XNAQʼTZBʼIL 40
Kxel qʼet xnaqʼtzbʼil «kye xjal tuʼn kyok te tzʼaqlxix»
«Aqeju in che xnaqʼtzan kye xjal tuʼn kyok te tzʼaqlxix che qoptzʼajel ik tzaʼn qe cheʼw twitz kyaʼj tuj tkyaqil tabʼqʼiyil te jumajx» (DAN. 12:3).
BʼITZ 151 Che tzajel ttxkoʼn Jehová
AJU KʼELEL QNIKʼ TIʼJ *
1. ¿Tiʼ kbʼajel aj Tkawin Jesús toj Mil Abʼqʼi?
¿OPE ximana tiʼj jniʼ tzalajbʼil kbʼel qnaʼn aj kyjaw anqʼin kyimni tzalu twitz Txʼotxʼ aj Tkawin Jesús toj Mil Abʼqʼi? Qa o kyim jun xjal kʼujlaʼn quʼn, qaj tuʼn tok qkeʼyin juntl maj ex ax jlu taj Jehová (Job 14:15). Noqpe qo ximen tiʼj jniʼ tzalajbʼil kbʼel kynaʼn nim xjal aj tok kykeʼyin kyfamiliar. Ik tzeʼn el qnikʼ tiʼj toj xnaqʼtzbʼil ma kyaj, o kux tzʼibʼin kybʼi xjal «tzʼaqlxix» toj libro te chwinqlal ex «che jawil anqʼin tuʼn tten kychwinqlal» (Hech. 24:15; Juan 5:29, TNM). Bʼalo che tel qfamiliar kyxol tnejel xjal che kjawil anqʼin tzalu twitz Txʼotxʼ. * Atzun qeju «mya tzʼaqlxix», toj juntl yol, aqeju mintiʼ el kynikʼ tiʼj Jehová ex mintiʼ e ajbʼen te, «che kjawil anqʼin tuʼn kyok toj juicio».
2, 3. a) Ik tzeʼn in tzaj qʼamaʼn toj Isaías 11:9 ex 10, ¿tiquʼn kxel qʼoʼn xnaqʼtzbʼil kye kykyaqil xjal toj ambʼil tzul? b) ¿Tiʼ kʼelel qnikʼ tiʼj toj xnaqʼtzbʼil lu?
2 Kykyaqil qeju che kjawil anqʼin, kxel qʼoʼn nim xnaqʼtzbʼil kye (Is. 26:9; 61:11). Tuʼntzunju, kxel qʼet xnaqʼtzbʼil kye xjal twitz tkyaqil Txʼotxʼ (kjawil uʼjit Isaías 11:9, 10). Aqeju nya tzʼaqlixix che kjawil anqʼin, kxel qʼet xnaqʼtzbʼil kye tuʼn tel kynikʼ tiʼj Jesús, tiʼj Tkawbʼil Dios, tiʼj chojbʼil, tiʼj tbʼi Jehová ex tiʼj toklen tuʼn tkawin. Atzun kye tzʼaqlixix, kxel qʼoʼn akʼaj xnaqʼtzbʼil kye tiʼj t-ximbʼetz Jehová at tiʼj Txʼotxʼ. Ateʼ junjun tmajen Jehová, e kyim tej naʼmxtoq tkubʼaj tuʼn tkubʼ tzʼibʼit Biblia. Tuʼn jlu, in nel qnikʼ tiʼj qa at nim xnaqʼtzbʼil kxel qʼet kye qeju tzʼaqlixix ex kye qeju nya tzʼaqlixix.
3 Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu: ¿Alkye tten kxel qʼet xnaqʼtzbʼil kye xjal? ¿Tiʼ kbʼajel kyiʼj qeju kxel kykʼamoʼn xnaqʼtzbʼil? ¿Ex tiʼ kbʼajel kyiʼj qeju mlay txi kykʼamoʼn? Tbʼanel qa ma qo ximen tiʼj tzaqʼwebʼil kyiʼj xjel lu. Ik tzeʼn kʼelel qnikʼ tiʼj, che onil junjun profecía ateʼ toj uʼj te Daniel ex Apocalipsis qiʼj tuʼn tel qnikʼ tiʼj tiʼ kbʼajel aj kyjaw anqʼin kyimni. Tnejel, qo xnaqʼtzan tiʼj tbʼanel profecía in tzaj qʼamaʼn toj Daniel 12:1 ex 2.
