1. ¿Tiquʼn kwest tuʼn tok qeʼ kykʼuʼj xjal kyiʼj txqantl?

 TJAQʼ tkawbʼil Satanás, mintiʼ ojtzqiʼn kyuʼn xjal alqiʼj jaku tzʼok qeʼ kykʼuʼj. Kukx in tzaj kybʼis kyuʼn empresa, kyuʼn político ex kyuʼn nejenel kye okslabʼil. Axpe ikx in kubʼ kyximen qa in tzaj kybʼis kyuʼn kyamiw, kyuʼn kyvesin ex kyuʼn toj kyja. Pero mintiʼ tuʼn qjaw labʼin tiʼj jlu tuʼnju in tzaj tqʼamaʼn Tyol Dios qa «tuj mankbʼil tqʼijlalil» mlay che nimen xjal te Dios, simel yol qe ex in che ok meltzʼaj tiʼj kyukʼil. Toj juntl yol, in kubʼ kyyekʼin tmod Tajaw il, aju mlayx tzʼok qeʼ qkʼuʼj tiʼj (2 Tim. 3:1-4; 2 Cor. 4:4).

2. a) ¿Alqiʼj kukx jaku tzʼok qeʼ qkʼuʼj? b) ¿Tiʼ jaku kubʼ t-xjelin jun erman?

² Atzun kye axix tok okslal jaku tzʼok qeʼ kykʼuʼj tiʼj Jehová (Jer. 17:7, 8). Qʼuqli qkʼuʼj tiʼj qa kʼujlaʼn qoʼ tuʼn ex qa mlay che kyaj tkolin qe tamiw (Sal. 9:10). Ax ikx, jaku tzʼok qeʼ qkʼuʼj tiʼj Jesús tuʼnju xi tqʼoʼn tchwinqlal tuʼn qklet (1 Ped. 3:18, ). Ex o tzʼel qnikʼ tiʼj qa jaku tzʼok qeʼ qkʼuʼj kyiʼj nabʼil ateʼ toj Tyol Dios (2 Tim. 3:16, 17). Ojtzqiʼn quʼn qa jaku tzʼok qeʼ qkʼuʼj tiʼj Jehová, tiʼj Jesús ex tiʼj Biblia. Pero jakulo kubʼ t-xjelin jun erman: «¿Kukxpe jaku tzʼok qeʼ qkʼuʼj kyiʼj erman toj congregación?». Kukx, ex qo xnaqʼtzan tiʼj tiquʼn in xi qqʼamaʼn jlu.

3. ¿Tiʼ qoklen at? (Marcos 10:29, 30).

³ O tzaj tqʼoʼn Jehová ambʼil qe tuʼn qajbʼen te junx kyukʼil tmajen. Tuʼn jlu, in tzaj qkʼamoʼn nim kʼiwlabʼil (kjawil uʼjit Marcos 10:29, 30). Twitz tkyaqil Txʼotxʼ, ateʼ erman kʼujlaʼn Jehová kyuʼn ik tzeʼn qe ex in nok tilil kyuʼn tuʼn t-xi kynimen qe tkawbʼil. Bʼalo junxitl qyol, qkostumbr ex qxbʼalun, pero kubʼ qyekʼin qkʼujlabʼil kyiʼj tej kyok qojtzqiʼn. Ex aju mas nim toklen, qgan tuʼn qajbʼen junx te Jehová kyukʼil (Sal. 133:1).

4. ¿Tiquʼn nim kyoklen erman?

⁴ Toj ambʼil jaʼlo, mas nim toklen tuʼn qten junx. At maj, in che onin erman qiʼj tuʼn qex kywitz nya bʼaʼn (Rom. 15:1; Gál. 6:2). Ax ikx, in che onin qiʼj tuʼn qajbʼen te Jehová ex tuʼn qten kyuw toj qokslabʼil (1 Tes. 5:11; Heb. 10:23-25). Bʼisbʼajil noqwit mintiʼ in che onin erman qiʼj tuʼn tkubʼ tiʼj Satanás quʼn ex tkyaqilju tokx tjaqʼ tkawbʼil. Toj chʼintl ambʼil, kʼokel tzaqpaj Satanás ex qe in che onin tiʼj kyiʼj tmajen Jehová. Toj ambʼil aju, kxel qqʼoʼn nimxix chjonte te Jehová tuʼnju o che tzaj tqʼoʼn erman tuʼn kyonin qiʼj.

