1, 2. a) Ik tzeʼn in tzaj tqʼamaʼn Proverbios 16:31, ¿tiʼ qximbʼetz ktel kyiʼj erman o che tijen? b) ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

TOJ jun parque estatal te tnam Arkansas te Estados Unidos, jaku che kanet diamante twitz txʼotxʼ kyuʼn xjal. Maske qʼanchaʼl qe diamante, bʼalo ateʼ junjun xjal mintiʼ in nok kyqʼoʼn kyoklen tuʼnju naʼmx kybʼaj bʼinchaʼn.

² In che ok erman o che tijen ik tzeʼn qe diamante lu tuʼnju nimxix kyoklen. In nok tmojbʼaʼn Tyol Dios saq at toj kywiʼ tukʼil jun corona (kjawil uʼjit Proverbios 16:31; 20:29). Pero at maj mintiʼ in qo ximen tiʼj jniʼ kyoklen. Aj tel kynikʼ kuʼxun tiʼj qa nim kyoklen erman o che tijen, ax ikx in nel kynikʼ kyiʼj junjuntl tiʼchaq nim kyoklen. Toj xnaqʼtzbʼil lu, kxel qqʼoʼn tzaqʼwebʼil kyiʼj oxe xjel lu: ¿Tiquʼn in kubʼ t-ximen Jehová qa nim kyoklen erman o che tijen? ¿Tiʼ kyoklen at toj ttnam Jehová? ¿Ex tiʼ jaku bʼant quʼn tuʼn tel qiʼn jun xnaqʼtzbʼil tiʼj techel in kubʼ kyqʼoʼn?

3. Ik tzeʼn in tzaj tqʼamaʼn Salmo 92:12 a 15, ¿tiquʼn in nok tqʼoʼn Jehová kyoklen erman o che tijen?

³ Nim kyoklen erman o che tijen toj twitz Jehová. Ojtzqiʼn qe tuʼn ex in nok tqʼoʼn toklen tbʼanel kymod. In tzalaj Jehová kyiʼj erman o che tijen aj kyonin kyiʼj kuʼxun tuʼn tok kynabʼil (Job 12:12; Prov. 1:1-4). Ax ikx, in nok tqʼoʼn kyoklen tuʼnju kukx in nikʼx kyuʼn (Mal. 3:16). Maske  o che ok weʼ twitz nimku nya bʼaʼn, kukx in nok tilil kyuʼn tuʼn kyajbʼen te Jehová. Mas o chʼiy qʼuqbʼil kykʼuʼj tiʼj ambʼil tzul twitzju tej tok kyojtzqiʼn axix tok. Kʼujlaʼn qe tuʼn Jehová tuʼnju kukx in che yolin tiʼj tbʼi maske o «che tijin» (kjawil uʼjit Salmo 92:12-15).

4. ¿Tiʼ jaku tzʼonin kyiʼj erman o che tijen?

⁴ Qa ya ma tijen teya, jaku tzʼok qeʼ tkʼuʼja tiʼj qa naʼnx taqʼunbʼena tuʼn Jehová (Heb. 6:10). In tzalaj tiʼja tuʼnju o tzʼonina tiʼj pakbʼabʼil. O tzʼok weʼya twitz junjun nya bʼaʼn ex o tzikʼx tuʼna. O kolina tiʼjju in tzaj tqʼamaʼn Tyol Dios, o japun junjun oklenj tuʼna ex o txi tyekʼina junjun aqʼuntl kye junjuntl erman. Ax ikx, o tzʼok tilil tuʼna tuʼn tok lepeʼya tiʼj ttnam Jehová. Nya oʼkxju, ax ikx o tzʼonina ex o txi tqʼuqbʼaʼna kykʼuʼj erman in che ajbʼen toj tkyaqil ambʼil te Jehová. Kʼujlaʼna tuʼn Jehová tuʼnju kukx in najbʼena te ex in tzaj ttziyen qa «mintiʼ in che kyaj tkolin qeju waʼlxix tuj kyokslabʼl» (Sal. 37:28). Ax ikx in tzaj ttziyen jlu teya: «Ok t-saqix kywiʼye, kukx tzyuʼn qeye wuʼne tuʼn tten kyipune» (Is. 46:4). Tuʼntzunju, miʼn kubʼ t-ximana qa ya mintiʼ toklena toj ttnam Jehová.

