1. ¿Tiʼ kbʼantel tuʼn Jesús toj chʼintl ambʼil?

 IN QO anqʼin toj jun ambʼil nim toklen tuʼnju chʼix tpon ambʼil tuʼn tok tjusgarin Jesús kykyaqil xjal in che anqʼin twitz Txʼotxʼ. ¿Tiquʼn in xi qqʼamaʼn qa chʼix tpon ambʼil lu? Tuʼnju xi tqʼamaʼn Jesús jun profecía kye t-xnaqʼtzbʼen aju kʼajbʼeltoq te jun «señ» tiʼj qa ya otoq tzul ex qa «chʼixtoq tjapun bʼaj tqʼijlalil» nya bʼaʼn (Mat. 24:3). Jaku kanet profecía lu quʼn toj Mateo capítulo 24 ex 25, toj Marcos capítulo 13 ex toj Lucas capítulo 21.

2. ¿Tiʼ kʼelel qnikʼ tiʼj toj xnaqʼtzbʼil lu ex tiquʼn?

² Yolin Jesús kyiʼj oxe techel tuʼntzun tbʼaj qbʼinchaʼn qten. Tnejel, aju techel kyiʼj ẍneʼl moqa rit ex qe chip, tkabʼin, aju techel kyiʼj laj qʼapoj moqa txin ex toxin, aju techel kyiʼj saq pwaq moqa talento. Teyele te junjun techel in tzaj tyekʼin kymod xjal in kubʼ kyyekʼin toj ambʼil jaʼlo. Ex aj kyok tjusgarin Jesús, kʼokel tqʼoʼn twitz tiʼj kymod otoq kubʼ kyyekʼin. Toj xnaqʼtzbʼil lu qo xnaqʼtzal kyiʼj techel lu ex kʼelel qnikʼ kyiʼj junjun xnaqʼtzbʼil. Tnejel qo xnaqʼtzal tiʼj techel kyiʼj rit ex kyiʼj chip.

QE RIT EX QE CHIP

3. ¿Toj alkye ambʼil che okel tjusgarin Jesús qe xjal?

³ Tqʼama Jesús qa aj tpon ambʼil tuʼn kyok tjusgarin teyele junjun xjal, kʼokel tqʼoʼn twitz tiʼj qa xi kybʼiʼn tbʼanel tqanil ex qa o che onin kyiʼj skʼoʼn maj (Mat. 25:​31-46). ¿Toj alkye ambʼil tzul tqʼamaʼn Jesús qa ik tten jun xjal ik tzeʼn jun rit moqa ik tzeʼn jun chip? Toj ambʼil te nimxix «kʼixbʼisabʼl», moqa chʼixtoq t-xi tzyet Armagedón (Mat. 24:21). Ik tzeʼn jun xqʼuqil rit, in che el tpaʼn qe rit kyiʼj chip, ax ikx te Jesús part che kbʼel tqʼoʼn qeju in che onin  kyiʼj skʼoʼn maj ex part che kbʼel tqʼoʼn qeju mintiʼ in che onin.

4. Ik tzeʼn in tzaj tqʼamaʼn Isaías 11:3 ex 4, ¿tiquʼn jaku tzʼok qeʼ qkʼuʼj tiʼj qa che okel tjusgarin Jesús qe xjal toj tumel? (Ax ikx qʼonka twitza kyiʼj tilbʼilal).

⁴ O txi tqʼoʼn Jehová toklen Jesús te jwes ex in tzaj tqʼamaʼn Biblia qa kjusgaril toj tumel (kjawil uʼjit Isaías 11:​3, 4). In nok tqʼoʼn Jesús twitz tiʼj alkye kyximbʼetz xjal, alqiʼj in che yolin ex alkye kybʼinchbʼen, axpe ikx alkye kymod in kubʼ kyyekʼin kyukʼil terman o che jaw skʼoʼn (Mat. 12:​36, 37; 25:40). Kʼelel tnikʼ Jesús tiʼj alkyeqe o che onin kyiʼj terman ex tiʼj aqʼuntl otoq bʼant kyuʼn. a Jun tumel tuʼn qonin aju tuʼn pakbʼan. Che okel qʼoʼn qeju in che onin te tzʼaqli ex kxel qʼoʼn ambʼil kye tuʼn kyanqʼin te jumajx twitz Txʼotxʼ (Mat. 25:46; Apoc. 7:​16, 17). ¡Jun tbʼanelxix kʼiwlabʼil kye qeju kukx che tel tzʼaqli! Qa kukx ma che ten tzʼaqli aj ttzaj ex aj tikʼ nimxix yajbʼil, mlay jatz qiʼn kybʼi «tzʼibʼan tuj tuʼjil chwinqlal» (Apoc. 20:15).