5. ¿Tiquʼn kwest tuʼn tok qeʼ kykʼuʼj junjun kyiʼj erman?

⁵ Noqtzun tuʼnj, ateʼ junjun erman kwest tuʼn tok qeʼ kykʼuʼj kyiʼj txqantl erman. ¿Tiquʼn? Tuʼnju xilo kyqʼamaʼn jun tiʼ te jun erman, pero yajxitl xi tqʼamaʼn kye txqantl. Moqa xi ttziyen jun erman jun tiʼ kye, pero mintiʼ japun twi tyol. Ax ikx, xilo tqʼamaʼn jun erman jun tiʼ kye moqa kubʼ tbʼinchaʼn jun tiʼ aju tzaj kybʼis tuʼn. Qa ikju, ¿tiʼ jaku tzʼonin qiʼj tuʼn tok qeʼ mas qkʼuʼj kyiʼj erman?

6. ¿Tzeʼn in nonin kʼujlabʼil qiʼj tuʼn tok qeʼ mas qkʼuʼj kyiʼj erman? (1 Corintios 13:4-8).

⁶ Jaku tzʼok qeʼ qkʼuʼj kyiʼj txqantl qa kʼujlaʼn qe quʼn. In yolin capítulo 13 te 1 Corintios kyiʼj junjun tiʼchaq in bʼant tuʼn jun xjal at tkʼujlabʼil ex jaku che onin tiʼj tuʼn tok qeʼ tkʼuʼj kyiʼj txqantl, axpe ikx qa o tzaj tbʼis kyuʼn (kjawil uʼjit 1 Corintios 13:4-8). Jun techel, in tzaj tqʼamaʼn versículo 4 jlu: «Aju xjal at tkʼujlalil at tpasens ex in tzʼeʼy tkʼuʼj tiʼj tukʼil». Kukx in ten tpasens Jehová qiʼj, axpe ikx aj qel txalpaj. Tuʼntzunju, ax ikx qe, bʼaʼn tuʼn tten qpasens kyiʼj erman aj tkubʼ kybʼinchaʼn jun tiʼ moqa aj ttzaj kyqʼamaʼn jun tiʼ aju in tzaj qbʼis tuʼn. In tzaj tqʼamaʼntl versículo 5 jlu: «Mya txʼuʼj twiʼ, ex mintiʼ in xi tkʼuʼn qʼoj». Toj juntl yol, mintiʼ tuʼn t-xi qiʼn tajlal tkyaqil nya bʼaʼn in nok kybʼinchaʼn erman qiʼj. In tzaj tqʼamaʼn Eclesiastés 7:9 qa mintiʼ tuʼn ttzaj naj qqʼoj, sino mas bʼaʼn tuʼn t-xi qbʼiʼn consej tkuʼx toj Efesios 4:26: «Miʼn txi kykʼuʼne qʼoj okxi tex qʼij».

7. ¿Tzeʼn in che onin nabʼil tkuʼx toj Mateo 7:1 a 5 qiʼj tuʼn tok qeʼ mas qkʼuʼj kyiʼj erman?

⁷ Ax ikx jaku tzʼok qeʼ qkʼuʼj kyiʼj erman qa ma ten qximbʼetz kyiʼj ik tzeʼn te Jehová. Kʼujlaʼn qe erman tuʼn Jehová ex mintiʼ in xi tiʼn tajlal kyil. Ax jlu tuʼn tbʼant quʼn (Sal. 130:3). Mas bʼaʼn tuʼn tok qqʼoʼn qwitz kyiʼj tbʼanel kymod ex tiʼjju jaku bʼant kyuʼn twitzju tuʼn tok qqʼoʼn qwitz tiʼj kypaltil (kjawil uʼjit Mateo 7:1-5). In nok qeʼ qkʼuʼj kyiʼj erman tuʼnju tkyaqil niman tuʼn kʼujlabʼil (1 Cor. 13:7). Pero mintiʼ in yolin jlu tiʼj qa taj Jehová tuʼn tok qeʼ qkʼuʼj kyiʼj txqantl noq tuʼnju in tzaj tqanin qe, sino il tiʼj tuʼn tkubʼ kyyekʼin qa jaku tzʼok qeʼ qkʼuʼj kyiʼj. *

8. ¿Tiʼ jaku tzʼonin tiʼja tuʼn tok qeʼ mas tkʼuʼja kyiʼj txqantl?

