1. ¿Tiʼ kubʼ tyekʼin Jesús tej tten tzalu twitz Txʼotxʼ?

AT JUN kʼloj toj tja Jehová in che ajbʼen te, kyxol jlu at Jesús, aju tnejel Tkʼwal ex ateʼ nimxix kyajlal anjel (Col. 1:15; Sal. 103:20). Tej tten Jesús tzalu twitz Txʼotxʼ, kubʼ tyekʼin qa jaku tzʼok Jehová te Qtat. Jun maj, akux in yolin kyukʼil t-xnaqʼtzbʼen, tqʼama jlu tiʼj Jehová: «Nmane ex Kymane» (Juan 20:17). Ex aj t-xi qqʼamaʼn te Jehová qa qaj tuʼn qajbʼen te ex aj qbautisarin, in qo ten kyxol erman at nim kykʼujlabʼil (Mar. 10:29, 30).

2. ¿Tiʼ kʼelel qnikʼ tiʼj toj xnaqʼtzbʼil lu?

² Ateʼ nim tmajen Jehová kwest tuʼn tel kynikʼ tiʼj qa in nok Jehová ik tzeʼn jun mambʼaj at nim tkʼujlabʼil. Atzun junjuntl, kwest tuʼn tkubʼ kyyekʼin kʼujlabʼil kyiʼj erman. Toj xnaqʼtzbʼil lu, kʼelel qnikʼ tiʼj tzeʼn in nonin Jesús qiʼj tuʼn tok qqʼoʼn Jehová te Qtat, qa kʼujlaʼn qoʼ tuʼn ex qa jaku qo ok laqʼeʼ ttxlaj. Ax ikx, kʼelel qnikʼ tiʼj tzeʼn jaku tzʼel qkanoʼn qe tmod Jehová aj qten kyukʼil erman.

3. ¿Tiquʼn ajbʼen yol «Qman» tuʼn Jesús ex tiʼ in tzaj tyekʼin jlu qe tiʼj Jehová?

³ Ik te Jehová ik tzeʼn jun mambʼaj at nimxix tkʼujlabʼil. Tuʼntzunju, taj Jesús tuʼn tkubʼ qximen qa ax tok jlu ex nya ik tzeʼn jun xjal noq oʼkx taj tuʼn tkawin qibʼaj. Kubʼ tyekʼin Jesús jlu tej t-xi tyekʼin kye t-xnaqʼtzbʼen tzeʼn tuʼn kynaʼn Dios. Tqʼama jlu toj tnaʼj Dios: «A Qman ata tuj kyaʼj» (Mat. 6:9). Jakutoq kyaj tqʼamaʼn Jesús tuʼn t-xi  qqʼamaʼn qe yol lu te Jehová: ‹Dios at tipumal›, ‹Bʼinchalte tkyaqil› moqa «Rey tuj tkyaqil tabʼqʼiyil», ex toj tumel jlu tuʼnju in che ajbʼen yol lu toj Biblia (Gén. 49:25; Is. 40:28; 1 Tim. 1:17). Pero ajbʼen yol «Qman» tuʼn tuʼn ttzaj tyekʼin qa kʼujlaʼn qoʼ tuʼn Jehová.

4. ¿Tiquʼn in xi qqʼamaʼn qa taj Jehová tuʼn qxi laqʼeʼ ttxlaj?

⁴ ¿Kwestpe in nela toj qwitz tuʼn tkubʼ qximen qa ik tten Jehová ik tzeʼn jun mambʼaj at tkʼujlabʼil? At junjun qe kwest in nela toj twitz. Qa mintiʼ xqo ok kʼujlaʼn tuʼn qtat, bʼalo kwest tuʼn tel qnikʼ tiʼj tzeʼn jun mambʼaj at kʼujlabʼil. Tuʼntzunju, in tzaj tqʼoʼn Tyol txokbʼil lu qiʼj: «Che laqʼexe ttxlaj Dios, ax ikx te ktzajel laqʼeʼ kyukʼile» (Sant. 4:8). Kʼujlaʼn qoʼ tuʼn Jehová ex in tzaj tqʼamaʼn qe qa jaku tzʼok te jun tbʼanel mambʼaj te qe.