5. ¿Tiʼ bʼaʼn tuʼn ttzaj kynaʼn erman o che tijen?

⁵ Nim jaku che onin erman o che tijen toj ttnam Jehová. Maske ya mintiʼ kyipumal ik tzeʼn ojtxe, at nim kynabʼil. Kukx in che ajbʼen tuʼn Jehová toj junxichaq tten ik tzeʼn kʼelel qnikʼ tiʼj kyoj techel qo yolil tiʼj te ambʼil ojtxe ex te ambʼil jaʼlo.

6, 7. Qʼamantza junjun techel kyiʼj junjun tmajen Jehová otoq che tijen ex e tzaj kʼiwlaʼn tuʼnju kukx e ajbʼen te.

⁶ In yolin Tyol Dios kyiʼj junjun xjal kukx e ajbʼen te Jehová maske otoq che tijen. Kyxol qe jlu, ten Moisés. Qʼiʼntoq junlo 80 abʼqʼi tuʼn tej tok te profeta ex tej tkubʼ nej kywitz aj Israel. Juntl kyxol xjal lu, ten Daniel, aju qʼiʼntoq junlo 90 abʼqʼi tuʼn ex kukx ok qʼoʼn toklen te profeta. Ax ikx te apóstol Juan, bʼalo qʼiʼntoq mas te 90 abʼqʼi tuʼn tej tkubʼ ttzʼibʼin uʼj te Apocalipsis.

⁷ Ateʼ junjuntl tmajen Jehová mintiʼxix  ok ojtzqiʼn kywitz kyuʼn txqantl. Maske ikju, e ok ojtzqiʼn tuʼn Jehová ex tzaj tkʼiwlaʼn kye tuʼnju kukx e ajbʼen te. Jun techel, noq chʼin tqanil in tzaj tqʼoʼn Tyol Dios tiʼj Simeón, jun xinaq «tzʼaqlxix ex nimal Dios». Noqtzun tuʼnj, ojtzqiʼntoq tuʼn Jehová ex tzaj tqʼoʼn ambʼil te tuʼn tok tojtzqiʼn Jesús ex tuʼn t-xi tqʼamaʼn jun profecía tiʼj ex tiʼj ttxuʼ (Luc. 2:22, 25-35). Ax ikx qo ximen tiʼj profetisa Ana. Otoq kyim tchmil ex otoq japun twi 84 abʼqʼi, pero mintiʼ el «tpaʼn tibʼ Ana tiʼj tja Dios». Tuʼnju kukx ajbʼen Ana te Jehová, tzaj kʼiwlaʼn tuʼn ex tzaj tqʼoʼn ambʼil te tuʼn tok tkeʼyin Jesús tej kʼwalx. Tuʼn jlu, in nel qnikʼ tiʼj qa ok tqʼoʼn Jehová toklen Simeón ex Ana (Luc. 2:36-38).

8, 9. ¿Tiʼ aqʼuntl kukx in bʼant kyuʼn ermana o kyim kychmil?

