XNAQʼTZBʼIL 39
¿Ope kux tzʼibʼin tbʼiya «tuj libro te chwinqlal»?
«Twitz Qman o tzʼibʼet jun libro jatum in che tzaj naʼn qe xjal bʼaʼn che niman te» (MAL. 3:16).
BʼITZ 61 Tzʼok tilil kyuʼne testigos de Jehová
AJU KʼELEL QNIKʼ TIʼJ *
Atxix toj tqʼijlalil Abel, tzaj tzyet tuʼn tkux ttzʼibʼin Jehová junjuntl bʼibʼaj «tuj libro te chwinqlal». (Qʼonka twitza tiʼj párrafo 1 ex 2).
1. Ik tzeʼn in tzaj tqʼamaʼn Malaquías 3:16, ¿alkye libro in kubʼ ttzʼibʼin Jehová ex tiʼ tkuʼx toj?
ATXIX toj ambʼil ojtxe, o kubʼ ttzʼibʼin Jehová jun libro nim toklen jatumel tkuʼx kybʼi junjun xjal toj. In xi tzyet lista toj libro lu tukʼil tbʼi Abel, aju tnejel ttestiw Jehová (Luc. 11:50, 51). * Tej tbʼet ambʼil, kux ttzʼibʼin Jehová junjuntl bʼibʼaj toj libro lu ex ya o kux ttzʼibʼin nim millón bʼibʼaj toj. In tzaj tqʼamaʼn Tyol Dios junjuntl tbʼi libro lu ik tzeʼn «jun libro jatum in che tzaj naʼn qe xjal», «libro te chwinqlal» ex «tuʼjil chwinqlal». Toj xnaqʼtzbʼil lu, kʼokel qqʼoʼn tbʼi te «libro te chwinqlal» (kjawil uʼjit Malaquías 3:16; Apoc. 3:5; 17:8).
2. ¿Alkyeqe bʼibʼaj o che kux tzʼibʼin toj libro te chwinqlal ex tiʼ jaku bʼant quʼn tuʼn tkux tzʼibʼin qbʼi toj?
2 Toj libro lu, tkuʼx kybʼi qeju kʼujlaʼn tbʼi Jehová kyuʼn ex in che kʼulin te tukʼil tkyaqil kykʼuʼj. Ex o tzaj qʼoʼn qʼuqbʼil kykʼuʼj tuʼn kyanqʼin te jumajx tzalu twitz Txʼotxʼ moqa toj kyaʼj. Jaku kux tzʼibʼin qbʼi toj libro lu qa ma ten jun tbʼanel qamiwbʼil tukʼil Jehová noq tuʼn chojbʼil bʼant tuʼn Jesús (Juan 3:16, 36). ¿Tajpe teya tuʼn tkux tzʼibʼin tbʼiya toj libro lu?
3, 4. a) Qa ya o kux tzʼibʼin qbʼi toj libro te chwinqlal, ¿ape t-xilen jlu qa tzul qʼoʼn qchwinqlal te jumajx? b) ¿Tiʼ kʼelel qnikʼ tiʼj toj xnaqʼtzbʼil lu ex toj juntl?
3 Qa ya o kux tzʼibʼin qbʼi toj libro te chwinqlal, ¿ape t-xilen jlu qa ktzajel qʼoʼn qchwinqlal te jumajx? Jaku kanet tzaqʼwebʼil tiʼj xjel lu quʼn toj Éxodo 32:33 jatumel xi tqʼamaʼn Jehová jlu te Moisés: «Oʼkx kjawitz nqʼuchane tuj wuʼje kybʼi qeju in che bʼinchan il nwitze». A t-xilen jlu qa jaku jatz qʼiʼn qbʼi toj libro te chwinqlal. In nok jlu ik tzeʼn in kux ttzʼibʼin Jehová qbʼi tuʼn lápiz (Apoc. 3:5). Nim toklen tuʼn kukx tok tilil quʼn tzmaxi aj tkux ttzʼibʼin Jehová qbʼi te jumajx toj libro te chwinqlal, ik tzeʼn otoq kux ttzʼibʼin tukʼil lapicero.
