XNAQʼTZBʼIL 36
BʼITZ 89 In tzaj tkʼiwlaʼn Jehová xjal bʼaʼn bʼin ex bʼaʼn nimen
«Kynimanxe ju yol»
«Kynimanxe ju yol, ex mya noq oʼkx tuʼn kybʼinteye» (SANT. 1:22).
¿TIʼ KʼELEL QNIKʼ TIʼJ?
Kʼelel qnikʼ tiʼj qa nya oʼkx tuʼn tjaw quʼjin Tyol Dios tkyaqil qʼij, sino ax ikx il tiʼj tuʼn qximen tiʼj ex tuʼn tkubʼ qbʼinchaʼn aju in nel qnikʼ tiʼj.
1, 2. ¿Tiquʼn in che tzalaj tmajen Jehová? (Santiago 1:22-25).
TAJBʼIL Jehová ex Jesús tuʼn qtzalaj. Tqʼama aj tzʼibʼil te Salmo 119:2 jlu: «At tzalajbʼil kye qeju in kybʼinchaʼn aju in tmaʼn Dios tuʼn tbʼant ex in che jyon tiʼj Qman tuʼn tkyaqil kyanmi». Ax ikx tqʼama Jesús jlu: «Mas at tzalajbʼil kye qeju in xi kybʼiʼn tyol Dios ex in xi kyniman» (Luc. 11:28).
2 At nim tiquʼn tuʼn kytzalaj tmajen Jehová. Jun kyxol tiquʼn, tuʼnju in jaw quʼjin Biblia tkyaqil qʼij ex in nok tilil quʼn tuʼn tkubʼ qbʼinchaʼn aju in tzaj tqʼamaʼn (kjawil uʼjit Santiago 1:22-25).
3. ¿Tiʼ tbʼanel in tzaj qe aj t-xi qbʼinchaʼn aju in tzaj tqʼamaʼn Tyol Dios?
3 ¿Tiʼ tbʼanel in tzaj qe aj t-xi qniman Tyol Dios? Jun techel, qa ma japun quʼn aju in tzaj tqʼamaʼn Tyol Dios, in tzalaj Jehová ex in qo tzalaj (Ecl. 12:13). Ax ikx aj t-xi qbʼiʼn qe consej in tzaj tqʼamaʼn Tyol Dios, in nonin qiʼj tuʼn qten bʼaʼn kyukʼil qe toj qja ex tuʼn qok te tbʼanel kyamiw erman. Bʼalo o tzʼok tqʼoʼna twitza tiʼj qa ax tok jlu. Nya oʼkxju, ax ikx in che onin tkawbʼil Jehová qiʼj tuʼn miʼn kytzajxix nya bʼaʼn qiʼj ik tzeʼn in tzaj kyiʼj txqantl. Ik tzeʼn tqʼama rey David toj jun bʼitz tej tyolin tiʼj tley Jehová ex tiʼj kastiw in kubʼ tqʼoʼn: «Qa ma che japun wuʼne, nim bʼaʼn in kybʼinchaʼn weye» (Sal. 19:7-11).
4. ¿Tiquʼn at maj kwest tuʼn t-xi qniman Tyol Dios?
4 Noqtzun tuʼnj, at maj kwest in nela toj qwitz tuʼn tkubʼ qbʼinchaʼn aju in nel qnikʼ tiʼj toj Tyol Dios. Maske at nim qaqʼun, nim toklen tuʼn tel qpaʼn ambʼil tuʼn tjaw quʼjin Biblia ex tuʼn qximen tiʼj. Qa ma bʼant jlu quʼn, kʼelel qnikʼ tiʼj tiʼ taj Jehová tuʼn tbʼant quʼn. Tzul tnaʼn xnaqʼtzbʼil lu qe junjun nabʼil tiʼj tzeʼn jaku jaw quʼjin Tyol Dios tkyaqil qʼij. Ax ikx kʼelel qnikʼ tiʼj tiʼ jaku tzʼonin qiʼj tuʼn qximen tiʼjju in jaw quʼjin ex tzeʼn jaku kubʼ qbʼinchaʼn aju in nel qnikʼ tiʼj.
BʼAʼN TUʼN TEL TPAʼNA AMBʼIL TUʼN TJAW TUʼJINA BIBLIA
5. ¿Alkye junjun tiʼchaq in nel tiʼn ambʼil kyiʼj tmajen Jehová?