⁸ In xi tiʼn ambʼil tuʼn tok qeʼ qkʼuʼj kyiʼj txqantl. ¿Tiʼtzun jaku bʼant tuʼna tuʼn tok qeʼ mas tkʼuʼja kyiʼj txqantl? Bʼaʼn tuʼn kyok tojtzqiʼna. Yolina kyukʼil kyoj chmabʼil ex pakbʼana junx kyukʼil. Tenx tpasensa kyiʼj ex qʼonxa ambʼil kye tuʼn tkubʼ kyyekʼin qa jaku tzʼok qeʼ tkʼuʼja kyiʼj. Qa mintiʼ ojtzqiʼn jun erman tuʼna, mlaylo yolina tukʼil kyiʼj junjun tiʼchaq in bʼaj toj tanqʼibʼila. Pero aj tok tojtzqiʼna, jakulo kubʼ tnaʼna bʼaʼn ex jakulo t-xi tqʼamaʼna junjun tiʼchaq te (Luc. 16:10). Yajtzun qa o tzaj tbʼisa tuʼn jun erman, ¿tiʼ jaku bʼant tuʼna? Miʼn t-xi tnajsaʼna tamiwbʼila tukʼil, sino qʼonkja tuʼn tikʼ ambʼil. Ax ikx, miʼn txi tqʼoʼna ambʼil te jlu tuʼn miʼn tok qeʼ tkʼuʼja kyiʼj txqantl. Jun tiʼ jaku tzʼonin tiʼja aju qa ma xnaqʼtzana kyiʼj tmajen Jehová aʼyeju kukx ok qeʼ kykʼuʼj kyiʼj txqantl maske at maj tzaj kybʼis kyuʼn.

9. a) Maske kubʼ kybʼinchaʼn nejenel nya bʼaʼn toj twitz Jehová toj tqʼijlalil Ana, ¿tiʼ bʼant tuʼn? b) ¿Tiʼ xnaqʼtzbʼil jaku tzʼel tiʼna tiʼj Ana? (Qʼonka twitza tiʼj dibujo).

⁹ ¿Ope tzaj tbʼisa tuʼn jun erman at jun toklen? Qa ikju, bʼaʼn tuʼn t-ximana tiʼjju bʼaj tiʼj Ana. Toj tqʼijlalil Ana, atoq Elí tnejel pal ex atoq in kubʼ nej kywitz xjal tuʼn kykʼulin te Jehová, pero mintiʼ kubʼ  kyqʼoʼn toj tja jun tbʼanel techel. In che ajbʼentoq tkʼwal te pal ex in che yaẍintoq kyukʼil nimku xuʼj, pero mintiʼ i ex kawin tuʼn Elí. Maske ikju, mintiʼ el tiʼn Jehová toklen Elí te tnejel pal. ¿Tiʼtzun bʼant tuʼn Ana? Maske kukx ajbʼen Elí te pal, mintiʼ kyaj tkolin tuʼn t-xiʼ kʼulil te Jehová toj tabernáculo. Tej t-xi tqʼamaʼn Ana tbʼis tkʼuʼj te Jehová, kubʼ t-ximen Elí qa otoq t-xi tkʼaʼn nim qʼeʼn, axpe ikx nya toj tumel xi yolin te (1 Sam. 1:12-16). Maske ikju, xi tqʼamaʼn Ana te Jehová qa matoq tzaj tqʼoʼn jun tal, kxeltoq tqʼoʼn tuʼn tajbʼen toj tabernáculo jatumel kʼokel xqʼuqin tuʼn Elí (1 Sam. 1:11). ¿Iltoqpe tiʼj tuʼn kyxi kawin tkʼwal Elí? Iltoq tiʼj, ex bʼant jlu tuʼn Jehová toj ambʼil mas bʼaʼn toj twitz (1 Sam. 4:17). Akux in pon ambʼil lu, tzaj tqʼoʼn Jehová jun tal Ana aju ok tqʼoʼn tbʼi te Samuel (1 Sam. 1:17-20).