«NIMKU XJAL OTOQ CHE KYIM CHE JAWIL ANQʼIN»
4, 5. ¿Tiʼ in tzaj tqʼamaʼn Daniel 12:1 tiʼjju kbʼajel toj bʼajsbʼil tqʼijlalil?
4 (Kjawil uʼjit Daniel 12:1). In tzaj tqʼamaʼn uʼj te Daniel tzeʼn che kbʼajel junjun tiʼchaq toj bʼajsbʼil tqʼijlalil. Jun techel, in tzaj tqʼamaʼn Daniel 12:1 qa «in kolin» Miguel moqa Jesucristo tiʼj ttnam Dios. Xi tzyet tuʼn tjapun twi profecía lu toj 1914 tej t-xi qʼoʼn toklen Jesús te aj Kawil toj Tkawbʼil Dios.
5 Ax ikx, tzaj qʼamaʼn te Daniel qa kjawil weʼ Jesús toj jun ambʼil «te nim kʼixkʼoj ex bʼis, naʼnx tbʼaj jun maj ikju atxix tej kykubʼ xeʼt qe nasyon». Aju ambʼil te kʼixkʼoj lu, atzun «kʼixbʼisabʼl maʼxix» in yolin Mateo 24:21 tiʼj. Kjawil weʼ Jesús moqa kkolil tiʼj ttnam Dios aj tkubʼaj ambʼil te nim kʼixbʼisabʼil, toj juntl yol, toj Armagedón. Aju ttnam Dios lu, ax ikx in nok tqʼoʼn uʼj te Apocalipsis tbʼi te «nimxix kyajlal xjal» in che etz «tuj nimxix yajbʼil» (Apoc. 7:9, 14).
6. ¿Tiʼ kbʼajel otoqxi che kyaj anqʼin nimxix kyajlal xjal ex tiquʼn in xi qqʼamaʼn jlu? (Ax ikx qʼonka twitza tiʼj xnaqʼtzbʼil «Kyxjel qeju in che uʼjin» tkuʼx toj revista lu ex in yolin kyiʼj qeju che kjawil anqʼin tzalu twitz Txʼotxʼ).
6 (Kjawil uʼjit Daniel 12:2). ¿Tiʼ kbʼajel otoqxi che kyaj anqʼin nimxix kyajlal xjal toj ambʼil te nim kʼixkʼoj ex bʼis? In yolin profecía tiʼj qa che kjawil anqʼin kyimni. Ojtxe, kubʼ qximen qa in yolin Daniel 12:2 kyiʼj qeju che kjawil anqʼin toj kyaʼj. Ax ikx, kubʼ qximen qa atztoq in yolin tiʼj ambʼil tej tchʼiy ttnam Jehová nqayin tiʼj 1918 tej otoqxi tzikʼ ambʼil jatumel chʼixmi weʼ pakbʼabʼil kyuʼn aj qʼoj. * Pero jaʼlo, in nel qnikʼ tiʼj qa atz in yolin tiʼj ambʼil aj kyjaw anqʼin kyimni toj akʼaj twitz Txʼotxʼ. Kbʼajel jlu otoqxi tzikʼ bʼajsbʼil tqʼijlalil ex Armagedón.
7. a) ¿Tiʼ kyxilen yol che kjawil anqʼin «tuʼn tten kychwinqlal te jumajx»? b) ¿Tiquʼn mas tbʼanel aj kyjaw anqʼin xjal toj ambʼil tzul?
