Qo ximen kyiʼj txqantl ex tenx tbʼanel qmod kyukʼil ik tzeʼn te Jehová
«At tzalajbʼil teju xjal in ximan kyiʼj qeju mintiʼ kyipun ex kyiʼj qe mebʼa» (SAL. 41:1).
1. ¿Tzeʼn in kubʼ kyyekʼin tmajen Jehová kykʼujlabʼil kyxolx?
OJTZQIʼN kywitz tmajen Jehová tuʼnju at tbʼanel kyamiwbʼil ex kykʼujlabʼil kyxolx (1 Juan 4:16, 21). In bʼant nim tiʼchaq kyuʼn kyiʼj kyerman, noqtzun tuʼnj, chʼixme tkyaqil maj in kubʼ kyyekʼin kykʼujlabʼil kyuʼn nya nim tiʼchaq, ik tzeʼn aj kyyolin tukʼil kʼujlabʼil ex aj tkubʼ kyyekʼin tbʼanel kymod. Aj kyximen kyiʼj txqantl ex aj tkubʼ kyyekʼin tbʼanel kymod, in japun nabʼil lu kyuʼn: «Kykanoʼmile tiʼj Dios, porke tkʼwaʼl Dios qeye, kʼujlaʼnxix qeye tuʼn» (Efes. 5:1).
2. ¿Alkye tten el tkanoʼn Jesús tkʼujlabʼil Ttat?
2 El tkanoʼn Jesús tiʼj Ttat toj jun tten tzʼaqli. Tkyaqil maj kubʼ tyekʼin tbʼanel tmod kyukʼil xjal. Tqʼama: «Kytzaje wukʼile kykyaqile aqeye ma che sikte tuʼn aqʼuntl ex ma che sikte tjaqʼ iqtz, oktzun che ojlale wuʼne». Tqʼamatl jlu: «Porke mans qine ex mans wanmiye» (Mat. 11:28, 29). Aj tel qkanoʼn tiʼj Jesús ex aj tkubʼ qyekʼin qa in qo «ximan kyiʼj qeju mintiʼ kyipun», tzul tkʼiwlaʼn Jehová qoʼ ex qo tzalajel tuʼn (Sal. 41:1). Qo xnaqʼtzan tiʼj tzeʼn jaku qo ximen kyiʼj toj qja, kyiʼj erman ex kyiʼj xjal toj pakbʼabʼil.
QO XIMEN KYIʼJ TOJ QJA
3. ¿Tzeʼn tmod chmilbʼaj ktel tukʼil t-xuʼjil? (Qʼonka twitza kyiʼj tnejel tilbʼilal).
3 Toj jun ja xjal, aʼye chmilbʼaj che kbʼel nej tuʼn kyximen kyiʼj txqantl (Efes. 5:25; 6:4). In tzaj tqʼamaʼn Tyol Dios jlu kye chmilbʼaj: «Atwit kynabʼle tuʼn kynajane kyukʼil kyxuʼjile» (1 Ped. 3:7). Ax ikx jaku kubʼ traducirit jlu ik tzeʼn «tuʼn qximen kyiʼj ex qa tuʼn tel qnikʼ kyiʼj». Tuʼn qximen tiʼj jun xjal, tnejel il tiʼj tuʼn tel qnikʼ tiʼj. Aju chmilbʼaj bʼaʼn ximen kyiʼj txqantl in nel tnikʼ tiʼj qa o tzʼok t-xuʼjil te onilte ex qa in chʼexpaj nim tiʼchaq kyxol, pero nya tuʼn jlu in nel tiʼn toklen t-xuʼjil (Gén. 2:18). Tuʼntzunju, in nok tqʼoʼn toklen aju in kubʼ tnaʼn t-xuʼjil ex in nimen te. Tqʼama jun ermana te Canadá jlu: «Mintiʼ in tzaj tqʼamaʼn nchmile qa mintiʼ toklen aju in kubʼ nnaʼne ex mintiʼ in tzaj tqʼamaʼn: ‹Mintiʼ jun tiquʼn tuʼn tkubʼ tnaʼna ikju›. Ax ikx in chin ok bʼiʼne tuʼn. Aj in nonin wiʼje tuʼn tchʼexpaj nximbʼetze tiʼj jun tiʼ, in bʼant jlu tuʼn tukʼil kʼujlabʼil».