4 Pero jakulo qo ximen kyiʼj junjun xjel ik tzeʼn jlu: ¿Tiʼ in tzaj tqʼamaʼn Tyol Dios kyiʼj qeju o kux tzʼibʼin kybʼi toj libro te chwinqlal ex kyiʼj qeju naʼmx tkux tzʼibʼin kybʼi? ¿Toj alkye ambʼil tzul qʼoʼn chwinqlal te jumajx kye qeju o kux tzʼibʼin kybʼi? Yajtzun qe xjal mintiʼ el kynikʼ tiʼj Jehová tej kykyim, ¿tiʼ kbʼajel kyiʼj? ¿Ope kux tzʼibʼin kybʼi toj libro te chwinqlal? Kxel qqʼoʼn tzaqʼwebʼil kyiʼj xjel lu toj xnaqʼtzbʼil lu ex toj juntl.
¿ALKYEQE BʼIBʼAJ O CHE KUX TZʼIBʼIN TOJ LIBRO?
5, 6. a) Ik tzeʼn in tzaj tqʼamaʼn Filipenses 4:3, ¿alkyeqe o kux tzʼibʼin kybʼi toj libro te chwinqlal? b) ¿Toj alkye ambʼil kbʼelex tzʼibʼin kybʼi te jumajx?
5 ¿Alkyeqe bʼibʼaj o che kux tzʼibʼin toj libro te chwinqlal? Tuʼn t-xi qqʼoʼn tzaqʼwebʼil tiʼj xjel lu, qo yolin tiʼj jweʼ grupo xjal. O kux tzʼibʼin kybʼi junjun grupo xjal lu toj libro te chwinqlal, atzun junjuntl mintiʼ.
6 Aju tnejel grupo xjal, atz in yolin kyiʼj qeju che xeʼl kawil tukʼil Jesús toj kyaʼj. ¿Ope kux tzʼibʼin kybʼi toj libro te chwinqlal? Oje. Ik tzeʼn xi tqʼamaʼn apóstol Pablo kye okslal te Filipos, ya o kux tzʼibʼin kybʼi okslal skʼoʼn maj toj libro te chwinqlal moqa aqeju che kawil junx tukʼil Jesús toj kyaʼj (kjawil uʼjit Filipenses 4:3). Pero qa nya kyaj tuʼn tjatz qʼiʼn kybʼi toj libro lu, nim toklen tuʼn kyten tzʼaqli twitz Jehová. Ex aj tok qʼoʼn mankbʼil sey kyiʼj aj kykyim moqa naʼmxtoq txi tzyet nimxix yajbʼil, kbʼelex tzʼibʼin kybʼi toj libro te chwinqlal te jumajx (Apoc. 7:3).
7. ¿Tzeʼn in nonin Apocalipsis 7:16 ex 17 qiʼj tuʼn tel qnikʼ tiʼj toj alkye ambʼil kbʼelex tzʼibʼin kybʼi nimxix kyajlal xjal te jumajx toj libro te chwinqlal?
7 Atzun tkabʼin grupo xjal, atz in yolin tiʼj «nimxix kyajlal xjal». ¿Ope kux tzʼibʼin kybʼi toj libro te chwinqlal? Oje. ¿Kukxpe ktel kybʼi toj libro te chwinqlal aj tkubʼaj Armagedón? Kukx (Apoc. 7:14). Tqʼama Jesús qa in che ok xjal lu ik tzeʼn qe ẍneʼl ex qa «che xeʼl tuj chwinqlal te jumajx» (Mat. 25:46). Pero kykyaqil qeju che kjel anqʼin toj Armagedón, nya jun rat ktzajel qʼoʼn kychwinqlal te jumajx. Jaku txi qqʼamaʼn qa kbʼelex tzʼibʼin kybʼi toj libro te chwinqlal tukʼil lápiz. Aj Tkawin Jesús toj Mil Abʼqʼi, kpastoril kyiʼj «ex che xel tiʼn jatum in che jatz twi aʼ te chwinqlal». Kykyaqilx qeju che okel lepeʼ tiʼj Jesús ex qa ma che ten tzʼaqli twitz Jehová, kbʼelex tzʼibʼin kybʼi te jumajx toj libro te chwinqlal (kjawil uʼjit Apocalipsis 7:16, 17).