5. ¿Tiʼ xnaqʼtzbʼil in tzaj tqʼoʼn techel kyiʼj rit ex chip ex alkyeqe il tiʼj tuʼn t-xi kybʼiʼn xnaqʼtzbʼil lu?

⁵ Bʼaʼn tuʼn tkubʼ tyekʼina qa jaku tena tzʼaqli. Aju techel kyiʼj rit ex kyiʼj chip, mas at tajbʼen kye qeju in che ayon tuʼn kyanqʼin te jumajx tzalu twitz Txʼotxʼ. Nya oʼkx in kubʼ kyyekʼin qa tzʼaqli qeʼ aj kyonin kyiʼj terman Jesucristo toj pakbʼabʼil, sino ax ikx aj t-xi kynimen qe tqanil in tzaj kyqʼoʼn kʼloj okslal skʼoʼn maj (Mat. 24:45). Ax ikx qeju che anqʼil toj kyaʼj il tiʼj tuʼn tok kyqʼoʼn kywiʼ tiʼj xnaqʼtzbʼil in tzaj tqʼoʼn techel kyiʼj rit ex qe chip. ¿Tiquʼn? Tuʼnju in nok tqʼoʼn Jesús twitz tiʼj kybʼinchbʼen, tiʼj kyximbʼetz ex tiʼj kyyol. Tuʼntzunju, ax ikx kye il tiʼj tuʼn tkubʼ kyyekʼin qa jaku che ten tzʼaqli. Tiʼj jlu in yolin kabʼetl techel tqʼama Jesús. Ax ikx jaku che kanet techel lu quʼn toj capítulo 25 te Mateo ex mas in yolin jlu kyiʼj qeju o che jaw skʼoʼn. Qo yolin jaʼlo kyiʼj qeju laj txin.

QE LAJ TXIN

6. ¿Tzeʼn kubʼ kyyekʼin jweʼ txin qa ten kynabʼil? (Mateo 25:​6-10).

⁶ Toj juntl techel, yolin Jesús kyiʼj laj txin o che ayon tiʼj jun novio (Mat. 25:​1-4). Kykyaqil kyajtoq tuʼn kyten aj tok wabʼj te mejebʼleʼn. Tqʼama Jesús qa at jweʼ at kynabʼil, atzun juntl jweʼ mintiʼ ten kynabʼil. Aqeju at kynabʼil bʼaj kybʼinchaʼn kyten ex e xqʼuqin. Kyajtoq tuʼn tkubʼ kyyoʼn novio noq jniʼxku ambʼil, maske yaj ma pon. Tuʼntzunju, xi kyiʼn kykandil tuʼn tajbʼen kyuʼn te qonikʼen. Nya oʼkx kykandil xi kyiʼn, sino ax ikx xi kyiʼn mastl aseyt toj juntl tkubʼel tuʼntzun tajbʼen kyuʼn qa yaj ma pon novio. Iktzun tten xi kyjyoʼn tumel tuʼn miʼn tkubʼ yupj kykandil (kjawil uʼjit Mateo 25:​6-10). Tej tpon novio e okx qe txin at kynabʼil tukʼil toj wabʼj te mejebʼleʼn. Chʼixmi ax jlu kbʼajel kyiʼj okslal skʼoʼn maj. Aqeju che tel tzʼaqli ex kukx in che xqʼuqin ajxi tul novio, toj juntl yol ajxi tul Jesús, che okex tukʼil toj Tkawbʼil Dios (Apoc. 7:​1-3). b Yajtzun juntl jweʼ txin mintiʼ ten kynabʼil, ¿tiʼ kbʼajel kyiʼj?

