1, 2. ¿Tiquʼn tbʼanel tuʼnju o qo kubʼ tbʼinchaʼn Jehová tuʼn tkubʼ qnaʼn tzalajbʼil aj t-xi qqʼoʼn chʼin kye txqantl ex nya aj ttzaj qkʼamoʼn?

 O QO kubʼ tbʼinchaʼn Jehová tuʼn qtzalaj mas aj t-xi qqʼoʼn chʼin kye txqantl ex nya aqoʼ tuʼn ttzaj qkʼamoʼn (Hech. 20:35). Ax tok, in qo tzalaj aj ttzaj qʼoʼn jun oyaj qe. Pero mas in qo tzalaj qa aqoʼ ma qox qʼonte. Ex tbʼanel tuʼnju o qo kubʼ tbʼinchaʼn Jehová tuʼn tbʼant jlu quʼn. ¿Tiquʼn?

² Tuʼnju toj qqʼabʼ taʼ tuʼn qtzalajxix. Ex qa ma txi qjyoʼn tumel tzeʼn tuʼn qonin kyiʼj txqantl, mas qo tzalajel. ¡O qo kubʼ tbʼinchaʼn Jehová te jun tten puro tbʼanel! (Sal. 139:14).

3. ¿Tiquʼn in tzaj tqʼamaʼn Biblia qa a Jehová «aju Dios at-xix tzalajbʼil tukʼil»?

³ In tzaj tqʼamaʼn Biblia qa in che tzalaj qeju in xi kyqʼoʼn chʼin kye txqantl. Tuʼntzunju, mintiʼ in qo jaw labʼin tiʼj aj ttzaj qʼamaʼn qa a Jehová «aju Dios at-xix tzalajbʼil tukʼil» (1 Tim. 1:11). Ate tzaj qʼonte oyaj tnejel ex mi aʼl juntl in tzaj qʼonte oyaj ik tzeʼn te. Ik tzeʼn tqʼama apóstol Pablo, «tuʼn Dios itzʼ qoʼ, ex tuʼn in qo yukch, ex tuʼn atoʼ» (Hech. 17:28). Nya oʼkxju, ax ikx «tkyaqil oyaj bʼaʼn ex tkyaqil oyaj tbʼanilxix» atz in tzaj tukʼil Jehová (Sant. 1:17).

4. ¿Tiʼ jaku tzʼonin qiʼj tuʼn qtzalaj mas?

⁴ ¿Tiʼ jaku bʼant quʼn qa qaj tuʼn qtzalaj mas aj t-xi qqʼoʼn chʼin kye txqantl? Ik tzeʼn kʼelel qnikʼ tiʼj toj xnaqʼtzbʼil lu, bʼaʼn qʼoʼn Jehová oyaj ex jaku tzʼel qkanoʼn tiʼj (Efes. 5:1). Ax ikx qo xnaqʼtzal tiʼj tiʼ jaku bʼant quʼn qa in kubʼ qnaʼn qa mintiʼ in tzaj kyqʼoʼn txqantl chjonte qe tiʼjju in bʼant quʼn kyiʼj. Tkyaqilju kʼelel qnikʼ tiʼj, kʼonil qiʼj tuʼn kukx t-xi qqʼoʼn chʼin kye txqantl ex tuʼn tkubʼ qnaʼn nim tzalajbʼil.

 QKANOMIL TIʼJ JEHOVÁ AJ T-XI QQʼOʼN CHʼIN KYE TXQANTL

5. ¿Alkyeqe tiʼchaq in tzaj tqʼoʼn Jehová qe?

⁵ Qo yolin kyiʼj junjun techel in tzaj tyekʼin qa bʼaʼn qʼoʼn Jehová oyaj. Jun techel, in tzaj tqʼoʼn aju at tajbʼen qe. Mintiʼlo in tzaj tqʼoʼn qqʼinumabʼil, pero in tzaj tqʼoʼn aju at tajbʼen qe ik tzeʼn qwa, qxbʼalun ex jun lugar jatumel tuʼn qanqʼin (Sal. 4:8; Mat. 6:​31-33; 1 Tim. 6:​6-8). Mintiʼ in tzaj tqʼoʼn Jehová qe tiʼchaq lu qe tuʼnju il tiʼj tuʼn tbʼant tuʼn. Qa ikju, ¿tiquʼntzun in bʼant tuʼn?