8. ¿Alkyeqe mintiʼ o kux tzʼibʼin kybʼi toj libro te chwinqlal ex tiʼ kbʼajel kyiʼj?
8 Aju toxin grupo xjal, in che ok mojbʼaʼn kyukʼil chip ex che kbʼel najsaʼn te jumajx toj Armagedón. Mintiʼ o kux tzʼibʼin kybʼi xjal lu toj libro te chwinqlal ex tqʼama Jesús qa «che xeʼltzun jlu tuj castiw te jumajx» (Mat. 25:46). Ex tqʼama Pablo tuʼn tonbʼil xewbʼaj xjan qa «ktzajel qʼoʼn kycastiw jlu tuʼn kynaj te jumajx» (2 Tes. 1:9; 2 Ped. 2:9). Ax jlu kbʼajel kyiʼj xjal o kubʼ kyximen tuʼn kyyolin nya bʼaʼn tiʼj xewbʼaj xjan, che kbʼel najsaʼn te jumajx ex mlay che jaw anqʼin (Mat. 12:32; Mar. 3:28, 29; Heb. 6:4-6). Atzun jaʼlo, qo yolin tiʼj kabʼe kʼloj xjal che kjawil anqʼin tzalu twitz Txʼotxʼ.
AQEJU CHE KJAWIL ANQʼIN
9. ¿Alkye kabʼe grupo xjal che kjawil anqʼin tzalu twitz Txʼotxʼ ex tiquʼn junxitl qe? (Hechos 24:15).
9 In tzaj tqʼamaʼn Tyol Dios qa che kjawil anqʼin kabʼe grupo xjal tzalu twitz Txʼotxʼ ex qa ktzajel qʼoʼn ambʼil kye tuʼn kyanqʼin te jumajx. ¿Alkyeqe xjal lu? Aqeju xjal «tzʼaqlxix» ex «qeju mya tzʼaqlxix» (kjawil uʼjit Hechos 24:15). In nok jun xjal te «tzʼaqlxix» qa ma tzʼajbʼen te Jehová toj tkyaqil tanqʼibʼil. Atzun qeju «mya tzʼaqlxix», atz in yolin kyiʼj xjal mintiʼ e ajbʼen te Jehová ex chʼixme tkyaqil maj mintiʼ e japun tkawbʼil kyuʼn. Tuʼnju che kjawil anqʼin kabʼe grupo xjal lu, ¿ape t-xilen qa o kux tzʼibʼin kybʼi toj libro te chwinqlal? Tuʼn t-xi qqʼoʼn tzaqʼwebʼil tiʼj xjel lu, qo xnaqʼtzan tiʼj teyele junjun grupo.
10. ¿Tiquʼn che kjawil anqʼin xjal «tzʼaqlxix» ex tiʼ oklenj kxel qʼoʼn te junjun kye? (Ax ikx qʼonk twitza tiʼj xnaqʼtzbʼil «Kyxjel qeju in che uʼjin» tkux toj revista lu ex in yolin kyiʼj qeju che kjawil anqʼin tzalu twitz Txʼotxʼ).