10. ¿Tzeʼn kubʼ tyekʼin David qa ok qeʼ tkʼuʼj kyiʼj txqantl maske kyaj kolin kyuʼn junjun tamiw?

¹⁰ ¿Ope tzaj tbʼisa tuʼn jun tamiwa? Qa ikju, bʼaʼn tuʼn t-ximana tiʼj aj kawil David. Tej tok tilil tuʼn Absalón tuʼn tel tiʼn tkawbʼil, kyaj kolin tuʼn Ahitofel, jun kyxol qe tamiw. Tzajlo nim tbʼis David tej tok meltzʼaj tkʼwal tiʼj ex tej tkyaj kolin tuʼn Ahitofel, pero nya a t-xilen jlu qa ya mintiʼ ok qeʼ tkʼuʼj David kyiʼj txqantl. Kukx ok qeʼ tkʼuʼj tiʼj Husái, jun kyxol qe tamiw mintiʼ kyaj tkolin te. Ex mintiʼ tzaj tbʼis tuʼn Husái tuʼnju kukx onin tiʼj maske jakutoq tzaj nya bʼaʼn tiʼj (2 Sam. 17:1-16).

11. ¿Tzeʼn kubʼ tyekʼin jun tmajen Nabal qa ok qeʼ tkʼuʼj kyiʼj txqantl?

¹¹ Atzun jaʼlo, qo ximen tiʼj techel kyaj tqʼoʼn jun tmajen Nabal, jun xjal te Israel ten nim tqʼinumabʼil. Kubʼ tyekʼin David ex qe t-xjal tbʼanel tmod kyukʼil tmajen Nabal ex e xqʼuqin kyiʼj. Tej tikʼ ambʼil, xi tqanin David chʼin twa te Nabal. Tuʼnju mintiʼ bʼant jlu tuʼn, tzaj tqʼoj David ex kubʼ t-ximen tuʼn tkubʼ tbʼyoʼn tkyaqil xjal toj tja Nabal. Jun kyxol qe tmajen Nabal, xi tqʼamaʼn te a Abigaíl aju otoq bʼaj.  Ojtzqiʼntoq tuʼn qa jakutoq che klet tuʼn. Tuʼntzunju, ok qeʼ tkʼuʼj tiʼj Abigaíl qa kxeltoq tbʼinchaʼn tiʼj nya bʼaʼn tuʼnju attoq nim tnabʼil. Ex mintiʼ tzaj tbʼis tuʼnju ten tipumal Abigaíl ex kubʼ tkʼuʼj David tuʼn tuʼn miʼn tkubʼ tbʼyoʼn qe xjal toj tja Nabal (1 Sam. 25:2-35). Atzunte Abigaíl, ok qeʼ tkʼuʼj tiʼj qa kbʼeltoq tnajsaʼn David kyil.

12. ¿Tzeʼn kubʼ tyekʼin Jesús qa ok qeʼ tkʼuʼj kyiʼj t-xnaqʼtzbʼen maske i el txalpaj?

