj.

In yolin Eclesiastés 5:8 tiʼj jun aj kawil in nok tbʼinchaʼn nya bʼaʼn kyiʼj mebʼa xjal ex nya toj tumel in xi tbʼinchaʼn kyiʼj tiʼchaq. Il tiʼj tuʼn ttzaj tnaʼn xjal lu qa bʼalo at juntl in xqʼuqin tiʼj ex mas nim toklen twitz toj kawbʼil. Bʼisbʼajil tuʼnju chʼixmi kykyaqil xjal ateʼ toj jun kawbʼil in che sbʼun ex tuʼn jlu in tzaj nya bʼaʼn kyiʼj mebʼa xjal.

Maske in tzaj qbʼis tuʼn tkyaqil jlu, in che chewix qanmi aj tel qnikʼ tiʼj qa in keʼyin Jehová kyiʼj kykyaqil xjal, axpe ikx kyiʼj aj kawil. Jaku qo naʼn Dios te Jehová tuʼn qtzaj tonin ex jaku kyaj qqʼoʼn qe qbʼis toj tqʼabʼ (Sal. 55:22; Filip. 4:6, 7). Ojtzqiʼn quʼn qa «in keʼyin [Jehová] tiʼj tkyaqilju in bʼaj twitz txʼotxʼ ex in xi tqʼoʼn kyipun qeju axix tok nnoʼk qeʼ kykʼuʼj tiʼj» (2 Crón. 16:9).

Ikju, in tzaj tyekʼin Eclesiastés 5:8 jun axix tok qe: qa toj jun kawbʼil, at jun xjal mas nim toklen twitz juntl. Noqtzun tuʼnj, in tzaj tyekʼin texto lu qa mas nim toklen Jehová twitz alkyexku juntl xjal. Toj ambʼil jaʼlo, in najbʼen Jesús tuʼn Jehová tuʼn tkawin toj Tkawbʼil. In nok tqʼoʼn Jehová twitz tiʼj tkyaqil ex tzʼaqli te, ex ax jlu in bʼant tuʼn Jesús.