7. ¿Tiʼ bʼaj kyiʼj qeju jweʼ txin mintiʼ ten kynabʼil ex tiquʼn?

⁷ Atzun kye txin mintiʼ ten kynabʼil, nya bʼinchaʼn kyten tej tpon novio. Tej  tok kybʼiʼn qa chʼixtoq tpon novio, ok kyqʼoʼn kywitz tiʼj qa chʼixtoq tkubʼ yupj kykandil. Ex tuʼnju mintiʼ xi kyiʼn mastl aseyt, i ex laqʼolte. Naʼmxtoq kymeltzʼaj tej tpon novio. «Atzun qe qʼapoj bʼanin kyten, e okx tuja tukʼil chmilbʼaj tuj mejebʼleʼn ex bʼiʼxtzun lamet ttzi ja» (Mat. 25:10). Yajxitl, tej kymeltzʼaj txin mintiʼ ten kynabʼil kyajtoq tuʼn kyokx, pero xi tqʼamaʼn novio jlu kye: «Mintiʼ ojtzqiʼn qeye wuʼne» (Mat. 25:​11, 12). Mintiʼ otoq kubʼ kybʼinchaʼn kyten tuʼn tkubʼ kyyoʼn novio jniʼxku ambʼil. ¿Tiʼ xnaqʼtzbʼil jaku tzʼel kyiʼn skʼoʼn maj tiʼj jlu?

8, 9. ¿Tiʼ in xi tyekʼin kye okslal skʼoʼn maj aju techel kyiʼj laj txin? (Ax ikx qʼonka twitza kyiʼj tilbʼilal).

⁸ Bʼaʼn tuʼn tbʼaj tbʼinchaʼn ttena ex tuʼn t-xqʼuqina. Mintiʼ tqʼama Jesús qa ateʼ kabʼe kʼloj okslal skʼoʼn maj. Qa ktel jun kbʼajel tbʼinchaʼn tten, atzun juntl miʼn. Sino tajtoq tuʼn tel kynikʼ okslal skʼoʼn maj tiʼj qa il tiʼj tuʼn tbʼaj kybʼinchaʼn kyten ex tuʼn kukx tikʼx kyuʼn tuʼntzun ttzaj kykʼamoʼn kʼiwlabʼil (Juan 14:​3, 4). ¡Nimxix toklen aju tqʼama Jesús! Qa qo xeʼl anqʼil toj kyaʼj moqa qo anqʼil tzalu twitz Txʼotxʼ, qkyaqilx il tiʼj tuʼn tok qqʼoʼn qwiʼ tiʼj xnaqʼtzbʼil in tzaj tqʼoʼn techel kyiʼj laj txin. Qkyaqilx il tiʼj tuʼn kukx qxqʼuqin ex tuʼn tbʼaj qbʼinchaʼn qten tuʼntzun tikʼx quʼn tzmaxi aj tul xitbʼil (Mat. 24:13).

⁹ Tej tyolin Jesús tiʼj techel kyiʼj laj txin, tajtoq tuʼn ttzaj tyekʼin qe qa il tiʼj tuʼn tbʼaj qbʼinchaʼn qten ex tuʼn qxqʼuqin. Tej tbʼaj yolin tiʼj lu, tzaj tqʼamaʼn juntl techel aju in yolin kyiʼj saq pwaq moqa talento. Tukʼil techel lu tajtoq tuʼn ttzaj tyekʼin qa nim toklen tuʼn qok te jun tbʼanel aqʼunal.

QE TALENTO

10. ¿Tzeʼn kubʼ kyyekʼin qeju kabʼe majen qa tzʼaqli qeʼ? (Mateo 25:​19-23).

