1, 2. a) ¿Tiʼtoq in bʼaj kyiʼj okslal Hebreo toj Judea tej t-xi ttzʼibʼin apóstol Pablo carta kye? b) ¿Tiquʼn pon carta lu toj jun ambʼil mas bʼaʼn?

 TZAJ nim nya bʼaʼn kyiʼj okslal Hebreo tej otoqxi kyim Jesús. Tej tzmatoq in tzaj tzyet congregación toj tnam Jerusalén, i el ikʼun okslal kyuʼn xjal (Hech. 8:1). Ex tej tikʼ juntl 20 abʼqʼi, e ok weʼ twitz junjun nya bʼaʼn tuʼnju kubʼaj kypwaq ex kywa (Hech. 11:​27-30). Maske tojlo abʼqʼi 61 ya mintiʼxix i el ikʼun qe okslal pero chʼixtoq kyok weʼ twitz jun nya bʼaʼn mas kwest. Toj ambʼil lu xi ttzʼibʼin apóstol Pablo jun carta kye tuʼn tonin kyiʼj.

² Aju carta xi ttzʼibʼin Pablo kye okslal Hebreo pon toj jun ambʼil mas bʼaʼn tuʼnju chʼixtoq kyok weʼ twitz jun ambʼil kwest. Xi tqʼoʼn apóstol Pablo junjun consej kye aju kʼoniltoq kyiʼj tuʼn tikʼx nimxix yajbʼil kyuʼn. Otoq kyaj tqʼamaʼn Jesús qa kbʼeltoq xiten tnam Jerusalén ex chʼixtoq tbʼaj jlu (Luc. 21:20). Ax tok, mintiʼtoq ojtzqiʼn tuʼn apóstol Pablo nix qe okslal te Judea jtojxix tuʼn tbʼaj jlu. Pero jakutoq tzʼajbʼen ambʼil lu kyuʼn okslal tuʼn tchʼiy qʼuqbʼil kykʼuʼj, tuʼn kukx tikʼx kyuʼn ex tuʼn tbʼaj kybʼinchaʼn kyten (Heb. 10:25; 12:​1, 2).

3. ¿Tiquʼn bʼaʼn tuʼn qxnaqʼtzan toj ambʼil jaʼlo tiʼj carta xi ttzʼibʼin Pablo kye aj hebreo?

³ Ax ikx qe, chʼix qok weʼ twitz jun ambʼil mas kwest twitzju e ok weʼ okslal Hebreo twitz (Mat. 24:21; Apoc. 16:​14, 16). Tuʼntzunju, aʼyeju consej xi qʼoʼn kye okslal lu, ax ikx jaku che onin qiʼj jaʼlo. Qo yolil kyiʼj junjun consej lu.

 «QQʼOʼNK TILIL TUʼN TOKXIX QNABʼL»

4. ¿Alkyeqe nya bʼaʼn e ok weʼ okslal judiy twitz? (Ax ikx qʼonka twitza tiʼj tilbʼilal).

⁴ Otoq che etz aj hebreo xi ttzʼibʼin apóstol Pablo kye toj kyokslabʼil judiy ex otoq che okslan tiʼj Jesucristo, tuʼntzunju e ok weʼ twitz nim nya bʼaʼn. Toj nim ambʼil otoq che ok judiy te ttnam Jehová ex nimtoq toklen tnam Jerusalén tuʼnju atz otoq che kawin rey te t-xjel Jehová. Nya oʼkxju, ax ikx atztoq taʼ templo toj Jerusalén. Kykyaqil judiy in xitoq kynimen Tley Moisés ex qeju kawbʼil in tzajtoq kyxnaqʼtzaʼn nejenel te okslabʼil judiy. Attoq ley tiʼj wabʼj, tiʼj circuncisión ex tiʼj alkye kymod judiy tuʼn tten kyukʼil xjal kye txqantl tnam. Pero atxix tej tkyim Jesús, ya mintiʼ xi tkʼamoʼn Jehová qe chojbʼil xi qʼoʼn toj templo. Tkyaqil chʼixpubʼil lu kwest ela toj kywitz okslal tuʼnju naqʼli qeʼ tuʼn t-xi kynimen Tley Moisés (Heb. 10:​1, 4, 10). Axpe ikx qe okslal otoq che chʼiy toj kyokslabʼil kwest ela toj kywitz tuʼn kynaqʼet kyiʼj chʼixpubʼil lu, ik tzeʼn te apóstol Pedro (Hech. 10:​9-14; Gál. 2:​11-14). Nya oʼkxju, sino ax ikx xi tzyet tuʼn kyel ikʼun t-xnaqʼtzbʼen Jesús kyuʼn nejenel kye txqantl okslabʼil tuʼnju e okslan tiʼj Jesucristo.