5. Ik tzeʼn in tzaj tyekʼin Lucas 10:22, ¿tiquʼn jaku tzʼonin Jesús qiʼj tuʼn qok laqʼeʼ mas ttxlaj Jehová?

⁵ Jaku tzʼonin Jesús qiʼj tuʼn qxi laqʼeʼ ttxlaj Jehová tuʼnju ojtzqiʼnxix tuʼn ex in che kubʼ tyekʼin tbʼanel tmod. Tuʼntzunju, tqʼama jlu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Ik tten Jesús ik tzeʼn jun qtzik tuʼnju kyaj tyekʼin qe tzeʼn tuʼn tok qqʼoʼn toklen Qtat at toj kyaʼj, tuʼn qnimen te ex tuʼn ttzalaj qiʼj. Ex tej tten tzalu twitz Txʼotxʼ, kubʼ tyekʼin qa tbʼanelxix te Jehová ex qa at nim tkʼujlabʼil (kjawil uʼjit Lucas 10:22). Qo xnaqʼtzan kyiʼj junjun techel.

6. ¿Tiquʼn jaku txi qqʼamaʼn qa tzaj tbʼiʼn Jehová te Jesús?

⁶ In che tzaj tbʼiʼn Jehová qe tkʼwal. Qo xnaqʼtzan tiʼj tzeʼn tzaj tbʼiʼn Jehová Jesús. Jaku txi qqʼamaʼn qa ok tqʼoʼn twiʼ tiʼj Jesús tej tnaʼn Dios te nimku maj tej tten tzalu twitz Txʼotxʼ (Luc. 5:16). Tzaj tbʼiʼn Jesús tej t-xi tqanin onbʼil te, ik tzeʼn tej tjaw tjyoʼn qeju 12 t-apóstol (Luc. 6:12, 13). Ax ikx tzaj tbʼiʼn tnaʼj Dios tej tzaj bʼajxix tkʼuʼj. Tej chʼixtoq t-xi kʼayin Jesús tuʼn Judas, kubʼsan te Ttat  tuʼn tonin tiʼj tuʼn tex twitz nya bʼaʼn lu. Nya oʼkx tzaj tbʼiʼn Jehová Tkʼwal, sino ax ikx tzaj tsamaʼn jun t-anjel tuʼn t-xi tqʼuqbʼaʼn tkʼuʼj (Luc. 22:41-44).

7. ¿Tiʼ teya in kubʼ tnaʼn aj tel tnikʼa tiʼj qa in tzaj tbʼiʼn Jehová tnaʼj Diosa?

⁷ Ax ikx toj ambʼil jaʼlo, in qo tzaj tbʼiʼn Jehová aj qnaʼn Dios te ex in qo tzaj ttzaqʼweʼn toj ambʼil mas bʼaʼn toj twitz (Sal. 116:1, 2). Atzun jlu ikʼ tiʼj jun ermana te India. Nimxixtoq in tzaj bʼaj tkʼuʼj, tuʼntzunju xi tqanin te Jehová tuʼn tonin tiʼj. Tqʼama ermana jlu: «Toj programa te JW Broadcasting^® te mayo te 2019, etz qʼamaʼn tiʼ jaku bʼant quʼn tuʼn miʼn ttzaj bʼajxix qkʼuʼj. Atzun jlu wajtoqe tuʼn tok nbʼiʼne. Tuʼn jlu, tzaj tzaqʼweʼn nnaʼj Diose».

8. ¿Tzeʼn kubʼ tyekʼin Jehová tkʼujlabʼil tiʼj Jesús?

⁸ In kubʼ tyekʼin Jehová tkʼujlabʼil qiʼj ik tzeʼn bʼant tuʼn tukʼil Tkʼwal tej tten tzalu twitz Txʼotxʼ (Juan 5:20). Onin tiʼj Jesús tuʼn miʼn tnaj tamiwbʼil tukʼil, tuʼn tkubʼ tnaʼn bʼaʼn ex tuʼn tten aju at tajbʼen te. Ex kukx xi tqʼamaʼn te qa kʼujlaʼn tuʼn ex qa in tzalaj tiʼj (Mat. 3:16, 17). Mintiʼ kubʼ tnaʼn Jesús qa tjunalxtoq at, tuʼnju ojtzqiʼntoq tuʼn qa kukx attoq Ttat tukʼil (Juan 8:16).

9. ¿Alkyeqe yekʼbʼil at tiʼj qa kʼujlaʼn qoʼ tuʼn Jehová?

⁹ Qkyaqilx o kubʼ qnaʼn tkʼujlabʼil Jehová ik tzeʼn te Jesús. Qo ximen tiʼj jlu: o tzaj tqʼoʼn Jehová ambʼil qe tuʼn qoktz toj ttnam, tuʼn qten kyxol erman jatumel at nim kʼujlabʼil, mujbʼabʼil ex in che onin qiʼj. Tuʼn jlu, in qo tzalaj (Juan 6:44). Ax ikx, in tzaj tqʼoʼn xnaqʼtzbʼil qe tiʼj Tyol ex in tzaj tqʼoʼn aju at tajbʼen qe junjun qʼij (Mat. 6:31, 32). Aj qximen tiʼj tkʼujlabʼil Jehová at qiʼj, ax ikx in chʼiy qkʼujlabʼil tiʼj.