6. ¿Tiʼ in tzaj t-xnaqʼtzaʼn Mateo 6:25 ex 26 qe?

⁶ In tzaj tqʼoʼn Jehová aju at tajbʼen qe tuʼnju kʼujlaʼn qoʼ tuʼn. Qo xnaqʼtzan tiʼj jun techel kubʼ tqʼoʼn Jesús toj Mateo 6:25 ex 26 (kjawil uʼjit). Yolin kyiʼj qe pájaro kyoj versículo lu tej tqʼama: «Mintiʼ in che awan ex mintiʼ in che chmon twitz awal, ex mintiʼ kytxʼutxʼ te chmobʼl kywa». Ax ikx tqʼama: «Ate Kymane aju at tuj kyaʼj nnoʼk kʼaʼchante kye». Ex tzaj tqanin xjel lu: «¿Myapetzun mas maʼ kyxilene kywitz qe chyuʼj?». Toj techel kubʼ tqʼoʼn, tajtoq tuʼn ttzaj t-xnaqʼtzaʼn qa mas nim kyoklen tmajen Jehová kywitz qe txkup. Qa in xqʼuqin Jehová kyiʼj txkup, jaku tzʼok qeʼ qkʼuʼj tiʼj qa ax ikx qe qo okel t-xqʼuqin. Tuʼnju a Jehová Qman ex kʼujlaʼn qoʼ tuʼn, in tzaj tqʼoʼn aju at tajbʼen qe (Sal. 145:16; Mat. 6:32).

7. ¿Alkye tten jaku tzʼel qkanoʼn tiʼj Jehová? (Ax ikx qʼonka twitza tiʼj tilbʼilal).

⁷ Kʼujlaʼn qe txqantl quʼn ik tzeʼn te Jehová ex tuʼntzunju in nok tilil quʼn tuʼn t-xi qqʼoʼn aju at tajbʼen kye. Jun techel, qa at jun erman mintiʼ twa moqa mintiʼ t-xbʼalun, jaku tzʼajbʼena tuʼn Jehová tuʼn tonina tiʼj. Ojtzqiʼn kywitz tmajen Jehová tuʼnju jun rat naj in xi kyqʼoʼn onbʼil aj ttzaj jun nya bʼaʼn. Qo ximen tiʼjju bʼant kyuʼn erman tej ttzaj COVID-19. Ateʼ junjun erman xi kyqʼoʼn wabʼj, xbʼalun ex junjuntl tiʼchaq kye erman attoq tajbʼen kye. Ax ikx ateʼ junjuntl erman xi kyqʼoʼn pwaq te onbʼil tiʼj aqʼuntl in bʼant twitz tkyaqil Txʼotxʼ tuʼntzun t-xi qʼet onbʼil kye erman jatumel tzaj jun xitbʼil tuʼnx twitz Txʼotxʼ. Japun kyuʼn aju in tzaj tqʼamaʼn Hebreos 13:16: «Miʼn tzikʼ tnaʼl kyuʼne tuʼn kybʼinchanteye aju bʼaʼn ex tuʼn kyonine kyibʼe kyxolxe; porke ate jlu jun oyaj in xi kyqʼoʼne te Dios in tzalaj tiʼj».

8. ¿Tiʼ jaku bʼant quʼn noq tuʼn qipumal in tzaj tqʼoʼn Jehová? (Filipenses 2:13).

 ⁸ In tzaj tqʼoʼn Jehová qipumal. At nim tipumal Jehová ex tgan tuʼn tajbʼen tuʼn tuʼn tonin kyiʼj tmajen (kjawil uʼjit Filipenses 2:13). ¿Ope txi tqanin teya te Jehová tuʼn tonin tiʼja tuʼn miʼn tkubʼ tzʼaqa toj jun il? ¿Moqa xi tqanina tipumala te tej tok weʼya twitz jun nya bʼaʼn? Nyalo oʼkx jlu xi tqanina, axlo ikx o txi tqanina tipumala tuʼn kybʼant junjun tiʼchaq tuʼna junjun qʼij. Tej ttzaj ttzaqʼweʼn Jehová tnaʼj Diosa ex tej ttzaj tqʼoʼn tipumala, kubʼlo tnaʼna ik tzeʼn te apóstol Pablo tej tqʼama jlu: «Tkyaqil tiʼchaq in nikʼx wuʼne noq tuʼn wipumale in tzaj tqʼoʼn aju qʼolte ipumalj» (Filip. 4:​13, TNM).