5. ¿Alkyeqe kabʼe grupo aj qʼoj e ok weʼ okslal twitz?

⁵ E ten kabʼe grupo aj qʼoj kyiʼj okslal te Judea. Jun, aqeju nejenel te okslabʼil judiy kyqʼama qa otoq che ok okslal te apóstata kyiʼj. Juntl grupo, aqeju in kyqʼamaʼntoq qa okslal qe tiʼj Jesús, pero ok tilil kyuʼn tuʼn t-xi kynimen Tley Moisés tuʼnju nyalo kyajtoq tuʼn kyel ikʼen (Gál. 6:12). ¿Tiʼtzulo onin kyiʼj okslal lu tuʼn kukx tikʼx kyuʼn ex tuʼn kyten tzʼaqli?

6. ¿Tiʼ xi tqʼamaʼn apóstol Pablo kye aj hebreo? (Hebreos 5:​14–6:1).

⁶ Toj carta xi ttzʼibʼin Pablo kye aj hebreo xi tqʼamaʼn kye tuʼn kyxnaqʼtzan tiʼj Tyol Dios ex tuʼn kyximen tiʼj  (kjawil uʼjit Hebreos 5:​14–6:1). Ajbʼen Tyol Dios tuʼn apóstol Pablo aju kubʼ tzʼibʼin toj yol hebreo tuʼn t-xi tchikʼbʼaʼn qa mastoq tbʼanel alkye tten in che kʼulin okslal twitz Jehová twitzju alkye tten in bʼant kyuʼn judiy. a Ojtzqiʼntoq tuʼn apóstol Pablo qa ma chʼiy kyojtzqibʼil ex kynabʼil okslal tiʼj Tyol Dios, jakutoq tzʼonin kyiʼj tuʼn tel kyikʼen qe nya ax tok xnaqʼtzbʼil ex tuʼn miʼn tel kypan kyibʼ tiʼj axix tok.

7. ¿Alkyeqe nya bʼaʼn in qo ok weʼ twitz toj ambʼil jaʼlo?

⁷ Ax ikx toj ambʼil jaʼlo, ateʼ xjal in xi kyqʼamaʼn nya ax tok tqanil kyiʼj tley Jehová ex aj qʼoj qeʼ qiʼj. In kyqʼamaʼn qa nya bʼaʼn xjal qoʼ tuʼnju in chex qnimen qe tkawbʼil Dios tiʼj yaẍbʼil. Aj tikʼ junjun qʼij, in chʼexpaj alkye tten in che ximen xjal twitzju alkye tten in ximen Jehová (Prov. 17:15). Tuʼntzunju, nim toklen tuʼn tel qnikʼ tiʼj alkyeqe nya ax tok xnaqʼtzbʼil ex tuʼn kyel qikʼun. Mintiʼ tuʼn t-xi qqʼoʼn ambʼil kye aj qʼoj tuʼn tnaj qʼuqbʼil qkʼuʼj kyuʼn tuʼntzun miʼn tkyaj qtzaqpiʼn tuʼn qajbʼen te Jehová (Heb. 13:9).

8. ¿Tzeʼn jaku qo chʼiy toj qokslabʼil?

