Qqʼonk qwitz tiʼj tzaqʼwebʼil in tzaj tqʼoʼn Tyol Dios.

In tzaj tqʼamaʼn Hechos 24:15 qa «ok che jawil anqʼin qe kyimni, tzaʼnx qeju tzʼaqlxix, ax ikx qeju mya tzʼaqlxix». Aʼye xjal tzʼaqlixix atz in yolin kyiʼj qeju e niman te Dios tej naʼmxtoq kykyim, tuʼntzunju kux tzʼibʼin kybʼi toj libro te chwinqlal (Mal. 3:16). Kyxol qe xjal nya tzʼaqlixix, ax ikx ateʼ qeju tzmatoq in nok kyojtzqiʼn Jehová tej kykyim. Mintiʼ kux tzʼibʼin kybʼi xjal lu toj libro te chwinqlal.

In yolin Juan 5:28 ex 29 kyiʼj kabʼe grupo xjal che kjawil anqʼin ex aʼyex xjal lu in yolin Hechos 24:15 kyiʼj. Tqʼama Jesús qa «aqeju kubʼ kybʼinchaʼn bʼaʼn che kjawil anqʼin tuʼn tten kychwinqlal, atzun qeju kubʼ kybʼinchaʼn nya bʼaʼn, che kjawil anqʼin tuʼn kyok toj juicio». Aʼye xjal tzʼaqlixix kubʼ kybʼinchaʼn bʼaʼn tej naʼmxtoq kykyim. Tuʼntzunju, ok che kjawil anqʼin tuʼn tten kychwinqlal tuʼnju kukx tzʼibʼin kybʼi toj libro te chwinqlal. Atzun qe xjal nya tzʼaqlixix kubʼ kybʼinchaʼn nya bʼaʼn tej naʼmxtoq kykyim. Tuʼntzunju, che kjawil anqʼin tuʼn kyok toj juicio. Naʼmx tkux tzʼibʼin kybʼi toj libro te chwinqlal ex toj jun ambʼil che okel toj prueba moqa kʼokel keʼyin kybʼinchbʼen. Toj ambʼil lu, ktzajel qʼoʼn ambʼil kye tuʼn tok kyojtzqiʼn Jehová ex tuʼn tkux tzʼibʼin kybʼi toj libro te chwinqlal.

In tzaj tchikʼbʼaʼn Apocalipsis 20:12 ex 13 qa kykyaqil qeju che kjawil anqʼin, il tiʼj tuʼn t-xi kybʼiʼn qe yol «tzʼibʼan kyuj libro». Atz in yolin jlu kyiʼj akʼaj kawbʼil tzul tqʼoʼn Jehová toj Paraíso. Ex alkye qeju mintiʼ ma txi kybʼiʼn qe kawbʼil lu, che kbʼel najsaʼn te jumajx (Is. 65:20).

Kyaj qʼamaʼn toj Daniel 12:2 qa aʼye xjal o che kyim ok che kjawil anqʼin «tuʼn tten kychwinqlal te jumajx, atzun qe txqantl che elel tuj kychʼixwi ex che elel ikʼun te jumajx». In yolin versículo lu tiʼjju kbʼajel kyiʼj xjal otoqxi che jaw anqʼin. Ateʼ junjun kxel qʼoʼn «kychwinqlal te jumajx», atzun junjuntl «che elel ikʼun te jumajx». Aj tkubʼaj mil abʼqʼi, ateʼ junjun xjal ktzajel qʼoʼn kychwinqlal te jumajx ex junjuntl che kbʼel najsaʼn te jumajx (Apoc. 20:15; 21:3, 4).

Jaku tzʼok qmojbʼaʼn aju kbʼajel kyiʼj kabʼe grupo xjal che kjawil anqʼin kyukʼil junjun xjal kyaj tuʼn kyxiʼ anqʼil toj juntl tnam. In che ok xjal tzʼaqlixix ik tzeʼn qe stranjer xjal in tzaj qʼoʼn jun visa te aqʼuntl kye moqa in tzaj qʼoʼn ambʼil kye tuʼn kyanqʼin toj tnam. Atzun kye xjal nya tzʼaqlixix, in che ok ik tzeʼn qe stranjer xjal in tzaj qʼoʼn jun visa temporal moqa de turista kye. Tuʼn ttzaj qʼoʼn ambʼil kye tuʼn kukx kyanqʼin toj tnam, il tiʼj tuʼn tkubʼ kyyekʼin qa in xi kybʼiʼn qe kawbʼil in tzaj qʼoʼn kye. Chʼixmi ax jlu kbʼajel kyiʼj xjal nya tzʼaqlixix, tuʼn kykyaj anqʼin toj akʼaj twitz Txʼotxʼ, il tiʼj tuʼn t-xi kybʼiʼn qe kawbʼil ktzajel tqʼoʼn Jehová kye ex tuʼn tkubʼ kyyekʼin qa tzʼaqli qe. Noq alkyexku visa jaku tzaj qʼoʼn te jun stranjer xjal, aj tikʼ ambʼil, jakulo tzaj qʼoʼn ambʼil te tuʼn kukx tanqʼin toj tnam moqa jaku tzʼajtz deportarin. Tukʼil tmod in kubʼ tyekʼin, in nel nikʼbʼaj tiʼj qa kukx kʼanqʼil toj tnam moqa miʼn. Axtzun jlu kbʼajel kyiʼj kykyaqil xjal che kjawil anqʼin, ktzajel qʼoʼn ambʼil kye tuʼn kukx kyanqʼin toj akʼaj twitz Txʼotxʼ qa ma che ten tzʼaqli twitz Jehová.

Nya oʼkx in tzaj qʼaqʼin tkʼuʼj Jehová kyiʼj xjal, sino tzʼaqlxix te ex jiqun tiʼj tmod (Deut. 32:4; Sal. 33:5). Ex kbʼel tyekʼin Jehová tkʼujlabʼil aj t-xi tqʼoʼn ambʼil tuʼn kyjaw anqʼin xjal tzʼaqlixix ex nya tzʼaqlixix. Pero nim toklen tuʼn t-xi kybʼiʼn qe tkawbʼil tiʼj bʼaʼn ex tiʼj nya bʼaʼn. Oʼkx qeju kʼokel kykʼujlaʼn Jehová ex ma txi kybʼiʼn qe tkawbʼil, kukx che anqʼil toj akʼaj twitz Txʼotxʼ.