¹⁰ Toj techel lu, yolin Jesús kyiʼj oxe majen. E ok kabʼe te tbʼanel aqʼunal, atzun juntl ok te kyʼaj (Mat. 25:​14-18).  Tej t-xiʼ patrón toj juntl tnam, kyaj toqxenin tpwaq kyukʼil oxe majen. Ok tilil kyuʼn kabʼe majen tuʼn kyten tzʼaqli ex tuʼn tchmet mas tpwaq kypatrón kyuʼn. Tej tmeltzʼaj patrón, otoq chmet kabʼe maj tajlal tpwaq. Tzalaj patrón kyiʼj kabʼe majen ex xi tqʼamaʼn jlu te teyele junjun kye: «Jaʼlo nimxix kxel nqʼoʼne teya tuʼntzun ttzalaja junx wukʼile» (kjawil uʼjit Mateo 25:​19-23). Yajtzun toxin majen, ¿tiʼ bʼant tuʼn tukʼil pwaq?

11. ¿Tiʼ bʼaj tiʼj majen nyatoq taj tuʼn taqʼunan ex tiquʼn?

¹¹ Xi qʼoʼn jun talento te toxin majen tuʼn tkubʼ taqʼunaʼn. Pero nyatoq taj majen lu tuʼn taqʼunan, tuʼntzunju, kux tmuquʼn talento. Tej tmeltzʼaj patrón, aj tqʼoʼn majen juntl maj tpwaq. Mintiʼ xi tqanin najsam te tpatrón tuʼnju mintiʼ otoq chmet mas tpwaq tuʼn ex tqʼama qa «jun xinaq kyuwxix» te tpatrón. Tuʼntzunju, tzaj tqʼoj patrón tiʼj, el tiʼn talento te ex ex tlajoʼn toj tja (Mat. 25:​24, 26-30).

12. Toj ambʼil jaʼlo, ¿alkyeqe in kubʼ kyechlaʼn kabʼe majen?

¹² Aqeju kabʼe majen e ok te tbʼanel aqʼunal in kubʼ kyechlaʼn qeju okslal skʼoʼn maj aʼyeju kukx in che ten tzʼaqli. A Jesús patrón ex in xi tqʼamaʼn jlu kye: «Jaʼlo nimxix kxel nqʼoʼne teya tuʼntzun ttzalaja junx wukʼile, chi patrón». Toj juntl yol, in chex kʼiwlaʼn aj kyjaw anqʼin toj kyaʼj, aju in nok tbʼi te tnejel anqʼibʼil (Mat. 25:​21, 23; Apoc. 20:5a). Atzunte toxin majen in nok te jun nya bʼaʼn techel kywitz skʼoʼn maj. Kʼelel qnikʼ tiʼj tiquʼn.

13, 14. ¿Tiʼ in tzaj t-xnaqʼtzan techel kyiʼj talento kye okslal skʼoʼn maj? (Ax ikx qʼonka twitza kyiʼj tilbʼilal).

¹³ Bʼaʼn tuʼn tkubʼ tyekʼina qa tbʼanel aqʼunala. Tej ttzaj tqʼamaʼn Jesús techel kyiʼj talento mintiʼ tzaj tqʼamaʼn qa che okel okslal skʼoʼn maj te kyʼaj. Sino tajtoq tuʼn ttzaj tyekʼin jun xnaqʼtzbʼil ik tzeʼn tej tyolin kyiʼj laj txin. Tajtoq Jesús tuʼn ttzaj tchikʼbʼaʼn tiʼtoq jaku bʼaj qa ya mintiʼ ẍi tzalaj tiʼj kyaqʼun. Toj juntl yol, ya mlay  che txket tuʼn Dios, ya mlay che jaw skʼoʼn ex ya mlay che okx toj Tkawbʼil Dios (2 Ped. 1:10).

¹⁴ Tej tyolin Jesús kyiʼj laj txin ex kyiʼj talento, tzaj tyekʼin qa nim toklen tuʼn tbʼaj kybʼinchaʼn kyten kykyaqil okslal skʼoʼn maj, tuʼn kyxqʼuqin ex tuʼn kyok te tbʼanel aqʼunal. Pero nya oʼkx qe techel lu yolin Jesús tiʼj tuʼn t-xi tqʼoʼn jun xnaqʼtzbʼil kye okslal skʼoʼn maj. In kanet juntl quʼn toj Mateo 24:40 ex 41. Qo xnaqʼtzan kyiʼj versículo lu.

¿ALKYE «KXEL QʼIʼN»?

