1, 2. ¿Tiʼ kyaj tqʼamaʼn profeta Ageo tuʼn tbʼaj toj ambʼil jaʼlo?

TEJ ttzaj jun terremoto atz Nepal toj abʼqʼi 2015, ateʼ junjun xjal kyqʼama jlu: «Jun rat e kubʼ xitj qe kʼaybʼil ex qe matij ja, e ok ik tzeʼn aj tkubʼ tilj jun chʼuq naipe». Atzun juntl tqʼama jlu: «E tzaj luʼlun xjal tuʼn kyxobʼil [...]. Nim xjal kyqʼama qa nya nim ambʼil ten terremoto, atzun weye, kubʼ nnaʼne qa ten nim ambʼil». Noqwit qiʼj bʼaj jlu, mlayxlo tzikʼ tnaʼl quʼn.

² Noqtzun tuʼnj, at juntl tiʼ in qo tzaj luʼlun tuʼn toj ambʼil jaʼlo ex nya oʼkx in bʼaj jlu toj jun tnam. In che tzaj luʼlun nasyon tuʼn Jehová ex ma tzikʼ ambʼil in bʼant jlu tuʼn. Atzun jlu kyaj tqʼamaʼn profeta Ageo tej tkubʼ ttzʼibʼin jlu: «Chʼix tpon tqʼijlalil tuʼn ttzaj yukch kyaʼj ex enter txʼotxʼ wuʼne, tukʼix mar ex txʼotxʼ» (Ageo 2:6).

3. ¿Tiquʼn junxitl aju tqʼama Ageo tukʼilju aj ttzaj jun terremoto?

³ In tzaj bʼis kyiʼj xjal ex xitbʼil aj ttzaj jun terremoto, pero aju yolin Ageo tiʼj, mintiʼ in tzaj tiʼn bʼis, sino tzalajbʼil. Ax Jehová qʼamante jlu: «Che tzajel luʼlun kykyaqil nasyon wuʼne ex ktzajel kyiʼn kyqʼinumabʼl, ex knojel njaye tuʼn wajwalile» (Ageo 2:7). ¿Tiʼ tajtoq Jehová tuʼn t-xi tqʼamaʼn kye xjal toj tqʼijlalil Ageo tukʼil profecía lu? ¿Ex tiʼ taj tuʼn ttzaj tqʼamaʼn qe toj ambʼil jaʼlo? Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu ex kʼelel qnikʼ tiʼj tzeʼn jaku qo onin tiʼj aqʼuntl tuʼn kytzaj luʼlun nasyon.

4. ¿Tiquʼn xi tsamaʼn Jehová profeta Ageo?

⁴ Xi tqʼoʼn Jehová jun aqʼuntl nim toklen te profeta Ageo. Qo xnaqʼtzan tiʼj tiquʼn in xi qqʼamaʼn jlu. Bʼalo ten Ageo kyxol qeju xjal i etz toj tnam Babilonia tuʼn kymeltzʼaj  toj tnam Jerusalén toj abʼqʼi 537 tjaqʼxi ambʼil qʼiʼn quʼn jaʼlo. Tej kypon toj tnam Jerusalén, kubʼ kyqʼoʼn qe tsimyentil tja Jehová (Esd. 3:8, 10). Pero tej tikʼ chʼin ambʼil, e ok weʼ twitz nya bʼaʼn ex tuʼn jlu tzaj kybʼis ex kyaj kykolin aqʼuntl (Esd. 4:4; Ageo 1:1, 2). Tuʼntzunju, toj abʼqʼi 520 tej naʼmxtoq tul Jesús xi tqʼamaʼn Jehová te Ageo tuʼn t-xi tqʼuqbʼaʼn kykʼuʼj xjal ex tuʼn tonin kyiʼj tuʼn kyaqʼunan juntl maj tuʼntzun tkyaj bʼant templo (Esd. 6:14, 15). *

5. ¿Tiquʼn onin tqanil xi tqʼamaʼn Ageo kyiʼj aj Judiy?