¹² Ok qeʼ tkʼuʼj Jesús kyiʼj t-xnaqʼtzbʼen maske i el txalpaj (Juan 15:15, 16). Tej t-xi tqanin Santiago ex Juan tuʼn ttzaj qʼoʼn jun kyoklen toj tkawbʼil Dios, mintiʼ xi tqʼamaʼn Jesús kye qa noqx gan in che ajbʼen te Jehová nix xi tqʼamaʼn kye qa mlaytoq che ok te t-xnaqʼtzbʼen (Mar. 10:35-40). Toj qonikʼen tej ttzyet Jesús kyuʼn xjal, kyaj kolin kyuʼn t-xnaqʼtzbʼen (Mat. 26:56). Pero kukx ok qeʼ tkʼuʼj Jesús kyiʼj, maske ojtzqiʼntoq kypaltil tuʼn, «xi tyekʼun tkʼujlalil nimxix kye» (Juan 13:1). Ex tej otoqxi jaw anqʼin, xi tqʼoʼn kyoklen 11 t-xnaqʼtzbʼen tuʼn kykubʼ nej twitz pakbʼabʼil ex tuʼn kyxqʼuqin kyiʼj t-ẍneʼl (Mat. 28:19, 20; Juan 21:15-17). Mintiʼ tzaj tbʼis Jesús kyuʼn t-xnaqʼtzbʼen maske aj il qe. Kukx e ajbʼen te Jehová tzmaxi tej kykyim. Ik tzeʼn ma tzʼel qnikʼ tiʼj, ok qeʼ tkʼuʼj Ana, David, aju tmajen Nabal, Abigaíl ex Jesús kyiʼj xjal aj il. Aju tbʼanel techel kyaj kyqʼoʼn, in nonin qiʼj tuʼn tok qeʼ qkʼuʼj kyiʼj txqantl.

13. ¿Tiquʼn at maj kwest tuʼn tok qeʼ qkʼuʼj kyiʼj txqantl?

¹³ ¿Ope t-xi qqʼamaʼn jun tiʼ te jun erman ex yajxitl xi tqʼamaʼn kye txqantl? Qa ikju, kubʼlo qnaʼn nim bʼis. Jun maj, xi tqʼamaʼn jun ermana jun tiʼ ikʼ toj tanqʼibʼil te jun ansyan. Toj juntl qʼij, pon llamarin t-xuʼjil ansyan tiʼj tuʼn t-xi tqʼuqbʼaʼn tkʼuʼj. Tuʼn jlu, ya mintiʼ ok qeʼ tkʼuʼj ermana tiʼj ansyan otoq yolin tukʼil. Pero bʼant jun tiʼ tbʼanel tuʼn ermana. Xi tqanin onbʼil te juntl ansyan ex onin tiʼj tuʼn tok qeʼ tkʼuʼj juntl maj kyiʼj ansyan.

14. ¿Tiʼ onin tiʼj jun ermano tuʼn tok qeʼ tkʼuʼj juntl maj kyiʼj kabʼe ansyan?

¹⁴ Toj nimku ambʼil, tzaj tqʼoj jun ermano kyiʼj kabʼe ansyan ex kubʼ t-ximen qa mlayx tzʼok qeʼ tkʼuʼj kyiʼj. Pero tzaj tnaʼn tyol jun ermano in noktoq tqʼoʼn toklen. Tqʼama ermano jlu: «A Satanás aj qʼoj qiʼj ex nya qe erman». Ximen ermano kyiʼj yol lu ex naʼn Dios. Tej tikʼ ambʼil, ok qeʼ tkʼuʼj juntl maj ermano kyiʼj kabʼe ansyan.

15. ¿Tiquʼn at maj kwest tuʼn tok qeʼ qkʼuʼj juntl maj kyiʼj txqantl? Yolina tiʼjju bʼaj tiʼj Grete.

¹⁵ ¿Ope tzʼel qʼiʼn jun toklena toj congregación? Qa ikju, tzajlo nim tbʼisa tuʼn. Qo xnaqʼtzan tiʼjju bʼaj tiʼj Grete tukʼil ttxuʼ, kabʼe ermana kukx e ajbʼen te Jehová kyoj abʼqʼi 1930. In che anqʼintoq toj tnam Alemania jatumel otoq tzʼel qʼiʼn ambʼil kye erman tuʼn kyajbʼen te Jehová kyuʼn nazi. Otoq txi qʼoʼn oklenj te Grete tuʼn tkubʼ tbʼinchaʼn junjun copia tiʼj uʼj Aju Xqʼuqil tuʼntzun t-xi qʼoʼn kye erman. Pero yajxitl, ok kybʼiʼn erman qa in neltoq tikʼen tman Grete qe testigo de Jehová. Kubʼ kyximen erman qa jakutoq tzaj nya bʼaʼn tiʼj congregación tuʼn jlu. Tuʼntzunju, el kyiʼn toklen Grete, pero nya oʼkx nya bʼaʼn lu ok weʼ twitz. Tej tok Tkabʼ Nimaq Qʼoj twitz Tkyaqil Txʼotxʼ,  mintiʼ xi qʼoʼn kyuʼj Grete tukʼil ttxuʼ ex mintiʼ e xi qʼolbʼen erman kye tej kyok kykeʼyin. Tzaj nim tbʼis Grete tuʼnju mintiʼ ok qeʼ kykʼuʼj erman tiʼj ex xi tiʼn ambʼil tuʼn tkubʼ tnajsaʼn kyil ex tuʼn tok qeʼ tkʼuʼj juntl maj kyiʼj. Tej tikʼ ambʼil, el tnikʼ Grete tiʼj qa otoq kubʼ tnajsaʼn Jehová kyil erman. Tuʼntzunju, kubʼ t-ximen qa iltoq tiʼj tuʼn tkubʼ tnajsaʼn kyil. *