15, 16. ¿Tiquʼn nim toklen tuʼn kukx kyxqʼuqin okslal skʼoʼn maj ik tzeʼn in tzaj tqʼamaʼn Mateo 24:40 ex 41?

¹⁵ Tej naʼmxtoq tyolin Jesús kyiʼj oxe techel, yolin kyiʼj kabʼe xjal in che aqʼunan toj kojbʼil ex kyiʼj kabʼe xuʼj in che cheʼn. Kykabʼil xuʼj in che cheʼn ex kykabʼil xinaq in che aqʼunan toj kojbʼil, pero tqʼama Jesús jlu kyiʼj: «Jun kxel qʼiʼn ex juntl kyjel qʼoʼn» (kjawil uʼjit Mateo 24:​40, 41). Toj juntl versículo, xi tqʼamaʼn jlu kye t-xnaqʼtzbʼen: «Che xqʼuqine, porke mintiʼ bʼiʼn kyuʼne alkye or tzul Kyajawe» (Mat. 24:42). Chʼixmi aʼyex yol tqʼama Jesús tej tbʼaj yolin kyiʼj laj txin (Mat. 25:13). Axlo kyxilen kabʼe versículo lu. Tzaj tqʼamaʼn Jesús qa kpol jun ambʼil jatumel tzul yekʼin alkyeqe okslal otoq che jaw skʼoʼn. Oʼkxlo qe okslal o che jaw skʼoʼn ex in che ten tzʼaqli che «kxel qʼiʼn», toj juntl yol, che okex kʼamoʼn tuʼn Jesús toj Tkawbʼil Dios (Juan 14:3).

¹⁶ Bʼaʼn tuʼn tkubʼ tyekʼina qa kukx in xqʼuqina. Qa ya mintiʼ ma tzʼok tilil tuʼn jun okslal skʼoʼn maj tuʼn t-xqʼuqin, ya mlay tentl toklen kyxol «qeju skʼoʼmaj» (Mat. 24:31). Ax ikx kykyaqil qeju che anqʼil tzalu twitz Txʼotxʼ, il tiʼj tuʼn tok kyqʼoʼn kywiʼ kyiʼj techel tqʼama Jesús, tuʼn kyten tzʼaqli ex tuʼn kukx kyxqʼuqin.

17. Qa kukx in che jaw t-skʼoʼn Jehová junjun okslal skʼoʼn maj toj ambʼil jaʼlo, ¿tiquʼn mintiʼ in tzaj bʼaj qkʼuʼj tuʼn jlu?

¹⁷ Ojtzqiʼnxix Jehová quʼn ex in nok qeʼ qkʼuʼj tiʼjju in kubʼ t-ximen tuʼn tbʼant. Tuʼntzunju, mintiʼ in tzaj bʼaj qkʼuʼj qa o kubʼ t-ximen tuʼn kyjaw t-skʼoʼn junjuntl skʼoʼn maj. c Bʼaʼn tuʼn ttzaj qnaʼn aju txʼolbʼabʼil tqʼama Jesús kyiʼj aqʼunal toj tqan uva tuʼnju ateʼ junjun xi qʼoʼn kyaqʼun tej chʼixtoq tex bʼaj qʼij (Mat. 20:​1-16). Aqeju e okx aqʼunal yajxitl tzaj kykʼamoʼn ax twiʼ kykʼuʼj ik tzeʼn qeju e okx nej. Chʼixmi ax jlu kbʼajel kyiʼj qeju skʼoʼn maj kukx in che ten tzʼaqli, kxel qʼoʼn ambʼil kye tuʼn kyanqʼin toj kyaʼj, axpe ikx qa tzma in che jaw skʼoʼn.

BʼAʼN TUʼN TOK TQʼOʼN TWIʼYA KYIʼJ QE XNAQʼTZBʼIL

18, 19. ¿Alkyeqe xnaqʼtzbʼil ma tzʼel qnikʼ tiʼj toj xnaqʼtzbʼil lu?