⁵ Aju tqanil xi tqʼamaʼn Ageo, onin kyiʼj aj Judiy tuʼn tchʼiy qʼuqbʼil kykʼuʼj tiʼj Jehová. Tukʼil nim tipumal Ageo xi tqʼamaʼn jlu kye qeju otoq tzaj bʼaj kykʼuʼj: «Tenx kyipune kykyaqile aqeye xjal ateʼye tuj txʼotxʼ lu; che aqʼnane ok chin tele kyukʼile. Aqine Kymane, aju Tajaw Tkyaqil in xi nmaʼne jlu kyeye» (Ageo 2:4). Nim onin tqanil lu kyiʼj xjal. El kynikʼ tiʼj qa at tipumal Jehová tibʼaj tkyaqil ex qa nejni kywitz anjel. Qa kyajtoq tuʼn tbʼant tbʼanel aqʼuntl kyuʼn, iltoq tiʼj tuʼn tok qeʼ kykʼuʼj tiʼj Jehová.

6. ¿Tiʼtoq tuʼn tbʼaj aj kytzaj luʼlun nasyon tuʼn Jehová?

⁶ Xi tqʼamaʼn Jehová te Ageo tuʼn t-xi tqʼamaʼn kye aj Judiy qa che tzajel luʼlun kykyaqil nasyon tuʼn. Tuʼn tqanil lu, xi tqʼamaʼn Jehová kye qeju otoq kyaj kytzaqpiʼn tuʼn tjaw kybʼinchaʼn templo qa ktzajel luʼlun tnam Persia tuʼn, aju kawin kyibʼaj nim tnam toj ambʼil aju. ¿Tiʼtoq tuʼn tbʼaj aj tbʼant jlu tuʼn Jehová? Tnejel, kbʼeltoq bʼaj aqʼuntl tiʼj tja Dios. Tkabʼin, kʼokeltoq kymojbʼan kyibʼ xjal kyukʼil tmajen Jehová tuʼntzun kykʼulin te toj templo. Nimlo onin tbʼanel tqanil lu kyiʼj tmajen Jehová (Zac. 8:9).

7. ¿Alkye aqʼuntl in qo onin tiʼj toj ambʼil jaʼlo?

⁷ ¿Tiʼ t-xilen profecía kyaj tqʼamaʼn Ageo toj ambʼil jaʼlo? In che tzaj luʼlun nasyon juntl maj tuʼn Jehová ex in qo onin tiʼj aqʼuntl lu. Qo ximen tiʼj jlu, toj 1914 xi tqʼoʼn Jehová toklen Jesús tuʼn tkawin toj kyaʼj (Sal. 2:6). Nya bʼaʼn ela tqanil lu toj kywitz xjal in che kawin twitz Txʼotxʼ. ¿Tiquʼn? Tuʼnju otoq «bʼaj tqʼijlalil tuʼn kykawin qe nasyon». Toj juntl yol, otoq kubʼaj ambʼil tuʼn ya miʼn tkawin jun xjal te t-xel Jehová (Luc. 21:24). Tuʼntzunju, kukx in xi kyqʼamaʼn tmajen Jehová kye xjal qa oʼkx Tkawbʼil kʼelel qʼinte nya bʼaʼn ex mas bʼant jlu kyuʼn tej ttzaj tzyet abʼqʼi 1919. Tuʼnju in xi pakbʼet tbʼanel tqanil tiʼj Tkawbʼil Dios, jaku txi qʼamet qa in che tzaj luʼlun xjal twitz tkyaqil Txʼotxʼ (Mat. 24:14).

8. Ik tzeʼn in tzaj tqʼamaʼn Salmo 2:1 a 3, ¿tiʼ kymod xjal in kubʼ kyyekʼin aj tok kybʼiʼn tbʼanel tqanil?

⁸ ¿Tiʼ kymod xjal in kubʼ kyyekʼin aj tok kybʼiʼn tqanil lu? Chʼixme kykyaqil xjal nya bʼaʼn in nela toj kywitz (kjawil uʼjit Salmo 2:1-3). In che jaw tilj qiʼj ex nya kyaj tuʼn tokx kyqʼon kyibʼ tjaqʼ tkawbʼil Jesús aju aj Kawil o jaw tjyoʼn Jehová. Mintiʼ in xi kynimen qa in qo pakbʼan tiʼj tbʼanel tqanil. Axpe ikx, ateʼ junjun aj kawil o tzʼel kyiʼn ambʼil tuʼn qpakbʼan. Maske in tzaj kyqʼamaʼn nim aj kawil qa in che ajbʼen te Dios, nya kyaj tuʼn tel qʼiʼn kyoklen nix tuʼn tkyaj kytzaqpiʼn kykawbʼil. Ik tzeʼn bʼaj toj tqʼijlalil Jesús, ax ikx toj ambʼil jaʼlo, nya kyaj xjal tuʼn tokx kyqʼon  kyibʼ tjaqʼ tkawbʼil Jesús ex in bʼant jlu kyuʼn aj in che el ikʼun tmajen Jehová (Hech. 4:25-28).