7 Atzun jaʼlo, qo yolin kyiʼj yol tkuʼx toj Daniel 12:2. Toj versículo lu, in tzaj qʼamaʼn qa che kjawil anqʼin junjun xjal «tuʼn tten kychwinqlal te jumajx». ¿Tiʼ kyxilen yol lu? A kyxilen qa kykyaqil qeju kukx ma tzʼok tilil kyuʼn tuʼn tel kynikʼ tiʼj Jehová toj mil abʼqʼi ex qa kukx ma che nimen te ex te Jesús, tzul qʼoʼn kychwinqlal te jumajx (Juan 17:3). Mas tbʼanel aj kyjaw anqʼin kyimni lu kywitz qeju e jaw anqʼin toj ambʼil ojtxe (Heb. 11:35). ¿Tiquʼn? Tuʼnju kykyaqil qeju e jaw anqʼin ojtxe e kyim juntl maj.
8. ¿Tiʼ kbʼajel kyiʼj qeju che kjawil anqʼin tuʼn tkubʼ qʼoʼn «kychʼixwi ex che elel ikʼun te jumajx»?
8 Noqtzun tuʼnj, nya kykyaqil qeju che kjawil anqʼin kxel kykʼamoʼn xnaqʼtzbʼil tzul tqʼoʼn Jehová. In tzaj tqʼamaʼn profecía tkuʼx toj Daniel qa ateʼ junjun che kjawil anqʼin tuʼn tkubʼ «kychʼixwi ex che elel ikʼun te jumajx». Tuʼnju mlay che nimen te Jehová, mlay kux tzʼibʼin kybʼi toj libro te chwinqlal ex mlay tzaj qʼoʼn kychwinqlal te jumajx. Ex che elel «ikʼun te jumajx», toj juntl yol, che kbʼel najsaʼn. Tuʼntzunju, atz in yolin Daniel 12:2 tiʼjju kbʼajel kyiʼj qeju otoq che jaw anqʼin ex atz kʼokel tqʼoʼn Jehová twitz tiʼjju kbʼantel kyuʼn aj kyjaw anqʼin (Apoc. 20:12). * Ateʼ junjun tzul qʼoʼn kychwinqlal te jumajx, atzun junjuntl mlay.
KXEL QʼET XNAQʼTZBʼIL «KYE XJAL TUʼN KYOK TE TZʼAQLXIX»
9, 10. a) Ik tzeʼn in tzaj tqʼamaʼn Daniel 12:3, ¿tiʼ mas kbʼajel aj tkubʼaj nimxix yajbʼil? b) ¿Alkyeqe «che qoptzʼajel ik tzaʼn qʼij twitz kyaʼj»?
9 (Kjawil uʼjit Daniel 12:3). ¿Tiʼ mas kbʼajel otoqxi kubʼaj ambʼil te nimxix yajbʼil aju ya chʼix tul? Ma qo yolin tiʼj jun tiʼ kbʼajel in tzaj qʼamaʼn toj Daniel 12:2, pero in tzaj tqʼamaʼn versículo 3 juntl tiʼ kbʼajel otoqxi kubʼaj nimxix yajbʼil.
10 ¿Alkyeqe «che qoptzʼajel ik tzaʼn qʼij twitz kyaʼj»? Jaku che onin tyol Jesús tkuʼx toj Mateo 13:43 qiʼj tuʼn tel qnikʼ tiʼj. Tqʼama jlu: «Atzun qe tzʼaqlxix che qoptzʼajel ik tzaʼn tqan qʼij tuj tkawbʼil Kyman». Tej tqʼama Jesús qe yol lu, atztoq in yolin kyiʼj «qeju at kyoklen tuj tkawbʼil Dios», toj juntl yol, kyiʼj qeju skʼoʼn maj che kawil tukʼil (Mat. 13:38). Tuʼntzunju, atzlo in yolin Daniel 12:3 kyiʼj skʼoʼn maj ex tiʼj aqʼuntl kbʼantel kyuʼn aj kykawin tukʼil Jesús toj Mil Abʼqʼi.