⁸ Xi tqʼamaʼn apóstol Pablo kye okslal tuʼn kychʼiy toj kyokslabʼil ex ax jlu tuʼn tbʼant qe quʼn. ¿Alkye tten? Aj tok tilil quʼn tuʼn tchʼiy qojtzqibʼil tiʼj axix tok ex tuʼn tten qximbʼetz ik tzeʼn te Jehová. Nim toklen tuʼn kukx tbʼant jlu quʼn maske otoqxi txi qtziyen tuʼn qajbʼen te Jehová ex maske otoqxi qo bautisarin. Tuʼntzunju, nim toklen tuʼn kukx quʼjin ex tuʼn kukx qxnaqʼtzan tiʼj Tyol Dios maske ma tzikʼ nim ambʼil moqa chʼin ambʼil toklen qojtzqiʼn axix tok (Sal. 1:2). Qa kukx ma qo xnaqʼtzan tiʼj Tyol Dios, kʼonil qiʼj tuʼn tchʼiy qʼuqbʼil qkʼuʼj, ik tzeʼn yolin apóstol Pablo tiʼj nim maj toj tcarta (Heb. 11:​1, 6).

«QEJU JUNX QOKSLABʼL KYUKʼIL TUʼN TKLET QANMI»

9. ¿Tiquʼn iltoq tiʼj tuʼn tten qʼuqbʼil kykʼuʼj okslal kyuw?

⁹ Iltoq tiʼj tuʼn tten nimxix qʼuqbʼil kykʼuʼj okslal te Judea tuʼn kykyaj anqʼin tiʼjju nya bʼaʼn chʼixtoq tul kanin (Heb. 10:​37-39). Otoq kyaj tqʼamaʼn Jesús kye t-xnaqʼtzbʼen tuʼn kyxiʼ oq kywiʼ witz aj tok kyqʼoʼn kywitz kyiʼj soldad in pon kytxolbʼan kyibʼ tiʼj tnam Jerusalén. Kykyaqil okslal iltoq tiʼj tuʼn t-xi kybʼiʼn consej lu, tanto qeju in che anqʼin toj tnam Jerusalén ex qeju in che anqʼin toj kojbʼil (Luc. 21:​20-24). Toj ambʼil aju, aj kypon soldad qʼojil tiʼj jun tnam atz in cheʼx xjal klol kyibʼ toj jun tnam tok muro tiʼj, ik tzeʼn Jerusalén. Atzunte Jesús xi tqʼamaʼn kye t-xnaqʼtzbʼen tuʼn kyxi oq twiʼ witz, tuʼntzunju, nimtoq toklen tuʼn tten nimxix qʼuqbʼil kykʼuʼj tuʼn tbʼant jlu kyuʼn.

10. ¿Tiʼ iltoq tiʼj tuʼn tbʼant kyuʼn okslal otoq chʼiy qʼuqbʼil kykʼuʼj? (Hebreos 13:17).

¹⁰ Ax ikx iltoq tiʼj tuʼn tok qeʼ kykʼuʼj okslal lu kyiʼj erman otoq txi tqʼoʼn Jesús kyoklen toj congregación. Aqeju erman lu, xilo kyqʼoʼn tqanil kye okslal tiʼj alkye ambʼil tuʼn kyxi oq ex alkye tten tuʼn tbʼant kyuʼn (kjawil uʼjit Hebreos 13:17). Aju yol griego ajbʼen toj Hebreos 13:17 tiʼj yol «kynimanxe», in tzaj tyekʼin qa in nimen jun xjal teju in tzaj qʼonte  tqanil te tuʼnju in nok qeʼ tkʼuʼj tiʼj ex nya tuʼnju il tiʼj tuʼn tbʼant tuʼn. Iltoq tiʼj tuʼn tchʼiy qʼuqbʼil kykʼuʼj okslal kyiʼj ansyan naʼmxtoq ttzaj nimxix yajbʼil. Qa bʼaʼntoq che nimen kyoj tbʼanel ambʼil, mastoq fácil tuʼn kynimen kyoj ambʼil kwest.

11. ¿Tiquʼn nim toklen tuʼn tten jun qʼuqbʼil qkʼuʼj kyuw?

¹¹ Nim toklen tuʼn tten qʼuqbʼil qkʼuʼj kyuw ik tzeʼn qe okslal xi ttzʼibʼin apóstol Pablo carta kye. In qo anqʼin toj jun ambʼil jatumel chʼixmi kykyaqil xjal mintiʼ in xi kynimen qa chʼix tul xitbʼil, axpe ikx in che xmayin qiʼj tuʼnju in xi qnimen jlu (2 Ped. 3:​3, 4). Ax tok, in tzaj tqʼamaʼn Biblia junjun tqanil tiʼjju kbʼajel toj nimxix yajbʼil, pero at mas tqanil mintiʼ ojtzqiʼn quʼn. Nim toklen tuʼn tok qeʼ qkʼuʼj tiʼj qa chʼix tul tiʼn Jehová xitbʼil ex qa qo okel t-xqʼuqin toj ambʼil aju (Hab. 2:3).