⁸ Toj ambʼil jaʼlo, ateʼ nim erman o che tijen ex in kubʼ kyqʼoʼn jun tbʼanel techel kywitz kuʼxun. Qo yolin tiʼjju bʼaj tiʼj ermana Lois Didur. Tej qʼiʼntoq 21 abʼqʼi tuʼn, xi tzyet tuʼn tajbʼen te precursora especial toj tnam te Canadá. Tej tkubʼ mojeʼ tukʼil John, e ajbʼen nim ambʼil te ansyan in bʼet kyojele Ja te Chmabʼil. Yajxitl, e ajbʼen junlo 20 abʼqʼi toj Betel te Canadá. Tej qʼiʼntoq 58 abʼqʼi tuʼn ermana, tzaj qʼoʼn txokbʼil kyiʼj tuʼn kyxiʼ ajbʼel atz Ucrania. ¿Tiʼtoq tuʼn tbʼant kyuʼn? ¿Kubʼpe kyximen qa ya otoq che tijen tuʼn kyxiʼ ajbʼel toj juntl tnam? Mintiʼ, sino tzaj kykʼamoʼn txokbʼil ex xi qʼoʼn toklen John tuʼn tten toj Kʼloj ansyan toj Ninja qʼil twitz aqʼuntl. Tej tikʼ wuq abʼqʼi, kyim John. Maske ikju, kukx kyaj ten ermana toj toklen. Atzun jaʼlo, ya o japun Lois twi 81 abʼqʼi ex kukx in najbʼen te Jehová toj Betel te Ucrania ex kʼujlaʼn kyuʼn kykyaqil erman.

⁹ Bʼalo ateʼ junjun ermana mintiʼxix in nok qqʼoʼn qwitz tiʼj kyaqʼun ex mas aj tkyim kychmil, ik tzeʼn bʼaj tiʼj ermana Lois. Pero kukx in nok tqʼoʼn Jehová kyoklen tuʼnju e onin kyiʼj kychmil ex tuʼnju kukx in che ajbʼen te (1 Tim. 5:3). Ex jaku che onin ermana lu kyiʼj kuʼxun.

10. ¿Tiʼ xnaqʼtzbʼil jaku tzʼel qiʼn tiʼj techel in kubʼ tqʼoʼn Tony?

¹⁰ Ateʼ erman o che tijen, mintiʼ in bʼant tuʼn kyetz toj kyja ex il tiʼj tuʼn kyok xqʼuqit. Pero in che ok erman lu te jun tbʼanel oyaj. Atzun jlu bʼaj tiʼj jun ermano Tony tbʼi. Bautisarin tej qʼiʼntoq 20 abʼqʼi tuʼn toj tnam Pensilvania te Estados Unidos toj agosto te 1942. Tej tikʼ chʼintl ambʼil, ten kabʼe abʼqʼi tukʼil mij toj cárcel tuʼnju mintiʼ okx tqʼon tibʼ kyxol soldad. Onin Tony tukʼil Hilda, aju t-xuʼjil tuʼn t-xi kyyekʼin axix tok kye kabʼe kykʼwal.  Toj nimku ambʼil, ajbʼen Tony te qʼol kyaqʼun kʼloj ansyan kyoj oxe kʼloj okslal ex te ansyan nukʼul aqʼuntl toj nimaq chmabʼil te jun qʼij. Ax ikx, in qʼontoq xnaqʼtzbʼil toj jun cárcel ex onin tuʼn kyok chmabʼil. Jaʼlo ya qʼiʼn 98 abʼqʼi tuʼn ex kukx in nok tilil tuʼn tuʼn tajbʼen te Jehová ex tuʼn tonin tiʼj kʼloj okslal jatumel in nok tchmon tibʼ.

11. ¿Tiʼ jaku bʼant quʼn tuʼn tkubʼ qyekʼin qa in nok qqʼoʼn kyoklen erman mintiʼ in bʼant tuʼn kyetz toj kyja?

¹¹ ¿Tiʼ jaku bʼant quʼn tuʼn tkubʼ qyekʼin qa in nok qqʼoʼn kyoklen erman mintiʼ in bʼant tuʼn kyetz toj kyja? Qa jaku bʼant, bʼaʼn tuʼn kyonin ansyan kyiʼj tuʼn kypakbʼan ex tuʼn kyten kyoj chmabʼil moqa tuʼn tok kybʼiʼn. Ax ikx, jaku kubʼ qyekʼin qa in qo ximen kyiʼj aj qxiʼ visitaril kye moqa aj qyolin kyukʼil toj teléfono. Nim toklen tuʼn qximen kyiʼj erman lu, mas qeju najchaq in che anqʼin tiʼj kʼloj okslal. Tuʼntzunju, qo ximen tiʼj qa kukx in che tzaj qnaʼn qe erman lu. Bʼalo ateʼ junjun kwest in nela kye tuʼn ttzaj kyqʼamaʼn aju o tzikʼ toj kyanqʼibʼil. Pero tbʼanel qa ma txi qqanin kye aju o tzikʼ kyiʼj toj kyajbʼebʼil te Jehová ex tuʼn tok qbʼiʼn aju tzul kyqʼamaʼn qe.