10. ¿Tzeʼn jaku tzʼel qkanoʼn tiʼj Jehová aj tkubʼ qyekʼin qkʼujlabʼil kyiʼj erman?

¹⁰ Kʼujlaʼn qe erman tuʼn Jehová. Atzun qe, at maj kwest tuʼn tkubʼ qyekʼin qkʼujlabʼil kyiʼj ex tuʼn t-xi qqʼamaʼn kye. In bʼaj jlu tuʼnju junxitl qtnam moqa junxitl tten xqo jaw chʼiy. Ex tuʼnju qkyaqilx aj il qoʼ, jaku tzaj tbʼis juntl quʼn moqa jaku tzaj tqʼoj. Maske ikju, jaku qo onin tuʼn tten kʼujlabʼil qxol ik tzeʼn in bʼant tuʼn Jehová (Efes. 5:1, 2; 1 Juan 4:19). Qo xnaqʼtzan tiʼj alkye tten in kubʼ tqʼoʼn Jehová techel qwitz.

11. ¿Tzeʼn kubʼ tyekʼin Jesús qʼaqʼbʼil tkʼuʼj Jehová?

¹¹ In tzaj «qʼaqʼan tkʼuʼj» Jehová kyiʼj xjal (Luc. 1:78). Aju xjal in tzaj qʼaqʼin tkʼuʼj tiʼj juntl, in nel tnikʼ kyiʼj qeju in tzaj nya bʼaʼn kyiʼj ex in jyon tumel tuʼn tonin kyiʼj. Kubʼ tyekʼin Jesús tbʼanel tmod kyiʼj xjal ex tuʼn jlu in nel qnikʼ tiʼj qa kʼujlaʼn qe tuʼn Jehová (Juan 5:19). In tzaj tqʼamaʼn Xjan Uʼj jlu: «Tejtzun tkeʼyinte Jesús nim xjal, tzaj qʼaqʼan tkʼuʼj kyiʼj; tuʼnju otoq che sikt ex in che bʼisun, ik kyten ik tzaʼn qe ẍneʼl mintiʼ pastoril kye» (Mat. 9:36). Nya oʼkx tzaj qʼaqʼin tkʼuʼj Jesús kyiʼj xjal, sino ax ikx kubʼ tyekʼin tukʼil tbʼinchbʼen. Tuʼntzunju, e qʼanit qe yabʼ tuʼn ex onin kyiʼj qeju otoq che sikt tuʼn aqʼuntl (Mat. 11:28-30; 14:14).

12. ¿Tiʼ jaku bʼant quʼn tuʼn tkubʼ qyekʼin qʼaqʼbʼil qkʼuʼj kyiʼj erman?

¹² Qa qaj tuʼn tkubʼ qyekʼin qʼaqʼbʼil qkʼuʼj kyiʼj erman, il tiʼj tuʼn qximen tiʼjju in bʼaj kyiʼj. Jun techel, qa yabʼ taʼ jun ermana, bʼalo mintiʼ in tzaj tqanin onbʼil qe, pero qa ma qo onin tiʼj, tzul tqʼoʼn chjonte qe. Jaku qo onin kyiʼj toj tja kyukʼil junjun tiʼchaq ik tzeʼn tuʼn t-xi qbʼinchaʼn jun kywa moqa tuʼn tjaw kytzʼis. Ax ikx,  qa at jun erman ya mintiʼ taqʼun, jaku txi qqʼoʼn chʼin tpwaq akux in kanet juntl taqʼun, pero nya il tiʼj tuʼn tok tbʼiʼn qa aqoʼ in qox qʼonte.

13, 14. Tuʼnju bʼaʼn te Jehová qʼon oyaj, ¿tzeʼn jaku tzʼel qkanoʼn tiʼj?

¹³ Bʼaʼn qʼon Jehová oyaj (Mat. 5:45). Qa qaj tuʼn ttzaj qʼaqʼin qkʼuʼj kyiʼj erman, mintiʼ tuʼn tkubʼ qyoʼn tzmaxi aj ttzaj kyqanin onbʼil. Jaku qo onin kyiʼj ik tzeʼn in bʼant tuʼn Jehová. Tkyaqil qʼij in netz Qʼij tuʼn ex mintiʼ in xi qqanin te. In nonin Qʼij kyiʼj kykyaqil xjal ex nya oʼkx kyiʼj qeju in xi kyqʼoʼn chjonte te. In tzaj tyekʼin Jehová qa kʼujlaʼn qoʼ tuʼn aj ttzaj tqʼoʼn aju at tajbʼen qe. Tuʼn tkyaqil jlu, in nok qkʼujlaʼn Jehová.