9. ¿Tiʼ tmod Jehová in kubʼ tyekʼin tuʼnju mintiʼ in nok kybʼiʼn xjal tbʼanel tqanil?

⁹ ¿Tiʼ tmod Jehová in kubʼ tyekʼin tuʼnju mintiʼ in nok kybʼiʼn xjal tbʼanel tqanil? In tzaj tqʼamaʼn Salmo 2:10 a 12 jlu: «Jaʼlo, aqeye rey ex aqeye in che kawin kyiʼj xjal twitz txʼotxʼ, tenx kynabʼle ex tzʼelx kynikʼe tiʼj xnaqʼtzbʼil lu. Che ajbʼene te Qman tukʼil tzalajbʼil ex nimbʼil, che mokʼekuye twitz tukʼil tchiylal, porke mya yajku tzaj tqʼoj ex jaku che bʼaj kyime tuʼn ax tuj bʼe, porke jurat naj in tzaj tqʼoj. At tzalajbʼil kye qeju nnoʼk qeʼ kykʼuʼj tiʼj tuʼn kyklet». In kubʼ tyekʼin Jehová tbʼanel tmod kyiʼj aj qʼoj ex in xi tqʼoʼn ambʼil kye tuʼn tchʼexpaj kyximbʼetz ex tuʼn tokx kyqʼon kyibʼ tjaqʼ Tkawbʼil. Noqtzun tuʼnj, chʼix tbʼaj ambʼil tuʼnju in qo anqʼin kyoj «mankbʼil tqʼijlalil» (2 Tim. 3:1; Is. 61:2). Tuʼntzunju, nim toklen tuʼn tel kynikʼ xjal tiʼj Jehová ex tuʼn tkubʼ kyximen tuʼn kyajbʼen te.

10. Ik tzeʼn in tzaj tqʼamaʼn Ageo 2:7 a 9, ¿tiʼ kymod xjal in kubʼ kyyekʼin tuʼnju in che tzaj luʼlun nasyon tuʼn Jehová?

¹⁰ Ateʼ junjun xjal in kubʼ kyyekʼin tbʼanel kymod aj in che tzaj luʼlun nasyon tuʼn Jehová ik tzeʼn kyaj tqʼamaʼn Ageo. Tqʼama Ageo qa tuʼnju in che tzaj luʼlun nasyon tuʼn Jehová, «ktzajel kyiʼn kyqʼinumabʼl». A jlu in yolin kyiʼj xjal kyaj tuʼn tel kynikʼ tiʼj axix tok ex kyaj tuʼn kykʼulin te Jehová (kjawil uʼjit Ageo 2:7-9). * Ax ikx kyaj tqʼamaʼn Isaías ex Miqueas qa atzun jlu tuʼn tbʼaj toj «bʼajsbʼil tqʼijlalil» (Is. 2:2-4; Miq. 4:1, 2).

11. ¿Tiʼ bʼant tuʼn jun ermano tej tok tbʼiʼn tbʼanel tqanil?

¹¹ Qo xnaqʼtzan tiʼj tzeʼn tzaj luʼlun jun ermano tuʼn tqanil lu, aju Ken tbʼi ex in najbʼen toj kytxuylal ninja qʼil twitz  aqʼuntl. Ma tzikʼ junlo 40 abʼqʼi tej tok tbʼiʼn tnejel maj tbʼanel tqanil tiʼj Tkawbʼil Dios. Pero kukx naʼn tuʼn ik tzeʼn tzma ew ok tbʼiʼn. In tzaj tqʼamaʼn jlu: «Tej tok nbʼiʼne axix tok tkuʼx toj Tyol Dios, in jaw tzalaje tej tel nnikʼe tiʼj qa in qo anqʼin kyoj bʼajsbʼil tqʼijlalil. El nnikʼe tiʼj qa iltoq tiʼj tuʼn tel npan wibʼe kyiʼj tiʼchaq te twitz txʼotxʼ ex tuʼn wajbʼene te Jehová tuʼntzun ttzalaj wiʼje ex tuʼn ttzaj tqʼoʼn nchwinqlale te jumajx. In naʼne Dios te Jehová ex mintiʼ xi tiʼn nim ambʼil tuʼn tbʼant wuʼne. El npan wibʼe tiʼj nya bʼaʼn ex okx nqʼon wibʼe tjaqʼ Tkawbʼil Dios aju mlayx yukch».