9. ¿Tiʼ mlay bʼant quʼn ex tiʼ jaku bʼant quʼn? (Ax ikx qʼonka twitza tiʼj tilbʼilal).

⁹ Mlay bʼant tuʼn t-xi qqʼoʼn kyipumal txqantl ik tzeʼn in bʼant tuʼn Jehová, pero jaku tzʼajbʼen qipumal quʼn tuʼn qonin kyiʼj. Jun techel, qa at jun erman ma tijen moqa yabʼ taʼ, jaku qoʼx bʼinchal limpieza toj tja moqa jaku txi qqʼamaʼn te qa jaku qoʼx laqʼol qe tiʼchaq at tajbʼen te. Qa jaku bʼant, ax ikx jaku txi qqʼamaʼn tuʼn qonin tiʼj limpieza ex tiʼj mantenimiento te Ja te Chmabʼil. Qa ma tzʼajbʼen qipumal quʼn ik tzeʼn jlu, kxel qqʼoʼn jun tbʼanel onbʼil kye erman.

10. ¿Tzeʼn jaku che ajbʼen yol quʼn tuʼn qonin kyiʼj txqantl?

¹⁰ Bʼaʼn tuʼn ttzaj qnaʼn qa at kyipumal qyol ex jaku tzʼajbʼen quʼn tuʼn qonin kyiʼj txqantl. ¿Ojtzqiʼnpe jun erman tuʼna aju taj tuʼn t-xi qʼuqbʼet tkʼuʼj? Qa ikju, tbʼanel tuʼn t-xi tqʼuqbʼaʼna tkʼuʼj. Jaku txiʼya visitaril te, jaku txi tllamarina, jaku txi tqʼoʼna jun tarjeta te moqa jaku txi ttzʼibʼina jun mensaje te. Nya il tiʼj tuʼn t-xi qqʼamaʼn nim yol, sino tuʼn t-xi qqʼamaʼn tuʼn tkyaqil qanmi. At maj oʼkx junjun yol taj jun erman tuʼn tok tbʼiʼn tuʼntzun kukx tten tzʼaqli ex tuʼn tkubʼ tnaʼn bʼaʼn (Prov. 12:25; Efes. 4:29).

11. ¿Tiʼ in bʼant tuʼn Jehová tukʼil tnabʼil?

¹¹ In tzaj tqʼoʼn Jehová qnabʼil. Kubʼ ttzʼibʼin discípulo Santiago jlu: «Qa at jun kyxole atx taj tnabʼl, qaninx tnabʼl te Dios». Ex tqʼamaʼntl: «Porke ate Dios nimxix in tzaj tqʼoʼn kye kykyaqil ex mintiʼ in ilin» (Sant. 1:5). In tzaj tyekʼin versículo lu qa mintiʼ in kyaj ten Jehová tukʼil tnabʼil, sino in tzaj tqʼoʼn kye txqantl. Ex aj ttzaj tqʼoʼn qnabʼil, mintiʼ in qʼojin. Nya taj tuʼn tkubʼ qnaʼn nya bʼaʼn aj t-xi qqanin onbʼil te, sino taj tuʼn t-xi qqanin te (Prov. 2:​1-6).

12. ¿Alkye tten jaku txi qyekʼin kye txqantl aju ojtzqiʼn quʼn?

 ¹² Yajtzun qe, ¿jakupe tzʼel qkanoʼn tiʼj Jehová aj qonin kyiʼj txqantl tuʼn tten kyojtzqibʼil? Jaku (Sal. 32:8). At nimku tumel tzeʼn jaku bʼant quʼn. Ik tzeʼn aj qonin kyiʼj akʼaj pakbʼal tuʼn tbʼant-xix kypakbʼan. Ax ikx kye ansyan, jaku che onin kyiʼj onil kye ansyan ex kyiʼj junjuntl erman tuʼn tjapun kyoklen toj congregación. Ex ateʼ junjun ermano ex ermana at kyojtzqibʼil tiʼj construcción ex mantenimiento in xi kyqʼon xnaqʼtzbʼil kye txqantl erman tuʼn tbʼant aqʼuntl lu kyuʼn kyoj Ja te Chmabʼil ex kyoj junjuntl ja in che ajbʼen tuʼn ttnam Jehová.