5 Chʼixmi kykyaqil tmajen Jehová at nim tiʼchaq tuʼn tbʼant kyuʼn. Ateʼ nim tiʼchaq in tzaj tqʼamaʼn Biblia qa nim toklen tuʼn tbʼant quʼn. Jun techel, chʼixme qkyaqilx in qo aqʼunan tuʼn tten aju at tajbʼen qe ex kye toj qja (1 Tim. 5:8). Nim qe erman in che xqʼuqin kyiʼj toj kyja yabʼ qe moqa ma che tijen. Ax ikx qe, il tiʼj tuʼn tel qpaʼn ambʼil tuʼn tok qxqʼuqin qibʼ. Ex at nim tiʼchaq tuʼn tbʼant quʼn toj congregación, ik tzeʼn tuʼn qpakbʼan. Tuʼntzunju, jakulo kubʼ qxjelin jlu: «¿Tiʼ jaku bʼant wuʼne tuʼn kukx tel npaʼne ambʼil tuʼn wuʼjine tiʼj Tyol Dios, tuʼn nximane tiʼj ex tuʼn tkubʼ wanqʼine?».
6. ¿Tiʼ jaku bʼant tuʼna tuʼn kukx tjaw tuʼjina Biblia tkyaqil qʼij? (Ax ikx qʼonka twitza tiʼj tilbʼilal).
6 Jun tiʼ nim toklen tuʼn kukx tbʼant kyuʼn okslal, aju tuʼn kyuʼjin tiʼj Biblia (Filip. 1:10). In tzaj tqʼamaʼn uʼj te Salmo qa «in tzalaj [xjal] tiʼj tley Qman Dios, ex kukx in ximan tiʼj qʼijl ex qonikʼan» (Sal. 1:1, 2). In tzaj tyekʼin jlu qa nim toklen tuʼn kukx tel qpaʼn ambʼil tuʼn quʼjin tiʼj Tyol Dios. Pero, ¿toj alkye or mas bʼaʼn tuʼn quʼjin? Toj alkyexku or, pero tbʼanel tuʼn kukx tbʼant quʼn toj ambʼil in kubʼ qximen. In tzaj tqʼamaʼn jun ermano Víctor tbʼi jlu: «Nganiye tuʼn wuʼjine tiʼj Biblia te prim. Maske nya ngane tuʼn njaw weʼye lwey, pero o tzʼel nnikʼe tiʼj qa mas in nok nqʼoʼne nwiʼye tiʼjju in jaw wuʼjine tuʼnju nya nim bulla te prim». ¿Jakupe bʼant jlu teya tuʼn? Xjelinkuya jlu: ¿Toj alkye ambʼil mas bʼaʼn tuʼn wuʼjine tiʼj Biblia?
¿Toj alkye ambʼil jaku jaw tuʼjina Tyol Dios junjun qʼij? (Qʼonka twitza tiʼj párrafo 6).
XIMANA TIʼJJU IN JAW TUʼJINA
7, 8. Qʼamantza tukʼil jun techel tiʼ mintiʼ tuʼn tbʼant quʼn aj tjaw quʼjin Biblia.
7 Ax tok, jakulo jaw quʼjin nim capítulo, pero qa mintiʼ in nel qnikʼ tiʼj noqx gan. ¿Ope bʼaj jlu tiʼja jun maj? In jaw tuʼjina jun xnaqʼtzbʼil ex aj tikʼ chʼin ambʼil ya mintiʼ naʼn tuʼna. Bʼisbʼajilxix qa ax jlu ma bʼaj qiʼj aj tjaw quʼjin Biblia. Tbʼanel qa in kubʼ qximen jteʼ capítulo kjawil quʼjin junjun qʼij (1 Cor. 9:26). Pero qa qajbʼil tuʼn tonin Biblia qiʼj, nya oʼkx il tiʼj tuʼn tjaw quʼjin.