12. ¿Tiʼ jaku kanet quʼn toj kʼloj okslal jatumel in nok qchmon qibʼ?

¹² Bʼalo jaku qo jaw labʼin aj tel qnikʼ tiʼj qa ateʼ erman o che tijen in kubʼ kyqʼoʼn jun tbʼanel techel jatumel in nok qchmon qibʼ tuʼnju kukx in che ajbʼen te Jehová. Ajbʼen jun ermana Harriette tbʼi toj nimku ambʼil toj kʼloj okslal te Nueva Jersey. Yajxitl, xiʼ ermana anqʼil tukʼil tal. Tej tpon toj juntl kʼloj okslal, el kypaʼn erman ambʼil tuʼn kyyolin tukʼil ex el kynikʼ tiʼj qa ok ermana ik tzeʼn jun tbʼanel oyaj. Yolin ermana kyiʼj tbʼanel ambʼil tiʼj pakbʼabʼil kyoj abʼqʼi 1920, aju ambʼil tej tel tnikʼ tiʼj axix tok. Toj ambʼil aju, tkyaqil maj in xi tiʼntoq ermana jun cepillo de diente aj tex pakbʼal. ¿Tiquʼn? Tuʼnju toj alkyexku ambʼil jakutoq txi qʼiʼn toj cárcel. Ex atzun jlu bʼaj tiʼj toj 1933, ten jun seman toj cárcel ex kabʼe maj bʼaj jlu tiʼj. Atzun tchmil nya tmajen Jehová, pero onin tiʼj tuʼn t-xqʼuqin kyiʼj oxe kykʼwal akux ten ermana toj cárcel. Jaku txi qqʼamaʼn qa nim toklen tuʼn tok qqʼoʼn kyoklen erman kukx in che ajbʼen te Jehová ik tzeʼn te ermana Harriette.

13. ¿Tiʼ jaku bʼant quʼn aj tel qnikʼ tiʼj kyoklen erman o che tijen at toj ttnam Jehová?

¹³ Nim kyoklen erman o che tijen toj ttnam Jehová. O tzʼok kykeʼyin tzeʼn in tzaj tkʼiwlaʼn Jehová ttnam ex tzeʼn o che tzaj kʼiwlaʼn tuʼn. Ax ikx, o tzʼel kyiʼn xnaqʼtzbʼil kyiʼj tiʼchaq o che el txalpaj tiʼj. Tuʼntzunju, bʼaʼn tuʼn qjyon qnabʼil kyukʼil tuʼnju at nim kyojtzqibʼil (Prov. 18:4). Qa ma tzʼel qpaʼn ambʼil tuʼn kyok qojtzqiʼn, jaku chʼiy qʼuqbʼil qkʼuʼj ex jaku tzʼel qnikʼ kyiʼj nim tiʼchaq.

14. ¿Alkye consej in tzaj tqʼoʼn Deuteronomio 32:7 kye kuʼxun?