10 Qo yolin tiʼj tkyajin grupo xjal ex atz in yolin kyiʼj qeju in che ok te «tzʼaqlxix». Tej naʼmxtoq kykyim, ya otoq kux tzʼibʼin kybʼi toj libro te chwinqlal. ¿Jatzpe qʼiʼn kybʼi tej kykyim? Mintiʼ, sino kukx ateʼ toj t-ximbʼetz Jehová. In tzaj tqʼamaʼn Biblia jlu: «Ate Dios mya Kydios kyimni; noq oʼkx Kydios itzʼ, ex kykyaqil itzʼ qe twitz Dios» (Luc. 20:38). Tuʼn jlu, in nel qnikʼ tiʼj qa kukx tzʼibʼin kybʼi qeju tzʼaqlixix toj libro te chwinqlal aj kyjaw anqʼin juntl maj. Noqtzun tuʼnj, naʼmxtoq tkux tzʼibʼin kybʼi te jumajx (Luc. 14:14). Axpe ikx, che okel junjun «te kawil tuj tkyaqil twitz txʼotxʼ» (Sal. 45:16).
11. ¿Tiʼ il tiʼj tuʼn tbʼant kyuʼn qeju «mya tzʼaqlxix» tuʼn tkux tzʼibʼin kybʼi toj libro te chwinqlal?
11 Te mankbʼil, qo yolin tiʼj tjweʼyin grupo, aqeju xjal «mya tzʼaqlxix». Mintiʼ e ten xjal lu kyxol xjal tzʼaqlixix tuʼnju mintiʼ el kynikʼ tiʼj tley Jehová. Tuʼntzunju, mintiʼ kux tzʼibʼin kybʼi toj libro te chwinqlal. Pero aj kyjaw anqʼin, kxel tqʼoʼn Jehová ambʼil kye tuʼn tkubʼ kyyekʼin qa jaku kux tzʼibʼin kybʼi toj libro lu. Kxel qʼet nim onbʼil kye qeju nya tzʼaqlixix tuʼnju ateʼ junjun kubʼ kybʼinchaʼn nim nya bʼaʼn. Nim toklen tuʼn t-xi qxnaqʼtzaʼn kye tzeʼn tuʼn tkubʼ kyanqʼin qe tkawbʼil Jehová. Tuʼn t-xi qʼet onbʼil lu kye xjal, kxel qʼet xnaqʼtzbʼil kye ex oʼkx kbʼantel jlu tuʼn Tkawbʼil Dios.
12. a) ¿Alkye kxel qʼonte xnaqʼtzbʼil kye qeju nya tzʼaqlixix? b) ¿Tiʼ kbʼajel kyiʼj qeju mlay txi kybʼiʼn xnaqʼtzbʼil kxel qʼoʼn kye?
12 ¿Alkye kxel qʼonte xnaqʼtzbʼil kye qeju nya tzʼaqlixix? Aqeju nimxix kyajlal xjal ex qeju tzʼaqlixix che kjawil anqʼin. ¿Tiʼ il tiʼj tuʼn tbʼant kyuʼn qeju nya tzʼaqlixix tuʼn tkux tzʼibʼin kybʼi toj libro te chwinqlal? Il tiʼj tuʼn kyok te tamiw Jehová ex tuʼn t-xi kyqʼamaʼn te qa kyaj tuʼn kyajbʼen te. Kʼokel tkeʼyin Jesús ex qeju 144,000 tiʼ kymod qeju nya tzʼaqlixix kbʼel kyyekʼin tiʼj xnaqʼtzbʼil kxel qʼoʼn kye (Apoc. 20:4). Qa mintiʼ ma txi tbʼiʼn jun xjal xnaqʼtzbʼil kxel qʼoʼn te, ya mlay txi qʼoʼn ambʼil te tuʼn tanqʼin maske ya otoq japun twi 100 abʼqʼi (Is. 65:20). In nok tqʼoʼn Jehová ex Jesús twitz tiʼjju tkuʼx toj kyanmi xjal ex mlay txi kyqʼoʼn ambʼil te ni jun xjal tuʼn ttzaj tiʼn nya bʼaʼn toj akʼaj twitz Txʼotxʼ (Is. 11:9; 60:18; 65:25; Juan 2:25).