12. ¿Alkye tten o tzaj kyiʼn kykyaqil tnam kyqʼinumabʼil toj tja Jehová toj ambʼil jaʼlo?

¹² Qʼanchaʼlxix qa in tzaj tkʼiwlaʼn Jehová ttnam. Toj ambʼil o tzikʼ, o tzʼok qkeʼyin qa at nim xjal kyaj tuʼn kyajbʼen te Jehová. Nyatoq nim qbʼet toj 1914, atzun toj ambʼil jaʼlo at mas te 8 millón qbʼet ex tkyaqil abʼqʼi in nok kychmon kyibʼ nim xjal qukʼil tuʼntzun tkubʼ qikʼsaʼn Nabʼitz Tkyimlen Jesucristo. Iktzun tten o tzaj kyiʼn kykyaqil tnam kyqʼinumabʼil toj tja Jehová, aju in kubʼ techlaʼn tkyaqilju o bʼant tuʼn tuʼntzun qkʼulin te toj tumel. Aj tbʼant chʼixpubʼil kyuʼn xjal, ax ikx in jaw nimsaʼn tbʼi Jehová (Efes. 4:22-24).

13. ¿Alkye junjuntl profecía in japun kywi tuʼnju in bʼaj toj ambʼil jaʼlo? (Qʼonka twitza tiʼj tilbʼilal tok tiʼj t-xkʼomil).

¹³ Tkyaqilju in bʼaj toj ambʼil jaʼlo, ax ikx in japun kywi junjuntl profecía tuʼn ik tzeʼn aju tkuʼx toj Isaías capítulo 60. In tzaj tqʼamaʼn versículo 22 jlu: «Aju tal bʼyuj xjal lu kchmetel kybʼaj tuj milen, ex aqeju noq nikʼxi kybʼaj jaʼlo che okel te jun nintz nasyon. Aqine Dios, kbʼantel naj jlu wuʼne tujxix tqʼijlalil». Ax ikx, in bʼaj juntl tiʼ tuʼnju in che oktz nim xjal toj ttnam Jehová. ¿Alqiʼj in qo yolin? In qo yolin tiʼj tbʼanel aqʼuntl jaku bʼant kyuʼn ex tiʼj kymod in kubʼ kyyekʼin aj kyonin tuʼn t-xi pakbʼet tbʼanel tqanil tiʼj Tkawbʼil Dios. Tuʼn jlu, jaku che ajbʼen tuʼn ttnam Jehová tuʼn tbʼant jun tbʼanel aqʼuntl ex in che ok ik tzeʼn «tbʼanil wabʼj» yolin Isaías  tiʼj (Is. 60:5, 16). Tuʼnju in che onin xjal lu, in xi pakbʼet tbʼanel tqanil kyoj 240 tnam ex tembʼil te pakbʼabʼil ex in che etz uʼj toj mas te 1,000 yol.

14. ¿Tiʼ il tiʼj tuʼn tkubʼ kyximen xjal toj ambʼil jaʼlo?

¹⁴ Tuʼnju ya chʼix tul xitbʼil ex in che tzaj luʼlun kykyaqil nasyon tuʼn Jehová, nim toklen tuʼn tkubʼ kyximen xjal tiʼ kbʼantel kyuʼn. ¿Che onilpe tiʼj Tkawbʼil Dios moqa kʼokel qeʼ kykʼuʼj kyiʼj xjal in che kawin? Maske in xi kybʼiʼn tmajen Jehová qe ley in che kubʼ qʼoʼn jatumel in che anqʼin, mintiʼ in che onin tiʼj kykawbʼil xjal (Rom. 13:1-7). Ojtzqiʼn kyuʼn qa oʼkx Tkawbʼil Dios kxel bʼinchante tiʼj tkyaqil nya bʼaʼn ex mintiʼ toklen Kawbʼil lu tukʼil kykawbʼil xjal (Juan 18:36, 37).