Che aqʼunal 144,000 junx tukʼil Jesús tuʼn t-xi qʼet xnaqʼtzbʼil kye xjal tzalu twitz Txʼotxʼ toj mil abʼqʼi. (Qʼonka twitza tiʼj párrafo 11).
11, 12. ¿Tiʼ aqʼuntl kbʼantel kyuʼn 144,000 toj mil abʼqʼi?
11 Che onil skʼoʼn maj tuʼn kyok nim xjal «te tzʼaqlxix». ¿Tzeʼn kbʼantel jlu kyuʼn? Che kbʼel nej tukʼil Jesús tuʼn t-xi qʼet xnaqʼtzbʼil kye nim xjal tzalu twitz Txʼotxʼ toj mil abʼqʼi. Nya oʼkx kxel qʼoʼn kyoklen 144,000 te aj kawil, sino ax ikx te pal (Apoc. 1:6; 5:10; 20:6). Kxel kyqʼoʼn «qʼanbʼil kye nasyon», toj juntl yol, che onil kyiʼj xjal tuʼn kyok te tzʼaqli (Apoc. 22:1, 2; Ezeq. 47:12). Nimxix tzalajbʼil kbʼel kynaʼn skʼoʼn maj aj tbʼant jlu kyuʼn.
12 ¿Alkyeqe xjal kxel qʼet onbʼil kye tuʼn kyok te tzʼaqli? Kxel qʼet onbʼil kye qeju che kjawil anqʼin, kye qeju che kjel anqʼin toj Armagedón ex kye qeju kʼwal che ul itzʼj toj akʼaj twitz Txʼotxʼ. Aj tkubʼaj mil abʼqʼi, kykyaqil xjal che anqʼil tzalu twitz Txʼotxʼ che okel te tzʼaqli. Qa ikju, ¿toj alkye ambʼil kbʼelex tzʼibʼin kybʼi te jumajx toj libro te chwinqlal?
AJU MANKBʼIL PRUEBA
13, 14. ¿Tiʼ il tiʼj tuʼn tbʼant kyuʼn xjal otoq che ok te tzʼaqli naʼmxtoq ttzaj qʼoʼn kychwinqlal te jumajx?
13 Bʼaʼn tuʼn ttzaj qnaʼn qa mlay tzaj qʼoʼn tchwinqlal jun xjal te jumajx noq tuʼnju otoq tzʼok te tzʼaqli. Qo ximen tiʼjju bʼaj tiʼj Adán ex Eva. Tzʼaqliqetoq, pero iltoq tiʼj tuʼn tkubʼ kyyekʼin qa in che nimen te Jehová tuʼn ttzaj qʼoʼn kychwinqlal te jumajx. Pero mintiʼ bʼant jlu kyuʼn (Rom. 5:12).
14 Ik tzeʼn ma tzʼel qnikʼ tiʼj, kykyaqil xjal che anqʼil tzalu twitz Txʼotxʼ che okel te tzʼaqli aj tkubʼaj mil abʼqʼi. ¿Che onilpe kykyaqil xjal lu tiʼj Tkawbʼil Jehová te jumajx? ¿Moqa che okel junjun ik tzeʼn Adán ex Eva ex mlay che ten tzʼaqli twitz Jehová? Qo xnaqʼtzan tiʼj tzaqʼwebʼil kyiʼj xjel lu.
15, 16. a) ¿Toj alkye ambʼil kbʼel kyyekʼin xjal qa kukx che ajbʼel te Jehová? b) ¿Tiʼ kbʼajel aj tkubʼaj mankbʼil prueba?
15 Kʼokex jupuʼn Satanás toj mil abʼqʼi ex mlay sbʼun kyiʼj xjal. Pero aj tkubʼaj mil abʼqʼi, kʼeletz tzaqpiʼn ex kʼokel tilil tuʼn tuʼn tsbʼun kyiʼj xjal otoq che ok te tzʼaqli. Toj ambʼil te prueba lu, nim toklen tuʼn tkubʼ kyyekʼin kykyaqil xjal qa che okel lepeʼ tiʼj Satanás moqa che onil tiʼj Tkawbʼil Jehová ex qa kʼokel kyqʼoʼn toklen tbʼi (Apoc. 20:7-10). Aju kbʼantel kyuʼn toj ambʼil lu, kʼonil tuʼn tel nikʼbʼaj tiʼj qa kbʼelex tzʼibʼin kybʼi toj libro te chwinqlal te jumajx.