12. ¿Tiʼ kʼonil qiʼj tuʼn qkyaj anqʼin aj ttzaj nimxix yajbʼil?

¹² Ax ikx nim toklen tuʼn tok qeʼ qkʼuʼj tiʼj qa in najbʼen «majen in bʼant taqʼun [ . . . ] ex at tnabʼl» tuʼn Jehová toj ambʼil jaʼlo tuʼn ttzaj tyekʼin qbʼe (Mat. 24:45). Ik tzeʼn kye okslal aj hebreo, xilo qʼoʼn tqanil kye tej kypon soldad te Roma, axlo ikx qe tzul qkʼamoʼn junjun tqanil tiʼj alkye tten jaku qo kyaj anqʼin aj tul nimxix yajbʼil. Nimxix toklen tuʼn tchʼiy qʼuqbʼil qkʼuʼj jaʼlo kyiʼj qeju qʼil twitz aqʼuntl toj ttnam Jehová. Qa mintiʼ in nok qeʼ qkʼuʼj kyiʼj jaʼlo ex qa mintiʼ in chex qnimen, mas kwest kʼelel toj qwitz tuʼn t-xi qnimen tqanil tzul kyqʼoʼn qe aj tul nimxix yajbʼil.

13. ¿Tiquʼn pon consej tkuʼx toj Hebreos 13:5 toj ambʼil mas tbʼanel?

¹³ Tej in che ayontoq okslal Hebreo tiʼj tqanil tuʼn kyxi oq twi witz, iltoq tiʼj tuʼn tok tilil kyuʼn tuʼn miʼn tten nim tiʼchaq kye ex tuʼn miʼn tpon kykʼuʼj tiʼj pwaq (kjawil uʼjit Hebreos 13:5). Ateʼ junjun kye otoq che ikʼ kyoj ambʼil kwest, ik tzeʼn tej tkubʼaj kypwaq ex kywa (Heb. 10:​32-34). Ax ikx otoq tzikʼx nya bʼaʼn kyuʼn tuʼn tpaj tbʼanel tqanil, pero atlo junjun kye xi tzyet tuʼn tok tilil kyuʼn tuʼn tkambʼet mas kypwaq tuʼnju nyatoq kyaj tuʼn ttzaj juntl maj mebʼayil ex nya bʼaʼn kyiʼj. Pero mlaytoq che klet tuʼn pwaq aj tkubʼ najsaʼn tnam Jerusalén (Sant. 5:3). Qa kʼujlaʼntoq pwaq kyuʼn, kwesttoq kʼelel toj kywitz tuʼn kyetz oq, tuʼn tkyaj kyqʼoʼn kyja ex qe tiʼchaq at kye.

14. ¿Tiʼ kbʼantel quʼn qa kyuw taʼ qʼuqbʼil qkʼuʼj?

¹⁴ Qa ma tzʼok qeʼxix qkʼuʼj tiʼj qa chʼix tul xitbʼil tuʼn Jehová, mlay kubʼ qximen tuʼn tten mastl qpwaq ex tiʼchaq qe. Mlay ten tvalor pwaq aj tul nimxix yajbʼil. In tzaj tqʼamaʼn Biblia qa «aju saq pwaq at kyukʼil [xjal] kʼelex kyxoʼn tuj cay» tuʼnju kʼelel kynikʼ tiʼj qa «aju qʼan pwaq ex aju saq pwaq at kyukʼil mlay che klet tuʼn tuj tqʼijlalil ok ttzaj ttxʼuʼjil Qman» (Ezeq. 7:19). Maslo bʼaʼn tuʼn miʼn t-xi bʼaj qwiʼ tiʼj pwaq, sino tuʼn kybʼant junjun tiʼchaq quʼn tuʼn tok qxqʼuqin qibʼ ex qe toj qja ex tuʼn tten ambʼil qiʼj tuʼn qajbʼen te Jehová. Nyalo toj tumel qa ma tzʼokx qqʼon qibʼ tjaqʼ kʼas moqa tuʼn tok qqʼoʼn nim ambʼil tuʼn kyok xqʼuqit qe tiʼchaq at qe. Il tiʼj tuʼn tok tilil quʼn tuʼn miʼn tkubʼ qqʼoʼn qe tiʼchaq tnejel toj qanqʼibʼil (Mat. 6:​19, 24). Akux in pon ambʼil tuʼn tul xitbʼil, il tiʼj tuʼn tkubʼ qyekʼin qa mas in nok qeʼ qkʼuʼj tiʼj Jehová ex nya kyiʼj tiʼchaq at qe.