¹⁴ Bʼaʼn tuʼn qjyon tumel tzeʼn tuʼn qyolin kyukʼil erman o che tijen (kjawil uʼjit Deuteronomio 32:7). Ax tok, bʼalo ya mintiʼxix in che keʼyin, mas chebʼe in che bʼet ex ya mintiʼxix in qbʼiʼn tqʼajqʼajel kywiʼ, pero kukx at jun tbʼanel kyanmi ex in tzalaj Jehová tiʼjju in bʼant kyuʼn (Ecl. 7:1). Bʼaʼn tuʼn ttzaj qnaʼn tiquʼn in nok tqʼoʼn Jehová kyoklen ex ax jlu tuʼn  tbʼant quʼn. Ex qkanoʼmil tiʼj Eliseo tuʼnju mintiʼ el tpan tibʼ tiʼj Elías. Oxe maj xi tqʼamaʼn jlu te: «Mlay kyaj nkolina tjunalxa» (2 Rey. 2:2, 4, 6).

15. ¿Tiʼ jaku txi qqanin kye erman o che tijen?

¹⁵ In kubʼ qyekʼin qa in qo ximen kyiʼj erman o che tijen aj tten qnabʼil aj t-xi qqanin xjel kye (Prov. 1:5; 20:5). Jun techel, jaku txi qqanin jlu kye: «Tej kuʼxun teya, ¿tiʼ onin tiʼja tuʼn tel tnikʼa tiʼj qa otoq kanet axix tok tuʼna? ¿Tiʼ o tzʼonin tiʼja tuʼn kukx tok laqʼeʼya ttxlaj Jehová? ¿Ex tiʼ o tzʼonin tiʼja tuʼn kukx ttzalaja toj tajbʼebʼila te Jehová?» (1 Tim. 6:6-8). Aj ttzaj kyqʼoʼn jun tzaqʼwebʼil qe, bʼaʼn tuʼn tok qqʼoʼn qwiʼ tiʼjju tzul kyqʼamaʼn.

16. Aj tyolin jun kuʼxun tukʼil jun erman ma tijen, ¿tiquʼn in xi qqʼamaʼn qa kykabʼil in bʼaj kyonin kyibʼ?

¹⁶ Aj tyolin jun kuʼxun tukʼil jun erman ma tijen, kykabʼil in bʼaj kyonin kyibʼ (Rom. 1:12). Kʼokel qeʼ tkʼuʼj kuʼxun tiʼj qa ax tok in xqʼuqin Jehová kyiʼj tmajen kukx in che ajbʼen te, atzunte erman otoq tijen, kbʼel tnaʼn qa kʼujlaʼn kyuʼn txqantl ex ktzalajel aj tyolin tiʼj tzeʼn o tzʼonin Jehová tiʼj.

17. ¿Tiquʼn in xi qqʼamaʼn qa mas tbʼanel in che ok tmajen Jehová o che tijen aj kyikʼ junjun abʼqʼi?

¹⁷ Qa tbʼanel keʼyin jun xjal toj tkuʼxumal, in chʼexpaj aj tbʼet ambʼil. Pero aj tikʼ junjun abʼqʼi, mas tbʼanel che keʼyin tmajen Jehová toj twitz (1 Tes. 1:2, 3). ¿Tiquʼn? Tuʼnju kukx in che ajbʼen te, kukx in xi kyqʼoʼn ambʼil te tuʼn tchʼexpaj kyanqʼibʼil ex tuʼn tten tbʼanel kymod. Qa ma tzʼok tilil quʼn tuʼn tok qojtzqiʼn qe erman o che tijen ex qa ma tzʼel qkanoʼn kyiʼj, mas kʼokel qeʼ qkʼuʼj tiʼj qa in che ok te jun tbʼanel oyaj tuʼn Jehová.

18. ¿Tiʼ kʼelel qnikʼ tiʼj toj juntl xnaqʼtzbʼil?

¹⁸ Aj tok kyqʼoʼn kuʼxun kyoklen erman o che tijen, nya oʼkx jlu in nonin tiʼj kʼloj okslal, sino ax ikx in nonin aj tok kyqʼoʼn erman o che tijen kyoklen kuʼxun. Toj juntl xnaqʼtzbʼil, kʼelel qnikʼ tiʼj tzeʼn jaku kubʼ kyyekʼin erman o che tijen qa in nok kyqʼoʼn kyoklen kuʼxun.