8 Qo ximen tiʼj jun techel. Nim toklen tuʼn ttzaj jbʼal kyibʼaj awal. Pero qa ma tzaj nimxix jbʼal, jaku tzaj nya bʼaʼn kyiʼj awal tuʼnju in kyuwix txʼotxʼ tuʼn nim aʼ ex mlay tzʼonin tuʼn kychʼiy awal. Ax jlu jaku bʼaj aj tjaw quʼjin Biblia, nim toklen tuʼn miʼn tjaw quʼjin jun rat naj, sino tuʼn tel qpaʼn ambʼil tuʼn qximen tiʼj tuʼntzun ttzaj qnaʼn ex tuʼn tjapun quʼn (Sant. 1:24).
Qa ma tzaj nim jbʼal mintiʼ in nonin kyiʼj awal tuʼn kychʼiy, ax ikx qe aj quʼjin tiʼj Biblia nim toklen tuʼn tel qpaʼn ambʼil tuʼn qximen tiʼjju in jaw quʼjin ex tuʼn tkubʼ qbʼinchaʼn. (Qʼonka twitza tiʼj párrafo 8).
9. ¿Tiʼ il tiʼj tuʼn tbʼant quʼn qa naqʼli qoʼ tuʼn quʼjin tiʼj Biblia jun rat naj?
9 ¿Tiʼ jaku bʼant tuʼna qa jun rat in jaw tuʼjina Biblia? Bʼaʼn tuʼn tok tilil tuʼna tuʼn tjaw tuʼjina mas chebʼe tuʼn ttzaj tqʼoʼn ambʼil teya tuʼn t-ximana tiʼj. Tuʼn tbʼant jlu tuʼna, jaku tzʼel tpaʼna mas ambʼil aj t-xnaqʼtzana tuʼntzun ttzaj tqʼoʼn ambʼil teya tuʼn t-ximana tiʼjju in jaw tuʼjina. Qatzun miʼn, jaku jaw tuʼjina noq junjun versículo tuʼntzun tten ambʼil teya tuʼn t-ximana tiʼjju otoq jaw tuʼjina. Tqʼama Víctor jlu, aju ma qo yolin tiʼj toj párrafo 6: «In nok tilil wuʼne tuʼn miʼn tjaw wuʼjine nim versículo ex at maj noq jun capítulo. Tuʼnju in nok tilil wuʼne tuʼn tjaw wuʼjine Biblia te prim, at ambʼil wiʼje tuʼn ximane tiʼj aj tex qʼij». Aj tjaw tuʼjina Biblia, aya kbʼel ximente jteʼ capítulo moqa jteʼ versículo kjawil tuʼjina, pero aju mas nim toklen aju tuʼn tjaw tuʼjina chebʼe ex tuʼn t-ximana tiʼj tzeʼn jaku tzʼonin tiʼja (Sal. 119:97; qʼonka twitza tiʼj recuadro « Qe xjel jaku che onin tiʼja tuʼn t-ximana»).
10. Chikʼbʼantza tukʼil jun techel tzeʼn jaku japun tuʼna aju in jaw tuʼjina toj Biblia (1 Tesalonicenses 5:17, 18).
10 Aj tuʼjina tiʼj Biblia, ximana tiʼj tzeʼn jaku japun tuʼna. Akux in bʼant jlu tuʼna, bʼaʼn tuʼn tkubʼ t-xjelina jlu: «¿Tzeʼn jaku txi nbʼinchaʼne jaʼlo moqa kyoj qʼij che ul aju ma tzʼel nnikʼe tiʼj?». Jun techel, in jaw tuʼjina 1 Tesalonicenses 5:17 ex 18 (kjawil uʼjit), yajxitl, jaku ximana tiʼj qa in naʼna Dios tuʼn tkyaqil tkʼuʼja ex qa in bʼant tuʼna toj tkyaqil ambʼil. Ax ikx jaku ximana tiʼj qa in xi tqʼoʼna chjonte tiʼj tkyaqilju in tzaj tkʼamoʼna. Ex jakulo ximana tiʼj oxe tiʼ aju taja tuʼn t-xi tqʼoʼna chjonte tiʼj te Jehová. Qa ma tzʼel tpaʼna junjun minut tuʼn t-ximana tiʼjju in jaw tuʼjina, nya oʼkx in jaw tuʼjina Tyol Dios sino in xi tzyet tuʼn tkubʼ tbʼinchaʼna aju in nel tnikʼa tiʼj. Ex qa ma bʼant jlu tuʼna tkyaqil qʼij, mas kʼokela te jun tbʼanel tmajen Jehová. Pero ¿yajtzun qa in nel tnikʼa tiʼj qa atx nim tiʼchaq naʼmx tbʼant tuʼna?