4. ¿Tzeʼn kbʼel tyekʼin chmilbʼaj qa in ximen tiʼj t-xuʼjil?
4 Aju chmilbʼaj in ximen kyiʼj txqantl, ax ikx in nok tqʼoʼn toklen aju in tnaʼn t-xuʼjil qa mintiʼ ma tzʼok ten yolil kyukʼil txqantl xuʼj ex qa mintiʼ in kubʼ tyekʼin nya bʼaʼn tajbʼil kyiʼj. Ex mintiʼ in bʼant jlu tuʼn kyoj redes sociales nix toj juntl tembʼil te Internet (Job 31:1). Kukx in japun twi tyol xi ttziyen te t-xuʼjil, nya noq tuʼnju at tkʼujlabʼil tiʼj, sino tuʼnju kʼujlaʼn Jehová tuʼn ex in nel tikʼun aju nya bʼaʼn (kjawil uʼjit Salmo 19:14; 97:10).
5. ¿Tzeʼn kbʼel tyekʼin xuʼjilbʼaj qa in ximen tiʼj tchmil?
5 Aj in nel tkanoʼn chmilbʼaj tiʼj Jesucristo, aju wibʼaj te, in nonin jlu tiʼj t-xuʼjil tuʼn tok nimen tuʼn (Efes. 5:22-25, 33). Qa ma bʼant jlu tuʼn, ax ikx kyximel t-xuʼjil tiʼj, ik tzeʼn aj tel tpaʼn ambʼil tuʼn tbʼant junjun aqʼuntl tuʼn kyxol kʼloj okslal ex qa in tzaj bʼaj tkʼuʼj tiʼj jun tiʼ. Jun ermano te Gran Bretaña in tzaj tqʼamaʼn: «At maj in nel tnikʼ nxuʼjile tiʼj qa in bʼaj nkʼuʼje tiʼj jun tiʼ tuʼnju in chʼexpaj nmode. Toj ambʼil lu in nok lepeʼ tiʼj nabʼil tkuʼx toj Proverbios 20:5, maske a t-xilen qa kbʼel tyoʼn aju ambʼil mas bʼaʼn tuʼntzun ‹tel tnikʼ› tiʼjju in kubʼ nximane, oʼkx mlay tzʼel tnikʼ tiʼj tqanil qa mlay bʼant tuʼn t-xi nqʼamaʼne te».
6. ¿Tzeʼn jaku qo onin qkyaqilx kyiʼj kʼwaʼl tuʼn kyximen kyiʼj txqantl ex tzeʼn jaku tzʼonin jlu kyiʼj?
6 Qa in nel kynikʼ tatbʼaj kyxolx, in che ok te jun tbʼanel techel kywitz kykʼwaʼl. Noqtzun tuʼnj, ax ikx at kyoklen tuʼn t-xi kyxnaqʼtzaʼn kykʼwaʼl tzeʼn tuʼn kyximen kyiʼj txqantl. Jaku txi kyqʼamaʼn kye tuʼn miʼn kykarrelin toj Ja te Chmabʼil moqa aj kyten jun rat erman junx, bʼaʼn tuʼn t-xi kyqʼoʼn ambʼil kye erman ma che tijen tuʼn tetz kywa tnejel. Qkyaqilx jaku qo onin kyiʼj tatbʼaj. Jun techel, qa ma tzʼokx tjaqoʼn jun kʼwaʼl ttzi ja qwitz, bʼaʼn tuʼn t-xi qqʼamaʼn tbʼanel yol te. Kʼonil jlu tiʼj kʼwaʼl ex mlay tzikʼ tnaʼl tuʼn qa at mas tzalajbʼil qa ma txi qqʼoʼn chʼin te juntl twitzju tuʼn ttzaj qʼoʼn qe (Hech. 20:35).
QO XIMEN KYIʼJ ERMAN
7. ¿Tzeʼn kubʼ tyekʼin Jesús qa ximen tiʼj jun xjal chkyin twiʼ ex tiʼ xnaqʼtzbʼil jaku tzʼel qiʼn tiʼj?