CHE KJAWIL ANQʼIN JUNJUN TUʼN TTEN KYCHWINQLAL EX JUNJUNTL TUʼN KYOK TOJ JUICIO
13, 14. a) ¿Tiʼtoq qximbʼetz at kyiʼj tyol Jesús tkuʼx toj Juan 5:29? b) ¿Tiʼ bʼaʼn tuʼn tok qqʼoʼn qwiʼ tiʼj aj kyjaw quʼjin yol lu?
13 Ax ikx yolin Jesús kyiʼj xjal che kjawil anqʼin tzalu twitz Txʼotxʼ. Jun techel, tqʼama jlu: «Kpol ambʼil tuʼn tok kybʼiʼn kykyaqil qeju ateʼ toj muqbʼil tqʼajqʼajel twiʼ ex che eletz, aqeju kubʼ kybʼinchaʼn bʼaʼn che kjawil anqʼin tuʼn tten kychwinqlal, atzun qeju kubʼ kybʼinchaʼn nya bʼaʼn, che kjawil anqʼin tuʼn kyok toj juicio» (Juan 5:28, 29, TNM). ¿Tiʼ tajtoq Jesús tuʼn ttzaj tqʼamaʼn?
14 Ojtxe, in kubʼtoq qximen qa atztoq in yolin Jesús kyiʼj tiʼchaq kbʼantel kyuʼn xjal otoqxi che jaw anqʼin. Toj juntl yol, aj kyjaw anqʼin, ateʼ junjun kbʼel kybʼinchaʼn bʼaʼn, atzun junjuntl nya bʼaʼn. Pero bʼaʼn tuʼn tok qqʼoʼn qwitz tiʼj qa mintiʼ tqʼama Jesús qa kxel kybʼinchaʼn bʼaʼn moqa kxel kybʼinchaʼn nya bʼaʼn. Sino tqʼama «aqeju kubʼ kybʼinchaʼn bʼaʼn» ex «atzun qeju kubʼ kybʼinchaʼn nya bʼaʼn». Tuʼn jlu, in nel qnikʼ tiʼj qa atztoq in yolin Jesús kyiʼj tiʼchaq bʼant kyuʼn xjal lu tej naʼmxtoq kykyim. Ex at ttxolil aju tqʼama tuʼnju mlay txi qʼoʼn ambʼil te ni jun xjal tuʼn tkubʼ tbʼinchaʼn nya bʼaʼn toj Tbʼanel Najbʼil. Ex aj tyolin texto lu tiʼj kybʼinchbʼen xjal mya tzʼaqli, atz in yolin tiʼj nya bʼaʼn kybʼinchbʼen tej naʼmxtoq kykyim. Qa ikju, ¿tiʼ tajtoq Jesús tuʼn ttzaj tqʼamaʼn qa «che kjawil anqʼin [junjun] tuʼn tten kychwinqlal» ex qa «che kjawil anqʼin [junjun] tuʼn kyok toj juicio»?
15. ¿Alkyeqe «che kjawil anqʼin tuʼn tten kychwinqlal» ex tiquʼn?
15 Aqeju tzʼaqli, toj juntl yol, aqeju ten tbʼanel kybʼinchbʼen tej naʼmxtoq kykyim, «che kjawil anqʼin tuʼn tten kychwinqlal» tuʼnju ya otoq kux tzʼibʼin kybʼi toj libro te chwinqlal. Tuʼn jlu, in nel qnikʼ tiʼj qa «aqeju [xjal] kubʼ kybʼinchaʼn bʼaʼn» ex che kjawil anqʼin ik tzeʼn in tzaj tqʼamaʼn Juan 5:29, aʼyex in che ok te «tzʼaqlxix» ik tzeʼn in tzaj tqʼamaʼn Hechos 24:15. Ex at ttxolil jlu tukʼilju in tzaj tqʼamaʼn Romanos 6:7 jatumel in tzaj qʼamaʼn jlu: «Aju o kyim, tzoqpiʼmajtl tjaqʼ tipumal il». Aj tkyim jun xjal tzʼaqlixix, in kubʼ najsaʼn til tuʼn Jehová, pero kukx in tzaj tnaʼn aju tajbʼebʼil te (Heb. 6:10). Noqtzun tuʼnj, aj kyjaw anqʼin xjal tzʼaqlixix, il tiʼj tuʼn kukx kyajbʼen te Jehová tuʼntzun miʼn tjatz qʼiʼn kybʼi toj libro te chwinqlal.