16 Ateʼ junjun xjal che okel ik tzeʼn Adán ex Eva ex mlay che onin tiʼj Tkawbʼil Jehová. ¿Tiʼtzun kbʼajel kyiʼj? In tzaj tqʼamaʼn Apocalipsis 20:15 jlu: «Alkye mintiʼ knet tbʼi tzʼibʼan tuj tuʼjil chwinqlal, kuʼx xoʼn tuj najabʼ in kʼant tuʼn qʼaqʼ». Tuʼn jlu, in nel qnikʼ tiʼj qa che kbʼel najsaʼn xjal jlu te jumajx. Pero chʼixme kykyaqil xjal otoq che ok te tzʼaqli, mlay che onin tiʼj Satanás ex kbʼelex tzʼibʼin kybʼi te jumajx toj libro te chwinqlal.
TOJ «MANKBʼIL TQʼIJLALIL»
17. ¿Tiʼ xi qʼamaʼn te Daniel tiʼjju kbʼajel toj qqʼijlalil? (Daniel 12:4, 8-10).
17 In kubʼ qnaʼn nimxix tzalajbʼil aj qximen tiʼjju kbʼajel toj ambʼil tzul. Pero ax ikx xi tqʼamaʼn jun anjel te Daniel tiʼ kbʼajel toj qqʼijlalil, toj juntl yol, toj «mankbʼil tqʼijlalil» (kjawil uʼjit Daniel 12:4, 8-10; 2 Tim. 3:1-5). Tqʼama jlu: «Aju kynabʼl xjal kchʼiyil». A t-xilen jlu qa mas kʼelel kynikʼ tmajen Jehová kyiʼj profecía tkuʼx toj uʼj te Daniel. Ax ikx tqʼama anjel juntl tiʼ kbʼajel toj qqʼijlalil. Tqʼama jlu: «Qe bʼinchal mya bʼaʼn, kukx kbʼantel mya bʼaʼn kyuʼn ex mlay tzʼel kynikʼ tiʼj ju in bʼaj».
18. ¿Tiʼ kbʼajel kyiʼj nya bʼaʼn xjal toj chʼintl ambʼil?
18 Toj ambʼil jaʼlo, chʼixmi kykyaqil xjal in che bʼinchan nya bʼaʼn ex mintiʼ in kubʼ qʼoʼn kykastiw (Mal. 3:14, 15). Pero toj chʼintl ambʼil, che okel xjal in che ok ik tzeʼn chip toj juicio tuʼn Jesús ex che elel tpaʼn kyiʼj qeju in che ok ik tzeʼn ẍneʼl (Mat. 25:31-33). Mlay che kyaj anqʼin nya bʼaʼn xjal toj nimxix yajbʼil ex mlay che jaw anqʼin toj akʼaj twitz Txʼotxʼ. Ax ikx, mlay kux tzʼibʼin kybʼi toj «libro jatum in che tzaj naʼn qe xjal bʼaʼn che niman te Qman» aju in yolin Malaquías 3:16 tiʼj.
19. ¿Tiʼ il tiʼj tuʼn tbʼant quʼn jaʼlo ex tiquʼn? (Malaquías 3:16-18).
19 Toj ambʼil jaʼlo, nim toklen tuʼn tkubʼ qyekʼin qa nya atoʼ kyxol xjal nya bʼaʼn (kjawil uʼjit Malaquías 3:16-18). In che ok tchmoʼn Jehová tmajen toj ambʼil jaʼlo ex in che ok ik tzeʼn «tnam etzan» tuʼn. Qkyaqilx qaj tuʼn qten kyxol tmajen Jehová jlu.