BʼINCHAMA AJU JAKU BʼANT TUʼNA
11. ¿Tiquʼn at maj jaku tzaj tbʼisa aj tuʼjina tiʼj Biblia? Qʼamantza jun techel.
11 Aj tuʼjina tiʼj Biblia, atlo maj tzul tbʼisa tuʼnju kʼelel tnikʼa tiʼj qa atx nim tiʼchaq il tiʼj tuʼn tbʼant tuʼna. Qo ximen tiʼj jlu: Toj tnejel qʼij, in jaw tuʼjina qa il tiʼj tuʼn tten tbʼanel tmoda kyukʼil kykyaqil ex nya oʼkx kyukʼil junjun (Sant. 2:1-8). Tuʼntzunju in kubʼ t-ximana tuʼn kybʼant junjun chʼixpubʼil tuʼna. ¡Tbʼanelxix jlu! Toj tkabʼin qʼij, in jaw tuʼjina qa nim toklen tuʼn tok t-xqʼuqina aju in xi tqʼamaʼna (Sant. 3:1-12). Tuʼn jlu in nel tnikʼa qa at maj in xi tqʼamaʼna junjun yol nyaxix bʼaʼn moqa nya tukʼil kʼujlabʼil. Tuʼntzunju, in kubʼ t-ximana tuʼn t-xi tqʼamaʼna qe yol mas tbʼanel ex tuʼn tonin kyiʼj txqantl. Toj toxin qʼij, in jaw tuʼjina qa mintiʼ tuʼn tok tamiwen tibʼa kyukʼil xjal mintiʼ in che ajbʼen te Jehová (Sant. 4:4-12). Tuʼn jlu in nel tnikʼa tiʼj qa il tiʼj tuʼn tok t-xqʼuqina alkyeqe película in nok tqʼoʼna twitza tiʼj ex alkye música in nok tbʼiʼna. Ex toj tkyajen qʼij, in tzaj nimxix tbʼisa tuʼnju at nim chʼixpubʼil il tiʼj tuʼn tbʼant tuʼna.
12. ¿Tiquʼn mintiʼ tuʼn ttzaj tbʼisa qa aj tuʼjina tiʼj Biblia in nel tnikʼa tiʼj qa atx chʼixpubʼil il tiʼj tuʼn tbʼant tuʼna? (Ax ikx qʼonka twitz tiʼj tqanil).
12 Miʼn tzaj tbʼisa qa in nel tnikʼa tiʼj qa il tiʼj tuʼn kybʼant junjun chʼixpubʼil tuʼna. In tzaj tyekʼin jlu qa in kubʼ tin tibʼa ex qa taja tuʼn tkubʼ tbʼinchaʼna aju bʼaʼn aj tuʼjina tiʼj Biblia. a Bʼaʼn tuʼn ttzaj tnaʼna qa aj tok tqʼoʼna akʼaj ttena, toj juntl yol, aj kyten tbʼanel tmoda, kxel tiʼn ambʼil ex kukx kʼokel tilil tuʼna (Col. 3:10). ¿Tiʼ kʼonil tiʼja tuʼn kukx t-xi tnimana aju in tzaj tqʼamaʼn Tyol Dios?
13. ¿Alkyeqe nabʼil jaku che onin tiʼja? (Ax ikx qʼonka twitza kyiʼj tilbʼilal).
13 Qa ma kubʼ qin qibʼ jaku tzʼonin qiʼj tuʼn tel qnikʼ tiʼj qa nya toj junx ambʼil jaku japun quʼn aju in tzaj tqʼamaʼn Tyol Dios (Prov. 11:2). Jaku bʼant jlu tuʼna: Bʼinchama jun lista tiʼjju taja tuʼn tbʼant, ximana tiʼj jun moqa kabʼe tiʼ jaku t-xi tbʼinchaʼna tnejel ex jaku kyaj tqʼoʼna qe txqantl te yajxi. ¿Alkye jun taja tuʼn t-xi tbʼinchaʼna tnejel?
Miʼn tzʼok tilil tuʼna tuʼn tjapun toj junx ambʼil tkyaqilju in nel tnikʼa tiʼj, mas bʼaʼn tuʼn tkubʼ tin tibʼa ex tuʼn tjapun jun moqa kabʼe tuʼna. (Qʼonka twitza tiʼj párrafo 13 ex 14).