15. Ik tzeʼn in tzaj tqʼamaʼn uʼj te Apocalipsis, ¿tiʼ che okel weʼ tmajen Jehová twitz?

¹⁵ In tzaj tqʼamaʼn uʼj te Apocalipsis qa kʼokel qʼuqbʼil kykʼuʼj tmajen Jehová toj malbʼil kyoj bʼajsbʼil tqʼijlalil. A t-xilen jlu qa qo okel weʼ twitz nim nya bʼaʼn ex qa qo elel ikʼun kyuʼn xjal. Kʼokel tilil kyuʼn aj kawil tuʼn qkʼulin kye ex che elel kyikʼun qe xjal nya kyaj tuʼn kyonin kyiʼj (Apoc. 13:12, 15). Ex kxel qʼoʼn «orden kye kykyaqil xjal tuʼn tok jun techal tiʼj kybʼanqʼabʼ ex qa tibʼaj kywitz, tzaʼnx qeju chʼin kyoklen ikx qeju maʼ kyoklen, qe qʼinun ex qe mebʼa xjal, qe xjal tzoqpiʼn qe ex qe majen» (Apoc. 13:16). Toj ambʼil ojtxe, ok qʼoʼn jun techel kyiʼj majen tuʼntzun tel nikʼbʼaj tiʼj alkye kypatrón. Chʼixme ax jlu kbʼajel toj ambʼil jaʼlo, kʼokel jun techel kyiʼj kykyaqil xjal qa tiʼj kyqʼabʼ moqa tibʼaj kywitz. ¿Tiʼ t-xilen jlu? Qa kbʼel kyyekʼin xjal tukʼil kybʼinchbʼen ex tukʼilju in kubʼ kyximen qa in che onin kyiʼj aj kawil.

16. ¿Tiquʼn nim toklen tuʼn tkubʼ qyekʼin jaʼlo qa oʼkx te Jehová in qo ajbʼen?

¹⁶ Yajtzun qe, ¿tiʼ kbʼantel quʼn? ¿Kxelpe qqʼoʼn ambʼil tuʼn tok techel qiʼj ex tuʼn qonin kyiʼj aj kawil? Kykyaqil qeju mlay txi kyqʼoʼn ambʼil tuʼn tok techel kyiʼj, che elel ikʼun ex kʼokel bʼinchan nya bʼaʼn kyiʼj. In tzaj tqʼamaʼn uʼj te Apocalipsis qa miʼn txi qʼoʼn ambʼil tuʼn «kyloqʼon xjal ex tuʼn miʼn kykʼayin qa mintiʼ techal txkup tok kyiʼj» (Apoc. 13:17). Atzun kye tmajen Jehová, ojtzqiʼn kyuʼn tiʼ kbʼantel tuʼn kyiʼj xjal kxel kyqʼoʼn ambʼil tuʼn tok techel kyiʼj (Apoc. 14:9, 10). Te t-xel techel lu, kxel kyqʼoʼn ambʼil tuʼn tok tzʼibʼin qe yol lu tiʼj kyqʼabʼ: «Tetzbʼil Qman we qin» (Is. 44:5). Toj ambʼil jaʼlo, bʼaʼn tuʼn tkubʼ qyekʼin qa oʼkx te Jehová in qo ajbʼen. Qa ma bʼant jlu quʼn, ktzalajel Jehová qiʼj aj qok tqʼoʼn te tetzbʼil.

17. ¿Tiʼ bʼaʼn tuʼn ttzaj qnaʼn tiʼj tpasens Jehová?

¹⁷ Kyoj bʼajsbʼil tqʼijlalil, o kubʼ tyekʼin Jehová nim tpasens tuʼnju nya taj tuʼn tkyim jun xjal (2 Ped. 3:9). O txi tqʼoʼn ambʼil kye kykyaqil xjal tuʼn tajtz tiʼj kyanmi ex tuʼn tjaw kyjyoʼn aju mas bʼaʼn. Noqtzun tuʼnj, at jatumel in pon bʼaj tpasens. Aqeju xjal mintiʼ in najtz tiʼj kyanmi, axju kbʼajel kyiʼj ik tzeʼn bʼaj tiʼj faraón toj tqʼijlalil Moisés. Xi tqʼamaʼn Jehová jlu te faraón: «Noqwit xi nyekʼune wipumale tuʼn tkʼixbʼiseta tuʼn yabʼil, owtlo kyima kyukʼix qe t-xjalila, ex ma kyaj anqʼina wuʼne tuʼn tel tnikʼa tiʼj wipumale, ex tuʼn tel tqanil nbʼiye tuj tkyaqil twitz txʼotxʼ» (Éx. 9:15, 16). Kpol qʼij jatumel  kʼelel kynikʼ kykyaqil nasyon tiʼj qa oʼkx te Jehová Dios axix tok (Ezeq. 38:23). ¿Alkye tten kbʼajel jlu?

