Tej kubʼ tikʼsaʼn Jesús Wabʼj te Qale mintiʼ e ten qe 70 t-xnaqʼtzbʼen, pero nya t-xilen jlu qa otoq kyaj kolin Jesús kyuʼn moqa ya mintiʼtoq in tzalaj kyiʼj. Sino tuʼnju tajtoq tuʼn tten tjunalx kyukʼil t-apóstol toj ambʼil aju.

Nya oʼkx tzalaj Jesús kyiʼj 12 t-apóstol, sino ax ikx kyiʼj 70 t-xnaqʼtzbʼen. Tnejel, jaw t-skʼoʼn Jesús 12 kyxol qeju t-xnaqʼtzbʼen tuʼn kyok tqʼoʼn te t-apóstol (Luc. 6:​12-16). Atz toj tnam Galilea e «tzaj ttxkoʼn Jesús qeju kabʼlaj t-xnaqʼtzbʼen» ex «e jeʼx t-samaʼn tuʼn kypakbʼan tiʼj tkawbʼil Dios, ex tuʼn kybʼanix yabʼ kyuʼn» (Luc. 9:​1-6). Yajxitl, toj tnam Judea e jaw t-skʼoʼn Jesús 70 t-xnaqʼtzbʼentl, e jeʼx t-samaʼn tuʼn kyxiʼ nej twitz, te kabʼe kybʼet (Luc. 9:51; 10:​1, TNM). Tuʼntzunju, ateʼtoq t-xnaqʼtzbʼen Jesús toj alkyexku lugar jatumel e pakbʼan.

Tej kyok judiy te t-xnaqʼtzbʼen Jesús kukxtoq in kubʼ kyikʼsaʼn Xjan Qʼij tkyaqil abʼqʼi kyukʼil toj kyja (Éx. 12:​6-11, 17-20). Tej chʼixtoq tkyim Jesús o txiʼ kyukʼil t-apóstol atz Jerusalén. Pero mintiʼ xi tqʼamaʼn kye t-xnaqʼtzbʼen te Judea, te Galilea ex te Perea tuʼn tkubʼ kyikʼsaʼn Xjan Qʼij junx tukʼil. Toj ambʼil aju tajlo tuʼn tten tjunalx kyukʼil t-apóstol. Tuʼntzunju xi tqʼamaʼn jlu kye: «Wajbʼilxixe tuʼn nwaʼne kyukʼile tuʼn tikʼset Xjan Qʼij naʼnxtoq nkyime» (Luc. 22:15).

Pero ¿tiquʼn tajtoq Jesús tuʼn tten tjunalx kyukʼil t-apóstol? Tuʼnju ya chʼinxtoq tkyim ik tzeʼn «Tal T-ẍneʼl Dios aju nneʼl qʼiʼn kyil xjal tuʼn» (Juan 1:29). Atztoq kkyimel Jesús Jerusalén jatumel xi qʼoʼn chojbʼil te Jehová toj nimku ambʼil. Kubʼ kybʼyoʼn aj Israel ẍneʼl toj Xjan Qʼij tuʼn ttzaj kynaʼn qa otoq che klet toj kyqʼabʼ aj Egipto. Pero mas tbʼanel chojbʼil bʼant tuʼn Jesús tuʼnju jaku che klet xjal tuʼn tiʼj il ex tiʼj kamik (1 Cor. 5:​7, 8). Noq tuʼn chojbʼil bʼant tuʼn Jesús o che ok qeju 12 apóstol te jun simyent kye kʼloj okslal (Efes. 2:​20-22). In tzaj tqʼamaʼn Tyol Dios qa aju tnam Jerusalén «at kabʼlaj t-simyentil ex tzʼibʼin tbʼi junjun apóstol tiʼj junjun simyent, atzun kybʼi qe kabʼlaj apóstol te Tal Ẍneʼl» (Apoc. 21:​10-14). Tuʼnlo at kyoklen apóstol tuʼn tjapun twiʼ t-ximbʼetz Dios, tajtoq Jesús tuʼn tkubʼ tikʼsaʼn bʼajsbʼil Xjan Qʼij tjunalx kyukʼil ex tzaj tzyet tuʼn tkubʼ tikʼsaʼn Wabʼj te Qale.

Mintiʼ e ten qe 70 t-xnaqʼtzbʼen Jesús ex qe txqantl tukʼil tej tkubʼ tikʼsaʼn Wabʼj te Qale. Pero kykyaqil qeju t-xnaqʼtzbʼen e ten tzʼaqli tzaj tbʼanel kye tuʼn Wabʼj te Qale te Jesucristo. ¿Tiquʼn in xi qqʼamaʼn jlu? Tuʼnju tej tikʼ ambʼil xi qʼoʼn kyoklen te okslal skʼoʼn maj tuʼn kykawin toj Tkawbʼil Dios ik tzeʼn xi ttziyen Jesús kye t-apóstol toj qonikʼen aju (Luc. 22:​29, 30).