16. ¿Tiquʼn il tiʼj tuʼn tok tilil quʼn tuʼn tok qeʼ qkʼuʼj kyiʼj txqantl?

¹⁶ Qa o tzʼok weʼya twitz jun nya bʼaʼn ik tzeʼn qeju ma qo yolin tiʼj, bʼaʼn tuʼn tok tilil tuʼna tuʼn tok qeʼ tkʼuʼja juntl maj kyiʼj erman. Oklo kxel tiʼn ambʼil, pero nya noqx gan aju kbʼantel tuʼna. Qo ximen tiʼj jun techel. Qa ma tzaj choʼn tkʼuʼja tuʼn jun wabʼj, maslo kʼokel t-xqʼuqina aju in xi twaʼna, pero nya t-xilen jlu qa kjel ttzaqpiʼna tuʼn twaʼna. Chʼixmi ax jlu tuʼn tbʼant quʼn qa ma tzaj qbʼis tuʼn jun erman, kʼokel tilil quʼn tuʼn tok qeʼ qkʼuʼj kyiʼj txqantl maske aj il qe. Qa ma tzʼok qeʼ qkʼuʼj juntl maj kyiʼj, qo tzalajel ex kʼokel qqʼoʼn qwiʼ tiʼjju jaku bʼant quʼn tuʼn qonin tuʼn tok qeʼ kykʼuʼj erman kyiʼj.

17. a) ¿Tiquʼn nim toklen tuʼn tok qeʼ qkʼuʼj kyiʼj txqantl? b) ¿Tiʼ kʼelel qnikʼ toj juntl xnaqʼtzbʼil?

¹⁷ Tjaqʼ tkawbʼil Satanás, kwest tuʼn tok qeʼ kykʼuʼj xjal kyiʼj txqantl. Atzun qe, in nok qeʼ qkʼuʼj kyiʼj erman tuʼnju kʼujlaʼn qe quʼn ex kʼujlaʼn qoʼ kyuʼn. Tuʼn jlu, in qo tzalaj ex at mujbʼabʼil qxol ex kʼonil qiʼj aj qok weʼ kywitz nya bʼaʼn toj ambʼil tzul. ¿Yajtzun qa o tzaj qbʼis tuʼn jun erman? ¿Tiʼ jaku bʼant quʼn tuʼn tok qeʼ qkʼuʼj juntl maj tiʼj? Bʼaʼn tuʼn tten qximbʼetz ik tzeʼn te Jehová, tuʼn t-xi qbʼiʼn qe nabʼil tkuʼx toj Tyol, tuʼn tok qkʼujlaʼn qe erman ex tuʼn qximen kyiʼj techel tkuʼx toj Tyol Dios. Qa ma bʼant jlu quʼn, ok che tel qamiw ik tzeʼn in tzaj tqʼamaʼn Proverbios 18:24: «At junjun tamiw xjal mas mojl kykʼujlalil tukʼil twitz tkʼujlalil jun terman». Pero nya oʼkx tuʼn tok qeʼ qkʼuʼj kyiʼj txqantl, sino il tiʼj tuʼn tkubʼ qyekʼin qa jaku tzʼok qeʼ kykʼuʼj qiʼj. Toj juntl xnaqʼtzbʼil, kʼelel qnikʼ tiʼj tzeʼn jaku tzʼok qeʼ kykʼuʼj txqantl qiʼj.