18. a) Ik tzeʼn in tzaj tqʼamaʼn Ageo 2:6, 20 a 22, ¿alkye juntl tten che tzajel luʼlun nasyon tuʼn Jehová? b) ¿Tzeʼn in nel qnikʼ tiʼj qa kjapunel kywi yol kyaj tqʼamaʼn Ageo toj ambʼil tzul?

¹⁸ Tej otoq tzikʼ nim syent abʼqʼi tkyimlen Ageo, kyaj tqʼamaʼn apóstol Pablo tuʼn tonbʼil Jehová qa kjapunel kywi yol kyaj qʼamaʼn toj Ageo 2:6, 20 a 22 toj ambʼil tzul (uʼjinktza). Kubʼ ttzʼibʼin apóstol Pablo jlu: «Kyyukchtel juntl maj txʼotxʼ wuʼne, ex mya noq oʼkx txʼotxʼ, ax ikx kyaʼj kyyukchtel, chi Dios. Aju yol lu: Juntl maj, atzun in tmaʼn tuʼn tel qʼiʼn tkyaqilju bʼaʼn tyukch, aqeju bʼinchaʼn qe, tuʼntzun kykyaj ten qeju mintiʼ in che yukch» (Heb. 12:26, 27). Aj tpon ambʼil tuʼn tbʼaj jlu, junxitl kʼokel twitzju in tzaj qʼamaʼn toj Ageo 2:7 tuʼnju che kbʼel najsaʼn kykyaqil qeju mintiʼ in nokx kyqʼon kyibʼ tjaqʼ tkawbʼil Jehová ik tzeʼn bʼaj tiʼj faraón.

19. ¿Alkye jun tiʼ mlayx tzaj luʼlun ex tzeʼn ojtzqiʼn quʼn?

¹⁹ ¿Alkye jun tiʼ mlay tzaj luʼlun moqa mlay kubʼ najsaʼn? Tqʼamatl Pablo jlu: «Kyjaʼtzun qqʼonx chjonte te Dios tuʼnju ma qkʼam jun kawbʼil mlay yukch, qqʼonx chjonte ex qo ajbʼen te Dios tuʼn ttzalaj qiʼj ex tuʼn tten tchi tuj qwitz ex tuʼn qniman te» (Heb. 12:28). Tuʼn jlu, in nel qnikʼ tiʼj qa oʼkx Tkawbʼil Dios mlayx yukch aj kytzaj luʼlun nasyon mankbʼil maj tuʼn Jehová (Sal. 110:5, 6; Dan. 2:44).

20. ¿Tiʼ il tiʼj tuʼn tbʼant kyuʼn xjal ex tzeʼn jaku qo onin kyiʼj?

²⁰ Ya chʼix tbʼaj ambʼil, nim toklen tuʼn tjaw kyjyoʼn xjal tiʼ kbʼantel kyuʼn. ¿Kukxpe che okel lepeʼ tiʼj kybʼinchbʼen xjal ex che kbʼel najsaʼn? ¿Moqa kbʼantel chʼixpubʼil kyuʼn tuʼn tkubʼ kybʼinchaʼn tajbʼil Jehová ex tuʼn kyanqʼin te jumajx? (Heb. 12:25). In qo onin kyiʼj xjal tuʼn tjaw kyjyoʼn aju mas bʼaʼn aj qpakbʼan. Tuʼntzunju, kukx qo onin kyiʼj xjal at jun tbʼanel kyanmi tuʼn tokx kyqʼon kyibʼ tjaqʼ Tkawbʼil Dios. Ex miʼn tzikʼ tnaʼl qe tyol Jesús lu quʼn: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mat. 24:14).