7 Jun maj attoq Jesús toj tnam Decápolis ex «ul kyiʼn xjal jun xjal twitz Jesús, chkyin twiʼ ex men» (Mar. 7:31-35). Xi tiʼn Jesús tjunalx ex kubʼ tqʼanin. ¿Tiquʼn mintiʼ kubʼ tqʼanin kywitz xjal? Bʼalo tuʼnju el tnikʼ tiʼj qa chkyin twiʼ xjal ex jakutoq kubʼ tnaʼn nya bʼaʼn kyxol nim xjal. Ax tok, mlay che bʼant milagr quʼn. Pero jaku ex il tiʼj tuʼn qximen tiʼjju kyaj erman ex tiʼjju in kubʼ kynaʼn. Kubʼ ttzʼibʼin apóstol Pablo jlu: «Qo ximan tiʼj tuʼn qkyuwsante qibʼ qxolx tuʼn qkʼujlante qibʼ ex tuʼn qbʼinchante bʼaʼn» (Heb. 10:24). Ximen Jesús tiʼjju xjal chkyin twiʼ ex kubʼ tyekʼin tbʼanel tmod tukʼil, ¿tzeʼn jaku tzʼel qkanoʼn tiʼj?
8, 9. ¿Tzeʼn jaku kubʼ qyekʼin qa in qo ximen kyiʼj erman ma che tijen ex kyiʼj qeju yabʼ ateʼ? (Qʼamantza junjun techel).
8 Qo ximen kyiʼj erman ma che tijen ex kyiʼj qeju at yabʼil kyiʼj. Aju kʼujlabʼil, atzun techel mas nim toklen tiʼj okslabʼil axix tok ex nya tuʼnju tbʼanel che aqʼunan (Juan 13:34, 35). In nonin kʼujlabʼil lu qiʼj tuʼn qonin kyiʼj erman ma che tijen ex qeju at jun yabʼil kyiʼj tuʼn kyxiʼ kyoj chmabʼil ex tuʼn kyex pakbʼal. In bʼant jlu quʼn maske mlay bʼant nim kyuʼn erman lu ik tzeʼn in kubʼ kyximen (Mat. 13:23). In tzaj tqʼoʼn ermano Michael nim chjonte kye toj tja ex kye kʼloj erman jatumel in nex pakbʼal tiʼj onbʼil in xi kyqʼoʼn te. In tzaj tqʼamaʼn jlu: «Noq tuʼnju in bʼant kyuʼn wiʼje, jaku bʼant tuʼn npone chʼixme kyoj kykyaqil chmabʼil ex jaku bʼant tuʼn kukx wexe pakbʼal. Aju mas ngane, aju tuʼn npakbʼane jatumel ateʼ nim xjal».
9 Kyoj nim ja Betel, at nim erman ma che tijen ex junjuntl yabʼ qe. ¿Tzeʼn in kubʼ kyyekʼin nejenel qa kʼujlaʼn qe kyuʼn ex qa in che ximen kyiʼj? Aj kyonin kyiʼj tuʼn kypakbʼaʼn tukʼil carta ex toj teléfono. Jun ermano Bill tbʼi qʼiʼn 86 abʼqʼi tuʼn, in xi ttzʼibʼin kye xjal in che anqʼin najchaq, in tzaj tqʼamaʼn jlu: «In xi qqʼoʼne nim chjonte tuʼnju jaku txi qtzʼibʼine qe carta». Juntl ermana chʼix tjapun twi 90 abʼqʼi, aju Nancy tbʼi, in tzaj tqʼamaʼn jlu: «Toj nwitze, nim toklen tuʼn t-xi ntzʼibʼine carta ex nya oʼkx tuʼn tkux nqʼoʼne toj sobre, sino jun tten tuʼn qpakbʼaʼn. Kyaj xjal tuʼn tel kynikʼ tiʼj axix tok». Atzun juntl ermana Ethel tbʼi ul itzʼj toj 1921, in tzaj tqʼamaʼn jlu: «Tkyaqil maj in chyoʼn nximlale ex at maj kwest tuʼn tok nxbʼalune». Maske in bʼaj jlu tiʼj, tgan tuʼn tpakbʼaʼn toj teléfono ex ateʼ tbʼanel trevisita. Atzunte Barbara qʼiʼn 85 abʼqʼi tuʼn in tzaj tqʼamaʼn jlu: «Tuʼnju at yabʼil wiʼje, kwest tuʼn wexe pakbʼal. Pero in tzaj tqʼoʼn teléfono ambʼil weye tuʼn npakbʼaʼne kyukʼil xjal. ¡Chjonte teya Jehová!». Toj chʼixme jun abʼqʼi, jun kʼloj erman ma che tijen e pakbʼan 1,228 or, xi kytzʼibʼin 6,265 cartas, ex bʼant mas te 2,000 llamadas kyuʼn ex xi kysipen 6,315 uʼj. ¡Nimxix in tzalaj Jehová! (Prov. 27:11).