¹⁸ ¿Tiʼ ma tzʼel qnikʼ tiʼj toj xnaqʼtzbʼil lu? Aju techel kyiʼj rit ex kyiʼj chip in tzaj tyekʼin qa nim toklen tuʼn kukx kyten qeju che anqʼil tzalu twitz Txʼotxʼ waʼlxix ex tzʼaqlixix jaʼlo ex toj ambʼil aj ttzaj nimxix kʼixbʼisabʼil. Aj tpon ambʼil aju, tzul tqʼamaʼn Jesús alkye «qeju tzʼaqlxix che xeʼl tuj chwinqlal te jumajx» (Mat. 25:46).

¹⁹ Ax ikx ma tzaj qnaʼn kabʼe techel in tzaj tyekʼin junjun xnaqʼtzbʼil kye okslal skʼoʼn maj. Aju in yolin kyiʼj laj txin, in tzaj tyekʼin qa kubʼ kybʼinchaʼn kyten txin ex e xqʼuqin. Ten kynabʼil ex kubʼ kyyoʼn  novio tzmaxi tej tpon. Atzun kye juntl jweʼ txin, mintiʼ e okx kʼamoʼn toj wabʼj te mejebʼleʼn tuʼnju mintiʼ ten kynabʼil ex tuʼnju mintiʼ kubʼ kybʼinchaʼn kyten. ¿Tiʼ xnaqʼtzbʼil jaku tzʼel qiʼn tiʼj jlu? Qa il tiʼj tuʼn tbʼaj tbʼinchaʼn qten ex tuʼn tkubʼ qyoʼn tzmaxi aj tkubʼ tnajsaʼn Jesús tkyaqil nya bʼaʼn. Toj techel kyiʼj talento, ma tzʼel qnikʼ tiʼj qa e ok kabʼe majen te tbʼanel aqʼunal. Tuʼnju ok tilil kyuʼn tuʼn kyten tzʼaqli ex tuʼn tten mastl tpwaq kypatrón kyuʼn, tzalaj kypatrón kyiʼj ex tzaj qʼoʼn mastl kye. Atzun teju majen nyatoq taj tuʼn taqʼunan etz lajoʼn. ¿Tiʼ xnaqʼtzbʼil jaku tzʼel qiʼn tiʼj? Nim toklen tuʼn kukx tok tilil quʼn toj qajbʼebʼil te Jehová tzmaxi aj tul tiʼn xitbʼil. Te bʼajsbʼil, ma tzʼel qnikʼ tiʼj qa kyaj t-xnaqʼtzaʼn Jesús tuʼn kukx tok tilil kyuʼn okslal skʼoʼn maj tuʼn kukx kyxqʼuqin tzmaxi aj kyxi qʼiʼn tuʼn kyten toj Tkawbʼil Dios toj kyaʼj. Tuʼn tkyaqil kykʼuʼj kyaj tuʼn tpon ambʼil tuʼn tok kychmon kyibʼ tukʼil Jesús toj kyaʼj. Aj tbʼaj Armagedón, kbʼel kyechlaʼn novia kbʼel mojeʼ tukʼil Jesús ex kʼokel «mejebʼleʼn te Tal Ẍneʼl» (2 Tes. 2:1; Apoc. 19:9).

20. ¿Tiʼ kbʼantel tuʼn Jehová qa ma txi qbʼiʼn qe xnaqʼtzbʼil in tzaj tqʼoʼn qe?

²⁰ Chʼix tpon ambʼil tuʼn kyok tjusgarin Jesús xjal, pero mintiʼ tuʼn qtzaj xobʼ. Qa ma qo ten tzʼaqli, tzul tqʼoʼn Jehová «nimxix qipumal» tuʼn qten bʼaʼn aj qok tjusgarin Jesús (2 Cor. 4:7; Luc. 21:36). Noq jaxku tumel qo anqʼil qa toj kyaʼj moqa tzalu twitz Txʼotxʼ, bʼaʼn tuʼn tok qqʼoʼn qwiʼ kyiʼj xnaqʼtzbʼil tzaj tyekʼin Jesús tej tqʼama qe techel. Ex tuʼnju tbʼanel tmod Jehová, kukx ktel qbʼi kyxol qeju «tzʼibʼan kybʼi tuj libro» te chwinqlal (Dan. 12:1; Apoc. 3:5).