 IL TIʼJ TUʼN TIKʼX QUʼN

15. ¿Tiquʼn nim toklen tuʼn kukx tikʼx kyuʼn okslal?

¹⁵ Iltoq tiʼj tuʼn kukx tikʼx kyuʼn okslal te Judea toj kyajbʼebʼil te Jehová tuʼnju chʼixtoq kytzaj mas nya bʼaʼn (Heb. 10:​36, TNM). Ateʼ junjun okslal otoq che ok weʼ twitz ikʼbʼil, pero ax ikx ateʼ junjuntl naʼmxtoq kyok weʼ twitz. Tuʼntzunju, xi tqʼamaʼn apóstol Pablo kye qa mastoq nim ikʼbʼil che okel weʼ twitz ex qa iltoq tiʼj tuʼn kyten tzʼaqli ajxi kykyim ik tzeʼn te Jesús (Heb. 12:4). Tzaj nim kyqʼoj judiy tuʼnju nim xjal e okslan tiʼj Jesús. Toj jun ambʼil tej naʼmxtoq tbʼaj jlu, e ok tzaqpaj jun kʼloj xjal tiʼj apóstol Pablo tej in pakbʼantoq toj tnam Jerusalén. Ex kyqʼama mas te 40 judiy jlu: «Ma bʼaj qjuramentin qibʼe qxolxe tuʼn miʼn t-xi qnikʼbʼeʼne jun tiʼxti qa naʼnxtoq tkubʼ Pablo quʼne, ex mlay tzikʼx tiʼj» (Hech. 22:22; 23:​12-14). Maske o che el ikʼun qe okslal kyuʼn nim xjal, kukx o tzʼok kychmon kyibʼ, kukx o che pakbʼan ex kukx ten qʼuqbʼil kykʼuʼj kyuw.

16. ¿Tzeʼn in nonin carta xi tzʼibʼin kye aj hebreo tuʼn tten qximbʼetz toj tumel kyiʼj nya bʼaʼn? (Hebreos 12:7).

¹⁶ ¿Tiʼtoq jaku tzʼonin kyiʼj okslal tuʼn tikʼx ikʼbʼil kyuʼn? Ojtzqiʼntoq tuʼn Pablo qa iltoq tiʼj tuʼn tten kyximbʼetz okslal toj tumel kyiʼj nya bʼaʼn. Tuʼntzunju xi tchikʼbʼaʼn kye qa jakutoq txi tqʼoʼn Dios ambʼil tuʼn ttzaj nya bʼaʼn kyiʼj tuʼntzun tonin kyiʼj tuʼn kyok te tbʼanel okslal (kjawil uʼjit Hebreos 12:7). Ax ikx jakutoq tzʼajbʼen ambʼil lu kyuʼn tuʼn tten tbʼanel kymod. Iktzun tten mastoq fácil kʼelel toj kywitz tuʼn tikʼx nya bʼaʼn kyuʼn ex tuʼn kychʼiy toj kyokslabʼil (Heb. 12:11).

17. ¿Tiʼtoq ojtzqiʼn tuʼn Pablo tiʼjju tuʼn tikʼx ikʼbʼil kyuʼn okslal?