10. ¿Alkye tten jaku qo onin kyiʼj erman tuʼntzun tok kyqʼoʼn kywiʼ kyiʼj chmabʼil?
10 Qo ximen kyiʼj txqantl kyoj chmabʼil. Qa ma qo ximen kyiʼj erman, qo onil kyiʼj tuʼn tetz kyiʼn tbʼanel xnaqʼtzbʼil kyoj chmabʼil. ¿Tzeʼn qo onil kyiʼj? Qo onil qa ma qo pon naj kyoj chmabʼil tuʼntzun tok kyqʼoʼn kywiʼ tiʼj xnaqʼtzbʼil. Ax tok, at maj jaku tzaj jun nya bʼaʼn ex yajlo qo pol. Pero qa naqʼli qoʼ tuʼn qpon yaj, nimlo toklen tuʼn tkubʼ qximen alkyeqe chʼixpubʼil kbʼantel quʼn tuʼntzun tkubʼ qyekʼin qa in qo ximen kyiʼj qerman. Ax ikx bʼaʼn tuʼn ttzaj qnaʼn qa a Jehová ex Tkʼwaʼl in tzaj qʼonte txokbʼil qiʼj (Mat. 18:20). Ex nim toklen tuʼn qnimen kye.
11. ¿Tiquʼn nim toklen tuʼn t-xi kybʼiʼn erman at kyoklen kyoj chmabʼil aju in tzaj tqʼamaʼn 1 Corintios 14:40?
11 Juntl tten tuʼn tkubʼ qyekʼin qa in qo ximen kyiʼj erman, aju qa ma txi qbʼiʼn kawbʼil tuʼn t-xi qbʼinchaʼn «tkyaqil tuj tumel ex tuj ttxolil», toj juntl yol, ik tzeʼn tajbʼil Jehová (1 Cor. 14:40). Jun techel, nim toklen tuʼn tel kynikʼ erman at kyoklen kyoj chmabʼil tuʼn miʼn kyikʼ tibʼaj ambʼil. Iktzun tten kbʼel kyyekʼin qa in che ximen tiʼj juntl erman kʼeletz tqʼoʼn toklen ex kyiʼj kykyaqil erman. ¿Tiquʼn? Tuʼnju at junjun erman in che anqʼin najchaq, junjuntl in che meltzʼaj toj kamionet ex junjuntl nya ajbʼel kyukʼil te Jehová ex in che ayon tuʼn kypon naj ja.
12. ¿Tiquʼn nim toklen tuʼn tkubʼ qyekʼin qkʼujlabʼil kyiʼj ansyan? (Qʼoʼnka twitza tiʼj recuadro « Qo ximen kyiʼj qeju qʼil twitz aqʼuntl toj ttnam Jehová.»).
12 Nim aqʼuntl in bʼant kyuʼn qeju in che xqʼuqin kyiʼj t-ẍneʼl Jehová ex in kubʼ kyqʼoʼn tbʼanel techel toj pakbʼabʼil, tuʼntzunju tbʼanel qa ma tzʼok qqʼoʼn kyoklen (kjawil uʼjit 1 Tesalonicenses 5:12, 13). Qʼuqli qkʼuʼj tiʼj qa in xi qqʼoʼn chjonte tiʼj tkyaqilju in bʼant kyuʼn qiʼj. Kyjuʼtzun, qo ximen kyiʼj ex qo onin kyiʼj. In tzaj tqʼamaʼn Tyol Dios jlu: «Atzun qe kwentil kyeye tuʼn miʼn kyel tzpete, bʼaʼn kyuʼn atzun qe che qʼol tajlal twitz Dios» (Heb. 13:7, 17).