14. ¿Tiʼ jaku bʼant tuʼna tnejel?
14 Tnejel, jaku kubʼ tbʼinchaʼna aju mas fácil teya moqa aju mas nim toklen tuʼn t-xi tbʼinchaʼna. Qa ya ojtzqiʼn tuʼna tiʼ tuʼn t-xi tbʼinchaʼna, jyonxa mas tqanil kyoj uʼj Onbʼil tuʼn kyxnaqʼtzan testigos de Jehová moqa toj Índice de las publicaciones Watch Tower. Ax ikx, qaninxa onbʼil te Jehová toj naʼj Dios tuʼn tten tganiya ex tuʼn tten tipumala tuʼn t-xi tbʼinchaʼna aju tajbʼil (Filip. 2:13). Yajxitl, bʼinchanxa aju in nel tnikʼa tiʼj. Aj tel tnikʼa tiʼj qa ma bʼant jun chʼixpubʼil tuʼna, kʼonil tiʼja tuʼn tkubʼ tbʼinchaʼna qe mastl tiʼchaq taja tuʼn tbʼant ik tzeʼn otoq kux ttzʼibʼina toj lista.
QʼONXA AMBʼIL TE TYOL DIOS TUʼN TONIN TIʼJA
15. ¿Tiquʼn junxitl qe tmajen Jehová kywitz qe xjal in che uʼjin tiʼj Biblia? (1 Tesalonicenses 2:13).
15 Ateʼ nim xjal in kyqʼamaʼn qa o jaw kyuʼjin Biblia nim maj. ¿Pero in xipe kybʼiʼn aju in tzaj tqʼamaʼn ex ope chʼexpaj kyanqʼibʼil tuʼn? Bʼisbʼajilxix tuʼnju mintiʼ in xi kybʼiʼn consej in tzaj tqʼamaʼn Biblia. Junxitl in bʼaj kyiʼj tmajen Jehová, tuʼnju in nel kynikʼ tiʼj qa a Dios o qʼamante aju kyaj tzʼibʼin toj Biblia. In nok tilil kyuʼn tuʼn kyok ik tzeʼn qe okslal te tnejel syent abʼqʼi aqeju in tzaj qʼamaʼn jlu kyiʼj: «Oʼkx o kymaye qa tyol Dios, ex ax tok tyol Dios». Tuʼntzunju, in nok tilil quʼn tuʼn tkubʼ qyekʼin qa in nonin Tyol Dios qiʼj (kjawil uʼjit 1 Tesalonicenses 2:13).
16. ¿Alkye kʼonil qiʼj tuʼn t-xi qniman aju in tzaj tqʼamaʼn Tyol Dios?
16 At maj kwest tuʼn tjaw quʼjin Biblia ex tuʼn tkubʼ qbʼinchaʼn aju in tzaj tqʼamaʼn. At maj, kwest tuʼn tel qpaʼn ambʼil tuʼn tjaw quʼjin. Moqa at maj, jun rat in jaw quʼjin ex mintiʼ in qo ximen tiʼjju in jaw quʼjin. Ex at maj, jaku tzaj qbʼis aj tel qnikʼ tiʼj qa atx nim chʼixpubʼil il tiʼj tuʼn tbʼant quʼn. Noq alkyexku nya bʼaʼn in nok weʼya twitz, kʼonil Jehová tiʼja. Kʼamonxa onbʼil tzul tqʼoʼn ex miʼn tzikʼ tnaʼl tuʼna aju kjawil tuʼjina toj Tyol Dios. Qʼonka tilil tuʼn tkubʼ tbʼinchaʼna aju in nel tnikʼa tiʼj. Qa mas ma uʼjina tiʼj Biblia ex qa mas ma kubʼ tbʼinchaʼna aju in tzaj tqʼamaʼn, mas ktzalajela (Sant. 1:25).
BʼITZ 94 In xi qqʼoʼn chjonte tiʼj Tyol Dios
a Bʼaʼn tuʼn tokxa toj jw.org tuʼn tok tqʼoʼna twitza tiʼj video Aju in tzaj kyqʼamaʼn junjuntl kuʼxun tiʼjju tuʼn quʼjin tiʼj Tyol Dios.
