Naʼmxtoq qxnaqʼtzaʼn, atlo maj in kubʼ qximen jlu: «¿Tiʼ kʼelel nnikʼe tiʼj toj xnaqʼtzbʼil lu?». Maske jaku kubʼ qximen qa aju xnaqʼtzbʼil qo xnaqʼtzal tiʼj ya ojtzqiʼn quʼn, pero nim toklen tuʼn ttzaj qkʼamoʼn qe akʼaj xnaqʼtzbʼil tajbʼil Jehová tuʼn ttzaj tyekʼin qe. ¿Tzeʼn jaku bʼant quʼn?

Qaninxa tnabʼila te Jehová. Miʼn kubʼ t-ximana qa ya ojtzqiʼn tkyaqil tuʼna, sino qʼonka tilil tuʼn tel tnikʼa kyiʼj akʼaj xnaqʼtzbʼil (Prov. 3:​5, 6). Qaninxa onbʼil te Jehová tuʼn tonin tiʼja tuʼn tel tnikʼa tiʼj tiʼ tajbʼil tuʼn ttzaj tyekʼin teya toj ambʼil aj t-xnaqʼtzana (Sant. 1:5).

Qʼonxa ambʼil te Tyol Dios tuʼn tonin tiʼja. «Aju tyol Dios itzʼte» (Heb. 4:12). Tkyaqil maj aj tjaw quʼjin Biblia, jaku tzʼel qnikʼ kyiʼj akʼaj xnaqʼtzbʼil ex jaku tzʼonin qiʼj toj junxichaq tten qanqʼibʼil. Pero oʼkx jaku tzʼonin qiʼj qa ma txi qqʼoʼn ambʼil te Jehová tuʼn kukx qtzaj t-xnaqʼtzaʼn.

Qʼonxa chjonte tiʼj tkyaqilju in kubʼ tqʼoʼn Jehová tibʼaj tmes. Aju xnaqʼtzbʼil in tzaj tqʼoʼn Jehová ik tten ik tzeʼn nim qwa, qchiʼ ex qkʼaʼ aju «kʼokʼjxix wen ex [ . . . ] aju mas tbʼanilxix» (Is. 25:6). Xnaqʼtzana kyiʼj kykyaqil xnaqʼtzbʼil, axpe ikx kyiʼj qeju mintiʼ tgana kyiʼj. Nya oʼkx che onil tiʼja, sino ax ikx tbʼanel che elel toj twitza.