16. ¿Tiʼ kyxilen yol «che kjawil anqʼin tuʼn kyok toj juicio»?
16 ¿Yajtzun qeju kubʼ kybʼinchaʼn nim nya bʼaʼn tej naʼmxtoq kykyim? Maske kubʼ najsaʼn kyil tej kykyim, pero mintiʼ e ajbʼen te Jehová. Tuʼntzunju, mintiʼ kux tzʼibʼin kybʼi toj libro te chwinqlal. Aqeju xjal «kubʼ kybʼinchaʼn nya bʼaʼn» ex che kjawil anqʼin, aʼyex che okel te «mya tzʼaqlxix» in yolin Hechos 24:15 tiʼj. Aqeju xjal che okel te nya tzʼaqlixix, «che kjawil anqʼin tuʼn kyok toj juicio». * Toj juntl yol, kʼokel tqʼoʼn Jesús twitz tiʼj kybʼinchbʼen (Luc. 22:30). Kxel tiʼn ambʼil tuʼn tel nikʼbʼaj tiʼj alkyeqe kbʼelex tzʼibʼin kybʼi toj libro te chwinqlal. Qa kyaj tuʼn tkux tzʼibʼin kybʼi, nim toklen tuʼn tkyaj kytzaqpiʼn nya bʼaʼn kybʼinchbʼen ex tuʼn t-xi kyqʼamaʼn te Jehová qa kyaj tuʼn kyajbʼen te.
17, 18. ¿Tiʼ kbʼantel kyuʼn qeju che kjawil anqʼin tzalu twitz Txʼotxʼ ex alkyeqe «kybʼinchbʼen» kʼokel keʼyin ik tzeʼn in tzaj tqʼamaʼn Apocalipsis 20:12 ex 13?
17 Qa tzʼaqli jun xjal aj tkyim moqa nya, aj tjaw anqʼin nim toklen tuʼn t-xi tnimen qe ley tkuʼx toj akʼaj rollo, aqeju che kjawil jaqoʼn toj mil abʼqʼi. In tzaj tqʼamaʼn apóstol Juan tiʼ ok tkeʼyin toj jun witzikʼ. Tqʼama jlu: «O wile qe kyimni, qeju maʼ kyoklen ex qeju chʼin kyoklen, waʼl qe qwitz Dios; ex e jaqet qe libro, ex at juntl libro jaqet, aju libro te chwinqlal. Kubʼtzun kysentens qe kyimni, ex ju kysentens kubʼ ik tzaʼnxju kybʼinchbʼen tzʼibʼan kyuj libro» (Apoc. 20:12, 13).
18 ¿Alkyetzun «kybʼinchbʼen» xjal che kjawil anqʼin kʼokel keʼyin? ¿Apeju bʼant kyuʼn tej naʼmxtoq kykyim? Miʼn, bʼaʼn tuʼn ttzaj qnaʼn qa otoq kubʼ najsaʼn kyil tej kykyim. Tuʼntzunju, mintiʼ in yolin jlu kyiʼj tiʼchaq bʼant kyuʼn tej naʼmxtoq kykyim. Sino atz in yolin tiʼj kymod kbʼel kyyekʼin tiʼj xnaqʼtzbʼil kxel qʼoʼn kye toj akʼaj twitz Txʼotxʼ. Axpe ikx, nim toklen tuʼn tel kynikʼ xjal tzʼaqli tiʼj Jesús ik tzeʼn Noé, Samuel, David ex Daniel ex tuʼn tkubʼ kyyekʼin qʼuqbʼil kykʼuʼj tiʼj chojbʼil bʼant tuʼn. Qa kbʼantel jlu kyuʼn tmajen Jehová, mas nim toklen tuʼn tbʼant kyuʼn xjal nya tzʼaqlixix.