13. ¿Tzeʼn jaku tzʼel qkanoʼn tiʼj Jehová aj t-xi qqʼoʼn xnaqʼtzbʼil kye txqantl?

¹³ Tbʼanel tuʼn tel qkanoʼn tiʼj Jehová aj t-xi qqʼoʼn xnaqʼtzbʼil kye txqantl. Ik tzeʼn ma tzʼel qnikʼ tiʼj, tgan Jehová tuʼn ttzaj tqʼoʼn qnabʼil. Ax ikx qe qaj tuʼn t-xi qyekʼin aju ojtzqiʼn quʼn kye txqantl. Jakulo kubʼ qximen qa jaku tzʼel qʼiʼn qoklen qa ma txi qyekʼin tkyaqilju ojtzqiʼn quʼn. Pero mintiʼ tuʼn qtzaj xobʼ te jlu. Ax ikx nya bʼaʼn qa ma kubʼ t-ximen jun tmajen Jehová jlu: «Bʼaʼn tuʼn tbʼant tuʼn tjunalx, porke ax ikx weye mi aʼl jun tzaj yekʼinte weye». Nya oʼkx in xi qyekʼin aju ojtzqiʼn quʼn, sino in bʼant quʼn tukʼil tkyaqil qanmi (1 Tes. 2:8). In nok qeʼ qkʼuʼj tiʼj qa iktzun tten kbʼantel «tuʼn kyqʼonte xnaqʼtzbʼil kye txqantl» (2 Tim. 2:​1, 2). Qa qkyaqilx ma qo onin kyiʼj txqantl tuʼn tten kyojtzqibʼil, qkyaqilx ktel qnabʼil ex qkyaqilx qo tzalajel.

QA MINTIʼ IN TZAJ QʼOʼN CHJONTE TIʼJJU IN BʼANT QUʼN

14. ¿Tiʼ in bʼant kyuʼn txqantl aj qonin kyiʼj?

¹⁴ Aj tbʼant junjun tiʼchaq quʼn kyiʼj txqantl ex mas kyiʼj qerman, chʼixmi tkyaqil maj in tzaj kyqʼoʼn chjonte qe. At maj in tzaj kyqʼoʼn chjonte qe aj ttzaj kytzʼibʼin jun tal uʼj moqa in xi kyjoʼn junjuntl tumel (Col. 3:15). Ex in qo tzalajxix aj tbʼant jlu kyuʼn.

15. ¿Tiʼ bʼaʼn tuʼn ttzaj qnaʼn qa mintiʼ in tzaj qʼoʼn chjonte qe tiʼjju in bʼant quʼn kyiʼj txqantl?

¹⁵ Pero at maj nya kykyaqil in tzaj kyqʼoʼn chjonte qe tiʼjju in bʼant quʼn kyiʼj. Ex jakulo kubʼ qximen qa noqx gan ma tzʼel qpaʼn ambʼil, ma txi qqʼoʼn qipumal ex junjun tiʼchaq tuʼn qonin kyiʼj. Qa in kubʼ qnaʼn jlu, ¿tiʼ jaku tzʼonin qiʼj tuʼn kukx qtzalaj ex tuʼn miʼn ttzaj qqʼoj? Bʼaʼn tuʼn ttzaj qnaʼn aju in tzaj tqʼamaʼn Hechos 20:35 jatumel ma jatz xnaqʼtzbʼil lu. Nya oʼkx jaku qo tzalaj qa ma tzaj qʼoʼn chjonte qe kyuʼn txqantl, sino kukx kxel qqʼoʼn tukʼil tzalajbʼil maske mintiʼ saj qʼoʼn chjonte qe. ¿Tzeʼn jaku bʼant quʼn? Qo xnaqʼtzan tiʼj.