Nimxix tzalajbʼil kbʼel qnaʼn aj tjaw anqʼin Daniel, qe xjal kʼujlaʼn quʼn ex qe txqantl tuʼn t-xi qʼoʼn chojbʼil kye toj akʼaj twitz Txʼotxʼ. (Qʼonka twitza tiʼj párrafo 20).
20. ¿Tiʼ xi ttziyan Jehová te Daniel ex tiquʼn taj teya tuʼn tjapun twiʼ?
20 In qo anqʼin toj jun ambʼil nim toklen. Pero ya chʼix kybʼaj junjun tiʼchaq qo jawil labʼin tiʼj. Chʼinx tpon ambʼil tuʼn tel qʼiʼn tkyaqil nya bʼaʼn. Aj tbʼaj jlu, kʼokel qqʼoʼn qwitz tiʼj tzeʼn che kjapunel twi tyol Jehová jlu xi tqʼamaʼn te Daniel: «Oktzun tjapun bʼaj mankbʼil tqʼijlalil, kjawil anqʼina tuʼn tkʼmonteya chojbʼil teya» (Dan. 12:13). ¿Tajpe teya tuʼn tpon ambʼil tuʼn tjaw anqʼin Daniel ex qe xjal kʼujlaʼn tuʼna? Qa ikju, qʼonka tilil tuʼn ttena tzʼaqli twitz Jehová ex kbʼelex ttzʼibʼin tbʼiya toj libro te chwinqlal.
BʼITZ 80 Tzʼelx kynikʼe tiʼj qa tbʼanelxix te Jehová
^ Toj xnaqʼtzbʼil lu, tzul qʼoʼn juntl akʼaj tqanil tiʼj xnaqʼtzbʼil kxel qʼet kye xjal ex aju in yolin Daniel 12:2 ex 3 tiʼj. Ax ikx, kʼelel qnikʼ tiʼj toj alkye ambʼil kxel qʼet ex alkyeqe che onil. Yajxitl, kʼelel qnikʼ tiʼj tzeʼn kʼonil xnaqʼtzbʼil lu kyiʼj xjal toj mankbʼil prueba aj tkubʼaj tuʼn Tkawin Jesús toj Mil Abʼqʼi.
^ Bʼalo chebʼe chebʼe che kjawil anqʼin xjal o che kyim. Tnejel, bʼalo che kjawil anqʼin tmajen Jehová e kyim toj bʼajsbʼil tqʼijlalil. Yajxitl, qeju e kyim tej naʼmxtoq kyul itzʼj ex tzmaxi aj kyjaw anqʼin kykyaqil qeju ateʼ toj t-ximbʼetz Jehová. Qa ikju, teyele junjun xjal kxel tqʼoʼn bʼaʼn tulen juntl xjal ojtzqiʼn twitz tuʼn. In tzaj tqʼamaʼn Tyol Dios jlu kyiʼj qeju che kjawil anqʼin toj kyaʼj: «Teyle junjun tuʼn tjaw anqʼin tuj tqʼijlalil». Tuʼn jlu, ax ikx jaku txi qqʼamaʼn qa toj ttxolil che kjawil anqʼin xjal tzalu twitz Txʼotxʼ (1 Cor. 14:33; 15:23).
^ Jun akʼaj xnaqʼtzbʼil lu ex in kubʼ tchʼexpuʼn aju in tzaj tqʼamaʼn capítulo 17 te libro Prestemos atención a las profecías de Daniel ex aju tkuʼx toj uʼj Aju Xqʼuqil te 1 te julio te 1987, t-xaq 21 a 25.
^ Aqeju yol «tzʼaqlxix» ex «mya tzʼaqlxix» in tzaj qʼamaʼn toj Hechos 24:15 ex qe yol «aqeju kubʼ kybʼinchaʼn bʼaʼn» ex «qeju kubʼ kybʼinchaʼn nya bʼaʼn» toj Juan 5:29, atz in che yolin tiʼjju bʼant kyuʼn xjal tej naʼmxtoq kykyim ex nya tiʼjju kbʼantel kyuʼn otoqxi che jaw anqʼin.