¹⁴ Ateʼ nim erman in nel kykanoʼn tiʼj Jehová tuʼnju bʼaʼn che qʼon oyaj maske mintiʼ in xi qanin kye. Atzun jlu bʼaj toj 2013 tej ttzaj supertifón Haiyan toj tnam Filipinas. Nim erman naj kyja ex tkyaqilju attoq kye. Pero jurat e onin erman twitz tkyaqil Txʼotxʼ kyiʼj. Noq tuʼn onbʼil ex aqʼuntl bʼant kyuʼn nim erman, e bʼaj bʼinchaʼn chʼintl junlo 750 ja ex menos te jun abʼqʼi xi tiʼn. Ax ikx, tej ttzaj COVID-19, ok tilil kyuʼn testigo de Jehová tuʼn kyonin kyiʼj kyerman. Qa bʼantni qten tuʼn qonin kyiʼj erman, in kubʼ qyekʼin qa kʼujlaʼn qe quʼn.

15, 16. Ik tzeʼn in tzaj tqʼamaʼn Lucas 6:36, ¿tiʼ il tiʼj tuʼn tbʼant quʼn qa qaj tuʼn tel qkanoʼn tiʼj Jehová?

¹⁵ In tzaj qʼaqʼin tkʼuʼj Jehová qiʼj ex in kubʼ tnajsaʼn qil tkyaqil qʼij (kjawil uʼjit Lucas 6:36; Sal. 103:10-14). Ax ikx te Jesús, kubʼ tnajsaʼn kyil t-xnaqʼtzbʼen tej kyel txalpaj tuʼnju nya tzʼaqliqe. Axpe ikx, xi tqʼoʼn tchwinqlal tuʼntzun tkubʼ najsaʼn qil (1 Juan 2:1, 2). Aj ttzaj qʼaqʼin tkʼuʼj Jehová ex Jesús qiʼj, mas in qo ok laqʼeʼ kytxlaj.

¹⁶ In chʼiy kʼujlabʼil qxol kyukʼil erman aj ttzaj qʼaqʼin qkʼuʼj kyiʼj ex aj tkubʼ qnajsaʼn kyil (Efes. 4:32). Ax tok, at maj kwest tuʼn tkubʼ qnajsaʼn kyil txqantl, pero nim toklen tuʼn tbʼant jlu quʼn. Tqʼama jun ermana qa nim onin jun xnaqʼtzbʼil  tiʼj, aju etz toj uʼj Xqʼuqil toj kastiy tok tbʼi, «Perdónense liberalmente unos a otros». * Kubʼ ttzʼibʼin ermana jlu: «Tej tkubʼ nxnaqʼtzaʼne xnaqʼtzbʼil aju, o tzʼonin wiʼje tuʼn tten nxime toj tumel tiʼj nya bʼaʼn. Tzaj tchikʼbʼaʼn xnaqʼtzbʼil qa aj tkubʼ qnajsaʼn til juntl, mintiʼ in tzaj tyekʼin qa bʼaʼn in nela toj qwitz aju nya bʼaʼn otoq tzʼok tbʼinchaʼn qiʼj moqa mintiʼ in nok qqʼoʼn toklen. Oʼkx in tzaj tyekʼin qa mintiʼ tuʼn tkux qkʼuʼn qʼoj toj qanmi tiʼj xjal ex tuʼn kukx qtzalaj». Aj tkubʼ qnajsaʼn kyil erman tuʼn tkyaqil qkʼuʼj, in kubʼ qyekʼin qa in che ok qkʼujlaʼn ex qa in nel qkanoʼn tiʼj Jehová.

17. Ik tzeʼn in tzaj tyekʼin Mateo 5:16, ¿tzeʼn jaku jaw qnimsaʼn Jehová?

¹⁷ Tbʼanelxix qoklen o tzaj qʼoʼn tuʼnju atoʼ kyxol erman ex at kʼujlabʼil qxol. Ex qaj tuʼn kyoktz mas xjal toj ttnam Jehová tuʼntzun qkʼulin te. Tuʼntzunju, nya qaj tuʼn tbʼant jun tiʼ quʼn aju jaku tzʼilix tbʼi Jehová tuʼn moqa tbʼi ttnam. In nok tilil quʼn toj tkyaqil ambʼil tuʼn tkubʼ qbʼinchaʼn aju bʼaʼn tuʼntzun tok kybʼiʼn xjal tbʼanel tqanil in xi qqʼamaʼn kye (kjawil uʼjit Mateo 5:16).