16. ¿Tiʼ bʼaʼn tuʼn ttzaj tnaʼna aj t-xi tqʼoʼna chʼin kye txqantl?

¹⁶ Bʼaʼn tuʼn ttzaj tnaʼna qa aj t-xi tqʼoʼna chʼin kye txqantl in nel tkanoʼna tiʼj Jehová. In tzaj tqʼoʼn Jehová tbʼanel tiʼchaq kye kykyaqil xjal maske ateʼ nim kye mintiʼ in xi kyqʼoʼn chjonte te (Mat. 5:​43-48). In tzaj tqʼamaʼn Jehová jlu kye tmajen: «Miʼn che ayone tuʼn tajtz qʼoʼn t-xel; kyjaʼtzun maʼ t-xilen jun oyaj tzul qʼoʼn kyeye» (Luc. 6:35). Tuʼntzunju, miʼn tzaj tbʼisa qa mintiʼ in tzaj qʼoʼn chjonte teya kyuʼn txqantl aj tbʼant jun tiʼ tuʼna kyiʼj. Bʼaʼn tuʼn ttzaj tnaʼna qa a Jehová tzul kʼiwlaʼn teya qa ma tzʼok tilil tuʼna tuʼn t-xi tqʼoʼna oyaj «tukʼil tzalajbʼil» (2 Cor. 9:7; Prov. 19:17).

17. ¿Tiʼ jaku tzʼonin qiʼj tuʼn tel qkanoʼn tiʼj Jehová? (Lucas 14:​12-14).

¹⁷ Juntl tiʼ jaku tzʼonin qiʼj tuʼn tel  qkanoʼn tiʼj Jehová aju qa ma txi qbʼiʼn aju in tzaj tqʼamaʼn Lucas 14:12 a 14 (kjawil uʼjit). Ax tok, nya jun il qa ma qo bʼinchan xtalbʼil moqa ma qo onin kyiʼj qeju jaku tzʼajtz kyqʼoʼn t-xel qe. Pero qa ma tzʼel qnikʼ tiʼj qa in qo onin kyiʼj txqantl tuʼnju qaj tuʼn tajtz kyqʼoʼn t-xel qe, ¿tiʼ jaku bʼant quʼn? Bʼaʼn tuʼn tok tilil quʼn tuʼn t-xi qbʼiʼn aju tqʼama Jesús: Tuʼn t-xi qqʼoʼn kye qeju mlay bʼant tuʼn tajtz kyqʼoʼn t-xel qe. Ex qa ma bʼant jlu quʼn, qo tzalajel tuʼnju kʼelel qkanoʼn tiʼj Jehová. Qa mintiʼ xqo ayon tuʼn ttzaj kyqʼoʼn txqantl t-xel qe, kukx kxel qqʼoʼn tukʼil tzalajbʼil maske mintiʼ saj kyqʼoʼn chjonte qe.

18. ¿Tiʼ kʼonil qiʼj tuʼn miʼn tkubʼ qximen nya bʼaʼn kyiʼj txqantl?

¹⁸ Miʼn kubʼ t-ximana nya bʼaʼn kyiʼj txqantl (1 Cor. 13:7). Qa mintiʼ ma tzaj qʼoʼn chjonte qe tuʼn juntl xjal ma qo onin tiʼj, bʼaʼn tuʼn qximen tiʼj xjel lu: «¿Axpe tok nya nim toklen toj twitz moqa noq ma tzikʼ tnaʼl tuʼn tuʼn ttzaj tqʼoʼn chjonte?». Ex bʼaʼn tuʼn ttzaj qnaʼn qa at maj at junjuntl tiʼchaq in nikʼ kyiʼj ex tuʼntzunju mintiʼ in tzaj kyqʼoʼn chjonte qe. At maj in che tzalaj tiʼjju ma bʼant quʼn kyiʼj, pero kwest in nela toj kywitz tuʼn ttzaj kyqʼoʼn chjonte. Ex at maj in tzaj kychʼixwi tuʼn kyonin txqantl kyiʼj, tuʼnju toj ambʼil ojtxe aqe kye e onin kyiʼj txqantl ex toj ambʼil jaʼlo ya mlay bʼant kyuʼn. Pero qa ax tok kʼujlaʼn qe erman quʼn, mlay kubʼ qximen nya bʼaʼn kyiʼj ex kukx kxel qqʼoʼn tukʼil tzalajbʼil (Efes. 4:2).