19. ¿Tiʼ kbʼajel kyiʼj qeju kʼelel kyikʼun xnaqʼtzbʼil?
19 ¿Tiʼ kbʼajel kyiʼj xjal qa ma tzʼel kyikʼun xnaqʼtzbʼil kxel qʼoʼn kye? In tzaj tqʼamaʼn Apocalipsis 20:15 jlu: «Alkye mintiʼ knet tbʼi tzʼibʼan tuj tuʼjil chwinqlal, kuʼx xoʼn tuj najabʼ in kʼant tuʼn qʼaqʼ». Ikju, che kbʼel najsaʼn te jumajx. Tuʼntzunju, nim toklen tuʼn tok tilil quʼn tuʼn tkux tzʼibʼin qbʼi toj libro te chwinqlal ex tuʼn miʼn tjatz qʼiʼn.
In nonin jun erman tuʼn t-xi qʼet xnaqʼtzbʼil kye xjal toj mil abʼqʼi. (Qʼonka twitza tiʼj párrafo 20).
20. ¿Alkye tbʼanel aqʼuntl kxel bʼinchet aj Tkawin Jesús toj Mil Abʼqʼi? (Qʼonka twitza tiʼj tilbʼilal tok tiʼj t-xkʼomil).
20 Tbʼanel kʼokel ambʼil aj Tkawin Jesús toj Mil Abʼqʼi. Tjaqʼ tkawbʼil, kxel qʼoʼn xnaqʼtzbʼil kye nimku xjal twitz tkyaqil Txʼotxʼ. Nya oʼkxju, ax ikx kbʼel kyyekʼin xjal tzʼaqlixix ex qeju nya tzʼaqlixix qa kxel kynimen tley Jehová (Is. 26:9; Hech. 17:31). ¿Alkye tten kxel qʼet xnaqʼtzbʼil kye kykyaqil xjal? Atzun jlu kʼelel qnikʼ tiʼj toj juntl xnaqʼtzbʼil ex kʼonil qiʼj tuʼn tok qqʼoʼn toklen.
BʼITZ 147 In tzaj ttziyen Dios qchwinqlal te jumajx
^ Toj xnaqʼtzbʼil lu, kʼelel qnikʼ tiʼj jun akʼaj xnaqʼtzbʼil tiʼjju tqʼama Jesús toj Juan 5:28 ex 29 jatumel tqʼama qa «che kjawil anqʼin [junjun xjal] tuʼn tten kychwinqlal» ex qa «che kjawil anqʼin [junjun] tuʼn kyok toj juicio». Ax ikx, kʼelel qnikʼ tiʼj tiʼ t-xilen teyele junjun kye ex alkyeqe xjal che kjawil anqʼin tuʼn tten kychwinqlal ex tuʼn kyok toj juicio.
^ Tzaj tzyet tuʼn tkubʼ tzʼibʼit libro lu «atxix tej tbʼant twitz txʼotxʼ». Aj ttzaj qʼamaʼn txʼotxʼ tzalu, atz in yolin jlu kyiʼj xjal jaku che klet tiʼj il (Mat. 25:34; Apoc. 17:8). Tuʼntzunju, alo tbʼi Abel kux tzʼibʼin tnejel toj «libro te chwinqlal».
^ Ojtxe, in xitoq qqʼamaʼn qa atoq t-xilen yol «juicio» tuʼn tkubʼ tsentens jun xjal. Ex atzun jlu jaku tzul toj qximbʼetz aj tok qbʼiʼn yol lu. Pero toj texto lu, bʼalo atztoq in yolin Jesús tiʼj ambʼil aj tok jun xjal toj prueba moqa tiʼj ambʼil aj tok keʼyin tbʼinchbʼen. Ik tzeʼn in tzaj tqʼamaʼn jun diccionario Griego tiʼj Tyol Dios, ax ikx a t-xilen «tuʼn tok keʼyin tmod jun xjal».