18. ¿Tiʼ kʼonil qiʼj tuʼn miʼn qtzaj xobʼ aj qpakbʼan?

¹⁸ At maj jaku qo el ikʼun kyuʼn txqantl tuʼnju in qo nimen te Qtat at toj kyaʼj. ¿Tiʼ jaku bʼant quʼn qa in qo tzaj xobʼ tuʼn qyolin tiʼj Tyol Dios kyukʼil xjal? Bʼaʼn tuʼn ttzaj qnaʼn qa kʼonil Jehová ex Jesús qiʼj. Xi tqʼamaʼn Jesús kye t-xnaqʼtzbʼen tuʼn miʼn ttzaj bʼaj kykʼuʼj tiʼj tiʼ kxel kyqʼamaʼn moqa tzeʼn kxel kyqʼamaʼn. Kyaj tqʼamaʼn jlu: «Jurat naj ktzajel tqʼoʼn Dios yol kyeye alkye tuʼn t-xi kymaʼne. Porke mya aqeye che yolil, noq oʼkx aju T-xew Dios aju Kymane, atzunte ktzajel qʼonte yol alkye tuʼn t-xi kymaʼne» (Mat. 10:19, 20).

19. ¿Tiʼ onin tiʼj Robert tuʼn miʼn ttzaj xobʼ tej tpakbʼan?

¹⁹ Qo xnaqʼtzan tiʼjju bʼaj tiʼj jun ermano  Robert tbʼi. Tej t-xi tzyet tuʼn t-xnaqʼtzan tiʼj Tyol Dios ex mintiʼxix tojtzqibʼil at, xi qʼiʼn twitz jun tribunal militar atz Sudáfrica. Ten tipumal ex xi tchikʼbʼaʼn qa mlaytoq txiʼ kyxol soldad tuʼnju kʼujlaʼntoq qe erman tuʼn. In tzaj tyekʼin jlu qa nim kyoklen erman toj twitz. Noq minabʼen, xi tqanin jun jwes jlu te: «¿Alkyetzun qe termana?». Mintiʼtoq ximen tuʼn Robert tuʼn ttzaj qanin jlu te, pero jurat tzaj tnaʼn texto te qʼij aju. Aju Mateo 12:50 jatumel in tzaj tqʼamaʼn jlu: «Tkyaqilju in tbʼinchaʼn tajbʼil Nmane aju at tuj kyaʼj, atzun witzʼine, ex atzun wanbʼeju, ex atzun ntxuʼyeju». Maske noq chʼin ambʼil qʼiʼntoq tuʼn Robert toj ttnam Jehová, onin xewbʼaj xjan tiʼj tuʼn t-xi ttzaqʼweʼn xjel lu ex junjuntl xjel mintiʼ ximen maj tuʼn tuʼn ttzaj qanin te. Nimxixlo tzalaj Jehová tiʼj. Ax ikx, nim ktzalajel Jehová qiʼj qa ma tzʼok qeʼ qkʼuʼj tiʼj ex qa mintiʼ xqo tzaj xobʼ aj qpakbʼan kyoj ambʼil kwest.

20. ¿Tiʼ bʼaʼn tuʼn tkubʼ qximen tuʼn kukx tbʼant quʼn? (Juan 17:11, 15).

²⁰ Kukx qo tzalaj tiʼj qoklen at tuʼnju atoʼ kyxol erman. At jun tbʼanel Qtat ex ateʼ nim qerman, aqeju kʼujlaʼn qoʼ kyuʼn. Kukx qqʼonx chjonte tiʼj jlu. In nok tilil tuʼn Satanás ex qe nya bʼaʼn anjel tuʼn tjawje qkʼuʼj tiʼj tkʼujlabʼil Jehová ex tuʼn miʼn tten mujbʼabʼil qxol. Atzunte Jesús, naʼn Dios qiʼj ex xi tqanin te Jehová tuʼn tonin qiʼj tuʼn kukx tten mujbʼabʼil qxol (kjawil uʼjit Juan 17:11, 15). In nok qqʼoʼn qwitz tiʼj qa in tzaj ttzaqʼweʼn Jehová tnaʼj Dios Jesús. Qkanoʼmil techel kyaj tqʼoʼn Jesús ex qeʼk qkʼuʼj tiʼj qa kʼujlaʼn qoʼ tuʼn Qtat at toj kyaʼj ex qa kʼonil qiʼj. Tuʼntzunju, miʼn tzʼel qpan qibʼ kyiʼj erman.