19, 20. ¿Tiquʼn bʼaʼn tuʼn tten qpasens? (Ax ikx qʼonka twitza kyiʼj tilbʼilal).

¹⁹ Tenx tpansensa. Ten tnabʼil rey Salomón tej tkubʼ ttzʼibʼin jlu: «Chtonxa twaya toj aʼ; knaʼ tkʼmaʼta tuʼmeʼl t-xel yajxiʼtel» (Ecl. 11:​1, XT). In tzaj tyekʼin texto lu qa at maj jaku tzaj qʼoʼn chjonte qe otoqxi tzikʼ nim ambʼil. Atzun jlu bʼaj tiʼj jun ermana.

²⁰ Ma tzikʼ nim ambʼil xi ttzʼibʼin t-xuʼjil  jun ansyan in bʼet kyojele Ja te Chmabʼil jun nota te jun ermana tzmatoq in jaw aʼ twiʼ jatumel xi tqʼamaʼn te tuʼn kukx tten tzʼaqli. Tej tikʼ junlo 8 abʼqʼi, xi ttzʼibʼin ermana jun carta te te qʼobʼil chjonte jatumel xi tqʼamaʼn jlu: «In xi ntzʼibʼine teya tuʼnju waje tuʼn t-xi nqʼamaʼne teya jniʼ o tzʼonina wiʼje maske mintiʼ ojtzqiʼn tuʼna». Ax ikx tqʼama: «Tbʼanel qe tyola kux ttzʼibʼina toj nota, pero aju mas kuʼpin toj wanmiye aju texto ex kukx in tzaj nnaʼne jaʼlo». a Kubʼ ttzʼibʼin junjun nya bʼaʼn otoq tzʼok weʼ twitz ex tqʼama: «Wajtoqe tuʼn tkyaj nqʼoʼne tkyaqil; ik tzeʼn wokslabʼile ex qe woklene. Pero kukx ul texto toj nwiʼye aju tzaj ttzʼibʼina ex onin wiʼje tuʼn kukx tok tilil wuʼne. Kyoj qeju 8 abʼqʼi o che ikʼ, o tzʼoninxix nota ex aju texto wiʼje». Olo tzalajxix t-xuʼjil ansyan in bʼet kyojele Ja te Chmabʼil tej tpon carta tukʼil. Qa at jun tiʼ o bʼant quʼn tiʼj juntl, jakulo tzaj qʼoʼn chjonte qe otoqxi tzikʼ nim ambʼil.

21. ¿Tiquʼn tbʼanel tuʼn kukx tok tilil quʼn tuʼn t-xi qqʼoʼn oyaj kye txqantl ik tzeʼn in bʼant tuʼn Jehová?

²¹ Ik tzeʼn ma tzʼel qnikʼ tiʼj, o qo kubʼ tbʼinchaʼn Jehová tuʼn qtzalaj aj t-xi qqʼoʼn chʼin kye txqantl ex nya aj ttzaj qkʼamoʼn. In kubʼ qnaʼn bʼaʼn aj qonin kyiʼj qerman ex qgan aj ttzaj kyqʼoʼn chjonte qe. Pero ax ikx qa mintiʼ saj kyqʼoʼn chjonte qe, in qo tzalaj tuʼnju otoq kubʼ qbʼinchaʼn aju bʼaʼn. Noq tiʼxku o txi qqʼoʼn, bʼaʼn tuʼn kukx ttzaj qnaʼn aju in tzaj tqʼamaʼn 2 Crónicas 25:9: «Jaku tzaj tqʼoʼn Qman mas nim teya twitz jlu». Mi aʼl juntl jaku tzʼaj qʼonte mas nim oyaj ik tzeʼn te Jehová. Ex mi aʼl juntl jaku tzʼaj tqʼoʼn tzalajbʼil qe aj qtzaj tkʼiwlaʼn. Tuʼntzunju, bʼaʼn tuʼn kukx tok tilil quʼn tuʼn t-xi qqʼoʼn oyaj kye txqantl ik tzeʼn in bʼant tuʼn Qman Jehová.