QO XIMEN KYIʼJ XJAL TOJ PAKBʼABʼIL
13. ¿Tiʼ xnaqʼtzbʼil in nel qiʼn tiʼj tmod Jesús kubʼ tyekʼin kyukʼil xjal?
13 Tqʼama aj sanjel Isaías jlu tiʼj Jesús: «Mlay kubʼ ttoqin jumajx jun ajlaj potzʼjni ex mlay kubʼ tyuptzʼaʼn aju mech noq in qusin» (Is. 42:3). Ok tkʼujlaʼn Jesús qe xjal ex ximen kyiʼj. El tnikʼ kyiʼj qeju ik kyten ik tzeʼn jun ajlal chʼixtoq tkubʼ toqj moqa ik tzeʼn jun kandil chʼixtoq tkubʼ yupj. Tuʼntzunju, ximen kyiʼj, ten tbʼanel tmod kyukʼil ex ten tpasens. Axpe ikx kyajtoq kʼwaʼl tuʼn kyten tukʼil (Mar. 10:14). Ax tok, mlay tzʼel qnikʼ ex mlay chex qxnaqʼtzaʼn xjal ik tzeʼn bʼant tuʼn Jesús. Pero jaku bʼant ex il tiʼj tuʼn qximen kyiʼj xjal in qo pakbʼan kye. Qo xnaqʼtzan tiʼj tzeʼn jaku qo onin kyiʼj tukʼilju tzeʼn qo yolin, toj alkye or in bʼant quʼn ex jteʼ ambʼil in qo yolin.
14. ¿Tiquʼn nim toklen tuʼn tok qxqʼuqin aju alkye tten in qo yolin kyukʼil xjal?
14 Alkye tten qo yolil kyukʼil xjal. Toj ambʼil jaʼlo, nim xjal in kubʼ kynaʼn qa in nok bʼinchaʼn nya bʼaʼn kyiʼj ex qa kyjunalx ateʼ tuʼn kypaj nejenel kyoj kʼaẍjel, qe aj kawil ex qe nejenel kyoj okslabʼil, tuʼnju in che sbʼun kyiʼj xjal (Mat. 9:36). Aju in tzaj tuʼn jlu in kubʼ kynaʼn qa mintiʼ jun qʼuqbʼil kykʼuʼj. Tuʼntzunju, bʼaʼn tuʼn tkubʼ qyekʼin tukʼil qyol ex tqʼajqʼajel qwiʼ qa tbʼanel qmod ex qa in qo ximen kyiʼj txqantl. Nim maj in qo ok bʼiʼn kyuʼn xjal tuʼnju in nok qqʼoʼn kyoklen ex in qo ximen kyiʼj ex nya oʼkx tuʼnju at qojtzqibʼil tiʼj Tyol Dios moqa in xi qchikʼbʼaʼn tkyaqil toj tumel kye.
15. ¿Alkyeqe tiʼchaq jaku bʼant quʼn tuʼntzun tkubʼ qyekʼin qa in qo ximen kyiʼj xjal toj pakbʼabʼil?