¹⁷ Xi tqʼamaʼn Pablo kye okslal Hebreo tuʼn kukx tikʼx kyuʼn ex tuʼn miʼn kykubʼ numj. Ojtzqiʼntoq tuʼn apóstol Pablo tiquʼn  xi tqʼoʼn consej jlu kye. Tnejel, tuʼnju otoq tzʼok lipen kyiʼj okslal ojtxe ex ojtzqiʼntoq tuʼn tiʼtoq in che ok weʼ twitz. Tkabʼin, tuʼnju otoq tzʼel ikʼun tej tok te okslal ex otoq che ok lipen aj qʼoj tiʼj nimku maj (2 Cor. 11:​23-25). Ojtzqiʼn tuʼn Pablo tiʼ iltoq tiʼj tuʼn tbʼant kyuʼn okslal tuʼn tikʼx nya bʼaʼn kyuʼn. Tuʼntzunju xi tnaʼn kye qa mintiʼ tuʼn tok qeʼ kykʼuʼj kyiʼjx, sino tiʼj Jehová. Jakutoq ten kyipumal okslal qa kukx ma tzaj kynaʼn texto lu: «Ate Qman onil weye; mlay chin xobʼe» (Heb. 13:6).

18. ¿Tiʼ bʼaʼn tuʼn tel qnikʼ tiʼj ex tiʼ bʼaʼn tuʼn tbʼant quʼn jaʼlo?

¹⁸ Toj ambʼil jaʼlo, at nim erman in che ok weʼ twitz ikʼbʼil. Jaku kubʼ qyekʼin qa kʼujlaʼn qeʼ quʼn aj qnaʼn Dios kyiʼj, ex at maj il tiʼj tuʼn t-xi qjyoʼn junjuntl tumel tzeʼn tuʼn qonin kyiʼj (Heb. 10:33). In tzaj tqʼamaʼn Biblia jlu: «Kykyaqil qeju kyajbʼil kukx tuʼn kynimante Jesucrist, ok che yajlanjtzel» (2 Tim. 3:12). A t-xilen jlu qa qkyaqilx il tiʼj tuʼn tbʼaj qbʼinchaʼn qten naʼmxtoq ttzaj nimxix nya bʼaʼn. Il tiʼj tuʼn tok qeʼxix qkʼuʼj tiʼj qa qo tzajel tonin Jehová tuʼn tikʼx alkyexku nya bʼaʼn quʼn. Ojtzqiʼn tuʼn toj alkye ambʼil kxel tqʼoʼn onbʼil kye qeju in che ten tzʼaqli twitz (2 Tes. 1:​7, 8).

19. ¿Alkyeqe junjun tiʼchaq bʼaʼn tuʼn tbʼant quʼn tuʼntzun tbʼaj qbʼinchaʼn qten aj tul nimxix yajbʼil? (Ax ikx qʼonka twitza tiʼj tilbʼilal).

¹⁹ Oninxixlo carta xi ttzʼibʼin apóstol Pablo kye aj hebreo tuʼn tbʼaj kybʼinchaʼn kyten tuʼn tikʼx nya bʼaʼn kyuʼn aju chʼixtoq tul. Xi tqʼamaʼn Pablo kye tuʼn tchʼiy kyojtzqibʼil ex kynabʼil tiʼj Tyol Dios. Iktzun tten jakutoq tzʼel kynikʼ alkyeqe nya ax tok xnaqʼtzbʼil tuʼntzun tel kyikʼen ex tuʼntzun miʼn tchewix qʼuqbʼil kykʼuʼj. Ax ikx xi tqʼamaʼn kye tuʼn tok qeʼ kykʼuʼj tiʼj Jesús ex kyiʼj qeju qʼil twitz aqʼuntl toj congregación tuʼntzun t-xi kynimen qe tqanil tzultoq kyqʼoʼn. Ex xi tyekʼin kye qa mastoq fácil kʼelel toj kywitz qa ma ten kyximbʼetz toj tumel kyiʼj nya bʼaʼn, toj juntl yol, qa ma kubʼ kyximen qa in tzajtoq tqʼoʼn Jehová ambʼil kye tuʼn kychʼiy toj kyokslabʼil. Ax ikx qe, qa ma txi qbʼiʼn qe consej in che jatz toj Biblia, jaku tzʼonin qiʼj tuʼn kukx tikʼx quʼn ex tuʼn qten tzʼaqli ajxi tul xitbʼil (Heb. 3:14).