15 At nim tumel tzeʼn jaku kubʼ qyekʼin qa in qo ximen kyiʼj xjal jatumel in qo pakbʼaʼn. Jun techel, in che ajbʼen xjel quʼn aj qyolin kyukʼil xjal, noqtzun tuʼnj, il tiʼj tuʼn t-xi qqanin xjel toj tumel ex tukʼil tbʼanel qmod. Ajbʼen jun precursor toj jun lugar jatumel mintiʼxix in che yolin xjal. Tuʼntzunju, el tnikʼ tiʼj qa mlaytoq t-xi tqanin jun xjel kye xjal aju mintiʼ ojtzqiʼn tzaqʼwebʼil kyuʼn tuʼnju jakutoq kubʼ kynaʼn nya bʼaʼn. Ni jun maj xi tqanin kye alkye tbʼi Dios moqa tiʼ aju Tkawbʼil Dios. Aju bʼant tuʼn, xi tqʼamaʼn kye ik tzeʼn jlu: «O tzeʼl nnikʼe tiʼj toj Xjan Uʼj qa at tbʼi Dios. ¿Jakupe txi nyekʼine teya?». Ax tok, mlay tzʼajbʼen tumel lu quʼn kyoj kykyaqil lugar tuʼnju junxitl junjun tnam ex junxitl tten kyanqʼibʼil xjal. Pero nim toklen tuʼn qximen kyiʼj xjal toj tkyaqil ambʼil ex tuʼn tok qqʼoʼn kyoklen, tuʼn tbʼant jlu quʼn, nim toklen tuʼn tel qnikʼ tiʼj tzeʼn kymod xjal jatumel in qo pakbʼaʼn.
16, 17. a) Qa qaj tuʼn tkubʼ qyekʼin qa in qo ximen kyiʼj xjal, ¿toj alkye ambʼil qo pol kyja? b) Qa qaj tuʼn tkubʼ qyekʼin qa in qo ximen kyiʼj xjal, ¿jniʼ ambʼil qo yolil kyukʼil?
16 Toj alkye ambʼil qo yolil kyukʼil xjal. Aj qpakbʼaʼn ttziyele ja, mintiʼ in che ayon xjal qiʼj tuʼnju mintiʼ otoq tzaj kyqʼoʼn txokbʼil qe. Tuʼntzunju nim toklen tuʼn qxiʼ toj jun or jatumel jaku qo yolin kyukʼil (Mat. 7:12). Jun techel, ¿maspe yaj in che jaw weʼ xjal jatumel in qo pakbʼaʼn aj tkubʼ bʼaj jun seman? Qa a jlu in bʼaj, bʼalo jaku bʼant tuʼn t-xi tzyet tuʼn qpakbʼaʼn toj bʼe ex qa tukʼil jun yekʼbʼil uʼj, moqa jaku qoʼx keʼyil jun xjal otoq qo yolin tukʼil ex ya bʼiʼn quʼn qa otoq tjaw weʼ.
17 Jniʼ ambʼil qo yolil kyukʼil xjal. Mintiʼxix ambʼil kyiʼj xjal ex tuʼntzunju nim toklen tuʼn miʼn tel qiʼn nim ambʼil kyiʼj aj qyolin tnejel maj. Mas bʼaʼn qa noq jun rat ma qo yolin twitzju tuʼn qikʼ tibʼaj ambʼil (1 Cor. 9:20-23). Aj tel kynikʼ xjal tiʼj qa in qo ximen tiʼjju in bʼant kyuʼn, jaku tzʼonin jlu tuʼn qok kybʼiʼn juntl maj. Qa in nok tilil quʼn tuʼn tten qmod ik tzeʼn in tqʼoʼn xewbʼaj xjan, qo aqʼunal junx tukʼil Dios. Axpe ikx jaku qo ajbʼen tuʼn Qman Jehová tuʼn tel tnikʼ jun xjal tiʼj axix tok (1 Cor. 3:6, 7, 9).
18. ¿Alkyeqe kʼiwlabʼil tzul qkʼamoʼn qa ma qo ximen kyiʼj txqantl?
18 Ik tzeʼn ma tzʼel qnikʼ tiʼj, bʼaʼn tuʼn tok tilil quʼn tuʼn qximen kyiʼj toj qja, kyiʼj erman ex kyiʼj xjal toj pakbʼabʼil. Qa ma bʼant jlu quʼn, tzul qkʼamoʼn nim kʼiwlabʼil jaʼlo ex toj ambʼil tzul. In tzaj tqʼamaʼn Salmo 41:1 ex 2 jlu: «At tzalajbʼil teju xjal in ximan kyiʼj qeju mintiʼ kyipun ex kyiʼj qe mebʼa; porke ok kletel tuʼn Qman tuj tqʼijlalil mya bʼaʼn». Nya oʼkxju, ax ikx «ktzalajel twitz txʼotxʼ».
